Ankara, 30-njy oktýabr (TDH). Şu gün Türkiýe Respublikasyna iş saparynyň çäklerinde hormatly Prezidentimiz Serdar Berdimuhamedow bilen Prezident Rejep Taýyp Ärdoganyň arasynda duşuşyk geçirildi.

Türkiýe Respublikasynyň Prezidenti belent mertebeli myhmany mähirli mübärekläp, çakylygy kabul edendigi üçin tüýs ýürekden hoşallyk bildirdi hem-de mümkinçilikden peýdalanyp, türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyza mähirli salamyny we iň gowy arzuwlaryny beýan etdi.

Döwlet Baştutanymyz Türki Döwletleriň Guramasynyň şu gün geçirilen nobatdaky sammitiniň ýokary guramaçylyk derejesini belläp, sammite gatnaşmaga çakylyk, Türkmenistanyň wekiliýetine bildirilen myhmansöýerlik we duşuşmaga döredilen mümkinçilik üçin minnetdarlyk bildirdi hem-de Gahryman Arkadagymyzyň Prezident Rejep Taýyp Ärdogana iberen mähirli salamyny, iň gowy arzuwlaryny ýetirdi. Şeýle hem hormatly Prezidentimiz Türkmenistan bilen Türkiýe Respublikasynyň arasyndaky dostlukly gatnaşyklary we strategik hyzmatdaşlygy pugtalandyrmaga goşýan şahsy goşandy üçin dostlukly ýurduň Prezidentine aýratyn minnetdarlyk bildirdi.

Duşuşygyň dowamynda bellenilişi ýaly, iki ýurduň döwlet Baştutanlarynyň arasynda yzygiderli geçirilýän ýokary derejeli duşuşyklar we gepleşikler syýasy, söwda-ykdysady hem-de medeni-ynsanperwer hyzmatdaşlygy ösdürmäge uly itergi berýär.

Döwlet Baştutanymyz pursatdan peýdalanyp, Prezident Rejep Taýyp Ärdogany özi üçin amatly wagtda Türkmenistana resmi sapar bilen gelmäge çagyrdy. Türkiýäniň Prezidenti çakylyk üçin hoşallyk bildirip, doganlyk Türkmenistan bilen strategik hyzmatdaşlygyň yzygiderli ösdürilmegine Türkiýede uly ähmiýet berilýändigini belledi.

Duşuşygyň ahyrynda hormatly Prezidentimiz Serdar Berdimuhamedow hem-de Prezident Rejep Taýyp Ärdogan däp bolan dostlukly döwletara gatnaşyklaryň iki doganlyk halkyň abadançylygynyň bähbidine mundan beýläk-de ugurlaryň giň gerimi boýunça ösdüriljekdigine ynam bildirip, birek-birege iň gowy arzuwlaryny beýan etdiler.

Türkmenistanyň Prezidentiniň Türkiýe Respublikasyna iş sapary tamamlandy

Ankara — Aşgabat, 30-njy oktýabr (TDH). Ozal habar berlişi ýaly, düýn hormatly Prezidentimiz Serdar Berdimuhamedow iş sapary bilen Türkiýe Respublikasyna bardy. Şu gün saparynyň çäklerinde döwlet Baştutanymyz Türki Döwletleriň Guramasynyň döwlet Baştutanlarynyň XIII sammitine gatnaşdy.

Ir bilen hormatly Prezidentimiz Türkiýe Respublikasynyň Prezidentiniň köşkler toplumyna bardy. Bu ýerde döwlet Baştutanymyzy Prezident Rejep Taýyp Ärdogan mähirli garşylady we bilelikde ýadygärlik surata düşdüler.

Sammite gatnaşýan ýurtlaryň döwlet Baştutanlarynyň ählisiniň bilelikde resmi surata düşmek dabarasy tamamlanandan soňra, TDG-niň döwlet Baştutanlarynyň XIII sammiti geçirildi.

Türkiýe Respublikasynyň Prezidenti Rejep Taýyp Ärdogan sammite gatnaşýan döwlet Baştutanlaryny mähirli mübärekläp, çakylygy kabul edip Türkiýä gelendikleri üçin hoşallygyny beýan etdi hem-de şu günki duşuşygyň özara hyzmatdaşlygy mundan beýläk-de ösdürmäge itergi berjekdigini nygtady.

Şeýle hem Prezident Rejep Taýyp Ärdogan öz çykyşynda hormatly Prezidentimiziň parasatly baştutanlygynda Türkmenistanyň Türki Döwletleriň Guramasynyň işine goşýan goşandyna ýokary baha berdi.

Türkiýäniň Prezidenti “Türkmenistanyň Prezidenti Arkadagly Serdar Berdimuhamedowa söz berýärin” diýip, döwlet Baştutanymyza çykyş etmek üçin söz berdi.

Hormatly Prezidentimiz Serdar Berdimuhamedow çykyşynyň başynda Türkiýe Respublikasynyň Prezidenti Rejep Taýyp Ärdogana Türki Döwletleriň Guramasynyň XIII sammitine gatnaşmaga çakylyk, şeýle hem türkmen wekiliýetine görkezilen mähirli myhmansöýerlik üçin tüýs ýürekden minnetdarlyk bildirdi hem-de mümkinçilikden peýdalanyp, türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň döwlet Baştutanlaryna iberen mähirli salamyny we iň gowy arzuwlaryny ýetirdi.

Döwlet Baştutanymyz şu günki duşuşygyň Türkiýe Respublikasynyň milli baýramy bolan Respublika güni bilen gabat gelmeginiň aýratyn many-mazmunyny belläp, bu şanly baýram mynasybetli Türkiýe Respublikasynyň Prezidenti Rejep Taýyp Ärdogany we ähli doganlyk türk halkyny tüýs ýürekden gutlady hem-de Türkiýe Respublikasyna mundan beýläk-de gülläp ösüş, abadançylyk we täze üstünlikleri arzuw etdi.

Türkmenistan türki dünýäniň ýurtlary bilen dostlukly gatnaşyklary pugtalandyrmaga aýratyn ähmiýet berýär. Şol sebäpli, biz Türki Döwletleriň Guramasyny doganlyk döwletleriň arasynda özara ynamy berkitmegiň, netijeli gatnaşyklary ösdürmegiň we amaly hyzmatdaşlygy giňeltmegiň möhüm guramasy hökmünde görýäris. Onuň işiniň netijeli bolmagy, ilkinji nobatda, halklarymyzyň bähbidine gönükdirilen anyk başlangyçlaryň we özara bähbitli taslamalaryň durmuşa geçirilmegi bilen baglanyşyklydyr.

Türki döwletler giň ykdysady mümkinçiliklere eýedir. Olary netijeli peýdalanmak üçin energetika, ulag-aragatnaşyk, senagat, oba hojalygy, gurluşyk, dokma, çig maly gaýtadan işlemek we ykdysadyýetiň beýleki pudaklarynda hyzmatdaşlygy has-da ösdürmek zerur bolup durýar. Şol bir wagtda, özara maýa goýumlary höweslendirmek, telekeçileriň arasynda gatnaşyklary giňeltmek we bilelikdäki önümçilik taslamalaryny durmuşa geçirmek üçin mundan beýläk-de amatly şertleriň döredilmegini maksadalaýyk hasaplaýarys.

Ykdysady ösüşi üpjün etmekde we sebitara gatnaşyklary giňeltmekde ulag-aragatnaşyk ulgamy strategik ähmiýete eýedir. Ýurtlarymyzyň amatly geografik ýerleşişi Merkezi Aziýany, Hazar sebitini, Günorta Kawkazy, Gara deňiz sebitini, Türkiýäni we Ýewropany birleşdirýän ulag geçelgelerini ösdürmek üçin giň mümkinçilikleri açýar. Bu mümkinçilikleri netijeli ulanmak maksady bilen, Hazarüsti halkara ulag geçelgesiniň kuwwatyny artdyrmagy möhüm hasaplaýarys diýip, hormatly Prezidentimiz sözüni dowam etdi we munuň üçin ýurdumyzyň Türkmenbaşy Halkara deňiz portunyň infrastrukturasyny gönükdirmäge taýýardygyny tassyklady.

Şeýle hem döwlet Baştutanymyz ulag ulgamyny döwrebaplaşdyrmagyň, halkara ýük daşamalaryň şertlerini has-da kämilleşdirmegiň, gümrük amallaryny yzygiderli ýeňilleşdirmegiň, sanly tehnologiýalary giňden ornaşdyrmagyň zerurdygyny belläp, üstaşyr geçelgeleriň geçirijilik ukybyny ýokarlandyrmak, logistika amallaryny utgaşdyrmak we ýükleriň geçirilmegi üçin amatly şertleri döretmek boýunça tagallalary birleşdirmegiň maksadalaýyk boljakdygyny aýtdy.

Nygtalyşy ýaly, ýene-de bir wajyp mesele daşky gurşawy goramak we tebigy serişdeleri rejeli peýdalanmak bolup durýar. Türkmenistan bu wezipä döwlet syýasatynyň baş ugurlarynyň biri hökmünde garaýar. Ýurdumyz ekologik abadançylygy üpjün etmäge, howanyň üýtgemeginiň ýaramaz täsirlerini azaltmaga, ekologik howpsuzlygy pugtalandyrmaga we durnukly ösüşiň ekologik esaslaryny berkitmäge aýratyn ähmiýet berýär.

Mälim bolşy ýaly, suw serişdelerini tygşytly ulanmak, çölleşmä garşy göreşmek, ýerleriň zaýalanmagynyň öňüni almak we tebigy ekoulgamlary goramak möhüm meselelerdir. Olaryň netijeli çözgütleriniň tapylmagy biziň ýurtlarymyzyň milli bähbitlerine doly laýyk gelýär.

Şu maksat bilen, Türkmenistan Aşgabatda Howanyň üýtgemegi bilen bagly tehnologiýalar boýunça we Çölleşmä garşy göreşmek boýunça sebit merkezlerini döretmek baradaky başlangyçlary Birleşen Milletler Guramasynyň derejesinde öňe sürdi diýip, hormatly Prezidentimiz aýtdy. Bu merkezleriň ekologik meseleleriň çözülmegine, ylmy-amaly hyzmatdaşlygyň giňeldilmegine hem-de sebit derejesinde utgaşykly çemeleşmeleriň ösdürilmegine ýardam etjekdigine ynam bildirdi.

Hormatly Prezidentimiz halklarymyzyň arasyndaky gadymy taryhy we ruhy arabaglanyşygyň medeni-ynsanperwer hyzmatdaşlygyň berk binýadyny emele getirýändiginiň, onuň medeni mirasy ösdürmek, ylym-bilime hormat goýmak, maşgala mukaddesligini sarpalamak, ulyny sylamak, myhmansöýerlik we parahatçylykly ýaşaýyş ýaly asylly ýörelgeleri özünde jemleýändigini belläp, bu gymmatlyklary has-da dabaralandyrmak maksady bilen, durmuş ulgamlarynda hyzmatdaşlygy giňeltmegiň möhümdigini nygtady.

Bellenilişi ýaly, ýokary okuw mekdepleriniň, ylmy-barlag merkezleriniň, döredijilik toparlarynyň we ýaşlar guramalarynyň arasynda gatnaşyklary ösdürmek, bilelikdäki bilim maksatnamalaryny hem-de akademiki alyşmalary ýola goýmak bu ugurda täze mümkinçilikleri döreder.

Şeýle hem syýahatçylyk gatnaşyklaryny ösdürmek üçin giň mümkinçilikler bar. Biz özara syýahatçylyk alyşmalaryny giňeltmek we ýurtlarymyzyň gadymy ýadygärliklerini halkara derejede wagyz etmek üçin bilelikdäki başlangyçlary goldaýarys.Ýurtlarymyzyň taryhy ýerleri, tebigy gözellikleri we milli däpleri halkara syýahatçylygy ösdürmekde uly ähmiýete eýedir.

Halkara parahatçylygy we howpsuzlygy pugtalandyrmak, halkara hukugyň umumy ykrar edilen kadalaryna hormat goýmak hem-de köptaraplaýyn hyzmatdaşlygy ösdürmek biziň döwletlerimiziň öňünde durýan möhüm wezipelerdir diýip, döwlet Baştutanymyz sözüni dowam etdi. Şunuň bilen baglylykda, Türki Döwletleriň Guramasy bilen Birleşen Milletler Guramasynyň arasyndaky hyzmatdaşlygy giňeltmegiň aýratyn ähmiýetini belledi. Munuň özi Durnukly ösüş maksatlaryna ýetmäge, halkara derejede ynanyşmagy pugtalandyrmaga, ykdysady gatnaşyklary ösdürmäge we ynsanperwer hem-de ekologik meseleleriň çözülmegine uly goşant bolar.

Bu ugurlarda ýurdumyzyň halkara başlangyçlary hem möhüm ähmiýete eýedir. Türkmenistanyň başlangyjy bilen Birleşen Milletler Guramasynyň Baş Assambleýasy 2028-nji ýyly “Halkara hukuk ýyly” diýip yglan etmek barada Kararnamany kabul etdi. Bu çözgüt halkara hukugyň ähmiýetini has-da ýokarlandyrmaga, onuň kadalarynyň we ýörelgeleriniň halkara gatnaşyklarda berk berjaý edilmegine gönükdirilendir diýip, hormatly Prezidentimiz aýtdy. Şonuň ýaly-da, şu günki ýokary derejeli duşuşygyň netijeleriniň döwletlerimiziň arasynda dostlukly hyzmatdaşlygyň täze ugurlaryny kesgitlemäge, bilelikdäki başlangyçlary durmuşa geçirmäge uly itergi berjekdigine ynam bildirdi.

Döwlet Baştutanymyz mümkinçilikden peýdalanyp, ähli gatnaşyjy döwletleriň Prezidentlerine Türkmenistan bilen doganlyk gatnaşyklary ösdürmäge yzygiderli üns berýändikleri üçin tüýs ýürekden minnetdarlyk bildirdi.

Şeýle hem hormatly Prezidentimiz Türki Döwletleriň Guramasynyň Baş sekretary Kubanyçbek Omuraliýewe guramanyň işini netijeli guramakda we bu sammitiň üstünlikli geçirilmegine goşandy üçin minnetdarlyk bildirdi.

Hormatly Prezidentimiz çykyşynyň ahyrynda Türki Döwletleriň Guramasynyň täze Baş sekretaryna jogapkärli işinde üstünlikleri, sammite gatnaşyjylaryň ählisine jan saglyk, bagtyýarlyk, uzak ömür, doganlyk halklara bolsa abadançylyk, rowaçlyk we täze üstünlikleri arzuw etdi.

Döwlet Baştutanymyzyň çykyşy uly üns bilen diňlenildi.

Sammitiň dowamynda söwda-ykdysady hyzmatdaşlygy işjeňleşdirmek, sanly ykdysadyýeti ösdürmek, söwda we gümrük amallaryny ýeňilleşdirmek, ulag-logistika geçelgeleriniň mümkinçiliklerini artdyrmak, medeni-ynsanperwer hyzmatdaşlygy pugtalandyrmak bilen baglanyşykly meseleler barada pikir alşyldy. Şeýle hem gatnaşyjy ýurtlar üçin özara gyzyklanma bildirilýän möhüm sebit we halkara meseleler ara alnyp maslahatlaşyldy.

Günüň ikinji ýarymynda döwlet Baştutanymyz Ankaradaky Hajettepe uniwersitetine bardy. Bu ýerde hormatly Prezidentimize halkara gatnaşyklar ugry boýunça hormatly doktor derejesini bermek dabarasy boldy.

Hajettepe uniwersitetinde hormatly Prezidentimizi Türkiýe Respublikasynyň wise-prezidenti Jewdet Ýylmaz hem-de bu ýokary okuw mekdebiniň rektory Mehmet Jahit Güran mähirli garşyladylar. Uniwersitetiň talyplary döwlet Baştutanymyza gül dessesini gowşurdylar.

Soňra hormatly Prezidentimiz Türkiýe Respublikasynyň wise-prezidenti Jewdet Ýylmaz we Hajettepe uniwersitetiniň rektory bilen bilelikde ýadygärlik surata düşdi.

Dabara gatnaşanlaryň hatarynda Türkmenistanyň resmi wekiliýetiniň agzalary we Türkiýäniň resmi adamlary, uniwersitetiň professor-mugallymlary, şeýle hem Türkiýede bilim alýan türkmen talyplary bar.

Dabarada, ilki bilen, uniwersitetiň prorektoryna söz berildi. Ol öz çykyşynda hormatly Prezidentimiziň gazanan üstünlikleri barada aýdyp, Hajettepe uniwersitetiniň Senatynyň Türkmenistanyň Prezidentine halkara gatnaşyklar ugry boýunça hormatly doktor derejesini bermek baradaky kararyny okady.

Kararda bellenilişi ýaly, halkara gatnaşyklar we ählumumy howpsuzlyk ulgamlarynda çuňňur akademiki taýýarlygy möhüm döwlet wezipesi bilen utgaşdyrýan görnükli döwlet işgäri, Türkmenistanyň Prezidenti hormatly Serdar Berdimuhamedowa özüniň Prezidentlik döwründe Türkmenistanyň hemişelik Bitaraplyk syýasatyny BMG derejesinde parahatçylygyň we öňüni alyş diplomatiýasynyň işjeň guralyna öwrendigi, Hereketleriň Awaza Maksatnamasy ýaly ählumumy özara baglanyşyk boýunça giň möçberli başlangyçlara, şeýle hem sebit hyzmatdaşlygyna we ösüş konsepsiýasyna üstünlikli ýolbaşçylyk edendigi, Türkiýe Respublikasy bilen Türkmenistanyň arasynda ykdysady we durmuş ulgamlarynda, şeýle hem ýokary bilim ulgamynda, şol sanda emeli aňdan başlap, “akylly” oba hojalygyna we bilelikdäki diplom maksatnamalaryna çenli giň ugurlardaky hyzmatdaşlykda görkezen berk syýasy erki hem-de goldawy üçin uniwersitetiň Senatynyň karary bilen, hormatly doktor derejesi berilýär.

Soňra Hajettepe uniwersitetiniň rektory Mehmet Jahit Güran gutlag sözi bilen çykyş etdi. Ol hemmeleri mähirli mübärekläp, Türkmenistanyň Prezidenti hormatly Serdar Berdimuhamedowy uniwersitetde kabul etmegiň özleri üçin uly hormatdygyny belledi we şu günki dabaranyň diňe bir görnükli döwlet işgärine akademiki derejäni bermek çäresi bolman, eýsem, umumy taryhymyzy, medeni gatnaşyklarymyzy we dost-doganlyk taglymlaryny beýan etmek hem bolup durýandygyny nygtady.

Bellenilişi ýaly, özüniň altmyş ýyllyk taryhynyň dowamynda Hajettepe uniwersiteti tutuş adamzadyň we türki dünýäniň öňünde bitiren hyzmatlary üçin birnäçe döwlet işgärlerine hormatly doktor derejesini berdi. Şunuň bilen baglylykda, Mehmet Jahit Güran bu derejäni kabul edendigi üçin hormatly Prezidentimiz Serdar Berdimuhamedowa çuňňur hoşallygyny beýan etdi.

Nygtalyşy ýaly, Türkiýe bilen Türkmenistanyň arasyndaky gatnaşyklar taryhyň we medeniýetiň umumylygyna, dost-doganlyga esaslanýar.

Şeýle hem uniwersitetiň rektory bilim we saglygy goraýyş ulgamlarynyň ýurtlarymyzyň abadan geljegi üçin möhüm ähmiýetini belläp, Hajettepe uniwersitetiniň Türkmenistan bilen saglygy goraýyş ulgamynda hyzmatdaşlyk edýändigini aýtdy. Şunuň bilen baglylykda, Mehmet Jahit Güran şu ýylyň 9-njy oktýabrynda Aşgabatda üç sany lukmançylyk desgasynyň — Halkara onkologiýa ylmy-kliniki merkeziniň, Stomatologiýa merkeziniň hem-de Halkara pediatriýa merkeziniň açylmagy mynasybetli gutlaglaryny beýan edip, bu saglyk desgalarynyň Türkmenistanyň halkynyň abadançylygynyň bähbidine hyzmat etmegini arzuw etdi.

Çykyşynyň ahyrynda Hajettepe uniwersitetiniň rektory hormatly Prezidentimize berk jan saglyk, bagtyýarlyk, jogapkärli döwlet işinde mundan beýläk-de üstünlikleri, Türkmenistanyň doganlyk halkyna bolsa abadançylyk baradaky iň gowy arzuwlaryny beýan etdi.

Soňra çykyş etmek üçin Türkiýe Respublikasynyň wise-prezidenti Jewdet Ýylmaza söz berildi. Ol Türki Döwletleriň Guramasynyň döwlet Baştutanlarynyň XIII sammitine gatnaşmak maksady bilen Türkiýä gelen hormatly Prezidentimizi ýene bir gezek mähirli mübärekläp, döwlet Baştutanymyza Hajettepe uniwersitetiniň halkara gatnaşyklar ugry boýunça hormatly doktory derejesini bermek dabarasyna gatnaşmagyň özi üçin uly hormatdygyny aýtdy hem-de bu ýokary alymlyk derejesiniň berilmeginiň Türkiýe bilen Türkmenistanyň arasyndaky gadymdan gelýän dost-doganlyk gatnaşyklaryny ösdürmäge möhüm goşant goşjakdygyna ynam bildirdi.

Bellenilişi ýaly, hormatly doktor derejesi ylmy, jemgyýetçilik we halkara derejede alnyp barylýan işlere gymmatly goşandy bolan şahslara berilýän ýokary bahadyr. Şu dabara hem döwlet Baştutanymyzyň halkara parahatçylygy we hyzmatdaşlygy pugtalandyrmakdaky tagallalaryna berlen ýokary baha bolmak bilen bir hatarda, iki ýurduň arasyndaky ýakyn gatnaşyklaryň ylmy ähmiýetini hem açyp görkezýär.

Wise-prezident Jewdet Ýylmaz Türkiýäniň Türkmenistan bilen gatnaşyklarynyň ýurdumyzyň Garaşsyzlygynyň ilkinji günlerinden bäri ähli ugurlarda özara ynanyşmak we hormat goýmak ýörelgeleri esasynda ösdürilýändigini aýtdy.

Wise-prezident Jewdet Ýylmaz döwlet Baştutanymyzyň iki ýurduň arasyndaky gatnaşyklary ösdürmäge, halklarymyzy ýakynlaşdyrmaga we umumy medeni mirasymyzy dikeltmäge berýän goldawlaryna ýokary baha berip, Hajettepe uniwersitetiniň Senatynyň hormatly Prezidentimiziň sebit hem-de ählumumy parahatçylygy pugtalandyrmakda goşandyny, aýratyn hem Türkiýe bilen Türkmenistanyň arasyndaky dostlugy berkitmekdäki möhüm ornuny göz öňünde tutup, halkara gatnaşyklar ugry boýunça hormatly doktor derejesini bermek baradaky kararynyň ähmiýetini belledi hem-de bu alymlyk derejesiniň berilmegi mynasybetli hormatly Prezidentimizi ýene bir gezek gutlady.

Soňra dabaraly ýagdaýda hormatly Prezidentimize halkara gatnaşyklar ugry boýunça hormatly doktor derejesiniň degişli diplomy gowşuryldy.

Soňra çykyş etmek üçin hormatly Prezidentimize söz berildi.

Döwlet Baştutanymyz Türkiýe Respublikasynyň Hajettepe uniwersitetiniň “Halkara gatnaşyklar ugry boýunça hormatly doktory” derejesiniň berilmegi mynasybetli uniwersitetiň rektory, professor, doktor Mehmet Jahit Gürana, uniwersitetiň Senatynyň agzalaryna we ähli professor-mugallymlaryna tüýs ýürekden minnetdarlyk bildirip, bu hormatly ady diňe bir özüne berlen sylag hökmünde däl, eýsem, Türkmenistanyň halkara gatnaşyklary ösdürmek, parahatçylygy we ynanyşmagy pugtalandyrmak, döwletleriň arasynda parahatçylygy we ynanyşmagy giňeltmek ugrunda alyp barýan işlerine berlen ýokary baha hökmünde kabul edýändigini aýtdy hem-de bu derejäniň berilmeginde Türkmenistanyň we Türkiýe Respublikasynyň arasyndaky dostlukly gatnaşyklaryň, taryhy we ruhy ýakynlygyň öz beýanyny tapýandygyna ynam bildirdi.

Türkmenistanda ylym-bilim ulgamyny ösdürmek döwlet syýasatynyň ileri tutulýan ugurlarynyň biri bolup durýar. Ýurdumyzda döwrebap bilim ulgamyny kemala getirmäge, ylym-bilim edaralarynyň maddy-tehniki binýadyny pugtalandyrmaga, okuw işine öňdebaryjy usullary ornaşdyrmaga uly üns berilýär diýip, hormatly Prezidentimiz aýtdy.

Bu pudak döwletleriň we halklaryň arasynda özara düşünişmegi pugtalandyrýan, tejribe alyşmaga mümkinçilik berýän hem-de umumy ösüş maksatlaryna ýetmäge ýardam edýän möhüm köpri bolup hyzmat edýär.

Biziň halklarymyz uzak asyrlaryň dowamynda özara hormat goýmak, birek-birege goldaw bermek we umumy gymmatlyklary gorap saklamak ýörelgelerine eýerýärler. Bu taryhy miras häzirki döwürde hem döwletara gatnaşyklarymyzyň berk binýadyny emele getirýär.

Häzirki wagtda türkmenistanly ýaşlaryň müňlerçesi Türkiýäniň ýokary okuw mekdeplerinde bilim alýarlar. Olar dürli ugurlar boýunça hünär öwrenýärler we tejribe toplaýarlar.

Türkmen we türk alymlarynyň, ýaş ylmy-barlag işgärleriniň bilelikde işlemeginiň täze ylmy netijeleri gazanmaga ýardam berjekdigine ynanýaryn. Şeýle hyzmatdaşlyk diňe bir bilim edaralarynyň ösüşine däl, eýsem, iki ýurduň ykdysady we durmuş taýdan has-da kämilleşmegine hem itergi berer diýip, hormatly Prezidentimiz nygtady.

Çykyşynyň ahyrynda döwlet Baştutanymyz türkmen-türk dost-doganlyk gatnaşyklarynyň hem-de özara bähbitli hyzmatdaşlygyň mundan beýläk-de pugtalanyp, täze belentliklere çykmagyny, doganlyk türk halkyna bolsa abadançylyk we gülläp ösüş arzuw etdi.

Dabara tamamlanandan soňra, hormatly Prezidentimiz uniwersitetiň rektory bilen hoşlaşyp, bu ýerden ugrady.

Soňra döwlet Baştutanymyza Türkiýäniň Daşary ykdysady gatnaşyklar geňeşi (DEIK) tarapyndan “Strategik dostluk nyşanynyň” gowşurylyş dabarasy boldy.

Bu ýerde belent mertebeli myhmany Türkiýäniň Daşary ykdysady gatnaşyklar geňeşiniň (DEIK) başlygy Nail Olpak mähirli garşylady.

Soňra Türkiýäniň Daşary ykdysady gatnaşyklar geňeşiniň başlygy Nail Olpak çykyş edip, hemmeleri mähirli mübärekledi hem-de iki doganlyk ýurduň wekillerini bir ýere jemlän bu dabarada hormatly Prezidentimize DEIK tarapyndan «Strategik dostluk nyşanyny» gowşurmagyň ýolbaşçylyk edýän geňeşi üçin uly hormatdygyny belledi.

Şeýle hem Nail Olpak pursatdan peýdalanyp, hormatly Prezidentimizi Hajettepe uniwersitetiniň halkara gatnaşyklar ugry boýunça hormatly doktory derejesiniň berilmegi bilen gutlady hem-de Türkiýäniň akademik we işewürlik jemgyýetçiliginiň sylaglarynyň gowşurylmagynyň Türkiýe bilen Türkmenistanyň arasyndaky dostlugyň ýene bir aýdyň şöhlelenmesi hökmünde kabul edilýändigini aýtdy.

Türkiýäniň Daşary ykdysady gatnaşyklar geňeşiniň başlygy türki dünýäniň beýik şahyry we akyldary Magtymguly Pyragynyň «Bir suprada taýýar kylynsa aşlar,//Göteriler ol ykbaly türkmeniň» diýen setirlerini mysal getirip, agzybirlik barada aýdylan bu sözleriň häzirki wagtda iki doganlyk ýurduň garaýyşlaryny özünde jemleýändigini nygtady.

Soňra Türkiýe Respublikasynyň wise-prezidenti Jewdet Ýylmaz çykyş edip, hemmeleri mähirli mübärekledi hem-de Türki Döwletleriň Guramasynyň XIII sammitiniň çäklerinde bir ýere jemlenip, iki doganlyk ýurduň arasyndaky ykdysady hyzmatdaşlygy pugtalandyrmakda möhüm orun eýeleýän işewürligiň wekilleri bilen duşuşmagyň özi üçin hormatdygyny belledi.

Nygtalyşy ýaly, Türkiýe doganlyk Türkmenistan bilen gatnaşyklara aýratyn ähmiýet berýär. Türkmenistan Garaşsyzlygyny gazanan ilkinji günlerinden bäri Türkiýe üçin diňe bir strategik hyzmatdaş däl, eýsem, dost we dogan ýurt bolmagynda galýar. Baý tebigy serişdeleri, amatly geografik ýerleşişi we türkmen halkynyň zähmetsöýerligi netijesinde, Türkmenistan bu gün sebitiň çalt ösýän ykdysadyýetleriniň birine öwrüldi. Dünýä nusgalyk “akylly” şäheri, ösen infrastrukturasy, senagat kärhanalary, döwrebap hassahanalary ýurduň ýokary ösüş depgininiň aýdyň subutnamasydyr.

Türkiýe Respublikasynyň wise-prezidenti bu ajaýyp üstünliklerde türkmen halkynyň Milli Lideriniň aýratyn ornunyň bardygyny belläp, häzirki wagtda Gahryman Arkadagymyzyň asylly başlangyçlarynyň hormatly Prezidentimiziň parasatly baştutanlygynda mynasyp dowam etdirilýändigini belledi.

Çykyşynyň ahyrynda Jewdet Ýylmaz hormatly Prezidentimizi Türkiýäniň Daşary ykdysady gatnaşyklar geňeşi tarapyndan «Strategik dostluk nyşanynyň» gowşurylmagy bilen tüýs ýürekden gutlady.

Soňra dabaraly ýagdaýda Türkmenistanyň Prezidentine Türkiýäniň Daşary ykdysady gatnaşyklar geňeşi (DEIK) tarapyndan «Strategik dostluk nyşanyny» gowşurmak barada kararyň kabul edilendigi yglan edildi we hormatly Prezidentimiz Serdar Berdimuhamedowa «Strategik dostluk nyşany» we ýörite şahadatnama gowşuryldy.

Soňra çykyş etmek üçin döwlet Baştutanymyza söz berildi.

Hormatly Prezidentimiz Türkiýe Respublikasynyň Daşary ykdysady gatnaşyklar geňeşiniň «Strategik dostluk nyşany» atly ýokary sylagynyň berilmegi mynasybetli, Geňeşiň başlygy Nail Olpaga we wekillerine minnetdarlyk bildirip, bu abraýly sylagy bildirilen belent hormatyň nyşany hökmünde kabul etmek bilen, ony Türkiýäniň Türkmenistan bilen bilelikde durmuşa geçirýän köpugurly hyzmatdaşlygynyň, netijeli işewürlik gatnaşyklarynyň hem-de giň gerimli işleriň möhüm tassyknamasy hasaplaýandygyny aýtdy.

Şeýle hem döwlet Baştutanymyz “Strategik dostluk nyşanynyň” gowşurylmagynyň türkmen-türk ykdysady gatnaşyklarynyň barha pugtalandyrylyp, täze many-mazmun bilen baýlaşdyrylýandygynyň aýdyň beýanydygyny belledi. Şonuň ýaly-da, pursatdan peýdalanyp, dabara gatnaşyjylaryň ählisini tüýs ýürekden mübärekledi we şeýle ähmiýetli çäräniň ýokary guramaçylyk derejesinde geçirilýändigi üçin Türkiýäniň Daşary ykdysady gatnaşyklar geňeşine minnetdarlyk bildirdi.

Bu duşuşyk iki döwletiň arasyndaky ykdysady hyzmatdaşlygyň häzirki ýagdaýyny seljermek, täze mümkinçilikleri kesgitlemek we geljek üçin anyk taslamalary ara alyp maslahatlaşmak babatda möhüm ähmiýete eýedir. Dabaramyza Türkiýäniň dürli pudaklaryna wekilçilik edýän işewürler we beýleki wekiller gatnaşýarlar diýip, döwlet Baştutanymyz sözüni dowam etdi hem-de olaryň arasynda köp ýyllaryň dowamynda Türkmenistanda ykdysady we durmuş taslamalarynyň durmuşa geçirilmegine uly goşant goşan kompaniýalaryň ýolbaşçylarynyň bardygyny belledi.

Nygtalyşy ýaly, Türkmenistan bilen Türkiýe Respublikasynyň arasyndaky gatnaşyklar taryhy we medeni umumylyga, özara hormata hem-de netijeli hyzmatdaşlyga esaslanýar. Ykdysady hyzmatdaşlyk bu gatnaşyklaryň ileri tutulýan ugurlarynyň biridir. Garaşsyzlygymyzyň geçen 35 ýylynyň dowamynda türk kompaniýalarynyň gatnaşmagynda Türkmenistanda ýüzlerçe iri, orta we uly möçberli taslamalar amala aşyryldy. Bu işler ýurdumyzyň önümçilik kuwwatynyň artmagyna, döwrebap infrastrukturasynyň döredilmegine, täze iş orunlarynyň açylmagyna we halkymyzyň ýaşaýyş-durmuş şertleriniň ýokarlanmagyna goşant goşdy.

Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň başlangyçlary bilen, 2012-nji ýyldan bäri milli ykdysadyýetimizi senagatlaşdyrmak, döwrebap önümçilik infrastrukturasyny ösdürmek, hususan-da, ýurdumyzda senagatlaşan jemgyýeti döretmek hem-de çig mal ýurdy bolmakdan taýýar önümleri öndürýän we eksport edýän ýurda öwrülmek boýunça giň gerimli işler yzygiderli dowam edýär.

Şu ýylyň 23-nji sentýabrynda Halk Maslahatynyň mejlisinde kabul edilen “Türkmenistany senagat taýdan ösdürmegiň 2030 — 2045-nji ýyllar üçin Milli strategiýasy” ýurdumyzyň bu ugurda uzak möhletli maksatlaryny kesgitleýär.

Bellenilişi ýaly, ýurdumyzda dürli pudaklarda baý tejribe toplan, önümçilik we dolandyryş babatda kämilleşen türkmen telekeçileriniň hem-de senagatçylarynyň täze nesli kemala geldi. Olar senagat kärhanalarynyň, ýaşaýyş jaýlarynyň, durmuş maksatly desgalaryň we beýleki möhüm taslamalaryň durmuşa geçirilmegine işjeň gatnaşýarlar.

Biz türk işewürleri bilen türkmen telekeçileriniň we senagatçylarynyň arasynda göni hyzmatdaşlygy giňeltmäge aýratyn ähmiýet berýäris. Bizde bilelikdäki senagat kooperasiýasyny döretmek, önümçilik kärhanalaryny gurmak, öňdebaryjy tehnologiýalary ornaşdyrmak, ýerli çig maly gaýtadan işlemek we taýýar önümleri daşary ýurt bazarlaryna çykarmak üçin giň mümkinçilikler bar diýip, döwlet Baştutanymyz aýtdy.

Hormatly Prezidentimiz türk kompaniýalaryny energetika infrastrukturasyny gurmak we döwrebaplaşdyrmak, senagat enjamlaryny öndürmek, olara hyzmat etmek boýunça taslamalara gatnaşmaga çagyrdy hem-de tehnologik tejribäni, maliýe mümkinçiliklerini we önümçilik kuwwatyny birleşdirmek arkaly hyzmatdaşlygyň uzak möhletli esasda ösdüriljekdigine ynam bildirdi.

Nygtalyşy ýaly, himiýa senagaty hem türkmen-türk hyzmatdaşlygyny ösdürmek üçin uly mümkinçiliklere eýedir. Gurluşyk we senagat pudaklarynda hem uly mümkinçilikler bar. Häzirki wagtda bu pudak ýokary tehnologiýaly önümçilik kuwwatlyklaryna daýanýar we eksport ugurly ösüşi bilen tapawutlanýar.

Oba hojalygy we azyk senagaty hem hyzmatdaşlygyň geljegi uly ugurlarydyr. Türkmenistanda oba hojalyk önümçiligini döwrebaplaşdyrmak, hasyllylygy ýokarlandyrmak, suw serişdelerinden rejeli peýdalanmak, azyk önümleriniň önümçiligini artdyrmak boýunça maksatnamalar amala aşyrylýar.

Ulag we logistika ulgamy Türkmenistanyň ykdysady ösüşiniň hem-de halkara hyzmatdaşlygynyň möhüm ugurlarynyň biridir. Şunuň bilen baglylykda, türk ulag we logistika kompaniýalary halkara ýük daşamalaryny ösdürmäge, logistika merkezlerini döretmäge, ammar we konteýner terminallaryny gurmaga, ulag serişdelerine hyzmat etmek hem-de sanly logistika ulgamlaryny ornaşdyrmak boýunça hyzmatdaşlygy ösdürmäge çagyryldy.

Ykdysadyýetimizi ösdürmekde sanly tehnologiýalaryň ähmiýeti barha artýar. Saglygy goraýyş we derman senagaty hem hyzmatdaşlygyň geljegi uly ugurlarydyr. Şypahana-dynç alyş ulgamynda hem Türkiýäniň tejribesinden peýdalanmak arkaly bilelikdäki taslamalary durmuşa geçirmek üçin mümkinçilikler bar.

Hormatly Prezidentimiz bu agzalan ugurlaryň hyzmatdaşlygyň strategik ugurlarydygyny, Türkmenistanyň ykdysadyýetinde kiçi we orta telekeçiligi ösdürmek, importyň ornuny tutýan önümleri öndürmek, eksporty artdyrmak we täze iş orunlaryny döretmek babatda hem giň mümkinçilikleriň bardygyny belläp, ýurdumyzyň daşary ýurtly maýadarlar bilen özara bähbitli taslamalary durmuşa geçirmäge, işewürlik gatnaşyklaryny ösdürmäge we uzak möhletli hyzmatdaşlygy pugtalandyrmaga taýýardygyny tassyklady.

Şu günki duşuşykda beýan edilen teklipleriň anyk taslamalara öwrülmegine aýratyn ähmiýet berýäris. Munuň üçin degişli ministrlikleriň we pudaklaýyn edaralaryň, Türkmenistanyň Söwda-senagat edarasynyň, Senagatçylar we telekeçiler birleşmesiniň, Türkmen-türk işewürlik geňeşiniň hem-de Türkiýäniň işewür düzümleriniň arasynda göni gatnaşyklary giňeltmegi zerur hasaplaýarys diýip, döwlet Baştutanymyz aýtdy hem-de her bir ugur boýunça ileri tutulýan taslamalary kesgitlemegiň, olaryň tehniki-ykdysady esaslandyrmalaryny taýýarlamagyň we durmuşa geçirilişini yzygiderli utgaşdyrmagyň hyzmatdaşlygyň netijeliligini ýokarlandyrjakdygyny belledi.

Hormatly Prezidentimiz türk işewürleriniň Türkmenistanda täze taslamalary durmuşa geçirmäge bolan gyzyklanmasyna ýokary baha berip, hyzmatdaşlygyň täze mümkinçiliklerini tapmagy we geljegi uly taslamalary gazanmagy arzuw etdi.

Dabara tamamlanandan soňra, hormatly Prezidentimiz Türkiýäniň Daşary ykdysady gatnaşyklar geňeşiniň başlygy bilen hoşlaşyp, bu ýerden ugrady.

Türkiýe Respublikasyna iş saparynyň maksatnamasy tamamlanandan soňra, hormatly Prezidentimiz Ankara şäheriniň Etimesgut howa menziline bardy.

Haly düşelen ýodajygyň ugrunda Hormat garawulynyň esgerleri nyzama düzülipdir.

Soňra döwlet Baştutanymyz bu ýerden Watanymyza ugrady.

Birnäçe sagatdan soňra hormatly Prezidentimiziň uçary paýtagtymyzyň Halkara howa menziline gelip gondy. Bu ýerde döwlet Baştutanymyzy ýurdumyzyň resmi adamlary mähirli garşyladylar. Olar hormatly Prezidentimizi Türkiýe Respublikasyna iş saparynyň hem-de Türki Döwletleriň Guramasynyň döwlet Baştutanlarynyň XIII sammitiniň üstünlikli geçmegi bilen tüýs ýürekden gutladylar.

Şeýle hem olar hormatly Prezidentimizi halkara gatnaşyklar ugry boýunça hormatly doktor derejesiniň berilmegi hem-de Türkiýe Respublikasynyň Daşary ykdysady gatnaşyklar geňeşiniň «Strategik dostluk nyşany» bilen sylaglanylmagy mynasybetli tüýs ýürekden gutlap, Arkadagly Gahryman Serdarymyza hem-de Gahryman Arkadagymyza berk jan saglyk, uzak ömür, il-ýurt bähbitli alyp barýan işleriniň mundan beýläk-de rowaçlyklara beslenmegini arzuw etdiler.

Hormatly Prezidentimiz gutlaglar üçin minnetdarlyk bildirip, hemmelere üstünlik arzuw etdi we bu ýerden ugrady.

Şeýlelikde, hormatly Prezidentimiz Serdar Berdimuhamedowyň Türkiýe Respublikasyna amala aşyran iş sapary iki doganlyk ýurduň arasyndaky hoşniýetli gatnaşyklaryň we strategik hyzmatdaşlygyň mizemezdigini ýene bir gezek subut etdi. Hormatly Prezidentimiziň Türki Döwletleriň Guramasynyň döwlet Baştutanlarynyň sammitine gatnaşmagy bolsa ýurdumyzyň türki dünýäniň giňişliginde köpugurly hyzmatdaşlygy çuňlaşdyrmaga, doganlyk halklaryň abadançylygynyň bähbidine umumy döredijilikli kuwwaty pugtalandyrmaga üýtgewsiz ygrarlydygyny görkezdi.

Türkmenistanyň Prezidentiniň Türkiýe Respublikasyna iş sapary başlandy

Aşgabat — Ankara, 29-njy oktýabr (TDH). Şu gün hormatly Prezidentimiz Serdar Berdimuhamedow Türki Döwletleriň Guramasynyň döwlet Baştutanlarynyň XIII sammitine gatnaşmak üçin iş sapary bilen Türkiýe Respublikasyna ugrady.

Paýtagtymyzyň Halkara howa menzilinden döwlet Baştutanymyzy ýurdumyzyň resmi adamlary ugratdylar.

Kökleri asyrlaryň jümmüşine uzaýan hem-de taryhyň, diliň we ruhy gymmatlyklaryň umumylygyna esaslanýan türkmen-türk gatnaşyklary bu gün täze many-mazmun bilen baýlaşdyrylyp, hil taýdan täze derejä çykarylýar. Iki döwletiň arasynda ýola goýlan ýokary derejedäki netijeli syýasy dialog söwda-ykdysady we medeni-ynsanperwer ulgamlary öz içine alýan köpugurly hyzmatdaşlygy yzygiderli giňeltmek üçin ygtybarly binýat bolup çykyş edýär.

Döwletara gatnaşyklar ikitaraplaýyn esasda, şeýle hem abraýly halkara guramalaryň çäklerinde okgunly ösdürilýär. Iki ýurduň döwlet Baştutanlarynyň yzygiderli dialogy halklarymyzyň abadançylygynyň bähbidine gönükdirilen giň möçberli bilelikdäki taslamalary üstünlikli durmuşa geçirmäge ýardam berýär.

Türki Döwletleriň Guramasy (TDG) bu gün halkara gatnaşyklar ulgamynda möhüm orun eýeläp, durnukly ösüşi üpjün etmek hem-de sebit hyzmatdaşlygyny pugtalandyrmak boýunça gatnaşyjy ýurtlaryň tagallalaryny birleşdirmek üçin netijeli mehanizm bolup çykyş edýär. Bu düzüm energetika, ulag, logistika, medeni-ynsanperwer ulgamlarda hereketleri utgaşdyrmak üçin binýady kemala getirýär.

TDG-niň çäklerindäki köpugurly hyzmatdaşlyk deňhukuklylyk, özara hormat goýmak we ähli taraplaryň bähbitlerini nazara almak ýörelgeleri esasynda ýola goýulýar. Türki halklaryň ruhy mirasyny gorap saklamak, olaryň medeni däplerini giňden wagyz etmek, şeýle hem gatnaşyjy ýurtlaryň ýaşlar guramalarynyň, ylmy we döredijilik jemgyýetçilikleriniň arasynda gatnaşyklary giňeltmek guramanyň gün tertibinde aýratyn orun eýeleýär.

Türkmenistan oňyn Bitaraplyk ýörelgelerine we parahatçylyk söýüjilikli daşary syýasatyna eýermek bilen, synçy ýurt hökmünde Türki Döwletleriň Guramasynyň işine işjeň gatnaşýar. Ýurdumyz bu gurama medeni dialogy ilerletmek hem-de ynanyşmagy pugtalandyrmak üçin möhüm meýdança hökmünde garaýar. Bu bolsa Türkmenistanyň daşary syýasy strategiýasynyň ileri tutulýan ugurlaryna doly laýyk gelýär.

Türki Döwletleriň Guramasy bilen hyzmatdaşlygy işjeňleşdirmäge hem-de täze many-mazmun bilen baýlaşdyrmaga türkmen halkynyň Milli Lideri Gahryman Arkadagymyz uly şahsy goşant goşýar. Gahryman Arkadagymyzyň türki dünýäni jebisleşdirmäge, medeni-ynsanperwer hyzmatdaşlygy giňeltmäge hem-de häzirki döwrüň möhüm meselelerini bilelikde çözmäge gönükdirilen döredijilikli başlangyçlary gurama agza döwletleriň Baştutanlarynyň giň goldawyna we ýokary bahasyna mynasyp bolýar.

Türki Döwletleriň Guramasynyň Aksakgallar geňeşiniň alyp barýan işi türki halklaryň köpasyrlyk däpleriniň dowamata atarylýandygynyň aýdyň mysaly boldy. Bu geňeşiň işine möhüm goşant goşýan türkmen halkynyň Milli Lideri Gahryman Arkadagymyzyň nygtaýşy ýaly, ýaşuly nesliň paýhasy, aksakgallaryň baý durmuş tejribesi we abraýy ýaşlary watansöýüjilik ruhunda terbiýelemekde, ahlak ýörelgeleri gorap saklap, geljekki nesillere ýetirmekde bahasyna ýetip bolmajak orun eýeleýär.

TDG-niň çäklerinde Türkmenistanyň öňe sürýän halkara başlangyçlary durnukly üstaşyr ulag geçelgelerini döretmek, energetika howpsuzlygyny pugtalandyrmak we “ýaşyl” ykdysadyýeti ösdürmek ýaly möhüm ugurlary öz içine alýar. Ýurdumyzyň parahatçylygyň we durnukly ösüşiň bähbidine türki döwletleriň mümkinçiliklerini birleşdirmäge gönükdirilen yzygiderli başlangyçlary netijeli hyzmatdaşlygy mundan beýläk-de çuňlaşdyrmak üçin berk binýat bolup hyzmat edýär.

...Birnäçe sagatdan hormatly Prezidentimiziň uçary iki ýurduň Döwlet baýdaklary bilen bezelen Ankara şäheriniň “Etimesgut” howa menziline gelip gondy.

Haly düşelen ýodajygyň ugrunda Hormat garawulynyň esgerleri nyzama düzülipdir.

Bu ýerde döwlet Baştutanymyzy Türkiýe Respublikasynyň wise-prezidenti Jewdet Ýylmaz, Türkmenistanyň resmi wekiliýetiniň agzalary we Türkiýäniň işewürleri mähirli garşyladylar.

Hormatly Prezidentimiz haly düşelen ýodajyk boýunça Hormat garawulynyň esgerleriniň hataryna tarap ýöredi.

Hormat garawulynyň esgerleriniň hatarynyň başynda döwlet Baştutanymyzy Hormat garawulynyň serkerdesi garşylady hem-de hasabat berdi.

Hormatly Prezidentimiz esgerlere “Merhaba, asker!” diýip ýüzlendi, esgerler bolsa, öz gezeginde, “Sag boluň!” diýip jogap berdiler.

Soňra Türki Döwletleriň Guramasyna gatnaşýan döwletleriň Baştutanlary Türki döwletleriň medeni seýilgähiniň açylyş dabarasynyň geçirilýän ýerine bardylar.

Seýilgähde türki halklaryň taryhyna degişli dürli binalaryň nusgalary ýerleşdirilipdir.

Soňra belent mertebeli myhmanlar bu ýerde bag nahallaryny ekdiler. Taryhy kökleriň, ruhy we ahlak gymmatlyklarynyň, däp-dessurlaryň umumylygyny alamatlandyrýan bu seýilgähde ýaş bag nahallarynyň oturdylmagy aýratyn many-mazmuna eýe boldy.

Soňra dabaranyň barşynda döwlet Baştutanlary bu ýerde ýaýbaňlandyrylan aýdym-sazly çykyşlara tomaşa etdiler.

Şeýle çykyşlar we medeni çäreler doganlyk döwletleriň kuwwatly döredijilik mümkinçiligini hem-de ruhy baýlygyny aýdyň şöhlelendirýär. Munuň özi halklary has-da ýakynlaşdyrmaga, özara ynanyşmagy pugtalandyrmaga, şeýle hem umumy taryhy-medeni mirasy halkara giňişlikde wagyz etmäge ýardam berýär.

Soňra döwlet Baştutanlary bilelikde ýadygärlik surata düşdüler.

Döwlet Baştutanlary türki dilli döwletleriň milli ak öýlerini synladylar.

Bu ýerde türkmeniň ak öýi dikilip, onda halkymyzyň ýaşaýyş-durmuşy we milli aýratynlyklary şöhlelendirilýär. Ak öý hemişe halkymyzyň myhmansöýerliginiň nyşany bolupdyr. Ak öýüň içinde türkmen halkynyň gündelik durmuşynda ulanan öý esbaplary, milli lybaslary, saz gurallary we beýlekiler ýerleşdirilipdir.

Şeýle hem ýurdumyzyň medeniýet we sungat ussatlarynyň ýerine ýetirmeginde aýdym-sazly çykyşlar ýaýbaňlandyryldy. Olarda milli mirasymyzyň, medeniýetimiziň we türkmen halk döredijiliginiň ajaýyp nusgalary öz beýanyny tapdy. Joşgunly “küştdepdi” tansynyň ýerine ýetirilmegi çärä aýratyn öwüşgin çaýdy.

Häzirki döwürde hormatly Prezidentimiziň parasatly baştutanlygynda hem-de türkmen halkynyň Milli Lideri Gahryman Arkadagymyzyň döredijilikli başlangyçlary esasynda bu baý taryhy-medeni hazyna aýawly saklanylyp, yzygiderli baýlaşdyrylýar we halkara derejede giňden wagyz edilýär. Medeni mirasyň umumylygy ýurtlarymyzyň arasyndaky özara ynanyşmagy we mizemez doganlyk gatnaşyklaryny pugtalandyrmagyň şerti bolup hyzmat edýär.

Ak öýüň ýanynda halkymyzyň göz guwanjy bolan ahalteke bedewiniň heýkeli oturdylypdyr. Gadymy türkmen topragynda pederlerimiz tarapyndan asyrlaryň dowamynda kemala getirilip, umumadamzat gymmatlygyna öwrülen behişdi bedewlerimiz Ýer ýüzünde bar bolan tohum atlaryň arasynda dünýäniň iň naýbaşylarynyň biri hasaplanýar. Eýesine wepadarlygy, gözelligi we ýyndamlygy bilen halkymyzyň buýsanjyna, ýakyn syrdaşyna öwrülen behişdi bedewlerimiz il-günümiziň uçar ganatydyr, köňül buýsanjydyr.

Milli we dünýä medeniýetiniň naýbaşy nusgasy bolan behişdi bedewler häzirki döwürde Garaşsyz, baky Bitarap Türkmenistanyň gazanýan beýik üstünlikleriniň, ähli ulgamlardaky okgunly ösüşiniň nyşanydyr. Şunuň bilen baglylykda, 2026-njy ýylyň “Garaşsyz, baky Bitarap Türkmenistan — bedew batly at-myradyň mekany” ýyly diýlip yglan edilmegi ahalteke atlaryny wagyz etmek we geljek nesillere ýetirmek ugrunda alnyp barylýan işleri has-da ilerletmek üçin täze tapgyry açdy.

Adamzat durmuşynyň dürli ulgamlarynda gazanylan beýik sepgitlere hem-de wakalara baý bolan türki halklaryň köpasyrlyk ýyl ýazgysy dünýä siwilizasiýasynyň taryhynda şöhle saçýan sahypalaryň biri bolup durýar. Ýewraziýanyň uç-gyraksyz giňişliklerinde ýaşan türki halklar müňýyllyklaryň dowamynda döredijilikli zähmete, ula hormat goýmaga hem-de tebigat bilen sazlaşykly ýaşamaga esaslanýan özboluşly durmuş ýörelgelerini kemala getiripdirler. Şonuň esasynda adamzat jemgyýetiniň taryhynda öçmejek yz galdyran beýik döwletler döredildi.

Baý halk döredijiligi, şadessanlar we rowaýatlar, çuňňur filosofik şygyr eserleri türki dünýäniň ruhy mirasynyň aýrylmaz bölegi bolup durýar. Watansöýüjiligi, edermenligi hem-de parahatçylyga ygrarlylygy wasp edýän ynsanperwer taglymlar nusgawy şahyrlaryň, şol sanda Gündogaryň beýik akyldary Magtymguly Pyragynyň döredijiliginden eriş-argaç bolup geçýär. Bu baky gymmatlyklar häzirki wagtda ýaşlary ahlak taýdan terbiýelemek üçin egsilmez çeşme bolup, türki dilli döwletleriň bu günki nesilleriniň arasynda ruhy gatnaşyklary pugtalandyrýar.

Ýewrаziýanyň iň gadymy ruhy we maddy medeniýetiniň gözbaşynda duran türkmen halky asyrlaryň dowamynda türki dünýäsiniň umumy siwilizasion baýlygyna uly döredijilik goşandyny goşup gelýär. Geçmişiň görnükli alymlary, şahyrlary we ussatlary tarapyndan döredilen edebiýat, binagärlik we amaly-haşam sungatynyň naýbaşy eserleri milletimiziň berk ruhy sütünini emele getirip, dünýä medeniýetiniň altyn hazynasynda orun aldy. Türkmen topragynyň beýik nusgawy şahyrlary tarapyndan wasp edilen ynsanperwerlik ýörelgeleri parahatçylygyň, adalatlylygyň, dostlugyň we döredijiligiň belent taglymlaryny wagyz edip, ähli doganlyk halklaryň umumy baýlygyna öwrüldi.

Dabaranyň dowamynda döwlet Baştutanlary Türkiýäniň milli halk oýunlaryna tomaşa etdiler.

Açylyş dabarasyndan soňra döwlet Baştutanlary “Malazgirt” çäreler merkezine bardylar.

Bu ýerde medeni maksatnamanyň çäklerinde ýaýbaňlandyrylan milli we etnosport oýunlary kökleri müňýyllyklaryň jümmüşine uzap gidýän däpleriň dowamata atarylýandygynyň aýdyň beýany boldy. Täsirli atly çykyşlar we etnografik görkezilişler türki halklaryň asyrlar aşyp gelýän durmuş ýörelgelerini açyp görkezdi. Olarda bedew hemişe erkanalygyň, okgunlylygyň we wepadarlygyň nyşany bolup durýar.

Şunuň bilen baglylykda, ýurdumyzda ahalteke atlarynyň şan-şöhratyny artdyrmak, ata-babalarymyzdan miras galan milli seýisçilik sungatyny has-da kämilleşdirmek we atly sporty ösdürmek boýunça uly işleriň alnyp barylýandygyny bellemek gerek. Türkmenistan gadymy döwürlerden bäri atşynaslygyň iri merkezi bolup durýar. Häzirki döwürde Gahryman Arkadagymyzyň milli atşynaslygy ösdürmek, onuň gadymdan gelýän däplerini gorap saklamak, behişdi bedewleriň dünýädäki şöhratyny has-da belende galdyrmak boýunça başyny başlan giň gerimli işleri hormatly Prezidentimiz Serdar Berdimuhamedowyň baştutanlygynda üstünlikli dowam etdirilýär.

Mälim bolşy ýaly, 2026-njy ýyl ýurdumyzda «Garaşsyz, baky Bitarap Türkmenistan — bedew batly at-myradyň mekany» şygary bilen geçýär. Milli atçylyk pudagy täze belentliklere çykarylyp, atçylyk-sport düzümlerini, atly sportuň görnüşlerini we milli atşynaslyk däplerini ösdürmek ugrunda giň gerimli işler durmuşa geçirilýär, bu ugurda halkara hyzmatdaşlyk ösdürilýär. Türkmen çapyksuwarlary şöhratly ata-babalarymyzyň iň gowy däplerini dowam edip, abraýly atly sport ýaryşlarynyň we daşary ýurtlarda geçirilýän köp sanly at çapyşyklarynyň ýeňijileri bolýarlar.

Her ýylyň aprel aýynyň soňky ýekşenbesinde ýurdumyzda uly dabaralara beslenýän Türkmen bedewiniň milli baýramy ahalteke bedewlerine diňe bir ählihalk däl-de, eýsem, halkara söýginiň hem nyşanydyr. Ahalteke atçylyk sungatynyň we atlary bezemek däpleriniň türkmen sungatynyň naýbaşy görnüşleriniň biri hökmünde ÝUNESKO-nyň Adamzadyň maddy däl medeni mirasynyň sanawyna girizilmegi bolsa milli we dünýä medeniýetiniň gymmatlygy hasaplanýan bedewlerimiziň Ýer ýüzündäki at-abraýyny has-da dabaralandyrýar.

Türkmen halkynyň Milli Lideriniň başlangyjy bilen, 2007-nji ýylda “Galkynyş” milli at üstündäki oýunlar topary döredildi. Häzirki wagtda bu topar diňe bir ýurdumyzda däl, eýsem, onuň çäginden daşarda hem meşhurdyr. Topar dünýäniň dürli künjeklerinde çykyş edip, abraýly halkara sylaglaryň ençemesine mynasyp boldy.

Çäräniň dowamynda türki döwletleriň medeniýet we sungat ussatlary çykyş etdiler. Konsert maksatnamasy dürli halklaryň asyrlarboýy dowam edip gelýän özboluşly däp-dessurlaryny şöhlelendirýän milli aýdym-sazlary öz içine aldy.

Umuman, türki dilli döwletleriň sungat ussatlarynyň gatnaşmagynda bilelikdäki çäreleriň geçirilmegi türki halklaryň özboluşly aýratynlyklary, taryhy, medeniýeti hem-de milli däp-dessurlary bilen tanyşmaga mümkinçilik döretmek bilen, döwletara hyzmatdaşlygyň täze derejä çykarylmagyna itergi berýär.

Hormatly Prezidentimiziň Türkiýe Respublikasyna iş sapary dowam edýär.

Aşgabat, 26-njy oktýabr (TDH). Şu gün hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Onda ýurdumyzyň oba hojalyk toplumynda we welaýatlarda alnyp barylýan işler bilen bagly meselelere garaldy.

Ilki bilen, Ahal welaýatynyň häkimi T.Nurmyradowa söz berildi. Häkim welaýatda dowam edýän möwsümleýin oba hojalyk işleriniň barşy barada hasabat berdi.

Bellenilişi ýaly, häzirki wagtda welaýatda pagta ýygymynyň depginini güýçlendirmek, hasyly ýitgisiz ýygnap almak hem-de döwlet harmanyna tabşyrmak boýunça zerur çäreler görülýär. Şunuň bilen birlikde, welaýatda bugdaý ekişi dowam edip, ekiş geçirilen meýdanlarda gögeriş suwy tutulýar. Kadaly gögeriş alnan meýdanlarda degişli ideg işleri ýerine ýetirilýär.

Bu işler bilen bir hatarda, welaýatyň güýzlük ýeralma, gök-bakja we beýleki azyklyk ekinleri ekilen meýdanlarynda ideg etmek, şeýle hem ýetişdirilen hasyly ýygnap, ilata ýetirmek boýunça işler utgaşykly alnyp barylýar.

Şeýle hem häkim ýurdumyzy durmuş-ykdysady taýdan ösdürmäge gönükdirilen maksatnamalara laýyklykda, şu ýyl welaýatda açylyp ulanmaga berilmegi meýilleşdirilen medeni-durmuş, önümçilik maksatly desgalardaky gurluşyk işleriniň ýagdaýy barada hasabat berdi.

Hormatly Prezidentimiz hasabaty diňläp, oba hojalygynda dowam edýän möwsümleýin işleriň ýokary hilli, guramaçylykly we agrotehniki möhletlerde geçirilmeginiň zerurdygyny belledi hem-de bu babatda häkime anyk tabşyryklary berdi.

Döwlet Baştutanymyz ýurdumyzy durmuş-ykdysady taýdan ösdürmäge, halkymyzyň ýaşaýyş-durmuş derejesini yzygiderli ýokarlandyrmaga gönükdirilen maksatnamalarda bellenen wezipeleriň üstünlikli ýerine ýetirilmeginiň möhümdigine ünsi çekip, şu ýyl welaýatda açylyp ulanmaga berilmegi göz öňünde tutulýan desgalardaky gurluşyk işleriniň ýokary hilli we öz wagtynda ýerine ýetirilmegini gözegçilikde saklamagy tabşyrdy.

Soňra Balkan welaýatynyň häkimi R.Jumaýew welaýatda alnyp barylýan möwsümleýin oba hojalyk işleri barada hasabat berdi.

Bellenilişi ýaly, şu günler welaýatda ýetişdirilen pagta hasylyny gysga wagtda hem-de ýitgisiz ýygnap almak boýunça degişli işler ýerine ýetirilip, ýygymyň depginini güýçlendirmek üçin zerur çäreler görülýär. Welaýatda bugdaý ekişi dowam edip, ekiş geçirilen meýdanlarda gögeriş suwy tutulýar, gögeriş alnan ýerlerde degişli ideg işleri alnyp barylýar.

Ýurdumyzda azyk bolçulygyny has-da pugtalandyrmak babatda öňde goýlan wezipelerden ugur alnyp, güýzlük ýeralma we gök-bakja ekinlerine ideg etmek, şeýle hem ýetişdirilen hasyly ýygnap almak boýunça degişli işler ýerine ýetirilýär.

Şunuň bilen bir hatarda, häkim şu ýyl welaýatda açylyp ulanmaga berilmegi meýilleşdirilýän medeni-durmuş we önümçilik maksatly desgalardaky gurluşyk işleri barada hasabat berdi.

Hormatly Prezidentimiz hasabaty diňläp, häzirki wagtda oba hojalygynda ýaýbaňlandyrylan möwsümleýin işleriň, hususan-da, pagta ýygymynyň we bugdaý ekişiniň ýokary guramaçylykly geçirilmeginiň möhümdigini belledi we bu babatda häkime degişli görkezmeleri berdi.

Şeýle hem döwlet Baştutanymyz şu ýyl welaýatda açylyp ulanmaga berilmegi göz öňünde tutulýan dürli maksatly desgalardaky gurluşyk işleriniň ýokary hilli we öz wagtynda ýerine ýetirilmegini gözegçilikde saklamagy tabşyrdy.

Soňra Daşoguz welaýatynyň häkimi D.Babaýew welaýatdaky möwsümleýin oba hojalyk işleriniň barşy barada hasabat berdi.

Hasabatda bellenilişi ýaly, welaýatda pagta hasylyny gysga wagtda we ýitgisiz ýygnap almak boýunça işler dowam edip, ýygymyň depginini güýçlendirmek üçin zerur çäreler görülýär. Şeýle hem welaýatda bugdaý ekişini agrotehniki möhletlerde we ýokary hilli geçirmek üçin oba hojalyk tehnikalarynyň doly güýjünde hem-de netijeli işledilmegine aýratyn üns berilýär. Bu işler bilen bir hatarda, welaýatda ýetişdirilen şalynyň, güýzlük gök-bakja we beýleki oba hojalyk ekinleriniň hasylyny ýygnap almak işleri ýerine ýetirilýär.

Şeýle hem häkim Oba milli maksatnamasyna laýyklykda, welaýatda şu ýyl açylyp ulanmaga berilmegi göz öňünde tutulýan medeni-durmuş we önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, pagta hasylyny soňky hanasyna çenli ýitgisiz ýygnap almak, bu ugurdaky işleriň depginlerini güýçlendirmek, bugdaý ekişini agrotehniki möhletlerde talabalaýyk geçirmek babatda häkime anyk tabşyryklary berdi.

Şeýle hem döwlet Baştutanymyz Oba milli maksatnamasyna laýyklykda, şu ýyl welaýatda açylyp ulanmaga berilmegi göz öňünde tutulýan dürli maksatly desgalardaky gurluşyk işleriniň ýokary hilli ýerine ýetirilmegini gözegçilikde saklamagy tabşyrdy.

Soňra Lebap welaýatynyň häkimi H.Aşyrmyradow welaýatda dowam edýän möwsümleýin oba hojalyk işleri barada hasabat berdi.

Hasabatda bellenilişi ýaly, şu günler welaýatda ýetişdirilen pagta hasylyny soňky hanasyna çenli ýitgisiz we gysga wagtda ýygnap almak, şeýle hem ýygnalan hasyly pagta kabul ediş kärhanalaryna we harmanhanalaryna tabşyrmak işleri alnyp barylýar. Möwsümde oba hojalyk tehnikalary netijeli işledilýär. Welaýatda bugdaý ekişi dowam edip, ekiş geçirilen meýdanlarda gögeriş suwuny tutmak, gögeriş alnan meýdanlarda ideg etmek işleri ýerine ýetirilýär. Bu işler bilen bir hatarda, welaýatda şalynyň, gök-bakja we beýleki oba hojalyk ekinleriniň hasylyny ýygnap almak işleri dowam edýär.

Şeýle-de häkim Oba milli maksatnamasyna laýyklykda, şu ýyl açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Döwlet Baştutanymyz hasabaty diňläp, häzirki wagtda oba hojalygynda jogapkärli möwsümiň dowam edýändigini belledi we şunuň bilen baglylykda, häkime pagta hasylyny ýitgisiz ýygnap almak, bugdaý ekişini agrotehnikanyň kadalaryna laýyklykda, öz wagtynda geçirmek üçin zerur çäreleri görmegi tabşyrdy.

Şeýle hem döwlet Baştutanymyz ýurdumyzy durmuş-ykdysady taýdan ösdürmäge gönükdirilen maksatnamalara laýyklykda, welaýatda şu ýyl üçin meýilleşdirilen işleriň ýokary hilli we bellenen möhletlerde ýerine ýetirilmegini gözegçilikde saklamagy tabşyrdy.

Soňra Mary welaýatynyň häkimi B.Orazgylyjow welaýatda dowam edýän möwsümleýin oba hojalyk işleriniň barşy barada hasabat berdi.

Bellenilişi ýaly, welaýatda dowam edýän möwsümleýin oba hojalyk işleriniň çäklerinde pagta hasylyny gysga wagtda we ýitgisiz ýygnap almak boýunça degişli işler alnyp barylýar. Pagta ýygymyna gatnaşýan oba hojalyk tehnikalaryny doly güýjünde işletmek, ýygnalan hasyly pagta arassalaýjy kärhanalarda we kabul ediş harmanhanalarynda bökdençsiz kabul etmek üçin zerur çäreler görülýär. Şunuň bilen birlikde, welaýatda bugdaý ekişi dowam edip, ekiş geçirilen meýdanlarda suw tutmak we ideg etmek işleri ýerine ýetirilýär. Bu işler bilen bir hatarda, welaýatyň gant şugundyry ekilen meýdanlarynda ideg işleri tamamlaýjy tapgyrda alnyp barlyp, häzirki wagtda ýetişdirilen hasyly ýygnap almaga taýýarlyk görülýär.

Hormatly Prezidentimiziň ýurdumyzda oba hojalyk ekinleriniň öndürilýän möçberlerini artdyrmak we azyk bolçulygyny has-da pugtalandyrmak babatda öňde goýan wezipelerinden ugur alnyp, welaýatda ekilen güýzlük ýeralma, gök-bakja we beýleki oba hojalyk ekinlerine ideg etmek bilen bir hatarda, ýetişdirilen hasyly ýygnap almak hem-de ilata ýetirmek boýunça degişli işler alnyp barylýar.

Mundan başga-da, häkim Oba milli maksatnamasyna laýyklykda, şu ýyl welaýatda açylyp ulanmaga berilmegi göz öňünde tutulýan desgalardaky gurluşyk işleriniň barşy barada hasabat berdi.

Döwlet Baştutanymyz hasabaty diňläp, milli ykdysadyýetimiziň dokma hem-de azyk senagaty pudaklary üçin gymmatly çig mal bolan pagta hasylyny soňky hanasyna çenli ýitgisiz ýygnap almak, bugdaý ekişini bellenen agrotehniki möhletlerde geçirmek üçin ähli zerur çäreleri görmegiň möhümdigini belledi we bu babatda häkime degişli tabşyryklary berdi.

Şeýle-de hormatly Prezidentimiz Oba milli maksatnamasyna laýyklykda, şu ýyl welaýatda açylyp ulanmaga berilmegi göz öňünde tutulýan desgalardaky gurluşyk işleriniň ýokary hilli ýerine ýetirilmegini gözegçilikde saklamagy tabşyrdy.

Soňra Ministrler Kabinetiniň Başlygynyň orunbasary T.Atahallyýew ýurdumyzyň oba hojalygynda dowam edýän möwsümleýin işleriň barşy barada hasabat berdi.

Bellenilişi ýaly, häzirki wagtda oba hojalygynda dowam edýän möwsümleýin işleriň çäklerinde ýetişdirilen pagta hasylyny gysga wagtda we ýitgisiz ýygnap almak, hasyly kabul ediş harmanhanalarynda we pagta arassalaýjy kärhanalarda bökdençsiz kabul etmek boýunça zerur çäreler görülýär. Bu işlerde ulanylýan oba hojalyk tehnikalary doly güýjünde işledilýär.

Geljek ýylyň hasyly üçin bugdaý ekişi dowam edip, ekiş geçirilýän meýdanlary mineral dökünler bilen gurplandyrmak, ekiş geçirilen ýerlerde gögeriş suwuny tutmak işleri utgaşykly alnyp barylýar.

Hormatly Prezidentimiziň ilatymyzy ýurdumyzda öndürilýän oba hojalyk önümleri bilen bolelin üpjün etmek barada öňde goýan wezipelerini üstünlikli ýerine ýetirmek maksady bilen, welaýatlarda azyklyk ekinleriň ýetişdirilen hasylyny ýygnap almak hem-de ilata ýetirmek boýunça degişli işler geçirilýär.

Daşoguz hem-de Lebap welaýatlarynda şaly hasylyny ýygnap almak işleri dowam edip, Mary welaýatynda gant şugundyry ekilen meýdanlarda ideg etmek işleri tamamlaýjy tapgyrda alnyp barylýar we häzirki wagtda hasyly ýygnap almaga taýýarlyk görülýär.

Hormatly Prezidentimiz hasabaty diňläp, oba hojalyk pudagynyň milli ykdysadyýetimizdäki möhüm ornuny belledi we şunuň bilen baglylykda, wise-premýere häzirki wagtda pudakda ýaýbaňlandyrylan möwsümleýin işleriň talabalaýyk alnyp barylmagyny gözegçilikde saklamagy tabşyrdy.

Soňra döwlet Baştutanymyz iş maslahatyna gatnaşyjylara ýüzlenip, welaýatlarda pagta ýygymynyň depginini güýçlendirmek hem-de hasyly gysga möhletde, ýitgisiz ýygnamak üçin ähli zerur işleri ýerine ýetirmegi, bugdaý ekişini agrotehniki möhletlere laýyklykda, ýokary hilli geçirmegi, ekişde oba hojalyk tehnikalarynyň we gurallarynyň doly güýjünde, netijeli işledilmegini üpjün etmegi, bugdaý ekilen meýdanlarda gögeriş suwuny wagtynda tutup, kadaly gögeriş almak üçin ähli zerur çäreleri görmegi, haşal otlara garşy göreş çärelerini wagtynda geçirmegi tabşyrdy.

Şeýle hem hormatly Prezidentimiz içerki bazarlarymyzy üpjün etmek üçin welaýatlarda ýetişdirilen gök-bakja we beýleki oba hojalyk önümlerini, Daşoguz we Lebap welaýatlarynda şaly hasylyny ýitgisiz ýygnap almagyň, Mary welaýatynda gant şugundyrynyň ýygymyna başlamaga gowy taýýarlyk görmegiň, bugdaý we pagta öndürijiler bilen hyzmat ediji edara-kärhanalaryň arasynda şu ýylyň hasyly üçin ýerine ýetirilen işler boýunça hasaplaşyklary wagtynda geçirmegiň zerurdygyny belledi.

Döwlet Baştutanymyz ýurdumyzy durmuş-ykdysady taýdan ösdürmäge gönükdirilen maksatnamalarda bellenen wezipeleri üstünlikli ýerine ýetirmegiň möhümdigine ünsi çekip, şu ýyl welaýatlarda açylyp ulanmaga berilmegi meýilleşdirilen medeni-durmuş we önümçilik maksatly desgalarda gurluşyk işleriniň alnyp barlyşyna berk gözegçilik etmegi tabşyrdy.

Hormatly Prezidentimiz Serdar Berdimuhamedow iş maslahatyny tamamlap, oňa gatnaşanlara berk jan saglyk, maşgala abadançylygyny, alyp barýan işlerinde uly üstünlikleri arzuw etdi.

Arkadag şäheri, 24-nji oktýabr (TDH). Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow milli binagärlik ýörelgeleri bilen häzirki zamanyň ösen tejribesiniň sazlaşygyndan binýat bolan Arkadag şäherine geldi. Gahryman Arkadagymyz bu ýerde täze şäheriň çäklerinde gurluşygy dowam edýän desgalaryň şekil taslamalary, binalaryň bezeg işlerinde ulanylýan serişdeleriň görnüşleri bilen tanyşdy.

Häzirki döwürde Gahryman Arkadagymyzyň yzygiderli tagallasy bilen gurlup ulanmaga berlen täze şäheriň gurluşygynyň ikinji tapgyry batly depginlerde dowam edýär. Bu ýerde medeni-durmuş we önümçilik maksatly binalaryň, ýol-ulag düzümine degişli desgalaryň gurluşyklary häzirki zamanyň talaplaryna we binagärligiň ýokary görkezijilerine laýyk derejede dowam etdirilýär.

...Ir bilen türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz häzirki zamanyň ösen tehnologiýalaryny özünde jemleýän hem-de «akylly» şäher konsepsiýasynyň talaplarynyň doly ýerine ýetirilmeginde bina edilen Arkadag şäherine geldi.

Täze şäheriň keşbinde türkmen halkynyň asyrlar aşyp gelýän milli binagärlik ýörelgeleri öz beýanyny tapýar. Munuň özi ösüşleriň belentliklerine tarap ynamly gadam urýan ýurdumyzda şähergurluşyk maksatnamasynda milli ülňüler bilen döwrebaplygyň utgaşdyrylyp amala aşyrylýandygyny görkezýär. Şunda şäher ilatynyň ýaşaýyş-durmuş derejesiniň ýokarlandyrylmagy, bagtyýar maşgalalaryň ähli amatlyklary özünde jemleýän döwrebap ýaşaýyş jaýlaryna göçüp gelmekleri bilen baglanyşykly meseleler yzygiderli gözegçilikde saklanylýar.

Türkmenistanyň at gazanan arhitektory Gahryman Arkadagymyz täze şäheriň gurluşygynyň ikinji tapgyrynda bina edilmegi meýilleşdirilýän önümçilik toplumlarynyň, ýol-ulag düzümine degişli desgalaryň we beýleki binalaryň şekil taslamalary bilen tanyşdy.

Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow täze şäheri mundan beýläk-de ösdürmegiň meýilnamasyna laýyklykda alnyp barylýan gurluşyk işleri we taýýarlanylan şekil taslamalary barada giňişleýin maglumat berdi.

Bu ýerde görkezilen şekil taslamalarynyň hatarynda 30 müň adama niýetlenen «Arkadagyň ruhy metjidiniň» ýanaşyk ýerleriniň abadanlaşdyrylyşy, onuň çäklerinde guruljak desgalaryň görnüşleri, täze şäheriň seýilgähiniň çäginde goýulmagy meýilleşdirilýän dürli şekiller, Ahalteke atlary şaýolunyň ugrunda oturdylmagy göz öňünde tutulýan bedew heýkelleriniň görnüşleri we ýol-ulag düzümine degişli taslamalar bar.

Gahryman Arkadagymyz, ilki bilen, metjidiň ýanaşyk ýerleriniň çyzgylary bilen tanşyp, onuň çäginde guruljak bassyrmalaryň şekil aýratynlyklaryna birnäçe belliklerini aýtdy. Çünki bu künjegiň, aýratyn-da, täze metjidiň binasynyň özboluşly aýratynlyklary bilen bitewi sazlaşygyň döremegine möhüm ähmiýet berlip, ol Arkadag şäheriniň umumy keşbiniň binagärlik sazlaşygynda öz beýanyny tapmalydyr.

Türkmenistanyň at gazanan arhitektory Gahryman Arkadagymyz täze şäheriň seýilgähiniň taslamasyny, onuň çäginde ýerleşdiriljek şekilleriň we serişdeleriň görnüşlerini synlap, olara birnäçe düzedişleri girizdi. Seýilgähde adamlaryň, aýratyn-da, ýaş nesilleriň wagtlaryny şadyýan geçirmekleri we amatly dynç alşyň hözirini görmekleri üçin ähli zerur şertler döredilmelidir. Şunda seýilgähiň ekologiýa ýagdaýyny ünsden düşürmeli däldir.

Gahryman Arkadagymyz şekil taslamalary bilen tanyşlygyň dowamynda Ahalteke atlary şaýolunyň ugrunda oturdyljak bedew heýkellerini synlady. Şaýoluň esasy bezegleriniň birine öwrüljek heýkelleriň görnüşlerine, olaryň reňk aýratynlyklaryna zerur üns berilmelidigini belläp, Gahryman Arkadagymyz bu babatda örän oýlanyşykly çemeleşilmelidigini we bedew heýkelleri taýýarlanylanda milli atşynaslyk tejribelerinden ugur alynmalydygyny aýtdy hem-de bu babatda öwüt-nesihatlaryny berdi.

Soňra türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz bu ýerde Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazowyň we Arkadag şäheriniň häkimi G.Mämmedowanyň gatnaşmagynda iş maslahatyny geçirdi.

D.Orazow häzirki döwürde Arkadag şäheriniň gurluşygynyň ikinji tapgyrynda durmuş we önümçilik maksatly desgalaryň, şol sanda ýaşaýyş jaýlarynyň gurluşyklarynyň depginleri, bu işleriň häzirki döwürde ýeten derejesi barada giňişleýin maglumat berdi.

Gahryman Arkadagymyz täze şäheriň çäklerinde gurulýan binalaryň we desgalaryň taslamalary taýýarlanylanda häzirki zaman şähergurluşyk maksatnamasynyň talaplarynyň göz öňünde tutulmalydygyny belläp, bu işlere taslamaçylaryň, gurluşykçylaryň we şäher ýolbaşçylarynyň örän jogapkärçilikli çemeleşmekleriniň möhümdigini aýtdy. Şol bir wagtyň özünde binalaryň ýanaşyk ýerleri göwnejaý abadanlaşdyrylmalydyr.

Gahryman Arkadagymyz täze şäherde bina edilýän önümçilik maksatly toplumlaryň gurluşyklarynda bolşy ýaly, ýol-ulag düzümine degişli desgalarda hem häzirki zamanyň täzeçil usullaryndan we ösen tehnologiýalardan netijeli peýdalanylmalydygyny belledi. Bu ugurda alnyp barylýan işleriň guramaçylyk ýagdaýy, hil derejesi hem-de desgalaryň gurluşygynyň bellenilen möhletlerde tamamlanmagy möhümdir.

Arkadag şäheriniň häkimi G.Mämmedowa, ilki bilen, döwlet Baştutanymyzyň çözgüdine laýyklykda, bag nahallaryny we dürli gülleri ekmek boýunça tejribe alyşmak maksady bilen, Niderlandlar Patyşalygyna sapar bilen gitmäge döredilen mümkinçilik üçin hormatly Prezidentimize hem-de Gahryman Arkadagymyza tüýs ýürekden hoşallyk bildirdi.

Şeýle hem ol güýzki bag ekmek möwsümine taýýarlyk işleri, bag nahallarynyň ekiljek ýerleriniň çyzgylary, şol bir wagtyň özünde ýurdumyzda giňden bellenilýän Hasyl toýuna taýýarlyk işleri barada maglumat berdi. Bellenilişi ýaly, açylan döwründen bäri Arkadag şäherinde jemi 50 müň düýp bag ekildi. Şu ýylyň ýazky möwsüminde 5 müň düýp bagyň ekilendigini aýdyp, häkim güýzki möwsümde hem 5 müň düýp bag ekmegiň meýilleşdirilendigi barada habar berdi. Ýeri gelende belläp geçsek, geçen ýylyň özünde ýurt boýunça 3 milliondan gowrak agaç nahaly ekildi. Munuň özi ösüşleriň belentliklerine tarap bedew bady bilen ynamly gadam urýan ýurdumyzyň täze taryhyna altyn harplar bilen ýazylan waka öwrüldi.

Gahryman Arkadagymyz dürli görnüşli baglary we gülleri ösdürip ýetişdirmekde Niderlandlar Patyşalygynyň baý tejribe toplan ýurt hökmünde ykrar edilendigini belläp, saparyň dowamynda Arkadag şäherinde toprak-howa şertlerine laýyk gelýän bag nahallaryny we dürli reňkdäki gülleri ekmek boýunça gepleşikleriň geçirilmelidigini aýtdy. Toplanan tejribäniň Arkadag we Aşgabat şäherlerinde utgaşykly alnyp barylmagynyň zerurdygyny belläp, Gahryman Arkadagymyz özüniň degerli maslahatlaryny berdi.

Bu baradaky gürrüňi dowam edip, Gahryman Arkadagymyz ýurdumyz boýunça geçirilýän Hasyl toýunda Arkadag şäheriniň mynasyp wekilçilik etmegi bilen baglanyşykly meselelere hemmetaraplaýyn taýýarlyk görülmelidigini belledi. Munuň özi Arkadag şäheriniň nusgalyk şäher hökmündäki derejesiniň pugtalandyrylmagynda ähmiýetli bolar.

Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz kesgitlenen wezipeleriň üstünlikli ýerine ýetirilmegi ugrunda degişli düzümleriň sazlaşykly işiniň üpjün edilmelidigini belläp, iş maslahatyny jemledi.

Soňra Gahryman Arkadagymyz täze şäheriň binagärlik keşbiniň baş bezegine öwrülýän metjidiň gurluşyk işlerini, onuň ýanaşyk ýerleriniň abadanlaşdyrylyşyny synlady. Häzirki döwürde bu ýerde alnyp barylýan gurluşyk we bezeg işleri kesgitlenen meýilnama laýyklykda, batly depginlerde dowam edýär.

Şol bir wagtyň özünde Arkadagyň ruhy metjidiniň bezeg işlerinde ulanylýan serişdeleriň berkligine, göze gelüwliligine möhüm ähmiýet berilýär. Aýratyn-da, metjidiň yşyklandyryş ulgamynda ulanylýan serişdeler hil taýdan häzirki zamanyň talaplaryna we ýokary halkara görkezijilere doly laýyk gelýär. Munuň özi sogap işleriň we ýagşy dessurlaryň berjaý edilýän mukaddes ýerinde ýagtylygyň derejesiniň döwrebap bolmagyny üpjün eder.

Ýeri gelende aýtsak, häzirki döwürde Arkadagyň ruhy metjidiniň yşyklandyryş ulgamy işe girizilýär. Binalar toplumynyň älemgoşar öwüşginli yşyklardan döreýän şekilleri häzirki zamanyň täzeçil ýörelgelerini özünde jemleýän Arkadag şäheriniň agşamky görnüşleriniň gözelligini artdyrýar.

Al-ýaşyl öwüsýän yşyklaryň özboluşly görnüşleri ynsan kalbyna ýakymly täsir edýär. Munuň özi Gahryman Arkadagymyzyň başlangyjy we yzygiderli tagallasy bilen binýat bolan täze şäheriň ähli desgalarynyň gurluşygyna we olaryň bezeg işlerine hem-de yşyklandyryş ulgamyna aýratyn üns berilýändigini görkezýär.

Gahryman Arkadagymyz bu ýerden täze şäheriň çäklerinde gurulýan kottejler toplumynyň ýerleşýän ýerine geldi. Toplumyň çäginde lagym ulgamlarynyň, agyz suwuny geçirijileriň we beýleki hyzmatlaryň ýokary derejesiniň üpjün edilmelidigini belläp, Gahryman Arkadagymyz bu işleriň bökdençsiz hereketiniň ýola goýulmagy bilen baglanyşykly meseleleriň üns merkezinde saklanmalydygyny aýtdy we bu babatda özüniň degerli maslahatlaryny berdi. Şeýle hem Gahryman Arkadagymyz, kottejleriň ýanaşyk ýerlerinde bolşy ýaly, olaryň howlularynda hem bagy-bossanlygyň döredilmelidigini belläp, täze jaýlaryň birine girip gördi.

Kottejleriň enjamlaşdyrylyşy, onuň otaglarynyň üpjünçiligi häzirki zamanyň talaplaryna doly laýyk gelýär. Aýratyn-da, jaýlaryň otaglarynda ýerleşdirilen mebeller we yşyklandyryş ulgamy halkymyzyň islegleri esasynda taýýarlanyldy. Soňra Gahryman Arkadagymyz jaýyň aşhanasy bilen tanyşdy. Bu ýerde ýangyn howpsuzlygyny berjaý etmek we onuň öňüni almak boýunça degişli gulluga dessin habar berýän sanly ulgamyň aýratynlyklary ornaşdyrylypdyr. Bu bolsa «akylly» öýleriň özboluşly mümkinçilikleri bolup durýar. Munuň özi bu jaýlara göçüp gelýän maşgalalaryň bagtyýar durmuşynyň üpjün edilmegi ugrunda döwlet derejesinde edilýän aladanyň aýdyň netijesidir.

Gahryman Arkadagymyz kottej jaýyň ikinji gatyna galyp, onuň howlusyny synlady hem-de howlynyň bagy-bossanlyga bürenmeginiň bu künjegiň ekologiýa ýagdaýynyň ýokary bolmagynda we maşgala agzalarynyň oňaýly dynç alşynda ähmiýetli boljakdygyna ünsi çekdi. Mälim bolşy ýaly, hormatly Prezidentimiziň oba hojalyk boýunça geçirýän iş maslahatlarynda ýaşaýyş jaýlarynyň we edara binalarynyň ýyladyş ulgamynyň kadaly işlemegi, olaryň talabalaýyk gyzdyrylmagy babatda berýän tabşyryklaryna laýyklykda, bu ugra aýratyn üns berilýär. Arkadag şäheriniň ikinji tapgyrynda gurulýan desgalarda hem ýyladyş ulgamlarynyň kadaly işleýşi döwrebap enjamlar arkaly berkidilendir. Gahryman Arkadagymyz bu babatda özüniň köpýyllyk tejribesine esaslanyp, birnäçe maslahatlaryny berdi we täze şäheriň çäginde gurulýan köp gatly ýaşaýyş jaýlarynyň birine bardy.

Gahryman Arkadagymyz bu ýerde ýaşaýyş jaýynyň bezeginde ulanylýan serişdeleriň we mermerleriň görnüşlerini synlady. Bellenilişi ýaly, bu mermerler ýokary hil derejesine laýyk gelýändigi we berkligi bilen tapawutlanýar. Munuň özi jaýlaryň bezegleriniň uzak möhletleýin häsiýete eýe bolmagyny üpjün edýär.

Köp gatly ýaşaýyş jaýynyň öýlerinde ýaşamak we ýokary derejede dynç almak üçin ähli amatlyklar üpjün edilipdir. «Akylly» şäher konsepsiýasyna laýyklykda bina edilen ýaşaýyş jaýynda ähli enjamlar sanly tehnologiýalar arkaly dolandyrylýar. Bu bolsa zähmetsöýer halkymyzyň häzirki zamanyň ýokary derejeli şertlerinden we döwrebap eşretlerden peýdalanmaklary ugrunda edilýän aladanyň aýdyň netijesidir.

Gahryman Arkadagymyz bu işleriň «Döwlet adam üçindir!» hem-de «Watan diňe halky bilen Watandyr! Döwlet diňe halky bilen döwletdir!» diýen asylly şygarlary baş ýörelge edinýän hormatly Prezidentimiziň aladasy bilen halkymyzyň bagtyýar durmuşynyň üpjün edilmegine gönükdirilen tagallalaryň rowaçlyklara beslenýändiginiň aýdyň subutnamasydygyny belledi. Hormatly Prezidentimiziň bu ugurda alyp barýan işleriniň halkymyzyň bähbidine gönükdirilýändigini belläp, Gahryman Arkadagymyz eşretli durmuşyň nesillerimiz arkaly dowamat-dowam bolýandygyny aýtdy.

Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz bu ýerden ugrap, ýolugra täze şäheriň awtomenziliniň gurluşygynyň dowam edýän ýerinde saklandy. Bu ýerde şäheriň täze seýilgähiniň gurluşygy-da alnyp barylýar.

Gahryman Arkadagymyz gurluşyklary synlap, täze şäherde ýokary ekologiýa ýagdaýynyň saklanmalydygyny, seýilgähiň çäklerinde dürli oturgyçlaryň, amatly bassyrmalaryň ýerleşdirilmelidigini, şol bir wagtyň özünde-de dürli bag nahallarynyň we köp öwüşginli gülleriň ekilmelidigini belledi.

Täze şäheriň gurluşygynyň ikinji tapgyrynyň çäklerinde wideogözegçiligiň yzygiderli ýola goýulmagynyň zerurdygyny nygtap, Gahryman Arkadagymyz bu işleriň şäheriň ähli künjeginde tertip-düzgüniň saklanmagynda we bar bolan kemçilikleriň ýüze çykarylmagynda ähmiýetli boljakdygyny aýtdy. Munuň özi şäher ilatynyň bagtyýar durmuşynyň üpjün edilmegi ugrundaky aladanyň aýdyň netijesidir.

Bu ýerde adamlaryň, maşgalalaryň göwnejaý dynç almaklaryny üpjün edýän ähli zerur şertleriň döredilmelidigini aýdyp, Gahryman Arkadagymyz şeýle işlere örän jogapkärçilikli hem-de häzirki zamanyň talaplaryna laýyk derejede çemeleşilmelidigini belledi we bu babatda özüniň öwüt-nesihatlaryny berdi.

Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz kesgitlenen wezipeleri abraý bilen ýerine ýetirmekde hemmelere üstünlik arzuw edip, bu ýerden ugrady.

Aşgabat, 23-nji oktýabr (TDH). Şu gün hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda ýurdumyzyň döwlet durmuşyna degişli birnäçe meselelere seredildi.

Ilki bilen, Mejlisiň Başlygy D.Gulmanowa ýurdumyzyň kanunçylyk binýadyny pugtalandyrmak boýunça alnyp barylýan işler barada maglumat berdi. Bellenilişi ýaly, Mejlisde döredilen iş toparlarynda döwletimiziň halkara resminamalara goşulmagyny hukuk taýdan goldamak bilen baglanyşykly kanun taslamalaryny taýýarlamak, Türkmenistanyň Ilaty durmuş taýdan goramak, Administratiw hukuk bozulmalary hakynda kodekslerine, şeýle hem «Işiň aýry-aýry görnüşlerini ygtyýarlylandyrmak hakynda», «Kärende hakynda», «Paýdarlar jemgyýetleri hakynda» Kanunlaryna döwrebap üýtgetmeleri we goşmaçalary girizmek boýunça işler alnyp barylýar.

Parlamentara gatnaşyklary ösdürmek, kanunçykaryjylyk işinde tejribe alyşmak maksady bilen, milli parlamentiň wekilleri Andorra Knýazlygynda, Tanzaniýa Birleşen Respublikasynda we Täjigistan Respublikasynda iş saparynda boldular. Şeýle hem Mejlisde Birleşen Milletler Guramasynyň Adam hukuklary boýunça Ýokary komissarynyň müdirliginiň Merkezi Aziýa üçin sebitleýin wekili bilen duşuşyk geçirilip, milli kanunçylygy kämilleşdirmegiň ugurlary ara alnyp maslahatlaşyldy.

Hormatly Prezidentimiz Serdar Berdimuhamedow ýurdumyzyň hukuk binýadyny kämilleşdirmek boýunça alnyp barylýan işleri dowam etmegiň, şeýle hem kabul edilen kanunlara üýtgetmeler we goşmaçalar girizmek boýunça netijeli işleri alyp barmagyň möhümdigini belledi.

Soňra Ministrler Kabinetiniň Başlygynyň orunbasary H.Geldimyradow ýurdumyzyň standartlaşdyryş ulgamyny mundan beýläk-de ösdürmek boýunça alnyp barylýan işler barada hasabat berdi.

Bellenilişi ýaly, häzirki wagtda ýurdumyzda bu ulgamy kämilleşdirmek we bu ugurda halkara guramalar bilen hyzmatdaşlygy ösdürmek hem-de döwrebap standartlary giňden ornaşdyrmak boýunça toplumlaýyn çäreler durmuşa geçirilýär. Bu işleriň netijeliligini has-da artdyrmak maksady bilen, wise-premýer döwlet Baştutanymyzyň garamagyna degişli teklibi hödürledi.

Döwlet Baştutanymyz hasabaty diňläp, ýurdumyzda milli standartlaşdyrmak ulgamyny kämilleşdirmek, döwrebap standartlary giňden ornaşdyrmak boýunça işleriň alnyp barylýandygyny aýtdy. Şunuň bilen baglylykda, döwlet Baştutanymyz wise-premýere bu ugurda halkara guramalar bilen hyzmatdaşlygy ösdürmek boýunça taýýarlanan teklibi goldap, wise-premýere degişli işleri geçirmegi tabşyrdy.

Soňra Ministrler Kabinetiniň Başlygynyň orunbasary G.Agajanow “Türkmengaz” döwlet konserni tarapyndan alnyp barylýan işler barada hasabat berdi.

Bellenilişi ýaly, häzirki wagtda bu düzümiň maddy-enjamlaýyn binýadyny mundan beýläk-de pugtalandyrmak we döwrebaplaşdyrmak boýunça zerur işler ýerine ýetirilýär. Munuň özi içerki we daşarky sarp edijileri tebigy gaz bilen yzygiderli üpjün etmäge ýardam berýär. Şunda dünýäniň öňdebaryjy kompaniýalary bilen hyzmatdaşlyga möhüm ähmiýet berilýär. Şunuň bilen baglylykda, wise-premýer döwlet Baştutanymyzyň garamagyna degişli resminamanyň taslamasyny hödürledi.

Hormatly Prezidentimiz hasabaty diňläp, ýurdumyzyň nebitgaz pudagynyň maddy-enjamlaýyn binýadyny kämilleşdirmek boýunça işleriň durmuşa geçirilýändigini belledi. Döwlet Baştutanymyz degişli Karara gol çekip, wise-premýere bu ugurda degişli işleri geçirmegi tabşyrdy.

Ministrler Kabinetiniň Başlygynyň orunbasary T.Atahallyýew oba hojalyk pudagynda we welaýatlarda möwsümleýin işleriň alnyp barlyşy hem-de Türkmen alabaýynyň baýramy mynasybetli baýramçylyk çärelerine görülýän taýýarlyk işleri barada hasabat berdi.

Bellenilişi ýaly, häzirki wagtda ýetişdirilen pagta hasylyny gysga wagtda ýygnap almak işleri dowam edýär. Bugdaý ekişi möwsümini bellenen agrotehniki möhletlerde we talabalaýyk geçirmek maksady bilen, ekişde ulanylýan oba hojalyk tehnikalaryny we gurallaryny öndürijilikli işletmek hem-de ekiş geçirilen meýdanlarda gögeriş suwuny tutmak we gögeriş alnan meýdanlarda ideg etmek işleri alnyp barylýar.

Şeýle hem ýurdumyzda Türkmen alabaýynyň baýramy mynasybetli dabaraly çäreleri giňden belläp geçmek boýunça taýýarlyk işleri alnyp barylýar. Däp bolşy ýaly, her ýyl bu sene mynasybetli dürli medeni çäreler guralýar.

Hormatly Prezidentimiz Serdar Berdimuhamedow hasabaty diňläp, ýurdumyzyň oba hojalyk pudagyny toplumlaýyn ösdürmegi, onuň maddy-enjamlaýyn binýadyny pugtalandyrmagy dowam etmegiň, bugdaý ekişini bellenen möhletlerde geçirmegiň, pagta hasylyny ýitgisiz ýygnap almak boýunça guramaçylyk işlerini gözegçilikde saklamagyň wajypdygyny nygtady. Şeýle hem döwlet Baştutanymyz wise-premýere beýleki oba hojalyk ekinlerini ösdürip ýetişdirmekde degişli işleri alyp barmagy tabşyrdy.

Soňra Ministrler Kabinetiniň Başlygynyň orunbasary B.Annamämmedow Türkmenistanyň Gurluşyk we senagat toplumynyň işgärleriniň güni mynasybetli geçirilmegi meýilleşdirilýän çäreler barada hasabat berdi.

Bellenilişi ýaly, häzirki wagtda “Türkmenistanyň gurluşyk, senagat, himiýa, energetika pudaklarynyň ösüşi” atly halkara sergini we maslahaty geçirmäge görülýän taýýarlyk işleri dowam edýär. Bu foruma daşary ýurt kompaniýalary, ýerli hususy kärhanalar, şeýle hem ýurdumyzyň ministrlikleri we pudaklaýyn dolandyryş edaralary gatnaşarlar. Forumyň çäklerinde ugurdaş ministrlikleriň we pudaklaýyn dolandyryş edaralarynyň ýolbaşçylarynyň daşary ýurt kompaniýalarynyň ýolbaşçylary hem-de wekilleri bilen ikitaraplaýyn duşuşyklarynyň geçirilmegi göz öňünde tutulýar. Halkara sergi we maslahat ýurdumyzyň gurluşyk, senagat, energetika we himiýa pudaklarynda, şeýle hem ýol gurluşygynda dünýäniň döwrebap tehnikalary we öňdebaryjy tehnologiýalary bilen tanyşmaga, daşary ýurtly hyzmatdaşlar bilen tejribe alyşmaga, ozal ýola goýlan gatnaşyklary has-da pugtalandyrmaga hem-de täze işewürlik gatnaşyklaryny ýola goýmaga mümkinçilik berer.

Şunuň bilen baglylykda, wise-premýer döwlet Baştutanymyzyň garamagyna degişli teklibi hödürledi.

Hormatly Prezidentimiz Serdar Berdimuhamedow hasabaty diňläp, ýurdumyzyň Gurluşyk we senagat toplumynyň işgärleriniň güni mynasybetli geçiriljek halkara sergä we maslahata gowy taýýarlyk görmegiň we ýokary derejede geçirmegiň möhümdigine ünsi çekdi hem-de wise-premýere bu babatda degişli tabşyryklary berdi.

Ministrler Kabinetiniň Başlygynyň orunbasary N.Atagulyýew ýurdumyzyň dokma senagatynyň eksport mümkinçiliklerini artdyrmak boýunça ýerine ýetirilýän işler barada hasabat berdi.

Bellenilişi ýaly, bu ugurda alnyp barylýan işleri üstünlikli durmuşa geçirmek maksady bilen, ýurdumyzyň dokma kärhanalarynyň Polşa Respublikasynyň Žguw şäherinde 2026-njy ýylyň noýabr aýynda geçiriljek «Fast Textile 2026» atly halkara sergisine gatnaşmagy göz öňünde tutulýar.

Sergide Dokma senagaty ministrliginiň kärhanalarynda, şeýle hem Senagatçylar we telekeçiler birleşmesiniň agzalaryna degişli dokma kärhanalarynda öndürilýän eksport ugurly önümler bilen tanyşdyrmak meýilleşdirilýär. Serginiň dowamynda özara hyzmatdaşlygy ýola goýmak maksady bilen, ikitaraplaýyn gepleşikleri geçirmek göz öňünde tutulýar.

Şunuň bilen baglylykda, wise-premýer döwlet Baştutanymyzyň garamagyna degişli teklibi hödürledi.

Hormatly Prezidentimiz Serdar Berdimuhamedow hasabaty diňläp, ýurdumyzyň dokma senagatyna degişli önümçilik toplumlarynda ýokary hilli dokma önümleriniň öndürilýändigini we daşary ýurtlara giňden eksport edilýändigini aýtdy. Döwlet Baştutanymyz ýurdumyzyň dokma kärhanalarynyň Polşa Respublikasynda geçiriljek halkara sergä gatnaşmagy boýunça taýýarlanan teklibi makullap, wise-premýere degişli işleri geçirmegi tabşyrdy.

Ministrler Kabinetiniň Başlygynyň orunbasary B.Seýidowa şu ýylyň noýabrynda Aşgabat şäherinde «Bagtyýarlyk döwrüniň teatr sungaty» atly V halkara teatr festiwalyny geçirmäge görülýän taýýarlyk barada hasabat berdi.

Bellenilişi ýaly, bu festiwala gatnaşmak üçin daşary ýurtlaryň birnäçe teatr toparlarynyň ýurdumyza gelmegine garaşylýar. Aşgabat we Arkadag şäherleriniň teatrlarynda ýurdumyzyň we daşary ýurtlaryň teatrlarynyň sahna oýunlarynyň görkezilişini geçirmek göz öňünde tutulýar. Şeýle hem teatr ýolbaşçylarynyň we döredijilik işgärleriniň gatnaşmaklarynda teatr sungatyny ösdürmek we hyzmatdaşlygy ýola goýmak boýunça iş maslahaty guralar.

Hormatly Prezidentimiz Serdar Berdimuhamedow hasabaty diňläp, ýurdumyzda milli teatr sungatyny ösdürmek, bu ugurda halkara hyzmatdaşlygy pugtalandyrmak boýunça işleriň alnyp barylýandygyny belledi we şunuň bilen baglylykda, wise-premýere «Bagtyýarlyk döwrüniň teatr sungaty» atly V halkara teatr festiwalyna gowy taýýarlyk görmegi hem-de ýokary derejede geçirmegi tabşyrdy.

Ministrler Kabinetiniň Başlygynyň orunbasary B.Mämmedow şu ýylyň noýabrynda Aşgabat şäherinde geçirilmegi meýilleşdirilýän “Halkara zähmet standartlaryny we durnukly ösüşi öňe sürmekde kärdeşler arkalaşyklarynyň orny” atly halkara ylmy-amaly maslahata hem-de Halkara Zähmet Guramasy bilen bilelikde Merkezi Aziýa ýurtlarynyň we Azerbaýjan Respublikasynyň kärdeşler arkalaşyklarynyň ýolbaşçylarynyň sebitara forumyna görülýän taýýarlyk işleri barada hasabat berdi.

Bellenilişi ýaly, bu halkara çärelere degişli halkara guramalardan we birnäçe döwletden wekilleriň, şol sanda hyzmatdaş ýurtlaryň kärdeşler arkalaşyklarynyň, BMG-niň Türkmenistandaky edaralarynyň, şeýle hem ýurdumyzyň Kärdeşler arkalaşyklarynyň Milli merkeziniň, degişli ministrlikleriniň, pudaklaýyn dolandyryş edaralarynyň wekilleriniň hem-de jemgyýetçilik guramalarynyň işjeň agzalarynyň gatnaşmagyna garaşylýar. Bu halkara çäreleriň geçirilmegi ýurdumyzyň Halkara Zähmet Guramasy bilen hyzmatdaşlygyny has-da ösdürmekde, Türkmenistanyň kärdeşler arkalaşyklarynyň alyp barýan işleri bilen daşary ýurtly hyzmatdaşlary tanyşdyrmakda hem-de Merkezi Aziýa ýurtlarynyň we Azerbaýjan Respublikasynyň kärdeşler arkalaşyklarynyň arasynda gatnaşyklary pugtalandyrmakda uly ähmiýete eýe bolar.

Hormatly Prezidentimiz Serdar Berdimuhamedow hasabaty diňläp, döwletimiziň dünýäniň abraýly halkara guramalary bilen özara bähbitli hyzmatdaşlygy ösdürmäge möhüm ähmiýet berýändigini belledi we şunuň bilen baglylykda, wise-premýere Aşgabat şäherinde geçiriljek halkara ylmy-amaly maslahata hem-de sebitara foruma gowy taýýarlyk görmegi we ýokary derejede geçirmegi tabşyrdy.

Ministrler Kabinetiniň Başlygynyň orunbasary B.Annaýew ýurdumyzyň halkara howa menzilleriniň maddy-enjamlaýyn binýadyny pugtalandyrmak boýunça alnyp barylýan işler barada hasabat berdi.

Bellenilişi ýaly, ýurdumyzyň raýat awiasiýasy pudagynda halkara kadalara laýyk gelýän döwrebap hyzmatlary ýola goýmaga aýratyn üns berilýär. Türkmenistanyň geografik taýdan amatly ýerleşmegi hem-de halkara howa menzillerinde döredilen häzirki zaman şertleri dürli daşary ýurt awiakompaniýalarynyň ünsüni özüne çekýär we hyzmatlardan peýdalanýanlaryň sany barha artýar. Ýurdumyzyň halkara howa menzilleriniň maddy-enjamlaýyn binýadyny has-da pugtalandyrmakda öňdebaryjy daşary ýurt kompaniýalary bilen hyzmatdaşlyga möhüm ähmiýet berilýär. Şunuň bilen baglylykda, döwlet Baştutanymyzyň garamagyna degişli teklip hödürlenildi.

Hormatly Prezidentimiz Serdar Berdimuhamedow hasabaty diňläp, ýurdumyzyň raýat awiasiýasy pudagynda uçuşlaryň howpsuzlygyny üpjün etmäge hem-de halkara kadalara laýyk gelýän döwrebap hyzmatlary ýola goýmaga aýratyn üns berilýändigini aýtdy. Döwlet Baştutanymyz ýurdumyzyň halkara howa menzilleriniň maddy-enjamlaýyn binýadyny berkitmek maksady bilen taýýarlanan teklibi makullap, wise-premýere degişli işleri geçirmegi tabşyrdy.

Soňra hormatly Prezidentimiz Ministrler Kabinetiniň agzalaryna ýüzlenip, ýekşenbe güni ýurdumyzda Türkmen alabaýynyň baýramynyň giňden bellenip geçiljekdigini, türkmen alabaýynyň merdana halkymyzyň gadymdan gelýän milli buýsanjydygyny aýtdy. Pursatdan peýdalanyp, döwlet Baştutanymyz mejlise gatnaşyjylary Türkmen alabaýynyň baýramy bilen tüýs ýürekden gutlady.

Mejlise gatnaşyjylar hem hormatly Prezidentimizi hem-de Gahryman Arkadagymyzy şanly sene mynasybetli gutladylar.

Mejlisde döwlet durmuşyna degişli başga-da birnäçe möhüm meselelere seredildi we olar boýunça degişli çözgütler kabul edildi.

Hormatly Prezidentimiz Serdar Berdimuhamedow Ministrler Kabinetiniň sanly ulgam arkaly geçirilen mejlisini jemläp, oňa gatnaşanlara berk jan saglygyny, maşgala abadançylygyny, berkarar Watanymyzyň gülläp ösmegi ugrunda alyp barýan işlerinde uly üstünlikleri arzuw etdi.

Aşgabat, 21-nji oktýabr (TDH). Şu gün Türkmenistanyň Prezidenti, Türkmenistanyň Ýaragly Güýçleriniň Belent Serkerdebaşysy goşun generaly Serdar Berdimuhamedow Türkmenistanyň Ýaragly Güýçleriniň harby bölüminiň täze binalar we desgalar toplumynyň açylyş dabarasyna gatnaşdy.

Berkarar döwletiň täze eýýamynyň Galkynyşy döwründe türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz tarapyndan başy başlanan harby özgertmeler hormatly Prezidentimiz Serdar Berdimuhamedowyň baştutanlygynda üstünlikli dowam etdirilýär.

Ýurdumyzyň hemişelik Bitaraplyk hukuk derejesine esaslanýan, diňe goranyş häsiýetine eýe bolan Harby doktrinasyna laýyklykda, Milli goşunymyzyň goranmak ukybyny pugtalandyrmak, harby we hukuk goraýjy edaralary iň täze tehnikalar bilen üpjün etmek, harby gullukçylaryň gulluk etmegi hem-de ýaşaýyş-durmuşy üçin amatly şertleri döretmek, işgärleriň hünär kämilligini yzygiderli ýokarlandyrmak boýunça möhüm işler alnyp barylýar.

Ýurdumyzyň harby gullukçylary iň täze tehnikalara ussatlyk bilen erk etmek, söweşjeň taýýarlygyň ýokary derejesini görkezmek bilen, ýurdumyzyň hem-de halkymyzyň polat galkany bolup, merdana ata-babalarymyzyň Watana wepalylyk ýörelgelerini mynasyp dowam etdirýärler. Olar Türkmenistanyň Garaşsyzlyk güni mynasybetli dabaraly harby ýörişlere gatnaşyp, Watanymyzyň goranyş kuwwatyny, halkymyzyň parahat we asuda durmuşynyň, mukaddes serhetlerimiziň, Garaşsyzlygymyzyň gazananlarynyň goragynda duran türkmen esgerleriniň ýokary hünär ussatlygyny, başarjaňlygyny görkezýärler.

...Ir bilen hormatly Prezidentimiz Serdar Berdimuhamedow dabaranyň geçirilýän ýerine geldi.

Bu ýerde Döwlet howpsuzlyk geňeşiniň sekretary, goranmak ministri B.Gündogdyýew Türkmenistanyň Ýaragly Güýçleriniň harby bölüminiň täze binalar we desgalar toplumynyň açylmaga taýýardygy barada döwlet Baştutanymyza hasabat berdi.

Soňra Türkmenistanyň Döwlet senasy ýaňlandy.

Soňra bu ýerde harby gullukçylar edebi-sazly kompozisiýany hem-de eziz Watanymyzy wasp edýän buýsançly aýdymy ýerine ýetirdiler.

Hormatly Prezidentimiz dabaraly ýagdaýda täze binalar we desgalar toplumynyň toý bagyny kesdi.

Türkmenistanyň Ýaragly Güýçleriniň harby bölüminiň täze binalar we desgalar toplumy dolandyryş binasyndan, nyzam meýdançasyndan, esger naharhanasyndan, esger ýatakhanalaryndan, lukmançylyk nokadyndan, açyk sport meýdançasyndan, päsgelçilik ýodasyndan, awtoulaglar üçin duralgadan, gulluk, hojalyk we durmuş maksatly binalardan ybarat bolup, olarda harby gullukçylar üçin ýokary derejeli gulluk we amatly ýaşaýyş şertleri göz öňünde tutulypdyr.

Soňra döwlet Baştutanymyz täze binalar we desgalar toplumynyň dolandyryş binasyna bardy.

Bu ýerde harby gullukçy hormatly Prezidentimizi Ýaragly Güýçlerimiziň düzümindäki döwrebap ýaraglar we uçarmansyz uçýan enjamlar hem-de olaryň häzirki zaman aýratynlyklary bilen tanyşdyrdy.

Dolandyryş binasynyň tehniki taýdan enjamlaşdyrylyşynyň hem-de döredilen şertleriň ýokary halkara ölçeglere we harby-guramaçylyk talaplaryna doly laýyk gelýändigini bellemek gerek. Binanyň döwrebap tehnologiýalar, iň täze enjamlar bilen üpjün edilmegi Milli goşunymyzyň maddy-enjamlaýyn binýadynyň pugtalandyrylýandygynyň we onuň ähli düzümlerine sanly ulgamyň üstünlikli ornaşdyrylýandygynyň aýdyň güwäsidir.

Garaşsyz, hemişelik Bitarap Türkmenistanyň Ýaragly Güýçleriniň harby bölümleriniň maddy-enjamlaýyn binýadyny pugtalandyrmak maksady bilen, olar döwrebap tehniki serişdeler bilen yzygiderli üpjün edilýär, ylmy esasda geçirilýän okuwlaryň netijesinde Watan goragçylarynyň hünär ussatlygy ýokarlanýar. Harby gullukçylary taýýarlamakda diňe bir olaryň söweşjeň endiklerine däl, eýsem, terbiýeçilik-watançylyk işine, söweşjeň tälimine hem-de bilim derejesini ýokarlandyrmaga uly üns berilýär.

Harby gullukçy gulluk etmäge we öňde goýlan wezipeleri üstünlikli ýerine ýetirmäge döredilen ajaýyp şertler üçin hormatly Prezidentimize tüýs ýürekden hoşallyk bildirdi hem-de Ýaragly Güýçleriň ähli şahsy düzüminiň adyndan Watan goragçylarynyň mähriban Watanymyza mundan beýläk-de ak ýürekden, wepaly gulluk etjekdikleri barada kasam etdi.

Hormatly Prezidentimiz harby gullukça jogapkärli gullugynda üstünlikleri arzuw etdi.

Bu ýerde Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Serdar Berdimuhamedow Hormat ýazgylar kitabynda ýadygärlik ýazgy galdyrdy.

Soňra hormatly Prezidentimize Türkmenistanyň Ýaragly Güýçleriniň şahsy düzüminiň adyndan nepis türkmen halysy sowgat gowşuryldy.

Soňra döwlet Baştutanymyz harby bölümiň lukmançylyk nokadynda döredilen şertler bilen tanyşdy. Lukmançylyk nokady iň häzirki zaman enjamlary bilen üpjün edilendir. Munuň özi saglygy goraýşyň halkara standartlaryna doly laýyk gelmek bilen, harby gullukçylaryň saglygyny berkitmekde we gorap saklamakda aýratyn ähmiýete eýedir.

Soňra Türkmenistanyň Ýaragly Güýçleriniň Belent Serkerdebaşysy esgerler ýatakhanasyna bardy hem-de bu ýerde esgerleriň ýaşaýyş-durmuş şertleri üçin döredilen mümkinçilikler bilen tanyşdy.

Esgerler üçin niýetlenen ýatakhananyň binalar toplumy döwrebaplygy, gurluş aýratynlygy bilen tapawutlanýar. Bu ýerde harby gullukçylaryň göwnejaý dynç almaklary, wagtlaryny peýdaly geçirmekleri üçin ähli zerur şertler döredilipdir. Ýatakhananyň giňligi, ýagtylandyrylyşy, esgerleriň dynç almagy üçin döredilen mümkinçilikler, otaglaryň ýerleşdirilişi harby düzgünnamalaryň talaplaryna doly laýyk gelýär. Bu bolsa harby gullukçylary mukaddes borçlaryny birkemsiz ýerine ýetirmäge ruhlandyrýar.

Ýatakhananyň içinde gündelik lybaslary we sport eginbaşlaryny, okuw esbaplaryny hem-de arassaçylyk serişdelerini saklamak üçin niýetlenilen döwrebap tekjeler ýerleşdirilipdir. Şeýle hem ýatakhanada harby gullukçylar üçin durmuş taýdan hyzmat ediş otagy, harby lybaslary hem-de beýleki goşlary saklamaga niýetlenen otag bar. Bu lybaslaryň we harby gullukçylar üçin niýetlenen serişdeleriň türkmen telekeçileri tarapyndan öndürilýändigini aýratyn bellemek gerek.

Otaglarda döwrebap ýyladyş we sowadyş ulgamlary, ýokary hilli mebeller we abzallar ornaşdyrylypdyr. Olarda döredilen şertler häzirki döwrüň talabyna doly laýyk gelýär.

Durmuş taýdan hyzmat ediş otaglary degişli enjamlar bilen üpjün edilipdir. Harby gullukçylaryň ygtyýarynda “Galkynyş” otagy hem bar. Bu bolsa olaryň medeniýetli dynç almaklaryna hem-de özlerini gyzyklandyrýan maglumatlar bilen tanşyp, bilimlerini artdyrmaklaryna ýardam edýär. Kitaphanada Gahryman Arkadagymyzyň we Arkadagly Gahryman Serdarymyzyň çuňňur watansöýüjilige ýugrulan eserleriniň ýerleşdirilmegi esgerleriň watançylyk ruhuny belende göterýär.

Soňra hormatly Prezidentimiz esgerler naharhanasyna bardy.

Bu ýerde harby gullukçylar döwlet Baştutanymyzy naharhananyň döwrebap mümkinçilikleri, azyk önümlerini saklamak we datly tagamlary taýýarlamak üçin döredilen şertler bilen tanyşdyrdylar.

Esgerler naharhanasynda ýokumly tagamlaryň çalt we ýokary hilli taýýarlanylmagy, harby gullukçylaryň talabalaýyk naharlanmagy, düzgün-tertibiň berjaý edilmegi üçin zerur şertler üpjün edilipdir. Naharhana häzirki döwrüň talaplaryna doly laýyk gelmek bilen, bu ýerde nahar taýýarlamak hem-de azyk önümlerini talabalaýyk saklamak üçin ýörite otaglar, ammarlar göz öňünde tutulypdyr. Döwrebap naharhana häzirki zaman sowadyş we ýyladyş ulgamlary hem-de nahar taýýarlamak işini ep-esli ýeňilleşdirýän zerur tehnologiýalar bilen enjamlaşdyrylandyr. Naharhanada milli tagamlaryň dürli görnüşleri taýýarlanylýar hem-de olaryň tagamyna, ýokumlylyk derejesine möhüm ähmiýet berilýär. Şunda aşpezleriň “Bereketli türkmen saçagy” atly kitaby esasy gollanma öwrendiklerini nygtamak gerek.

Hormatly Prezidentimiz bu ýerde gulluk edýän harby gullukçylara hem sag-aman gulluk etmeklerini we üstünlikleri arzuw etdi.

Soňra ýurdumyzyň Ýaragly Güýçleriniň Belent Serkerdebaşysy harby gullukçylar we olaryň maşgala agzalary üçin niýetlenen täze ýaşaýyş jaýyna geldi. Döwrebap ýaşaýyş jaýynyň açaryny alan harby gullukçy N.Kowusow hormatly Prezidentimizi mähirli garşylady. Döwlet Baştutanymyz harby gullukçy we onuň maşgala agzalary bilen söhbetdeş bolup, bu ýerde döredilen şertler bilen gyzyklandy.

Harby gullukçynyň çagalary ýürek joşgunyny goşgy setirleriniň hem-de buýsançly sözleriň üsti bilen ýetirdiler. Harby gullukçy Watan goragçylarynyň mukaddes gulluk borjuny berjaý etmegi we dynç almagy, şeýle hem olaryň maşgala agzalarynyň abadan durmuşda ýaşamagy ugrunda döredilýän mümkinçilikler üçin tüýs ýürekden hoşallygyny beýan etdi. Täze jaýa göçüp gelmek bagty miýesser eden harby gullukçynyň maşgala agzalary hem halkymyzyň ýaşaýyş-durmuş şertlerini has-da gowulandyrmak ugrunda edýän ähli aladalary üçin hormatly Prezidentimize alkyş sözlerini aýtdylar.

Türkmenistanyň Ýaragly Güýçleriniň harby bölüminiň täze binalar we desgalar toplumynyň çäginde harby gullukçylardyr olaryň maşgala agzalary üçin jemi 96 hojalyga niýetlenen, her biri 48 öýli, 2 gatly 2 sany döwrebap ýaşaýyş jaýy, şeýle hem sadaka jaýy, dükan, çagalar oýun meýdançasy, awtoduralga göz öňünde tutulypdyr.

Döwlet Baştutanymyz harby gullukçylary we olaryň maşgalalaryny zerur amatlyklar bilen üpjün etmegiň yzygiderli dowam etdiriljekdigini aýtdy hem-de ýaşaýyş jaýynda döwrebap şertleriň, çagalar üçin mümkinçilikleriň döredilendigini belläp, maşgala agzalaryny täze toplumyň açylmagy, täze jaýa göçüp gelmekleri bilen gutlady. Soňra maşgala agzalaryna sowgatlar gowşuryldy. Arkadagly Gahryman Serdarymyz harby gullukçynyň maşgala agzalarynyň haýyşy boýunça olar bilen ýadygärlik surata düşdi. Ýagşy däp-dessurlara eýerip, täze jaýdan paýly bolan bagtyýar maşgalanyň hoşallygynyň alamaty hökmünde hormatly Prezidentimize toý düwünçegi gowşuryldy.

N.Kowusow Watan goragçylarynyň mukaddes gulluk borjuny berjaý etmekleri, maşgala agzalarynyň abadan durmuşda ýaşamaklary ugrunda döredilýän mümkinçilikler üçin ýene bir gezek tüýs ýürekden hoşallygyny beýan etdi we harby kasama wepaly bolup, ýurdumyzyň asudalygyny goramak ýaly mukaddes wezipäni üstünlikli ýerine ýetirmekde yhlas-başarnygyny gaýgyrman gulluk etjekdigine ynandyrdy hem-de harby kasam etdi.

Amatly ýaşaýyş we dynç alyş üçin ähli zerur şertler bilen üpjün edilen, ýyladyş hem-de sowadyş ulgamlary ornaşdyrylan täze jaýlaryň binagärlik çözgüdine, bezegine hem uly üns berlipdir. Olaryň myhmanlar hem-de çagalar üçin niýetlenen giň, ýagty otaglary, şeýle hem ýatylýan otaglary döwrebap mebel önümleri bilen enjamlaşdyrylypdyr. Döwrebap aşhana hem jaýlaryň gurluşyk işleriniň ösen talaplara laýyk derejede ýerine ýetirilendigini görkezýär.

Soňra döwlet Baştutanymyz ýaşaýyş jaýyndan çykdy hem-de Türkmenistanyň Ýaragly Güýçleriniň harby bölüminiň binalar we desgalar toplumyna täze awtoulaglaryň açarlaryny gowşurdy.

Täze ýaşaýyş jaýlarynyň daş-töweregi birkemsiz abadanlaşdyrylypdyr. Bu ýerde dürli gülleriň hem-de saýaly baglaryň ekilmegi ekologiýa abadançylygyny saklamaga ýardam edýär. Şeýle hem toplumda körpe nesliň dynç almagy, sagdyn hem-de erkana ösmegi üçin niýetlenen oýun meýdançasy döredilipdir. Munuň özi ýurdumyzda ýaş nesilleriň bagtyýar durmuşy ugrunda ählitaraplaýyn alada etmegiň döwlet syýasatynyň möhüm ugurlarynyň birine öwrülendiginiň aýdyň beýanydyr.

Harby bölümiň täze binalar we desgalar toplumynyň çäginde sportuň dürli görnüşleri boýunça türgenleşikleri geçirmäge we ýaryşlary guramaga niýetlenen meýdançalar bar. Munuň özi harby gullukçylaryň söweşjeň tälim almak bilen bir hatarda sportuň dürli görnüşleri bilen meşgullanmaklarynda we sagdyn durmuş ýörelgelerine ygrarly bolmaklarynda ähmiýetlidir.

Harby gullukçylaryň göwnejaý gullugy we döwrebap ýaşaýşy üçin ähli amatlyklaryň döredilmegi ýurdumyzda ýaýbaňlandyrylan harby özgertmeleriň ileri tutulýan ugurlarynyň biri bolup durýar. Çünki harby gullukçylar ata Watanymyzyň mukaddes çäkleriniň ýerüsti, deňiz we asman giňişliginiň ygtybarly goragyny üpjün edýärler. Şeýle asylly wezipäni ýerine ýetirýän harby gullukçylara döwletimiz tarapyndan aýratyn hormat goýulýar. Toplumyň çäginde täze ýaşaýyş jaýlarynyň bina edilmegi we olaryň harby gullukçylara sowgat berilmegi hem şeýle aladalaryň netijesidir.

Soňra döwlet Baştutanymyz sadaka jaýyna bardy.

Bu ýerde halkymyzyň asylly ýol-ýörelgelerini dowam etdirip, sadaka bermek we beýleki däp-dessurlary berjaý etmek üçin ähli mümkinçilikler göz öňünde tutulypdyr. Ýurdumyzyň durmuşyndaky möhüm ähmiýetli wakalaryň, döwletli tutumlaryň hormatyna toý sadakalarynyň berilmegi asylly däbe öwrüldi. Bu döwrebap bina hem harby gullukçylaryň we olaryň maşgala agzalarynyň milli däplerimizi ýerine ýetirmegi üçin ähli şertleriň üpjün edilýändiginiň aýdyň güwäsidir.

Soňra hormatly Prezidentimiz toplumyň çägindäki söwda nokadyna bardy.

Köpugurly söwda nokadynda alyjylara gündelik zerur bolan harytlaryň giň görnüşleri elýeterli edilipdir. Munuň özi ýaşaýjylar üçin goşmaça amatlyklary döredýär. Bu ýerde sahawatly türkmen topragynda bitýän miwelerdir gök önümler, türkmen telekeçileriniň öndürýän azyk we hojalyk harytlary, şeýle hem beýleki önümler alyjylara hödürlenýär. Bu bolsa hormatly Prezidentimiziň ilaty azyk harytlary bilen bökdençsiz üpjün etmek babatda berýän tabşyryklarynyň üstünlikli durmuşa geçirilýändigini tassyklaýar.

Soňra Döwlet howpsuzlyk geňeşiniň sekretary, goranmak ministri B.Gündogdyýew Türkmenistanyň Ýaragly Güýçleriniň harby bölüminiň täze binalar we desgalar toplumyny gurduryp berendikleri üçin ýurdumyzyň Ýaragly Güýçleriniň Belent Serkerdebaşysyna hem-de Gahryman Arkadagymyza ähli harby gullukçylaryň adyndan hoşallyk sözlerini beýan etdi.

Döwlet Baştutanymyz hemmelere mukaddes harby gullukda hem-de Watanymyzyň asudalygyny üpjün etmek boýunça jogapkärli wezipelerini mynasyp ýerine ýetirmekde üstünlikleri arzuw edip, bu ýerden ugrady.

Şeýlelikde, täze harby bölümiň binalar we desgalar toplumynyň açylyp ulanmaga berilmegi hormatly Prezidentimiziň asylly başlangyçlary bilen şöhratlanýan Watanymyzyň Ýaragly Güýçleriniň maddy-enjamlaýyn binýadynyň barha kämilleşdirilýändiginiň, harby gullukçylaryň ýaşaýyş-durmuş şertleriniň has-da gowulandyrylýandygynyň aýdyň nyşanyna öwrüldi.

Aşgabat, 19-njy oktýabr (TDH). Şu gün hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Onda ýurdumyzyň oba hojalyk toplumynda hem-de welaýatlarynda alnyp barylýan işler bilen baglanyşykly meselelere garaldy.

Ilki bilen, Ahal welaýatynyň häkimi T.Nurmyradowa söz berildi. Häkim welaýatda dowam edýän möwsümleýin oba hojalyk işleriniň barşy barada hasabat berdi.

Bellenilişi ýaly, häzirki wagtda welaýatda pagta ýygymy dowam edip, ýetişdirilen hasyly gysga möhletde we ýitgisiz ýygnap almak boýunça zerur işler alnyp barylýar. Möwsümde oba hojalyk tehnikalary netijeli işledilýär. Şeýle hem welaýatda bugdaý ekişini ýokary hilli we agrotehniki möhletlerde geçirmek üçin zerur çäreler görülýär. Bu ugurda oba hojalyk tehnikalary we gurallary doly güýjünde işledilýär. Ekiş geçirilen meýdanlarda gögeriş suwy tutulýar, gögeriş alnan ýerlerde degişli ideg işleri geçirilýär.

Şeýle hem häkim welaýatda Türkmen alabaýynyň baýramy mynasybetli geçiriljek dabaraly çärelere taýýarlyk görlüşi hem-de Oba milli maksatnamasyna laýyklykda, şu ýyl açylyp ulanmaga berilmegi meýilleşdirilýän medeni-durmuş we önümçilik maksatly desgalarda alnyp barylýan gurluşyk işleriniň ýagdaýy barada hasabat berdi.

Hormatly Prezidentimiz hasabaty diňläp, welaýatda ýetişdirilen pagta hasylyny ýitgisiz ýygnap almagyň, bugdaý ekişini öz wagtynda we ýokary hilli geçirmegiň zerur talap bolup durýandygyny belledi we şunuň bilen baglylykda, häkime birnäçe anyk tabşyryklary berdi. Şeýle hem döwlet Baştutanymyz ýurdumyzy durmuş-ykdysady taýdan ösdürmäge gönükdirilen maksatnamalara laýyklykda, şu ýyl welaýatda açylyp ulanmaga berilmegi göz öňünde tutulýan desgalardaky gurluşyk işleriniň öz wagtynda we ýokary hilli ýerine ýetirilmegini gözegçilikde saklamagy tabşyrdy.

Soňra Balkan welaýatynyň häkimi R.Jumaýew welaýatda alnyp barylýan möwsümleýin oba hojalyk işleri barada hasabat berdi.

Hasabatda bellenilişi ýaly, häzirki wagtda welaýatda dowam edýän pagta ýygymynyň depginini güýçlendirmek hem-de ýetişdirilen hasyly ýitgisiz ýygnap almak boýunça degişli işler dowam edýär. Şeýle hem welaýatda bugdaý ekişini ýokary hilli geçirmek üçin zerur çäreler görlüp, ekiş geçirilen meýdanlarda gögeriş suwuny tutmak, gögeriş alnan ýerlerde ideg etmek işleri ýerine ýetirilýär.

Mundan başga-da, häkim Türkmen alabaýynyň baýramy mynasybetli welaýatda geçiriljek medeni-köpçülikleýin çärelere taýýarlyk görlüşi hem-de Oba milli maksatnamasyna laýyklykda, şu ýyl açylyp ulanmaga berilmegi meýilleşdirilýän medeni-durmuş we önümçilik maksatly desgalardaky hem-de binalardaky gurluşyk işleri barada hasabat berdi.

Hormatly Prezidentimiz hasabaty diňläp, häzirki wagtda dowam edýän möwsümleýin işleriň agrotehnikanyň kadalaryna laýyklykda we öz wagtynda geçirilmeginiň zerurdygyny belledi hem-de şunuň bilen baglylykda, häkime welaýatyň ekerançylyk meýdanlarynda alnyp barylýan işleri gözegçilikde saklamagy tabşyrdy.

Şeýle hem döwlet Baştutanymyz Oba milli maksatnamasyna laýyklykda, şu ýyl welaýatda açylyp ulanmaga berilmegi göz öňünde tutulýan dürli maksatly desgalardaky gurluşyk işleriniň alnyp barlyşyny gözegçilikde saklamagy tabşyrdy.

Soňra Daşoguz welaýatynyň häkimi D.Babaýew welaýatdaky möwsümleýin oba hojalyk işleriniň barşy barada hasabat berdi.

Hasabatda bellenilişi ýaly, welaýatda pagta ýygymynyň depginini güýçlendirmek hem-de ýetişdirilen hasyly ýitgisiz ýygnap almak boýunça zerur çäreler görülýär. Şunuň bilen birlikde, welaýatda bugdaý ekişini agrotehnikanyň kadalaryna laýyklykda ýokary hilli geçirmek boýunça zerur işler alnyp barylýar. Ekişde oba hojalyk tehnikalary netijeli işledilip, ekiş geçirilen ýerlerde endigan gögeriş alynýar. Ýurdumyzda azyk bolçulygyny has-da pugtalandyrmak barada öňde goýlan wezipelerden ugur alnyp, welaýatda ýetişdirilen şaly hasylyny ýygnap almak boýunça degişli işler dowam edýär.

Mundan başga-da, häkim Türkmen alabaýynyň baýramy mynasybetli welaýatda guraljak dabaraly çärelere taýýarlyk görlüşi hem-de Oba milli maksatnamasyna laýyklykda, şu ýyl açylyp ulanmaga berilmegi göz öňünde tutulýan medeni-durmuş we önümçilik maksatly desgalardaky gurluşyk işleriniň alnyp barlyşy barada hasabat berdi.

Hormatly Prezidentimiz hasabaty diňläp, pagta ýygymynyň depginini güýçlendirmek, ýygym möwsümine gatnaşýan ähli düzümleriň sazlaşykly işini üpjün etmek, bugdaý ekişini agrotehniki möhletlerde we ýokary hilli geçirmek babatda häkime degişli tabşyryklary berdi.

Şeýle hem döwlet Baştutanymyz Oba milli maksatnamasyny durmuşa geçirmegiň çäklerinde şu ýyl welaýatda açylyp ulanmaga berilmegi göz öňünde tutulýan dürli maksatly binalardaky we desgalardaky gurluşyk işleriniň ýokary hilli ýerine ýetirilmegini gözegçilikde saklamagy tabşyrdy.

Soňra Lebap welaýatynyň häkimi H.Aşyrmyradow welaýatda dowam edýän möwsümleýin oba hojalyk işleri barada hasabat berdi.

Hasabatda bellenilişi ýaly, şu günler welaýatda dowam edýän pagta ýygymynyň depginini güýçlendirmek boýunça zerur çäreler görülýär. Şunuň bilen birlikde, welaýatyň ekerançylyk meýdanlarynda bugdaý ekişi dowam edip, ekiş geçirilen ýerlerde gögeriş suwuny tutmak, kadaly gögeriş alnan meýdanlarda bolsa ideg işleri ýerine ýetirilýär. Şeýle hem welaýatda ýetişdirilen şaly hasylyny öz wagtynda we ýitgisiz ýygnap almak hem-de döwlet harmanyna tabşyrmak boýunça zerur işler geçirilýär.

Şeýle hem häkim Türkmen alabaýynyň baýramy mynasybetli welaýatda geçiriljek çärelere taýýarlyk görlüşi hem-de şu ýyl welaýatda açylyp ulanmaga berilmegi meýilleşdirilýän medeni-durmuş we önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz Serdar Berdimuhamedow hasabaty diňläp, häzirki wagtda oba hojalygynda ýaýbaňlandyrylan agrotehniki çäreleriň möhüm ähmiýetine ünsi çekdi we şunuň bilen baglylykda, daýhan yhlasy bilen ýetişdirilen pagta hasylyny öz wagtynda we ýitgisiz ýygnap almagyň, bugdaý ekişini agrotehniki möhletlerde geçirmegiň zerurdygyny belledi hem-de häkime degişli tabşyryklary berdi.

Şeýle hem döwlet Baştutanymyz ýurdumyzy durmuş-ykdysady taýdan ösdürmäge gönükdirilen maksatnamalara laýyklykda, şu ýyl welaýatda açylyp ulanmaga berilmegi meýilleşdirilýän dürli maksatly desgalardaky gurluşyk işleriniň ýokary hilli ýerine ýetirilmegini gözegçilikde saklamagy tabşyrdy.

Soňra Mary welaýatynyň häkimi B.Orazgylyjow welaýatda dowam edýän möwsümleýin oba hojalyk işleriniň barşy barada hasabat berdi.

Bellenilişi ýaly, häzirki wagtda welaýatda pagta ýygymynyň depginini güýçlendirmek, pagta hasylyny ýitgisiz ýygnap almak, ýygnalan hasyly kabul ediş harmanhanalarynda, pagta arassalaýjy kärhanalarda bökdençsiz kabul etmek boýunça degişli işler geçirilýär. Şunuň bilen birlikde, welaýatda bugdaý ekişini talabalaýyk geçirmek üçin zerur çäreler görlüp, ekişde oba hojalyk tehnikalary doly güýjünde işledilýär. Ekiş geçirilen meýdanlarda gögeriş we ösüş suwuny tutmak işleri alnyp barylýar. Welaýatyň gant şugundyry ekilen meýdanlarynda hatarara bejergi, mineral dökünler bilen iýmitlendirmek hem-de ösüş suwuny tutmak işleri ýerine ýetirilýär.

Mundan başga-da, häkim welaýatda Türkmen alabaýynyň baýramyny guramaçylykly geçirmek boýunça görülýän taýýarlyk işleri hem-de Oba milli maksatnamasyna laýyklykda, şu ýyl açylyp ulanmaga berilmegi göz öňünde tutulýan desgalardaky gurluşyk işleriniň ýagdaýy barada hasabat berdi.

Döwlet Baştutanymyz hasabaty diňläp, häzirki wagtda welaýatyň ekerançylyk meýdanlarynda dowam edýän möwsümleýin işleriň, hususan-da, pagta ýygymynyň we bugdaý ekişiniň ýokary hilli we agrotehniki möhletlerde ýerine ýetirilmeginiň zerur talap bolup durýandygyny belledi we häkime birnäçe anyk tabşyryklary berdi.

Şeýle hem hormatly Prezidentimiz Oba milli maksatnamasyna laýyklykda, welaýatda şu ýyl üçin meýilleşdirilen işleriň ýokary hilli hem-de öz wagtynda ýerine ýetirilmegini gözegçilikde saklamagy tabşyrdy.

Soňra Ministrler Kabinetiniň Başlygynyň orunbasary T.Atahallyýew ýurdumyzyň oba hojalygynda dowam edýän möwsümleýin işleriň barşy barada hasabat berdi.

Bellenilişi ýaly, şu günler ekerançylyk meýdanlarynda ýetişdirilen pagta hasylyny ýitgisiz ýygnap almak, ýygnalan hasyly kabul ediş harmanhanalarynda we pagta arassalaýjy kärhanalarda bökdençsiz kabul etmek boýunça degişli işler alnyp barylýar. Bu işlerde ulanylýan oba hojalyk tehnikalarynyň we awtoulaglaryň netijeli işledilmegi üçin zerur çäreler görülýär.

Şunuň bilen birlikde, bugdaý ekişini agrotehniki möhletlerde geçirmek, ekiş geçirilen meýdanlarda gögeriş suwuny tutmak, gögeriş alnan meýdanlarda ideg etmek boýunça işler dowam edýär.

Bu işler bilen bir hatarda, Daşoguz hem-de Lebap welaýatlarynda ýetişdirilen şaly hasylyny ýygnap almak işleri alnyp barylýar. Mary welaýatynda bolsa gant şugundyry ekilen meýdanlarda ideg etmek işleri soňky tapgyrda dowam edip, ýetişdirilen hasyly ýygnap almaga taýýarlyk görülýär.

Hormatly Prezidentimiz Serdar Berdimuhamedow hasabaty diňläp, oba hojalyk pudagynyň milli ykdysadyýetimizdäki möhüm ornuna ünsi çekdi we şunuň bilen baglylykda, wise-premýere ýurdumyzyň ekerançylyk meýdanlarynda ýaýbaňlandyrylan möwsümleýin agrotehniki çäreleriň ýokary hilli geçirilmegini gözegçilikde saklamagy tabşyrdy.

Soňra döwlet Baştutanymyz iş maslahatyna gatnaşyjylara ýüzlenip, häzirki wagtda ýurdumyzyň oba hojalyk pudagynda dowam edýän möwsümleýin işlere ýene-de bir gezek ünsi çekdi we welaýatlarda pagta ýygymynyň depginini güýçlendirmek hem-de hasyly gysga möhletde, ýitgisiz ýygnamak üçin ähli zerur işleri ýerine ýetirmegiň, bugdaý ekişini agrotehniki möhletlere laýyklykda, ýokary hilli geçirmegiň, ekişde oba hojalyk tehnikalaryny we gurallaryny doly güýjünde, netijeli işletmegiň zerurdygyny belledi.

Şeýle hem döwlet Baştutanymyz bugdaý ekilen meýdanlarda gögeriş suwuny wagtynda tutup, kadaly gögeriş almak üçin ähli zerur çäreleri görmegi, haşal otlara garşy göreş çärelerini wagtynda geçirmegi, Daşoguz we Lebap welaýatlarynda şaly hasylyny ýitgisiz ýygnap almagy, Mary welaýatynda gant şugundyrynyň ýygymyna başlamaga gowy taýýarlyk görmegi tabşyrdy.

Mundan başga-da, hormatly Prezidentimiz welaýatlarda bugdaý we pagta öndürijiler bilen hyzmat ediji edara-kärhanalaryň arasynda şu ýylyň hasyly üçin ýerine ýetirilen işler boýunça hasaplaşyklary wagtynda geçirmegiň hem-de Türkmen alabaýynyň baýramy mynasybetli geçiriljek çärelere gowy taýýarlyk görmegiň möhümdigini belledi.

Şunuň bilen birlikde, döwlet Baştutanymyz ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna hem-de Oba milli maksatnamasyna laýyklykda, welaýatlarda şu ýyl meýilleşdirilen işleriň öz wagtynda we ýokary hilli ýerine ýetirilmegi üçin ähli zerur çäreleri görmegi tabşyrdy.

Hormatly Prezidentimiz iş maslahatyny tamamlap, oňa gatnaşanlara berk jan saglyk, maşgala abadançylygyny, alyp barýan işlerinde uly üstünlikleri arzuw etdi.

Aşgabat, 17-nji oktýabr (TDH). Şu gün hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda ýurdumyzyň döwlet durmuşyna degişli birnäçe meselelere seredildi.

Ilki bilen, Mejlisiň Başlygy D.Gulmanowa milli kanunçylygy mundan beýläk-de döwrebaplaşdyrmak boýunça alnyp barylýan işler barada maglumat berdi.

Bellenilişi ýaly, Mejlisde ýurdumyzda hereket edýän kanunlary Türkmenistanyň Konstitusiýasyna we döwrüň talaplaryna laýyklykda kämilleşdirmek maksady bilen, “Elektron söwda hakynda”, “Gozgalmaýan emläge bolan hukuklaryň döwlet belligine alynmagy hakynda” Türkmenistanyň Kanunlarynyň taslamalaryny taýýarlamak, şeýle hem Türkmenistanyň Gümrük, Jenaýat, Raýat iş ýörediş kodekslerine we başga-da birnäçe kanunçylyk namalaryna degişli üýtgetmeleri hem-de goşmaçalary girizmek boýunça işler geçirilýär.

Şu ýylyň 7-nji oktýabrynda “Awaza” milli syýahatçylyk zolagynda sebitde we bütin dünýäde durnukly ösüşi üpjün etmekde, parahatçylygy, ynanyşmagy berkitmekde zenanlaryň orny, gender deňligi, saglygy goraýyş, demografik ösüş, kanun çykaryjy edaralaryň arasynda hyzmatdaşlygy ösdürmek bilen bagly meseleleri ara alyp maslahatlaşmak hem-de tejribe alyşmak maksady bilen, “Parahatçylygy saklamakda we durnukly ösüşe ýetmekde zenanlaryň orny” atly halkara zenanlar dialogy, “Ählumumy saglygy goraýyş hyzmatlary we Durnukly ösüş maksatlary” atly ikinji halkara maslahat, “Demografik prosesler we durnukly ösüş: häzirki zamanyň wezipeleri we halkara tejribesi” atly halkara maslahat geçirildi.

Milli parlamentiň ýolbaşçysy «Awaza» milli syýahatçylyk zolagynda guralan forumlaryň ýokary guramaçylyk derejesinde geçirilmegine beren hemmetaraplaýyn goldawlary üçin hormatly Prezidentimize hem-de Gahryman Arkadagymyza tüýs ýürekden hoşallyk bildirdi.

Hormatly Prezidentimiz Serdar Berdimuhamedow döwrüň talaplaryna laýyk gelýän täze Kanunlaryň taslamalaryny işläp taýýarlamaga aýratyn üns bermegiň hem-de bu ugurda alnyp barylýan işleri dowam etmegiň möhümdigini belledi.

Soňra Ministrler Kabinetiniň Başlygynyň orunbasary H.Geldimyradow milli pulumyzyň — manadyň dolanyşyga girizilmegi mynasybetli geçiriljek çäreler barada hasabat berdi.

Bellenilişi ýaly, manadyň dolanyşyga girizilmeginiň 33 ýyllygyna gabatlanyp “Milli manat — täze taryhy döwrüň bedew batly ösüşleriniň binýady” atly ylmy-amaly maslahaty geçirmek meýilleşdirilýär. Maslahatda hormatly Prezidentimiziň ýurdumyzy durmuş-ykdysady taýdan ösdürmek boýunça başlangyçlaryny we bank ulgamynda amala aşyrýan özgertmelerini giňden beýan etmek, bu ulgamda gazanylýan üstünlikler bilen tanyşdyrmak, şeýle hem halkara maliýe guramalary bilen alnyp barylýan hyzmatdaşlygy has-da pugtalandyrmak bilen baglanyşykly meseleleri ara alyp maslahatlaşmak göz öňünde tutulýar. Şunuň bilen baglylykda, wise-premýer döwlet Baştutanymyzyň garamagyna degişli teklibi hödürledi.

Hormatly Prezidentimiz hasabaty diňläp, wise-premýere milli pulumyzyň — manadyň dolanyşyga girizilmeginiň 33 ýyllygyna bagyşlanan ylmy-amaly maslahata gowy taýýarlyk görmegi we guramaçylykly geçirmegi tabşyrdy.

Soňra Ministrler Kabinetiniň Başlygynyň orunbasary G.Agajanow “Türkmenistanyň nebiti we gazy — 2026” atly XXXI halkara maslahata we sergä görülýän taýýarlyk barada hasabat berdi.

Bellenilişi ýaly, hormatly Prezidentimiziň degişli Kararyna laýyklykda, Aşgabat şäherinde geçirilmegi göz öňünde tutulan bu çärelere taýýarlyk işleri giň gerimde alnyp barylýar. Munuň özi Gahryman Arkadagymyzyň ýurdumyzda amatly maýa goýum gurşawyny döretmek boýunça başlangyçlarynyň hormatly Prezidentimiziň parasatly baştutanlygynda üstünlikli durmuşa geçirilýändiginiň aýdyň beýanydyr.

Halkara maslahat “Energiýa. Hyzmatdaşlyk. Ösüş” diýen şygar astynda geçiriler we onuň çäklerinde birnäçe plenar mejlisler hem-de beýleki maslahatlar guralar. Şeýle hem “tegelek stoluň” başyndaky söhbetdeşlikler hem-de ikitaraplaýyn duşuşyklar geçiriler. Şunuň bilen baglylykda, döwlet Baştutanymyzyň garamagyna degişli teklip hödürlenildi.

Hormatly Prezidentimiz hasabaty diňläp, ýurdumyzda nebitgaz toplumyny ösdürmek, bu ugurda halkara hyzmatdaşlygy berkitmek maksady bilen, halkara maslahatlaryň we sergileriň yzygiderli geçirilýändigini aýtdy. Şunuň bilen baglylykda, döwlet Baştutanymyz wise-premýere «Türkmenistanyň nebiti we gazy — 2026» atly halkara maslahaty we sergini ýokary derejede geçirmegi tabşyrdy.

Ministrler Kabinetiniň Başlygynyň orunbasary T.Atahallyýew oba hojalyk pudagynda we welaýatlarda möwsümleýin işleriň alnyp barlyşy barada hasabat berdi.

Bellenilişi ýaly, geljek ýylyň bugdaý hasylynyň düýbüni tutmak maksady bilen, bugdaý ekişi dowam edýär. Ekişde ulanylýan oba hojalyk tehnikalaryny we gurallaryny öndürijilikli işletmek boýunça degişli işler alnyp barylýar. Şeýle hem ekiş geçirilen meýdanlarda gögeriş suwuny tutmak boýunça degişli işler ýerine ýetirilýär.

Häzirki wagtda pagta ýygymy dowam edýär. Ýygnalýan hasyly pagta arassalaýjy kärhanalarda we kabul ediş harmanhanalarynda kabul etmek hem-de gaýtadan işlemek, şeýle hem pagta ýygýan kombaýnlary we beýleki tehnikalary netijeli işletmek boýunça degişli işler amala aşyrylýar.

Şeýle hem wise-premýer şu ýylyň oktýabr aýynyň soňky ýekşenbesinde Türkmen alabaýynyň baýramy mynasybetli dabaraly çäreleri geçirmek boýunça alnyp barylýan taýýarlyk işleri barada hasabat berdi.

Hormatly Prezidentimiz hasabaty diňläp, oba hojalyk pudagyny toplumlaýyn ösdürmegi dowam etmegiň, bugdaý ekişini bellenen möhletlerde geçirmegiň, pagta ýygymy möwsümini guramaçylykly geçirmegi dowam etmegiň wajypdygyny nygtady. Şeýle hem döwlet Baştutanymyz wise-premýere Türkmen alabaýynyň baýramy mynasybetli geçiriljek çärelere gowy taýýarlyk görmegi tabşyrdy.

Soňra Ministrler Kabinetiniň Başlygynyň orunbasary B.Annamämmedow ýurdumyzyň oba hojalyk önüm öndürijilerini mineral dökünler bilen üpjün etmek boýunça alnyp barylýan işler barada hasabat berdi.

Bellenilişi ýaly, häzirki wagtda “Türkmenhimiýa” döwlet konserniniň kärhanalarynda dürli görnüşli dökünler öndürilýär. Öndürilýän mineral dökünler bilen ýurdumyzyň oba hojalyk önüm öndürijileri doly üpjün edilip, galan bölegi daşary ýurtlara eksport edilýär.

Hormatly Prezidentimiz hasabaty diňläp, ýurdumyzyň oba hojalyk önüm öndürijilerini mineral dökünler bilen üpjün etmekde himiýa pudagyna uly ornuň degişlidigini belledi hem-de wise-premýere «Türkmenhimiýa» döwlet konserniniň önümçilik kärhanalaryny doly taslama kuwwatynda işletmek boýunça alnyp barylýan işleri dowam etmegi tabşyrdy.

Ministrler Kabinetiniň Başlygynyň orunbasary N.Atagulyýew şu ýylyň noýabr aýynda Hytaý Halk Respublikasynyň Şanhaý şäherinde geçiriljek “Hytaý halkara import EXPO” sergisine Türkmenistanyň milli pawilýony bilen gatnaşmagy boýunça alnyp barylýan işler barada hasabat berdi.

Bellenilişi ýaly, ýurdumyzyň soňky tehnologiýalar ornaşdyrylan döwrebap kärhanalarynda öndürilýän ýokary hilli önümleri dünýä bazarlaryna çykarmak üçin giň mümkinçilikler döredilýär. Ýurdumyzyň iri möçberli halkara sergilere yzygiderli gatnaşyp, harytlarymyzyň giňden mahabatlandyrylmagy hem milli önümlerimizi daşary ýurt bazarlarynda ilerletmekde uly ähmiýete eýe bolýar.

“Hytaý halkara import EXPO” sergisinde Türkmenistanyň milli pawilýonynda ýurdumyzda öndürilip, dünýä bazarlaryna çykarylýan giň görnüşli harytlar, söwda-ykdysady we maýa goýum hyzmatdaşlygynyň mümkinçilikleri, şeýle hem halkymyzyň milli medeni mirasy bilen tanyşdyrmak göz öňünde tutulýar. Şeýle hem serginiň çäklerinde Türkmen-hytaý işewürler forumy guralar. Şunuň bilen baglylykda, döwlet Baştutanymyzyň garamagyna degişli teklip hödürlenildi.

Hormatly Prezidentimiz hasabaty diňläp, ýurdumyzda öndürilýän ýokary hilli önümleri halkara sergilere çykarmak we giňden tanyşdyrmak boýunça netijeli işleriň alnyp barylýandygyny aýtdy hem-de wise-premýere Hytaý Halk Respublikasynda geçiriljek «Hytaý halkara import EXPO» sergisine ýurdumyzyň milli pawilýony bilen ýokary derejede gatnaşmagyny üpjün etmegi tabşyrdy.

Ministrler Kabinetiniň Başlygynyň orunbasary B.Seýidowa “Türkmenistanyň Prezidentiniň “Türkmeniň Altyn asyry” atly baýragyny almak ugrundaky bäsleşigi yglan etmek hakynda” Kararyň taslamasy barada hasabat berdi.

Bellenilişi ýaly, Watanymyzyň dünýädäki belent şan-şöhratyny, milli medeni mirasymyzy we gadymy gymmatlyklarymyzy kämil eserleriň üsti bilen beýan edýän zehinli döredijilik adamlaryny ýüze çykarmak we olary höweslendirmek maksady bilen, ýurdumyzda dürli bäsleşikler yglan edilýär. Türkmenistanyň Prezidentiniň “Türkmeniň Altyn asyry” atly baýragyny almak ugrundaky bäsleşik munuň aýdyň mysalydyr.

Her ýylda geçirilmegi asylly däbe öwrülen bu bäsleşigiň çäklerinde höwesjeň aýdymçy ýaşlaryň arasynda “Ýaňlan, Diýarym!” telebäsleşigini, dutarçy bagşy-sazandalaryň arasynda “Çalsana, bagşy!” bäsleşigini hem-de zehinli çagalaryň arasynda “Garaşsyzlygyň merjen däneleri” bäsleşigini yglan etmek meýilleşdirilýär.

Türkmenistanyň Prezidentiniň «Türkmeniň Altyn asyry» atly baýragyny almak ugrundaky bäsleşigi mukaddes Garaşsyzlygymyzyň 36 ýyllyk baýramy mynasybetli 2027-nji ýylyň sentýabr aýynda jemlemek göz öňünde tutulýar. Şunuň bilen baglylykda, wise-premýer döwlet Baştutanymyzyň garamagyna degişli resminamanyň taslamasyny hödürledi.

Hormatly Prezidentimiz hasabaty diňläp, ýurdumyzda milli medeniýetimizi ösdürmäge, medeni mirasymyzy öwrenmäge, ýaş zehinleri ýüze çykarmaga uly üns berilýändigini aýtdy. Döwlet Baştutanymyz «Türkmenistanyň Prezidentiniň «Türkmeniň Altyn asyry» atly baýragyny almak ugrundaky bäsleşigi yglan etmek hakynda» Karara gol çekip, wise-premýere degişli işleri geçirmegi tabşyrdy.

Ministrler Kabinetiniň Başlygynyň orunbasary B.Mämmedow şu ýylyň noýabr aýynda ýurdumyzyň ýokary okuw mekdeplerinde halkara ylmy-amaly maslahatlary we olimpiadalary geçirmäge görülýän taýýarlyk barada hasabat berdi.

Bellenilişi ýaly, milli bilim ulgamyny döwrebaplaşdyrmak, ýaşlaryň intellektual ukyplaryny ösdürmek, ylma we döredijilige höweslerini artdyrmak babatda toplumlaýyn işler durmuşa geçirilýär. Hususan-da, geljek aýda Ýagşygeldi Kakaýew adyndaky Halkara nebit we gaz uniwersitetinde Halkara açyk informatika internet olimpiadasyny, “Ylym-bilim ulgamynda sanly tehnologiýalar, emeli aň we kiberhowpsuzlyk: ylmy-tehnologik ösüşiň häzirki zaman ugurlary” atly utgaşykly görnüşde halkara ylmy-amaly maslahaty, S.A.Nyýazow adyndaky Türkmen oba hojalyk uniwersitetinde “Agrosenagat toplumynyň durnukly ösüşi” atly sanly ulgam arkaly halkara ylmy-amaly maslahaty, V Açyk halkara internet ekologiýa olimpiadasyny, Türkmen oba hojalyk institutynda “Agroinnowasiýalar: durnukly ösüşiň röwşen ýoly” atly sanly ulgam arkaly III halkara ylmy-taslama bäsleşigini, Myrat Garryýew adyndaky Türkmenistanyň Döwlet lukmançylyk uniwersitetinde “Häzirki zaman stomatologiýasynyň wajyp meseleleri” atly utgaşykly görnüşde halkara ylmy-amaly maslahaty, biologiýa dersi boýunça V halkara internet olimpiadasyny geçirmek göz öňünde tutulýar.

Şeýle hem noýabr aýynda Türkmen döwlet ykdysadyýet we dolandyryş institutynda maliýe dersi boýunça III Açyk halkara internet olimpiadasyny, “Ykdysadyýetiň durnukly ösüşi: halkara tejribe we ösüşiň geljekki ugurlary” atly utgaşykly görnüşde III halkara ylmy-amaly maslahaty, Türkmenistanyň Inžener-tehniki we ulag kommunikasiýalary institutynda “Halkara ulag-logistiki hyzmatdaşlygy berkitmekde Türkmenistanyň durnukly ulag syýasatynyň orny” atly sanly ulgam arkaly II halkara ylmy-amaly maslahaty geçirmek meýilleşdirilýär.

Mundan başga-da, Magtymguly adyndaky Türkmen döwlet uniwersitetinde himiýa dersi boýunça V halkara olimpiadany hem-de onuň bilen ugurdaş “Himiýa ylmyny we tehnologiýalaryny durnukly ösdürmekde öňdebaryjy tejribeleriň ähmiýeti” atly utgaşykly görnüşde halkara ylmy-amaly maslahaty, Türkmen döwlet maliýe institutynda maliýe hasabatlylygynyň halkara standartlary dersi boýunça III Açyk halkara internet olimpiadasyny, Aba Annaýew adyndaky Halkara atçylyk akademiýasynda “Halkara parahatçylyk we ynanyşmak — ykdysady ösüşleriň özeni” atly II halkara internet olimpiadasyny geçirmek göz öňünde tutulýar.

Ylmy-amaly maslahatlaryň we ders bäsleşikleriniň geçirilmegi ylym-bilim ulgamlarynda halkara hyzmatdaşlygy yzygiderli pugtalandyrmaga, bilim işiniň ylmy-usulyýet binýadyny öňdebaryjy tejribeler bilen baýlaşdyrmaga itergi berer. Şunuň bilen baglylykda, wise-premýer döwlet Baştutanymyzyň garamagyna degişli teklibi hödürledi.

Hormatly Prezidentimiz hasabaty diňläp, ýurdumyzda ýaş nesliň zehin-başarnygyny ösdürmäge, bu ugurda halkara hyzmatdaşlygy berkitmäge möhüm ähmiýet berilýändigini aýtdy. Döwlet Baştutanymyz ýurdumyzyň degişli ýokary okuw mekdeplerinde halkara maslahatlary hem-de olimpiadalary geçirmek baradaky teklibi makullap, wise-premýere degişli işleri geçirmegi tabşyrdy.

Soňra Ministrler Kabinetiniň Başlygynyň orunbasary, daşary işler ministri R.Meredow Merkezi Aziýa ýurtlary bilen Amerikanyň Birleşen Ştatlarynyň arasyndaky «C5+1» ministrler derejesindäki nobatdaky duşuşyga taýýarlyk görlüşi barada hasabat berdi.

Bellenilişi ýaly, hormatly Prezidentimiziň alyp barýan döwlet syýasatynda dünýäniň dürli ýurtlary bilen özara bähbitli hyzmatdaşlygyň ösdürilmegine aýratyn ähmiýet berilýär. Olaryň hatarynda Amerikanyň Birleşen Ştatlaryny görkezmek bolar. ABŞ bilen uzak ýyllaryň dowamynda milli we sebit derejesinde gyzyklanma bildirilýän ugurlarda hyzmatdaşlyk gatnaşyklaryny alyp barmagyň möhüm gurallary ýola goýuldy. Merkezi Aziýa ýurtlary bilen Amerikanyň Birleşen Ştatlarynyň arasyndaky «C5+1» görnüşinde alnyp barylýan hyzmatdaşlyk munuň aýdyň mysalydyr. Bu hyzmatdaşlygy ýola goýmak we onuň işini berkitmek boýunça bilelikdäki tagallalara türkmen tarapy yzygiderli goşant goşýar. Hususan-da, 2025-nji ýylyň sentýabryndan 2026-njy ýylyň sentýabry aralygynda bu formatyň sekretariatynda Türkmenistanyň Amerikanyň Birleşen Ştatlary bilen bilelikde başlyklyk edendigini bellemek zerurdyr.

Türkmen tarapy bu sekretariatda başlyklyk eden döwründe bu formatyň çäklerinde anyk mowzugy ilerletmek tejribesini ilkinji bolup ýola goýdy. Has takygy, bu döwürde Türkmenistan formatyň çäklerinde emeli aňyň mümkinçilikleri bilen bagly mowzugy öňe sürdi. Şol bir wagtyň özünde, Türkmenistan bilen ABŞ-nyň başlyklyk eden döwründe, ýagny 2025-nji ýylyň 6-njy noýabrynda Waşington şäherinde şu formatyň döwlet Baştutanlarynyň sammiti geçirildi.

Hormatly Prezidentimiziň bu ýokary derejeli duşuşygyň netijeleri boýunça beren görkezmelerinden we tabşyryklaryndan ugur alyp, türkmen tarapy formatyň çäklerinde geçirilýän dürli derejedäki çärelere işjeň gatnaşýar. Soňky aýlaryň dowamynda bu formatyň çäklerinde dürli derejelerdäki duşuşyklaryň geçirilendigi we olaryň işjeňleşendigi bellenildi.

Şu ýylyň 19-njy oktýabrynda bolsa Samarkant şäherinde bu formata gatnaşýan ýurtlaryň daşary syýasat edaralarynyň ýolbaşçylarynyň duşuşygynyň geçirilmegi meýilleşdirilýär. Şunuň bilen baglylykda, bu duşuşyga görülýän taýýarlyk işleri barada aýdyldy. Duşuşykda köptaraplaýyn formatyň çäklerinde hyzmatdaşlygyň möhüm ugurlary babatda türkmen tarapynyň garaýyşlaryny beýan etmek göz öňünde tutulýar. Bu duşuşyk bilen bir hatarda, Hökümet agzalarynyň we işewürleriň gatnaşmagynda birnäçe ugurlar, hususan-da, sanly tehnologiýalar, bilim we saglyk, wajyp minerallar, energiýa we ulag infrastrukturalary, oba hojalyk we dokma toplumy, maliýe we maýa goýum ýaly ugurlar boýunça işewürler sessiýalary geçiriler.

Bu çäräniň çäklerinde Amerikanyň Birleşen Ştatlarynyň Döwlet sekretary bilen ikitaraplaýyn duşuşygyň geçirilmegi göz öňünde tutulýar. Duşuşygyň dowamynda gyzyklanma bildirilýän ugurlardaky hyzmatdaşlyk mümkinçiliklerini, şol sanda şu ýylyň 3-nji noýabrynda Aşgabat şäherinde geçirilmegi meýilleşdirilýän nobatdaky türkmen-amerikan syýasy geňeşmelerine taýýarlyk işlerini ara alyp maslahatlaşmak maksadalaýyk hasaplanylýar.

Merkezi Aziýa ýurtlary bilen Amerikanyň Birleşen Ştatlarynyň arasyndaky bu formatyň ministrler derejesindäki nobatdaky duşuşygynyň netijeleri boýunça Merkezi Aziýa ýurtlarynyň daşary işler ministrleriniň we Amerikanyň Birleşen Ştatlarynyň Döwlet sekretarynyň Bilelikdäki Beýannamasyny kabul etmek meýilleşdirilýär.

Hormatly Prezidentimiz hasabaty diňläp, Merkezi Aziýa ýurtlary bilen Amerikanyň Birleşen Ştatlarynyň arasyndaky ministrler derejesindäki nobatdaky duşuşygyň sebitiň durnukly ykdysady ösüşini üpjün etmekde uly ähmiýete eýedigini belledi. Şunuň bilen baglylykda, döwlet Baştutanymyz wise-premýer, daşary işler ministrine sebitara hyzmatdaşlygy ösdürmäge ýardam berjek bu duşuşyga gowy taýýarlyk görmegi we işjeň gatnaşmagy tabşyrdy.

Ministrler Kabinetiniň Başlygynyň orunbasary B.Annaýew “Altyn Asyr” ýapyk görnüşli paýdarlar jemgyýetiniň maddy-enjamlaýyn binýadyny döwrebaplaşdyrmak boýunça alnyp barylýan işler barada hasabat berdi.

Bellenilişi ýaly, ýurdumyzyň milli öýjükli aragatnaşyk ulgamyny döwrebaplaşdyrmak we elýeterli bolmagyny üpjün etmek boýunça degişli işler alnyp barylýar. Hususan-da, “Altyn Asyr” ýapyk görnüşli paýdarlar jemgyýetini döwrebap enjamlar toplumlary bilen üpjün etmek babatda netijeli çäreler görülýär. Şunda dünýäniň öňdebaryjy kompaniýalary bilen hyzmatdaşlyga möhüm ähmiýet berilýär. Şunuň bilen baglylykda, döwlet Baştutanymyzyň garamagyna degişli teklip hödürlenildi.

Hormatly Prezidentimiz hasabaty diňläp, ýurdumyzyň milli öýjükli aragatnaşyk ulgamyny döwrebaplaşdyrmak boýunça işleriň alnyp barylýandygyny belledi. Döwlet Baştutanymyz «Altyn Asyr» ýapyk görnüşli paýdarlar jemgyýetiniň maddy-enjamlaýyn binýadyny berkitmek maksady bilen taýýarlanylan teklibi makullap, wise-premýere degişli işleri geçirmegi tabşyrdy.

Mejlisde döwlet durmuşyna degişli başga-da birnäçe möhüm meselelere seredildi we olar boýunça degişli çözgütler kabul edildi.

Hormatly Prezidentimiz Serdar Berdimuhamedow Ministrler Kabinetiniň sanly ulgam arkaly geçirilen mejlisini jemläp, oňa gatnaşanlara berk jan saglyk, maşgala abadançylygyny, berkarar Watanymyzyň gülläp ösmegi ugrunda alyp barýan işlerinde uly üstünlikleri arzuw etdi.

Hormatly Prezidentimiz Serdar Berdimuhamedow BMG-niň Biodürlülik baradaky maslahatynyň Liderler sammitine gatnaşdy

Baku — Ýerewan — Aşgabat, 16-njy oktýabr (TDH). Şu gün hormatly Prezidentimiz Serdar Berdimuhamedow Ermenistan Respublikasynda Biodürlülik baradaky maslahatyň çäklerinde geçirilen Liderler sammitine gatnaşdy.

Ozal habar berlişi ýaly, 15-nji oktýabrda döwlet Baştutanymyz Azerbaýjan Respublikasyna iş saparyny amala aşyrdy. Hormatly Prezidentimiz Serdar Berdimuhamedow goňşy ýurda iş saparynyň maksatnamasyny tamamlap, BMG-niň Biologik köpdürlülik baradaky Konwensiýasyna gatnaşyjy taraplaryň maslahatynyň (COP17) çäklerinde guralan Liderler sammitine gatnaşmak üçin Baku şäherinden Ermenistan Respublikasyna ugrady.

Döwlet Baştutanymyz Ermenistana ugramak üçin Azerbaýjan Respublikasynyň Geýdar Aliýew adyndaky Halkara howa menziline bardy.

...Birnäçe wagtdan soňra, hormatly Prezidentimiziň uçary Ýerewanyň Halkara howa menziline gelip gondy. Bu ýerde belent mertebeli türkmen myhmanyny Ermenistan Respublikasynyň resmi adamlary we Türkmenistanyň resmi wekiliýetiniň agzalary mähirli garşyladylar.

Soňra döwlet Baştutanymyzyň awtoulag kerweni ýokary derejedäki sammitiň geçirilýän ýerine — “Meridian” sergi we çäreler merkezine ugrady.

Türkmenistan bilen Ermenistan Respublikasynyň arasyndaky netijeli döwletara gatnaşyklar däp bolan dostluk, özara hormat goýmak we ynanyşmak ýörelgelerine esaslanýar. Ýokary derejede ýola goýlan yzygiderli dialog söwda-ykdysady we medeni-ynsanperwer hyzmatdaşlygy işjeň ösdürmäge hem-de täze many-mazmun bilen baýlaşdyrmaga ýardam berýär. Şeýle hem ýurtlarymyz iri halkara düzümleriň çäklerinde üstünlikli hyzmatdaşlyk edýärler.

BMG-niň Biodürlülik baradaky maslahatynyň çäklerinde Ýerewanda geçirilýän Liderler sammiti tebigy ekoulgamlary goramak işinde dünýä jemgyýetçiliginiň tagallalaryny birleşdirmäge gönükdirilendir. Howanyň üýtgemegi bilen baglanyşykly wehimleriň barha artýan şertlerinde bu abraýly meýdança döwlet Baştutanlaryna dünýäde ekologiýa durnuklylygyny üpjün etmek üçin syýasy mehanizmleri işläp taýýarlamaga mümkinçilik berýär.

Türkmenistanyň ekologiýa syýasaty ýurdumyzyň döwlet ösüşiniň ileri tutulýan ugurlarynyň hataryna çykarylyp, amala aşyrylýan giň möçberli milli maksatnamalarda öz beýanyny tapýar. Ýurdumyz daşky gurşawy goramagyň we tebigy serişdelerden netijeli peýdalanmagyň häzirki hem-de geljekki nesilleriň abadançylygynyň hökmany şerti bolup durýandygyndan ugur alýar. Şunuň bilen baglylykda, bu ugurda alnyp barylýan işler çölleşmä garşy göreşmek, bioköpdürlüligi gorap saklamak hem-de suw serişdelerinden netijeli peýdalanmak boýunça çäreleriň giň toplumyny öz içine alýar.

Halkara giňişlikde Türkmenistan möhüm ekologiýa meseleleri boýunça dünýä jemgyýetçiliginiň tagallalaryny birleşdirmäge gönükdirilen anyk başlangyçlar bilen yzygiderli çykyş edýär. Merkezi Aziýada howanyň üýtgemegi bilen baglanyşykly tehnologiýalar boýunça sebit merkezini döretmek, şeýle hem Aral deňziniň basseýni üçin BMG-niň Ýörite maksatnamasyny işläp taýýarlamak baradaky teklipleriň yzygiderli öňe sürülmegi munuň aýdyň subutnamasydyr.

Ýurdumyz “ýaşyl” ykdysadyýet ýörelgelerini ornaşdyrmaga, uglerodyň daşky gurşawa zyňyndylaryny peseltmäge hem-de gaýtadan dikeldilýän energetikany ösdürmäge aýratyn üns berýär. Yzygiderli geçirilýän ählihalk bag ekmek dabaralary bu ugurda alnyp barylýan giň möçberli işleriň aýdyň mysallarynyň biridir. Onuň çäklerinde her ýyl millionlarça düýp bag nahallary oturdylyp, şäherleriň daşynda ýaşyl zolaklar döredilýär.

Türkmenistan öz üstüne alan halkara borçnamalaryna berk ygrarly bolmak bilen, BMG-niň tebigaty goramak boýunça konwensiýalarynyň, şol sanda Biologik köpdürlülik hakynda konwensiýanyň hem-de howa boýunça Pariž ylalaşygynyň düzgünlerini berjaý edýär. Ýurdumyzyň ekologiýa döwlet strategiýasy özünde milli bähbitleri ählumumy ösüş ýörelgeleri bilen sazlaşykly utgaşdyrýar.

Bu giň möçberli çärä BMG-niň Baş Sekretary, döwlet hem-de Hökümet Baştutanlary, tebigaty goramak boýunça guramalaryň ýolbaşçylary, BMG-niň wekilleri hem-de halkara bilermenler gatnaşdylar.

Sammitiň geçirilýän ýerinde hormatly Prezidentimizi Ermenistan Respublikasynyň Premýer-ministri Nikol Paşinýan hem-de BMG-niň Baş Sekretary Antoniu Guterriş mähirli garşyladylar we bilelikde ýadygärlik surata düşdüler.

Wekiliýet baştutanlarynyň bilelikde resmi surata düşmek dabarasyndan soňra, BMG-niň Biodürlülik baradaky maslahatynyň çäklerindäki Liderler sammiti öz işine başlady.

Sammitiň gün tertibine ekoulgamlary we biologik köpdürlüligi goramak, ekologiýa başlangyçlaryny maliýeleşdirmek hem-de BMG-niň Biodürlülik baradaky maslahatynyň esasy maksatnamasyna (COP17) taýýarlyk görmek bilen baglanyşykly meseleler girizildi.

Hormatly Prezidentimiz öz çykyşynda, ilki bilen, Ermenistan Respublikasynyň Premýer-ministri Nikol Paşinýana sammitiň ýokary guramaçylyk derejesi, bildirilen myhmansöýerlik hem-de netijeli işlemäge döredilen ähli şertler üçin tüýs ýürekden minnetdarlyk bildirip, Liderleriň şu gezekki sammitiniň döwletleriň dünýäde biologik köpdürlüligi gorap saklamaga hem-de kabul eden borçnamalaryndan anyk hereketlere geçmäge umumy syýasy erklerini tassyklamak üçin mümkinçilik döredýändigini belledi.

«Türkmenistan BMG-niň Biologik köpdürlülik hakynda Konwensiýasynyň hem-de Kunmin-Monreal ählumumy Çarçuwaly maksatnamasynyň maksatlaryny hem-de ýörelgelerini yzygiderli goldaýar. Biz bioköpdürlüligiň azalmagynyň, howanyň üýtgemeginiň, çölleşmäniň we topragyň ýaramazlaşmagynyň ekologiýa howpsuzlygyna hem-de ýurtlaryň durnukly ösüşine gönüden-göni täsir edýän özara baglanyşykly wehimler bolup durýandygyndan ugur alýarys.

Garagum sährasyndan başlap, Köpetdagyň we Köýtendagyň daglyklaryna hem-de Hazar deňziniň kenar ýakasyna çenli özboluşly tebigy ekoulgamlara eýe bolan Türkmenistan tebigy baýlyklaryň goralyp saklanmagyna döwlet syýasatynyň möhüm ugry hökmünde garaýar» diýip, döwlet Baştutanymyz aýtdy we ýurdumyzyň bu işde birnäçe ileri tutulýan ugurlara esaslanýandygyny nygtady.

Hormatly Prezidentimiz Türkmenistanyň aýratyn goralýan tebigy çäkleriň milli ulgamlaryny kämilleşdirmäge, ekologiýa gözegçiligini ösdürmäge, haýwanlaryň we ösümlikleriň seýrek görnüşlerini goramaga möhüm ähmiýet berýändigini belläp, halkara hyzmatdaşlar bilen bilelikde ählumumy çarçuwaly maksatnamanyň maksatlaryny nazara almak bilen işlenip taýýarlanylan Türkmenistanyň 2026 — 2035-nji ýyllar üçin bioköpdürlüligi gorap saklamak boýunça Milli strategiýasynyň we Hereketleriň meýilnamasynyň bu ugurdaky işiň möhüm guraly bolup durýandygyny nygtady.

Döwlet Baştutanymyz serhetüsti ekoulgamlary, haýwanlaryň migrasiýa ýollaryny we tebigy serişdeleri gorap saklamak maksady bilen, sebit hyzmatdaşlygynyň giňeldilmegini ileri tutulýan ugurlaryň hatarynda belläp, ýurdumyzyň Hazar deňziniň ekologiýa abadançylygyna, Aral deňziniň basseýniniň ekoulgamyny goramaga hem-de çölleşmä garşy göreşmäge aýratyn ähmiýet berýändigini aýtdy.

Nygtalyşy ýaly, bu wezipeleriň netijeli çözülmegi döwletleriň ylalaşykly hereketlerini, ylmy taýdan esaslandyrylan çözgütleri hem-de hyzmatdaşlygyň uzak möhletli mehanizmlerini talap edýär.

Hormatly Prezidentimiz Birleşen Milletler Guramasynyň, onuň ýöriteleşdirilen edaralarynyň we tebigaty goramak boýunça halkara mehanizmleriniň kuwwatyny doly derejede ulanmagyň zerurdygyna ünsi çekip, tebigy mirasy gorap saklamak hem-de ylmy barlaglary ösdürmek ulgamynda ýurdumyzyň ÝUNESKO bilen hyzmatdaşlyga aýratyn ähmiýet berýändigini belledi. “Bütindünýä mirasynyň “Aram guşaklygynyň Turan çölleri” transmilli obýektiniň düzümine Türkmenistanyň tebigy çäkleriniň girizilmegi halkara hyzmatdaşlygyň ekoulgamlary gorap saklamaga ýardam berýändiginiň aýdyň mysalydyr.

BMG-niň ugurdaş edaralary bilen hyzmatdaşlygy, şol sanda tebigy prosesleri ylmy esasda öwrenmek, suw hem-de deňiz ekoulgamlaryny gorap saklamak we ekologik gözegçiligiň usullaryny kämilleşdirmek ulgamlarynda özara hyzmatdaşlygy mundan beýläk-de ösdürmegi möhüm hasaplaýarys” diýip, döwlet Baştutanymyz aýtdy we bioköpdürlüligi goramak ulgamynda ählumumy maksatlary gazanmak üçin BMG-niň ulgamynyň ylmy, bilermenlik we institusional mümkinçiliklerini doly derejede ulanmagyň zerurdygyna berk ynam bildirdi.

Hormatly Prezidentimiz tebigaty goramak boýunça halkara borçnamalaryny berjaý etmek üçin ähli zerur şertleriň üpjün edilmeginiň ileri tutulýan wezipe bolup durýandygyny belläp, ösüp barýan ýurtlaryň maliýe serişdelerine we döwrebap tehnologiýalara elýeterliliginiň üpjün edilmeginiň, milli kuwwatyň pugtalandyrylmagynyň, şeýle hem genetiki serişdeleri ulanmakdan alynýan bähbitleriň adalatly we deňhukukly paýlanylmagynyň, şol sanda olaryň yzygiderliligi baradaky sanly maglumatlaryň möhüm ähmiýete eýedigini nygtady.

“BMG-niň Baş Assambleýasynyň 81-nji sessiýasynyň çäklerinde Türkmenistan ekologiýa howpsuzlygy we howanyň üýtgemegine garşy durnuklylyk ulgamynda halkara hyzmatdaşlygy pugtalandyrmaga gönükdirilen başlangyçlary öňe sürmegi dowam eder. Hususan-da, biz yzygiderli syýasy we bilermenlik hyzmatdaşlygyny alyp barmak, anyk başlangyçlary ilerletmek hem-de halkara hyzmatdaşlygy pugtalandyrmak üçin açyk köptaraply meýdança hökmünde Aşgabat howa dialogyny döretmek ugrunda çykyş edýäris.

Çölleşmä garşy göreşmäge we gurak sebitleriň howanyň üýtgemeginiň täsirlerine durnuklylygyny ýokarlandyrmaga aýratyn ähmiýet berýäris. Şunuň bilen baglylykda, Türkmenistan Merkezi Aziýa ýurtlary üçin çölleşmä garşy göreşmek boýunça sebit merkezini döretmek başlangyjyny öňe sürýär. Bu ugurlara ekoulgamlary gorap saklamak, tebigy serişdelerden netijeli peýdalanmak hem-de Durnukly ösüş maksatlaryna ýetmek boýunça toplumlaýyn halkara tagallalaryň möhüm bölegi hökmünde garaýarys” diýip, döwlet Baştutanymyz sözüni dowam etdi we Türkmenistanyň ösüp barýan ýurtlaryň, şol sanda deňze çykalgasy bolmadyk döwletleriň bähbitlerini hem-de özboluşly zerurlyklaryny nazara almazdan, ählumumy ekologiýa maksatlaryna ýetmegiň mümkin däldigine berk ynanýandygyny nygtady. Şunuň bilen baglylykda, hormatly Prezidentimiz Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatynyň 2024 — 2034-nji ýyllar üçin Hereketleriň Awaza maksatnamasynda hem-de Awaza syýasy Jarnamasynda berkidilen çözgütleriň aýratyn ähmiýetini belledi.

Döwlet Baştutanymyz howanyň üýtgemegi hem-de ekologiýa bilen baglanyşykly maliýe serişdelerine elýeterliligi giňeltmek, tebigaty goramak boýunça döwrebap we sanly tehnologiýalary paýlaşmak, şeýle hem howanyň üýtgemeginiň täsirlerine durnukly infrastrukturany ösdürmek maksady bilen, halkara goldawyň işjeňleşdirilmeginiň zerurdygyny belläp, şunda adalatlylyk, raýdaşlyk we deňhukukly hyzmatdaşlyk ýörelgeleriniň bioköpdürlüligi gorap saklamak boýunça halkara tagallalaryň esasyny düzmelidigini nygtady.

“Bu ugurda umumy ekologiýa maksatlaryna ýetmegiň bähbidine döwletleriň bilimlerini we mümkinçiliklerini, toplan tejribesini birleşdirmäge mümkinçilik berýän köptaraplaýyn hyzmatdaşlyk mehanizmleri, şol sanda Günorta — Günorta ugry boýunça özara gatnaşyklar möhüm orun eýelemelidir” diýip, hormatly Prezidentimiz aýtdy we BMG-niň Biologik köpdürlülik hakynda Konwensiýasynyň taraplarynyň geçiriljek 17-nji maslahatynyň kabul edilen borçnamalary ýerine ýetirmäge we halkara hyzmatdaşlygy pugtalandyrmaga goşmaça itergi bermelidigine ynam bildirdi.

Çykyşynyň ahyrynda hormatly Prezidentimiz Serdar Berdimuhamedow Türkmenistanyň ähli gyzyklanma bildirýän döwletler hem-de halkara guramalar bilen netijeli hyzmatdaşlyga taýýardygyny tassyklap, syýasy erkiň, ylmy maglumatlaryň hem-de amaly mümkinçilikleriň birleşdirilmeginiň häzirki we geljekki nesilleriň bähbidine Ýer ýüzüniň tebigy mirasyny gorap saklamaga mümkinçilik berjekdigini aýtdy.

Döwlet Baştutanymyzyň çykyşy uly üns bilen diňlenildi.

Sammitiň jemleri boýunça Ýerewan Jarnamasy kabul edildi.

Ermenistan Respublikasyna iş saparynyň maksatnamasy tamamlanandan soňra, hormatly Prezidentimiz Ýerewan şäheriniň Halkara howa menziline bardy we bu ýerden Watanymyza ugrady.

Birnäçe wagtdan hormatly Prezidentimiz paýtagtymyzyň Halkara howa menziline geldi. Bu ýerde döwlet Baştutanymyzy ýurdumyzyň resmi adamlary mähirli garşyladylar.

Şeýlelikde, hormatly Prezidentimiz Serdar Berdimuhamedowyň Bakuwda hem-de Ýerewanda geçirilen ýokary derejeli çärelere gatnaşmagy ählumumy hyzmatdaşlygyň jogapkärçilikli gatnaşyjysy hökmünde Türkmenistanyň belent abraýynyň nobatdaky aýdyň mysaly boldy. Döwlet Baştutanymyzyň sammitlerdäki beýan eden teklipleri hem-de başlangyçlary ýurdumyzyň sebitde we dünýäde ekologiýa abadançylygynyň hem-de durnukly ösüşiň bähbidine giň halkara hyzmatdaşlyga taýýardygyny tassyklady.

Türkmenistanyň Prezidenti Aziýada hyzmatdaşlygy we ynanyşmagy berkitmegiň çäreleri Geňeşiniň VII sammitine gatnaşdy

Aşgabat — Baku, 15-nji oktýabr (TDH). Şu gün hormatly Prezidentimiz Serdar Berdimuhamedow Aziýada hyzmatdaşlygy we ynanyşmagy berkitmegiň çäreleri Geňeşiniň nobatdaky sammitine gatnaşmak üçin iş sapary bilen Azerbaýjan Respublikasyna ugrady.

...Ir bilen döwlet Baştutanymyz Azerbaýjana ugramak üçin paýtagtymyzyň Halkara howa menziline geldi. Bu ýerde hormatly Prezidentimizi ýurdumyzyň resmi adamlary ugratdylar.

Türkmenistan hem-de Azerbaýjan Respublikasy deňhukuklylyk, özara hormat goýmak, milli bähbitleri nazara almak ýörelgeleri esasynda ösdürilýän strategik hyzmatdaşlygyň, köpasyrlyk dostlugyň we hoşniýetli goňşuçylygyň mizemez nusgasyny görkezýärler. Yzygiderli esasda alnyp barylýan ýokary derejedäki gatnaşyklar syýasy-diplomatik, söwda-ykdysady we medeni-ynsanperwer ulgamlardaky ikitaraplaýyn hyzmatdaşlygy giňeltmäge kuwwatly itergi berýär. Gündogar — Günbatar ugry boýunça halkara üstaşyr ulag we energetika geçelgelerini döretmekde möhüm halka bolup çykyş edýän iki döwletiň geostrategik mümkinçiliklerini netijeli durmuşa geçirmek ikitaraplaýyn gün tertibinde aýratyn orun eýeleýär.

Hormatly Prezidentimiz Serdar Berdimuhamedowyň Aziýada hyzmatdaşlygy we ynanyşmagy berkitmegiň çäreleri Geňeşiniň nobatdaky sammitine gatnaşmak üçin Azerbaýjan Respublikasyna amala aşyrýan sapary ýurdumyzyň halkara giňişlikdäki belent abraýynyň nobatdaky subutnamasydyr.

Aziýada hyzmatdaşlygy we ynanyşmagy berkitmegiň çäreleri Geňeşi Aziýa giňişliginde parahatçylygy, durnuklylygy we hyzmatdaşlygy pugtalandyrmaga gönükdirilen ýokary wekilçilikli hem-de abraýly döwletara forumdyr. Bu Geňeş syýasy, ykdysady, ekologiýa, ynsanperwer, şeýle hem täze wehimlere garşy durmak ýaly esasy bäş ugry öz içine alyp, köptaraplaýyn we köpugurly dialog üçin amatly meýdança bolup durýar.

Türkmen wekiliýetiniň bu ýokary derejeli foruma gatnaşmagy sebit we halkara gün tertibiniň möhüm meselelerini ara alyp maslahatlaşmakda ýurdumyzyň köptaraply dialog ýörelgelerine üýtgewsiz ygrarlydygynyň subutnamasydyr.

Aziýada hyzmatdaşlygy we ynanyşmagy berkitmegiň çäreleri Geňeşiniň mümkinçilikleriniň peýdalanylmagy ulag-logistika, durnukly energetika, ekologiýa we howanyň üýtgemegine garşy durmak ýaly ulgamlarda hyzmatdaşlygy ösdürmek üçin giň gözýetimleri açýar. Türkmenistan Geňeşde synçy döwlet bolmak bilen, bu meýdança ynanyşykly gatnaşyklaryň netijeli guraly hökmünde garaýar hem-de Ýewraziýa giňişliginde özara hormat goýmak ýagdaýyny pugtalandyrmakda deňagramly çemeleşmeleri işläp taýýarlamaga işjeň ýardam berýär.

BMG-niň Baş Assambleýasy tarapyndan üç gezek ykrar edilen hemişelik Bitaraplyk hukuk derejesine esaslanýan ýurdumyzyň parahatçylyk döredijilikli daşary syýasy ugry Türkmenistanyň döwlet syýasatynyň berk binýady we sebitde durnuklylygy üpjün etmekde ygtybarly şert bolup çykyş edýär. Ýurdumyz halkara giňişlikde netijeli başlangyçlary öňe sürüp, ýüze çykýan gapma-garşylyklary parahatçylykly we syýasy-diplomatik ýollar arkaly çözmäge gönükdirilen “Dialog — parahatçylygyň kepili” filosofiýasyny yzygiderli ilerledýär. Türkmenistanyň BMG-niň çäklerinde yzygiderli öňe sürýän we halkara gatnaşyklarda ynanyşmagy pugtalandyrmaga gönükdirilen giň möçberli Kararnamalary bu ugruň netijeli häsiýetiniň aýdyň subutnamasydyr.

Öňüni alyş diplomatiýasy ýurdumyzyň parahatçylyk döredijilik strategiýasynda aýratyn orun eýeleýär. Ştab-kwartirasy Aşgabatda ýerleşýän BMG-niň Merkezi Aziýa üçin öňüni alyş diplomatiýasy boýunça sebit merkezi bilen ýakyndan hyzmatdaşlyk Türkmenistanyň köptaraplaýyn we ynanyşykly dialoga ygrarlydygyny aýdyň görkezýär. Oňyn Bitaraplygyň we öňüni alyş diplomatiýasynyň bu üstünlikli nusgasy halkara jemgyýetçiligiň giň goldawyna eýe bolup, ählumumy durnuklylygy üpjün etmäge uly goşant goşýar.

...Birnäçe wagtdan hormatly Prezidentimiziň uçary Baku şäheriniň iki ýurduň Döwlet baýdaklary bilen bezelen Geýdar Aliýew adyndaky Halkara howa menziline gelip gondy.

Bu ýerde döwlet Baştutanymyzy Azerbaýjan Respublikasynyň resmi adamlary hem-de Türkmenistanyň resmi wekiliýetiniň agzalary mähirli garşyladylar.

Sammitiň geçirilýän ýeri — Baku Kongresler merkezinde döwlet Baştutanymyz Serdar Berdimuhamedowy Azerbaýjan Respublikasynyň Prezidenti Ilham Aliýew mähirli garşylady.

Wekiliýet Baştutanlarynyň bilelikdäki surata düşmek dabarasyndan soňra, Aziýada hyzmatdaşlygy we ynanyşmagy berkitmegiň çäreleri Geňeşiniň VII sammiti öz işine başlady.

Azerbaýjan Respublikasynyň Prezidenti Ilham Aliýew sammite gatnaşyjylary mähirli mübärekläp, çakylygy kabul edip, Azerbaýjana gelendikleri üçin hoşallyk bildirdi we şu günki duşuşygyň özara hyzmatdaşlygy pugtalandyrmakda möhüm ädim boljakdygyny belledi.

Soňra sammite gatnaşýan wekiliýet ýolbaşçylaryna söz berildi.

Hormatly Prezidentimiz Serdar Berdimuhamedow, ilki bilen, öz çykyşynda Azerbaýjan Respublikasynyň Prezidenti Ilham Aliýewe sammitiň ýokary guramaçylyk derejesi, bildirilen myhmansöýerlik hem-de netijeli işlemäge döredilen amatly şertler üçin tüýs ýürekden minnetdarlyk bildirdi. Şeýle-de Türkmenistanyň Aziýada hyzmatdaşlygy we ynanyşmagy berkitmegiň çäreleri Geňeşine yklymda parahatçylygy, howpsuzlygy, özara ynanyşmagy we durnukly ösüşi pugtalandyrmaga ýardam bermäge gönükdirilen möhüm halkara meýdança hökmünde garaýandygyny belledi.

“Biz Azerbaýjan Respublikasynyň Aziýada hyzmatdaşlygy we ynanyşmagy berkitmegiň çäreleri Geňeşinde başlyklyk etmeginiň netijelerine ýokary baha berýäris. Şunuň bilen baglylykda, Azerbaýjanyň bu formatyň başlygy hökmünde onuň maksatlaryna hem-de wezipelerine berk ygrarly bolmak bilen, hyzmatdaşlygy we özara ynanyşmagy pugtalandyrmak boýunça çäreleri durmuşa geçirmekde yzygiderlilik görkezendigini, şol bir wagtda halkara hyzmatdaşlygy giňeltmäge işjeň ýardam berendigini aýratyn bellemek isleýärin.

Şu günki sammit çuňňur geosyýasy we geoykdysady özgerişlikleriň döwründe geçýär. Häzirki zaman halkara ýagdaýlary we täze wehimler döwletlerden parahatçylygy, howpsuzlygy pugtalandyrmagyň hem-de halkara gatnaşyklarda durnuklylygy üpjün etmegiň bähbidine ylalaşykly tagallalary talap edýär. Şunda halkara hukugyň we Birleşen Milletler Guramasynyň Tertipnamasynyň kadalarynyň berk berjaý edilmegi aýratyn ähmiýete eýe bolýar.

Şunuň bilen baglylykda, biz halkara durnuklylygy üpjün etmäge gönükdirilen bilelikdäki tagallalary amala aşyrmak üçin zerur bolan halkara-hukuk binýadyny pugtalandyrmaga aýratyn ähmiýet berýäris. Mälim bolşy ýaly, Türkmenistan 2028-nji ýyly “Halkara hukuk ýyly” we 2027 — 2037-nji ýyllary BMG-niň “Dialog we öňüni alyş diplomatiýasynyň onýyllygy” diýip yglan etmek baradaky başlangyçlar bilen çykyş etdi” diýip, hormatly Prezidentimiz sözüni dowam etdi hem-de halkara hukugyň we öňüni alyş diplomatiýasynyň mümkinçilikleriniň giňeldilmeginiň dialogyň çäklerinde, ilkinji nobatda, gapma-garşylyklaryň öňüni almaga, ynanyşmagy pugtalandyrmaga we özara kabul ederlikli çözgütleri işläp taýýarlamaga ýardam berjekdigine ynam bildirdi.

Döwlet Baştutanymyz halkara jemgyýetçilik tarapyndan bu başlangyçlaryň goldanyljakdygyna ynam bildirip, ştab-kwartirasy Aşgabatda ýerleşýän BMG-niň Merkezi Aziýa üçin öňüni alyş diplomatiýasy boýunça sebit merkeziniň mümkinçiliklerini has giň ulanmagyň möhümdigini nygtady.

“Syýasy şertler bilen birlikde, ykdysady baglanyşygy pugtalandyrmak, özara bähbitli söwdany giňeltmek we ygtybarly ulag-logistika zynjyrlaryny döretmek dünýäde howpsuzlygy hem-de durnukly ösüşi üpjün etmegiň möhüm şerti bolup durýar. Dünýä ykdysadyýetiniň üýtgäp durýan döwründe ulag ugurlaryny diwersifikasiýalaşdyrmak, multimodal ýük daşamalaryny ösdürmek hem-de sebit hyzmatdaşlygyna bökdençlik döredýän infrastruktura we amaly päsgelçilikleri aradan aýyrmak aýratyn ähmiýete eýe bolýar.

Türkmenistanyň başlangyjy boýunça kabul edilen BMG-niň Baş Assambleýasynyň 2026 — 2035-nji ýyllar üçin Durnukly ulagyň onýyllygy hakyndaky Kararnamasyny dowam etmek bilen, ýurdumyz ulag we logistika ulgamlarynda halkara hyzmatdaşlygy ösdürmäge gönükdirilen başlangyçlary yzygiderli öňe sürýär. Şolaryň hatarynda Merkezi we Günorta Aziýanyň Hazar deňziniň üsti bilen Ýewropa bazarlaryna çykmagyny üpjün edýän yklymara ulag ugurlaryny döretmek hem-de Durnukly ulag arabaglanyşygynyň ählumumy atlasyny işläp taýýarlamak ýaly başlangyçlar bar.

Umuman, biz Gündogar — Günbatar we Demirgazyk — Günorta ugurlary boýunça ulag geçelgeleriniň mümkinçilikleriniň has netijeli ulanylmagy, şeýle hem logistika ulgamynda halkara hyzmatdaşlygyň giňeldilmegi we söwda amallarynyň ýeňilleşdirilmegi ugrunda çykyş edýäris.

Aziýada hyzmatdaşlygy we ynanyşmagy berkitmegiň çäreleri Geňeşiniň çäklerinde ulag meseleleri boýunça ministrler derejesindäki dialogy ösdürmek maksadalaýyk bolardy diýip hasaplaýarys. Şeýle format milli tejribäni paýlaşmaga, bar bolan päsgelçilikleri ýüze çykarmaga hem-de ähli gyzyklanma bildirýän döwletleriň bähbidine amaly maslahatlary işläp taýýarlamaga mümkinçilik berer” diýip, hormatly Prezidentimiz sözüni dowam etdi. Şunuň bilen baglylykda, sanlylaşdyrmak ulgamyndaky halkara hyzmatdaşlygyň ähmiýetiniň hem barha artýandygyny, emeli aňyň we beýleki öňdebaryjy tehnologiýalaryň ykdysadyýeti ösdürmek, döwlet dolandyryşynyň netijeliligini ýokarlandyrmak hem-de diplomatik gurallary kämilleşdirmek üçin giň mümkinçilikleri açýandygyny belledi.

“Şunuň bilen birlikde, olaryň ulanylmagy halkara hukuga, ynanyşmak we ähli döwletleriň bähbitlerini nazara almak ýörelgelerine esaslanýan jogapkärçilikli çemeleşmäni talap edýär.

Şunuň bilen baglylykda, Türkmenistan halkara gatnaşyklarda we diplomatiýada emeli aňy parahatçylykly ulanmak boýunça Halkara kodeksi işläp taýýarlamak başlangyjy bilen çykyş edýär.

Howanyň üýtgemegi hem-de ekologiýa howpsuzlygy häzirki döwrüň çynlakaý wehimleri bolmagynda galýar. Türkmenistan bu ulgamlarda halkara hyzmatdaşlygyň pugtalandyrylmagy ugrunda yzygiderli çykyş edýär. Biz howanyň ählumumy üýtgeýän şertlerinde suw serişdelerinden netijeli peýdalanmak, tebigaty goraýan döwrebap tehnologiýalary ornaşdyrmak hem-de milli ykdysadyýetleriň durnuklylygyny ýokarlandyrmak maksady bilen, biziň formatymyza gatnaşyjy döwletleriň tagallalaryny birleşdirmäge aýratyn ähmiýet berýäris.

Halkara ekologiýa hyzmatdaşlygyny ösdürmäge goşant goşmak maksady bilen, Türkmenistan howanyň üýtgemegine garşy uýgunlaşmak, çölleşmä we gurakçylyga garşy göreşmek, suw serişdelerinden netijeli peýdalanmak hem-de “ýaşyl” çözgütleri ilerletmek boýunça tejribe alyşmak we çemeleşmeleri ylalaşmak üçin köptaraplaýyn platformany — Aşgabat howa dialogyny döretmek başlangyjyny öňe sürýär” diýip, hormatly Prezidentimiz aýtdy we gyzyklanma bildirýän döwletleri hem-de halkara hyzmatdaşlary bu başlangyjy goldamaga çagyrdy.

Döwlet Baştutanymyz Aziýada hyzmatdaşlygy we ynanyşmagy berkitmegiň çäreleri Geňeşiniň durnukly ekologiýa ösüşiniň bähbidine bilelikdäki taslamalary durmuşa geçirmek hem-de netijeli çözgütleri ilerletmek üçin ähli mümkinçilikleriniň bardygyna ynam bildirip, ynsanperwer ulgamyň özara hyzmatdaşlygyň aýrylmaz bölegi bolup durýandygyny belledi. Nygtalyşy ýaly, Geňeşe gatnaşyjy döwletleriň taryhy baglanyşygy, baý medeni mirasy we köpasyrlyk hoşniýetli goňşuçylyk däpleri özara düşünişmegi hem-de ynanyşmagy pugtalandyrmak üçin berk binýat döredýär.

Hormatly Prezidentimiz Türkmenistanyň Aziýada hyzmatdaşlygy we ynanyşmagy berkitmegiň çäreleri Geňeşiniň ýaşlar platformalarynyň çäklerinde akademiki alyşmalaryň giňeldilmegini we hyzmatdaşlygyň ösdürilmegini doly goldaýandygyny aýtdy we şunuň bilen baglylykda, parahatçylykly dialog medeniýetini gaýtadan dikeltmek işine ösüp gelýän nesli çekmegiň guraly hökmünde ýaşlar diplomatiýasyny düýpli ösdürmegiň zerurdygyny nygtady.

“Ýurtlarymyzyň parahatçylyk, özara hormat goýmak we netijeli medeniýetara dialog taglymlaryny ilerledip biljek işjeň we zehinli ýaşlaryndan ybarat Ynanyşmagyň ýaş ilçileriniň torunyň döredilmegi bu ugurda anyk ädim bolup bilerdi” diýip, hormatly Prezidentimiz aýtdy we Türkmenistanyň Aziýada hyzmatdaşlygy we ynanyşmagy berkitmegiň çäreleri Geňeşiniň alyp barýan işine uly ähmiýet berýändigini hem-de onuň maksatlarydyr ýörelgelerini yzygiderli goldaýandygyny, synçy döwlet hökmünde ýurdumyzyň Aziýada köptaraplaýyn hyzmatdaşlygy giňeltmäge gönükdirilen netijeli başlangyçlary hem-de teklipleri ilerletmäge mundan beýläk-de goşant goşmaga taýýardygyny tassyklady.

Prezident Ilham Aliýew döwlet Baştutanymyza çuň manyly çykyşy üçin hoşallyk bildirip, beýan eden teklipleriniň hem-de başlangyçlarynyň möhüm ähmiýetini belledi.

Şeýle hem sammitiň dowamyndaky çykyşlarda ynanyşmak çärelerini pugtalandyrmak, howanyň üýtgemegine garşy uýgunlaşmak, Aziýada ulag-logistika strategiýalaryny utgaşdyrmak, halkara ulag geçelgelerini ösdürmek, azyk howpsuzlygyny hem-de ekologiýa durnuklylygyny üpjün etmek, sanly özgertmeleri çaltlandyrmak bilen baglanyşykly meselelere seredilip geçildi.

Şeýlelikde, Türkmenistan Aziýada hyzmatdaşlygy we ynanyşmagy berkitmegiň çäreleri Geňeşiniň sammitiniň çäklerinde ulag-logistika hyzmatdaşlygyny diwersifikasiýalaşdyrmaga, ekologiýa meselelerini çözmäge, şol sanda daşky gurşawy goramaga we suw serişdelerinden netijeli peýdalanmaga, ynsanperwer hyzmatdaşlygy ösdürmäge gönükdirilen başlangyçlary öňe sürdi. Hormatly Prezidentimiziň beýan eden teklipleri Türkmenistanyň Durnukly ösüş maksatlaryna ýetmek we ählumumy abadançylygy üpjün etmek üçin dünýä jemgyýetçiliginiň tagallalaryny birleşdirmäge çalyşýandygynyň nobatdaky subutnamasy boldy.

Hormatly Prezidentimiziň Azerbaýjan Respublikasyna iş sapary dowam edýär.

Aşgabat, 12-nji oktýabr (TDH). Şu gün hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Onda ýurdumyzyň oba hojalyk toplumynda hem-de welaýatlarynda alnyp barylýan işler bilen baglanyşykly meselelere garaldy.

Ilki bilen, Ahal welaýatynyň häkimi T.Nurmyradowa söz berildi. Häkim welaýatda dowam edýän möwsümleýin oba hojalyk işleriniň barşy barada hasabat berdi. Bellenilişi ýaly, häzirki wagtda welaýatda pagta ýygymynyň depginini güýçlendirmek, pagta hasylyny ýitgisiz ýygnap almak we döwlet harmanyna tabşyrmak boýunça zerur işler alnyp barylýar. Ýygym möwsüminde oba hojalyk tehnikalaryny, pagta arassalaýjy kärhanalary hem-de kabul ediş harmanhanalaryny netijeli işletmek üçin zerur çäreler görülýär.

Bu işler bilen bir hatarda, welaýatda bugdaý ekişi dowam edip, bu ugurda oba hojalyk tehnikalary we gurallary doly güýjünde işledilýär. Ekiş geçirilen meýdanlarda gögeriş suwy tutulýar. Şunuň bilen birlikde, welaýatyň ekerançylyk meýdanlarynda güýzlük ýeralma, gök-bakja we beýleki azyklyk ekinlere ideg etmek, ýetişdirilen hasyly ýygnap almak hem-de ilata ýetirmek işleri utgaşykly alnyp barylýar. Şeýle hem häkim şu ýyl welaýatda açylyp ulanmaga berilmegi meýilleşdirilýän medeni-durmuş we önümçilik maksatly desgalarda alnyp barylýan gurluşyk işleriniň ýagdaýy barada hasabat berdi.

Hormatly Prezidentimiz Serdar Berdimuhamedow hasabaty diňläp, ösdürilip ýetişdirilen pagta hasylyny ýygnap almak işleriniň depginlerini güýçlendirmegiň, bugdaý ekişini agrotehniki möhletlerde geçirmegiň zerurdygyny belledi we häkime bu ugurda alnyp barylýan işleri gözegçilikde saklamagy tabşyrdy.

Şeýle hem döwlet Baştutanymyz ýurdumyzy durmuş-ykdysady taýdan ösdürmek boýunça maksatnamalara laýyklykda, şu ýyl welaýatda açylyp ulanmaga berilmegi göz öňünde tutulýan desgalardaky gurluşyk işleriniň öz wagtynda we ýokary hilli ýerine ýetirilmegini üpjün etmegi tabşyrdy.

Soňra Balkan welaýatynyň häkimi R.Jumaýewe söz berildi. Häkim, ilki bilen, Balkanabat şäherinde birnäçe saglygy goraýyş düzümleriniň açylyp ulanmaga berilmegi mynasybetli welaýatyň ähli ýaşaýjylarynyň adyndan hormatly Prezidentimize hem-de Gahryman Arkadagymyza tüýs ýürekden hoşallyk bildirip, berk jan saglyk, uzak ömür, il-ýurt bähbitli tutumly işleriniň mundan beýläk-de rowaçlyklara beslenmegini arzuw etdi.

Soňra häkim welaýatda dowam edýän möwsümleýin oba hojalyk işleri barada hasabat berdi. Bellenilişi ýaly, häzirki wagtda welaýatda ýetişdirilen pagta hasylyny ýitgisiz ýygnap almak, ýygnalan hasyly bökdençsiz kabul etmek we talabalaýyk saklamak boýunça degişli işler ýerine ýetirilýär.

Şunuň bilen birlikde, welaýatda bugdaý ekişini ýokary hilli we agrotehniki möhletlerde geçirmek, ekişde ulanylýan oba hojalyk tehnikalarynyň doly güýjünde işledilmegini üpjün etmek, ekiş geçirilen ýerlerde gögeriş suwuny tutmak boýunça işler alnyp barylýar. Hormatly Prezidentimiziň ýurdumyzda azyk bolçulygyny has-da pugtalandyrmak barada berýän tabşyryklaryndan ugur alnyp, welaýatyň ekerançylyk meýdanlarynda güýzlük ýeralmanyň we gök-bakja ekinleriniň bol hasylyny ösdürip ýetişdirmek boýunça degişli işler ýerine ýetirilýär.

Şeýle hem häkim şu ýyl welaýatda açylyp ulanmaga berilmegi meýilleşdirilýän medeni-durmuş we önümçilik maksatly desgalardaky hem-de binalardaky gurluşyk işleri barada hasabat berdi.

Hormatly Prezidentimiz hasabaty diňläp, häzirki wagtda oba hojalygynda dowam edýän möwsümleýin işleriň möhüm ähmiýetine ünsi çekdi we şunuň bilen baglylykda, häkime pagta ýygymynyň hem-de bugdaý ekişiniň agrotehniki möhletlerde we ýokary guramaçylyk derejesinde geçirilmegini gözegçilikde saklamagy tabşyrdy. Şeýle hem döwlet Baştutanymyz ýurdumyzy durmuş-ykdysady taýdan ösdürmäge gönükdirilen maksatnamalarda göz öňünde tutulan wezipeleriň üstünlikli berjaý edilmeginiň möhümdigini belläp, welaýatda bu ugurda alnyp barylýan işleriň ýokary hilli we öz wagtynda ýerine ýetirilmegini üpjün etmegi tabşyrdy.

Soňra Daşoguz welaýatynyň häkimi D.Babaýew welaýatdaky möwsümleýin oba hojalyk işleriniň barşy barada hasabat berdi. Hasabatda bellenilişi ýaly, welaýatda ýetişdirilen pagta hasylyny gysga wagtda we ýitgisiz ýygnap almak maksady bilen zerur çäreler görülýär. Möwsümde oba hojalyk tehnikalary doly güýjünde işledilýär, ýygnalan hasyl pagta kabul ediş harmanhanalarynda bökdençsiz kabul edilýär.

Welaýatda bugdaý ekişi dowam edip, ekiş geçirilen meýdanlarda kadaly gögeriş alynýar. Bu ugurda oba hojalyk tehnikalary we gurallary doly güýjünde hem-de netijeli işledilýär. Şunuň bilen birlikde, welaýatyň ekerançylyk meýdanlarynda güýzlük gök-bakja we beýleki oba hojalyk ekinlerine ideg etmek, şeýle hem ýetişdirilen hasyly ýygnap almak we ilata ýetirmek boýunça işler dowam edýär. Bu işler bilen bir hatarda, welaýatda şaly hasylyny ýygnamak işlerine girişilip, möwsümi öz wagtynda geçirmek üçin zerur çäreler görülýär.

Şeýle hem häkim ýurdumyzy ykdysady taýdan ösdürmäge gönükdirilen maksatnamalara laýyklykda, şu ýyl welaýatda açylyp ulanmaga berilmegi göz öňünde tutulýan medeni-durmuş we önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, häzirki wagtda dowam edýän möwsümleýin oba hojalyk işleriniň agrotehniki möhletlerde we ýokary guramaçylyk derejesinde alnyp barylmagynyň zerur talap bolup durýandygyny belledi we şunuň bilen baglylykda, häkime welaýatda pagta ýygymynyň depginini güýçlendirmek, bugdaý ekişini öz wagtynda we ýokary hilli geçirmek babatda birnäçe görkezmeleri berdi.

Şeýle hem döwlet Baştutanymyz ýurdumyzy durmuş-ykdysady taýdan ösdürmäge gönükdirilen maksatnamalara laýyklykda, şu ýyl welaýatda açylyp ulanmaga berilmegi göz öňünde tutulýan dürli maksatly binalardaky we desgalardaky gurluşyk işleriniň ýokary hilli ýerine ýetirilmegini gözegçilikde saklamagy tabşyrdy.

Soňra Lebap welaýatynyň häkimi H.Aşyrmyradow welaýatda dowam edýän möwsümleýin oba hojalyk işleri barada hasabat berdi. Hasabatda bellenilişi ýaly, oba hojalygynda dowam edýän möwsümleýin işleriň çäklerinde şu günler welaýatda ýetişdirilen pagta hasylyny ýitgisiz ýygnap almak hem-de döwlet harmanyna tabşyrmak boýunça degişli işler alnyp barylýar. Möwsümde oba hojalyk tehnikalaryny, pagta arassalaýjy kärhanalary we pagta kabul ediş harmanhanalaryny bökdençsiz işletmek ugrunda zerur çäreler görülýär.

Şunuň bilen birlikde, welaýatda bugdaý ekişi dowam edip, ekiş möwsüminde oba hojalyk tehnikalary we gurallary doly güýjünde işledilýär. Ekiş geçirilen ýerlerde gögeriş suwy tutulýar. Welaýatyň güýzlük ýeralma, gök-bakja we beýleki oba hojalyk ekinleri ekilen meýdanlarynda ideg etmek, şeýle hem ýetişdirilen ekinleriň hasylyny ýygnap almak we ilata ýetirmek boýunça işler guramaçylykly alnyp barylýar. Bu işler bilen bir hatarda, welaýatda ýetişdirilen şaly hasylyny gysga wagtda ýygnap almak üçin degişli taýýarlyk işleri ýerine ýetirilýär.

Şeýle hem häkim şu ýyl welaýatda açylyp ulanmaga berilmegi meýilleşdirilýän medeni-durmuş we önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, häzirki wagtda oba hojalygynda ýaýbaňlandyrylan möwsümleýin işlere ünsi çekdi we häkime bu işleriň, hususan-da, pagta ýygymynyň we bugdaý ekişiniň depginleriniň güýçlendirilmegini hem-de agrotehniki möhletlerde geçirilmegini üpjün etmegi tabşyrdy.

Şeýle hem döwlet Baştutanymyz şu ýyl welaýatda açylyp ulanmaga berilmegi meýilleşdirilýän dürli maksatly desgalardaky gurluşyk işleriniň ýokary hilli ýerine ýetirilmegini gözegçilikde saklamagy tabşyrdy.

Soňra Mary welaýatynyň häkimi B.Orazgylyjow welaýatda dowam edýän möwsümleýin oba hojalyk işleriniň barşy barada hasabat berdi. Häkim, ilki bilen, Mary şäherinde saglygy goraýyş desgasynyň açylyp ulanmaga berilmegi mynasybetli welaýatyň ýaşaýjylarynyň adyndan Arkadagly Gahryman Serdarymyza hem-de Gahryman Arkadagymyza tüýs ýürekden hoşallyk bildirip, berk jan saglyk, uzak ömür, il-ýurt bähbitli tutumly işleriniň mundan beýläk-de rowaçlyklara beslenmegini arzuw etdi.

Soňra häkim welaýatda dowam edýän möwsümleýin oba hojalyk işleri barada hasabat berdi. Bellenilişi ýaly, şu günler welaýatyň babadaýhanlary tarapyndan ösdürilip ýetişdirilen pagta hasylyny ýitgisiz ýygnap almak boýunça zerur işler geçirilýär. Ýygym möwsüminde oba hojalyk tehnikalaryny doly güýjünde işletmäge, ýygnalan hasyly pagta arassalaýjy kärhanalarda we kabul ediş harmanhanalarynda bökdençsiz kabul etmäge aýratyn üns berilýär.

Bu işler bilen bir hatarda, welaýatda geljek ýylyň hasyly üçin bugdaý ekişini ýokary hilli we bellenen möhletlerde geçirmek, ekiş geçirilen ýerlerde gögeriş suwuny tutmak we kadaly gögeriş almak üçin zerur çäreler görülýär. Welaýatyň güýzlük ýeralma, gök-bakja we beýleki oba hojalyk ekinleri ekilen meýdanlarynda ideg hem-de ýetişdirilen hasyly ýygnap almak işleri alnyp barylýar. Gant şugundyry ekilen meýdanlarda hatarara bejergi, mineral dökünler bilen iýmitlendirmek we ösüş suwuny tutmak işleri ýerine ýetirilýär.

Şeýle hem häkim Oba milli maksatnamasyna laýyklykda, şu ýyl welaýatda açylyp ulanmaga berilmegi göz öňünde tutulýan desgalardaky gurluşyk işleriniň ýagdaýy barada hasabat berdi.

Döwlet Baştutanymyz hasabaty diňläp, pagta ýygymynyň we bugdaý ekişiniň bellenen agrotehniki möhletlerde we talabalaýyk geçirilmegini esasy wezipeleriň hatarynda kesgitledi hem-de şunuň bilen baglylykda, häkime welaýatda bu ugurda alnyp barylýan işleri yzygiderli gözegçilikde saklamagy tabşyrdy. Şeýle hem hormatly Prezidentimiz ýurdumyzy durmuş-ykdysady taýdan ösdürmäge gönükdirilen maksatnamalaryň çäklerinde welaýatda şu ýyl üçin meýilleşdirilen işleriň ýokary hilli hem-de öz wagtynda ýerine ýetirilmegini gözegçilikde saklamagy tabşyrdy.

Soňra Ministrler Kabinetiniň Başlygynyň orunbasary T.Atahallyýew ýurdumyzda dowam edýän möwsümleýin oba hojalyk işleriniň barşy barada hasabat berdi.

Bellenilişi ýaly, häzirki wagtda ýurdumyzda ýetişdirilen pagta hasylyny gysga wagtda we ýitgisiz ýygnap almak, ýygnalan hasyly pagta arassalaýjy kärhanalarda we kabul ediş harmanhanalarynda bökdençsiz kabul etmek hem-de gaýtadan işlemek boýunça zerur çäreler görülýär.

Şunuň bilen birlikde, ýurdumyz boýunça bugdaý ekişi dowam edip, ekiş möwsümini bellenen agrotehniki möhletlerde we talabalaýyk geçirmek maksady bilen degişli işler alnyp barylýar. Ekiş geçirilen meýdanlarda gögeriş suwy tutulýar.

Hormatly Prezidentimiziň ilatymyzy ýurdumyzda öndürilýän oba hojalyk önümleri bilen bolelin üpjün etmek baradaky tabşyryklaryndan ugur alnyp, welaýatlarda güýzlük ekilen azyklyk ekinleriň ýetişdirilen hasylyny ýygnap almak hem-de bu önümler bilen içerki bazarlary üpjün etmek boýunça degişli işler geçirilýär.

Ýurdumyzyň Daşoguz hem-de Lebap welaýatlarynda şaly oragy dowam edip, Mary welaýatynda bolsa gant şugundyry ekilen meýdanlarda ideg işleri alnyp barylýar.

Hormatly Prezidentimiz Serdar Berdimuhamedow hasabaty diňläp, häzirki wagtda dowam edýän möwsümleýin oba hojalyk işleriniň, hususan-da, pagta ýygymynyň we bugdaý ekişiniň öz wagtynda hem-de ýokary guramaçylykly geçirilmeginiň möhümdigini belledi we wise-premýere ýurdumyz boýunça bu ugurda alnyp barylýan işleri gözegçilikde saklamagy tabşyrdy.

Soňra döwlet Baştutanymyz iş maslahatyna gatnaşyjylara ýüzlenip, häzirki wagtda oba hojalyk pudagynda jogapkärli möwsümiň — pagta ýygymynyň hem-de bugdaý ekişiniň dowam edýändigine ýene-de bir gezek ünsi çekdi we ýygymyň depginini güýçlendirmegi, hasyly gysga wagtda we ýitgisiz ýygnap almak üçin ähli zerur işleri geçirmegi, bugdaý ekişiniň bellenen agrotehniki möhletlerde geçirilmegini, bu işlerde oba hojalyk tehnikalarynyň doly güýjünde işledilmegini üpjün etmegi tabşyrdy.

Döwlet Baştutanymyz sanly ulgam arkaly geçirilen iş maslahatyny tamamlap, oňa gatnaşanlara berk jan saglyk, maşgala abadançylygyny, alyp barýan işlerinde uly üstünlikleri arzuw etdi.