Aşgabat, 4-nji iýun (TDH). Şu gün hormatly Prezidentimiz Serdar Berdimuhamedow sanly ulgam arkaly Ministrler Kabinetiniň mejlisini geçirdi. Onda şu ýylyň bäş aýynda ýurdumyzda alnyp barlan işleriň jemleri jemlenildi.

Ilki bilen, Mejlisiň Başlygy D.Gulmanowa çykyş edip, milli kanunçylygy döwrüň talaplaryna laýyk getirmegiň çäklerinde alnyp barylýan işler barada maglumat berdi. Bellenilişi ýaly, ýurdumyzda amala aşyrylýan durmuş-ykdysady özgertmeleriň hukuk esaslaryny pugtalandyrmak maksady bilen, şu ýylyň ýanwar — maý aýlarynda Türkmenistanyň Kanunlarynyň 8-si kabul edildi. Şolaryň hatarynda ýurdumyzyň kazyýet edaralarynyň işini kämilleşdirmek we Ýük markalary hakynda halkara Konwensiýasyna degişli Teswirnama goşulmak bilen bagly kanunlar bar. Şunuň bilen birlikde, Jenaýat, Arbitraž, Raýat we Jenaýat iş ýörediş, maşgala, zähmet gatnaşyklary, salgytlar, ýubileý medaly, administratiw önümçilik, awtomobil ulagy, migrasiýa bilen baglanyşykly hereket edýän kanunlara degişli üýtgetmeler we goşmaçalar girizildi. Mundan başga-da, Mejlisiň kararlarynyň 10-sy kabul edildi.

Häzirki wagtda adam hukuklaryny we azatlyklaryny hem-de kanuny bähbitlerini goramak, saýlawçylaryň bitewi döwlet sanawyny döretmek, ylmy-intellektual eýeçiligi ösdürmek, wirtual aktiwler, Türkmenistanyň Bitaraplygynyň 30 ýyllygy mynasybetli ýubileý medalyny döretmek bilen baglanyşykly täze Kanunlaryň taslamalaryny taýýarlamak, şeýle hem hereket edýän birnäçe Kanunlary kämilleşdirmek boýunça işler alnyp barylýar.

Ýylyň başyndan bäri daşary ýurt döwletleriniň Türkmenistandaky Adatdan daşary we Doly ygtyýarly ilçilerinden ynanç hatlarynyň 6-sy kabul edildi. Mundan başga-da, Mejlisde dünýä döwletleriniň parlamentleriniň, ýurdumyzdaky daşary ýurt wekilhanalarynyň hem-de halkara guramalaryň wekilleri bilen ikitaraplaýyn hyzmatdaşlyk meselelerini ara alyp maslahatlaşmak boýunça duşuşyklaryň 30-sy geçirildi.

Mejlisiň deputatlary we hünärmenleri kanun çykaryjylyk işini kämilleşdirmek meseleleri boýunça ýurdumyzyň degişli döwlet edaralarynyň halkara guramalar bilen bilelikde guran okuw maslahatlarynyň 48-sine gatnaşdylar. Halkara tejribäni öwrenmek maksady bilen, milli parlamentiň wekilleriniň daşary ýurtlara iş saparlarynyň 17-si amala aşyryldy.

Hormatly Prezidentimiz Serdar Berdimuhamedow döwletimiziň alyp barýan netijeli syýasatynyň, halkymyzyň hal-ýagdaýyny has-da gowulandyrmagyň kabul edilýän Kanunlarda öz beýanyny tapmalydygyny belledi. Şunuň bilen baglylykda, döwlet Baştutanymyz döwrüň talap edýän täze Kanunlaryny işläp taýýarlamak işlerini dowam etmegiň möhümdigine ünsi çekdi.

Ministrler Kabinetiniň Başlygynyň orunbasary H.Geldimyradow şu ýylyň ýanwar — maý aýlarynda gazanylan makroykdysady görkezijiler barada hasabat berdi. Bellenilişi ýaly, durmuşa geçirilen toplumlaýyn çäreleriň netijesinde, milli ykdysadyýetimiziň ähli pudaklarynyň durnukly ösüşi üpjün edildi we ilatymyzyň ýaşaýyş-durmuş derejesi has-da ýokarlandy. Hasabat döwründe jemi içerki önüm 6,3 göterim artdy, şol sanda ösüş depgini senagat pudagynda 0,8; gurluşykda 4,7; ulag we aragatnaşyk pudagynda 10,8; söwdada 9,9; oba hojalygynda 4 we hyzmatlar ulgamynda 8,6 göterime deň boldy.

2024-nji ýylyň degişli döwri bilen deňeşdirilende, jemi öndürilen önümiň möçberi 9,7 göterim artdy. Ykdysadyýetiň pudaklarynda oňyn önümçilik görkezijileri gazanyldy.

Şu ýylyň bäş aýynda, geçen ýylyň degişli döwri bilen deňeşdirilende, bölek satuw haryt dolanyşygy 12,5; daşary söwda dolanyşygy 5,4 göterim ýokarlandy.

Hasabat döwründe Döwlet býujetiniň girdeji bölegi 101,2; çykdajy bölegi 97,6 göterim ýerine ýetirildi. Ýurdumyzyň iri we orta kärhanalarynda ortaça aýlyk zähmet haky, 2024-nji ýylyň degişli döwrüne görä, 11,4 göterim ýokarlandy. Zähmet haklary, pensiýalar, döwlet kömek pullary we talyp haklary öz wagtynda maliýeleşdirildi. Maliýeleşdirmegiň ähli çeşmeleriniň hasabyna özleşdirilen düýpli maýa goýumlaryň möçberi, geçen ýylyň degişli döwri bilen deňeşdirilende, 16,3 göterim artdy.

Şeýle hem Oba milli maksatnamasynyň ýerine ýetirilişi barada hasabat berildi.

Hormatly Prezidentimiz Serdar Berdimuhamedow hasabaty diňläp, ykdysadyýetiň durnukly ösüşini üpjün etmek, jemi içerki önümiň ösüş depginini ýylyň ahyryna çenli bellenen derejede saklamak üçin zerur çäreleri görmegiň wajypdygyny bellemek bilen, wise-premýere ýurdumyzy ösdürmek boýunça kabul edilen döwlet maksatnamalarynyň ýerine ýetirilişini berk gözegçilikde saklamagy tabşyrdy.

Soňra Ministrler Kabinetiniň Başlygynyň orunbasary B.Amanow gözegçilik edýän pudaklarynda 2025-nji ýylyň ýanwar — maý aýlarynda ýerine ýetirilen işleriň netijeleri barada hasabat berdi.

Hasabat döwründe “Türkmennebit” döwlet konserni tarapyndan nebiti çykarmagyň meýilnamasy 109 göterim ýerine ýetirildi.

Bellenilişi ýaly, nebiti gaýtadan işlemegiň meýilnamasy 108; benzin öndürmegiň meýilnamasy 102,8; dizel ýangyjyny öndürmegiň meýilnamasy 101,2; çalgy ýaglaryny öndürmegiň meýilnamasy 121,1 göterim berjaý edildi. Suwuklandyrylan gazy öndürmekde 102,2 göterim ösüş depgini üpjün edildi.

Şeýle hem hasabat döwründe tebigy we ugurdaş gazy çykarmagyň meýilnamasy 102,5 göterim ýerine ýetirildi.

Hormatly Prezidentimiz Serdar Berdimuhamedow hasabaty diňläp, nebitgaz toplumynyň kuwwatyny yzygiderli ýokarlandyrmagyň, munuň üçin önümçilik işini yzygiderli döwrebaplaşdyrmagyň, häzirki zaman tehnologiýalaryny giňden ornaşdyrmagy dowam etmegiň möhümdigine ünsi çekdi. Şunuň bilen baglylykda, döwlet Baştutanymyz wise-premýere ýurdumyzda nebitiň we tebigy gazyň çykarylyşyny artdyrmak boýunça alnyp barylýan işleri gözegçilikde saklamagy tabşyrdy.

Ministrler Kabinetiniň Başlygynyň orunbasary T.Atahallyýew oba hojalyk pudagynda şu ýylyň ýanwar — maý aýlarynda ýerine ýetirilen işleriň netijeleri hem-de welaýatlarda alnyp barylýan möwsümleýin oba hojalyk işleri barada hasabat berdi. Bellenilişi ýaly, oba hojalyk pudagy boýunça önümçiligiň ösüş depgini, geçen ýylyň degişli döwri bilen deňeşdirilende, 113 göterime deň boldy. Bu görkeziji Oba hojalyk ministrligi boýunça 100,7; Daşky gurşawy goramak ministrligi boýunça 100; Suw hojalygy baradaky döwlet komiteti boýunça 140,2; “Türkmenpagta” döwlet konserni boýunça 121,6; “Türkmengallaönümleri” döwlet birleşigi boýunça 108,4; “Türkmenobahyzmat” döwlet birleşigi boýunça 100,8; Azyk senagaty döwlet birleşigi boýunça 103,3; Maldarçylyk we guşçulyk senagaty döwlet birleşigi boýunça 101,1 hem-de “Türkmen atlary” döwlet birleşigi boýunça 101 göterime deň boldy.

Hasabat döwründe oba hojalyk pudagy boýunça maýa goýum serişdelerini özleşdirmegiň meýilnamasy 311,8 göterim ýerine ýetirildi.

Şeýle hem wise-premýer häzirki wagtda alnyp barylýan möwsümleýin oba hojalyk işleri barada aýtdy. Bellenilişi ýaly, şu gün ussat daýhanlaryň, tejribeli hünärmenleriň, alymlaryň we mehanizatorlaryň gatnaşmagynda tejribe maslahatlary geçirilip, hormatly ýaşulularyň gatnaşmagynda Ahal, Lebap we Mary welaýatlarynda bugdaý oragyna başlanyldy. Balkan we Daşoguz welaýatlarynda bolsa orak möwsümine 11-nji iýunda başlamak boýunça degişli taýýarlyk işleri alnyp barylýar.

Şunuň bilen bir hatarda, welaýatlaryň gowaça, ýeralma, gök-bakja we beýleki oba hojalyk ekinleri ekilen ýerlerinde agrotehnikanyň kadalaryna laýyklykda ideg etmek, ýetişdirilen gök ekinleriň hasylyny ýygnap almak boýunça degişli işler geçirilýär.

Şeýle hem wise-premýer döwlet Baştutanymyza ussat pileçilerimiz tarapyndan ýurdumyz boýunça 2 müň 100 tonnadan gowrak pile öndürilip, bu ugurda bellenen şertnamalaýyn borçnamanyň üstünlikli berjaý edilendigi baradaky hoş habary aýtdy.

Hormatly Prezidentimiz Serdar Berdimuhamedow hasabaty diňläp, önümçilik kuwwatyny doly peýdalanmagyň, ekinleriň hasyllylygyny ýokarlandyrmagyň oba hojalyk pudagynyň esasy wezipeleri bolup durýandygyny, şunuň bilen baglylykda, bu ugurda alnyp barylýan işleri netijeli dowam etmegiň, ekin meýdanlarynda oba hojalyk işlerini öz wagtynda geçirmegiň möhümdigini nygtady.

Döwlet Baştutanymyz bugdaý oragynyň hem ýetip gelendigini aýdyp, wise-premýere hasyly ýitgisiz ýygnap almak işlerine berk gözegçilik etmegi tabşyrdy.

Soňra hormatly Prezidentimiz Serdar Berdimuhamedow Ministrler Kabinetiniň agzalaryna ýüzlenip, zähmetsöýer pileçilerimiziň Watan harmanyna 2100 tonnadan gowrak pile tabşyryp, şu ýylky şertnamalaýyn borçnamalaryny üstünlikli ýerine ýetirendiklerini aýtdy. Döwlet Baştutanymyz ussat pileçileri bu zähmet üstünligi bilen tüýs ýürekden gutlady.

Ministrler Kabinetiniň Başlygynyň orunbasary B.Annamämmedow gurluşyk we senagat toplumynda şu ýylyň bäş aýynda ýerine ýetirilen işleriň netijeleri barada hasabat berdi. Bellenilişi ýaly, hasabat döwründe toplum tarapyndan öndürilen önümleriň we ýerine ýetirilen işleriň meýilnamasy 109 göterim berjaý edildi.

Gurluşyk we binagärlik ministrligi boýunça öndürilen önümleriň, ýerine ýetirilen işleriň we hyzmatlaryň meýilnamasy 113,4 göterim amal edildi.

Senagat we gurluşyk önümçiligi ministrligi tarapyndan öndürilen önümleriň, ýerine ýetirilen işleriň we hyzmatlaryň meýilnamasy 114,8 göterime deň boldy.

Hasabat döwründe Energetika ministrligi tarapyndan önümleri öndürmegiň hem-de amala aşyrylan işleriň we hyzmatlaryň meýilnamasy 108,8 göterim berjaý edildi. “Türkmenhimiýa” döwlet konserni boýunça bu görkeziji 105,6 göterime barabar boldy.

Hasabat döwründe Awtomobil ýollarynyň gurluşygyny dolandyrmak baradaky döwlet agentligi tarapyndan ýerine ýetirilen işleriň meýilnamasy 104,8 göterim, Aşgabat şäheriniň häkimligi boýunça ýerine ýetirilen işleriň meýilnamasy 111,8 göterim berjaý edildi.

Hormatly Prezidentimiz Serdar Berdimuhamedow hasabaty diňläp, gurluşyk we senagat toplumynyň, himiýa pudagynyň önümçilik kärhanalarynyň doly kuwwatynda işledilmegini gazanmagyň möhümdigini belledi.

Döwlet Baştutanymyz wise-premýere energetika pudagynyň kuwwatyny yzygiderli artdyrmagy, şeýle hem täze önümçilik desgalaryny gurmak we olary innowasion tehnologiýalar bilen üpjün etmek boýunça alnyp barylýan işleri dowam etmegi tabşyrdy.

Soňra Ministrler Kabinetiniň Başlygynyň orunbasary N.Atagulyýew gözegçilik edýän ministrliklerinde we pudaklaýyn dolandyryş edaralarynda, şeýle hem telekeçilik ulgamynda şu ýylyň ýanwar — maý aýlarynda ýerine ýetirilen işleriň netijeleri barada hasabat berdi.

Hasabat döwründe Söwda we daşary ykdysady aragatnaşyklar ministrligi boýunça söwda dolanyşygynyň ösüş depgini, geçen ýylyň degişli döwri bilen deňeşdirilende, 123,1 göterime, öndürilen önümleriň ösüş depgini 100,7 göterime barabar boldy.

Dokma senagaty ministrligi boýunça önüm öndürmegiň ösüş depgini 108 göterim üpjün edildi. Şol sanda, geçen ýylyň degişli döwri bilen deňeşdirilende, önümçiligiň ösüşi nah ýüplük boýunça 130,4; nah matalarda 136,7; gön önümleri babatda 124,5 göterime deň boldy.

“Türkmenhaly” döwlet birleşigi boýunça önüm öndürmegiň meýilnamasy 100,6 göterim ýerine ýetirildi.

Döwlet haryt-çig mal biržasy tarapyndan hasabat döwründe 124 birža söwdasy geçirilip, olarda 11 müň 714 şertnama hasaba alyndy.

Şu ýylyň ýanwar — maý aýlarynda Söwda-senagat edarasy boýunça ýerine ýetirilen işleriň ösüş depgini 103 göterime barabar boldy.

Senagatçylar we telekeçiler birleşmesi boýunça şu ýylyň bäş aýynda oba hojalyk we azyk önümlerini öndürmegiň ösüş depgini 107,2; senagat önümlerini öndürmegiň ösüş depgini 108,2 göterime deň boldy.

Hormatly Prezidentimiz Serdar Berdimuhamedow hasabaty diňläp, ýurdumyzyň bazarlarynda we söwda nokatlarynda azyk önümleriniň hem-de zerur bolan beýleki harytlaryň üpjünçiligini üns merkezinde saklamagyň wajypdygyny belledi. Şunuň bilen baglylykda, döwlet Baştutanymyz wise-premýere öndürilýän önümleriň we ýerine ýetirilýän hyzmatlaryň möçberidir görnüşlerini artdyrmagy, şeýle hem dokma kärhanalarynyň işini döwrebap ýola goýmagy tabşyrdy.

Döwlet Baştutanymyz Ministrler Kabinetiniň agzalaryna ýüzlenip, hasabatdan görnüşi ýaly, geçen bäş aýyň dowamynda dünýäniň köp sanly döwletleri bilen söwda-ykdysady gatnaşyklarda gowy netijeleriň gazanylandygyny kanagatlanma bilen belledi.

Hormatly Prezidentimiz Ykdysady hyzmatdaşlyk boýunça hökümetara türkmen-rus toparynyň türkmen böleginiň täze düzümi bilen bagly degişli resminama gol çekdi.

Ministrler Kabinetiniň Başlygynyň orunbasary B.Seýidowa gözegçilik edýän ulgamlarynda 2025-nji ýylyň ýanwar — maý aýlarynda alnyp barlan işleriň netijeleri barada hasabat berdi. Bellenilişi ýaly, hasabat döwründe Türkmenistanyň Garaşsyzlygynyň 34 ýyllyk baýramy mynasybetli dabaralary we çäreleri ýokary derejede geçirmek boýunça guramaçylyk toparynyň birinji mejlisi, dutarçy bagşy-sazandalaryň arasynda yglan edilen “Çalsana, bagşy!” atly bäsleşigiň Aşgabat we Arkadag şäherleri, Ahal hem-de Balkan welaýatlary boýunça jemleýji tapgyrlary, şeýle hem “Parahatçylyk sazy, dostluk, doganlyk sazy” atly aýdym-sazly festiwal guramaçylykly geçirildi.

Ýurdumyzda köp sanly halkara medeni çäreler, şol sanda sergiler, konsertler, festiwal guraldy. Medeniýet, sungat we döredijilik işgärleri daşary ýurtlarda geçirilen halkara medeni çärelere gatnaşdylar. Türkmen wekiliýeti Magtymguly Pyragynyň we Döwletmämmet Azadynyň aramgählerine zyýarat etmek maksady bilen, Eýran Yslam Respublikasynda saparda boldy.

Şeýle hem kitaphanalar, muzeýler, Türkmen döwlet neşirýat gullugy, Oguz han adyndaky «Türkmenfilm» birleşigi, köpçülikleýin habar beriş serişdeleri tarapyndan ýerine ýetirilen işler barada hasabat berildi.

Hormatly Prezidentimiz Serdar Berdimuhamedow hasabaty diňläp, wise-premýere tomusky dynç alyş möwsüminiň başlanmagy bilen baglylykda, medeni edaralarda we teatrlarda çagalar üçin gyzykly çäreleri guramagy, milli mirasymyzy hemmetaraplaýyn öwrenmek we ýaşlaryň arasynda wagyz etmek boýunça zerur işleri alyp barmagy, taryhy-medeni ýadygärliklerimizi aýawly saklamak boýunça zerur işleri yzygiderli geçirip durmagy tabşyrdy.

Soňra Ministrler Kabinetiniň Başlygynyň orunbasary B.Orazdurdyýewa gözegçilik edýän ulgamlarynda şu ýylyň ýanwar — maý aýlarynda alnyp barlan işleriň netijeleri barada hasabat berdi.

Hasabat döwründe ýaş nesliň döwrebap bilim almagy ugrunda toplumlaýyn işler amala aşyryldy, okatmagyň öňdebaryjy usullary bilim işinde giňden ulanyldy, okuw kitaplarydyr gollanmalar neşir edildi. Mekdep okuwçylary, talyp ýaşlar halkara ders we internet bäsleşiklerinde jemi 711 medala we dürli derejeli diplomlara mynasyp boldular. Ýurdumyzda umumybilim berýän orta mekdepleriň uçurymlarynyň gatnaşmagynda “Soňky jaň” dabaralary guramaçylykly geçirildi.

Şu ýylyň bäş aýynda ylym ulgamynyň kämilleşdirilmegine, innowasion tehnologiýalaryň önümçilige ornaşdyrylmagyna we halkara hyzmatdaşlygyň giňeldilmegine gönükdirilen işler dowam etdirildi. Aspirantura, doktorantura hem-de alymlyk derejelerine dalaşgärlige jemi 114 adam kabul edildi.

Hasabat döwründe öňüni alyş-bejeriş işleriniň öňdebaryjy usullaryny amaly lukmançylyga ornaşdyrmak boýunça işler alnyp baryldy. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň serişdeleriniň hasabyna näsag çagalara operasiýalar we bejergiler amala aşyryldy. Saglygy goraýyş boýunça XII Türkmen-german forumy, BMG-niň Çagalar gaznasy bilen bilelikde Immunizasiýa hepdeligi, Daniýa Patyşalygynyň Kopengagen şäherinde Bütindünýä Saglygy Goraýyş Guramasynyň Ýewropa sebiti boýunça edarasynda Türkmenistanyň güni geçirildi.

Bedenterbiýäni we sporty ösdürmek boýunça hem netijeli işler alnyp baryldy. Şu ýylyň ýanwar — maý aýlarynda türgenlerimiz halkara ýaryşlara gatnaşyp, jemi 349 medala mynasyp boldular. Bütindünýä saglyk güni mynasybetli köpçülikleýin welosipedli ýörişler, bedenterbiýe-sport çäreleri, Aşgabat şäherindäki Olimpiýa şäherçesiniň Başa-baş söweş sungaty sport toplumynda sportuň milli we guşakly alyş göreşi boýunça halkara ýaryş guramaçylykly geçirildi.

Hormatly Prezidentimiz Serdar Berdimuhamedow hasabaty diňläp, ýurdumyzyň bilim, ylym, saglygy goraýyş, bedenterbiýe we sport ulgamlarynda netijeli işleri alyp barmagyň, tomus möwsüminiň başlanmagy bilen, çagalaryň we ýetginjekleriň boş wagtlaryny gyzykly geçirmekleri üçin dynç alyş çärelerini guramagyň möhümdigine ünsi çekdi.

Saglygy goraýyş ulgamynyň işini yzygiderli kämilleşdirmek, ýaşlary bedenterbiýe we köpçülikleýin sport bilen meşgullanmaga giňden çekmek üçin netijeli işleri alyp barmak zerurdyr diýip, döwlet Baştutanymyz aýtdy we wise-premýere bu babatda birnäçe anyk tabşyryklary berdi.

Soňra Ministrler Kabinetiniň Başlygynyň orunbasary, daşary işler ministri R.Meredowa söz berildi. Ol, ilki bilen, hormatly Prezidentimizi şu ýylyň 1-2-nji iýunynda Mongoliýa döwlet saparynyň ýokary derejede geçmegi bilen tüýs ýürekden gutlady. Bellenilişi ýaly, Ulan-Bator şäherinde ýokary derejede geçirilen gepleşikleriň barşynda köpugurly ikitaraplaýyn hyzmatdaşlygy işjeňleşdirmegiň giň meselelerine garaldy.

Syýasy-diplomatik ulgamda netijeli türkmen-mongol dialogy barada aýdylanda, taraplaryň halkara giňişlikde, Birleşen Milletler Guramasynyň çäklerinde mundan beýläk-de özara gatnaşyklara ygrarlydygy tassyklanyldy. Şunda ählumumy parahatçylygy we howpsuzlygy üpjün etmek ýaly möhüm meselelere aýratyn üns berildi. Şunuň bilen baglylykda, BMG-niň Baş Assambleýasynyň 80-nji mejlisiniň çäginde bilelikdäki işi dowam etmek göz öňünde tutulýar.

Söwda-ykdysady hyzmatdaşlygy giňeltmek babatda Ulan-Bator şäherinde geçirilen Türkmen-mongol işewürler forumynyň netijeli bolandygy bellenildi. Onuň barşynda maýa goýum işi, ulag we logistika, aragatnaşyk, dokma senagaty, oba hojalygy, işewür gatnaşyklar hyzmatdaşlygyň ileri tutulýan ugurlarynyň hatarynda kesgitlenildi, şeýle hem ikitaraplaýyn resminamalara gol çekildi.

Medeni-ynsanperwer ulgamda türkmen-mongol gatnaşyklaryna uly üns berildi. Bellenilişi ýaly, saparyň çäklerinde Türkmenistanyň milli amaly-haşam sungatynyň eserleriniň sergisi, türkmen halysynyň sergi-ýarmarkasy hem-de iki ýurduň sungat ussatlarynyň bilelikdäki konserti guraldy. Şunuň bilen bir hatarda, bilim we ylym ugry boýunça hyzmatdaşlygyň giň meselelerine garaldy, degişli ylalaşyklara we ähtnamalara gol çekildi.

Hormatly Prezidentimiziň Mongoliýa amala aşyran döwlet saparynyň netijeleri boýunça jemi 14 resminama gol çekildi.

Ministrler Kabinetiniň Başlygynyň orunbasary, daşary işler ministri soňra şu ýylyň ýanwar — maý aýlarynda ministrlik tarapyndan ýerine ýetirilen işleriň netijeleri barada hasabat berdi.

Bitarap Watanymyzyň daşary syýasy ugruny yzygiderli durmuşa geçirmek, ikitaraplaýyn we köptaraplaýyn görnüşde dostlukly gatnaşyklary hem-de netijeli hyzmatdaşlygy mundan beýläk-de ösdürmek, döwlet Baştutanymyzyň tabşyryklaryny ýerine ýetirmek we bu ugurda öňde goýlan wezipeleri çözmek maksady bilen, hasabat döwründe degişli işler geçirildi.

Bellenilişi ýaly, hormatly Prezidentimiz ýylyň başyndan bäri “Merkezi Aziýa — Ýewropa Bileleşigi” görnüşindäki birinji sammite gatnaşmak üçin Özbegistan Respublikasyna, Russiýa Federasiýasyna, “Merkezi Aziýa — Italiýa” görnüşindäki birinji sammite gatnaşmak üçin Gazagystan Respublikasyna iş saparlaryny, Ýaponiýa sapary, şeýle hem Mongoliýa döwlet saparyny amala aşyrdy.

Hasabat döwründe türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Monako Knýazlygynda saparda boldy, şeýle hem Gazagystan Respublikasyna, Gyrgyz Respublikasyna we Özbegistan Respublikasyna dostlukly saparlary, Fransiýa Respublikasyna resmi sapary we Russiýa Federasiýasynyň Tatarystan Respublikasyna iş saparyny amala aşyrdy.

Şu ýylyň mart aýynda Gruziýanyň Premýer-ministriniň Türkmenistana resmi sapary boldy. Mundan başga-da, aprel aýynda Ykdysady Hyzmatdaşlyk Guramasynyň Baş sekretary ýurdumyza sapary amala aşyrdy.

Hasabat döwründe daşary ýurt wekiliýetleriniň Türkmenistana, şeýle hem ýurdumyzyň wekiliýetleriniň daşary ýurtlara bolan saparlary daşary ýurtly hyzmatdaşlar bilen netijeli gatnaşyklaryň okgunly ösýändigine şaýatlyk edýär. Sanly ulgam arkaly dürli derejedäki duşuşyklaryň 293-si geçirildi. Şeýle hem Türkmenistanda daşary ýurt döwletleriniň we halkara guramalaryň wekilleri bilen resmi gepleşikler hem-de duşuşyklar guraldy. Ýylyň başyndan bäri ýurdumyzyň halkara gatnaşyklarynyň şertnamalaýyn-hukuk binýadynyň üsti 73 resminama bilen ýetirildi.

Daşary syýasat edaralarynyň ugry boýunça ikitaraplaýyn duşuşyklar, Daşary işler ministrlikleriniň arasyndaky geňeşmeler yzygiderli geçirilýär. Şeýle hem ilçihanalar arkaly diplomatik gatnaşyklary pugtalandyrmak we giňeltmek boýunça yzygiderli işler alnyp barylýar. Munuň özi Türkmenistanyň daşary syýasatynyň möhüm ugurlarynyň biri bolup durýar.

Hormatly Prezidentimiz Serdar Berdimuhamedow hasabaty diňläp, dünýä ýurtlary bilen özara bähbitli hyzmatdaşlygy yzygiderli ösdürmegiň we berkitmegiň Garaşsyz, hemişelik Bitarap Türkmenistanyň daşary syýasatynyň esasy ugurlarynyň biri bolup durýandygyny belledi.

Döwlet Baştutanymyz şeýle hem halkara guramalar bilen özara bähbitli we uzak möhletli gatnaşyklary pugtalandyrmagy üns merkezinde saklamagyň wajypdygyny nygtap, wise-premýer, daşary işler ministrine bu ugurdaky hyzmatdaşlygy dowam etmegi tabşyrdy.

Ministrler Kabinetiniň ýanyndaky Ulag we kommunikasiýalar agentliginiň Baş direktory M.Çakyýew gözegçilik edýän ulgamlarynda şu ýylyň ýanwar — maý aýlarynda alnyp barlan işleriň netijeleri barada hasabat berdi. Hasabat döwründe bu toplum boýunça ýerine ýetirilen işleriň we hyzmatlaryň ösüş depgini 115,3 göterime deň boldy.

Awtomobil, demir ýol, howa, deňiz we derýa ulaglary arkaly ýük daşamagyň meýilnamasy 103,4; ýolagçy gatnatmagyň meýilnamasy 102 göterim ýerine ýetirildi.

Şu ýylyň bäş aýynda “Türkmendemirýollary” agentligi boýunça ýerine ýetirilen hyzmatlaryň ösüş depgini 104,6; “Türkmenawtoulaglary” agentligi boýunça 110; “Türkmenhowaýollary” agentligi boýunça 120,5; “Türkmendeňizderýaýollary” agentligi boýunça 113,4; “Türkmenaragatnaşyk” agentligi boýunça bolsa 120,8 göterime deň boldy.

Şeýle hem “Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasyny” durmuşa geçirmegiň çäklerinde ýerine ýetirilen işler barada aýdyldy.

Hormatly Prezidentimiz Serdar Berdimuhamedow hasabaty diňläp, ýolagçy we ýük gatnawlaryny artdyrmak, ýolagçy gatnatmak boýunça hyzmatlaryň ýokary hilini we howpsuzlygyny üpjün etmek boýunça netijeli işleri alyp barmagyň, halkara ulag-üstaşyr gatnawlary üçin amatly şertleri döretmek arkaly ýurdumyzyň logistika mümkinçiliklerinden doly peýdalanmagyň, olary mundan beýläk-de işjeň ösdürmegiň möhümdigini belledi we agentligiň ýolbaşçysyna bu ugurda birnäçe anyk tabşyryklary berdi.

Soňra hormatly Prezidentimiz Serdar Berdimuhamedow Ministrler Kabinetiniň agzalaryna ýüzlenip: “Garaşsyz ýurdumyzda şu ýylyň bäş aýynda ýerine ýetirilen işleriň netijeleri kabul edilen maksatnamalaryň üstünlikli durmuşa geçirilýändigini görkezýär” diýip belledi.

Jemi içerki önümiň ösüşi hasabat döwründe 6,3 göterim derejede durnukly saklanyp gelýär. Ýurdumyzda kabul edilen ähli maksatnamalar üstünlikli durmuşa geçirilýär. Iri senagat we durmuş maksatly desgalaryň, şol sanda täze şäherçeleriň, ýaşaýyş jaýlarynyň, mekdepleriň, çagalar baglarynyň, beýleki binalaryň we desgalaryň gurluşygy netijeli dowam edýär diýip, döwlet Baştutanymyz aýtdy.

“Biziň esasy wezipämiz halkymyzyň ýaşaýyş-durmuş derejesini has-da gowulandyrmakdan ybaratdyr” diýip, hormatly Prezidentimiz nygtady we şoňa görä-de, ýurdumyzy 2022 — 2028-nji ýyllarda durmuş-ykdysady taýdan ösdürmegiň maksatnamasynyň amala aşyrylyşyny hemişe berk gözegçilikde saklamagyň möhümdigine ünsi çekdi.

Döwlet Baştutanymyz Ministrler Kabinetiniň agzalaryna ýüzlenip, ýurdumyzda üç günläp, ýagny 6-njy, 7-nji, 8-nji iýunda Gurban baýramynyň bellenilip geçiljekdigini, bu mukaddes baýramyň gadymdan gelýän medeni-ruhy mirasymyzy, däp-dessurlarymyzy özünde jemleýändigini aýtdy.

“Gurbanlyk günleri berýän sadakalaryňyz kabul bolsun!” diýip, hormatly Prezidentimiz Serdar Berdimuhamedow aýtdy we pursatdan peýdalanyp, mejlise gatnaşyjylary, mähriban halkymyzy mukaddes Gurban baýramy bilen tüýs ýürekden gutlady.

Mejlise gatnaşyjylar hem döwlet Baştutanymyzy we Gahryman Arkadagymyzy mukaddes Gurban baýramy bilen tüýs ýürekden gutladylar.

Hormatly Prezidentimiz Serdar Berdimuhamedow Ministrler Kabinetiniň sanly ulgam arkaly geçirilen mejlisini jemläp, oňa gatnaşanlara berk jan saglygyny, maşgala abadançylygyny, berkarar Watanymyzyň gülläp ösmegi ugrunda alyp barýan jogapkärli işlerinde uly üstünlikleri arzuw etdi.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow türkmen gudratynyň aýdyň nyşany hökmünde ykrar edilen we häzirki zaman binagärlik tejribesiniň nusgasyna öwrülen Arkadag şäherine iş saparyny amala aşyrdy. Bu ýerde Gahryman Arkadagymyza täze şäheriň gurluşygynyň ikinji tapgyrynda alnyp barylýan işleriň maksatnamasy we gurulmagy meýilleşdirilýän desgalaryň şekil taslamalary görkezildi. Mundan başga-da, Gahryman Arkadagymyz täze şäherde degişli ýolbaşçylaryň gatnaşmagynda iş maslahatyny geçirdi.

Häzirki döwürde ýurdumyzyň ähli künjeklerinde bolşy ýaly, Gahryman Arkadagymyzyň başlangyjyndan we yzygiderli tagallasyndan binýat bolan täze şäheriň durmuşynda taryhy ähmiýeti bolan beýik işler amala aşyrylýar. Häzirki zaman şähergurluşyk maksatnamasynyň üstünlikli durmuşa geçirilmegi ösüşleriň belentliklerine tarap ynamly gadam urýan ýurdumyzyň her bir gününiň taryhy ähmiýeti bolan wakalara beslenmegini şertlendirýär. Täze şäherde ilatyň ýaşaýyş-durmuş derejesiniň ýokarlanmagyny esasy ugur edinýän netijeli işler amala aşyrylýar.

Gahryman Arkadagymyz bu ýerde alnyp barylýan gurluşyk işleri, aýratyn-da, Arkadag şäheriniň metjidiniň gurluşygynda ulanylýan serişdeleri synlap, bu ugurda öňde durýan wezipeleriň üstünlikli ýerine ýetirilmegi ugrunda degişli düzümleriň sazlaşykly işiniň üpjün edilmegi babatda birnäçe görkezmeleri berdi.

Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow we Arkadag şäheriniň häkimi G.Mämmedowa täze şäheriň çäklerinde gurulmagy meýilleşdirilýän desgalar toplumlarynyň çäklerinde oturdylmagy göz öňünde tutulýan şekiller, olaryň özboluşly aýratynlyklary barada hasabat berdiler.

Bellenilişi ýaly, Gahryman Arkadagymyzyň tabşyrygyna laýyklykda, täze şäheriň çäklerinde gurulýan we gurulmagy meýilleşdirilýän desgalaryň abadanlaşdyrylyşyna we olaryň bezeg aýratynlyklarynyň döwrebap talaplara laýyk gelmegine möhüm üns berilýär. Şunda gurluşyk serişdeleriniň hili, berkligi we uzak möhletleýinligi bilen baglanyşykly meseleler yzygiderli gözegçilikde saklanylýar.

Halk Maslahatynyň Başlygy görkezilýän şekil taslamalary we “Ahalteke atlary” şaýolunyň ugrunda oturdylmagy meýilleşdirilýän şekiller, duralgalar, olaryň görnüşleri hem-de ýerleşjek ýerleriniň çyzgylary bilen içgin tanşyp, bu babatda özüniň degerli maslahatlaryny berdi. Şunda täze şäheriň çäklerinde ýerleşdiriljek heýkelleriň, beýleki desgalaryň gözelligi, ykjamlygy we Arkadag şäheriniň derejesine laýyk gelmegi möhüm talap hökmünde kesgitlenendir.

Türkmen halkynyň Milli Lideri bu ýerde “Ahalteke atlary” şaýolunyň gurluşygy, onuň ýanýodalarynyň aýratynlyklary barada aýdyp, ýol ýakasynda oturdyljak bedewleriň şekilleriniň döwrebaplygyna zerur üns berilmelidigini belledi. Şunda halkymyzyň buýsanjyna öwrülen şöhratly ahalteke bedewleriniň heýkelleriniň binýadynyň gelşikli bolmagyna zerur üns berilmelidir.

Gahryman Arkadagymyz hormatly Prezidentimiziň ýurdumyzda ýol-ulag düzümine degişli desgalaryň bina edilmegine, aýratyn-da, häzirki zaman ýollarynyň çekilmegine möhüm ähmiýet berýändigini belledi. Ýurdumyzda ýol gurmak arkaly dünýä ýol çekilýär. Şeýlelik bilen, häzirki zaman ýollary ýurdumyzyň üstaşyr kuwwatlyklaryny artdyryp, sebitiň ýurtlarynyň üçünji bir ýurda geçmegine mümkinçilik döredýär. Bu bolsa häzirki döwrüň möhüm meseleleriniň üstünlikli çözülmeginde ähmiýetlidir. Bu baradaky gürrüňi dowam edip, Türkmenistanyň at gazanan arhitektory Gurbanguly Berdimuhamedow “Ahalteke atlary” şaýolunyň ýakasy bilen çekiljek welosiped ýodasynyň we bedewler üçin niýetlenen ýodanyň talabalaýyk hem-de häzirki zaman görkezijilerine laýyk gelmeginiň wajypdygyny aýtdy. Şunda atly gezelenç üçin niýetlenen ýoda düşeljek çägäniň arassalygyna, hiline zerur üns berilmelidir. Şol bir wagtyň özünde, şaýoluň ugrunda bedewler üçin dynç alyş bassyrmalarynyň we welosipedçilere niýetlenen duralgalaryň amatlylyk derejesine möhüm ähmiýet berilmelidigini belläp, Gahryman Arkadagymyz bu işleriň ýokary derejede amala aşyrylmagyna örän jogapkärçilikli çemeleşmegi tabşyrdy.

Şol bir wagtyň özünde, dürli maksatly desgalaryň milli binagärlik ýörelgelerine, bu künjegiň ekologiýa derejesine zerur üns berilmelidir. Munuň özi ýurdumyzda raýatlar, olaryň oňaýly ýaşaýşy we ýokary derejeli dynç alşy bilen baglanyşykly meseleleriň möhüm orna degişlidiginiň nobatdaky beýanydyr diýip, Halk Maslahatynyň Başlygy belledi we birnäçe görkezmeleri berdi. Täze şäheriň çäklerinde oturdyljak heýkelleriň we beýleki desgalaryň häzirki zaman amatlylyk talabyna laýyk gelmegi bilen bir hatarda, olaryň bezeg aýratynlyklaryna möhüm üns berilmelidir.

Soňra türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazowyň we Arkadag şäheriniň häkimi G.Mämmedowanyň gatnaşmagynda iş maslahatyny geçirdi. Onuň dowamynda Arkadag şäheriniň gurluşygynyň ikinji tapgyrynda bina edilýän desgalarda alnyp barylýan işleriň häzirki ýagdaýyna we gurluşyk işleriniň depginlerini ýokarlandyrmak boýunça işleriň derejesine garaldy.

Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow, ilki bilen, ýakynda hormatly Prezidentimiziň gol çeken resminamasyna laýyklykda, ýurdumyzyň wekilçilikli topary bilen Saud Arabystany Patyşalygynda saparda bolmaga döredilen mümkinçilik üçin hormatly Prezidentimize hem-de Gahryman Arkadagymyza sagbolsun aýtdy. Bellenilişi ýaly, saparyň çäklerinde dostlukly ýurduň Er-Riýad şäherinde degişli düzümleriň ýolbaşçylary bilen gepleşikler geçirilip, gurluşyk ulgamynda özara tejribe alyşmak boýunça degişli ylalaşyklar gazanyldy. Şunda gazanylan ylalaşyklary ýerine ýetirmegiň maksatnamasy işlenip taýýarlanyldy.

D.Orazow şeýle hem täze şäheriň gurluşygynyň ikinji tapgyrynda önümçilik we durmuş maksatly binalaryň gurluşyklary we olaryň dowamynda ýerine ýetirilýän işleriň ýagdaýy, gurluşyk we bezeg serişdeleriniň aýratynlyklary, olaryň hil derejesi barada hasabat berdi.

Gahryman Arkadagymyz ägirt uly geljegi bolan täze şäheriň çäklerinde ýerine ýetirilýän gurluşyk işleriniň depginlerini ýokarlandyrmak meselelerine, aýratyn-da, gurluşyk işlerinde ulanylýan serişdeleriň berkligine, uzak möhletleýinligine we bezeg babatda häzirki zaman talaplaryna laýyk gelmegine zerur üns bermegi tabşyrdy. Şunda binalaryň ýokary hilli we bellenen möhletlerde ulanmaga tabşyrylmagy möhüm talap hökmünde kesgitlenendir.

Iş maslahatynyň dowamynda Arkadag şäheriniň häkimi G.Mämmedowa häzirki döwürde täze şäheriň ýokary amatlyklary özünde jemleýän döwrebap ýaşaýyş jaýlaryna ilaty göçürip getirmek işleriniň talabalaýyk ýagdaýda dowam edýändigi barada hasabat berdi. Şeýle hem hasabatyň çäklerinde Arkadag şäherinde milli senenamamyzda möhüm orun eýeleýän Çagalary goramagyň halkara güni, Bütindünýä welosiped güni, Gurban baýramy we Ylymlar güni ýaly şanly seneleriň hormatyna geçiriljek çäreleriň medeni maksatnamasynyň taýýarlanylandygy barada aýdyldy.

Halk Maslahatynyň Başlygy hasabaty diňläp, Arkadag şäheriniň döwrebap ýaşaýyş jaýlaryna ilaty göçürip getirmek meselelerine örän jogapkärçilikli çemeleşilmelidigini we bu işleriň häzirki döwrüň talabyna laýyk derejede yzygiderli ýerine ýetirilmelidigini belläp, bu babatda häkime birnäçe görkezmeleri berdi.

Ýurdumyzyň durmuşynda möhüm ähmiýeti bolan şanly seneleriň hormatyna guralýan dabaralarda Arkadag şäheriniň hemmetaraplaýyn sazlaşykly ösüşiniň, şäher ilatynyň bagtyýar durmuşynyň we abadançylygynyň öz beýanyny tapmalydygyny belläp, Gahryman Arkadagymyz bu işleriň ýokary guramaçylyk derejesiniň üpjün edilmegi ugrunda zerur tagallalaryň amala aşyrylmalydygyny aýtdy.

Aýratyn-da, baýramçylyk günlerinde şäheriň çäklerinde degişli tertip-düzgüniň üpjün edilmegi möhüm talap hökmünde kesgitlenendir. Şunda Arkadag şäher häkimliginiň hem-de täze şäheriň harby we hukuk goraýjy edaralarynyň bilelikdäki tagallalary ýola goýulmalydyr. Munuň özi kesgitlenen wezipeleriň üstünlikli ýerine ýetirilmeginde aýratyn ähmiýetlidir diýip, Gahryman Arkadagymyz belledi we bu babatda häkime birnäçe anyk görkezmeleri berdi.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow täze şäherde meýilleşdirilen ähli çäreleriň guramaçylykly geçirilmegi we şäheriň okgunly ösüşiniň üpjün edilmegi ugrunda alnyp barylýan işlerde hemmelere üstünlikleri arzuw edip, bu ýerden ugrady.

(TDH)

Aşgabat, 29-njy maý (TDH). Şu gün hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda ýurdumyzyň döwlet durmuşyna degişli birnäçe meselelere seredildi.

Ilki bilen, Mejlisiň Başlygy D.Gulmanowa çykyş edip, alnyp barylýan kanun çykaryjylyk işleri barada maglumat berdi.

Bellenilişi ýaly, häzirki wagtda Mejlisde döredilen iş toparlarynda ýurdumyzy durmuş-ykdysady taýdan ösdürmegiň maksatnamalaryndan we halkara hukugyň umumy ykrar edilen kadalaryndan ugur alnyp, raýat-hukuk gatnaşyklaryny kämilleşdirmek, adam hukuklaryny we azatlyklaryny hem-de kanuny bähbitlerini goramak, saýlaw ulgamyny döwrebaplaşdyrmak, ylmy-intellektual eýeçilik gatnaşyklary, wirtual aktiwler we gümrük meseleleri bilen baglanyşykly Türkmenistanyň Kanunlarynyň taslamalaryny taýýarlamak boýunça işler geçirilýär.

Şol bir wagtda abraýly halkara guramalar hem-de daşary ýurtlaryň parlamentleri bilen hyzmatdaşlyk gatnaşyklary yzygiderli ösdürilýär. Şunuň bilen baglylykda, Litwa Respublikasynyň Türkmenistanda täze bellenilen Adatdan daşary we Doly ygtyýarly ilçisinden ynanç hatynyň kabul edilendigi barada aýdyldy. Şeýle hem garalýan döwürde Saud Arabystany Patyşalygynyň, Ermenistan Respublikasynyň Doly ygtyýarly wekilleri hem-de Türkmen-eýran parlamentara dostluk toparynyň agzalary bilen duşuşyklar geçirildi.

Şeýle hem Türkmenistanyň Mejlisiniň Başlygynyň ýolbaşçylygyndaky wekiliýet Hytaý Halk Respublikasynyň Pekin şäherine iş saparyny amala aşyrdy. Saparyň dowamynda birnäçe ikitaraplaýyn duşuşyklar geçirilip, olaryň dowamynda ýurtlarymyzyň arasyndaky hyzmatdaşlygyň ileri tutulýan ugurlary ara alnyp maslahatlaşyldy. Şunuň bilen baglylykda, milli parlamentiň ýolbaşçysy bu iş saparyny amala aşyrmaga döredilen mümkinçilik üçin hormatly Prezidentimize we Gahryman Arkadagymyza tüýs ýürekden hoşallyk bildirdi.

Hormatly Prezidentimiz Serdar Berdimuhamedow täze kanunlar işlenip taýýarlanylanda döwrüň talap edýän kanun taslamalaryny göz öňünde tutmagyň we şoňa görä-de, kanunlary kämilleşdirmek işlerini mundan beýläk-de dowam etdirmegiň möhümdigini belledi.

Soňra Ministrler Kabinetiniň Başlygynyň orunbasary H.Geldimyradow “Senagat howpsuzlygynyň talaplarynyň berjaý edilişine önümçilik barlagyny guramagyň we amala aşyrmagyň talaplarynyň” taslamasy barada hasabat berdi.

Hasabatda bellenilişi ýaly, bu resminama “Howply önümçilik desgalarynyň senagat howpsuzlygy hakynda” Türkmenistanyň Kanunyna laýyklykda, “Türkmenstandartlary” baş döwlet gullugy tarapyndan degişli ministrlikler we pudaklaýyn dolandyryş edaralary bilen bilelikde işlenip taýýarlanyldy. Şunuň bilen baglylykda, döwlet Baştutanymyzyň garamagyna degişli Kararyň taslamasy hödürlenildi.

Hormatly Prezidentimiz Serdar Berdimuhamedow hasabaty diňläp, ýurdumyzyň senagat desgalarynda howpsuzlyk talaplaryny berjaý etmegiň möhüm ähmiýetini belledi. Şunuň bilen baglylykda, döwlet Baştutanymyz ýurdumyzda hereket edýän önümçilik desgalarynda senagat howpsuzlygynyň berjaý edilişine önümçilik barlaglaryny guramak maksady bilen, bu ugurda taýýarlanylan degişli resminama gol çekip, ony sanly ulgam arkaly wise-premýere iberdi we bu ugurda zerur işleri alyp barmagy tabşyrdy.

Soňra Ministrler Kabinetiniň Başlygynyň orunbasary B.Amanow nebit, nebit önümleri we gazhimiýa önümleri daşary ýurtlara ýüklenip iberilende ýük amallaryny geçirmek boýunça kadalaşdyryjy-gözükdiriji resminamalary kämilleşdirmek hem-de döwrebaplaşdyrmak boýunça alnyp barylýan işler barada hasabat berdi.

Bellenilişi ýaly, degişli döwlet edaralary bilen bilelikde bu ugurda ýerine ýetirilen işleriň netijesinde “Türkmenistanyň deňiz portlarynda we port nokatlarynda nebit, nebit önümleri we gazhimiýa önümleri daşary ýurtlara ýüklenip iberilende ýük amallaryny geçirmegiň Düzgünleriniň” taslamasy taýýarlanyldy. Şunuň bilen baglylykda, döwlet Baştutanymyzyň garamagyna degişli teklip hödürlenildi.

Hormatly Prezidentimiz Serdar Berdimuhamedow hasabaty diňläp, ýurdumyzyň nebitgaz pudagyny ösdürmek boýunça maksatnamalaýyn işleriň durmuşa geçirilýändigini belledi. Döwlet Baştutanymyz nebit, nebit önümleri we gazhimiýa önümleri boýunça ýük amallaryny geçirmegiň düzgünlerini döwrebaplaşdyrmak boýunça taýýarlanan teklibi goldap, wise-premýere bu ugurda degişli işleri geçirmegi tabşyrdy.

Soňra Ministrler Kabinetiniň Başlygynyň orunbasary T.Atahallyýew ýurdumyzyň oba hojalyk pudagynda hem-de welaýatlarynda möwsümleýin işleriň barşy barada hasabat berdi.

Bellenilişi ýaly, ýurdumyzyň gowaça meýdanlarynda degişli ideg işleri, hususan-da, hatarara bejergi, ýekelemek, otag etmek, mineral dökünler bilen iýmitlendirmek hem-de ösüş suwuny tutmak işleri utgaşykly alnyp barylýar. Daşoguz welaýatynda şaly ekişi tamamlanyp, Lebap welaýatynda bu jogapkärli möwsüme taýýarlyk işleri ýerine ýetirilýär. Ýurdumyzda ýeralmanyň we gök-bakja önümleriniň öndürilýän möçberlerini artdyrmak, bu önümler bilen ilaty bolelin üpjün etmek barada öňde goýlan wezipelerden ugur alnyp, häzirki wagtda welaýatlaryň ekerançylyk meýdanlarynda bu ekinlere ideg etmek hem-de ýetişdirilen hasyly ýygnap almak işleri alnyp barylýar. Şunuň bilen birlikde, ekerançylyk meýdanlarynyň suw üpjünçiligini we ýerleriň melioratiw ýagdaýyny gowulandyrmak, suw serişdelerini tygşytly we netijeli peýdalanmak maksady bilen zerur çäreler görülýär.

Şeýle hem hasabatyň dowamynda wise-premýer döwlet Baştutanymyza galla oragyna girişmegiň senesini belläp, bu möhüm çärelere ak pata bermek baradaky haýyş bilen ýüzlendi.

Hormatly Prezidentimiz Serdar Berdimuhamedow hasabaty diňläp, ýurdumyzda oba hojalyk pudagyny toplumlaýyn ösdürmek, maddy-enjamlaýyn binýadyny berkitmek işlerini netijeli alyp barmagyň, welaýatlaryň gowaça ekilen meýdanlarynda agrotehniki kadalara laýyklykda ideg etmek işlerini hem dowam etdirmegiň möhümdigini belledi.

Soňra döwlet Baştutanymyz Ministrler Kabinetiniň agzalaryna ýüzlenip, ýurdumyzda oba hojalyk pudagyny ösdürmäge uly üns berilýändigini, döwletimiz tarapyndan ýerden bol hasyl almak boýunça daýhanlarymyz üçin zerur şertleriň döredilýändigini aýtdy.

Hormatly Prezidentimiz şu ýyl hem ýurdumyzyň welaýatlarynda gallanyň bol hasylynyň ösdürilip ýetişdirilendigini kanagatlanma bilen belläp, Ahal, Lebap we Mary welaýatlarynda şu ýylyň 4-nji iýunynda, Balkan we Daşoguz welaýatlarynda bolsa 11-nji iýunda galla oragyna başlamaga ak pata berdi.

Döwlet Baştutanymyz hormatly ýaşululardan galla oragyna «Bismilla» bilen başlap bermeklerini haýyş edip, zähmetsöýer gallaçy daýhanlara, ähli oba hojalyk işgärlerine alyp barýan işlerinde uly üstünlikleri arzuw etdi.

Ministrler Kabinetiniň Başlygynyň orunbasary B.Annamämmedow Çagalary goramagyň halkara güni mynasybetli baýramçylyk çärelerini ýokary derejede geçirmek boýunça paýtagtymyzda alnyp barylýan işler barada hasabat berdi.

Bu şanly sene mynasybetli häzirki wagtda Aşgabat şäheriniň şaýollarynda we köçelerinde, seýilgählerinde arassaçylyk we abadanlaşdyryş işleri bilen bir hatarda medeni-durmuş maksatly binalaryň, ýaşaýyş toplumlarynyň daş-töwereklerinde dürli bezeg güllerini ekmek işleri yzygiderli alnyp barylýar. Şeýle hem şäher häkimligi, degişli ministrlikler we pudaklaýyn dolandyryş edaralary, jemgyýetçilik guramalary bilen bilelikde döredijilik bäsleşikleriniň, festiwallaryň, ylmy-amaly maslahatlaryň hem-de bedenterbiýe-sport çäreleriniň, aýdym-sazly dabaralaryň geçirilmegi meýilleşdirilýär.

Şonuň ýaly-da wise-premýer paýtagtymyzda “Güneşli” çagalar we ýetginjekler merkeziniň täze, döwrebap binasyny gurmak boýunça ýerine ýetirilýän işler barada hasabat berdi. Bellenilişi ýaly, ýurdumyzyň bilim ulgamynyň maddy-enjamlaýyn binýadyny has-da pugtalandyrmak, ýaş nesliň ukyp-başarnyklaryny açmak, zehinli çagalary ýüze çykarmak maksady bilen, umumy meýdany 4 gektar bolan, şol sanda esasy binany, kitaphanany, sport, medeni çäreleri we oýun üçin meýdançalary, tehniki binalary hem-de desgalary öz içine alýan täze merkezi gurmak meýilleşdirilýär.

Şeýle hem wise-premýer Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň serişdeleriniň hasabyna merkezde ýerleşjek çagalar kitaphanasynda asman giňişligini synlamak üçin obserwatoriýa otagynyň gurnaljakdygy hem-de kitaphananyň döwrebap sanly tehnologiýalar bilen enjamlaşdyryljakdygy barada aýtdy. Şunuň bilen baglylykda, döwlet Baştutanymyzyň garamagyna bu merkezi gurmak hakynda Kararyň taslamasy hödürlenildi.

Hormatly Prezidentimiz Serdar Berdimuhamedow hasabaty diňläp, ýurdumyzda ýaş nesilleriň sagdyn, bagtyýar ösüp ulalmagy, ylymly-bilimli adamlar bolup ýetişmegi üçin ähli mümkinçilikleriň döredilýändigini, döwrebap çagalar baglarynyň, mekdepleriň, bedenterbiýe-sagaldyş, dynç alyş merkezleriniň gurlup ulanmaga berilýändigini belledi hem-de wise-premýere ýurdumyzda Çagalary goramagyň halkara güni mynasybetli giň gerimli çäreleri ýokary derejede geçirmegi tabşyrdy.

Döwlet Baştutanymyz pursatdan peýdalanyp, mejlise gatnaşyjylary we mähriban halkymyzy Çagalary goramagyň halkara güni bilen tüýs ýürekden gutlady hem-de «Aşgabat şäherinde «Güneşli» çagalar we ýetginjekler merkezini gurmak hakynda» Karara gol çekdi.

Öz gezeginde Ministrler Kabinetiniň agzalary hem hormatly Prezidentimiz Serdar Berdimuhamedowy we Gahryman Arkadagymyzy Çagalary goramagyň halkara güni bilen tüýs ýürekden gutladylar.

Ministrler Kabinetiniň Başlygynyň orunbasary N.Atagulyýew gözegçilik edýän toplumy tarapyndan ýerine ýetirilýän işler barada hasabat berdi.

Bellenilişi ýaly, ýurdumyzda söwda ulgamyny kämilleşdirmek, ilata ýokary hilli söwda hyzmatlaryny ýerine ýetirmek, şol sanda söwda we hyzmat ediş maksatly döwrebap desgalary gurmak boýunça zerur işler durmuşa geçirilýär. Şunuň bilen baglylykda, wise-premýer Ahal welaýatynyň Sarahs etrabynyň Sarahs şäheriniň çäginde täze gurulmagy göz öňünde tutulýan bazaryň şekil taslamasynyň işlenilip taýýarlanylandygyny aýtdy we döwlet Baştutanymyzyň garamagyna degişli teklibi hödürledi.

Hormatly Prezidentimiz Serdar Berdimuhamedow hasabaty diňläp, ýurdumyzyň söwda ulgamyny kämilleşdirmek, ilaty ýokary hilli söwda hyzmatlary bilen üpjün etmek boýunça maksatnamalaýyn işleriň amala aşyrylýandygyny, söwda we hyzmat ediş maksatly döwrebap desgalaryň yzygiderli gurulýandygyny belledi. Döwlet Baştutanymyz Ahal welaýatynyň Sarahs etrabynyň Sarahs şäherinde döwrebap täze bazary gurmak bilen bagly taýýarlanan teklibi makullap, wise-premýere bu ugurda degişli işleri geçirmegi tabşyrdy.

Soňra Ministrler Kabinetiniň Başlygynyň orunbasary B.Seýidowa «Awaza — dostluk mekany» atly halkara tans we folklor festiwalyny geçirmäge görülýän taýýarlyk işleri barada hasabat berdi.

Bellenilişi ýaly, bu halkara çäräni 2 — 7-nji iýun aralygynda “Awaza” milli syýahatçylyk zolagynda geçirmek meýilleşdirilýär. Festiwalyň çäklerinde ýurdumyzyň we daşary döwletleriň tans toparlarynyň gatnaşmagynda “Küştdepdi — parahatçylyk waspçysy” atly halkara maslahaty, bu tans dessurynyň görnüşleriniň görkezme çykyşlaryny, şeýle hem tans we folklor toparlarynyň konsertini guramak göz öňünde tutulýar. Bu festiwal türkmen milli tans sungatyny we gadymy folkloryny dünýä halklary bilen tanyşdyrmaga, halklaryň arasyndaky döredijilik gatnaşyklaryny ösdürmäge ýardam berer. Şunuň bilen baglylykda, wise-premýer hormatly Prezidentimiziň garamagyna degişli teklibi hödürledi.

Döwlet Baştutanymyz hasabaty diňläp, Halkara parahatçylyk we ynanyşmak ýyly hem-de hemişelik Bitaraplygymyzyň 30 ýyllygy mynasybetli halkara çäreleriň giňden geçirilýändigini, olaryň ýurdumyz bilen dünýä döwletleriniň arasyndaky medeni-ynsanperwer gatnaşyklary has-da ösdürmäge ýardam berýändigini belledi hem-de şunuň bilen baglylykda, «Awaza» milli syýahatçylyk zolagynda «Awaza — dostluk mekany» atly halkara tans we folklor festiwalyna gowy taýýarlyk görmegi hem-de ony ýokary derejede geçirmegi wise-premýere tabşyrdy.

Ministrler Kabinetiniň Başlygynyň orunbasary B.Orazdurdyýewa Ylymlar güni mynasybetli geçirilmegi meýilleşdirilýän halkara ylmy maslahatlar we dabaraly çäreler barada hasabat berdi.

Bellenilişi ýaly, ýurdumyzda giňden bellenilýän Ylymlar güni mynasybetli 12-13-nji iýunda “Berkarar döwletiň täze eýýamynyň Galkynyşy döwründe ylym, tehnika we innowasion tehnologiýalar” atly halkara ylmy maslahaty guramaçylykly geçirmek boýunça taýýarlyk işleri alnyp barylýar. Ýurdumyzyň ylmy jemgyýetçiliginiň wekilleriniň hem-de daşary ýurtly alymlaryň gatnaşmaklarynda geçiriljek bu maslahatda ylmyň we tehnologiýalaryň ileri tutulýan ugurlary ara alnyp maslahatlaşylar. Şunuň bilen birlikde, Oguz han adyndaky Inžener-tehnologiýalar uniwersitetinde 11-nji iýunda “Innowasiýalar, parahatçylyk, durnukly ösüş” atly utgaşykly görnüşdäki halkara ylmy-amaly maslahaty, 12-nji iýunda bolsa Türkmenistanyň ýaşlarynyň arasynda ylmy işler boýunça yglan edilen bäsleşigiň ýeňijilerini sylaglamak dabarasyny geçirmek göz öňünde tutulýar. Şunuň bilen baglylykda, wise-premýer hormatly Prezidentimiziň garamagyna degişli teklibi hödürledi.

Hormatly Prezidentimiz Serdar Berdimuhamedow hasabaty diňläp, Garaşsyz ýurdumyzda ylym ulgamyny ösdürmäge aýratyn ähmiýet berilýändigini belledi we şunuň bilen baglylykda, Ylymlar güni mynasybetli ýurdumyzyň ylmy ösüşlerini dünýä ýaýmak, bu ugurda halkara hyzmatdaşlygy pugtalandyrmak maksady bilen, halkara ylmy maslahatlary, Türkmenistanyň ýaşlarynyň arasynda ylmy işler boýunça bäsleşigiň ýeňijilerini sylaglamak dabarasyny ýokary guramaçylyk derejesinde geçirmegi wise-premýere tabşyrdy.

Soňra Ministrler Kabinetiniň Başlygynyň orunbasary, daşary işler ministri R.Meredow “Merkezi Aziýa — Italiýa” formatyndaky döwlet Baştutanlarynyň birinji sammitine gatnaşmak maksady bilen, Türkmenistanyň Prezidentiniň Gazagystan Respublikasynyň Astana şäherine iş saparyna görülýän taýýarlyk barada hasabat berdi.

Bellenilişi ýaly, Ýewropa döwletleri, şol sanda Italiýa Respublikasy bilen hoşniýetli gatnaşyklary we özara bähbitli hyzmatdaşlygy ösdürmek ýurdumyzyň daşary syýasatynyň ileri tutulýan ugurlarynyň biri bolup durýar. Bu ýurt bilen diplomatik gatnaşyklar 1992-nji ýylda ýola goýuldy. Ýurtlarymyz syýasy-diplomatik ulgamda, abraýly halkara guramalaryň çäklerinde netijeli hyzmatdaşlyk edýärler. Mälim bolşy ýaly, Italiýa Türkmenistanyň başlangyjy boýunça Birleşen Milletler Guramasynyň Baş Assambleýasynyň kabul eden 8 Kararnamasynyň awtordaşlarynyň biridir.

Söwda-ykdysady ulgamda, işewür düzümleriň ugry boýunça özara gatnaşyklar hem netijeli häsiýete eýedir. Italiýanyň birnäçe iri kompaniýalary bilen hyzmatdaşlyk ýola goýuldy. Şunuň bilen birlikde, Türkmenistan we Italiýa medeni-ynsanperwer ulgamynda, şol sanda arheologiýa ugry boýunça netijeli hyzmatdaşlyk edýärler. Häzirki güne çenli 37 resminama ikitaraplaýyn gatnaşyklaryň hukuk binýadyny düzýär.

Ýokary derejedäki saparlar we duşuşyklar döwletara dialogy ösdürmekde möhüm ähmiýete eýedir. Şunuň bilen baglylykda, Türkmenistanyň Prezidentiniň 2009-njy we 2019-njy ýyllarda Italiýa Respublikasyna resmi saparlaryny, 2015-nji ýylda bolsa iş saparyny amala aşyrandygy bellenildi. 2014-nji ýylda Italiýanyň Premýer-ministri Türkmenistana iş sapary bilen geldi.

Iki ýurduň Hökümetleriniň we parlamentleriniň derejesinde, şeýle hem daşary syýasat edaralarynyň arasynda yzygiderli gatnaşyklar alnyp barylýar. “Merkezi Aziýa — Italiýa” formaty netijeli hyzmatdaşlygy giňeltmek üçin täze ugurlary açýar. Şunuň bilen baglylykda, döwlet Baştutanymyzyň garamagyna 30-njy maýda Astanada geçirilmegi meýilleşdirilýän sammite gatnaşmak üçin Gazagystan Respublikasyna amala aşyryljak saparyň maksatnamasy hödürlenildi.

Hormatly Prezidentimiz Serdar Berdimuhamedow hasabaty diňläp, Türkmenistanyň Italiýa Respublikasy bilen syýasy-diplomatik, söwda-ykdysady we medeni-ynsanperwer ulgamlarda köp ýyllaryň dowamynda netijeli gatnaşyklary alyp barýandygyny aýtdy.

Döwlet Baştutanymyz iki ýurduň köptaraply görnüşde hem hyzmatdaşlyk edýändigine ünsi çekip, Merkezi Aziýa döwletleriniň we Italiýanyň arasyndaky özara bähbitli hyzmatdaşlygy pugtalandyrmakda Merkezi Aziýa — Italiýa sammitiniň möhüm ornuny belledi hem-de wise-premýer, daşary işler ministrine bu ugurdaky hyzmatdaşlygy ösdürmäge gönükdirilen işleri dowam etdirmegi tabşyrdy.

Soňra wise-premýer, daşary işler ministri Türkmenistanyň Prezidentiniň şu ýylyň 1-2-nji iýunynda Mongoliýa boljak döwlet saparyna görülýän taýýarlyk işleri barada hasabat berdi.

Bellenilişi ýaly, Aziýa we Ýuwaş umman sebitiniň döwletleri bilen dostlukly dialogyň we özara bähbitli hyzmatdaşlygyň ösdürilmegi ýurdumyzyň daşary syýasy strategiýasynyň esasy ugurlarynyň biri bolup durýar. Bu ugurda Mongoliýa bilen netijeli hyzmatdaşlyk pugtalandyrylýar. Ýurtlarymyzyň arasynda diplomatik gatnaşyklar 1992-nji ýylda ýola goýuldy. Häzirki wagtda döwletara gatnaşyklaryň şertnama-hukuk binýady 11 sany resminama bilen berkidildi.

Türkmen-mongol gatnaşyklaryny işjeňleşdirmekde ýokary derejedäki saparlara hem-de duşuşyklara aýratyn ähmiýet berilýär. Mälim bolşy ýaly, Birleşen Milletler Guramasynyň we Şanhaý Hyzmatdaşlyk Guramasynyň çäklerinde iki ýurduň döwlet Baştutanlarynyň 3 duşuşygy guraldy. Mundan başga-da, 2024-nji ýylyň oktýabr aýynda Mongoliýanyň Prezidentiniň Türkmenistana döwlet sapary boldy. Şeýle hem hökümetleriň derejesinde we daşary işler ministrlikleriniň arasynda gatnaşyklar ösdürilýär.

Türkmenistan hem-de Mongoliýa halkara guramalaryň, şol sanda BMG-niň we beýleki düzümleriň çäklerinde netijeli hyzmatdaşlyk edip, birek-birege goldaw berýärler. Mongoliýa Türkmenistanyň başlangyjy bilen BMG-niň Baş Assambleýasy tarapyndan kabul edilen 16 Kararnamanyň awtordaşlarynyň biri, şol bir wagtda, ýurdumyz hem Mongoliýanyň öňe süren BMG-niň Baş Assambleýasynyň 5 Kararnamasynyň döredijileriniň biri bolup durýar.

Söwda-ykdysady hyzmatdaşlyk barada aýdylanda bolsa, oba hojalygy, maldarçylyk, ýeňil senagat hem-de ulag we logistika ulgamlary ileri tutulýan ugurlardyr. Özara haryt dolanyşygyny artdyrmaga, bu işe kiçi we orta telekeçiligi çekmäge aýratyn üns berilýär. Şunuň bilen bir hatarda, ikitaraplaýyn medeni-ynsanperwer gatnaşyklar hem giňeldilýär. 2015-nji ýylda Türkmenistanyň Mongoliýadaky Medeniýet günleriniň we geçen ýylyň oktýabr aýynda Aşgabatda bilelikdäki medeni çäräniň geçirilmegi munuň aýdyň subutnamasydyr.

Häzirki wagtda Türkmenistanyň Prezidentiniň Mongoliýa boljak döwlet saparyna taýýarlyk görmek we onuň ýokary guramaçylyk derejesini üpjün etmek üçin degişli işler alnyp barlyp, onuň netijesinde saparyň maksatnamasy işlenip taýýarlanyldy. Saparyň dowamynda döwletara gatnaşyklaryň şertnama-hukuk binýadyny pugtalandyrjak ikitaraplaýyn resminamalara gol çekilmegi göz öňünde tutulýar. Şeýle hem saparyň çäklerinde Türkmen-mongol işewürler forumynyň, sungat ussatlarynyň gatnaşmagynda medeni çäräniň, milli amaly-haşam sungatynyň sergisiniň we türkmen halysynyň sergi-ýarmarkasynyň geçirilmegi meýilleşdirilýär.

Döwlet Baştutanymyz hasabaty diňläp, Bitarap Türkmenistanyň dünýä döwletleri bilen netijeli hyzmatdaşlygy ösdürmäge aýratyn üns berýändigini, ýakynda Mongoliýada geçiriljek duşuşyklaryň hem türkmen-mongol gatnaşyklaryny täze derejä çykarmakda möhüm ädim boljakdygyny belledi we şunuň bilen baglylykda, wise-premýer, daşary işler ministrine bu döwlet saparyna gowy taýýarlyk görmegi hem-de onuň ýokary derejede geçirilmegini üpjün etmegi tabşyrdy.

Ministrler Kabinetiniň ýanyndaky Ulag we kommunikasiýalar agentliginiň Baş direktory M.Çakyýew ýurdumyzyň deňiz flotunyň maddy-tehniki binýadyny has-da pugtalandyrmak boýunça ýerine ýetirilýän işler barada hasabat berdi.

Bellenilişi ýaly, häzirki wagtda bu ugurda “Balkan” gämi gurluşyk we abatlaýyş zawody” açyk görnüşli paýdarlar jemgyýeti tarapyndan zerur işler geçirilýär. Munuň özi gämilere hyzmat etmek işleriniň hilini ýokarlandyrmaga mümkinçilik döredýär. Agentligiň ýolbaşçysy bular barada aýtmak bilen, hormatly Prezidentimiziň garamagyna degişli teklibi hödürledi.

Döwlet Baştutanymyz hasabaty diňläp, ýurdumyzyň deňiz flotunyň işini halkara talaplar esasynda ýola goýmagyň, gämileri yzygiderli döwrebaplaşdyrmagyň möhüm ähmiýetini belledi. Döwlet Baştutanymyz «Balkan» gämi gurluşyk we abatlaýyş zawody tarapyndan ýerine ýetirilýän hyzmatlary kämilleşdirmäge gönükdirilen teklibi goldap, agentligiň ýolbaşçysyna bu ugurda degişli işleri geçirmegi tabşyrdy.

Mejlisde döwlet durmuşyna degişli başga-da birnäçe möhüm meselelere seredildi we olar boýunça degişli çözgütler kabul edildi.

Hormatly Prezidentimiz Serdar Berdimuhamedow Ministrler Kabinetiniň sanly ulgam arkaly geçirilen mejlisini jemläp, oňa gatnaşanlara berk jan saglyk, maşgala abadançylygyny, berkarar Watanymyzyň gülläp ösmegi ugrunda alyp barýan işlerinde uly üstünlikleri arzuw etdi.

Aşgabat, 26-njy maý (TDH). Şu gün hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Onda ýurdumyzyň oba hojalyk toplumynda hem-de welaýatlarynda alnyp barylýan işler bilen baglanyşykly meselelere garaldy.

Ilki bilen, Ahal welaýatynyň häkimi T.Nurmyradowa söz berildi. Ol welaýatda dowam edýän möwsümleýin oba hojalyk işleri barada hasabat berdi.

Bellenilişi ýaly, welaýatda galla oragyna guramaçylykly girişmek hem-de ösdürilip ýetişdirilen bugdaý hasylyny ýitgisiz ýygnap almak maksady bilen zerur taýýarlyk işleri geçirildi. Welaýatyň gowaça ekilen meýdanlarynda hatarara bejergi, mineral dökünler bilen iýmitlendirmek hem-de ösüş suwuny tutmak işleri ýerine ýetirilýär. Bu agrotehniki çärelerde oba hojalyk tehnikalary doly güýjünde işledilýär. Ýurdumyzda azyk bolçulygyny has-da pugtalandyrmak maksady bilen, welaýatyň ýazlyk ýeralma we gök-bakja ekilen meýdanlarynda agrotehnikanyň kadalaryna laýyklykda ideg etmek hem-de ýetişdirilen hasyly ýygnap almak işleri dowam edýär.

Mundan başga-da, häkim welaýatda Çagalary goramagyň halkara güni hem-de Bütindünýä welosiped güni mynasybetli geçiriljek medeni-köpçülikleýin we sport çärelerine, şeýle hem çagalaryň tomusky dynç alyş möwsümine görülýän taýýarlyk işleri barada hasabat berdi.

Hormatly Prezidentimiz Serdar Berdimuhamedow hasabaty diňläp, häzirki wagtda dowam edýän möwsümleýin oba hojalyk işlerinde agrotehnikanyň kadalarynyň berk berjaý edilmeginiň möhümdigini belledi hem-de bu babatda häkime anyk tabşyryklary berdi.

Soňra Balkan welaýatynyň häkimi H.Aşyrmyradow welaýatda dowam edýän möwsümleýin oba hojalyk işleri barada hasabat berdi.

Bellenilişi ýaly, häzirki wagtda welaýatda ýetişdirilen bugdaý hasylyny ýygnap almaga guramaçylykly girişmek üçin degişli taýýarlyk işleri alnyp barylýar. Gowaça ekilen meýdanlarda hatarara bejergi, ösüş suwuny tutmak we mineral dökünler bilen iýmitlendirmek işleri ýerine ýetirilýär. Bu ugurda oba hojalyk tehnikalary netijeli işledilýär. Welaýatda pile öndürmek boýunça bellenilen meýilnamany üstünlikli ýerine ýetirmek maksady bilen, häzirki wagtda taýýarlanylan piläni kabul ediş kärhanalaryna tabşyrmak işleri dowam edýär. Ýurdumyzda azyk bolçulygyny has-da pugtalandyrmak boýunça öňde goýlan wezipelerden ugur alnyp, welaýatda ýeralma we gök-bakja ekinlerine ideg etmek, şeýle hem ýetişdirilen hasyly ýygnap almak işleri utgaşykly alnyp barylýar.

Mundan başga-da, häkim welaýatda Çagalary goramagyň halkara güni hem-de Bütindünýä welosiped güni mynasybetli geçiriljek baýramçylyk we sport çärelerine, şeýle hem çagalaryň tomusky dynç alyş möwsümine görülýän taýýarlyk işleri barada hasabat berdi.

Döwlet Baştutanymyz hasabaty diňläp, gowaça ideg etmek işlerinde agrotehniki talaplaryň berk berjaý edilmegini, galla oragy möwsümine gowy taýýarlyk görülmegini esasy wezipeleriň hatarynda belledi we bu babatda häkime degişli tabşyryklary berdi.

Soňra Daşoguz welaýatynyň häkimi D.Babaýew welaýatda alnyp barylýan möwsümleýin oba hojalyk işleri barada hasabat berdi.

Bellenilişi ýaly, galla oragyny ýokary hilli we guramaçylykly geçirmek maksady bilen, häzirki wagtda welaýatda galla kabul ediş kärhanalary, däne ýygýan kombaýnlar, beýleki tehnikalar möwsüme doly taýýar edildi. Welaýatyň gowaça ekilen meýdanlarynda hatarara bejergi, otag, ýekelemek işleri geçirilýär. Şonuň bilen bir hatarda, gowaça ösüş suwuny tutmak we mineral dökünler bilen iýmitlendirmek boýunça taýýarlyk işleri alnyp barylýar. Welaýatda şaly ekişini bellenen möhletde geçirmek üçin hem zerur çäreler görülýär. Pile öndürmek möwsüminiň çäklerinde şu günler ýetişdirilen pile hasylyny kabul ediş kärhanalaryna tabşyrmak işine girişildi. Bu işler bilen bir hatarda, welaýatyň ýazlyk ýeralma we gök-bakja ekilen meýdanlarynda agrotehnikanyň kadalaryna laýyklykda ideg etmek we suw tutmak işleri ýerine ýetirilýär.

Şeýle hem häkim welaýatda Çagalary goramagyň halkara güni hem-de Bütindünýä welosiped güni mynasybetli geçiriljek medeni-köpçülikleýin çärelere hem-de çagalaryň tomusky dynç alyş möwsümine görülýän taýýarlyk işleri barada hasabat berdi.

Hormatly Prezidentimiz hasabaty diňläp, häzirki wagtda oba hojalygynda dowam edýän jogapkärli möwsüme ünsi çekdi we şunuň bilen baglylykda, häkime welaýatyň ekerançylyk meýdanlarynda agrotehniki çäreleriň talabalaýyk geçirilmegini yzygiderli gözegçilikde saklamagy tabşyrdy.

Soňra Lebap welaýatynyň häkimi M.Annanepesow welaýatda dowam edýän möwsümleýin oba hojalyk işleri barada hasabat berdi.

Bellenilişi ýaly, şu günler welaýatda gallaçy babadaýhanlar tarapyndan ösdürilip ýetişdirilen bugdaý hasylyny ýitgisiz we öz wagtynda ýygnap almak üçin zerur taýýarlyk işleri alnyp barylýar. Welaýatyň gowaça ekilen meýdanlarynda hatarara bejergi, ýekelemek, otag, mineral dökünler bilen iýmitlendirmek hem-de ösüş suwuny tutmak işleri ýerine ýetirilýär. Bu işlerde oba hojalyk tehnikalaryndan netijeli peýdalanylýar. Welaýatyň ýazlyk ýeralma we gök-bakja ekinleri ekilen meýdanlarynda ideg etmek işleri bilen birlikde, irki ýetişdirilen ýazlyk ýeralmanyň hasylyny ýygnap almak boýunça zerur çäreler görülýär.

Mundan başga-da, häkim welaýatda Çagalary goramagyň halkara güni, Bütindünýä welosiped güni mynasybetli guraljak çärelere, şeýle hem çagalaryň tomusky dynç alyş möwsümine görülýän taýýarlyk işleri barada hasabat berdi.

Döwlet Baştutanymyz hasabaty diňläp, agrotehniki çäreleriň öz wagtynda we ýokary hilli geçirilmeginiň oba hojalyk önümçiliginiň netijeliligini kesgitleýän esasy şertleriň biridigini belledi hem-de häkime bu ugurda birnäçe anyk tabşyryklary berdi.

Soňra Mary welaýatynyň häkimi B.Orazow welaýatda dowam edýän möwsümleýin oba hojalyk işleriniň barşy barada hasabat berdi.

Bellenilişi ýaly, welaýatda galla oragy möwsümine guramaçylykly girişmek hem-de daýhan yhlasy bilen ýetişdirilen bugdaý hasylyny ýitgisiz ýygnap almak maksady bilen, zerur taýýarlyk işleri alnyp barylýar. Welaýatyň gowaça ekilen meýdanlarynda hatarara bejergi, mineral dökünler bilen iýmitlendirmek hem-de ösüş suwuny tutmak işleri utgaşykly ýerine ýetirilýär. Bu işlerde oba hojalyk tehnikalarynyň netijeli işledilmegine aýratyn üns berilýär. Şeýle hem ýetişdirilen pile hasylyny döwlet harmanyna tabşyrmak işleri ýerine ýetirilýär. Şonuň bilen bir hatarda, welaýatyň ýazlyk ýeralma we gök-bakja ekilen meýdanlarynda ideg etmek, şeýle hem ýetişdirilen hasyly ýygnap almak işleri dowam edýär.

Şeýle hem häkim welaýatda Çagalary goramagyň halkara güni, Bütindünýä welosiped güni mynasybetli geçiriljek dabaraly çärelere hem-de çagalaryň tomusky dynç alyş möwsümine görülýän taýýarlyk işleri barada hasabat berdi.

Hormatly Prezidentimiz hasabaty diňläp, häkime gowaça meýdanlarynda alnyp barylýan ideg işleriniň ýokary hilli geçirilmegini, şeýle hem galla oragy möwsümine talabalaýyk taýýarlyk görülmegini üpjün etmegi tabşyrdy.

Soňra Ministrler Kabinetiniň Başlygynyň orunbasary T.Atahallyýew ýurdumyzyň oba hojalygynda dowam edýän möwsümleýin işler barada hasabat berdi.

Bellenilişi ýaly, ýurdumyzda galla oragy möwsümini guramaçylykly geçirmek hem-de ýetişdirilen bugdaý hasylyny öz wagtynda ýygnap almak üçin degişli taýýarlyk işleri geçirildi. Bu işleriň çäklerinde galla kabul ediş kärhanalary, elewatorlar we bugdaý daşamakda ulanyljak awtoulaglar galla oragy möwsümine taýýar edildi. Ýurdumyzyň gowaça ekilen meýdanlarynda degişli ideg işleri, hususan-da, hatarara bejergi, ýekelemek, otag etmek, mineral dökünler bilen iýmitlendirmek hem-de ösüş suwuny tutmak işleri utgaşykly alnyp barylýar. Bu ugurda oba hojalyk tehnikalary we gurallary netijeli işledilýär. Şunuň bilen birlikde, Daşoguz welaýatynda şaly ekişi dowam edip, Lebap welaýatynda bu möwsüme taýýarlyk görülýär. Bu işler bilen bir hatarda, welaýatlarda ýetişdirilen pile hasylyny ýygnap almak we döwlet harmanyna tabşyrmak boýunça işler alnyp barylýar. Welaýatlaryň ýeralma, gök-bakja we beýleki azyklyk ekinleri ekilen meýdanlarynda ideg etmek, şeýle hem ýetişdirilen hasyly ýygnap almak işleri ýerine ýetirilýär.

Hormatly Prezidentimiz Serdar Berdimuhamedow hasabaty diňläp, ekerançylyk meýdanlaryndaky agrotehniki çäreleriň öz wagtynda ýerine ýetirilmeginiň, bu işlerde agrotehnikanyň kadalarynyň berk berjaý edilmeginiň, ýer-suw serişdeleriniň netijeli peýdalanylmagynyň, önümçilige innowasion usullaryň yzygiderli ornaşdyrylmagynyň ekinlerden bol hasyl almaga, oba hojalyk önümçiligini durnukly ösdürmäge we netijede, ýurdumyzda azyk bolçulygyny has-da pugtalandyrmaga ýardam berýändigini belledi we şunuň bilen baglylykda, wise-premýere birnäçe anyk tabşyryklary berdi.

Soňra döwlet Baştutanymyz iş maslahatyna gatnaşyjylara ýüzlenip, galla oragy möwsüminiň ýetip gelýändigine ünsi çekdi hem-de welaýatlarda bu jogapkärli möwsüme gowy taýýarlyk görmegi tabşyrdy.

Şeýle hem hormatly Prezidentimiz gowaça meýdanlarynda ideg işleriniň talabalaýyk geçirilmeginiň möhümdigini belläp, hatarara bejergi, mineral dökünler bilen iýmitlendirmek we ösüş suwuny tutmak işleriniň agrotehniki möhletlerde geçirilmegini berk gözegçilikde saklamagy, gowaça zyýan berijileriň öňüni almak boýunça işleri öz wagtynda geçirmegi, Balkan, Daşoguz we Mary welaýatlarynda döwlete pile tabşyrmagyň depginini güýçlendirmegi tabşyrdy. Şunuň bilen birlikde, Daşoguz welaýatynda şaly ekişiniň agrotehniki talaplara laýyk geçirilmegini gazanmagyň, welaýatlarda pagta we bugdaý öndürijiler bilen hyzmat ediji edara-kärhanalaryň arasynda ýerine ýetirilen işler üçin hasaplaşyklaryň wagtynda geçirilmegini üpjün etmegiň zerurdygy bellenildi.

Döwlet Baştutanymyz ýeralma we beýleki gök-bakja ekinlerine ideg etmek hem-de ýetişdirilen hasyly zaýasyz ýygnap almak işleriniň alnyp barlyşynyň hem ünsden düşürilmeli däldigini nygtap, Çagalary goramagyň halkara güni hem-de Bütindünýä welosiped güni mynasybetli welaýatlarda göz öňünde tutulýan çäreleri ýokary derejede geçirmek üçin gowy taýýarlyk görmegi, şeýle hem çagalaryň tomusky dynç alyş möwsümine taýýarlyk işleriniň alnyp barlyşyna berk gözegçilik etmegi tabşyrdy.

Hormatly Prezidentimiz Serdar Berdimuhamedow iş maslahatyny tamamlap, oňa gatnaşanlara berk jan saglyk, maşgala abadançylygyny, alyp barýan işlerinde uly üstünlikleri arzuw etdi.

Hormatly mugallymlar we bilim işgärleri!

Mähriban uçurymlar!

Sizi Berkarar döwletiň täze eýýamynyň Galkynyşy döwrüne ajaýyp öwüşgin çaýýan hem-de bagtyýar ýaşlarymyzy süýji arzuwlara, ýakymly duýgulara besleýän «Soňky jaň» dabarasy bilen tüýs ýürekden gutlaýaryn. Garaşsyz ýurdumyzyň hemişelik Bitaraplygynyň şanly 30 ýyllygynyň halkara derejede giňden bellenilýän Halkara parahatçylyk we ynanyşmak ýylynda bilimler baýramyna bagyşlanyp geçiriljek dabaralaryň uçurymlarymyzyň kalbynda eziz Watanymyzyň şöhratly geçmişine, şu gününe hem-de beýik geljegine buýsanjy has-da artdyrjakdygyna berk ynanýaryn.

Berkarar döwletiň täze eýýamynyň Galkynyşy döwrüniň bagtyýar uçurymlary!

Siz türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň öňdengörüjilikli beýik başlangyjy bilen işlenip taýýarlanan «Türkmenistanda on iki ýyllyk umumy orta bilime geçmegiň Konsepsiýasy» esasynda 12 ýyllyk okuw maksatnamalary boýunça bilim alan ilkinji uçurymlar bolup durýarsyňyz. Bu geçen döwrüň içinde milli bilim ulgamyny dünýä ölçeglerine, umumy ykrar edilen halkara kadalara laýyklykda kämilleşdirmek ugrunda toplumlaýyn işler amala aşyryldy. Size okatmagyň öňdebaryjy usullary, ylmyň gazananlary hem-de innowasion tehnologiýalar arkaly döwrebap bilim berildi. Siziň okan döwrüňizde halkara bilim bäsleşiklerinde gazanan uly üstünlikleriňiz Watanymyzyň abraýydyr, biziň alyp barýan bilim özgertmelerimiziň ajaýyp miweleridir.

Hormatly mugallymlar we bilim işgärleri!

Türkmen halky ylmyň we bilimiň egsilmez güýjüne gadymy döwürlerden akyl ýetiren, okamagy, öwrenmegi, döretmegi hem-de gurmagy durmuş mekdebine öwren halkdyr. Gadymy Jeýtunda, Änewde, Nusaýda, Merwde, Gürgençde hem-de Amulda ylym-bilim ösüşiň iň möhüm şerti bolupdyr. Ylym we bilim geçmişde bolşy ýaly, häzirki döwürde-de ähli ösüşlerimiziň binýadyny düzýär. Biz bu gymmatly baýlygymyz arkaly Garaşsyz Watanymyzyň geljegini gurýarys. Şoňa görä-de, biz geljekde hem ylymly-bilimli, giň dünýägaraýyşly, başarjaň, maksada okgunly nesilleri terbiýelemek üçin ähli tagallalary ederis. Ýaş nesillerimiziň bilimlerini yzygiderli artdyrmak üçin okuw dersleriniň mazmunyny milli tejribelerimize, ylymlaryň we bilimleriň täze gazananlaryna laýyklykda has-da baýlaşdyrarys, döwrebap okuw kitaplaryny, gollanmalary taýýarlarys.

«Watan diňe halky bilen Watandyr! Döwlet diňe halky bilen döwletdir!» diýen ýörelgeden ugur alyp, milli bilim ulgamyny mundan beýläk-de ösdürmäge aýratyn uly üns bereris. Bitarap Watanymyzyň ähli ýerlerinde döwrebap çagalar baglaryny, orta mekdepleri gurup, ýaş nesillerimiziň ýokary hilli bilim almagy we sagdyn ösmegi üçin oňaýly şertleri döretmek ugrundaky işleriň depginini has-da güýçlendireris. Dünýädäki iň abraýly we hormatly kärleriň birine eýe bolan mugallymlarymyzyň döredijilikli zähmet çekmegi üçin ähli amatly mümkinçilikleri dörederis, olaryň ýaşaýyş-durmuş derejesini has-da ýokarlandyrmak barada yzygiderli alada ederis.

Mähriban uçurymlar!

Siz Watanymyzyň beýik geljegini gurýan nesillersiňiz. Il-günümiziň hem-de bütin adamzadyň bagtyýarlygyna gönükdirilen belent maksatlarymyza ýetmekde size aýratyn bil baglaýarys. Şoňa görä-de, siz durmuş ýoluňyzdaky indiki täze ädimlere has aýgytly we ruhubelentlik bilen gadam basmalysyňyz, eziz Watanymyzyň, halkymyzyň bähbidi ugrunda okamak, döretmek arkaly hemişe öňe gitmelisiňiz. Siz gözbaşy has gadymy döwürlerden gaýdýan milli ýörelgelerimizden, müňýyllyklaryň dowamynda toplanan tejribelerimizden ugur alyp, eziz Diýarymyza, mähriban halkymyza bolan beýik söýgiňiz bilen berkarar Watanymyzyň dünýädäki abraýyny, mertebesini, şan-şöhratyny has-da beýgeltmelisiňiz. Oguz han, Gorkut ata, Görogly beg, Alp Arslan, Jelaleddin Menguberdi ýaly beýik ärlerimiziň, Mahmyt Kaşgarly, Abu Seýit Abulhaýyr, Hoja Ahmet Ýasawy, Baýram han, Döwletmämmet Azady, Magtymguly Pyragy ýaly ägirtlerimiziň dürdäne öwüt-ündewlerine eýerip, bilimleriňiziň, garaýyşlaryňyzyň derejesini yzygiderli ýokarlandyrmalysyňyz.

Hormatly mugallymlar we bilim işgärleri!

Mähriban uçurymlar!

Sizi «Soňky jaň» dabarasy we okuw ýylyny üstünlikli tamamlamagyňyz mynasybetli ýene-de bir gezek tüýs ýürekden gutlaýaryn. Size berk jan saglyk, abadan we bagtyýar durmuş, berkarar Watanymyzyň mundan beýläk-de gülläp ösmegi ugrunda alyp barýan işleriňizde hem-de okuwlaryňyzda uly üstünlikleri arzuw edýärin.

Türkmenistanyň Prezidenti

Serdar BERDIMUHAMEDOW.

Aşgabat, 23-nji maý (TDH). Şu gün hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda döwlet durmuşyna degişli birnäçe meselelere seredildi.

Ilki bilen, Ministrler Kabinetiniň Başlygynyň orunbasary H.Geldimyradow döwlet Baştutanymyzyň tabşyrygyna laýyklykda, Türkmenistanda wirtual aktiwleri düzgünleşdirmek we maýning tehnologiýasyny kanunlaşdyrmak boýunça alnyp barylýan işler barada hasabat berdi. Bellenilişi ýaly, wirtual aktiwleriň dolanyşygynda gatnaşyklary düzgünleşdirmek maksady bilen, “Wirtual aktiwler hakynda” Türkmenistanyň Kanunynyň taslamasy işlenip taýýarlanyldy. Onda umumy düzgünler, wirtual aktiwler işi babatda döwlet düzgünleşdirmesi, wirtual aktiwleriň dolanyşygy çygrynda işleriň guralmagy, maýning, wirtual aktiwleriň emissiýasy we jemgyýetçilige hödürlenilmegi, wirtual aktiwler hyzmatlaryny üpjün edijiler hem-de jemleýji düzgünler beýan edilýär. Bu Kanunyň kabul edilmegi maýa goýumlaryň çekilmegine, maliýe tehnologiýalary başlangyçlarynyň ösdürilmegine, sanly hyzmatlar ulgamynda telekeçilik işjeňliginiň höweslendirilmegine ýardam eder. Şunuň bilen baglylykda, döwlet Baştutanymyzyň garamagyna degişli teklip hödürlenildi.

Hormatly Prezidentimiz hasabaty diňläp, sanly tehnologiýalaryň hem-de sanly ykdysadyýetiň çalt ösýän döwründe wirtual aktiwleriň dolanyşygyny hukuk taýdan düzgünleşdirmegiň möhüm bolup durýandygyny belledi we wise-premýere «Wirtual aktiwler hakynda» Türkmenistanyň Kanunynyň taslamasy boýunça Mejlis bilen degişli işleri geçirmegi tabşyrdy.

Ministrler Kabinetiniň Başlygynyň orunbasary B.Amanow “Türkmengeologiýa” döwlet korporasiýasy tarapyndan nebitiň we tebigy gazyň gorlaryny ýüze çykarmak boýunça alnyp barylýan işler barada hasabat berdi. Bellenilişi ýaly, häzirki wagtda ýurdumyzyň günbatar we gündogar sebitlerinde kuwwatly tehnikalaryň, seýsmiki enjamlaryň, programma üpjünçilik ulgamlarynyň kömegi bilen nebitiň hem-de tebigy gazyň gorlaryny gözlemek işleri geçirilýär. Bu işleriň üstünlikli ýerine ýetirilmegi uglewodorod serişdeleriniň çykarylýan möçberini artdyrmaga ýardam berer.

Hormatly Prezidentimiz hasabaty diňläp, ýurdumyzda nebiti we gazy gözlemek boýunça gözleg-barlag işlerini ýokary hilli, netijeli ýerine ýetirmäge uly üns berilýändigini, nebitiň we tebigy gazyň ýerasty gorlarynyň yzygiderli ýüze çykarylýandygyny aýtdy. Şunuň bilen baglylykda, döwlet Baştutanymyz wise-premýere «Türkmengeologiýa» döwlet korporasiýasy tarapyndan uglewodorod serişdeleriniň gözlegine gönükdirilen işleri geljekde-de netijeli dowam etdirmegi tabşyrdy.

Ministrler Kabinetiniň Başlygynyň orunbasary T.Atahallyýew oba hojalyk pudagynda we welaýatlarda alnyp barylýan möwsümleýin işler barada hasabat berdi.

Bellenilişi ýaly, häzirki wagtda gowaça ekilen meýdanlarda hatarara bejergi, mineral dökünler bilen iýmitlendirmek, ösüş suwuny tutmak işleri alnyp barylýar. Galla oragyny guramaçylykly geçirmek, ösdürilip ýetişdirilen bugdaýyň bol hasylyny çalt we ýitgisiz ýygnap almak, galla oragy möwsümine ähli ugurlar boýunça taýýarlyk işleri geçirilýär. Ýeralmanyň, gök we bakja önümleriniň öndürilýän möçberini artdyrmak, bu önümler bilen ilaty ýeterlik möçberde üpjün etmek maksady bilen, ekerançylyk meýdanlarynda ýazlyk ekilen ekinlere agrotehnikanyň kadalaryna laýyklykda ideg etmek işleri alnyp barylýar. Pile hasylyny ýygnamak işleri-de dowam edýär. Daşoguz welaýatynda şaly ekmek boýunça degişli işler geçirilýär. Bulardan başga-da, ýurdumyzda ekerançylyk meýdanlarynyň suw üpjünçiligini, ýerleriň melioratiw ýagdaýyny gowulandyrmak, suw serişdelerini tygşytly peýdalanmak, suwaryş we şor suw akabalaryny arassalamak babatda zerur çäreler görülýär.

Hormatly Prezidentimiz hasabaty diňläp, ýurdumyzyň oba hojalyk pudagyny toplumlaýyn ösdürmek, pudagyň maddy-enjamlaýyn binýadyny has-da berkitmek işleriniň hemişe üns merkezinde saklanmalydygyny belledi. Döwlet Baştutanymyz welaýatlaryň gowaça ekilen meýdanlarynda ideg işlerini dowam etdirmegiň, galla oragy möwsümine gowy taýýarlyk görmegiň zerurdygyny aýdyp, wise-premýere birnäçe anyk tabşyryklary berdi.

Ministrler Kabinetiniň Başlygynyň orunbasary N.Atagulyýew hormatly Prezidentimiziň degişli Kararyna laýyklykda, şu ýylyň 11 — 13-nji iýuny aralygynda “Turkmentextile Expo — 2025” atly halkara sergi-ýarmarkany geçirmek boýunça alnyp barylýan taýýarlyk işleri barada hasabat berdi. Bellenilişi ýaly, halkara sergi-ýarmarka dokma senagaty kärhanalarynyň, Senagatçylar we telekeçiler birleşmesiniň bu ugurda iş alyp barýan agzalarynyň, daşary ýurt kompaniýalarynyň gatnaşmagy göz öňünde tutulýar. Şunuň bilen bir hatarda, ýerli we daşary ýurt dizaýnerleriniň lybaslarynyň görkezilişini guramak, Merkezi Aziýanyň gadymy dokma usullary, häzirki zaman tehnologiýalaryna bagyşlanan ussatlyk sapaklaryny geçirmek meýilleşdirilýär. Munuň özi ýurdumyzyň dokma senagatynda ýetilen sepgitler bilen tanyşmaga, özara hyzmatdaşlygy ýola goýmaga we ösdürmäge, öňdebaryjy tejribäni alyşmaga oňaýly mümkinçilikleri döreder. Şunuň bilen baglylykda, wise-premýer döwlet Baştutanymyzyň garamagyna degişli teklibi hödürledi.

Hormatly Prezidentimiz hasabaty diňläp, ýurdumyzda öndürilýän ýokary hilli dokma önümleriniň dünýä bazarynda uly islegden peýdalanýandygyny, hereket edýän dokma senagat kärhanalarynda dünýäniň öňdebaryjy, ýokary öndürijilikli enjamlarynyň ornaşdyrylmagynyň işi ýokary netijeli alyp barmaga şert döredýändigini belledi. Şunuň bilen baglylykda, döwlet Baştutanymyz wise-premýere paýtagtymyzda geçiriljek «Turkmentextile Expo — 2025» atly halkara sergi-ýarmarka gowy taýýarlyk görmegi hem-de ony ýokary guramaçylyk derejesinde geçirmegi tabşyrdy.

Ministrler Kabinetiniň Başlygynyň orunbasary B.Seýidowa şu ýylyň iýun aýynda geçiriljek esasy çäreleriň tertibi barada hasabat berdi.

Bellenilişi ýaly, Çagalary goramagyň halkara güni, Bütindünýä welosiped güni, Daşky gurşawy goramagyň bütindünýä güni, Ylymlar güni, Medeniýet we sungat işgärleriniň hem-de Magtymguly Pyragynyň şygryýet güni mynasybetli dürli çäreleri we sport ýaryşlaryny geçirmek göz öňünde tutulýar. Ozal yglan edilen döredijilik bäsleşikleriniň jemlerini jemlemek meýilleşdirilýär. Şeýle-de dutarçy bagşy-sazandalaryň arasynda yglan edilen “Çalsana, bagşy!” atly bäsleşigiň Daşoguz, Lebap we Mary welaýatlary boýunça jemleýji tapgyrlaryny geçirmek göz öňünde tutulýar. Şu ýylyň 2 — 7-nji iýuny aralygynda «Awaza» milli syýahatçylyk zolagynda “Awaza — dostluk mekany” atly halkara tans we folklor festiwalynyň, 6-njy iýunda Pekin şäherinde Türkmenistanyň Hytaý Halk Respublikasyndaky Medeniýet ýylynyň ýapylyş dabarasy mynasybetli çäreleriň, 22 — 27-nji iýun aralygynda Ahal welaýatynda Medeniýet hepdeligi mynasybetli medeni çäreleriň geçirilmegi meýilleşdirilýär. Şeýle hem 27-nji iýunda Magtymguly Pyragynyň şygryýet güni mynasybetli, beýik şahyryň “Magtymguly Pyragy” medeni-seýilgäh toplumyndaky ýadygärligine gül goýmak dabarasynyň geçirilmegi göz öňünde tutulýar. 29-njy iýunda bolsa Arkadag şäheriniň iki ýyllygy mynasybetli aýdym-sazly baýramçylyk dabarasyny geçirmek meýilleşdirilýär.

Hormatly Prezidentimiz hasabaty diňläp, ýurdumyzda bellenilýän baýramçylyklar bilen bagly iýun aýynda geçiriljek çärelere gowy taýýarlyk görmegiň wajypdygyna ünsi çekdi. Döwlet Baştutanymyz wise-premýere Çagalary goramagyň halkara güni, Bütindünýä welosiped güni, Daşky gurşawy goramagyň bütindünýä güni, Ylymlar güni, Medeniýet we sungat işgärleriniň hem-de Magtymguly Pyragynyň şygryýet güni mynasybetli geçiriljek çärelere gowy taýýarlyk görmegi we olary ýokary derejede geçirmegi tabşyrdy.

Ministrler Kabinetiniň Başlygynyň orunbasary B.Orazdurdyýewa Bütindünýä welosiped güni mynasybetli geçiriljek bedenterbiýe-sport we sagdyn durmuş çärelerine taýýarlyk görlüşi barada hasabat berdi. Şunuň bilen baglylykda, 3-nji iýunda paýtagtymyzda köpçülikleýin welosipedli ýörişi guramagyň göz öňünde tutulýandygy barada aýdyldy. Şanly sene mynasybetli 30-njy maý — 3-nji iýun aralygynda welaýatlarda, Aşgabat we Arkadag şäherlerinde welosipedli ýörişleri, sport ýaryşlaryny, ylmy-amaly maslahatlary, wagyz-nesihat we beýleki çäreleri geçirmek meýilleşdirilýär. Şunuň bilen baglylykda, wise-premýer Arkadagly Gahryman Serdarymyzyň garamagyna degişli teklibi hödürledi.

Hormatly Prezidentimiz hasabaty diňläp, ýurdumyzda Bütindünýä welosiped gününi dabaraly belläp geçmek üçin gowy taýýarlyk görmegiň möhümdigini belledi. Şeýle hem döwlet Baştutanymyz paýtagtymyzda, Arkadag şäherinde, welaýatlarda bedenterbiýe-sport çärelerine gowy taýýarlyk görmegiň we talabalaýyk geçirmegiň wajypdygyny nygtap, wise-premýere bu babatda degişli tabşyryklary berdi.

Soňra Ministrler Kabinetiniň Başlygynyň orunbasary, daşary işler ministri R.Meredow Ykdysady hyzmatdaşlyk boýunça bilelikdäki türkmen-eýran hökümetara toparynyň 18-nji mejlisiniň netijeleri barada hasabat berdi.

Bellenilişi ýaly, goňşy ýurtlar bilen hoşniýetli, özara bähbitli hyzmatdaşlygy ösdürmek ýurdumyzyň daşary syýasatynyň ileri tutulýan ugurlarynyň biridir. Şolaryň hatarynda Eýran Yslam Respublikasy hem bar. Döwlet Baştutanymyzyň tabşyrygy boýunça şu ýylyň 19-20-nji maýynda Türkmenistanyň wekiliýeti Tähran şäherine iş saparyny amala aşyrdy. Saparyň çäklerinde bilelikdäki toparyň nobatdaky mejlisi geçirildi. Onuň gün tertibine söwda-ykdysady, medeni-ynsanperwer ulgamlarda ikitaraplaýyn hyzmatdaşlygy işjeňleşdirmegiň meseleleri girizildi hem-de degişli çözgütler kabul edildi. Gaz ulgamynda hyzmatdaşlygy ösdürmegiň, hususan-da, türkmen mawy ýangyjyny Eýrana göni ibermegiň, bu döwletiň çäklerinden üçünji ýurtlara üstaşyr geçirmegiň, şol sanda ony “swap” görnüşinde ugratmagyň mümkinçiliklerine garaldy. Şeýle-de elektroenergetika pudagynda döwletara gatnaşyklary giňeltmegiň mümkinçilikleri gyzyklanma bildirilip ara alnyp maslahatlaşyldy. Bu babatda Mary — Maşat elektrik geçirijisiniň türkmen böleginiň taslamasyny amala aşyrmak bilen bagly çärelere seredildi. Şunuň bilen baglylykda, degişli meseleleriň birnäçesi, şol sanda türkmen elektrik energiýasyny mundan beýläk-de Eýrana ibermek meselesi ara alnyp maslahatlaşyldy.

Mejlisiň barşynda ulag pudagyndaky hyzmatdaşlyk, uzynlygy 242 kilometre deň bolan Gumdag — Etrek — Eýran serhedi awtomobil ýolunyň taslamasy bilen bagly meselelere-de üns berildi. Şunuň bilen birlikde, iki ýurduň arasynda ulag gatnawlaryny we ýük dolanyşygyny artdyrmak bilen bagly meselelere garaldy. Olar boýunça degişli ylalaşyk gazanyldy. Şeýle-de söwda we işewürlik ugurlarynda hyzmatdaşlygy ilerletmegiň meselelerine seredildi. Hususan-da, taraplar söwda-ykdysady gatnaşyklary has-da işjeňleşdirmek, haryt dolanyşygynyň möçberini mundan beýläk-de artdyrmak maksady bilen, 2026 — 2028-nji ýyllar üçin iş meýilnamasyny taýýarlamak barada ylalaşdylar. Şunuň bilen baglylykda, serhetýaka söwda zolaklaryny döretmek barada giňişleýin maslahatlaşmalar boldy. Bellenilişi ýaly, bilelikdäki sergileriň, işewürlik maslahatlarynyň, beýleki çäreleriň geçirilmegi, bu ugurda “Ýol kartasynyň” taýýarlanylmagy hem-de Türkmen-eýran işewürlik geňeşiniň döredilmegi netijeli gatnaşyklary ilerletmäge ýardam eder. Mundan başga-da, mejlisiň gün tertibine suw hojalygy ulgamynda, hususan-da, suw serişdelerini rejeli peýdalanmak babatda ikitaraplaýyn gatnaşyklar bilen bagly meseleler girizildi.

Däp bolan medeni-ynsanperwer gatnaşyklary mundan beýläk-de pugtalandyrmak meselesine hem üns berildi. Şunda özara Medeniýet günlerini geçirmek, medeniýet we sungat sergilerini, festiwallary guramak, bilim we ylym, saglygy goraýyş, sport, syýahatçylyk ulgamlarynda hyzmatdaşlygy, ÝUNESKO-nyň çäklerinde gatnaşyklary ösdürmek meseleleri maslahatlaşyldy. Ykdysady hyzmatdaşlyk boýunça bilelikdäki türkmen-eýran hökümetara toparynyň 18-nji mejlisiniň netijeleri boýunça degişli Teswirnama gol çekildi.

Türkmenistanyň wekiliýetiniň goňşy ýurda iş saparynyň çäklerinde Eýranyň Beýik ruhy lideri Aýatolla Seýed Ali Hameneýi bilen duşuşyk geçirildi. Şeýle hem Eýran Yslam Respublikasynyň Prezidenti Masud Pezeşkian bilen duşuşyk boldy. Onda ikitaraplaýyn hyzmatdaşlygyň, sebit we ählumumy gün tertibiniň möhüm meseleleri ara alnyp maslahatlaşyldy. Eýranyň Prezidenti türkmen halkynyň Milli Lideri Gahryman Arkadagymyzyň çakylygy boýunça Halkara parahatçylyk we ynanyşmak ýyly hem-de Türkmenistanyň Bitaraplygynyň 30 ýyllygy mynasybetli şu ýylyň 12-nji dekabrynda Aşgabatda geçiriljek halkara foruma gatnaşjakdygyny tassyklady. Duşuşykda türkmen-eýran hyzmatdaşlygynyň strategik ugurlary boýunça alnyp barylýan bilelikdäki işi dowam etdirmegiň zerurdygy bellenildi. Goňşy döwletiň Baştutany eýran tarapynyň meýilleşdirilen çäreleri, taslamalary, bu ulgamlarda ozal gazanylan ylalaşyklary durmuşa geçirmäge taýýardygyny aýtdy.

Wekiliýetiň saparynyň çäklerinde Ykdysady hyzmatdaşlyk boýunça bilelikdäki türkmen-eýran hökümetara toparynyň eýran böleginiň başlygy, Eýran Yslam Respublikasynyň ýol we şäher ösüşi ministri hanym Farzaneh Sadeghi Malwajerd, energetika ministri Abbas Aliabadi, nebit ministri Mohsen Paknežad, daşary işler ministri Seýed Abbas Aragçi bilen duşuşyklar geçirildi.

Hormatly Prezidentimiz hasabaty diňläp, Eýran Yslam Respublikasynyň ýurdumyzyň ýakyn hyzmatdaşlyk edýän goňşy döwletleriniň biri bolup durýandygyny belledi. Iki ýurduň arasynda gazanylýan ylalaşyklary durmuşa geçirmekde Ykdysady hyzmatdaşlyk boýunça bilelikdäki türkmen-eýran hökümetara toparyna möhüm orun degişlidir diýip, döwlet Baştutanymyz aýtdy we wise-premýer, daşary işler ministrine Eýran Yslam Respublikasy bilen döwletara gatnaşyklary ösdürmek, söwda-ykdysady hyzmatdaşlygy berkitmek boýunça alnyp barylýan işleri mundan beýläk-de dowam etdirmegi tabşyrdy.

Ministrler Kabinetiniň ýanyndaky Ulag we kommunikasiýalar agentliginiň Baş direktory M.Çakyýew milli raýat awiasiýasy pudagyny mundan beýläk-de ösdürmek boýunça alnyp barylýan işler barada hasabat berdi. Bellenilişi ýaly, ýurdumyzda ulag ulgamyny hemmetaraplaýyn ösdürmek babatda zerur işler durmuşa geçirilýär. Şunda raýat awiasiýasynyň düzümleriniň döwrebaplaşdyrylmagyna, iň täze enjamlar bilen üpjün edilmegine möhüm ähmiýet berilýär. Munuň özi Ýewropanyň we Aziýanyň söwda ulag ýollarynyň çatrygynda ýerleşýän Türkmenistana üstaşyr ulag geçelgelerini işjeňleşdirmek üçin amatly mümkinçilikleri döredýär. Şunuň bilen baglylykda, agentligiň ýolbaşçysy hormatly Prezidentimiziň garamagyna bu ugurda alnyp barylýan işleri has-da ilerletmek bilen bagly degişli teklibi hödürledi.

Döwlet Baştutanymyz hasabaty diňläp, ýurdumyzyň Halkara howa menzillerinde döwrebap şertleri döretmäge, halkara talaplara laýyk gelýän awiasiýa howpsuzlygyny üpjün etmäge möhüm ähmiýet berilýändigini aýtdy. Şunuň bilen baglylykda, hormatly Prezidentimiz Halkara howa menzillerinde uçuş barlaglaryny ýerine ýetirmek bilen bagly teklipleri makullap, agentligiň ýolbaşçysyna degişli işleri geçirmegi tabşyrdy.

Soňra hormatly Prezidentimiz Serdar Berdimuhamedow Ministrler Kabinetiniň agzalaryna ýüzlenip, 25-nji maýda ýurdumyzda Aşgabat şäheriniň gününiň, Türkmen halysynyň baýramynyň, «Soňky jaň» dabarasynyň giňden bellenip geçiljekdigini aýtdy. Berkarar döwletiň täze eýýamynyň Galkynyşy döwründe ak şäherimiz Aşgabatda ýaşamak, işlemek we medeniýetli dynç almak üçin ähli amatly şertler döredildi, paýtagtymyzda «Ak şäherim Aşgabat» atly köpugurly halkara serginiň geçirilmegi-de indi asylly däbe öwrüldi diýip, döwlet Baştutanymyz aýtdy. Ýurdumyzda halyçylyk sungatyny ösdürmäge hem aýratyn üns berilýär. Asyrlaryň dowamynda ene-mamalarymyz tarapyndan sünnälenip dokalan türkmen halylarynda halkymyzyň şöhratly taryhy, pähim-parasady jemlenendir. Şunuň bilen baglylykda, Arkadagly Gahryman Serdarymyz Türkmen halysynyň baýramy mynasybetli haly we haly önümleriniň sergisiniň, maslahatyň geçirilmeginiň halkymyzyň halyçylyk sungatyny dünýä ýaýmakda wajyp ähmiýetiniň boljakdygyna berk ynam bildirdi. Biz geljekde-de gözel paýtagtymyz Aşgabady ösdürmäge, halyçylyk sungatyny kämilleşdirmäge döwlet derejesinde uly üns bereris diýip, döwlet Baştutanymyz aýtdy.

Pursatdan peýdalanyp, hormatly Prezidentimiz Ministrler Kabinetiniň agzalaryny we mähriban halkymyzy Aşgabat şäheriniň güni, Türkmen halysynyň baýramy, uçurymlary «Soňky jaň» dabarasy bilen gutlady. Mejlise gatnaşyjylar hem hormatly Prezidentimizi, Gahryman Arkadagymyzy şanly seneler mynasybetli tüýs ýürekden gutladylar.

Hormatly Prezidentimiz Serdar Berdimuhamedow Ministrler Kabinetiniň sanly ulgam arkaly geçirilen mejlisini jemläp, oňa gatnaşanlara berk jan saglyk, maşgala abadançylygyny, berkarar Watanymyzyň gülläp ösmegi ugrunda alyp barýan işlerinde uly üstünlikleri arzuw etdi.

Aşgabat, 20-nji maý (TDH). Şu gün hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Onda ýurdumyzyň oba hojalyk toplumynda we sebitlerde alnyp barylýan işler bilen baglanyşykly meselelere garaldy.

Ilki bilen, Ahal welaýatynyň häkimi T.Nurmyradowa söz berildi. Ol welaýatdaky möwsümleýin oba hojalyk işleri barada hasabat berdi.

Bellenilişi ýaly, häzirki wagtda galla oragy möwsümine taýýarlyk görmek maksady bilen zerur guramaçylyk çäreleri geçirildi. Tohumlyk ekilen bugdaýyň hasylyny talabalaýyk ýygnap almak üçin taýýarlyk işleri alnyp barylýar. Welaýatyň gowaça ekilen meýdanlarynda hatarara bejergi, ýekelemek, otag etmek işleri geçirilýär. Bu agrotehniki çärelerde oba hojalyk tehnikalary doly güýjünde işledilýär. Şunuň bilen birlikde, pile möwsüminiň çäklerinde taýýarlanylan piläni kabul ediş nokatlaryna tabşyrmak işleri dowam edýär. Welaýatyň ýazlyk ýeralma, gök-bakja ekilen meýdanlarynda agrotehnikanyň kadalaryna laýyklykda ideg etmek, ýetişdirilen hasyly ýygnap almak işleri ýerine ýetirilýär. Şeýle hem häkim 25-nji maýda welaýatda “Soňky jaň” dabarasyny guramaçylykly geçirmek boýunça görülýän taýýarlyk işleri barada hasabat berdi.

Hormatly Prezidentimiz hasabaty diňläp, möwsümleýin işleriň agrotehnikanyň kadalaryna laýyklykda geçirilmeginiň, şunda oba hojalyk tehnikalaryndan netijeli peýdalanmagyň zerur talap bolup durýandygyny belledi hem-de bu babatda birnäçe tabşyryklary berdi.

Soňra Balkan welaýatynyň häkimi H.Aşyrmyradowa söz berildi. Häkim, ilki bilen, Eýran Yslam Respublikasynyň Gülüstan welaýaty bilen Balkan welaýatynyň arasynda söwda-ykdysady, ylmy-tehniki we medeni hyzmatdaşlyk hakynda Ähtnamanyň çäklerinde hyzmatdaşlygy pugtalandyrmak bilen bagly meseleleri ara alyp maslahatlaşmak üçin 14 — 16-njy maý aralygynda Eýran Yslam Respublikasynyň Gülüstan welaýatyna iş saparyny amala aşyrmaga döredilen mümkinçilik üçin hormatly Prezidentimize hem-de Gahryman Arkadagymyza tüýs ýürekden hoşallyk bildirdi.

Soňra häkim Balkan welaýatynda dowam edýän möwsümleýin oba hojalyk işleri barada hasabat berdi.

Bellenilişi ýaly, häzirki wagtda tohumlyk bugdaýyň hasylyny bildirilýän talaplara laýyklykda ýygnap almak, saklamak maksady bilen degişli taýýarlyk işleri alnyp barylýar. Gowaça ekilen meýdanlarda hatarara bejergi, ýekelemek, otag etmek işleri ýerine ýetirilýär. Welaýatda piläni kabul ediş kärhanalaryna tabşyrmak işleri dowam edýär. Ýurdumyzda ýeralma, gök-bakja önümleriniň öndürilýän möçberini artdyrmak barada öňde goýlan wezipelerden ugur alnyp, häzirki wagtda sebitde bu ekinlere ideg etmek, ýetişdirilen hasyly ýygnap almak işleri ýerine ýetirilýär. Mundan başga-da, häkim welaýatyň orta mekdeplerinde “Soňky jaň” dabarasyny guramaçylykly geçirmek boýunça görülýän taýýarlyk işleri barada hasabat berdi.

Hormatly Prezidentimiz hasabaty diňläp, oba hojalyk önümçiliginiň ähli tapgyrlarynda agrotehnikanyň kadalarynyň berk berjaý edilmeginiň ekinlerden bol we ýokary hilli hasyl almagyň, oba hojalygyny netijeli ýöretmegiň esasy şertleriniň biri bolup durýandygyna ünsi çekdi we häkime degişli tabşyryklary berdi.

Daşoguz welaýatynyň häkimi D.Babaýew sebitdäki möwsümleýin oba hojalyk işleri barada hasabat berdi.

Bellenilişi ýaly, welaýatda galla oragyny guramaçylykly geçirmek maksady bilen, häzirki wagtda galla kabul ediş kärhanalaryny, däne ýygýan kombaýnlary, beýleki tehnikalary möwsüme taýýarlamak işleri dowam edýär. Gowaça ekilen meýdanlarda hatarara bejergi, otag etmek, ýekelemek işleri geçirilýär. Şunda oba hojalyk tehnikalaryndan netijeli peýdalanylýar. Welaýatda şaly ekişi dowam edip, bu möwsümi bellenen möhletde geçirmek üçin zerur çäreler görülýär. Şu günler ýüpekçi kärendeçiler tarapyndan ýüpek gurçugyna ideg etmek işleri dowam edýär. Ýazlyk ýeralma, gök-bakja ekilen meýdanlarda agrotehnikanyň kadalaryna laýyklykda ideg etmek, suw tutmak işleri ýerine ýetirilýär. Şeýle hem häkim 25-nji maýda welaýatda “Soňky jaň” dabarasyny ýokary derejede geçirmek babatda görülýän taýýarlyk işleri barada hasabat berdi.

Hormatly Prezidentimiz hasabaty diňläp, gowaça ideg işleriniň talabalaýyk geçirilmegini, bugdaý oragy möwsümine ykjam taýýarlyk görülmegini ileri tutulýan wezipeleriň hatarynda kesgitledi hem-de bu babatda birnäçe anyk tabşyryklary berdi.

Lebap welaýatynyň häkimi M.Annanepesow welaýatda dowam edýän möwsümleýin oba hojalyk işleri barada hasabat berdi.

Bellenilişi ýaly, şu günler sebitde galla oragy möwsümine taýýarlyk işleri tamamlaýjy tapgyrda alnyp barylýar. Gowaça ekilen meýdanlarda agrotehnikanyň kadalaryna laýyklykda ideg işleri geçirilýär. Gögeriş alnan meýdanlara hatarara bejergi, ýekelemek, otag etmek işleri ýerine ýetirilýär. Hormatly Prezidentimiziň ýurdumyzda azyk bolçulygyny has-da pugtalandyrmak barada öňde goýan wezipelerinden ugur alnyp, welaýatyň ýazlyk ýeralma, gök-bakja ekinleri ekilen meýdanlaryna ideg etmek işleri ýerine ýetirilýär. Şeýle-de häkim 2024-2025-nji okuw ýylynyň tamamlanmagy mynasybetli “Soňky jaň” dabarasyny guramaçylykly geçirmek boýunça görülýän taýýarlyk işleri barada hasabat berdi.

Hormatly Prezidentimiz hasabaty diňläp, möwsümleýin oba hojalyk işleriniň möhüm ähmiýetine ünsi çekdi we welaýatyň ekerançylyk meýdanlarynda ýaýbaňlandyrylan agrotehniki çäreleriň, hususan-da, gowaça ideg işleriniň ýokary hilli alnyp barylmagyny, galla oragyna talabalaýyk taýýarlyk görülmegini üpjün etmegi tabşyrdy.

Mary welaýatynyň häkimi B.Orazow welaýatda dowam edýän möwsümleýin oba hojalyk işleriniň barşy barada hasabat berdi.

Bellenilişi ýaly, sebitde galla oragy möwsümini guramaçylykly geçirmek boýunça taýýarlyk işleri alnyp barylýar. Bu işleriň çäklerinde galla kabul ediş kärhanalary, elewatorlar, däne ýygýan kombaýnlar, awtoulaglar we beýleki tehnikalar möwsüme taýýar edildi. Tohumlyk bugdaýyň hasylyny ýitgisiz ýygnap almak, talabalaýyk saklamak üçin taýýarlyk işleri geçirilýär. Gowaça ekilen meýdanlarda hatarara bejergi, otag etmek, ýekelemek işleri ýerine ýetirilýär. Şeýle-de welaýatda ýetişdirilen pile hasylyny ýygnap almak, döwlet harmanyna tabşyrmak işleri dowam edýär. Ýazlyk ýeralma, gök-bakja ekilen meýdanlara ideg etmek, ýetişdirilen hasyly ýygnap almak işleri alnyp barylýar. Mundan başga-da, häkim 25-nji maýda welaýatda “Soňky jaň” dabarasyny guramaçylykly geçirmek boýunça görülýän taýýarlyk işleri barada hasabat berdi.

Döwlet Baştutanymyz hasabaty diňläp, welaýatyň gowaça ekilen meýdanlarynda alnyp barylýan ideg işleriniň ýokary hilli we guramaçylykly geçirilmeginiň, şunda oba hojalyk tehnikalarynyň netijeli işledilmeginiň, bugdaý oragy möwsümine guramaçylykly girişilmeginiň möhümdigini belledi hem-de degişli tabşyryklary berdi.

Soňra Ministrler Kabinetiniň Başlygynyň orunbasary T.Atahallyýew ýurdumyzyň oba hojalygynda dowam edýän möwsümleýin işler barada hasabat berdi.

Bellenilişi ýaly, häzirki wagtda galla kabul ediş kärhanalary, elewatorlar, bugdaý daşamakda ulanyljak awtoulaglar galla oragy möwsümine taýýar edildi. Şunuň bilen birlikde, tohumlyk bugdaýyň hasylyny talabalaýyk ýygnap almak, saklamak boýunça degişli taýýarlyk işleri geçirilýär. Ýurdumyzyň gowaça ekilen meýdanlarynda hatarara bejergi, ýekelemek, otag etmek, mineral dökünler bilen iýmitlendirmek işleri utgaşykly alnyp barylýar. Bu ugurda oba hojalyk tehnikalary netijeli işledilýär. Şunuň bilen birlikde, Daşoguz welaýatynda şaly ekişi dowam edýär. Pile möwsüminiň çäklerinde ýetişdirilen pile hasylyny ýygnap almak hem-de döwlet harmanyna tabşyrmak boýunça işler dowam edýär. Diýarymyzda ýeralmanyň, gök-bakja, beýleki azyklyk ekinleriň bol hasylyny ösdürip ýetişdirmek maksady bilen, häzirki wagtda ekerançylyk meýdanlarynda bu ekinlere ideg etmek, ýetişdirilen hasyly ýygnap almak işleri alnyp barylýar.

Hormatly Prezidentimiz hasabaty diňläp, oba hojalyk pudagynda özgertmeleri üstünlikli durmuşa geçirmek, pudagy döwrüň talabyna laýyklykda ösdürmek boýunça öňde durýan wezipeleriň toplumlaýyn çemeleşmäni, täzeçil çözgütleri talap edýändigini belledi we wise-premýere möwsümleýin işleriň ýokary hilli, guramaçylykly alnyp barylmagyny yzygiderli gözegçilikde saklamagy tabşyrdy. Soňra döwlet Baştutanymyz iş maslahatyna gatnaşyjylara ýüzlenip, galla oragy möwsüminiň ýetip gelýändigine ünsi çekdi hem-de möwsüme gowy taýýarlyk görüp, ony guramaçylykly geçirmegiň möhümdigini belledi.

Hormatly Prezidentimiz welaýatlaryň gowaça meýdanlarynda hatarara bejergi, ýekelemek, otag etmek işleriniň agrotehniki talaplara laýyk alnyp barlyşyny berk gözegçilikde saklamagy, gowaça ideg etmekde oba hojalyk tehnikalaryny doly güýjünde işletmek üçin zerur çäreleri görmegi, welaýatlaryň bugdaý meýdanlarynda ýetişdirilen tohumlyk bugdaý hasylyny bildirilýän talaplara laýyk ýygnap almak, daşamak hem-de saklamak işlerine gowy taýýarlyk görmegi tabşyrdy. Şeýle-de döwlet Baştutanymyz Daşoguz welaýatynda şaly ekişini bellenen agrotehniki möhletlerde geçirmegiň, sebitlerde pile taýýarlamak boýunça netijeli işleri alyp barmagyň, pagta we bugdaý öndürijiler bilen hyzmat ediji edara-kärhanalaryň arasynda ýerine ýetirilen işler üçin hasaplaşyklaryň wagtynda geçirilmegini üpjün etmegiň zerur talap bolup durýandygyny belledi. Hormatly Prezidentimiz ýeralma we beýleki gök-bakja ekinlerine ideg etmek, ýetişdirilen hasyly zaýasyz ýygnap almak işleriniň wagtynda geçirilmegine pugta gözegçilik etmegi, 25-nji maýda welaýatlardaky orta mekdeplerde «Soňky jaň» dabarasyny guramaçylykly geçirmek üçin zerur çäreleri görmegi tabşyrdy.

Hormatly Prezidentimiz Serdar Berdimuhamedow iş maslahatyny jemläp, oňa gatnaşanlara berk jan saglyk, maşgala abadançylygyny, alyp barýan işlerinde uly üstünlikleri arzuw etdi.

Aşgabat, 17-nji maý (TDH). Şu gün hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda döwlet durmuşyna degişli birnäçe meselelere seredildi.

Ilki bilen, Mejlisiň Başlygy D.Gulmanowa alnyp barylýan kanun çykaryjylyk işi barada maglumat berdi.

Bellenilişi ýaly, häzirki wagtda kabul edilen maksatnamalardan gelip çykýan wezipeleri kanunçylyk taýdan üpjün etmek maksady bilen, ministrliklerden we pudaklaýyn dolandyryş edaralaryndan gelip gowuşýan teklipler esasynda ýurdumyzyň ykdysady, syýasy, medeni durmuşynyň dürli ugurlaryna degişli kanun taslamalaryny taýýarlamak boýunça işler dowam edýär. Daşary ýurtlaryň parlamentleri we halkara guramalar bilen gatnaşyklary ösdürmek boýunça degişli işler alnyp barylýar. Mejlisiň wekilleri sanly ulgam arkaly geçirilen çärelere, hususan-da, 1941 — 1945-nji ýyllaryň Beýik Watançylyk urşunda gazanylan Ýeňşiň 80 ýyllygy mynasybetli Russiýa Federasiýasynyň Federal Ýygnagynyň Federasiýa Geňeşiniň, şeýle hem Türkmen-saud parlamentara dostluk toparynyň agzalarynyň maslahatlaryna gatnaşdylar. Milli parlamentiň wekili ÝHHG-niň Aşgabatdaky merkeziniň guramagynda geçirilen strategik meýilnamalaşdyryş boýunça ýaş geňeşçileriň sebitleýin okuw maslahatyna gatnaşmak üçin Türkiýe Respublikasynyň Stambul şäherinde iş saparynda boldy.

Döwlet Baştutanymyz ýurdumyzyň kanunçylyk ulgamyny kämilleşdirmegi dowam etdirmegiň, täze kanunlaryň taslamalaryny taýýarlamak boýunça netijeli işleri alyp barmagyň möhümdigini belledi.

Ministrler Kabinetiniň Başlygynyň orunbasary H.Geldimyradow geljek ýyl üçin ýurdumyzyň baş maliýe meýilnamasynyň, ýurdumyzy durmuş-ykdysady taýdan ösdürmegiň esasy ugurlarynyň we maýa goýum Maksatnamasynyň taslamalaryny işläp düzmek maksady bilen, döwlet Baştutanymyzyň “Türkmenistanyň 2026-njy ýyl üçin Döwlet býujetini düzmek hakynda” Kararyň taslamasyny taýýarlamak boýunça beren tabşyryklarynyň ýerine ýetirilişi barada hasabat berdi.

Bellenilişi ýaly, bu resminamada Döwlet býujetini düzmek üçin ministrlikler, pudaklaýyn dolandyryş edaralary, häkimlikler tarapyndan berilmäge degişli hasabatlary hem-de maglumatlary taýýarlamagyň tertibi we möhletleri anyk kesgitlenildi. Geljek ýylyň Döwlet býujeti we maliýe-ykdysady görkezijileri düzülende, “Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyndan” we degişli hasaplama görkezijilerinden ugur almak göz öňünde tutulýar. 2026-njy ýylda ýurdumyzyň makroykdysady ýagdaýyny we maliýe, pul-karz ulgamyny durnukly saklamak, ykdysadyýetiň pudaklaryny depginli ösdürmegi, giň gerimli özgertmeleri dowam etdirmek, maýa goýumlaryň esasy bölegini täze önümçiliklere gönükdirmek bilen, olaryň netijeliligini artdyrmak, pudaklara sanly ulgamy, täze tehnologiýalary ornaşdyrmak, amatly işewürlik gurşawyny döretmek we hususy telekeçiligi ösdürmek, ilatymyzyň ýaşaýyş-durmuş derejesini mundan beýläk-de ýokarlandyrmak babatda çäreleri durmuşa geçirmek maksat edinilýär. Hasabatyň dowamynda wise-premýer döwlet Baştutanymyzyň garamagyna degişli resminamanyň taslamasyny hödürledi.

Hormatly Prezidentimiz hasabaty diňläp, geljek ýylda hem ýurdumyzy durmuş-ykdysady taýdan ösdürmegi dowam etdirmek maksady bilen, 2026-njy ýyl üçin Döwlet býujetini düzmek hakynda resminama gol çekdi we ony sanly ulgam arkaly wise-premýere iberip, degişli tabşyryklary berdi.

Ministrler Kabinetiniň Başlygynyň orunbasary B.Amanow gözegçilik edýän toplumynda, hususan-da, “Türkmengaz” döwlet konserni tarapyndan alnyp barylýan işler barada hasabat berdi. Bellenilişi ýaly, iri senagat kärhanalaryna sanly ulgamy giňden ornaşdyrmak hem-de olary halkara tejribä laýyklykda dolandyrmak boýunça zerur işler alnyp barylýar. Munuň özi buraw işlerine, tebigy gazyň çykarylyşyna we onuň hereket edýän bir bitewi gaz geçiriji ulgama goýberilişine, gündelik sarp edilişine gözegçilik etmäge hem-de netijeli dolandyrmaga mümkinçilik berer. Şunuň bilen baglylykda, döwlet Baştutanymyzyň garamagyna degişli teklip hödürlenildi.

Hormatly Prezidentimiz hasabaty diňläp, ýurdumyzyň ilatyny, senagat kärhanalaryny, durmuş maksatly desgalary tebigy gaz bilen bökdençsiz üpjün etmäge möhüm ähmiýet berilýändigini belledi. Şunuň bilen baglylykda, döwlet Baştutanymyz wise-premýere «Türkmengaz» döwlet konserni tarapyndan tebigy gazy çykarmak, akdyrmak hem-de sarp edijilere eltmek işlerine gözegçiligi has-da kämilleşdirmegi tabşyrdy.

Ministrler Kabinetiniň Başlygynyň orunbasary T.Atahallyýew oba hojalyk pudagynda hem-de welaýatlarda möwsümleýin oba hojalyk işleriniň barşy barada hasabat berdi.

Bellenilişi ýaly, ýurdumyzyň bugdaý ekilen meýdanlarynda agrotehnikanyň kadalaryna laýyklykda ideg etmek işleri tamamlaýjy tapgyrda alnyp barylýar. Galla oragy möwsümine guramaçylykly girişmek üçin degişli taýýarlyk işleri geçirilýär. Gowaça ekilen meýdanlarda ideg etmek, hususan-da, hatarara bejergi, ýekelemek, otag etmek işleri ýerine ýetirilýär. Diýarymyzda ýeralmanyň we gök-bakja önümleriniň öndürilýän möçberlerini artdyrmak, bu önümler bilen ilaty bolelin üpjün etmek maksady bilen, ekerançylyk meýdanlarynda ýazlyk ekilen ekinlere ideg işleri geçirilýär. Daşoguz welaýatynda şaly ekişi dowam edýär.

Hormatly Prezidentimiz hasabaty diňläp, ýurdumyzda oba hojalyk pudagyny toplumlaýyn ösdürmek boýunça alnyp barylýan işleri dowam etdirmegiň möhümdigini belledi. Şeýle hem döwlet Baştutanymyz welaýatlaryň gowaça ekilen meýdanlarynda ideg işlerini agrotehnikanyň kadalaryna laýyklykda alyp barmagyň, şunda oba hojalyk tehnikalaryny we gurallary netijeli peýdalanmagyň, bugdaý ekilen meýdanlarda ideg etmek işleri bilen bir hatarda, galla oragy möwsümine hem gowy taýýarlyk görmegiň zerurdygyny aýtdy we bu babatda wise-premýere degişli tabşyryklary berdi.

Ministrler Kabinetiniň Başlygynyň orunbasary B.Annamämmedow Aşgabat şäheriniň güni mynasybetli geçiriljek “Ak şäherim Aşgabat” atly XXIV köpugurly halkara sergä we maslahata görülýän taýýarlyk işleri barada hasabat berdi.

Bellenilişi ýaly, halkara sergä we maslahata ýerli hem-de daşary ýurt kompaniýalary, ýurdumyzyň edara-kärhanalary, telekeçiler, işewürler gatnaşarlar. Onda myhmanlary paýtagtymyzyň ajaýyp keşbi, milli ykdysadyýetimiziň dürli ulgamlarynyň ýeten sepgitleri bilen tanyşdyrmak, ýurdumyzyň degişli ministrlikleriniň, pudaklaýyn dolandyryş edaralarynyň we daşary ýurt kompaniýalarynyň ýolbaşçylarynyň hem-de wekilleriniň arasynda ikitaraplaýyn duşuşyklaryň geçirilmegi göz öňünde tutulýar. Munuň özi häzirki zaman tehnikalary, tehnologiýalary bilen tanyşmaga, daşary ýurtly hyzmatdaşlar bilen özara tejribe alyşmaga, täze işewürlik gatnaşyklaryny ýola goýmaga mümkinçilik döreder. Şeýle hem baýramçylyk mynasybetli gurluşyk we senagat toplumynyň tapawutlanan işgärlerine hormatly Prezidentimiziň adyndan gymmat bahaly sowgatlary gowşurmak dabarasyny, beýleki medeni çäreleri geçirmek meýilleşdirilýär. Şunuň bilen baglylykda, döwlet Baştutanymyzyň garamagyna degişli teklip hödürlenildi.

Hormatly Prezidentimiz hasabaty diňläp, 24-25-nji maýda «Ak şäherim Aşgabat» atly ХХIV köpugurly halkara sergini we maslahaty guramaçylykly geçirmegiň, Aşgabat şäheriniň güni mynasybetli guraljak medeni çärelere gowy taýýarlyk görmegiň hem-de olary ýokary derejede geçirmegiň zerurdygyny belläp, wise-premýere birnäçe anyk tabşyryklary berdi.

Soňra Ministrler Kabinetiniň Başlygynyň orunbasary N.Atagulyýewe söz berildi. Ol hasabatynyň başynda şu ýylyň 15-16-njy maýynda Tatarystan Respublikasynyň Kazan şäherinde geçirilen “Russiýa — Yslam dünýäsi: KazanForum 2025” XVI halkara ykdysady forumynyň çäklerinde guralan “Russia Halal EXPO” halkara sergisine dünýäniň 12 döwleti bilen birlikde, Türkmenistanyň hem öz milli pawilýony bilen gatnaşandygyny we ýurdumyzyň pawilýonynyň uly gyzyklanma döredendigini aýtdy. Wise-premýer şeýle abraýly sergä gatnaşmaga döredilen mümkinçilik üçin hormatly Prezidentimize we Gahryman Arkadagymyza tüýs ýürekden hoşallyk bildirdi.

Soňra wise-premýer hasabatyny dowam edip, Türkmen halysynyň baýramy mynasybetli geçiriljek dabaralara görülýän taýýarlyk işleri barada aýtdy. Bellenilişi ýaly, şanly sene mynasybetli haly we haly önümleriniň sergisi guralar hem-de onuň çäklerinde milli halyçylyk sungatyny ösdürmäge we kämilleşdirmäge mynasyp goşant goşan, “Türkmenistanyň at gazanan halyçysy” diýen hormatly ada mynasyp bolan halyçylary sarpalamak dabarasy bolar. Şeýle hem dünýäniň belli halyşynaslarynyň, alymlaryň, ussat hünärmenleriň gatnaşmagynda Türkmen halyşynaslarynyň bütindünýä jemgyýetiniň XXV mejlisi geçiriler. Şunuň bilen baglylykda, wise-premýer Arkadagly Gahryman Serdarymyzyň garamagyna degişli teklibi hödürledi.

Hormatly Prezidentimiz hasabaty diňläp, ýurdumyzda halyçylyk sungatyny ösdürmäge we kämilleşdirmäge möhüm ähmiýet berilýändigini belledi. Şunuň bilen baglylykda, döwlet Baştutanymyz wise-premýere Türkmen halysynyň baýramy mynasybetli çäreleri, haly önümleriniň sergisini, Türkmen halyşynaslarynyň bütindünýä jemgyýetiniň mejlisini ýokary derejede geçirmegi tabşyrdy.

Ministrler Kabinetiniň Başlygynyň orunbasary B.Seýidowa paýtagtymyzda guralmagy meýilleşdirilýän festiwallar barada hasabat berdi.

Bellenilişi ýaly, şu ýylyň 19 — 21-nji maýy aralygynda milli gymmatlyklarymyzy giňden wagyz etmek, medeniýetleri özara baýlaşdyrmak maksady bilen, «Parahatçylyk sazy» atly halkara festiwal, 29 — 31-nji maýy aralygynda «Parahatçylyk sazy, dostluk, doganlyk sazy» atly aýdym-sazly festiwal geçiriler. Festiwallaryň çäklerinde konsertleri, döredijilik duşuşyklaryny, ussatlyk sapaklaryny guramak, myhmanlaryň paýtagtymyzyň medeni ojaklaryna, beýleki gözel ýerlerine baryp görmekleri göz öňünde tutulýar. Şunuň bilen baglylykda, döwlet Baştutanymyzyň garamagyna degişli teklip hödürlenildi.

Hormatly Prezidentimiz hasabaty diňläp, ýurdumyzda Halkara parahatçylyk we ynanyşmak ýyly bilen bagly halkara derejeli çäreleriň yzygiderli geçirilýändigini aýtdy. Şunuň bilen baglylykda, döwlet Baştutanymyz wise-premýere «Parahatçylyk sazy» atly halkara festiwala, şeýle hem ýaşlar simfoniki orkestriniň we birleşen çagalar horunyň «Parahatçylyk sazy, dostluk, doganlyk sazy» atly aýdym-sazly festiwalyna gowy taýýarlyk görmegi hem-de olary ýokary guramaçylyk derejesinde geçirmegi tabşyrdy.

Ministrler Kabinetiniň Başlygynyň orunbasary B.Orazdurdyýewa 2024-2025-nji okuw ýylynyň tamamlanmagy, “Soňky jaň” dabarasy, şeýle hem Aşgabat şäheriniň güni mynasybetli guraljak çärelere görülýän taýýarlyk işleri barada hasabat berdi.

Bellenilişi ýaly, Halkara parahatçylyk we ynanyşmak ýylynda okuw ýylynyň tamamlanmagy hem-de Aşgabat şäheriniň güni mynasybetli, 25-nji maýda Garaşsyzlyk binasyna, Berdimuhamet Annaýew adyndaky Arkadag şäher mugallymçylyk orta hünär mekdebinde, Gökdepe etrabynyň Yzgant şäherçesindäki Berdimuhamet Annaýew adyndaky 27-nji orta mekdepde Berdimuhamet Annaýewiň heýkellerine gül goýmak dabaralaryny, Balkan, Daşoguz, Lebap, Mary welaýatlarynyň baş baýdak meýdançalarynda gül goýmak dabaralaryny geçirmek göz öňünde tutulýar. Soňra ýurdumyzyň ähli orta mekdeplerinde “Halkara parahatçylyk we ynanyşmak ýyly” atly şygar bilen “Soňky jaň” dabaralary geçiriler. Göreldeli uçurymlara, kärine ussat bilim işgärlerine hormatly Prezidentimiziň we Gahryman Arkadagymyzyň adyndan ýadygärlik sowgatlar gowşurylar. Baýramçylyk güni uçurymlaryň Aşgabat we Arkadag şäherleriniň, welaýatlaryň gözel ýerlerine, medeni-dynç alyş merkezlerine gezelençlerini guramak meýilleşdirilýär. Şunuň bilen bir hatarda, medeniýet we sungat ussatlarynyň konsertleriniň geçirilmegi göz öňünde tutulýar. Şunuň bilen baglylykda, döwlet Baştutanymyzyň garamagyna degişli teklip hödürlenildi.

Hormatly Prezidentimiz hasabaty diňläp, ýurdumyzda okuw ýylynyň tamamlanmagy hem-de Aşgabat şäheriniň güni mynasybetli umumybilim berýän mekdepleriň uçurymlarynyň gatnaşmagynda «Soňky jaň» dabaralaryny ýokary derejede geçirmegiň wajypdygyny belläp, degişli tabşyryklary berdi.

Soňra wise-premýer hasabatyny dowam edip, çagalaryň we ýetginjekleriň tomusky dynç alyş möwsümini guramaçylykly geçirmäge görülýän taýýarlyk işleri barada aýtdy. Bellenilişi ýaly, häzirki wagtda ýurdumyzyň çagalar sagaldyş-dynç alyş merkezlerinde tomusky dynç alyş möwsümini talabalaýyk geçirmek üçin zerur şertler döredilýär. Olarda dürli medeni-köpçülikleýin we sport-sagaldyş çärelerini geçirmek göz öňünde tutulýar. Şunuň bilen bir hatarda, Bilim ministrliginde çagalaryň we ýetginjekleriň tomusky dynç alşyny guramak boýunça toparyň mejlisini geçirmek hem-de onda möwsümiň talabalaýyk guralmagy bilen bagly meseleleri ara alyp maslahatlaşmak meýilleşdirilýär. Şunuň bilen baglylykda, wise-premýer döwlet Baştutanymyzyň garamagyna degişli teklibi hödürledi.

Hormatly Prezidentimiz ýurdumyzda ýaş nesilleriň bagtyýar durmuşda ýaşamagy, gowy dynç almagy üçin ähli şertleriň döredilýändigini belledi. Şunuň bilen baglylykda, döwlet Baştutanymyz wise-premýere Gökderede we «Awaza» milli syýahatçylyk zolagynda, welaýatlarda hereket edýän çagalar sagaldyş-dynç alyş merkezlerinde çagalardyr ýetginjekleriň mynasyp dynç almagy, wagtlaryny peýdaly geçirmegi üçin tomusky dynç alyş möwsümini guramaçylykly geçirmegi tabşyrdy.

Soňra Ministrler Kabinetiniň Başlygynyň orunbasary, daşary işler ministri R.Meredow türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Russiýa Federasiýasynyň Tatarystan Respublikasyna iş saparynyň netijeleri barada hasabat berdi.

Bellenilişi ýaly, goňşy ýurtlar hem-de ýakyn hyzmatdaş döwletler bilen gatnaşyklary yzygiderli ösdürmek Türkmenistanyň daşary syýasatynyň ileri tutulýan ugurlarynyň biri bolup durýar. Gahryman Arkadagymyzyň 16-njy maýda «Russiýa — Yslam dünýäsi: KazanForum 2025» XVI halkara ykdysady forumyna gatnaşmak maksady bilen Russiýa Federasiýasynyň Tatarystan Respublikasyna amala aşyran iş sapary-da munuň aýdyň mysalydyr. Türkmen halkynyň Milli Lideri forumda çykyş edip, häzirki wagtda yslam dünýäsiniň öňünde durýan örän wajyp meseleler barada durup geçdi we yslam ýurtlarynyň Aziýa — Ýuwaş umman sebitinden Ýakyn Gündogar we Ýewropa ýurtlaryna çenli aralykdaky giňişligi birleşdirýän Ýewraziýa energetika, ulag we tehnologiýa guşagyny döretmeginiň zerurdygyny belledi. Hususan-da, hyzmatdaşlygyň bu görnüşiniň durmuşa geçirilmegi netijesinde energiýa serişdeleriniň, harytlaryň we hyzmatlaryň iň gysga ýollar arkaly iberilmegini üpjün etmäge hem-de örän uly giňişligi, kuwwatly senagat we çig mal merkezlerini birleşdirmäge mümkinçilik açyljakdygy nygtaldy. Şunuň ýaly birleşdiriji guşak ählumumy özara hereketleriň köprüsine öwrüler hem-de söwda-nyrh syýasatyna, ählumumy ykdysadyýetiň ýagdaýlaryna we ösüşine oňyn täsir edip biler. Şunuň bilen baglylykda, Gahryman Arkadagymyz Türkmenistanyň “Beýik Ýüpek ýoluny dikeltmek” strategiýasyny iş ýüzünde işjeň durmuşa geçirýändigini aýtdy.

Türkmenistanyň Halk Maslahatynyň Başlygy ýurdumyzyň garaýyşlaryna laýyklykda, yslam dünýäsiniň möhüm wezipesiniň ählumumy we yklym derejesinde yzygiderli, durnukly ykdysady ösüşi üpjün etmek maksady bilen, bilelikdäki işler üçin örän amatly şertleri döretmekden ybaratdygyny aýtdy. Bu babatda Türkmenistan yslam ýurtlarynyň bähbitleriniň utgaşykly bolmagyny, olaryň özara düşünişmegini gazanmak, ykdysady hyzmatdaşlygyň bähbitlidigine we geljeginiň uludygyna düşünmek üçin diplomatiýany gural hökmünde netijeli ulanmagyň mümkinçiliklerinden ugur alýar. Ýurdumyz bu ýörelgeleri iş ýüzünde üstünlikli durmuşa geçirýär. Ilkinji nobatda, olary Aziýada giň möçberli we uzak möhletli energetika, ulag, infrastruktura taslamalaryny amala aşyrmakda ulanýar. Bu ýerde gürrüň Türkmenistan — Owganystan — Pakistan — Hindistan gaz geçirijisi, Türkmenistan — Owganystan — Pakistan elektrik geçirijisi hem-de optiki süýümli aragatnaşyk ulgamy, Merkezi we Günorta Aziýany Ýakyn we Uzak Gündogar bilen birleşdirýän demir ýollar barada barýar.

Gahryman Arkadagymyz çykyşynda azyk howpsuzlygyna aýratyn üns berip, bu meseläniň ähmiýetini we yslam ýurtlarynyň onuň çözülmegi üçin edýän tagallalaryny birleşdirmeginiň zerurdygyny belledi. Mundan başga-da, tehnologiýalaryň ösüşi ýaly möhüm ugurda hyzmatdaşlygyň uly ähmiýeti nygtaldy. Şunuň bilen baglylykda, Milli Liderimiziň Russiýa Federasiýasynyň Tatarystan Respublikasyna amala aşyran iş saparynyň türkmen-rus gatnaşyklarynyň mundan beýläk-de ösmegine täze itergi berjekdigi aýdyldy.

Hormatly Prezidentimiz hasabaty diňläp, Türkmenistanyň Russiýa Federasiýasynyň Tatarystan Respublikasy bilen özara bähbitli gatnaşyklary ösdürmäge möhüm ähmiýet berýändigini belledi. Ýakynda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň Tatarystan Respublikasynda geçirilen halkara ykdysady foruma gatnaşmagy hem hyzmatdaşlygy berkitmekde möhüm ädim boldy diýip, döwlet Baştutanymyz aýtdy we wise-premýer, daşary işler ministrine bu ugurda alnyp barylýan işleri dowam etdirmegi tabşyrdy.

Wise-premýer, daşary işler ministri hasabatyny dowam edip, Türkmenistan bilen Ýewropada Howpsuzlyk we Hyzmatdaşlyk Guramasynyň arasyndaky hyzmatdaşlygy ösdürmek boýunça alnyp barylýan işler barada aýtdy. Bellenilişi ýaly, hormatly Prezidentimiziň baştutanlygynda durmuşa geçirilýän daşary syýasatyň esasy ugurlarynyň biri-de halkara we sebit guramalary bilen hyzmatdaşlygy ösdürmekden ybaratdyr. Şolaryň arasynda Ýewropada Howpsuzlyk we Hyzmatdaşlyk Guramasy hem bar.

Ýurdumyzyň bu gurama bilen gatnaşyklary syýasy, ykdysady, daşky gurşaw, ynsanperwer ugurlar boýunça ýyllyk meýilnamanyň esasynda alnyp barylýar. Şunuň bilen baglylykda, Türkmenistan bilen ÝHHG-niň arasyndaky hyzmatdaşlygy ösdürmäge gönükdirilen birnäçe teklipler beýan edildi. Şolaryň hatarynda Ýewropada Howpsuzlyk we Hyzmatdaşlyk Guramasynyň Parlament Assambleýasynyň şu ýylyň 29-njy iýuny — 3-nji iýuly aralygynda Portugaliýa Respublikasynyň Porto şäherinde geçiriljek 32-nji her ýylky mejlisine Türkmenistanyň Mejlisiniň wekiliýetiniň gatnaşmagy boýunça degişli işleri geçirmek we bu çäräniň çäklerinde Halkara parahatçylyk we ynanyşmak ýyly, Türkmenistanyň Bitaraplygynyň 30 ýyllygy mynasybetli ugurdaş çäräni guramak; ÝHHG-niň Demokratik institutlar we adam hukuklary baradaky býurosynyň direktorynyň çakylygyna laýyklykda, bu býuronyň ýolbaşçylary we wekilleri bilen ikitaraplaýyn duşuşyklary geçirmek, onuň işi bilen tanyşmak, hyzmatdaşlygyň geljekki mümkinçiliklerini ara alyp maslahatlaşmak maksady bilen, şu ýylyň 9-njy iýunynda türkmen wekiliýetini Polşa Respublikasynyň Warşawa şäherine iş saparyna ibermek; 18-19-njy iýunda Türkiýe Respublikasynyň Stambul şäherinde guraljak Ýewropada Howpsuzlyk we Hyzmatdaşlyk Guramasynyň Baş sekretarynyň we Merkezi Aziýa ýurtlarynyň serhet gulluklarynyň ýolbaşçylarynyň forumyna türkmen wekiliýetiniň gatnaşmagy boýunça degişli işleri geçirmek we çäräniň çäklerinde ýurdumyzyň bu gurama bilen serhet howpsuzlygy boýunça alyp barýan işleriniň esasy ugurlaryny beýan etmek; 2025-nji ýylyň 27-28-nji maýynda Aşgabatda ÝHHG bilen bilelikde dawalaryň öňüni almak boýunça öňüni alyş diplomatiýasy hem-de BMG-niň Howpsuzlyk geňeşiniň «Zenanlar, parahatçylyk we howpsuzlyk» gün tertibini durmuşa geçirmek, bu ugurda Howpsuzlyk geňeşiniň degişli Kararnamasyny ýerine ýetirmek boýunça sebitleýin maslahaty guramak baradaky teklipler bar.

Döwlet Baştutanymyz hasabaty diňläp, Bitarap Türkmenistanyň halkara guramalar, şol sanda Ýewropada Howpsuzlyk we Hyzmatdaşlyk Guramasy bilen gatnaşyklary ösdürmäge aýratyn üns berýändigini hem-de ýurdumyzyň bu düzüm bilen netijeli hyzmatdaşlygy alyp barýandygyny belledi. Şunuň bilen baglylykda, hormatly Prezidentimiz wise-premýer, daşary işler ministrine bu ugurdaky işleri dowam etdirmegi tabşyrdy.

Ministrler Kabinetiniň ýanyndaky Ulag we kommunikasiýalar agentliginiň Baş direktory M.Çakyýew “Türkmendemirýollary” agentliginiň maddy-tehniki binýadyny mundan beýläk-de pugtalandyrmak boýunça alnyp barylýan işler barada hasabat berdi. Bellenilişi ýaly, häzirki wagtda ýurdumyzda demir ýol ulgamynyň ýük dolanyşygyny ösdürmek, üstaşyr geçirijilik ukybyny artdyrmak boýunça ägirt uly işler durmuşa geçirilýär. Munuň özi geografik taýdan amatly ýerleşýän Türkmenistanyň üstaşyr ulag kuwwatyny has-da pugtalandyrmaga mümkinçilik döredýär. Şunuň bilen baglylykda, agentligiň ýolbaşçysy döwlet Baştutanymyzyň garamagyna degişli teklipleri hödürledi.

Hormatly Prezidentimiz hasabaty diňläp, ýurdumyzyň üstaşyr geçirijilik ukybyny artdyrmaga we demir ýol ulgamynyň ýük dolanyşygyny ösdürmäge möhüm ähmiýet berilýändigini belledi. Şunuň bilen baglylykda, döwlet Baştutanymyz demir ýol ulaglary pudagynyň maddy-tehniki binýadyny berkitmek bilen bagly taýýarlanylan teklipleri makullady we agentligiň ýolbaşçysyna degişli işleri geçirmegi tabşyrdy.

Soňra hormatly Prezidentimiz Ministrler Kabinetiniň agzalaryna ýüzlenip, 18-nji maýda Türkmenistanyň Konstitusiýasynyň we Döwlet baýdagynyň gününiň dabaraly bellenilip geçiljekdigini aýtdy. “Bu baýramçylyk Garaşsyz Watanymyzyň mundan beýläk-de gülläp ösmegi ugrunda alnyp barylýan işlerde biziň jebisligimizi we agzybirligimizi has-da pugtalandyrýar” diýip, döwlet Baştutanymyz belledi we pursatdan peýdalanyp, mejlise gatnaşyjylary hem-de mähriban halkymyzy Türkmenistanyň Konstitusiýasynyň we Döwlet baýdagynyň güni bilen tüýs ýürekden gutlady.

Mejlise gatnaşyjylar hem hormatly Prezidentimizi, Gahryman Arkadagymyzy Türkmenistanyň Konstitusiýasynyň we Döwlet baýdagynyň güni mynasybetli tüýs ýürekden mähirli gutladylar.

Hormatly Prezidentimiz Serdar Berdimuhamedow Ministrler Kabinetiniň sanly ulgam arkaly geçirilen mejlisini jemläp, oňa gatnaşanlara berk jan saglyk, maşgala abadançylygyny, berkarar Watanymyzyň gülläp ösmegi ugrunda alyp barýan işlerinde uly üstünlikleri arzuw etdi.

Aşgabat — Kazan, 16-njy maý (TDH). Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Russiýa Federasiýasynyň Tatarystan Respublikasyna iş sapary bilen ugrady we şol ýerde hormatly myhman hökmünde “Russiýa — Yslam dünýäsi: KazanForum 2025” XVI halkara ykdysady forumyna gatnaşdy. Paýtagtymyzyň Halkara howa menzilinde Gahryman Arkadagymyzy ýurdumyzyň resmi adamlary ugratdylar.

Russiýa Federasiýasynyň iri sebitleri bilen netijeli hyzmatdaşlygy ösdürmek däp bolan dostlukly türkmen-rus dialogynyň aýrylmaz bölegidir. Doganlyk Tatarystan bilen köpýyllyk netijeli gatnaşyklar hem munuň aýdyň mysalydyr. Şol gatnaşyklar özara bähbitlilik we uzak möhletleýinlik ýörelgeleri esasynda guralýar. Dürli derejelerde yzygiderli geçirilýän duşuşyklardyr gepleşikler ikitaraplaýyn hyzmatdaşlygyň ygtybarly binýadyny emele getirýär. Soňky ýyllarda köpugurly türkmen-tatar gatnaşyklaryna hil taýdan täze itergi berildi. Özara gatnaşyklaryň kuwwatyndan netijeli peýdalanmakda Söwda-ykdysady, ylmy-tehniki we medeni hyzmatdaşlyk boýunça bilelikdäki iş toparyna möhüm orun degişlidir. Onuň mejlislerinde hyzmatdaşlygyň derwaýys meseleleri, gazanylan ylalaşyklary amala aşyrmak boýunça çäreler ara alnyp maslahatlaşylýar, häzirki döwrüň ýagdaýlaryny hem-de täze mümkinçilikleri nazara almak bilen, özara gatnaşyklaryň ileri tutulýan ugurlary anyklaşdyrylýar.

Türkmen halkynyň Milli Lideriniň Kazana bu gezekki sapary hem RF-niň Tatarystan Respublikasy bilen netijeli hyzmatdaşlygy, umuman, Russiýa Federasiýasy bilen gatnaşyklary mundan beýläk-de pugtalandyrmagyň ýolunda nobatdaky ädim bolar. Ýurdumyzyň yslam dünýäsiniň döwletleri bilen hyzmatdaşlygy-da okgunly ösdürilýär. Şunuň bilen baglylykda, Gahryman Arkadagymyzyň 2022-nji we 2024-nji ýyllarda hormatly myhman hökmünde “Russiýa — Yslam dünýäsi: KazanForum” halkara ykdysady forumlaryna gatnaşandygyny bellemek gerek. Ýurdumyzyň wekiliýeti-de 2009-njy ýyldan bäri her ýyl geçirilýän bu wekilçilikli duşuşyga ençeme gezek gatnaşdy.

Türkmenistanyň, Russiýa Federasiýasynyň hem-de Tatarystan Respublikasynyň Döwlet baýdaklary bilen bezelen Kazan şäheriniň Gabdulla Tukaý adyndaky Halkara howa menzilinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowy Russiýa Federasiýasynyň Tatarystan Respublikasynyň Baştutany Rustam Minnihanow, beýleki resmi adamlar mähirli garşyladylar. Bu ýerde Hormat garawuly nyzama düzüldi.

Myhmansöýerligiň asylly däbine görä, Gahryman Arkadagymyza duz-çörek, milli tatar tagamy çak-çak hödürlenildi we gül desseleri gowşuryldy. Soňra Türkmenistanyň Halk Maslahatynyň Başlygy “Russiýa — Yslam dünýäsi: KazanForum 2025” XVI halkara ykdysady forumynyň geçirilýän ýeri bolan “Kazan EKSPO” halkara sergi merkezine geldi hem-de forumyň “Sanly ulgam: täze ýagdaýlar we hyzmatdaşlygy giňeltmek üçin mümkinçilikler” atly plenar mejlisine gatnaşdy.

Geçen ýyllaryň dowamynda bu giň gerimli forum özüni Russiýa Federasiýasynyň subýektleriniň we Yslam Hyzmatdaşlyk Guramasyna (YHG) agza ýurtlaryň özara bähbitli hyzmatdaşlygynyň, bilelikdäki taslamalary durmuşa geçirmegiň derwaýys meselelerini ara alyp maslahatlaşmagyň açyk meýdançasy hökmünde görkezdi. Plenar mejlisiň açylyşynda Yslam banklarynyň we maliýe edaralarynyň baş geňeşiniň (CIBAFI) Baş sekretary Abdelila Belatik giriş sözi bilen çykyş etdi. Ol belent mertebeli myhmanlary, wekiliýetleriň agzalaryny mübärekläp, netijeli döwletara hyzmatdaşlygy mundan beýläk-de ösdürmekde şu duşuşygyň uly ähmiýetini belledi.

Russiýa Federasiýasynyň Hökümetiniň Başlygynyň orunbasary, “Russiýa — Yslam dünýäsi: KazanForum 2025” XVI halkara ykdysady forumynyň guramaçylyk komitetiniň başlygy Marat Husnullin Russiýa Federasiýasynyň Prezidenti Wladimir Putiniň foruma gatnaşyjylara iberen Ýüzlenmesini okady.

Soňra türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa söz berildi.

Gahryman Arkadagymyz çykyşynyň başynda «Russiýa — Yslam dünýäsi: KazanForum 2025» XVI halkara ykdysady forumyna gatnaşyjylary mähirli mübärekledi we Tatarystan Respublikasynyň Baştutany Rustam Minnihanowa halkara ähmiýetli bu möhüm çärä gatnaşmaga çakylyk üçin minnetdarlyk bildirdi.

Milli Liderimiziň belleýşi ýaly, häzirki dünýä ösüşiniň esasy meýilleri, täze geoykdysady hakykatyň, ugurlaryň we görnüşleriň döredilmegi yslam dünýäsiniň öňünde birnäçe uly wezipeleri goýýar. Olary çözmek üçin düýpli oýlanmak zerurdyr. Käbir ýagdaýlarda bolsa onuň häzirki zaman ykdysady dünýä gurluşynda biziň ýurtlarymyzyň orny we mümkinçilikleri barada täzeden pikirlenmegi, ileri tutulýan ugurlary dogry saýlamagy, hakyky artykmaçlyklary doly ulanmagy, pugta amaly esasda mümkinçilikleri birleşdirmegi talap edýändigi aýdyňdyr. Gahryman Arkadagymyz şular barada aýtmak bilen, häzirki wagtda yslam dünýäsiniň ählumumy ykdysady ösüşde öňdebaryjylaryň biri hökmünde çykyş etmegi üçin ähli mümkinçilikleriň bardygyna ynam bildirdi. Biziň ýurtlarymyz demografiýa, tebigy serişdeler, geografik ýerleşiş ýaly ugurlarda ajaýyp görkezijilere eýedir. Tehnologik dereje gyşarnyksyz ösdürilýär. Maliýe we guramaçylyk mümkinçilikleri ýokarlandyrylýar, ylym-bilim binýady berkidilýär. Bularyň ählisi dürli ugurlarda iri, ösüş maksatly taslamalary öňe sürmekde gowy şertler bolup durýar, ählumumy ykdysady we maýa goýum giňişliginde yslam dünýäsine degişli ýurtlaryň ornuny hem-de ähmiýetini artdyrýar.

Türkmenistanyň halkara ykdysady hyzmatdaşlyga garaýşy energetika, ulag-logistika we tehnologik ugurlary ileri tutmaga esaslanýar. Şunuň bilen baglylykda, Gahryman Arkadagymyz yslam döwletleriniň Ýewraziýanyň Aziýa — Ýuwaş umman sebitinden Ýakyn Gündogar we Ýewropa ýurtlaryna çenli yklymy baglanyşdyrýan bitewi energetika, ulag we tehnologik guşagyny döredip biljekdiklerini belledi. Hyzmatdaşlygyň şeýle görnüşi amala aşyrylan ýagdaýynda, energiýa serişdeleriniň, harytlaryň, hyzmatlaryň gysga ýol arkaly eltilmegi üpjün ediler. Şonuň netijesinde, uly giňişlikler, kuwwatly senagat we çig mal merkezleri birleşdiriler. Strategik babatda şeýle guşak ählumumy özara gatnaşyklaryň köprüsi bolup biler. Munuň bolsa haryt-nyrh syýasatyna, umuman, dünýä ykdysadyýetiniň ähli ýagdaýyna oňyn täsir edip biljekdigi gürrüňsizdir. Şunuň bilen baglylykda, Türkmenistan öz teklip eden «Beýik Ýüpek ýoluny täzeden dikeltmek» strategiýasyny iş ýüzünde işjeň ilerledýär diýip, türkmen halkynyň Milli Lideri nygtady.

Biziň ýurdumyzyň parahatçylyga, durmuş adalatlylygyna we gadymdan gelýän gymmatlyklara eýermegi şeýle döredijilikli usulyň möhüm şerti bolup çykyş edýär. Munuň özi biziň üçin ahlak esaslarynyň özeni we daýanjydyr. Ol ykdysady we täjirçilik soraglarynda-da öz beýanyny tapýar. Şunuň bilen baglylykda, Gahryman Arkadagymyz bu babatda yslam dünýäsiniň hyzmatdaşlygyň netijeli, özüne çekiji nusgalaryny görkezip biljekdigine ynam bildirdi. Şu maksatlara ýetmek üçin yslam ýurtlarynyň ylalaşylan energetika syýasatyny alyp barmagy, halkara üstaşyr geçelgeleriň netijeliligini ýokarlandyrmagy we ony ýeňilleşdirmek soraglaryny utgaşdyrmagy, logistika baglanyşygyny berkitmegi zerur bolup durýar. Şunda Milli Liderimiz Türkmenistanyň garaýşynyň hemişe deňhukukly gatnaşyklara hem-de ählumumy we sebit ýagdaýlaryna ähli gatnaşyjylaryň bähbitleriniň ykrar edilmegine esaslanýandygyny aýtdy. Hususan-da, biziň ýurdumyz hyzmatdaşlygyň syýasylaşdyrylmagyna, energetika, ulag akymlarynyň birtaraplaýyn çäklendirilmegine garşy berk çykyş edýär. Olaryň diwersifikasiýa ýoly bilen ösdürilmeginiň we giň halkara gatnaşyjylar üçin elýeterli bolmagynyň zerurdygynyň tarapdary bolup durýar.

Türkmenistan ählumumy we sebit derejesinde yzygiderli, durnukly ykdysady ösüşi gazanmakda bilelikde işlemek üçin iň amatly şertleriň döredilmeginiň yslam dünýäsiniň örän möhüm wezipesi bolup durýandygyny belleýär. Şunuň bilen baglylykda, Türkmenistan yslam ýurtlarynyň bähbitleriniň utgaşykly bolmagyny, olaryň özara düşünişmegini gazanmak, ykdysady hyzmatdaşlygyň bähbitlidigine we geljeginiň uludygyna düşünmek üçin diplomatiýany gural hökmünde netijeli ulanmagyň mümkinçiliklerinden ugur alýar diýip, hormatly Arkadagymyz sözüni dowam etdi. Türkmenistan bu kadalary iş ýüzünde durmuşa geçirýär, ilkinji nobatda, olary Aziýada giň möçberli we uzak möhletleýin energetika, ulag hem-de üpjünçilik ulgamlaryna degişli taslamalary amala aşyranda ulanýar. Bu ýerde gürrüň Türkmenistan — Owganystan — Pakistan — Hindistan gaz geçirijisi, Türkmenistan — Owganystan — Pakistan ugry boýunça elektrik geçiriji we optiki-süýümli aragatnaşyk ulgamlary, Merkezi we Günorta Aziýany Ýakyn hem-de Uzak Gündogar bilen baglanyşdyrýan demir ýollar ýaly halkara ähmiýetli desgalaryň gurluşygy barada barýar.

Türkmenistanyň Halk Maslahatynyň Başlygy bu agzalan taslamalaryň durmuşa geçirilmeginiň energetika howpsuzlygynyň derejesini düýpli ýokarlandyrmaga mümkinçilik berjekdigine, energiýa çig malynyň çeşmeleriniň köp ýurtlara elýeterli bolmagyny üpjün etjekdigine, şeýle hem esasy ulag ýollaryna çykmaga, dürli söwda we täjirçilik gatnaşyklaryny ösdürmäge, täze iş orunlaryny döretmäge, köp durmuş soraglaryny çözmäge şert döretjekdigine ynam bildirdi. Bu bolsa, ahyrky netijede, syýasy ýagdaýy durnuklylaşdyrmaga, töwekgelçiliklerdir howplaryň azalmagyna, döwletara gatnaşyklarda ynanyşmagy we aç-açanlygy ýokarlandyrmaga ýardam eder.

Gahryman Arkadagymyzyň nygtaýşy ýaly, häzirki wagtda Türkmenistan hem ylalaşylan kadalarda we ölçeglerde işleýän, Ýewropa we Aziýa — Ýuwaş umman sebitlerini birleşdirýän, Hazar we Gara deňizleriniň sebitleriniň çäklerinden geçýän Ýewraziýa multimodal ulag ugurlaryny durmuşa geçirmegiň üstünde netijeli iş alyp barýar. Munuň özi guramaçylyk, hukuk, ykdysady, maliýe hem-de tehnologik soraglaryň toplumyny çözmekde ulgamlaýyn işleri talap edýär. Elbetde, bu tagallalar düýpli syýasy-diplomatik goldawy, Birleşen Milletler Guramasynyň derejesinde çözgütleriň goldanylmagyny we kabul edilmegini talap edýär. Türkmen halkynyň Milli Lideri bu babatda yslam ýurtlarynyň raýdaşlyk ornunyň möhüm ähmiýete eýe boljakdygyna ynam bildirdi. Şunuň bilen baglylykda, hormatly Arkadagymyz yslam maliýe we ykdysady institutlaryna, maýa goýum gaznalaryna ýurtlarymyzyň gatnaşýan halkara ykdysady taslamalaryna iş ýüzünde giňden ýardam bermegi, şeýle hem BMG-niň we beýleki abraýly halkara düzümleriň derejesinde kabul edilýän strategik çözgütleri amala aşyrmaga gatnaşmagy teklip etdi.

Azyk howpsuzlygyny üpjün etmegi-de hyzmatdaşlygymyzyň wajyp ugry hasap edýäris. Bu wezipe häzir Ýer ýüzüniň birnäçe sebitinde bolup geçýän, ýeňil bolmadyk geosyýasy we ykdysady ýagdaýlarda aýratyn möhümdir diýip, türkmen halkynyň Milli Lideri Gurbanguly Berdimuhamedow belledi. Türkmenistan Azyk howpsuzlygy boýunça yslam guramasyna gatnaşyjy ýurt hökmünde ylalaşylan syýasatyň alnyp barylmagy ugrunda çykyş edýär. Şeýle hem dürli sebäplere görä, azyk önümleriniň we durmuşda zerur bolan beýleki harytlaryň ýetmezçiligi bilen ýüzbe-ýüz bolan yslam ýurtlarynyň bähbitlerini goramagyň tarapdary bolup durýar. Biziň ýurdumyz bu kadalary iş ýüzünde amala aşyrýar. Hususan-da, Türkmenistan owgan halkyna raýdaşlyk bildirip, köp ýyllaryň dowamynda azyk önümlerini, çaga iýmitini, ýyly egin-eşikleri, derman serişdelerini, hususy arassaçylyk serişdelerini ynsanperwerlik kömegi hökmünde doganlyk goňşy ýurda iberýär. Biz bu işlerimizi geljekde hem dowam etdireris diýip, Türkmenistanyň Halk Maslahatynyň Başlygy sözüniň üstüni ýetirdi.

Milli Liderimiziň belleýşi ýaly, tehnologiýalar hyzmatdaşlygyň ýene-de bir möhüm ugry bolup durýar. Biziň ýurtlarymyz, aýratyn-da, soňky ýyllarda ýokary tehnologiýalar, innowasion işläp taýýarlamalar, emeli aň ulgamynda uly tejribe topladylar. Bu mümkinçilikler dünýä hojalyk gatnaşyklaryna doly deňhukukly goşulmak üçin ösüşiň öňdebaryjy orunlaryna çykmakda yslam dünýäsiniň döwletleriniň umumy tagallalarynda ulanylyp bilner we ulanylar. Şunuň bilen baglylykda, Gahryman Arkadagymyz döwletlerimiziň tehnologik kooperasiýalarynyň ugurlaryny, tejribe alyşmagy, ýokary derejeli hünärmenleri taýýarlamagy, bilelikdäki köpugurly innowasion maksatnamalary we tejribe ähmiýetli düýpli barlaglaryň taslamalaryny işe girizmegi ulgamlaýyn, yzygiderli esasda ýola goýmagynyň maksadalaýyk hasaplanýandygyna ünsi çekdi.

Kazanda bolmak bilen, Türkmenistan bilen Russiýa Federasiýasynyň doganlyk Tatarystan Respublikasynyň hyzmatdaşlygynda ýetilen sepgitleri we bitirilen hyzmatlary aýratyn bellemek isleýärin. Tatarystanly kärdeşlerimiz bilen gatnaşyklar biziň ýurdumyzyň Russiýa, onuň sebitleri bilen söwda-ykdysady, medeni-ynsanperwer gatnaşyklaryny ösdürmekde netijeli hyzmatdaşlygyň nusgalyk mysaly bolup durýar diýip, Milli Liderimiz aýtdy. Şunda Tatarystan kuwwatly tehnologik, serişde we senagat mümkinçilikleri babatda hem, Türkmenistan bilen taryhy gatnaşyklary babatda hem aýratyn orny eýeleýär.

Biziň ýurdumyz Tatarystan Respublikasy bilen energetika pudagynda, senagat, ulag, söwda we beýleki birnäçe ugurlar boýunça bilelikdäki işleri alyp barýar. Gahryman Arkadagymyz bu babatda Russiýa Federasiýasynyň ýolbaşçylary we Hökümeti tarapyndan berilýän goldawy aýratyn belläp, şeýle garaýyş üçin minnetdarlyk bildirdi hem-de onuň Türkmenistanyň we Russiýanyň halklarynyň uzak möhletleýin, düýpli bähbitlerine laýyk gelýändigine ynam bildirdi. Bu bolsa iki ýurduň arasyndaky strategik hyzmatdaşlygyň ruhuna, mazmunyna doly laýyk gelýär.

Elbetde, yslam ýurtlarynyň we Russiýanyň arasynda dostlugy, özara düşünişmegi, ynanyşmagy, hyzmatdaşlygy berkitmekde Tatarystan Respublikasynyň, hut hormatly Baştutan Rustam Nurgaliýewiç Minnihanowyň netijeli we döredijilikli ornuny bellemegi wajyp hasaplaýaryn. Bu möhüm wezipe Tatarystan Respublikasynyň hem-de onuň ýolbaşçylarynyň diňe bir yslam döwletlerinde däl, eýsem, bütin dünýäde-de uly abraý gazanandygyny görkezdi diýip, türkmen halkynyň Milli Lideri nygtady. Çykyşynyň ahyrynda Gahryman Arkadagymyz yslam dünýäsiniň bir bölegi hökmünde Türkmenistanyň onuň ähli halklary bilen doganlyk, raýdaşlyk we hormat goýmak gatnaşyklaryna düýpli eýerýändigini, bu gatnaşyklary ösdürmäge hem-de berkitmäge, biziň ýurtlarymyzyň parahatçylyk, abadançylyk we gülläp ösüş bilen bagly işlerine öz goşandyny goşmaga taýýardygyny tassyklady.

Türkmenistanyň Halk Maslahatynyň Başlygy Gurbanguly Berdimuhamedowyň çykyşy uly gyzyklanma we üns bilen diňlenildi.

Soňra Malaýziýanyň Premýer-ministri Anwar Ibrahim çykyş edip, Kazanda geçýän forumyň ähmiýetini nygtady. Şunda türkmen halkynyň Milli Lideriniň beýan eden, ýokary tehnologiýalar ulgamyndaky mümkinçilikleri, häzirki wagtda aýratyn ähmiýete eýe bolan innowasion işläp taýýarlamalary, emeli aňy ulanmaga degişli teklipleriniň derwaýysdygy bellenildi.

Soňra Russiýa Federasiýasynyň Tatarystan Respublikasynyň Baştutany Rustam Minnihanow ýygnananlara ýüzlendi. Ol Gahryman Arkadagymyza çuň manyly çykyşy we umumy abadançylygyň, ösüşiň bähbidine döwletara gatnaşyklary okgunly ilerletmäge gönükdirilen oňyn başlangyçlary üçin tüýs ýürekden hoşallyk bildirdi.

“Kazan EKSPO” halkara sergi merkezinden Türkmenistanyň Halk Maslahatynyň Başlygy Gurbanguly Berdimuhamedowyň we Russiýa Federasiýasynyň Tatarystan Respublikasynyň Baştutanynyň bilelikdäki awtoulag kerweni Kazan Kremline tarap ugrady. Bu taryhy-binagärlik toplumynyň çäginde Tatarystanyň Baştutanynyň resmi kabulhanasy ýerleşýär.

Soňra türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Russiýa Federasiýasynyň Tatarystan Respublikasynyň Baştutany Rustam Minnihanowyň duşuşygy boldy.

R.Minnihanow Milli Liderimizi ýene-de bir gezek tüýs ýürekden mübärekläp, belent mertebeli myhmana “Russiýa — Yslam dünýäsi: KazanForum 2025” XVI halkara ykdysady forumyna gatnaşmak üçin Kazana gelmek baradaky çakylygy kabul edendigi, şeýle hem netijeli hyzmatdaşlygy pugtalandyrmak boýunça beýan eden başlangyçlary üçin hoşallyk bildirdi.

Tatarystanyň Baştutany Türkmenistan bilen Tatarystan Respublikasynyň arasyndaky hyzmatdaşlygyň ähli ugurlar boýunça okgunly ösdürilýändigini aýdyp, netijeli ikitaraplaýyn gatnaşyklary pugtalandyrmakda Gahryman Arkadagymyzyň uly goşandyny aýratyn belledi. Mümkinçilikden peýdalanyp, R.Minnihanow hormatly Prezidentimiz Serdar Berdimuhamedowa mähirli salamyny we iň gowy arzuwlaryny beýan etdi.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow mähirli kabul edilendigi we ýurdumyzyň wekiliýetine bildirilen myhmansöýerlik üçin minnetdarlyk bildirip, Tatarystanyň Baştutany bilen Kazanda duşuşýandygyna örän şatdygyny belledi hem-de oňa hormatly Prezidentimiziň mähirli salamyny ýetirdi.

Gahryman Arkadagymyz “Russiýa — Yslam dünýäsi: KazanForum 2025” XVI halkara ykdysady forumyna gatnaşmaga çakylygy üçin hoşallygyny bildirip, meýilleşdirilen ähli çäreleriň üstünlikli geçmegini arzuw etdi.

Milli Liderimiziň belleýşi ýaly, her ýyl Kazanda şeýle möhüm ähmiýetli çäreleriň geçirilmegi Tatarystanyň ýokary abraýyna hem-de oňa uly halkara gyzyklanmanyň bildirilýändigine şaýatlyk edýär. Bu çäreler Russiýa Federasiýasynyň yslam dünýäsiniň ýurtlary bilen ykdysady gatnaşyklaryny işjeňleşdirmäge gönükdirilendir. Gahryman Arkadagymyz Türkmenistanyň wekiliýetiniň şu saparynyň we dürli meýdançalarda geçiriljek duşuşyklaryň türkmen-rus strategik hyzmatdaşlygynyň möhüm bölegi bolup durýan ikitaraplaýyn gatnaşyklary giňeltmäge saldamly goşant boljakdygyna ynam bildirdi.

Duşuşygyň dowamynda türkmen-tatar hyzmatdaşlygynyň häzirki ýagdaýy we geljegi ara alnyp maslahatlaşyldy. Şunuň bilen baglylykda, halklarymyzyň arasyndaky doganlyk gatnaşyklaryň däp-dessurlaryň, dilleriň meňzeşligine, medeniýetleriň umumylygyna, özara hormat goýmaga, deňhukuklylyga esaslanýandygy nygtaldy. Ýokary derejede yzygiderli geçirilýän duşuşyklar netijeli ikitaraplaýyn hyzmatdaşlygyň möhüm şertleriniň biri bolup durýar. Şunuň bilen baglylykda, Russiýa Federasiýasynyň Tatarystan Respublikasynyň Baştutanynyň şu ýyl Türkmenistana amala aşyran saparynyň ähmiýetine üns çekildi. Saparyň barşynda onuň hormatly Prezidentimiz Serdar Berdimuhamedow hem-de Gahryman Arkadagymyz bilen duşuşyklary boldy. Şunda duşuşyklaryň çäklerinde gazanylan ylalaşyklaryň türkmen-tatar gatnaşyklaryna täze itergi berjekdigine ynam bildirildi. Şeýle-de Türkmenistanyň we Tatarystanyň söwda-ykdysady ulgamda, şol sanda nebitgaz pudagynda, gämi gurluşygynda, awiasiýa, awtomobil ýük daşaýjy tehnikalaryň iberilmeginde netijeli hyzmatdaşlyk edýändigi kanagatlanma bilen bellenildi. Medeni-ynsanperwer ulgamdaky gatnaşyklar hem okgunly ösdürilýär.

Duşuşygyň ahyrynda Türkmenistanyň Halk Maslahatynyň Başlygy Gurbanguly Berdimuhamedow we Tatarystanyň Baştutany Rustam Minnihanow köpugurly türkmen-tatar gatnaşyklarynyň Türkmenistan bilen Russiýa Federasiýasynyň arasyndaky strategik hyzmatdaşlygyň çäklerinde mundan beýläk-de pugtalandyryljakdygyna ynam bildirip, birek-birege berk jan saglyk, işlerinde üstünlikleri, doganlyk halklarymyza bolsa abadançylyk, rowaçlyk arzuw etdiler.

Soňra türkmen halkynyň Milli Lideriniň hormatyna Tatarystan Respublikasynyň Baştutanynyň adyndan günortanlyk nahar berildi. Bu ýerde Gahryman Arkadagymyz we Tatarystanyň Baştutany hem-de RF-niň Tatarystan Respublikasynyň Döwlet geňeşçisi Mintimer Şaýmiýew söhbetdeş boldular. Söhbetdeşligiň dowamynda türkmen-tatar gatnaşyklarynyň ýokary derejesi kanagatlanma bilen bellenildi hem-de onuň kuwwatynyň özara bähbitli hyzmatdaşlygy ösdürmek üçin amatly mümkinçilikleri döredýändigi aýdyldy. Şunda Türkmenistanyň we Tatarystanyň halklarynyň umumy abadançylygynyň bähbidine laýyk gelýän gatnaşyklaryň mundan beýläk-de ösdüriljekdigine ynam bildirildi.

Soňra Gahryman Arkadagymyz hem-de RF-niň Tatarystan Respublikasynyň Baştutany Kazanyň iň meşhur teatrlarynyň biri bolan Galiasgar Kamal adyndaky Tatar döwlet akademiki teatryna baryp gördüler. Teatryň şu ýyl açylan täze binasynda we içki bezeglerinde tatar halkynyň medeni däpleri bilen binagärligiň häzirki zaman meýilleri sazlaşykly utgaşdyrylypdyr. Milli Liderimiz we Tatarystanyň Baştutany bu ýerde teatr zallarynyň enjamlaşdyrylyşy, döredijilik toparynyň netijeli işlemegi hem-de tomaşaçylar üçin döredilen şertler bilen tanyşdylar.

Soňra Türkmenistanyň Halk Maslahatynyň Başlygy Gurbanguly Berdimuhamedow we Russiýa Federasiýasynyň Tatarystan Respublikasynyň Baştutany bilelikde Gabdulla Tukaý adyndaky Halkara howa menziline ugradylar.

Gahryman Arkadagymyz we Rustam Minnihanow Türkmenistanyň hem-de Tatarystanyň däp bolan dostlukly, köpugurly, netijeli hyzmatdaşlyga ygrarlydygyny ýene-de bir gezek tassyklap, mähirli hoşlaşdylar we iki doganlyk halka iň gowy arzuwlaryny beýan etdiler.

Türkmen halkynyň Milli Lideri uçarda Watanymyza ugrady.

* * *

“Russiýa — Yslam dünýäsi: KazanForum 2025” XVI halkara ykdysady forumynyň çäklerinde “Kazan EKSPO halkara sergi merkezinde “Russia Halal EXPO 2025” halkara sergisi geçirilýär. Oňa Türkmenistan hem gatnaşýar. Serginiň maksady halal ulgamyny wagyz etmekden we onuň mümkinçiliklerini görkezmekden, daşary ýurtly hyzmatdaşlar bilen söwda, ykdysady, durmuş-medeni gatnaşyklary ýola goýmakdan, önüm öndürijilere öz önümlerini görkezmek, täze bazarlara çykarmak üçin mümkinçilikleri hödürlemekden ybaratdyr. Bu giň gerimli maýa goýum we infrastruktura taslamalarynyň sergisi häzirki döwrüň ýagdaýlaryny hem-de geljegi nazara almak bilen, döwletara hyzmatdaşlygyň ileri tutulýan ugurlaryny kesgitlemek, foruma gatnaşyjylaryň arasynda netijeli dialogy ösdürmek, işewürlik gatnaşyklaryny höweslendirmek, işewürlik duşuşyklarynydyr gepleşikleri geçirmek, dürli ulgamlarda özara tejribe alyşmak üçin açyk meýdança bolup hyzmat edýär.

30 müň inedördül metr meýdanda Russiýa Federasiýasynyň subýektlerine we sebitlerine, daşary ýurtlara, wekilçilik edýän döwlet we işewürlik düzümleriniň pawilýonlary, şol sanda Türkmenistanyň hem milli pawilýony ýerleşýär. Bu ýerde ykdysadyýetiň dürli pudaklarynyň gazananlary we önümleri, şol sanda azyk harytlarynyň önümçiligi, oba hojalygy, senagat pudagy, hususan-da, ugurdaş enjamlaryň, gurluşyk we timarlaýyş serişdeleriniň, mebelleriň, halkyň sarp edýän harytlarynyň önümçiligidir hyzmatlar ulgamy, innowasion tehnologiýalar, maliýe hem-de maýa goýum mümkinçilikleri görkezilýär. Şunuň bilen bir hatarda, sergi ulag-kommunikasiýa, saglygy goraýyş, bilim-ylym, syýahatçylyk, sport ýaly ulgamlarda öňdebaryjy işläp taýýarlamalar bilen tanyşmaga şert döredýär.

Ýurdumyzyň bu iri gözden geçirilişe gatnaşmagy diňe bir Russiýanyň iri sebitleri we beýleki sergä gatnaşýan döwletler bilen söwda-ykdysady hyzmatdaşlygy ösdürmäge itergi bermän, eýsem, Türkmenistanyň dünýäniň halal bazarynda eýeleýän ornuny pugtalandyrmaga, maýa goýum gatnaşyklaryny işjeňleşdirmäge, geljegi uly bilelikdäki taslamalary durmuşa geçirmäge-de ýardam eder. Türkmenistanyň milli pawilýony ykdysadyýetiň esasy pudaklarynyň ählisinde, şol sanda hususy pudakda gazanylýan üstünlikler, uzak möhletli, özara bähbitli hyzmatdaşlyk üçin bar bolan kuwwat bilen tanyşmaga mümkinçilik berýär.

Döwrebap bazar gatnaşyklary esasynda ösdürilýän ýokary netijeli, köpugurly ykdysadyýeti kemala getirmek, senagatlaşdyrmak, sanly ulgamy ornaşdyrmak, daşary ýurtlardan getirilýän harytlaryň ornuny tutýan önümleri öndürmek bilen bagly wezipeleri çözmek, eksport mümkinçiliklerini artdyrmak türkmen halkynyň Milli Lideri Gurbanguly Berdimuhamedow tarapyndan başy başlanyp, Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda üstünlikli durmuşa geçirilýän öňdengörüjilikli strategiýanyň esasy maksadydyr. Toplumlaýyn özgertmeler Watanymyzy okgunly ösdürmäge, öňdebaryjy ylmy işläp taýýarlamalary, ýokary tehnologiýalary giňden ornaşdyrmaga gönükdirilendir.

Şunda hususy pudagy goldamaga uly ähmiýet berilýär. Häzirki wagtda bu ulgamyň wekilleri dürli pudaklarda netijeli işleýärler. Türkmenistanyň Senagatçylar we telekeçiler birleşmesiniň agzalary bolan işewür düzümleriň netijeli işlemegi içerki bazarda haryt bolçulygyny üpjün etmäge, öndürilýän önümleriň bäsdeşlige ukyplylygyny ýokarlandyrmaga, eksport ugurlaryny giňeltmäge ýardam edýär. Häzirki wagtda “Türkmenistanda öndürildi” haryt nyşanly önümler daşary ýurtlarda uly meşhurlyga eýedir.

Ýurdumyzyň pawilýonynda ykdysadyýetiň esasy pudaklarynyň, şol sanda nebitgaz, himiýa, azyk, dokma senagatynyň önümleri, gurluşyk, timarlaýyş serişdeleri görkezilýär. Bu ýerde aýakgaplaryň, gön önümleriniň, beýleki senagat harytlarynyň nusgalary-da goýlupdyr. Önümçiligiň diwersifikasiýalaşdyrylmagy hem-de sanly ulgama geçilmegi esasynda, ýurdumyzyň elektron senagaty okgunly ösýär. Sergide bu ulgamyň gazananlary elektron enjamlaryň dürli görnüşleri, kompýuter tehnikalarynyň nusgalary arkaly giňden beýan edilýär. Şeýle hem ulag-kommunikasiýa pudagy öz mümkinçiliklerini görkezýär.

Türkmen halkynyň Milli Lideriniň başlangyjy boýunça “akylly” şäher konsepsiýasy esasynda gurlan Arkadag şäheri ýurdumyzyň innowasion ösüşiniň, ylmy-tehniki gazananlarynyň iş ýüzünde giňden ulanylýandygynyň aýdyň nyşany bolup durýar. Türkmenistanyň pawilýonynda halkymyzyň medeni mirasynyň aýrylmaz bölegi bolup durýan milli sungatyň däp bolan görnüşleriniň önümleri hem görkezilýär. Şolaryň hatarynda meşhur türkmen halylary, ajaýyp şaý-sepler bar. Zehinli türkmen halyçylarynyň, zergärleriniň döreden bu eserleri gözelligi, inçeligi bilen tutuş dünýäde meşhurdyr. Şeýle hem bu ýerde milli saz gurallary görkezilýär. Sergi bölüminde Gahryman Arkadagymyzyň we Arkadagly Gahryman Serdarymyzyň türkmen halkynyň baý taryhyna, medeniýetine, Watanymyzyň häzirki döwürde gazanýan üstünliklerine bagyşlanan kitaplary-da aýratyn orun eýeleýär.

Şeýlelikde, halkara ykdysady foruma we “Russia Halal EXPO” sergisine gatnaşýan döwletleriň işewür toparlarynyň wekilleri ýurdumyzyň ägirt uly ykdysady kuwwaty bilen ýakyndan tanyşmaga, türkmen kärdeşleri bilen özara gatnaşyklaryň geljegi uly ugurlaryny ara alyp maslahatlaşmaga mümkinçilik alýarlar. Türkmenistanyň bu ýerdäki pawilýonynyň sergä gelen köp sanly myhmanlarda uly gyzyklanma döredendigini bellemek gerek.

Halkymyzyň asylly däplerine görä, myhmanlara şu ýyl zähmetsöýer ekerançylarymyz tarapyndan ýetişdirilen ilkinji hasylyň naz-nygmatlary hödür edildi. Myhmanlar datly miweleriň, gök-bakja ekinleriniň önümleriniň süýji tagamyna mynasyp baha berdiler. Sergä gelenleriň arasynda Kazanyň ýokary okuw mekdeplerinde bilim alýan türkmen talyplary-da bar. Elbetde, sahawatly türkmen topragynda ýetişdirilen ir-iýmişlerden dadyp görmek mümkinçiligi ýaş watandaşlarymyzda uly kanagatlanma duýgusyny döretdi.

Sergä gatnaşyjylar Türkmenistanyň sergi bölüminiň guramaçylyk derejesine ýokary baha berdiler. Bu iri gözden geçiriliş ýurdumyzyň gazanýan uly üstünliklerini görkezýär hem-de gyzyklanma bildirýän daşary ýurtly hyzmatdaşlaryň ählisi bilen netijeli gatnaşyklary ýola goýmak üçin giň mümkinçilikleri açýar.

Aşgabat, 12-nji maý (TDH). Şu gün hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Onda ýurdumyzyň oba hojalyk toplumynda we sebitlerde alnyp barylýan işler bilen baglanyşykly meselelere garaldy.

Ilki bilen, Ahal welaýatynyň häkimi T.Nurmyradowa söz berildi. Ol welaýatdaky möwsümleýin oba hojalyk işleri barada hasabat berdi.

Bellenilişi ýaly, bugdaý ekilen meýdanlarda ideg işleri bilen bir hatarda, tohumlyk bugdaýyň hasylyny ýygnap almak, talabalaýyk saklamak üçin taýýarlyk işleri-de alnyp barylýar. Welaýatyň gowaça ekilen meýdanlarynda hatarara bejergi, ýekelemek, otag etmek işleri dowam edýär. Bu ugurda oba hojalyk tehnikalary doly güýjünde işledilýär. Pile möwsüminiň çäklerinde taýýarlanylan piläni kabul ediş nokatlaryna tabşyrmak işine guramaçylykly girişildi. Şeýle-de häkim Türkmenistanyň Konstitusiýasynyň we Döwlet baýdagynyň güni mynasybetli welaýatda geçiriljek dabaraly çärelere taýýarlyk görlüşi barada hasabat berdi.

Hormatly Prezidentimiz hasabaty diňläp, ekerançylyk meýdanlaryndaky möwsümleýin işlerde agrotehniki kadalaryň berjaý edilmeginiň oba hojalygyny netijeli alyp barmagyň esasy şertleriniň biridigini belledi we häkime degişli tabşyryklary berdi.

Balkan welaýatynyň häkimi H.Aşyrmyradow welaýatdaky möwsümleýin oba hojalyk işleri barada hasabat berdi.

Bellenilişi ýaly, häzirki wagtda sebitiň bugdaý ekilen meýdanlarynda ideg etmek, ösüş suwuny tutmak işleri ýerine ýetirilýär. Tohumlyk bugdaýyň hasylyny ýygnap almaga, ony talabalaýyk saklamaga taýýarlyk görülýär. Gowaça ekilen meýdanlarda gögeriş suwuny tutmak, gögeriş alnan meýdanlarda bolsa hatarara bejergi, otag etmek we ýekelemek işleri ýerine ýetirilýär. Bu agrotehniki çärelerde oba hojalyk tehnikalary doly güýjünde işledilýär. Şunuň bilen birlikde, ýüpek gurçugyna ideg etmek işleri alnyp barylýar. Şeýle hem häkim Türkmenistanyň Konstitusiýasynyň we Döwlet baýdagynyň güni mynasybetli welaýatda geçirilmegi göz öňünde tutulýan dabaraly çärelere taýýarlyk görlüşi barada hasabat berdi.

Hormatly Prezidentimiz hasabaty diňläp, möwsümleýin oba hojalyk işleriniň ýokary hilli geçirilmeginiň, bu işlerde kuwwatly tehnikalardan netijeli peýdalanmagyň zerurdygyny belledi hem-de bu babatda degişli tabşyryklary berdi.

Daşoguz welaýatynyň häkimi D.Babaýew welaýatda alnyp barylýan möwsümleýin oba hojalyk işleri barada hasabat berdi.

Bellenilişi ýaly, sebitde bugdaýyň bol hasylyny ösdürip ýetişdirmek maksady bilen, ak ekin meýdanlarynda agrotehnikanyň kadalaryna laýyklykda ideg etmek, ösüş suwuny tutmak işleri alnyp barylýar. Tohumlyk bugdaýyň hasylyny ýygnap almak hem-de talabalaýyk saklamak boýunça taýýarlyk işleri dowam edýär. Gowaça ekilen meýdanlarda hatarara bejergi, otag etmek, ýekelemek işleri geçirilýär. Şunda oba hojalyk tehnikalaryndan netijeli peýdalanylýar. Welaýatda şaly ekişi guramaçylykly dowam edip, ekiş geçiriljek ýerlerde sürüm, tekizleýiş we suw tutmak işleri ýerine ýetirilýär. Pile boýunça bellenen meýilnamany üstünlikli ýerine ýetirmek maksady bilen, şu günler ýüpekçi kärendeçiler tarapyndan ýüpek gurçugyna ideg etmek işleri dowam edýär. Türkmenistanyň Konstitusiýasynyň we Döwlet baýdagynyň güni mynasybetli welaýatda medeni-köpçülikleýin çäreleri guramaçylykly geçirmek babatda-da degişli taýýarlyk işleri alnyp barylýar.

Hormatly Prezidentimiz hasabaty diňläp, pagta we bugdaý ýaly aýratyn ünsi talap edýän ekinlere ideg işleriniň agrotehnikanyň kadalaryny berk berjaý etmek arkaly geçirilmeginiň zerurdygyny belledi we häkime birnäçe tabşyryklary berdi.

Lebap welaýatynyň häkimi M.Annanepesow welaýatda dowam edýän möwsümleýin oba hojalyk işleri barada hasabat berdi.

Bellenilişi ýaly, bugdaý ekilen meýdanlarda agrotehnikanyň kadalaryna laýyklykda ideg işleri geçirilýär. Ýetişdirilen tohumlyk bugdaýyň hasylyny ýygnap almak we talabalaýyk saklamak üçin ýöriteleşdirilen galla kabul ediş nokatlary möwsüme doly taýýar edildi. Şunuň bilen birlikde, galla oragynda ulanyljak oba hojalyk tehnikalaryny möwsüme taýýarlamak boýunça zerur çäreler görülýär. Welaýatyň gowaça ekilen meýdanlarynda kadaly ösüşi üpjün etmek maksady bilen, gögeriş suwuny tutmak, hatarara bejergi, ýekelemek we otag etmek işleri alnyp barylýar. Bu ugurda oba hojalyk tehnikalarynyň netijeli işledilmegine aýratyn üns berilýär. Sebitde ýetişdirilen pile hasylyny ýygnamak işleri tamamlaýjy tapgyrda alnyp barylýar. Türkmenistanyň Konstitusiýasynyň we Döwlet baýdagynyň güni mynasybetli welaýatda meýilleşdirilýän medeni-köpçülikleýin çäreleri ýokary guramaçylyk derejesinde geçirmek maksady bilen, meýilnama esasynda taýýarlyk işleri dowam edýär.

Hormatly Prezidentimiz hasabaty diňläp, bugdaýa we gowaça ideg etmek işleriniň ýokary hilli geçirilmeginiň möhümdigini belledi hem-de bu babatda häkime degişli tabşyryklary berdi.

Mary welaýatynyň häkimi B.Orazow welaýatda dowam edýän möwsümleýin oba hojalyk işleriniň barşy barada hasabat berdi.

Bellenilişi ýaly, bugdaý ekilen meýdanlarda ideg işleri dowam edýär. Tohumlyk bugdaýyň hasylyny ýitgisiz ýygnap almak, talabalaýyk saklamak üçin taýýarlyk işleri alnyp barylýar. Welaýatyň gowaça ekilen meýdanlarynda hatarara bejergi, otag etmek, ýekelemek işleri geçirilýär. Bu işlerde oba hojalyk tehnikalaryndan netijeli peýdalanylýar. Şeýle hem welaýatda ýetişdirilen pile hasylyny ýygnap almak we döwlet harmanyna tabşyrmak işleri ýerine ýetirilýär. Mundan başga-da, häkim Türkmenistanyň Konstitusiýasynyň we Döwlet baýdagynyň güni mynasybetli geçiriljek dabaraly çärelere taýýarlyk görlüşi barada hasabat berdi.

Hormatly Prezidentimiz hasabaty diňläp, welaýatyň ekerançylyk meýdanlarynda, hususan-da, gowaça we bugdaý ekilen meýdanlarda dowam edýän möwsümleýin işleriň ýokary hilli, guramaçylykly geçirilmeginiň, bu ugurda oba hojalyk tehnikalarynyň netijeli işledilmeginiň möhümdigini belledi hem-de häkime degişli tabşyryklary berdi.

Soňra Ministrler Kabinetiniň Başlygynyň orunbasary T.Atahallyýew ýurdumyzyň oba hojalygynda dowam edýän möwsümleýin işler barada hasabat berdi.

Bellenilişi ýaly, häzirki wagtda welaýatlaryň bugdaý ekilen meýdanlarynda agrotehnikanyň kadalaryna laýyklykda ideg etmek işleri alnyp barylýar. Tohumlyk bugdaý hasylyny ýygnap almak we talabalaýyk saklamak boýunça taýýarlyk işleri geçirilýär. Gowaça ekilen meýdanlarda gögeriş suwuny tutmak, gögeriş alnan ýerlerde hatarara bejergi, ýekelemek we otag etmek işleri alnyp barylýar. Bu ugurda oba hojalyk tehnikalary netijeli işledilýär. Daşoguz welaýatynda şaly ekişi dowam edýär. Bu işler bilen bir hatarda, pile möwsüminiň çäklerinde Balkan we Daşoguz welaýatlarynda ýüpek gurçugyna ideg etmek, Ahal, Lebap, Mary welaýatlarynda bolsa ýetişdirilen pile hasylyny ýygnap almak işleri ýerine ýetirilýär. Howanyň gyzmagy bilen baglylykda, ýurdumyzyň tokaý zolaklarynda, öri we ekin meýdanlarynda ýangynyň döremeginiň öňüni almak maksady bilen, ýangyna garşy gorag zolaklaryny döretmek boýunça arassaçylyk, sürüm işleri geçirilýär.

Hormatly Prezidentimiz hasabaty diňläp, ýurdumyzda azyk bolçulygyny, gaýtadan işleýän senagaty çig mal bilen üpjün edýän oba hojalyk pudagynyň milli ykdysadyýetimizdäki möhüm ornuna ünsi çekdi we pudagy durnukly ösdürmegiň, önümçilige täze tehnologiýalary we ylmyň soňky gazananlaryny giňden ornaşdyrmagyň zerurdygyny belledi hem-de wise-premýere birnäçe tabşyryklary berdi.

Soňra döwlet Baştutanymyz iş maslahatyna gatnaşyjylara ýüzlenip, welaýatlaryň gowaça meýdanlarynda hatarara bejergi, ýekelemek, otag etmek işleriniň alnyp barlyşyny berk gözegçilikde saklamagy, gowaça ideg etmekde oba hojalyk tehnikalaryny doly güýjünde işletmek üçin zerur çäreleri görmegi, bugdaý ekilen meýdanlarda ideg etmek işleriniň agrotehniki kadalara laýyk geçirilmegini üpjün etmegi, tohumlyk bugdaý hasylyny talabalaýyk ýygnap almak, daşamak hem-de saklamak işlerine gowy taýýarlyk görmegi tabşyrdy. Şeýle-de hormatly Prezidentimiz Daşoguz welaýatynda şaly ekişini bellenen möhletlerde geçirmegiň, welaýatlarda ýüpek gurçugyna ideg etmek, pile taýýarlamak boýunça netijeli işleri alyp barmagyň, pagta we bugdaý öndürijiler bilen hyzmat ediji edara-kärhanalaryň arasynda ýerine ýetirilen işler üçin hasaplaşyklaryň öz wagtynda geçirilmegini gazanmagyň möhümdigini belledi. Döwlet Baştutanymyz howanyň gyzmagy bilen baglylykda, tokaý zolaklarynda, öri we ekin meýdanlarynda ýangyn döremeginiň öňüni almak boýunça geçirilýän işleri berk gözegçilikde saklamagy, welaýatlarda Türkmenistanyň Konstitusiýasynyň we Döwlet baýdagynyň güni mynasybetli geçiriljek çärelere gowy taýýarlyk görmegi tabşyrdy.

Hormatly Prezidentimiz Serdar Berdimuhamedow iş maslahatyny jemläp, oňa gatnaşanlara berk jan saglyk, maşgala abadançylygyny, alyp barýan işlerinde uly üstünlikleri arzuw etdi.

Aşgabat — Moskwa — Aşgabat, 9-njy maý (TDH). Şu gün hormatly Prezidentimiz Serdar Berdimuhamedow iş sapary bilen Russiýa Federasiýasyna ugrady we şol ýerde Russiýanyň Prezidenti Wladimir Putiniň çakylygy boýunça 1941 — 1945-nji ýyllaryň Beýik Watançylyk urşunda gazanylan Ýeňşiň 80 ýyllygynyň hormatyna Moskwada geçirilýän dabaraly çärelere gatnaşdy. Paýtagtymyzyň Halkara howa menzilinde döwlet Baştutanymyzy resmi adamlar ugratdylar.

Ýeňiş güni milli senenamamyzda möhüm orny eýeleýär. Şol gazaply urşuň ilkinji günlerinden biziň ildeşlerimiz meýletinlik bilen fronta ugradylar we doganlyk halklar bilen bilelikde Ýer ýüzünde parahatçylygyň, nesilleriň bagtyýar durmuşynyň bähbidine egin-egne berip söweşdiler. Uruş döwründe tylda güýç-gaýratyny gaýgyrman tutanýerli zähmet çekenler hem umumy Ýeňşe ägirt uly goşant goşdular. Şu gün — 9-njy maýda Watanymyzyň ähli şäherlerinde we obalarynda aýylganç söweşlerde gahrymanlarça wepat bolan gerçeklerimiziň ýagty ýadygärligi hatyralanylýar. Ýurdumyzda frontçy weteranlar, urşuň yzynda galanlar we tylda zähmet çekenler uly hormat-sarpa, alada bilen gurşalyp alyndy. Häzirki döwürde olaryň söweş meýdanlarynda, zähmetde görkezen edermenligi türkmenistanlylaryň ýaş nesli üçin hakyky watançylygyň, gaýduwsyzlygyň we ynsanperwerligiň mekdebi bolup durýar.

Parahatçylyk — ägirt uly umumadamzat gymmatlygy. Ol durnukly ösüşiň, netijeli halkara hyzmatdaşlygyň, adamlaryň abadan durmuşynyň esasy bolup hyzmat edýär. Gahryman Arkadagymyz tarapyndan başy başlanyp, häzirki döwürde hormatly Prezidentimiziň baştutanlygynda yzygiderli durmuşa geçirilýän Bitarap Türkmenistanyň döredijilikli daşary syýasat strategiýasy ählumumy parahatçylygy, howpsuzlygy, döwletleriň hem-de halklaryň arasynda dostluk, hoşniýetli goňşuçylyk, ynanyşmak gatnaşyklaryny pugtalandyrmaga gönükdirilendir. Döwletimiziň oňyn teklipleri halkara bileleşigiň giň goldawyna mynasyp bolýar. Hemişelik Bitaraplygymyzyň 30 ýyllyk şanly senesi giňden bellenilýän 2025-nji ýylyň Türkmenistanyň başlangyjy boýunça “Halkara parahatçylyk we ynanyşmak ýyly” diýlip yglan edilmegi-de munuň aýdyň güwäsidir. Bu başlangyç Birleşen Milletler Guramasynyň Baş Assambleýasynyň degişli Kararnamasy bilen berkidildi.

...Hormatly Prezidentimiziň uçary birnäçe wagtdan Moskwanyň “Wnukowo — 2” Halkara howa menziline baryp gondy. Şol ýerde döwlet Baştutanymyzy resmi adamlar garşyladylar. Hormatly Prezidentimiz Serdar Berdimuhamedow “Prawda” we “Sowet Türkmenistany” gazetleriniň 1945-nji ýyldaky ýörite neşirleriniň nusgalary bilen tanyşdyryldy. Metbugat neşirleriniň bu taryhy sanlary Arkadagly Gahryman Serdarymyza sowgat berildi.

Soňra hormatly Prezidentimiziň awtoulag kerweni Moskwa Kremline tarap ugrady. Bu ýerde döwlet Baştutanymyzy Russiýa Federasiýasynyň Prezidenti Wladimir Putin mähirli garşylady. Iki döwletiň Baştutanlary dostlarça salamlaşyp, bilelikde ýadygärlik surata düşdüler.

Kremlden hormatly Prezidentimiz beýleki belent mertebeli myhmanlar — baýramçylyk çärelerine gatnaşmak üçin Moskwa gelen GDA ýurtlarynyň hem-de beýleki döwletleriň wekiliýetleriniň Baştutanlary bilen bilelikde Gyzyl meýdanyň merkezi münberine bardy.

Moskwa Kremliniň Spask başnýasyndaky zaňlar ýaňlanandan soňra, sagat 10:00-da Gyzyl meýdanda dabaraly Ýeňiş ýörişi başlandy. Russiýa Federasiýasynyň Prezidenti Wladimir Putin uruş weteranlaryna we dabara gatnaşýanlaryň ählisine gutlag sözi bilen ýüzlendi. Ol hemmeleri Beýik Ýeňşiň şanly 80 ýyllygy bilen tüýs ýürekden gutlady. 1941 — 1945-nji ýyllaryň Beýik Watançylyk urşunda wepat bolanlaryň hatyrasyna bir minutlyk dymyşlyk yglan edildi.

Dünýä taryhyndaky iň gazaply we gandöküşikli uruşda gazanylan Beýik Ýeňiş gününden bäri 80 ýyl geçdi. Bu uruş öwezini dolup bolmajak ýitgilere sebäp bolup, millionlarça adamyň gurban bolmagyna getirdi. Doganlyk halklar gazaply howpuň garşysyna jebisleşip, söweş meýdanlarynda edermenligiň, gaýduwsyzlygyň nusgasyny görkezdiler. Beýik Watançylyk urşunda gazanylan Ýeňiş umumy gymmatlyk bolup durýar. Hormatly Prezidentimiziň şu gezekki ýubileý dabaralaryna gatnaşmagy azat ediji gahrymanlaryň umumy edermenligine hormat-sarpanyň nyşanydyr.

Türkmen halky hem Beýik Ýeňşe mynasyp goşant goşdy. Biziň ildeşlerimiz frontlarda gaýduwsyzlyk bilen söweşip, gahrymançylyk, edermenlik we ruhubelentlik görkezdiler. Türkmenistanly esgerleriň edermenligi Watana söýginiň, borja wepalylygyň hakyky nusgasydyr. Uruşdan mähriban ojaklaryna dolanmadyk hem-de Ýeňiş bilen gaýdyp gelen ildeşlerimiziň atlary “Hatyra” we “Şöhrat” kitaplaryna girizildi.

...Gyzyl meýdandaky baýramçylyk dabarasy ýetip gelýär. Münberiň öňünden Russiýa Federasiýasynyň we beýleki ýurtlaryň goşunlarynyň wekilleri batly gadam urup geçýärler. Şolaryň hatarynda Türkmenistanyň Goranmak ministrliginiň Hormat garawulynyň batalýony hem bar. Häzirki wagtda ýaş türkmen esgerleri ata-babalarymyzyň şöhratly däplerini mynasyp dowam etdirýärler. Şunda pederlerimiziň parasatly wesýetlerine wepaly nesilleriň aýrylmaz arabaglanyşygy hem-de dowamatlylygy öz beýanyny tapýar.

Biz edermenlik üçin türkmenistanlylaryň 104-siniň “Sowet Soýuzynyň Gahrymany” diýen belent ada mynasyp bolandygyna, 19 frontçynyň bolsa “Şöhrat” ordeniniň doly eýeleri bolandygyna çäksiz buýsanýarys. Ildeşlerimiziň müňlerçesi söweşjeň orden-medallar bilen sylaglanyldy. Olaryň hatarynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň atasy, hormatly Prezidentimiz Serdar Berdimuhamedowyň garry atasy Berdimuhamet Annaýew hem bar. Häzirki wagtda Berdimuhamet Annaýewiň durmuş ýoly ýurdumyzyň ýaşlary üçin watançylygyň, belent ruhy-ahlak gymmatlyklaryna ygrarlylygyň nusgasy bolup hyzmat edýär. Ilhalar ynsan Berdimuhamet Annaýew fronta meýletinlik bilen gidip, uruşdan agyr ýaralanyp geldi hem-de mugallymçylyk işini dowam etdi. Ol SSSR-iň Ýokary Sowetiniň Prezidiumynyň 1949-njy ýylyň 2-nji martyndaky Permany esasynda “Hormat nyşany” ordeni bilen sylaglanyldy. 2018-nji ýylyň iýunynda bolsa Russiýa Federasiýasynyň Prezidentiniň Permanyna laýyklykda, Berdimuhamet Annaýewiň Russiýa Federasiýasynyň ýokary döwlet sylagy — “Edermenligi üçin” diýen medaly bilen sylaglanandygyny bellemek gerek. Beýik Ýeňşiň 75 ýyllygy mynasybetli Russiýadan Türkmenistana 206-njy atyjylyk diwiziýasynyň 748-nji atyjylyk polkunyň söweşjeň baýdagy getirildi. Berdimuhamet Annaýew hut şu baýdak astynda batyrgaý söweşipdir.

Gazaply uruş ýyllarynda tylda tutanýerli zähmet çeken ildeşlerimiziň edermenligi hem hiç wagt ýatdan çykarylmaz. Olar janyny aýaman kärhanalarda, ekin meýdanlarynda zähmet çekip, oba hojalyk ekinleriniň bol hasylyny ýetişdirdiler we ýygnadylar. Gahryman Arkadagymyzyň kakasy Mälikguly Berdimuhamedow ýetginjekkä, 1944-nji ýylda “Köp ekeliň dänäni!” atly goşgusyny ýazypdyr. Bu täsirli setirlerde hakyky watançylyk, Ýeňiş gününi ýakynlaşdyrmak üçin tagallalar öz beýanyny tapýar.

Ýeňşe Türkmenistanyň medeniýet we sungat işgärleri-de mynasyp goşant goşdular. Olar konsert toparlarynyň düzüminde ençeme gezek söweşleriň dowam edýän ýerlerine bardylar. Kähalatlarda şeýle konsertler frontuň öň hatarynda hem geçirildi. Ählihalk işine türkmen zenanlary-da uly goşant goşdular. Olar urşa giden gerçekleriň ýerine halk hojalygynyň dürli pudaklarynda tutanýerlilik bilen zähmet çekdiler. Goranmak gaznasyna 7400 kilograma golaý altyn-kümüş şaý-seplerini tabşyrdylar.

Ýurdumyzyň çägine senagat kärhanalary, harby hassahanalar, okuw mekdepleridir edaralar göçürilip getirildi. Türkmenistanlylar söweş hereketleriniň gidýän ýerinden getirilen adamlary hem aýratyn üns we mähir bilen gurşap alyp, olary öz maşgalalaryna kabul etdiler. Aýratyn-da, ýerli ýaşaýjylar göçürilen çagalary mähir bilen gurşap aldylar. Bularyň ählisi halkymyzyň doganlyk goldawy, birek-birege ýardam bermek, raýdaşlyk ýaly ýörelgelere wepalylygynyň aýdyň güwäsi boldy. Uruş gutarandan soňra, göçürilip getirilen maşgalalaryň köpüsi mähriban ojaklaryna gaýdyp bardy. Ýöne Türkmenistanda hemişelik galmak kararyna gelen adamlar hem az bolmady.

Türkmen halky gadymdan bäri mähriban topragyny gaýduwsyzlyk bilen goranlara uly sarpa goýup gelipdir. Bu asylly däplere eýerilip, ýurdumyzda Beýik Watançylyk urşunyň weteranlary hemmetaraplaýyn alada bilen gurşalyp alyndy. Beýik Watançylyk urşuna gatnaşanlaryň hem-de geçen asyryň 40-njy ýyllarynda tylda zähmet çekenleriň ählisiniň mynasyp durmuşyny üpjün etmek Türkmenistanyň döwlet syýasatynyň ileri tutulýan ugurlarynyň biri bolup durýar. Her ýyl Beýik Ýeňşiň hormatyna uruş weteranlaryna, urşuň yzynda galanlara dabaraly ýagdaýda gymmatly sowgatlar gowşurylýar. Frontçular we tylda zähmet çekenler üçin durmuş ýeňillikleri göz öňünde tutuldy.

...Dabaraly ýöriş tamamlanandan soňra, şanly sene mynasybetli Moskwa gelen döwlet Baştutanlary, asylly däbe görä, Kreml diwarynyň ýanyndaky Aleksandrow bagyna ugradylar we şol ýerde Näbelli esgeriň guburyna gül goýdular.

Belent mertebeli myhmanlar matam sazynyň owazy astynda ýadygärlikler toplumyna barýarlar. Olaryň öňünden harby gullukçylar gül çemenlerini göterip barýarlar. Bir minutlyk dymyşlyk yglan edilýär we Russiýa Federasiýasynyň Döwlet senasy ýaňlanýar. Hormatly Prezidentimiz Serdar Berdimuhamedow 1941 — 1945-nji ýyllaryň Beýik Watançylyk urşunyň söweş meýdanlarynda tutuş adamzadyň parahat durmuşy we azatlygy ugrunda faşizme garşy göreşen gahrymanlary hatyralap, Baky oda gülleri goýdy.

Hormat garawulynyň hem-de Russiýa Federasiýasynyň Ýaragly Güýçleriniň goşun kysymlaryna wekilçilik eden düzümleriň esgerleri ýadygärlikler toplumynyň öňünden batly gadam urup geçýärler. Soňra wekiliýetleriň Baştutanlarynyň bilelikde surata düşmek dabarasy boldy.

Ýeňiş güni mukaddes we nurana baýramdyr. Biz onuň şatlygyny doganlyk halklar bilen paýlaşýarys. Gahrymanlaryň şan-şöhrata beslenen edermenligi baradaky hakyda müdimilik kalplarymyzda ýaşap, dostlugyň, hoşniýetli döwletara gatnaşyklaryň pugtalandyrylmagyna ýardam edýär.

Beýik Ýeňşiň 80 ýyllygy mynasybetli dabaraly çäreler tamamlanandan soňra, hormatly Prezidentimiz Serdar Berdimuhamedow “Wnukowo — 2” Halkara howa menziline bardy we şol ýerden Watanymyza ugrady.

Arkadagly Gahryman Serdarymyzyň uçary birnäçe wagtdan soňra Aşgabadyň Halkara howa menziline gelip gondy. Bu ýerde döwlet Baştutanymyzy resmi adamlar garşyladylar.

Türkmenistanda Ýeňiş güni baýram edildi

Aşgabat, 9-njy maý (TDH). Şu gün ýurdumyzda şanly baýram — 1941 — 1945-nji ýyllaryň Beýik Watançylyk urşunda gazanylan Ýeňşiň 80 ýyllygy bellenildi. Paýtagtymyzdaky “Halk hakydasy” ýadygärlikler toplumynda geçirilen gül goýmak dabarasyna türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow gatnaşdy.

Halklaryň Beýik Ýeňşiň hatyrasyna arzuw-umytlaryny, güýç-gaýratyny we zähmetini alamatlandyrýan bu nurana baýram türkmenistanlylaryň durmuşynda-da möhüm orny eýeleýär. Hormatly Prezidentimiz Serdar Berdimuhamedow Beýik Ýeňşiň 80 ýyllygy mynasybetli Garaşsyz, hemişelik Bitarap Türkmenistanyň halkyna iberen Gutlagynda Berkarar döwletiň täze eýýamynyň Galkynyşy döwründe eziz Watanymyzy ösdürmäge, ýaş nesilleri watançylygyň, mertligiň belent ruhunda terbiýelemäge, halkymyzyň agzybirligini, jebisligini berkitmäge uruş we zähmet weteranlarymyzyň örän uly goşant goşýandyklaryny belleýär. Döwlet Baştutanymyzyň nygtaýşy ýaly, dünýäniň gülläp ösýän döwletleriniň birine öwrülýän ýurdumyzda 1941 — 1945-nji ýyllarda watançylygyň deňi-taýy bolmadyk nusgasyny görkezen weteranlarymyzyň, urşuň gazaply günlerini başdan geçiren enelerimiziň, gaýduwsyzlyk bilen zähmet çeken raýatlarymyzyň sylag-hormaty örän ýokarydyr. Eziz Watanymyzy söýmegi, ynsan mertebesini belent tutmagy, ata-enä sarpa goýmagy ündeýän, hakyky watançylary terbiýelemekde görelde bolýan ýaşuly nesillerimiz biziň buýsanjymyzdyr.

Gazaply urşuň söweş meýdanlarynda edermenlik we gaýduwsyzlyk görkezen ildeşlerimiz “Gahryman” diýen belent ada mynasyp boldular, söweş ordenleridir medallar bilen sylaglandylar. Şolaryň hatarynda Gahryman Arkadagymyzyň atasy, hormatly Prezidentimiz Serdar Berdimuhamedowyň garry atasy Berdimuhamet Annaýew hem bar. Onuň durmuş ýoly häzirki wagtda türkmen ýaşlary üçin hakyky watançylygyň, gahrymançylygyň, belent adamkärçiligiň nusgasydyr. Mälim bolşy ýaly, 2020-nji ýylda Beýik Watançylyk urşunda gazanylan Ýeňşiň 75 ýyllygynyň baýram edilen günleri ýurdumyz we halkymyz üçin aýratyn ähmiýetli waka beslendi. Türkmenistana Berdimuhamet Annaýewiň söweşen 206-njy atyjylyk diwiziýasynyň 748-nji atyjylyk polkunyň söweşjeň baýdagy hem-de şahsy maglumaty getirildi. Asylly zähmeti bilen ildeşleriniň çuňňur hormatyna mynasyp bolan ussat mugallym, edermen esgeriň harby gulluk resminamalary we onuň gulluk eden polkunyň söweşjeň baýdagy paýtagtymyzdaky Berdimuhamet Annaýewiň adyny göterýän harby mekdebe gowşuryldy. Söweşjeň baýdagyň getirilmegi hem-de Berdimuhamet Annaýewiň Russiýanyň ýokary döwlet sylagyna — “Edermenligi üçin” medalyna mynasyp bolmagy Beýik Watançylyk urşy ýyllarynda beýleki halklaryň wekilleri bilen egin-egne berip, duşman bilen gaýduwsyz söweşen hem-de Ýeňşe uly goşant goşan türkmenistanly esgerlere çäksiz hormatyň, Türkmenistan bilen Russiýanyň arasynda ynanyşmagyň, dostluk gatnaşyklarynyň mizemez nyşany boldy.

Beýik Ýeňşiň 80 ýyllygynyň ýurdumyz üçin ýene-de bir şanly sene bolan hemişelik Bitaraplygymyzyň 30 ýyllygynyň bellenilýän ýylynda baýram edilmegi buýsandyryjy ýagdaýdyr. 2025-nji ýylyň 21-nji martynda Birleşen Milletler Guramasynyň Baş Assambleýasynyň 79-njy sessiýasynyň 61-nji plenar mejlisinde «Türkmenistanyň hemişelik Bitaraplygy» atly Kararnamanyň biragyzdan kabul edilmegi ýurdumyzyň ählumumy abadançylygyň we ösüşiň üpjün edilmegine gönükdirilen Bitaraplyk hukuk derejesine, ynsanperwer syýasatyna, parahatçylyk we ynanyşmak ýörelgeleriniň dabaralandyrylmagy ugrunda öňe sürýän başlangyçlaryna berilýän ýokary bahanyň nyşany boldy. Häzirki wagtda Garaşsyz, hemişelik Bitarap Watanymyz sebit we ählumumy derejede ykrar edilen parahatçylyk dörediji merkeze öwrüldi.

Milli gahrymanlarymyza belent sarpa goýmak we olary ýatlamak ähli döwürlerde hem türkmen jemgyýetiniň mukaddes ýörelgeleriniň biridir. Ýurdumyzda ýowuz urşa gatnaşanlar hem-de olaryň maşgala agzalary aýratyn üns-alada bilen gurşalýar. Milli gahrymanlarymyzyň atlary “Hatyra” we “Şöhrat” kitaplarynda ebedileşdirildi. Weteranlara durmuş ýeňillikleri bilen birlikde, maddy kömek berilýär. Hormatly Prezidentimiz ildeşlerimize milli gahrymanlarymyz baradaky hakydany gorap saklamagyň we ebedileşdirmegiň mynasyp nusgasyny görkezýär. Şu ýyl hem döwlet Baştutanymyz Beýik Watançylyk urşuna gatnaşanlara hem-de uruşda wepat bolan esgerleriň ýanýoldaşlaryna pul we gymmat bahaly sowgatlary gowşurmak hakynda Permana gol çekdi. Hormatly Prezidentimiz Ýeňiş güni mynasybetli dabaralaryň möhümdigini we şeýle çäreleriň Watanymyzyň durmuşynda uly syýasy ähmiýetiniň bardygyny belleýär.

...Belentde howalanyp görünýän “Halk hakydasy” ýadygärlikler toplumynyň ýanyna uly mähelle ýygnandy. Bu ýerde — “Milletiň ogullary” ýadygärliginde biz Watan ugrundaky söweşlerde şehit bolanlary, “Baky şöhrat” ýadygärliginde Beýik Watançylyk urşunda wepat bolanlary, “Ruhy tagzym” ýadygärliginde Aşgabat ýertitremesinde gurban bolanlary hatyralaýarys.

Dabara gatnaşyjylar türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowy mähirli garşylaýarlar. Olaryň hatarynda Mejlisiň Başlygy, Hökümet agzalary, daşary döwletleriň we halkara guramalaryň Türkmenistandaky diplomatik wekilhanalarynyň, ýurdumyzyň ministrlikleriniň, pudaklaýyn dolandyryş edaralarynyň, harby we hukuk goraýjy düzümleriň, jemgyýetçilik guramalarynyň, köpçülikleýin habar beriş serişdeleriniň ýolbaşçylarydyr wekilleri, hormatly ýaşulular, ýaşlar bar.

Gahryman Arkadagymyz bu ýerde guralan dabara gatnaşýan Beýik Watançylyk urşunyň weteranlarynyň, urşa gatnaşanlaryň ýanýoldaşlary, tylda zähmet çeken merdana weteranlar bilen hal-ahwal soraşdy hem-de olary Ýeňiş baýramy bilen gutlady.

Köp kynçylyklary görüp, eşretli zamanada ýaşamak bagty miýesser eden weteranlar hemmetaraplaýyn üns-alada bilen gurşalýandygy, şeýle hem şanly sene mynasybetli döwlet Baştutanymyzyň adyndan baýramçylyk sowgatlarynyň gowşurylandygy we gutlaglar üçin Gahryman Arkadagymyza, Arkadagly Gahryman Serdarymyza tüýs ýürekden hoşallyklaryny beýan etdiler.

Milli Liderimiz döwletimiziň mundan beýläk-de ýaşuly nesiller barada alada etjekdigini, bu işleriň yzygiderli üns merkezinde saklanjakdygyny nygtady. Gahryman Arkadagymyz Türkmenistanyň Döwlet howpsuzlyk geňeşiniň sekretary, goranmak ministri B.Gündogdyýewe weteranlar baradaky aladanyň ünsden düşürilmeli däldigini aýdyp, olar bilen yzygiderli duşuşyp, hal-ýagdaýlary bilen häli-şindi gyzyklanyp durmak babatda birnäçe maslahatlary berdi.

Döwlet howpsuzlyk geňeşiniň sekretary, goranmak ministri B.Gündogdyýew Türkmenistanyň Ýaragly Güýçleriniň Belent Serkerdebaşysy hormatly Prezidentimiziň tabşyrygyna laýyklykda, uruş weteranlary we urşa gatnaşanlaryň ýanýoldaşlary, uruş ýyllarynda tylda zähmet çeken weteranlar bilen geçirilmeli duşuşyklaryň ýörite maksatnamasynyň düzülendigi barada hasabat berdi.

“Halk hakydasy” ýadygärlikler toplumynda dabaranyň başlanýandygyny alamatlandyryp, Türkmenistanyň Döwlet senasy ýaňlanýar. Hormat garawulynda beýik pederlerimiziň şöhratly söweşjeň däplerini mynasyp dowam etdirýän ýaş harby gullukçylar hatara düzüldiler. Dabaranyň möhüm pursady ýetip gelýär: söweşjeň buýsanjyň we hakydanyň mukaddes ýerlerine öwrülen belent ýadygärliklere hormatly Prezidentimiziň adyndan ajaýyp gül desseleri goýulýar.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow “Milletiň ogullary”, “Ruhy tagzym” we “Baky şöhrat” ýadygärliklerine tagzym etdi. Soňra Gahryman Arkadagymyz we Beýik Watançylyk urşunyň weteranlary, ýaşululardyr tylda zähmet çeken eneler “Baky şöhrat” ýadygärligine gül desselerini goýdular. Milli Liderimiz weteranlary hormatly Prezidentimiziň adyndan sarpalap, ýene-de bir gezek Ýeňiş güni bilen gutlady hem-de olara berk jan saglyk, uzak ömür arzuw etdi.

Soňra dabara gatnaşanlaryň ählisi belent hormat duýgusy bilen ýadygärlige gül desselerini goýdular. Milli gahrymanlarymyzyň edermenligine sarpa goýmak üçin bu ýere talyplar, frontçy esgerleriň agtyk-çowluklary hem geldiler. Türkmenistanlylaryň ýaş nesilleri olara buýsanmaga haklydyrlar.

Gül goýmak dabarasynyň ahyrynda Gahryman Arkadagymyz Hökümet agzalary, harby we hukuk goraýjy edaralaryň ýolbaşçylary bilen bilelikde bu ýerdäki muzeýe bardy hem-de 1941 — 1945-nji ýyllaryň Beýik Watançylyk urşunyň söweşlerinde wepat bolan watandaşlarymyzyň edermenliklerine bagyşlanan sergi bilen tanyşdy.

Milli Liderimiziň atasy, ýowuz urşa gatnaşan Berdimuhamet Annaýewiň portreti merkezi orunda ýerleşdirilipdir. Bu görnükli şahsyýetiň zähmet, söweş we durmuş ýoly ýaş nesiller üçin görelde mekdebidir. Türkmenistanyň Halk Maslahatynyň Başlygy gaýduwsyz gahrymanlarymyzyň we Watan goragçylarymyzyň edermenliginiň ýaşlar üçin watançylygyň belent nusgasy, türkmenistanlylaryň häzirki we geljek neslini çuň watansöýüjilik, wepalylyk ruhunda terbiýelemekde hemişe mynasyp ýolgörkeziji bolup galjakdygyny belledi.

Gahryman Arkadagymyz halkymyzyň agzybirligini we jebisligini pugtalandyrmakda, ýaş nesli Watana wepalylyk ruhunda terbiýelemekde, milli däp-dessurlarymyzy wagyz etmekde weteranlaryň uly goşandynyň bardygyny nygtap, ýygnananlary Beýik Ýeňşiň 80 ýyllyk şanly senesi bilen ýene-de bir gezek gutlady hem-de hemmelere berk jan saglyk, uzak ömür, parahat, abadan we bagtyýar durmuş arzuw etdi.

Milli gahrymanlarymyza baky hormat we şöhrat bolsun! Biz bagtyýar şu günümiziň we geljegimiziň goragynda görkezen gahrymançylygy, edermenligi üçin olaryň öňünde baş egýäris.

* * *

Şu gün ýurdumyzyň ähli künjeklerinde edermen Watan goragçylaryna hormat-sarpanyň nyşany hökmünde 1941 — 1945-nji ýyllaryň urşunda gaýduwsyzlyk bilen söweşip, wepat bolan milli gahrymanlarymyzyň hormatyna bina edilen ýadygärliklere gül desseleri goýuldy. Welaýatlaryň we etraplaryň merkezlerindäki konsert meýdançalarynyň ählisinde döredijilik toparlarynyň çykyşlary ýaýbaňlandyryldy. “Halkara parahatçylyk we ynanyşmak ýyly” şygary astynda geçýän şu ýylda Ýeňiş güni mynasybetli geçirilen dabaralar parahatçylyk dörediji döwlet bolan Garaşsyz, baky Bitarap Watanymyza buýsanjymyzy has-da artdyrdy.

Beýleki habarlar