Arkadag şäheri, 7-nji oktýabr. Şu gün türkmen halkynyň Milli Lideri, Türkmenistanyň Halk Maslahatynyň Başlygy, Hormatly il ýaşulusy Gurbanguly Berdimuhamedow Arkadag şäheri boýunça iş saparyny amala aşyryp, şäheri ösdürmegiň nobatdaky tapgyrynda gurulmagy meýilleşdirilýän binalaryň şekil taslamalary, olaryň bezeg aýratynlyklaryna degişli maglumatlar bilen tanyşdy hem-de degişli ýolbaşçylaryň gatnaşmagynda iş maslahatyny geçirdi.

Gahryman Arkadagymyzyň başlangyjy we yzygiderli tagallasy bilen binýat bolan täze şäherde ähli ugurlar boýunça alnyp barylýan işleriň depgini barha güýçlenýär. Munuň özi sazlaşykly ösüş ýoluna düşen döwrebap şäherde giň möçberli şähergurluşyk-binagärlik maksatnamasynyň üstünlikli durmuşa geçirilýändiginiň aýdyň beýanydyr.

Milli Liderimiz ähli ugurlar boýunça halkara derejeli güwänamalara mynasyp bolan täze şähere gelip, ilki bilen, bu ýerde gurulmagy meýilleşdirilýän häzirki zaman desgalarynyň taslamalary we olaryň bezeg aýratynlyklary bilen tanyşdy. Häzirki döwürde Arkadag şäheriniň gurluşygynyň ikinji tapgyrynda alnyp barylýan işler döwrüň talaplaryna laýyk derejede dowam edýär.

Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow şäheriň gurluşygynyň ikinji tapgyrynda gurulmagy meýilleşdirilýän dürli maksatly binalaryň, şol sanda Çeperçilik haly kärhanasynyň taýýarlanylan taslamalary, toplumyň baş binasynyň daşky bezeg aýratynlyklary, şäheriň çäklerinde bina edilýän beýleki durmuş maksatly desgalaryň enjamlaşdyrylyşy barada hasabat berdi. Bu ýerde haly kärhanasynyň umumy görnüşi, onuň daşky bezeg aýratynlyklary, Arkadag şäheriniň täze seýilgähiniň, ýol-ulag düzümine degişli desgalaryň şekil taslamalary hem-de olaryň yşyklandyryş ulgamynyň görnüşleri görkezildi.

Mälim bolşy ýaly, täze şäheriň köp sanly ýaşaýjylarynyň ýüztutmalary we haýyşlary esasynda bu ýerde halyçylyk kärhanasyny gurmak boýunça döwlet derejesindäki çözgüt kabul edildi. Ol türkmen gelin-gyzlarynyň döreden dünýä nusgalyk el işleriniň, halyçylyk sungatynyň häzirki döwürde dowam etdirilmeginde we täze iş orunlarynyň döredilmeginde möhüm ähmiýete eýe bolar. Haly kärhanasy täze şäheriň binagärlik keşbi bilen bir bitewi sazlaşygy emele getirip, eli çeper zenanlaryň zähmetinden türkmen halylarynyň dünýä nusgalyk görnüşleriniň dokalmagynda mynasyp orun eýelär.

Gahryman Arkadagymyz görkezilen taslamalar bilen tanşyp, olara birnäçe belliklerini aýtdy. Aýratyn-da, täze kärhananyň daşky bezeginde häzirki zamanyň sanly tehnologiýalary netijeli ulanylmalydyr. Şunda yşyklandyryş ulgamynyň täzeçil usullaryna aýratyn ähmiýet berilmelidir. Şol bir wagtyň özünde haly kärhanasynyň daşky bezeginde türkmen halkynyň dünýä nusgalyk milli ýörelgeleriniň ulanylmagy, şunda paýhasly pederlerimiziň aýratyn ähmiýet beren dagdan agajy, üzärlik ýa-da beýleki keramatly hasaplanýan serişdeleriň, milli keşdeçilik sungatynyň esasy nyşany bolan “goçak” nagşynyň peýdalanylmagy maksadalaýyk bolar diýip, Milli Liderimiz belledi we bu ugra degişli meseleleri içgin öwrenmegi tabşyrdy.

Bellenilişi ýaly, bu ýerde haly kärhanasynyň bina edilmeginde çuňňur many bar. Haly sungatynyň ösdürilmegi häzirki döwrüň möhüm wezipeleriniň biri hökmünde kesgitlenendir. Şunuň bilen baglylykda, halyçylyk kärhanasynyň binagärlik aýratynlygyna, enjamlaşdyrylyşyna bolşy ýaly, onuň daşky bezegine-de hemmetaraplaýyn, milli binagärlik ýörelgeleri esasynda çemeleşilmelidir. Täze şäheriň gurluşygynyň ikinji tapgyrynda bina ediljek Çeperçilik haly kärhanasynda döredijilikli işlemek we oňaýly dynç almak, boş wagtlaryňy peýdaly geçirmek üçin ähli zerur şertleriň döredilmelidigini belläp, hormatly Arkadagymyz halyçylaryň arakesme pursatlarynda rahat dynç almaklary, olaryň dürli bedenterbiýe maşklaryny ýerine ýetirmekleri babatda zerur mümkinçilikleriň döredilmelidigini aýtdy.

Soňra Türkmenistanyň Halk Maslahatynyň Başlygy Arkadag şäheriniň çäklerinde gurulmagy göz öňünde tutulýan seýilgähiň taslamasy, onda ýerleşdirilmegi meýilleşdirilýän şekiller bilen tanşyp, olara birnäçe bellikleri aýtdy we degişli düzedişleri girizdi. Aýratyn-da, seýilgähiň çäklerinde ýerleşdiriljek oturgyçlaryň ýaramlylyk derejesine möhüm üns berilmelidir. Munuň özi adamlaryň amatly dynç alşynyň wajyp şerti bolup durýar. Türkmenistanyň at gazanan arhitektory Gahryman Arkadagymyz täze şäheriň çäklerinde gurulýan ýol-ulag düzümine degişli desgalaryň, aýratyn-da, gatnaw ýollarynyň çatrygynda oturdyljak özboluşly binalaryň şäheriň binagärlik keşbi bilen bir bitewi sazlaşygy emele getirmelidigine ünsi çekdi. Şunda halkalaýyn aýlawly ýollaryň ýanaşyk ýerleriniň abadanlaşdyrylmagyna, olaryň yşyklandyryş ulgamynyň ýokary derejede bolmagyna möhüm ähmiýet berilmelidir. Milli Liderimiz bu ýerde goýuljak mermer we granit daşlarynyň reňkleriniň desganyň yşyklandyryş ulgamy bilen sazlaşmalydygyny belledi hem-de bu işleriň binagärlik, ekologiýa babatda halkara güwänamalara mynasyp bolan Arkadag şäheriniň häzirki zaman derejesine laýyk gelmelidigine ünsi çekdi.

Hormatly Arkadagymyz täze şäheriň gurluşygynyň ýokary hil derejesine laýyk gelmelidigini belledi. Şunda dünýäniň ösen tejribesi, täzeçil tehnologiýalar netijeli ulanylmalydyr. Şäher gurluşygynda alnyp barylýan işlerde ekologik meselä aýratyn orun degişli bolmalydyr we bu meseleler yzygiderli gözegçilikde saklanylmalydyr.

Soňra Türkmenistanyň Halk Maslahatynyň Başlygy Gurbanguly Berdimuhamedow bu ýerde Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazowyň we Arkadag şäheriniň häkimi G.Mämmedowanyň gatnaşmagynda iş maslahatyny geçirdi. Onda häzirki döwürde Arkadag şäherinde VI Wena balyny geçirmäge görülýän taýýarlyk işleri barada hasabat berildi. Bellenilişi ýaly, ýurdumyz ähli ugurlarda bolşy ýaly, medeniýet ulgamynda-da halkara ähmiýetli çäreleriň geçirilýän merkezine öwrüldi. Arkadag şäherinde nobatdaky Wena balyny geçirmek baradaky çözgüdiň kabul edilmegi bolsa täze şäheriň dünýä ähmiýetli dabaralaryň geçirilýän merkezi hökmündäki derejesini tassyklaýar.

Iş maslahatynyň dowamynda Birleşen Milletler Guramasynyň Bilim, ylym we medeniýet meseleleri boýunça guramasy (ÝUNESKO) tarapyndan Türkmenistanyň hödürnamasy esasynda ahalteke atçylyk sungatynyň we atlary bezemek däpleriniň ÝUNESKO-nyň Adamzadyň maddy däl medeni mirasynyň sanawyna goşulandygyny tassyklaýan güwänamanyň ýakyn günlerde Arkadag şäherine gowşuryljakdygy barada habar berildi. Munuň özi ahalteke bedewleriniň gadymy mekany bolan ýurdumyzda bedewleriň arassa ganlylygyny saklamak, olary milli seýisçilik däpleri esasynda idetmek we atlaryň baş sanyny artdyrmak, ahalteke bedewleriniň dünýädäki şöhratyny belende götermek babatda alnyp barylýan işleriň halkara derejede ykrar edilýändiginiň aýdyň beýanydyr.

Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow ýurdumyzyň wekiliýetiniň Bütindünýä pul gaznasynyň maslahatyna gatnaşmaga çagyrylandygy barada aýdyp, şeýle ýokary derejeli maslahatlara gatnaşmaga döredýän mümkinçilikleri we hemmetaraplaýyn goldawlary üçin Arkadagly Gahryman Serdarymyza çuňňur hoşallygyny ýetirmegi Gahryman Arkadagymyzdan haýyş etdi. Häzirki wagtda bu sapara ýokary derejede taýýarlyk görülýär. Bellenilişi ýaly, Bütindünýä pul gaznasynyň nobatdaky maslahatynda ekologiýa, “akylly” şäher konsepsiýasy, lukmançylyk we oba hojalyk klasterlerine maýa goýum serişdelerini gönükdirmek ýaly meseleler ara alnyp maslahatlaşylar. Bu iri maslahatda Arkadag şäheriniň maýa goýum maksatnamasy, maslahat beriş ulgamy we ynsanperwerlik goldawlary ýaly ugurlar boýunça pikir alyşmalar hem bolar.

Şeýle-de maslahatyň dowamynda täze şäherde alnyp barylýan işler, öňde boljak şanly seneleri mynasyp derejede dabaralandyrmak boýunça görülýän taýýarlyk, Arkadag şäherindäki giň möçberli işleri yzygiderli gözegçilikde saklamak babatda edilýän tagallalar barada hasabatlar berildi.

Gahryman Arkadagymyz täze şäherde geçiriljek halkara çärelere, şol sanda Bitaraplyk baýramyna görülýän taýýarlyk işleriniň häzirki zaman talaplaryna laýyk derejede bolmalydygyny belläp, meýilleşdirilen çärelerde Arkadag şäheriniň hemmetaraplaýyn sazlaşykly ösüşiniň, bu ýerde alnyp barylýan işleriň geriminiň we ähmiýetiniň, şäheriň ilatynyň bagtyýar durmuşynyň öz beýanyny tapmalydygyny aýtdy. Aýratyn-da, ahalteke atçylyk sungatynyň we atlary bezemek däpleriniň ÝUNESKO-nyň abraýly sanawyna girizilendigini tassyklaýan güwänamany gowşurmak çäresine, Bütindünýä pul gaznasynyň nobatdaky maslahatyna ýokary derejede taýýarlyk görülmelidir. Bütindünýä pul gaznasynyň Arkadag şäheriniň mundan beýläk-de ösdürilmegine, onuň çäklerinde tutuş dünýä ähmiýetli önümçilik toplumlarynyň gurluşygyna maýa goýum serişdelerini gönükdirmäge uly gyzyklanma bildirýändigi aýdyldy. Munuň özi Arkadag şäheriniň ýokary ekologik derejesiniň, bu ýerde ösen tejribeleriň, täzeçil tehnologiýalaryň netijeli ulanylýandygynyň ykrarnamasydyr.

Arkadag şäheriniň halkara sylaglaryň 21-sine mynasyp bolmagy, şeýle hem ýakynda Koreýa Respublikasynda geçirilen halkara sergide täze şähere ýokary derejeli baýraklaryň ýene-de üçüsiniň gowşurylmagy bu ýerde alnyp barylýan işleriň dünýä giňişliginde hemmetaraplaýyn ykrar edilýändiginiň nobatdaky güwäsidir. Şular barada aýtmak bilen, Gahryman Arkadagymyz Bütindünýä pul gaznasynyň nobatdaky maslahatynda Arkadag şäherinde alnyp barylýan işleriň derejesiniň we ähmiýetiniň doly görnüşde beýan edilmelidiginiň, onda ýaýbaňlandyrylan özgertmeleriň häzirki zamanyň ösen tejribesine, ýokary halkara görkezijilere laýyk amala aşyrylmalydygynyň wajypdygyna ünsi çekdi. Türkmen halkynyň Milli Lideri täze şäherde gurulýan desgalaryň gurluşygynda we olaryň timarlaýyş, bezeg işlerinde ýokary hilli serişdeleriň ulanylmalydygyny belledi. Şol serişdeler ýurdumyzyň howa şertlerini, ekologik, bezeg ýagdaýlaryny nazara almak bilen, olaryň berkligi, amatlylygy göz öňünde tutulyp seçilip alynmalydyr. Şeýle hem Arkadag şäherinde geçirilýän köpçülikleýin çärelerde, şanly seneleriň hormatyna guralýan dabaralarda ähli ugurlar boýunça gazanylýan üstünlikler öz beýanyny tapmalydyr.

Gahryman Arkadagymyz iş maslahatyny jemläp, hemmelere öňde durýan wezipeleri netijeli ýerine ýetirmekde üstünlik arzuw etdi we bu ýerden ugrady.

Aşgabat, 5-nji oktýabr. Şu gün Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Serdar Berdimuhamedow Döwlet howpsuzlyk geňeşiniň nobatdaky mejlisini geçirdi. Mejlisiň gün tertibine harby we hukuk goraýjy edaralaryň şu ýylyň ýanwar — sentýabr aýlarynda ýerine ýetiren işleriniň netijeleri, Garaşsyz Türkmenistanda howpsuzlygy, parahatçylygy üpjün etmek, bu düzümleriň maddy-enjamlaýyn binýadyny pugtalandyrmak, olaryň işini mundan beýläk-de kämilleşdirmek bilen bagly meseleler girizildi.

Ilki bilen, Döwlet howpsuzlyk geňeşiniň sekretary, goranmak ministri B.Gündogdyýew hasabat döwründe ýolbaşçylyk edýän düzümlerinde alnyp barlan işleriň netijeleri, ýurdumyzyň goranyş ukybyny pugtalandyrmak, Ýaragly Güýçlerimiziň serkerdeler düzüminiň hünärini ýokarlandyrmak boýunça görülýän çäreler barada hasabat berdi. Şeýle hem harby gullukçylaryň gullugy, ýaşaýyş-durmuşy üçin döredilýän şertler, çagyryş boýunça harby gullugy geçýän harby gullukçylary harby gullukdan boşatmak we harby gulluga çagyrmak babatda geçirilýän işler barada aýdyldy.

Döwlet howpsuzlyk geňeşiniň sekretary, goranmak ministri Watanymyzyň Garaşsyzlygynyň 33 ýyllygy mynasybetli geçirilen dabaraly harby ýörişiň netijeleri barada-da hasabat berdi. Şunuň bilen birlikde, hasabat döwründe döwlet Baştutanymyzyň gatnaşmagynda ýaş Watan goragçylaryny taýýarlamak üçin ähli mümkinçilikler bilen üpjün edilen Türkmenistanyň Goranmak ministrliginiň Berdimuhamet Annaýew adyndaky Ýöriteleşdirilen harby mekdebiniň täze binalar toplumynyň açylyş dabarasynyň geçirilendigi aýdyldy.

Hormatly Prezidentimiz hasabaty diňläp, ýurdumyzyň Ýaragly Güýçleriniň döwrüň talabyna görä kämilleşdirilmeginiň hem-de goşunlaryň ähli kysymlarynyň maddy-enjamlaýyn binýadynyň döwrebaplaşdyrylmagynyň goranyş häsiýetine eýe bolan Türkmenistanyň Harby doktrinasynyň çäklerinde amala aşyrylýan özgertmeleriň ileri tutulýan ugurlarynyň biridigini belledi. Şunuň bilen baglylykda, çagyryş boýunça harby gullugy geçýän harby gullukçylaryň harby gullukdan boşadylmagynyň we Türkmenistanyň raýatlarynyň harby gulluga nobatdaky çagyrylyşynyň talabalaýyk derejede geçirilmegini üpjün etmek barada görkezme berildi.

Ýurdumyzyň Ýaragly Güýçleriniň Belent Serkerdebaşysy ugurdaş ýokary okuw mekdeplerinde serkerdeleri taýýarlamak işlerini wajyp wezipeleriň hatarynda görkezdi. Hormatly Prezidentimiz harby we hukuk goraýjy edaralarda gulluk edýän ýaşlary watançylyk ruhunda terbiýelemegiň ähmiýeti barada aýdyp, Döwlet howpsuzlyk geňeşiniň sekretary, goranmak ministrine birnäçe tabşyryklary berdi.

Baş prokuror B.Muhamedow şu ýylyň ýanwar — sentýabr aýlarynda ähli ulgamlarda kanunylygyň berjaý edilişine berk hem takyk gözegçiligiň amala aşyrylmagy ugrunda görlen çäreler barada hasabat berdi. Şeýle hem döwlet Baştutanymyzyň tabşyrygy esasynda kadalaşdyryjy hukuk namalarynyň düzgünleriniň berjaý edilişine geçirilen barlaglaryň netijeleri, ýolbaşçylyk edýän düzümleriniň işine sanly tehnologiýalaryň, öňdebaryjy usullaryň ornaşdyrylyşy barada aýdyldy.

Hormatly Prezidentimiz hasabaty diňläp, kanun bozulmalary, olary döredýän sebäpleri aradan aýyrmak maksady bilen, anyk çäreleriň görülmeginiň zerurdygyna ünsi çekdi. Ýurdumyzyň Ýaragly Güýçleriniň Belent Serkerdebaşysy hukuk tertibini pugtalandyrmakda harby we hukuk goraýjy hem-de beýleki edaralar bilen sazlaşykly işlemegiň möhümdigini belläp, Baş prokurora birnäçe anyk tabşyryklary berdi.

Içeri işler ministri M.Hydyrow jemgyýetçilik tertibini üpjün etmek, düzgün bozulmalaryň öňüni almak, ýangyn howpsuzlyk gullugynyň işini döwrüň talaplaryna laýyklykda guramak maksady bilen, şu ýylyň dokuz aýynda ýerine ýetirilen işleriň netijeleri barada hasabat berdi. Şeýle hem “Ýol hereketiniň howpsuzlygy — ömrümiziň rahatlygy” şygary astynda geçirilen biraýlygyň çäklerinde guralan çäreler hakynda aýdyldy. Mundan başga-da, Ahal, Balkan, Mary, Lebap welaýatlarynyň birnäçe etraplarynda IIM-niň Polisiýa müdirlikleriniň awtoulaglaryň tehniki ýagdaýyny anyklaýyş we hasaba alyş toparlarynyň döwrebap edara binalarynyň ulanmaga berlendigi aýdyldy.

Döwlet Baştutanymyz hasabaty diňläp, ýurdumyzda kanunylygy we jemgyýetçilik tertibini goramak, ýol hereketiniň hem-de ýangyn howpsuzlygynyň kadalaryny berk berjaý etmek boýunça işleriň degişli derejede geçirilmelidigini aýtdy. Içeri işler ministrliginiň ähli düzümleriniň maddy-enjamlaýyn binýadyny mundan beýläk-de pugtalandyrmak üçin anyk çäreleri görmegiň wajypdygyny belläp, ýurdumyzyň Ýaragly Güýçleriniň Belent Serkerdebaşysy içeri işler ministrine degişli görkezmeleri berdi.

Ýokary kazyýetiň başlygy B.Hojamgulyýew hasabat döwründe ýolbaşçylyk edýän düzüminde ýerine ýetirilen işler, ony ösdürmegiň maksatnamasynyň durmuşa geçirilişi, kazylaryň netijeli işlemegi üçin döredilýän şertler barada hasabat berdi. Şeýle hem hormatly Prezidentimiziň ozal beren tabşyryklarynyň ýerine ýetirilişi, Mary welaýatynyň Garagum etrap kazyýetiniň döwrebap binasynyň açylandygy barada aýdyldy.

Döwlet Baştutanymyz hasabaty diňläp, kazyýet ulgamynda amala aşyrylýan özgertmeleriň ähmiýetine ünsi çekdi. Öňde durýan wezipeleri üstünlikli çözmek üçin innowasion tehnologiýalary işjeň ulanmak, bu düzümiň işgärleriniň hünär derejesini yzygiderli ýokarlandyrmak zerurdyr diýip, ýurdumyzyň Ýaragly Güýçleriniň Belent Serkerdebaşysy aýtdy we Ýokary kazyýetiň ýolbaşçysyna ilat arasynda, edara-kärhanalarda, guramalarda, köpçülikleýin habar beriş serişdelerinde milli kanunçylygyň düzgünleri barada wagyz-nesihat işlerini alyp barmagy tabşyrdy.

Soňra milli howpsuzlyk ministri N.Atagaraýew döwletimizde amatly jemgyýetçilik ýagdaýyny üpjün etmek maksady bilen ýylyň başyndan bäri geçirilen işler barada hasabat berdi. Şeýle hem Milli howpsuzlyk ministrliginiň wezipelerini üstünlikli ýerine ýetirmek üçin döwrebap tehniki serişdeleri we usullary ulanmak boýunça görülýän çäreler barada aýdyldy.

Hormatly Prezidentimiz hasabaty diňläp, degişli ösüş maksatnamasynyň durmuşa geçirilmegine aýratyn üns bermegiň zerurdygyny nygtady. Döwlet Baştutanymyz beýleki hukuk goraýjy edaralar bilen sazlaşykly işleşmegiň, işgärler mümkinçiligini berkitmegiň möhümdigini belläp, ministrligiň ýolbaşçysyna birnäçe görkezmeleri berdi.

Döwlet serhet gullugynyň başlygy Ý.Nuryýew hasabat döwründe Watanymyzyň mukaddes serhetleriniň eldegrilmesizligini üpjün etmek, serhet goşunlarynyň maddy-enjamlaýyn binýadyny döwrebaplaşdyrmak, ýurdumyzyň Ýaragly Güýçleriniň Belent Serkerdebaşysynyň tabşyryklaryny ýerine ýetirmek boýunça amala aşyrylan işler barada hasabat berdi.

Hormatly Prezidentimiz hasabaty diňläp, Watanymyzyň serhetlerini ygtybarly goramagyň wajypdygyna ünsi çekdi. Serhet galalarynyň işini mundan beýläk-de kämilleşdirmek, harby gullukçylaryň netijeli gulluk etmegi üçin amatly şertleri döretmek möhüm wezipeleriň hatarynda görkezildi. Döwlet serhet gullugynyň ýolbaşçysyna serkerdeleriň hünär derejesini ýokarlandyrmak üçin zerur çäreleri görmek hem tabşyryldy.

Adalat ministri M.Taganow milli kanunçylyk binýadyny döwrüň talaplaryna laýyk getirmek, raýatlaryň hukuk medeniýetini ýokarlandyrmak, ilata talabalaýyk hukuk kömegini bermek ugrunda şu ýylyň ýanwar — sentýabr aýlarynda ýerine ýetirilen işler barada hasabat berdi.

Ýurdumyzyň Ýaragly Güýçleriniň Belent Serkerdebaşysy hasabaty diňläp, kanun çykaryjylyk babatda bitewi döwlet syýasatynyň yzygiderli durmuşa geçirilmegini wajyp ugurlaryň hatarynda görkezdi. Hormatly Prezidentimiz Serdar Berdimuhamedow raýatlarymyzyň hukuk medeniýetini ýokarlandyrmagyň möhümdigine aýratyn ünsi çekip, ministre hukuk bozulmalarynyň öňüni almak hem-de her bir raýatyň öz hukuklaryna, borçlaryna doly düşünmegini gazanmak üçin ilat arasynda wagyz-nesihat, düşündiriş işlerini yzygiderli geçirmegi dowam etdirmegi tabşyrdy.

Döwlet gümrük gullugynyň başlygy M.Hudaýkulyýew şu ýylyň dokuz aýynda ýerine ýetirilen işleriň netijeleri, ýurdumyzyň serhetleriniň üstünden geçýän ýükleriň kadaly geçirilmegini üpjün etmek boýunça görlen çäreler barada hasabat berdi.

Döwlet Baştutanymyz hasabaty diňläp, Ýewraziýa sebitinde üstaşyr ulag geçelgeleriniň möhüm çatrygy hökmünde ýurdumyzyň geostrategik ornunyň artýandygy bilen baglylykda, bu edaranyň işiniň geriminiň giňeýändigini aýtdy. Munuň özi gümrük serhedi arkaly ýükleriň geçirilmeginiň tertibine berk gözegçilik edilmegini talap edýär. Şunuň bilen baglylykda, gullugyň ýolbaşçysyna gümrük serhedinden geçirilýän harytlary ygtybarly gözegçilikden geçirip, harytlaryň hiliniň bellenen talaplara doly laýyk gelýändigini hemişelik üns merkezinde saklamak barada görkezmeler berildi.

Döwlet migrasiýa gullugynyň başlygy A.Sazakow bu düzümiň ösüş maksatnamasyny üstünlikli durmuşa geçirmek üçin ýylyň başyndan bäri geçirilen toplumlaýyn işler barada hasabat berdi. Şeýle hem sanly ulgamy, öňdebaryjy tejribäni ornaşdyrmagyň hasabyna gullugyň maddy-enjamlaýyn binýadyny döwrebaplaşdyrmak boýunça görülýän çäreler barada aýdyldy.

Hormatly Prezidentimiz hasabaty diňläp, bu gullugyň esasy maksadynyň döwletimiziň özygtyýarlylygyny pugtalandyrmaga hemmetaraplaýyn ýardam etmekden ybaratdygyny belledi. Bu ulgamda dünýä tejribesini işjeň özleşdirmegiň, işgärleriň hünär derejesini ýokarlandyrmagyň hasabyna geçirilýän işleri kämilleşdirmäge aýratyn üns bermek zerurdyr diýip, döwlet Baştutanymyz aýtdy we degişli görkezmeleri berdi.

Ýurdumyzyň Ýaragly Güýçleriniň Belent Serkerdebaşysy mejlisi jemläp, diňe goranyş häsiýetine eýe bolan Harby doktrina laýyklykda, hemişelik Bitarap ýurdumyzyň howpsuzlygyny we bitewüligini üpjün etmek boýunça netijeli çäreleriň görülýändigini belledi. Döwletimiziň goranyş ukybyny pugtalandyrmaga, Watan goragçylarynyň, olaryň maşgala agzalarynyň ýaşaýyş-durmuş şertlerini gowulandyrmaga uly ähmiýet berilýär diýip, döwlet Baştutanymyz aýtdy we bu ugurdaky işleriň mundan beýläk-de dowam etdiriljekdigini belledi.

Döwlet howpsuzlyk geňeşiniň mejlisinde başga-da birnäçe meselelere garaldy we olar boýunça degişli çözgütler kabul edildi.

Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Serdar Berdimuhamedow mejlisi tamamlap, oňa gatnaşanlara berk jan saglyk, halkymyzyň parahat hem-de bagtyýar durmuşynyň bähbidine alyp barýan jogapkärli gulluklarynda uly üstünlikleri arzuw etdi.

Aşgabat, 4-nji oktýabr. Şu gün hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda şu ýylyň dokuz aýynda ykdysadyýetimiziň pudaklarynda alnyp barlan işleriň jemleri jemlenildi hem-de öňde durýan wezipeler kesgitlenildi.

Ilki bilen, Mejlisiň Başlygy D.Gulmanowa çykyş edip, şu ýylyň ýanwar — sentýabr aýlarynda ýerine ýetirilen işler barada maglumat berdi.

Bellenilişi ýaly, geçen dokuz aýyň dowamynda Türkmenistanyň Kanunlarynyň 23-si, hususan-da, “Türkmenistanyň “Magtymguly Pyragynyň 300 ýyllygyna” atly ýubileý medalyny döretmek hakynda”, “Magtymguly Pyragynyň medeni mirasy hakynda”, “Energiýany tygşytlamak we energiýadan netijeli peýdalanmak hakynda”, “Gidrometeorologiýa işi hakynda” Kanunlar, ýurdumyzyň daşary syýasat başlangyçlaryny hukuk taýdan goldamak bilen baglanyşykly başga-da birnäçe Kanunlar kabul edildi. Şeýle hem hereket edýän kanunlary Türkmenistanyň Konstitusiýasynyň düzgünlerine, halkara hukugyň kadalaryna laýyk getirmek maksady bilen, Raýat, Maşgala, Býujet, Zähmet, Ilaty durmuş taýdan goramak, Sanitariýa kodekslerine we başga-da birnäçe kanunlara degişli üýtgetmeleridir goşmaçalary girizmek bilen baglanyşykly Kanunlar, Mejlisiň kararlarynyň 18-si kabul edildi.

Türkmenistanyň Prezidentiniň ýanyndaky Döwlet gullugy akademiýasynyň diňleýjileri üçin deputatlaryň gatnaşmagynda kanun çykaryjylyk işiniň döwrebap usullary we ýörelgeleri boýunça okuw sapaklary guraldy. Ýylyň başyndan bäri daşary döwletleriň Türkmenistandaky Adatdan daşary we Doly ygtyýarly ilçileriniň 14-sinden ynanç hatlary kabul edildi. Daşary ýurtlaryň parlamentleri we halkara guramalar bilen gatnaşyklary pugtalandyrmagyň çäklerinde duşuşyklaryň 30-dan gowragy geçirildi. Deputatlar kanun çykaryjylyk işini kämilleşdirmek hem-de döwlet maksatnamalarynyň ýerine ýetirilmegini üpjün etmek meseleleri boýunça maslahatlaryň 91-sine gatnaşdylar. Kanun çykaryjylyk işinde tejribe alyşmak maksady bilen, daşary ýurtlara iş saparlarynyň 28-si guraldy. Şeýle-de Watanymyzda gazanylýan beýik ösüşleri, täze taryhy döwürde öňde goýlan maksatlary giňden wagyz etmek, kabul edilýän kanunlaryň many-mazmunyny halk köpçüligine düşündirmek üçin deputatlaryň ençeme çärelere gatnaşýandyklary barada aýdyldy.

Hormatly Prezidentimiz Serdar Berdimuhamedow kanunçylyk ulgamyny döwrebaplaşdyrmagyň we ykdysadyýetimizi mundan beýläk-de pugtalandyrmagyň möhüm ähmiýete eýedigini belledi. Şunuň bilen baglylykda, döwlet Baştutanymyz ýurdumyzyň kanunçylygyny kämilleşdirmegi dowam etdirmegiň wajypdygyna ünsi çekdi.

Ministrler Kabinetiniň Başlygynyň orunbasary H.Geldimyradow şu ýylyň ýanwar — sentýabr aýlarynda ýurdumyzda gazanylan makroykdysady görkezijiler barada hasabat berdi.

Maksatnamalaýyn çäreleriň üstünlikli durmuşa geçirilmegi netijesinde, şu ýylyň dokuz aýynda jemi içerki önüm 6,3 göterim artdy. Bu görkeziji senagat pudagynda 3,5 göterime, gurluşykda 9,3 göterime, ulag-aragatnaşyk pudagynda 6,8 göterime, söwdada 9 göterime, oba hojalygynda 5,2 göterime, hyzmatlar ulgamynda 7,5 göterime deň boldy. 2023-nji ýylyň degişli döwri bilen deňeşdirilende, jemi öndürilen önüm 11,7 göterim artdy. Geçen ýylyň degişli döwri bilen deňeşdirilende, şu ýylyň üç çärýeginde bölek satuw haryt dolanyşygy 11,2 göterim köpeldi. Daşary söwda dolanyşygynda hem oňyn görkezijiler gazanyldy. Döwlet býujetiniň girdeji bölegi 102,4 göterim, çykdajy bölegi 97,7 göterim ýerine ýetirildi. Ýurdumyzyň iri we orta kärhanalarynda ortaça aýlyk zähmet haky, 2023-nji ýylyň degişli döwrüne görä, 10,5 göterim ýokarlandy. Zähmet haklary, pensiýalar, döwlet kömek pullary, talyp haklary öz wagtynda maliýeleşdirildi. Maliýeleşdirmegiň ähli çeşmeleriniň hasabyna özleşdirilen düýpli maýa goýumlaryň möçberi, geçen ýylyň degişli döwri bilen deňeşdirilende, 16,6 göterim artdy. Şeýle hem “Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna” laýyklykda gurulmagy we durky täzelenilmegi meýilleşdirilen desgalar boýunça ýerine ýetirilen işler barada aýdyldy.

Döwlet Baştutanymyz hasabaty diňläp, «Türkmenistany 2025-nji ýylda durmuş-ykdysady taýdan ösdürmegiň we maýa goýum Maksatnamasynyň», şeýle hem geljek ýylyň Döwlet býujetiniň taslamalaryny seljermegiň möhümdigini nygtady. Şunuň bilen birlikde, wise-premýere bu ugurda alnyp barylýan işleriň netijeliligini ýokarlandyrmak boýunça zerur çäreleri görmek tabşyryldy.

Soňra Ministrler Kabinetiniň Başlygynyň orunbasary B.Amanow gözegçilik edýän ýangyç-energetika toplumynda 2024-nji ýylyň ýanwar — sentýabr aýlarynda ýerine ýetirilen işleriň netijeleri barada hasabat berdi. Nebiti we gaz kondensatyny çykarmak babatda gazanylan tehniki-ykdysady görkezijiler hakynda-da aýdyldy.

Bellenilişi ýaly, “Türkmennebit” döwlet konserni tarapyndan nebit çykarmagyň meýilnamasy 102,6 göterime deň boldy. Şu ýylyň dokuz aýynda nebiti gaýtadan işleýän zawodlar tarapyndan nebiti gaýtadan işlemegiň meýilnamasy 104,1 göterim, benzin öndürmegiň meýilnamasy 106,9 göterim, çalgy ýaglaryny öndürmegiň meýilnamasy 105,9 göterim, tebigy we ugurdaş gazy çykarmagyň meýilnamasy 100,3 göterim, mawy ýangyjy daşary ýurtlara ibermegiň meýilnamasy 101,7 göterim ýerine ýetirildi. Şunuň bilen bir hatarda, dizel ýangyjyny, polipropilen, suwuklandyrylan gazy öndürmek boýunça gazanylan tehniki-ykdysady görkezijiler barada aýdyldy.

Hormatly Prezidentimiz hasabaty diňläp, nebitgaz pudagynyň kärhanalaryny we önümçiliklerini doly güýjünde, durnukly işletmek üçin toplumyň işini yzygiderli kämilleşdirip durmagyň wajypdygyny nygtap, wise-premýere bu babatda birnäçe anyk tabşyryklary berdi.

Ministrler Kabinetiniň Başlygynyň orunbasary T.Atahallyýew gözegçilik edýän pudaklarynda şu ýylyň dokuz aýynda ýerine ýetirilen işleriň netijeleri, ýurdumyzyň welaýatlaryndaky möwsümleýin oba hojalyk işleri barada hasabat berdi.

Bellenilişi ýaly, oba hojalyk pudagynda önümçiligiň ösüş depgini, geçen ýylyň degişli döwri bilen deňeşdirilende, 126,3 göterime, şol sanda Oba hojalyk ministrligi boýunça 101,9 göterime, Daşky gurşawy goramak ministrligi boýunça 120,1 göterime, Suw hojalygy baradaky döwlet komiteti boýunça 142,4 göterime, “Türkmenpagta” döwlet konserni boýunça 100 göterime, “Türkmengallaönümleri” döwlet birleşigi boýunça 226,4 göterime, “Türkmenobahyzmat” döwlet birleşigi boýunça 119,8 göterime, Azyk senagaty döwlet birleşigi boýunça 100,2 göterime, Maldarçylyk we guşçulyk senagaty döwlet birleşigi boýunça 100,7 göterime, “Türkmen atlary” döwlet birleşigi boýunça 102,4 göterime barabar boldy. Maýa goýum serişdelerini özleşdirmegiň meýilnamasy 340,6 göterim ýerine ýetirildi.

Häzirki wagtda ýurdumyzyň welaýatlarynda bugdaý ekişini bellenen möhletlerde we talabalaýyk geçirmek, ýetişdirilen pagta, şaly hasylyny ýygnap almak boýunça degişli işleriň alnyp barylýandygy aýdyldy. Şunuň bilen bir hatarda, mallaryň baş sanyny artdyrmak, olaryň önüm berijiligini ýokarlandyrmak maksady bilen, maldarçylyk hojalyklarynda mallar üçin ot-iýmleriň ätiýaçlyk gorlaryny döretmek işleri dowam edýär. Ekerançylyk meýdanlarynyň suw üpjünçiligini, ýerleriň melioratiw ýagdaýyny gowulandyrmak üçin suwaryş we şor suw akabalaryny arassalamak boýunça degişli işler geçirilýär.

Hormatly Prezidentimiz Serdar Berdimuhamedow hasabaty diňläp, ýurdumyzda alnyp barylýan oba hojalyk işlerini berk gözegçilikde saklamagyň zerurdygyna ünsi çekdi. Döwlet Baştutanymyz pagta ýygymynyň depginini güýçlendirmegiň, oba hojalyk tehnikalaryny netijeli peýdalanmagyň, bugdaý ekişini agrotehniki möhletlerde geçirmek boýunça zerur işleri alyp barmagyň, oba hojalyk pudagynyň kärhanalaryny doly güýjünde işletmek üçin öz wagtynda zerur çäreleri görmegiň wajypdygyny nygtady. Hormatly Prezidentimiz ýokary hilli oba hojalyk önümlerini öndürýän döwrebap önümçilikleri döretmegi dowam etdirmegiň, mallaryň we guşlaryň baş sanyny artdyrmagyň, tohumçylyk işini ylmy taýdan guramak boýunça zerur işleri geçirmegiň möhümdigini aýdyp, wise-premýere birnäçe anyk tabşyryklary berdi.

Ministrler Kabinetiniň Başlygynyň orunbasary B.Annamämmedow şu ýylyň ýanwar — sentýabr aýlarynda gurluşyk we senagat toplumy tarapyndan ýerine ýetirilen işleriň netijeleri barada hasabat berdi.

Bellenilişi ýaly, hasabat döwründe toplum tarapyndan öndürilen önümleriň hem-de ýerine ýetirilen işleriň meýilnamasy 110,5 göterim boldy. Ýylyň başyndan bäri Gurluşyk we binagärlik ministrligi boýunça işleriň meýilnamasy 106,4 göterim ýerine ýetirildi. Senagat we gurluşyk önümçiligi ministrligi tarapyndan öndürilen önümleriň, ýerine ýetirilen işleriň möçberi 1 milliard 302 million manada deň boldy. Hasabat döwründe Energetika ministrligi boýunça öndürilen önümleriň, ýerine ýetirilen işleriň meýilnamasy 104,7 göterime, “Türkmenhimiýa” döwlet konserni boýunça 125,6 göterime deň boldy. Şu ýylyň ýanwar — sentýabr aýlarynda Awtomobil ýollarynyň gurluşygyny dolandyrmak baradaky döwlet agentligi boýunça ýerine ýetirilen işleriň meýilnamasy 114 göterim, Aşgabat şäheriniň häkimligi boýunça 137,1 göterim berjaý edildi.

Hormatly Prezidentimiz hasabaty diňläp, ýurdumyzyň gurluşyk we senagat toplumynyň kärhanalaryny taslama kuwwatyna çykarmak boýunça toplumlaýyn çäreleri görmegi dowam etdirmegiň möhümdigini belledi. Bilelikdäki kärhanalary, önümçilikleri ýola goýup, täze iş orunlaryny döretmek boýunça işleri ilerletmek wajyp wezipeleriň hatarynda görkezildi. Döwlet Baştutanymyz wise-premýere 2024-nji ýylda açylyp ulanmaga berilmeli binalaryň we desgalaryň, ýaşaýyş jaýlarynyň gurluşygynyň bellenen möhletlerde tamamlanmagyna berk gözegçilik etmegi tabşyrdy.

Ministrler Kabinetiniň Başlygynyň orunbasary B.Atdaýew gözegçilik edýän ministrliklerinde, pudaklaýyn dolandyryş edaralarynda, telekeçilik ulgamynda şu ýylyň ýanwar — sentýabr aýlarynda alnyp barlan işleriň netijeleri barada hasabat berdi.

Söwda we daşary ykdysady aragatnaşyklar ministrligi boýunça söwda dolanyşygynyň ösüş depgini, geçen ýylyň degişli döwri bilen deňeşdirilende, 102,1 göterime, öndürilen önümleriň ösüş depgini 103,1 göterime barabar boldy. Dokma senagaty ministrligi boýunça, geçen ýylyň degişli döwri bilen deňeşdirilende, nah ýüplügiň öndürilişi 144,4 göterime, nah matalar 128,4 göterime, tikin we trikotaž önümleri 100,3 göterime, gön önümleri 124,6 göterime barabar boldy. “Türkmenhaly” döwlet birleşigi boýunça önüm öndürmegiň meýilnamasy 100,2 göterim ýerine ýetirildi. Döwlet haryt-çig mal biržasy tarapyndan hasabat döwründe 225 birža söwdasy geçirilip, olarda 21 müň 378 şertnama hasaba alyndy. Dokuz aýda Söwda-senagat edarasy boýunça ýerine ýetirilen işleriň ösüş depgini 103,4 göterime barabar boldy. Hasabat döwründe sergileriň 17-si, maslahatlaryň 96-sy geçirildi. Senagatçylar we telekeçiler birleşmesi boýunça oba hojalyk we azyk önümlerini öndürmegiň ösüş depgini 109,5 göterime, senagat önümleriniň ösüş depgini 104 göterime deň boldy.

Hormatly Prezidentimiz hasabaty diňläp, ýurdumyzda ýokary hilli harytlary öndürmek boýunça alnyp barylýan işlere berk gözegçilik etmegiň wajypdygyna ünsi çekdi. Şeýle hem döwlet Baştutanymyz Senagatçylar we telekeçiler birleşmesi tarapyndan harytlaryň eksportyny artdyrmak babatda zerur işleri geçirmegiň möhümdigini belläp, wise-premýere bu babatda anyk tabşyryklary berdi.

Ministrler Kabinetiniň Başlygynyň orunbasary M.Mämmedowa şu ýylyň ýanwar — sentýabr aýlarynda gözegçilik edýän düzümlerinde ýerine ýetirilen işleriň netijeleri barada hasabat berdi.

Bellenilişi ýaly, hasabat döwründe welaýatlarda, Aşgabat we Arkadag şäherlerinde şanly seneler, Magtymguly Pyragynyň doglan gününiň 300 ýyllygy, medeni-durmuş maksatly desgalaryň açylyp ulanmaga berilmegi mynasybetli dürli çäreler geçirildi. “Ýaňlan, Diýarym!” telebäsleşiginiň jemleýji tapgyry geçirildi, Türkmenistanyň Prezidentiniň “Türkmeniň Altyn asyry” atly baýragyny almak ugrundaky bäsleşigiň jemleri jemlenildi. Hasabat döwründe Watanymyzyň Garaşsyzlygynyň 33 ýyllygy mynasybetli dabaralar, konsertler, sergiler we beýleki medeni çäreler guraldy. Halkara hyzmatdaşlygyň çäklerinde-de dürli çäreler geçirilip, türkmen hünärmenleri daşary ýurtlarda iş saparlarynda boldular. Şu ýylyň 1-nji sentýabrynda Türkmenistanyň we Täjigistan Respublikasynyň döwlet Baştutanlarynyň sanly ulgam arkaly gatnaşmaklarynda dostlukly ýurduň Hatlon welaýatynyň Dusti etrabynda Magtymguly adyndaky umumybilim berýän orta mekdebiň binalar toplumynyň açylyş dabarasynda iki ýurduň sungat ussatlarynyň çykyşlary guraldy. Ýurdumyzyň döredijilik topary Russiýa Federasiýasynyň Moskwa şäherinde beýik türkmen şahyry Magtymguly Pyragynyň heýkeliniň açylyş dabarasyna gatnaşdy.

Teatrlaryň, sirkleriň, kinoteatrlaryň we kinokonsert merkezleriniň, kitaphanalaryň, muzeýleriň, Türkmen döwlet neşirýat gullugynyň, Oguz han adyndaky “Türkmenfilm” birleşiginiň, Döwlet habarlar agentliginiň ýerine ýetiren işleriniň netijeleri barada-da hasabat berildi. Hasabat döwründe döwlet maksatnamalaryndan, sanly ykdysadyýeti ösdürmegiň Konsepsiýasyndan gelip çykýan wezipeleri ýerine ýetirmek, şol sanda elektron neşirleriň sanyny artdyrmak, pudaga degişli elektron saýtlary häzirki zaman talaplaryna laýyk gelýän maglumatlar bilen üpjün etmek, işgärleriň hünär derejesini ýokarlandyrmak boýunça degişli işler alnyp baryldy.

Soňra wise-premýer Arkadag şäherinde VI Wena balyny geçirmäge görülýän taýýarlyk barada hasabat berdi. Garaşylyşy ýaly, bu döredijilik çäresine Saglygy goraýyş we derman senagaty işgärleriniň güni mynasybetli baýramçylyk dabaralaryna, Magtymguly Pyragynyň doglan gününiň 300 ýyllygyna bagyşlanan “Döwürleriň we siwilizasiýalaryň özara arabaglanyşygy — parahatçylygyň we ösüşiň binýady” atly halkara foruma gatnaşýan daşary ýurtly myhmanlar hem-de beýlekiler gatnaşar. Şunuň bilen baglylykda, döwlet Baştutanymyzyň garamagyna bu medeni çäräni geçirmek bilen bagly degişli teklip hödürlenildi.

Hormatly Prezidentimiz hasabaty diňläp, 10-njy oktýabrda Arkadag şäherinde guraljak VI Wena balyna gowy taýýarlyk görmegiň we ony ýokary derejede geçirmegiň möhümdigini belledi hem-de wise-premýere birnäçe anyk tabşyryklary berdi.

Ministrler Kabinetiniň Başlygynyň orunbasary B.Orazdurdyýewa gözegçilik edýän ulgamlarynda şu ýylyň dokuz aýynda alnyp barlan işleriň netijeleri barada hasabat berdi.

Bellenilişi ýaly, hasabat döwründe Bilimler we talyp ýaşlar güni hem-de täze okuw ýylynyň başlanmagy mynasybetli ýurdumyzyň bilim edaralarynda “Pähim-paýhas ummany Magtymguly Pyragy” atly dabaraly çäreler geçirildi. Hormatly Prezidentimiziň we Gahryman Arkadagymyzyň adyndan 1-nji synpa okuwa kabul edilen ähli okuwçylara “Bilimli” noutbuk kompýuterleri gowşuryldy. Baýramçylyk mynasybetli çagalar baglary, orta mekdepler dabaraly açylyp ulanmaga berildi. Ylymly-bilimli nesilleri terbiýeläp ýetişdirmäge gönükdirilen özgertmeler dowam etdirildi. Bilim işine okatmagyň öňdebaryjy usullary giňden ornaşdyryldy. Mekdep okuwçylary halkara ders bäsleşiklerinde 15 altyn, 32 kümüş, 55 bürünç medal, halkara internet bäsleşiklerinde 94 altyn, 99 kümüş, 102 bürünç medal gazandylar. Halkara derejede geçirilen ders bäsleşiklerinde, olimpiadalarda talyp ýaşlar 58 altyn, 122 kümüş, 202 bürünç, toparlaýyn bäsleşiklerde 5 altyn, 11 kümüş, 17 bürünç medala mynasyp boldular.

Hasabat döwründe ylmy barlaglaryň netijeliliginiň ýokarlandyrylmagyna, innowasion tehnologiýalaryň önümçilige ornaşdyrylmagyna gönükdirilen işler dowam etdirildi. Öňüni alyş-bejeriş işleriniň öňdebaryjy usullary amaly lukmançylyga ornaşdyryldy. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň serişdeleriniň hasabyna näsag çagalara operasiýalar we bejergiler geçirildi. Gazna tarapyndan saglygy goraýyş edaralaryna gemodializ enjamlary sowgat berildi. Şu ýylyň dokuz aýynda bedenterbiýäni, sporty ösdürmek, ussat türgenleri taýýarlamak boýunça işler hem dowam etdirildi. Türgenlerimiz halkara ýaryşlarda 146 altyn, 134 kümüş, 193 bürünç medal gazandylar. Aşgabat şäheri “Arkalaşygyň täze sport mümkinçilikleriniň şäheri”, Olimpiýa şäherçesiniň Tennis toplumy «Tennis boýunça Aziýa sebitiniň okuw-türgenleşik merkezi» diýlip yglan edildi.

Soňra wise-premýer Türkmenistanyň saglygy goraýyş we derman senagaty işgärleriniň gününe görülýän taýýarlyk barada hasabat berdi.

Baýramçylygyň öňüsyrasynda, 9 — 12-nji oktýabrda Aşgabat şäherinde Halkara fiziologiýa ylmy-kliniki we Halkara sagaldyş-dikeldiş merkezlerini, Türkmenabat şäherinde glisirrizin turşusyny öndürýän kärhanany, Mary şäherinde Mary welaýatynyň hem-de Mary şäheriniň Arassaçylyk we keselleriň ýaýramagyna garşy göreşmek gulluklarynyň edara binalaryny dabaraly açyp ulanmaga bermek göz öňünde tutulýar. “Saglygy goraýyş, bilim we sport Berkarar döwletiň täze eýýamynyň Galkynyşy döwründe” atly halkara sergi hem-de ylmy maslahat geçiriler. Myrat Garryýew adyndaky Türkmenistanyň Döwlet lukmançylyk uniwersitetinde zähmetde tapawutlanan saglygy goraýyş işgärlerine döwlet sylaglary gowşurylar.

Türkmenistanda fiziologiýa ylmyny ösdürmegiň 2024 — 2028-nji ýyllar üçin Milli maksatnamasyny; Türkmenistanda lukmançylyk sagaldyş-dikeldiş çäreleriniň 2024 — 2028-nji ýyllar üçin Milli strategiýasyny; Türkmenistanyň immuno-öňüni alyş boýunça 2024 — 2028-nji ýyllar üçin Milli maksatnamasyny tassyklamak; Ilatyň derman serişdeleri we lukmançylyk maksatlaryna niýetlenen önümler bilen üpjün edilmegini kämilleşdirmek; Halkara sagaldyş-dikeldiş merkezini; Halkara fiziologiýa ylmy-kliniki merkezini döretmek; Balkan, Lebap we Mary welaýatlarynda onkologiýa hassahanalarynyň gurluşygynyň taslamalaryny maliýeleşdirmek hakynda Türkmenistanyň Prezidentiniň Kararlarynyň taslamalary işlenip taýýarlanyldy.

Hormatly Prezidentimiz hasabaty diňläp, ýurdumyzyň bilim ulgamynyň mundan beýläk-de kämilleşdirilmegini ileri tutulýan wezipeleriň hatarynda görkezdi. Şunuň bilen birlikde, sporty ösdürmäge aýratyn üns berlip, Diýarymyzda dürli sport çärelerini, halkara ýaryşlary geçirmegiň möhümdigi bellenildi. Döwlet Baştutanymyz saglygy goraýyş ulgamyny döwrebaplaşdyrmagyň wajypdygyny aýdyp, bu ugurda tejribe alyşmak üçin daşary ýurtly hyzmatdaşlar bilen ýakyndan gatnaşyklary dowam etdirmegiň zerurdygyny belledi. Hormatly Prezidentimiz wise-premýere Saglygy goraýyş we derman senagaty işgärleriniň güni mynasybetli ulanmaga beriljek häzirki zaman saglygy goraýyş desgalarynyň açylyş dabarasynyň ýokary derejede geçirilmegini üpjün etmegi, «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergä we ylmy maslahata gowy taýýarlyk görmegi tabşyrdy.

Mejlisiň dowamynda hormatly Prezidentimiz Serdar Berdimuhamedow Türkmenistanda fiziologiýa ylmyny ösdürmegiň 2024 — 2028-nji ýyllar üçin Milli maksatnamasyny; Türkmenistanda lukmançylyk sagaldyş-dikeldiş çäreleriniň 2024 — 2028-nji ýyllar üçin Milli strategiýasyny; Türkmenistanyň immuno-öňüni alyş boýunça 2024 — 2028-nji ýyllar üçin Milli maksatnamasyny tassyklamak; Ilatyň derman serişdeleri we lukmançylyk maksatlaryna niýetlenen önümler bilen üpjün edilmegini kämilleşdirmek; Halkara sagaldyş-dikeldiş merkezini; Halkara fiziologiýa ylmy-kliniki merkezini döretmek; Balkan, Lebap we Mary welaýatlarynda onkologiýa hassahanalarynyň gurluşygynyň taslamalaryny maliýeleşdirmek hakynda Kararlara gol çekdi.

Soňra Ministrler Kabinetiniň Başlygynyň orunbasary, daşary işler ministri R.Meredow şu ýylyň dokuz aýynda Daşary işler ministrligi tarapyndan ýerine ýetirilen işleriň netijeleri barada hasabat berdi.

Bitarap Türkmenistanyň daşary syýasat strategiýasyny durmuşa geçirmek, döwlet Baştutanymyzyň daşary ýurtly hyzmatdaşlar bilen ikitaraplaýyn we köptaraplaýyn gatnaşyklary, halkara guramalar bilen hyzmatdaşlygy pugtalandyrmak boýunça ozal beren tabşyryklaryny ýerine ýetirmek üçin degişli işler geçirildi. Halkara gatnaşyklary giňeltmekde ýokary derejedäki saparlara we gepleşiklere aýratyn orun degişlidir. Hasabat döwründe hormatly Prezidentimiz Russiýa Federasiýasyna, Gazagystan Respublikasyna iş saparlaryny amala aşyrdy. Ýylyň başyndan bäri türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Birleşen Arap Emirliklerinde, Türkiýe Respublikasynda, Täjigistan Respublikasynda, Russiýa Federasiýasynyň Tatarystan Respublikasynda, Gazagystan Respublikasynda, Eýran Yslam Respublikasynda saparlarda boldy. Şu ýylyň iýunynda Koreýa Respublikasynyň Prezidenti Türkmenistana döwlet saparyny amala aşyrdy.

Hasabat döwründe hormatly Prezidentimiz Eýran Yslam Respublikasynyň, Gyrgyz Respublikasynyň, Russiýa Federasiýasynyň, Gazagystan Respublikasynyň, Özbegistan Respublikasynyň Prezidentleri, Ýaponiýanyň Premýer-ministri bilen telefon arkaly söhbetdeşlikleri geçirdi. 24-nji maýda paýtagtymyzda Garaşsyz Döwletleriň Arkalaşygynyň Hökümet Baştutanlarynyň Geňeşiniň nobatdaky mejlisi geçirildi. Oňa gatnaşmak maksady bilen, Russiýa Federasiýasynyň Hökümetiniň Başlygy, Belarus Respublikasynyň, Gazagystan Respublikasynyň, Gyrgyz Respublikasynyň we Täjigistan Respublikasynyň Premýer-ministrleri ýurdumyza iş sapary bilen geldiler. Ýylyň başyndan bäri, Birleşen Milletler Guramasynyň, Ýewropada Howpsuzlyk we Hyzmatdaşlyk Guramasynyň, Bütindünýä Syýahatçylyk Guramasynyň, Türki medeniýetiň halkara guramasynyň (TÜRKSOÝ), Türki Döwletleriň Guramasynyň, Garaşsyz Döwletleriň Arkalaşygynyň Baş sekretarlary Türkmenistanda saparda boldular.

Daşary ýurt wekiliýetleriniň Türkmenistana hem-de ýurdumyzyň wekiliýetleriniň daşary ýurtlara amala aşyran saparlary, halkara derejedäki gepleşikler we duşuşyklar dürli ulgamlarda netijeli gatnaşyklary ösdürmäge gönükdirildi. Daşary ýurtly hyzmatdaşlar bilen gatnaşyklaryň şertnama-hukuk binýadynyň üsti 141 resminama bilen ýetirildi. Daşary syýasat edaralarynyň ugry boýunça ikitaraplaýyn hyzmatdaşlyk yzygiderli amala aşyrylýar. Şeýle hem ilçihanalar arkaly diplomatik gatnaşyklary pugtalandyrmak boýunça degişli işler geçirilýär.

Hormatly Prezidentimiz hasabaty diňläp, dünýä ýurtlary, şeýle hem abraýly halkara guramalar bilen gatnaşyklary ösdürmek boýunça alnyp barylýan işleri dowam etdirmegiň zerurdygyny belledi. Döwlet Baştutanymyz bu baradaky gürrüňi dowam edip, ýylyň ahyryna çenli geçiriljek çärelere, resmi we döwlet saparlaryna, halkara maslahatlara, Garaşsyz döwletimiziň Bitaraplyk baýramyna gowy taýýarlyk görmegiň möhümdigini belläp, bu babatda anyk tabşyryklary berdi.

Soňra Ministrler Kabinetiniň Başlygynyň orunbasary, daşary işler ministri R.Meredow ýurdumyzyň wekiliýetiniň Birleşen Milletler Guramasynyň Baş Assambleýasynyň 79-njy sessiýasyna gatnaşmagynyň netijeleri barada hasabat berdi. Şu maksat bilen, şu ýylyň 26-njy sentýabry — 1-nji oktýabry aralygynda Nýu-Ýork şäherine iş sapary amala aşyryldy.

Bellenilişi ýaly, 27-nji sentýabrda Türkmenistanyň wekiliýeti sessiýada çykyş edip, häzirki zamanyň ählumumy meseleleri, hususan-da, howpsuzlyk, durnukly ösüş, howanyň üýtgemegi, ynsanperwerlik meseleleri boýunça ýurdumyzyň garaýyşlaryny beýan etdi. Şunuň bilen baglylykda, hormatly Prezidentimiziň bu ulgamlardaky halkara başlangyçlary barada aýdyldy. Ählumumy howpsuzlyk strategiýasyny geljekde amala aşyrmak maksady bilen, halkara parahatçylygy berkitmek, dünýäde ýüze çykýan dürli ýagdaýlary çözmek üçin öňüni alyş diplomatiýasyna, Bitaraplygyň ýörelgelerine esaslanmak babatda teklipler öňe sürüldi. Türkmenistanyň wekiliýeti Birleşen Milletler Guramasynyň parahatçylygy üpjün etmekdäki tagallalarynda bitarap ýurtlara bu guramanyň çäklerinde ileri tutulýan hyzmatdaş derejesini bermek başlangyjy bilen çykyş etdi.

Durnukly ösüş babatda ýurdumyz tarapyndan çalşykly dolanyşykdaky ykdysadyýete geçmegiň Ählumumy çarçuwaly maksatnamasy; Durnukly ulag arabaglanyşygynyň ählumumy atlasy; Ählumumy energetika howpsuzlygy we durnukly ösüş boýunça hyzmatdaşlygyň bileleşigi baradaky teklipler beýan edildi. Türkmenistan Aral meselesine, Merkezi Aziýa we Hazar deňzi sebitlerinde ekologik abadançylygy üpjün etmäge uly üns berýär. Şunuň bilen baglylykda, ýurdumyz Birleşen Milletler Guramasynyň ýöriteleşdirilen edaralary, hususan-da, Daşky gurşawy goramak maksatnamasy, Ösüş maksatnamasy, degişli halkara maliýe institutlary, şol sanda Ählumumy ekologiýa gaznasy, Ýaşyl howa gaznasy bilen hyzmatdaşlygy giňeltmek boýunça başlangyçlar bilen çykyş edýär.

Ynsanperwer ulgam barada aýdylanda, türkmen tarapy ilaty, eneligi we çagalygy goramak, maýyplaryň, bosgunlaryň, raýatlygy bolmadyk adamlaryň hukuklaryny goramak, durmuş meseleleri boýunça işleri dowam etdirmegiň ähmiýetini nygtady. Şeýle hem 2025-nji ýylda BMG-niň döredilmeginiň 80 ýyllygynyň, Türkmenistanyň hemişelik Bitaraplygyň 30 ýyllygynyň, dünýäde ýurdumyzyň başlangyjy bilen Halkara parahatçylyk we ynanyşmak ýylynyň belleniljekdigi bilen baglylykda, bu ýylyň aýratyn ähmiýeti nygtaldy. Şoňa görä, bu şanly seneler mynasybetli meýilleşdirilýän çäreleri BMG-niň agza döwletleri bilen bilelikde üstünlikli geçirmegiň möhümdigi aýdyldy.

Nýu-Ýorka saparyň çäklerinde ýurdumyzyň wekiliýeti Merkezi Aziýa döwletleriniň we ABŞ-nyň daşary syýasat edaralarynyň ýolbaşçylarynyň “C5+1” düzümdäki duşuşygyna, Ykdysady Hyzmatdaşlyk Guramasynyň daşary işler ministrleriniň nobatdaky her ýylky duşuşygyna gatnaşdy. Olarda garalan meseleler boýunça Türkmenistanyň resmi garaýyşlary beýan edildi.

BMG-niň Baş sekretary Antoniu Guterriş bilen geçirilen duşuşygyň barşynda iri halkara guramanyň ýolbaşçysynyň Aşgabada bolan iş saparynyň hem-de onuň dowamynda Türkmenistanyň Prezidenti Serdar Berdimuhamedow, Türkmenistanyň Halk Maslahatynyň Başlygy Gurbanguly Berdimuhamedow bilen geçirilen gepleşikleriň ähmiýeti bellenildi. Şeýle hem Türkmenistanyň bitaraplyk syýasatynyň nusgawy häsiýete eýedigi, häzirki zaman dünýäsiniň gün tertibinde duran dürli meseleler babatda ýurdumyzyň işjeň we oňyn orny nygtaldy.

Baş Assambleýanyň 79-njy sessiýasynyň çäklerinde ýurdumyzyň wekiliýeti ikitaraplaýyn duşuşyklaryň birnäçesini geçirdi. Saparyň dowamynda Türkmenistanyň Daşary işler ministrligi bilen Kamboja Patyşalygynyň Daşary işler we halkara hyzmatdaşlyk ministrliginiň arasynda ikitaraplaýyn geňeşmeleri ýola goýmak babatda özara düşünişmek hakynda Ähtnama, Türkmenistanyň Daşary işler ministrliginiň Halkara gatnaşyklary instituty bilen Serbiýa Respublikasynyň Daşary işler ministrliginiň Diplomatik akademiýasynyň arasynda hyzmatdaşlyk etmek hakynda Ähtnama gol çekildi.

Hormatly Prezidentimiz Serdar Berdimuhamedow hasabaty diňläp, Garaşsyz, baky Bitarap döwletimiziň Birleşen Milletler Guramasy bilen köpugurly hyzmatdaşlygy alyp barýandygyny belledi. Türkmenistanyň BMG-niň Baş Assambleýasynyň 79-njy sessiýasynyň wise-başlygy hökmünde çykyş etmegi, şeýle hem nobatdaky sessiýada ýurdumyzyň öňe süren teklipleri we başlangyçlary munuň şeýledigini görkezýär. Döwlet Baştutanymyz geljekde-de Birleşen Milletler Guramasy bilen netijeli hyzmatdaşlygyň dowam etdiriljekdigini aýdyp, wise-premýer, daşary işler ministrine degişli tabşyryklary berdi.

Soňra Ministrler Kabinetiniň ýanyndaky Ulag we kommunikasiýalar agentliginiň Baş direktory M.Çakyýew gözegçilik edýän pudaklarynda şu ýylyň dokuz aýynda alnyp barlan işleriň netijeleri barada hasabat berdi.

Hasabat döwründe toplum boýunça ýerine ýetirilen işleriň we hyzmatlaryň ösüş depgini 117,2 göterime deň boldy. Şu ýylyň ýanwar — sentýabr aýlarynda awtomobil, demir ýol, howa, deňiz, derýa ulaglary arkaly ýük daşamagyň ösüş depgini 102,7 göterime, ýolagçy gatnatmagyň ösüş depgini 104,2 göterime, “Türkmendemirýollary” agentligi boýunça ýerine ýetirilen hyzmatlaryň ösüş depgini 102,5 göterime deň boldy. Arkadag şäheriniň demir ýol menziliniň, “Turgundy” demir ýol bekediniň “gury portunda” ammarlar toplumynyň, Turgundy — Hyrat demir ýolunyň birinji tapgyrynyň Turgundy — Sanabar aralygynyň gurluşyk işlerine girişildi, Serhetabat — Turgundy demir ýol geçelgesiniň türkmen-owgan serhedinde täze demir ýol köprüsi açylyp ulanmaga berildi. Hasabat döwründe “Türkmenawtoulaglary” agentligi boýunça 109,5 göterim, “Türkmenhowaýollary” agentligi boýunça 148,3 göterim, “Türkmendeňizderýaýollary” agentligi boýunça 112,8 göterim, “Türkmenaragatnaşyk” agentligi boýunça bolsa 114,3 göterim ösüş gazanyldy.

Ýurdumyzyň dürli künjeklerinde bu ulgama degişli düzümleýin önümçilik we durmuş maksatly desgalaryň, şol sanda Serhetabat — Hyrat optiki-süýümli aragatnaşyk geçirijisiniň gurluşyk işleri alnyp barylýar. Hasabat döwründe halkara forumlaryň, bilelikdäki iş toparlarynyň mejlisleriniň birnäçesi geçirildi.

Hormatly Prezidentimiz hasabaty diňläp, sanly ulgamy ornaşdyrmak boýunça taslamalaryň durmuşa geçirilişini çaltlandyrmagyň, ýurdumyzda ýolagçy we ýük dolanyşygyny artdyrmak boýunça zerur işleri geçirmegiň, demir ýol ulgamynyň geçirijilik ukybyny artdyrmak babatda zerur çäreleri görmegiň, ýurdumyzyň ulag-logistika ulgamyny döwrebaplaşdyrmak işlerini berk gözegçilikde saklamagyň möhümdigini belledi we agentligiň ýolbaşçysyna degişli tabşyryklary berdi.

Soňra hormatly Prezidentimiz mejlise gatnaşyjylara ýüzlenip, ýurdumyzda şu ýylyň dokuz aýynda ýerine ýetirilen işleriň netijeleriniň kabul eden maksatnamalarymyzyň üstünlikli durmuşa geçirilýändigini görkezýändigini belledi. Hasabat döwründe jemi içerki önümiň ösüş depgininiň 6,3 göterime deň bolmagy, iri senagat, durmuş maksatly desgalaryň we binalaryň dabaraly ýagdaýda açylyp ulanmaga berilmegi munuň aýdyň mysalydyr. Döwlet Baştutanymyz ýerine ýetirilmeli meýilnamalar barada aýdyp, ýylyň ahyryna çenli az wagtyň galandygyny nygtady. “Şoňa görä-de, 2024-nji ýyly gowy netijeler bilen tamamlamak üçin hemmämiz yhlas bilen zähmet çekmeli” diýip, hormatly Prezidentimiz aýtdy we ykdysadyýetimiziň ähli pudaklarynda gowy netijeleri gazanmak, jemi içerki önümiň ösüş depginini durnukly saklamak üçin zerur çäreleri görmegiň wajypdygyny belledi.

Döwlet Baştutanymyz 10-njy oktýabrda Saglygy goraýyş we derman senagaty işgärleriniň gününiň giňden bellenilip geçiljekdigini aýtdy. “Türkmenistanda saglygy goraýyş we derman senagaty ulgamyny innowasion esasda ösdürmäge möhüm ähmiýet berilýär. Şunda saglygy goraýyş işgärleriniň bitirýän işleri uly hormata mynasypdyr” diýip, hormatly Prezidentimiz aýtdy hem-de saglygy goraýyş we derman senagaty ulgamynyň işgärlerini hünär baýramçylygy bilen tüýs ýürekden gutlady.

Hormatly Prezidentimiz Serdar Berdimuhamedow Ministrler Kabinetiniň sanly ulgam arkaly geçirilen mejlisini jemläp, oňa gatnaşanlara berkarar Watanymyzyň gülläp ösmegi ugrunda alyp barýan işlerinde uly üstünlikleri arzuw etdi.

Aşgabat, 3-nji oktýabr. Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlyklyk etmeginde halk häkimiýetiniň ýokary wekilçilikli edarasynyň Prezidiumynyň mejlisi geçirildi. Onuň işine Halk Maslahatynyň Prezidiumynyň agzalary, Türkmenistanyň Mejlisiniň Başlygy, Ministrler Kabinetiniň Başlygynyň orunbasarlary, syýasy partiýalaryň, jemgyýetçilik birleşikleriniň, beýleki döwlet, häkimiýet we jemgyýetçilik edaralarynyň, köpçülikleýin habar beriş serişdeleriniň ýolbaşçylary gatnaşdylar. Mejlisiň gün tertibine beýik Garaşsyzlygymyzyň 33 ýyllyk baýramynyň öňüsyrasynda üstünlikli geçirilen Türkmenistanyň Halk Maslahatynyň mejlisinde kabul edilen çözgütlerden gelip çykýan wezipeleri ara alyp maslahatlaşmak bilen bagly meseleler girizildi.

Gahryman Arkadagymyz mejlisi açmak bilen, Prezidiumyň agzalaryna ýüzlenip, ýakynda berkarar ýurdumyzyň mukaddes Garaşsyzlygynyň 33 ýyllyk baýramynyň ýokary derejede, giňden bellenilip geçilendigini, halkymyzyň Garaşsyzlyk toýuny uly üstünlikler bilen garşylandygyny aýtdy.

Bilşiňiz ýaly, 24-nji sentýabrda Türkmenistanyň Halk Maslahatynyň nobatdaky mejlisi geçirildi. Onda Garaşsyz döwletimizde gazanylan üstünlikleriň, ýetilen sepgitleriň, ýerine ýetirilen işleriň jemi jemlendi. Şeýle hem döwrüň talaplaryndan, täze ykdysady şertlerden ugur alyp, täze taryhy eýýamda öňde durýan möhüm wezipeler ara alnyp maslahatlaşyldy. Halk Maslahatynyň mejlisinde hormatly Prezidentimiz Arkadagly Gahryman Serdarymyz Garaşsyz, baky Bitarap Diýarymyzy mundan beýläk-de toplumlaýyn ösdürmäge gönükdirilen taryhy ähmiýetli birnäçe çözgütleri kabul edip, degişli Permanlara gol çekdi diýip, Milli Liderimiz nygtady. Şunuň bilen baglylykda, «Türkmenistanyň Halk Maslahaty hakynda» Türkmenistanyň Konstitusion kanunynyň 15-nji we 16-njy maddalarynyň düzgünlerine laýyklykda, Halk Maslahatynyň Prezidiumynyň mejlisini çagyrdyk diýip, hormatly Arkadagymyz sözüni dowam etdi hem-de onuň gün tertibine Türkmenistanyň Halk Maslahatynyň mejlisinden gelip çykýan wezipeleri ara alyp maslahatlaşmak bilen bagly soraglaryň girizilendigini belledi.

Milli Liderimiz mejlise Halk Maslahatynyň Prezidiumynyň agzalarynyň, Türkmenistanyň Mejlisiniň Başlygynyň, Ministrler Kabinetiniň Başlygynyň orunbasarlarynyň, syýasy partiýalaryň, jemgyýetçilik birleşikleriniň, beýleki döwlet, häkimiýet we jemgyýetçilik edaralarynyň, köpçülikleýin habar beriş serişdeleriniň ýolbaşçylarynyň gatnaşýandyklaryny aýdyp, gün tertibiniň birinji soragyna geçmek bilen, onuň Halk Maslahatynyň taryhy mejlisiniň netijeleri boýunça durmuşa geçirilýän işler we öňde durýan wezipeler hakyndadygyny nygtady.

Türkmen halkynyň Milli Lideri Gurbanguly Berdimuhamedow Arkadagly Gahryman Serdarymyzyň Halk Maslahatynyň mejlisinde 2025-nji ýylyň «Halkara parahatçylyk we ynanyşmak ýyly» diýlip yglan edilmegi bilen bagly Permana hem gol çekendigine mejlise gatnaşyjylaryň ünsüni çekdi hem-de bu barada we forumyň netijeleri boýunça çykyş etmek üçin Ministrler Kabinetiniň Başlygynyň orunbasary, daşary işler ministri R.Meredowa söz berdi.

R.Meredowyň belleýşi ýaly, şu ýylyň 24-nji sentýabrynda geçirilen Türkmenistanyň Halk Maslahatynyň mejlisinde häzirki döwürde ýurdumyzyň ösüşiniň dürli ugurlary bilen bagly strategik meselelere seredildi. Türkmen halkynyň Milli Lideriniň eden taryhy çykyşynda Türkmenistany mundan beýläk-de ösdürmek, uzak möhlete gönükdirilen maksatlar baradaky mümkinçiliklere seljerme berildi. Hususan-da, ýurdumyzyň daşary syýasaty barada durlup geçilip, 2025-nji ýylda şanly senäniň — Türkmenistanyň hemişelik Bitaraplygynyň 30 ýyllygynyň halkara derejede giňden belleniljekdigi aýdyldy. Şeýle hem Gahryman Arkadagymyz ýurdumyzyň başlangyjy bilen BMG-niň Baş Assambleýasy tarapyndan 2025-nji ýylyň “Halkara parahatçylyk we ynanyşmak” ýyly diýlip yglan edilmeginiň möhüm ähmiýetine ünsi çekdi. Şunda wise-premýer türkmen halkynyň Milli Lideriniň: “Bitaraplyk biziň parahatçylygy we hyzmatdaşlygy ündeýän, halklary dost-doganlyga hem-de agzybirlige çagyrýan, ynsanperwerligi wagyz edýän işlerimizi dünýä ýaýýan taglymatdyr” diýip, Halk Maslahatynyň mejlisinde aýdan sözlerini mysal getirdi.

Türkmenistanyň Prezidenti hem öz çykyşynda döwletimiziň alyp barýan daşary syýasat ugruna uly üns berdi. Döwlet Baştutanymyz Türkmenistanyň dünýäniň dürli döwletleri, abraýly halkara guramalar, hususan-da, BMG bilen deňhukukly, özara bähbitli hyzmatdaşlygy işjeň görnüşde amala aşyrýandygyny belledi. Türkmenistanyň Halk Maslahatynyň taryhy mejlisinde seredilen meselelerden ugur alyp, hormatly Prezidentimiz «2025-nji — Halkara parahatçylyk we ynanyşmak ýylyny geçirmek boýunça çäreler hakynda» Permana gol çekdi. Resminama laýyklykda, Türkmenistanyň Mejlisine, Ministrler Kabinetine, Daşary işler ministrligine, syýasy partiýalara we jemgyýetçilik guramalaryna Halkara parahatçylyk we ynanyşmak ýyly bilen bagly dabaralardyr çäreleri ýokary derejede, guramaçylykly geçirmek hem-de bu babatda döwlet guramaçylyk toparyny döretmek tabşyryldy. Şunuň bilen baglylykda, wise-premýer geçiriljek çäreleriň we dabaralaryň meýilnamasyny taýýarlamagy teklip etdi. Meýilnamada Bitaraplyk syýasaty, parahatçylygy, howpsuzlygy we ynanyşmagy berkitmek, dialog medeniýetini ösdürmek, howanyň üýtgemegi, ekologiýa meselelerine bagyşlanan dürli dabaralardyr çäreler öz beýanyny tapar. Hususan-da, 2025-nji ýylyň dekabrynda Aşgabatda Halkara parahatçylyk we ynanyşmak ýylynda ýetilen sepgitleriň netijeleri we dünýä syýasatynyň geljegi bilen bagly meselelere bagyşlanan halkara forumy, parahatçylygyň we ynanyşmagyň halkara parlament dialogyny, parahatçylygyň, howpsuzlygyň we durnukly ösüşiň hatyrasyna Bitaraplygyň dostlary toparynyň duşuşygyny, dialogy, parahatçylygy we ynanyşmagy berkitmekde zenanlaryň orny barada halkara maslahaty, parahatçylyk we ynanyşmak meseleleri boýunça ýaşlaryň halkara duşuşygyny, 2025-nji ýylyň birinji ýarymynda BMG-niň Nýu-Ýorkdaky ştab-kwartirasynda parahatçylyga, ynanyşmaga we Bitaraplyga bagyşlanan halkara maslahaty, ýylyň ikinji ýarymynda Şweýsariýanyň Ženewa şäherinde geçiriljek Ženewa parahatçylyk hepdeliginiň çäklerinde Halkara parahatçylyk we ynanyşmak ýyly mynasybetli halkara çäreleri, 2025-nji ýylyň dowamynda BMG-niň Wena şäherinde ýerleşýän halkara merkezinde dostluk dabarasyny geçirmek teklip edildi.

R.Meredow Gahryman Arkadagymyzyň parahatçylyk we ynanyşmak ýörelgeleriniň iş ýüzünde durmuşa geçirilmegi babatda uly tagallalary edýändigini belläp, türkmen halkynyň Milli Lideriniň halkymyza sowgat eden ajaýyp goşgusynda parahatçylyk, ynanyşmak ideýalarynyň aýdyň beýan edilýändigini hem-de asudalygy, howpsuzlygy berkitmekde ýurdumyzyň eýeleýän ornuny açyp görkezýändigini nygtady. Ol çykyşynyň ahyrynda Türkmenistanyň Prezidentiniň degişli Permanyny Gahryman Arkadagymyzyň tabşyryklary esasynda ýerine ýetirmek maksady bilen, ähli zerur işleriň geçiriljekdigine ynandyrdy.

Milli Liderimiz çykyşy diňläp, Birleşen Milletler Guramasynyň Baş Assambleýasynyň 78-nji sessiýasynyň 63-nji plenar mejlisinde Türkmenistanyň başlangyjy bilen 2025-nji ýylyň “Halkara parahatçylyk we ynanyşmak ýyly” diýlip yglan edilendigini nygtap, munuň ýurdumyzyň ählumumy parahatçylygy pugtalandyrmak, döwletleriň arasynda ynanyşmagy berkitmek ugrunda edýän taýsyz tagallalarynyň bütin dünýäde ykrar edilýändigini görkezýändigini belledi. Biz oňyn Bitaraplyk hukuk ýagdaýymyzdan ugur alyp, ähli döwletler, abraýly halkara guramalar bilen hyzmatdaşlygy ösdürmäge möhüm ähmiýet berýäris. Dünýä döwletleri bilen deňhukukly, özara bähbitli gatnaşyklary ösdürmek döwletimiziň daşary syýasatynyň esasy ugurlarynyň biridir diýip, türkmen halkynyň Milli Lideri aýtdy we Halkara parahatçylyk we ynanyşmak ýyly mynasybetli dabaralarydyr çäreleri guramaçylykly geçirmäge ýokary derejede taýýarlyk görmelidigini nygtady. Şonuň ýaly-da, 2025-nji ýylda örän möhüm taryhy we şanly senäni — Türkmenistanyň hemişelik Bitaraplygynyň 30 ýyllyk baýramyny uly üstünlikler bilen garşylamaga düýpli taýýarlyk görmeli.

Soňra türkmen halkynyň Milli Lideri indiki meselä geçip, ýurdumyzyň ylym-bilim, saglyk, sport ulgamlarynda, ýaşlary kämil derejede ýetişdirmek ugrunda alnyp barylýan işler, öňde durýan wezipeler, Halk Maslahatynyň mejlisinde kabul edilen «Türkmenistanda ylym ulgamyny ösdürmegiň 2024 — 2052-nji ýyllar üçin Strategiýasy» barada çykyş etmek üçin Ministrler Kabinetiniň Başlygynyň orunbasary B.Orazdurdyýewa söz berdi.

Bellenilişi ýaly, Gahryman Arkadagymyzyň başlangyjy bilen esaslandyrylan Türkmenistanyň Halk Maslahatynyň mejlislerinde ýurdumyzy ösdürmek bilen bagly toplumlaýyn meseleler ara alnyp maslahatlaşylýar, örän möhüm çözgütler kabul edilýär. Garaşsyzlyk baýramynyň öň ýanynda geçirilen mejlisde hormatly Prezidentimiziň hem-de Milli Liderimiziň maksatnamalaýyn çykyşlarynda beýan eden taglymatlary, kesgitlän wezipeleri, onda kabul edilen çözgütlerdir gol çekilen resminamalar täze döwletli işlere badalga berdi.

Wise-premýer türkmen halkynyň Milli Lideriniň ylym, bilim, saglygy goraýyş, sport ulgamlarynyň gurluşyny, dolandyrylyşyny, kanunçylyk we maddy-enjamlaýyn binýadyny kämilleşdirmek, jemgyýetimiziň aň-bilim derejesini ýokarlandyrmak babatda badalga beren nusgalyk işleriniň bu gün üstünlikli dowam etdirilýändigini, milli hem öňdebaryjy tejribeleriň, ylmyň, tehnologiýalaryň gazananlarynyň tapgyrma-tapgyr ornaşdyrylyp, dünýä döwletleri, iri halkara guramalar bilen hyzmatdaşlygyň ösdürilýändigini nygtady. Gahryman Arkadagymyzyň öňdengörüjilikli başlangyçlary bilen ylym we bilim döwletimizi hemmetaraplaýyn ösdürmegiň, dünýäniň ykdysady, ylmy-medeni giňişligindäki ornuny pugtalandyrmagyň berk binýadyna öwrülip, häzirki günde bu ulgamlary döwrebaplaşdyrmak babatda ägirt uly işler amala aşyrylýar. Işlenip taýýarlanan konsepsiýalar, strategiýalar, maksatnamalar esasynda bilim işi ykrar edilen halkara kadalara laýyklykda kämilleşdirilýär, ylymly-bilimli, watansöýüji nesil kemala getirilýär, ýokary derejeli hünärmenler taýýarlanylýar, ylmy barlaglar iňňän möhüm, geljegi uly ugurlara gönükdirilýär, oýlap tapyşlar, ylmy-tehniki gazanylanlar milli ykdysadyýetimize ornaşdyrylýar.

Hormatly Prezidentimiz tarapyndan «Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasynyň», «Türkmenistanda ylym ulgamyny ösdürmegiň 2024 — 2052-nji ýyllar üçin Strategiýasynyň» tassyklanylmagy Gahryman Arkadagymyzyň bilim we ylym ulgamlaryny döwrebaplaşdyrmaga gönükdirilen özgertmeleriniň täze taryhy döwürde mynasyp dowam etdirilýändigini aýdyňlygy bilen tassyklaýar.

Şeýle hem wise-premýer türkmen halkynyň Milli Lideriniň başlangyçlary bilen taýýarlanylan «Saglyk» Döwlet maksatnamasynda ynsan saglygyny goramak, adam ömrüni uzaltmak, anyklaýyş-bejeriş merkezlerini, hassahanalary, şypahanalary, “Arkadag Medisina Klasteri Menejment” kärhanasyny, derman serişdelerini öndürýän kärhanalary gurmak, lukmançylyk ylymlaryny ösdürmek ugrunda ägirt uly işleriň amala aşyrylyp, halkara ykrarnamalara mynasyp bolan saglygy goraýşyň milli nusgasynyň kemala getirilendigini nygtady. Şonuň ýaly-da, Gahryman Arkadagymyzyň ýadawsyz tagallalary esasynda sportuň pajarlap ösýän ýurdy hökmünde Türkmenistanyň abraýynyň dünýä dolýandygyna, halkara ýaryşlaryň, dünýä çempionatlarynyň ýokary derejede geçirilip, bedenterbiýäniň we sportuň belent ýörelgeleriniň dabaralandyrylýandygyna üns çekilip, Aşgabadyň «Arkalaşygyň täze sport mümkinçilikleriniň şäheri», Olimpiýa şäherçesiniň Tennis toplumynyň «Tennis boýunça Aziýa sebitiniň okuw-türgenleşik merkezi» diýlip yglan edilmeginiň bu ugurdaky üstünliklerimiziň dünýä derejesindäki aýdyň ykrarnamasydygy aýdyldy.

B.Orazdurdyýewa çykyşynyň ahyrynda Arkadagly Gahryman Serdarymyzyň hem-de Gahryman Arkadagymyzyň Halk Maslahatynyň mejlisinde bilim özgertmelerini dowam etdirmek, türkmen medeniýetini, edebiýatyny, taryhyny täze nazaryýet esasynda düýpli öwrenmek, Arkadag şäherinde bu ugurda halkara ylmy-barlag merkezini döretmek, täze strategiýalary, konsepsiýalary, maksatnamalary taýýarlamak barada beren möhüm tabşyryklaryny ýerine ýetirmek boýunça tagallalaryny gaýgyrmajakdyklaryna hem-de türkmen halkynyň Milli Lideriniň nusgalyk taglymatlaryna eýerip, öňde duran wezipeleri hem-de tabşyryklary ýerine ýetirjekdiklerine ynandyrdy.

Gahryman Arkadagymyz çykyşy diňläp, Arkadagly Gahryman Serdarymyzyň baştutanlygynda Garaşsyz, hemişelik Bitarap ýurdumyzda ylym-bilim ulgamyny ösdürmek babatda toplumlaýyn işleriň amala aşyrylýandygyny, kabul edilen milli maksatnamalara laýyklykda giň gerimli işleriň alnyp barylýandygyny, möhüm Kararlaryň, çözgütleriň kabul edilýändigini belledi. Şoňa görä-de, biz geljekde-de ylym ulgamyny ösdürmäge, onuň hukuk we maddy enjamlaýyn binýadyny berkitmäge üns bermeli. Ylmyň gazananlaryny, innowasiýalary, sanly ulgamy önümçilige ornaşdyrmak işine aýratyn ähmiýet bermeli. Ylmy-barlag edaralarynyň, ýokary okuw mekdepleriniň, önümçiligiň arasyndaky hyzmatdaşlygy has-da pugtalandyrmaly. Ylym-bilim bilen meşgullanýan edaralary ýokary taýýarlykly hünärmenler bilen üpjün etmeli diýip, Gahryman Arkadagymyz aýtdy.

Türkmen halkynyň Milli Lideri Halk Maslahatynyň Prezidiumynyň mejlisiniň gün tertibinde goýlan üçünji mesele boýunça Arkadag şäherinde alnyp barylýan işler hem-de Halk Maslahatynyň mejlisinde kabul edilen «Arkadag şäherini 2024 — 2052-nji ýyllarda ösdürmegiň Konsepsiýasy» barada çykyş etmek üçin Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazowa söz berdi.

Bellenilişi ýaly, Gahryman Arkadagymyzyň tagallalary bilen Türkmenistanyň Halk Maslahaty döwlet ähmiýetli meseleleri çözmäge, halkymyzyň agzybirligini hem-de jebisligini has-da berkitmäge ýakyndan gatnaşýar. Garaşsyz, hemişelik Bitarap döwletimiziň hemmetaraplaýyn ösmegine ýardam bermek boýunça degişli işleri durmuşa geçirýär, halk demokratiýasynyň bu kadasy ýurdumyzyň jemgyýetçilik-syýasy durmuşynda mynasyp orun eýeleýär. Halk Maslahatynyň 24-nji sentýabrda geçirilen mejlisiniň çözgütleri barada durup geçip, D.Orazow türkmen halkynyň Milli Lideriniň başlyklyk etmeginde geçirilen umumymilli forumda halkymyzyň bagtyýar we abadan durmuşyny üpjün etmäge, ýurdumyzyň mundan beýläk-de ösüş hem rowaçlyk ýoly bilen üstünlikli öňe gitmegine gönükdirilen möhüm meseleleriň ara alnyp maslahatlaşylandygyny aýtdy.

Gahryman Arkadagymyz we döwlet Baştutanymyz ilatyň ýaşaýyş-durmuş derejesini has gowulandyrmak, ýurdumyzy ähli ugurlar boýunça mundan beýläk-de ösdürmek ugrunda ýerine ýetirilmeli işleri kesgitläp, olary amala aşyrmakda anyk wezipeleri öňde goýdular. Türkmenistanyň Prezidentiniň “Arkadag şäherini 2024 — 2052-nji ýyllarda ösdürmegiň Konsepsiýasyny tassyklamak hakynda” Permana gol çekmegi Arkadag şäheriniň ýaşaýjylary üçin begençli wakalaryň biri boldy. Resminamada ýerine ýetirilen, ýerine ýetirilýän we geljekde ýerine ýetirilmeli işler giňişleýin beýan edildi, şeýle hem şäheriň ähli ulgamlaryny sazlaşykly, durnukly ösdürmäge, ilatyň ýaşamagyna, zähmet çekmegine, dynç almagyna gönükdirilen amatlyklary yzygiderli üpjün etmek, ýaşaýyş-durmuş derejesini has-da ýokarlandyrmak bu resminamanyň esasy maksady bolup durýar.

D.Orazow degişli Permanyň Arkadag şäherinde zähmet çekýän agzybir işgärler üçin şatlykly waka bolmak bilen, olaryň jogapkärçiligini hem has-da artdyrandygyny nygtady. Şunuň bilen birlikde, şäheriň häzirki we geljekki meýilnamalary barada durlup geçildi. Häzirki döwürde Arkadag şäherini ösdürmek, onuň ikinji tapgyryny gurmak bilen bagly işleriň durmuşa geçirilýändigi, täze şäherde sagdyn durmuş ýörelgeleriniň berkidilmegine, senagat we önümçilik desgalarynyň ýokary ekologik talaplara laýyk gelmegine möhüm ähmiýet berilýändigi bellenilip, «Arkadag Medisina Klasteri Menejment» kärhanasynyň işleriniň muňa anyk şaýatlyk edýändigi, amala aşyrylýan bu beýik işleriň raýatlaryň, çagalaryň bagtyýar geljegine gönükdirilendigi aýdyldy.

Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy çykyşynyň ahyrynda Arkadag şäheriniň ikinji tapgyryny onuň gözelligine görk goşup, binagärlik keşbi bilen sazlaşykly dowam etdirmek boýunça gujur-gaýratlaryny gaýgyrman, tutanýerli zähmet çekjekdiklerine ynandyrdy hem-de Gahryman Arkadagymyza we Arkadagly Gahryman Serdarymyza berk jan saglyk, uzak ömür, il-ýurt bähbitli, döwlet ähmiýetli işlerinde uly üstünlikleri arzuw etdi.

Halk Maslahatynyň Başlygy Gurbanguly Berdimuhamedow çykyşy diňläp, häzirki döwürde Arkadag şäherinde nusgalyk işleriň amala aşyrylýandygyny nygtap, bu ýerde ýokary amatlyklary bolan ýaşaýyş jaýlarynyň, dolandyryş binalarynyň, bilim we saglygy goraýyş edaralarynyň, söwda-dynç alyş merkezleriniň, seýilgähleriň gurlup ulanmaga berilýändigine, şäheriň ikinji tapgyrynyň gurluşygynyň bolsa güýçli depginde alnyp barylýandygyna ünsi çekdi. Biz ýurdumyzda, şol sanda Arkadag şäherinde ekologik taýdan arassa önümçilikleri döretmäge möhüm ähmiýet berýäris. Şäherde «Arkadag Medisina Klasteri Menejment» kärhanasynyň işe girizilmegini muňa mysal hökmünde görkezip bolar. Bu kärhananyň döredilmegi bilen, dürli görnüşli lukmançylyk serişdeleriniň önümçiligi ýola goýuldy diýip, Gahryman Arkadagymyz aýtdy. Türkmen halkynyň Milli Lideri «Arkadag şäherini 2024 — 2052-nji ýyllarda ösdürmegiň Konsepsiýasyna» laýyklykda, Arkadag şäheriniň ähli ulgamlarynda sazlaşykly we durnukly ösüşi gazanmagyň, şäheriň dolandyryş ulgamyna sanly tehnologiýalary giňden ornaşdyrmak, olary yzygiderli kämilleşdirmek arkaly ilatyň ýaşamagyna, zähmet çekmegine, dynç almagyna gönükdirilen amatlyklary yzygiderli üpjün etmegiň, şäheriň ilatynyň iş üpjünçiligini mundan beýläk-de ýokarlandyrmagyň zerurdygyny belledi.

Hormatly Arkadagymyz sözüni dowam edip, Türkmenistanyň Halk Maslahatynyň halk häkimiýetiniň iň ýokary wekilçilikli edarasy bolmak bilen, hemişelik Bitarap döwletimizde halk bilen geňeşmegiň — Halk Maslahatynyň mejlisini yzygiderli geçirmegiň asylly däbe öwrülendigini aýtdy. Şunuň bilen bir hatarda, häzirki döwürde Türkmenistanyň Halk Maslahatynyň işiniň täze mazmun bilen baýlaşdyrylýandygy, onuň halkyň agzybirligini, jebisligini berkitmegiň, jemgyýeti dolandyrmagyň hem-de ösdürmegiň möhüm guraly hasaplanýandygy, döwletimiziň ähli pudaklary bilen birlikde, halk häkimiýetini kämilleşdirmek boýunça-da netijeli işleriň alnyp barylýandygy nygtaldy.

«Maslahatly biçilen don gysga bolmaz» diýlişi ýaly, biz geljekde hem ilatyň giň gatlaklarynyň möhüm jemgyýetçilik-syýasy çözgütleriň kabul edilmegine gatnaşmagyny üpjün ederis. Ata-babalarymyzyň döwlet gurluşynda toplan baý taryhy tejribesine, asylly däplerine daýanarys diýip, Gahryman Arkadagymyz aýtdy. Türkmen halkynyň Milli Lideri mejlise gatnaşyjylaryň her biriniň öňde durýan wezipeleri üstünlikli durmuşa geçirmek üçin jan aýaman zähmet çekjekdigine, berkarar Watanymyzyň ösüşlerine mynasyp goşant goşjakdyklaryna berk ynam bildirdi.

Gahryman Arkadagymyz Türkmenistanyň Halk Maslahatynyň Prezidiumynyň mejlisiniň gün tertibinde göz öňünde tutulan birnäçe soraglara seredilendigini hem-de olary ara alyp maslahatlaşandyklaryny aýdyp, mejlisi tamamlady we hemmelere alyp barýan işlerinde uly üstünlikleri arzuw etdi.

Eziz Diýarymyzda baş baýram — mukaddes Garaşsyzlygymyzyň 33 ýyllygy şanly wakalara we zähmet üstünliklerine beslendi. Beýik akyldar şahyrymyz Magtymguly Pyragynyň berkarar döwlet gurmak barada eden arzuwlary bu günki günde hakykata öwrüldi. Garaşsyz, hemişelik Bitarap döwletimiziň abraýyny arşa göteren türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň beýik başlangyçlaryny, döwletli tutumlaryny mynasyp dowam etdirýän Arkadagly Gahryman Serdarymyzyň baştutanlygynda Watanymyz kuwwatly döwlete öwrüldi. Halkymyzyň ýaşaýyş-durmuş derejesini we hilini ýokarlandyrmak, bäsdeşlige ukyply milli ykdysadyýeti döretmek, ýurdumyzy hemmetaraplaýyn ösdürmek boýunça maksatnamalar üstünlikli durmuşa geçirilýär.

27-nji sentýabrda hormatly Prezidentimiz Serdar Berdimuhamedow Garaşsyzlyk binasyna gül goýmak dabarasyna hem-de paýtagtymyzdaky Döwlet münberi toplumynyň öňündäki meýdançada geçirilen dabara gatnaşdy.

Soňky ýyllarda ýurdumyzyň Ýaragly Güýçlerine gelip gowuşýan iň döwrebap ýerüsti, deňiz we howa tehnikalarynyň gözden geçirilişi Watanymyzyň goranyş kuwwatyny, häzirki döwrüň wehimlerine hem-de howplaryna garşy durmaga taýýarlygyny, türkmen esgerleriniň ýokary hünär ussatlygyny, başarjaňlygyny aýdyň şöhlelendirdi. Harby we hukuk goraýjy edaralaryň atly bölümleriniň baýramçylyk ýörişi dabaranyň aýratyn bezegine öwrüldi.

Türkmenistanyň Garaşsyzlygynyň 33 ýyllygy mynasybetli hormatly Prezidentimiz Serdar Berdimuhamedowa türkmen halkynyň abadançylygy, bagtyýarlygy, Watanymyzyň mundan beýläk-de gülläp ösmegi ugrundaky yzygiderli aladasy üçin tüýs ýürekden hoşallygyň nyşany hökmünde Hökümet agzalarynyň adyndan Dowamly atly ajaýyp bedew sowgat berildi.

Milli ykdysadyýetimiziň ähli pudaklary Garaşsyzlyk baýramyna zähmet ýeňişlerini bagyşlady. Dabaraly ýörişe Türkmenistanyň Halk Maslahatynyň, Mejlisiň we jemgyýetçilik guramalarynyň wekilleri, Arkadag şäheriniň, paýtagtymyzyň, ýurdumyzyň sebitleriniň wekiliýetleri gatnaşdylar.

Şanly sene mynasybetli dabaralar ýurdumyzyň ähli künjeklerinde giňden ýaýbaňlandyryldy. Sungat ussatlarynyň ýerine ýetirmeginde milli aýdym-saz sungatynyň, häzirki zaman eserleriniň iň gowy nusgalary ýaňlandy. Eziz Watanymyzyň gözelligini, güýç-kuwwatyny, halkymyzyň bitewüligini, belent ruhy ýeňişlerini, döredijilikli taryhy işlerini wasp edýän çykyşlar ýerine ýetirildi. “Älem” medeni-dynç alyş merkeziniň öňündäki meýdançada geçirilen konsert tamamlanandan soňra, ak mermerli paýtagtymyzyň asuda asmanyny baýramçylyk feýerwerki gurşap aldy we ol şol günki ajaýyp çäreleriň jemini jemledi.

28-nji sentýabrda Halkara ahalteke atçylyk sport toplumynda hormatly Prezidentimiz Serdar Berdimuhamedowyň gatnaşmagynda baýramçylyk çäreleri dowam etdi. Meşhur ahalteke atlaryna bagyşlanan giň gerimli şekillendiriş we amaly-haşam sungatynyň sergisi, artistleriň, bagşy-sazandalaryň joşgunly çykyşlary, pälwanlaryň milli göreş boýunça bäsleşigi bu ýerde hakyky türkmen toýuna mahsus köpöwüşginli baýramçylyk ýagdaýyny emele getirdi.

Göýä uçup barýan ýaly duýgyny döredýän, gadymdan bäri gözel keşbi, syraty bilen dünýäni haýrana goýýan bedewler dürli aralyga geçirilen çapyşyklaryň ýedisinde öz tizligini we çeýeligini görkezdiler. Jemleýji çapyşykda bolsa Türkmenistanyň Prezidentiniň Baş baýragyny almak ugrunda çekeleşikli bäsleşik boldy. Soňra ýeňijilere baýraklar gowşuryldy.

Türkmenistanyň Garaşsyzlygynyň 33 ýyllyk baýramy mynasybetli, Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy Serdar Berdimuhamedowyň gol çeken Permanyna laýyklykda, Türkmenistanyň harby we hukuk goraýjy edaralarynyň harby gullukçylarynyň hem-de işgärleriniň bir toparyny Türkmenistanyň medallary bilen sylaglamak, olara harby we ýörite atlary dakmak hem-de hünär derejelerini bermek dabarasy boldy. Şunuň bilen birlikde, halk hojalygynyň dürli pudaklarynyň iň gowy işgärleriniň, önümçiligiň öňdebaryjylarynyň, ministrlikleriň we pudaklaýyn dolandyryş edaralarynyň, olaryň düzümleýin guramalarynyň wekilleriniň, döredijilik işgärleriniň, zähmet weteranlarynyň bir toparyny sylaglamak dabarasy geçirildi. Olar döwletimiziň, halkymyzyň öňünde bitiren aýratyn hyzmatlary üçin orden-medallar bilen sylaglandylar, şeýle hem hormatly atlar dakyldy.

Geçen hepdede hormatly Prezidentimiz Serdar Berdimuhamedow we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow daşary ýurtly işewür hyzmatdaşlaryň birnäçesi bilen duşuşyklary geçirdiler. “CLAAS” kompaniýasynyň paýdarlar jemgyýetiniň, “Buig” we “Jоhn Deere” kompaniýalarynyň, “Wozroždeniýe” taslama-gurluşyk kompaniýalar toparynyň wekilleri bilen ýurdumyzda iri ykdysady taslamalary durmuşa geçirmäge gatnaşmagyň gerimini giňeltmek meseleleri ara alnyp maslahatlaşyldy.

Sport ulgamynda ikitaraplaýyn hyzmatdaşlygy işjeňleşdirmegiň mümkinçilikleri Bütindünýä etnosport konfederasiýasynyň başlygy Bilal Ärdogan bilen geçirilen duşuşyklarda ara alnyp maslahatlaşylan esasy mesele boldy.

Şeýle-de Türkmenistanyň Halk Maslahatynyň Başlygy Gurbanguly Berdimuhamedow ýurdumyzyň giň möçberli milli maksatnamalaryny durmuşa geçirmäge, tohumçylygy ösdürmäge şahsy goşandy üçin «Türkmenistanyň Gahrymany» diýen ýokary ada mynasyp bolan GDA-nyň Tohumçylyk meseleleri boýunça hökümetara utgaşdyryjy geňeşiniň ýolbaşçysy Iwan Kuzmin bilen duşuşdy. Oba hojalykçy akademik ýurdumyzyň oba hojalyk ylmy-barlag institutynyň alymlary tarapyndan döredilen bugdaýyň “Serdar”, “Arkadag”, “Pyragy” atly täze görnüşlerine ýokary baha berdi. Obasenagat pudagyny ylmy esasda ösdürmek boýunça alnyp barylýan giň möçberli işleriň öz oňyn netijesini berýändigi bellenildi. Bu bolsa ýurtda azyk howpsuzlygynyň berkidilmegine, pudagyň eksport kuwwatynyň ýokarlandyrylmagyna mümkinçilik berýär.

Baýramçylygyň öňüsyrasynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlyklyk etmeginde geçirilen Türkmenistanyň Halk Maslahatynyň nobatdaky mejlisinde halkymyzyň bagtyýar, abadan durmuşyny üpjün etmäge gönükdirilen döwlet we syýasy-jemgyýetçilik durmuşynyň möhüm meseleleri, uzak möhletleýin geljek üçin ýurdumyzy ösdürmegiň wezipeleri ara alnyp maslahatlaşyldy.

Şol günüň öň ýanynda taryhy maslahata gatnaşjak wekiller ýurdumyzyň Garaşsyzlygynyň 33 ýyllygy mynasybetli, «Magtymguly Pyragy» medeni-seýilgäh toplumynda ýerleşýän Magtymguly Pyragynyň ýadygärligine gül goýdular.

Gahryman Arkadagymyz Halk Maslahatynyň mejlisindäki çykyşynda hormatly Prezidentimiz Serdar Berdimuhamedowyň baştutanlygynda amala aşyrylýan düýpli özgertmeleriň giň gerimi hem-de täzeçilligi bilen tapawutlanýandygyny, döwlet we jemgyýetçilik durmuşynyň ähli ulgamlaryny öz içine alýandygyny belledi. Milli Liderimiz ýurdumyzyň gazanan üstünlikleri barada aýdyp, olaryň halkymyzyň ýaşaýyş-durmuş derejesini has-da ýokarlandyrmaga gönükdirilendigini nygtady. Adam başyna düşýän girdejiniň, adam maýasynyň hem-de ylmy-tehnologik ösüşleriň ýokary derejesi; ähli pudaklarda zähmet öndürijiliginiň ýokary bolmagy; ykdysady özgertmeleriň işjeň depgini; dünýä bazarynda bäsdeşlige ukyplylyk ykdysady ösüşleriň esasy aýratynlyklarynyň hatarynda görkezildi.

Şeýle-de türkmen halkynyň Milli Lideri ýaşlar barada döwlet syýasatynyň möhüm ugurlaryna ünsi çekdi. Şunuň bilen baglylykda, mekdebe çenli çagalar edaralarynyň hem-de umumybilim berýän orta mekdepleriň sanyny artdyrmagyň; saglygy sebäpli mümkinçiligi çäkli çagalar bilen alnyp barylýan işleri kämilleşdirmegiň, olar bilen işleýän pedagogik işgärleriň hünärini ýokarlandyrmagyň; ýokary okuw mekdeplerinde ylym-bilim-önümçilik arabaglanyşygynyň kämil usulyny döretmegiň zerurdygy bellenildi. Arkadag şäheriniň halkara ylym-bilim merkezi hökmünde ornuny pugtalandyrmagyň, şäherde Türkmenistanyň gadymy, orta asyrlar, täze we iň täze taryhyny, arheologik, binagärlik ýadygärliklerini öwrenýän hem-de wagyz edýän halkara ylmy-barlag merkezini döretmegiň möhümdigi barada aýdyldy.

Halk Maslahatynyň Başlygy ilatyň iş bilen üpjünçiligini gowulandyrmaga mümkinçilik berýän, ykdysadyýetimiziň pudaklarynda amala aşyrylýan özgertmeler barada aýdyp, «Türkmenistanyň zähmet bazaryny 2030-njy ýyla çenli ösdürmegiň Konsepsiýasyny» kabul etmegiň maksadalaýyk boljakdygyny belledi. Bu Konsepsiýa iş üpjünçiligi boýunça halkara guramalar, daşary ýurt döwletleri bilen hyzmatdaşlygy giňeltmekde, hususan-da, Halkara Zähmet Guramasynyň konwensiýalaryna goşulmakda möhüm ädim bolar. Gahryman Arkadagymyz maliýe bazaryny ösdürmegiň, telekeçiligiň täze görnüşlerini we usullaryny ornaşdyrmagyň meselelerine aýratyn üns çekip, 2030-njy ýyla çenli maliýe bazaryny ösdürmegiň Strategiýasynyň, kiçi we orta telekeçiligi goldamagyň Milli maksatnamasynyň kabul edilmegini wajyp wezipeleriň hatarynda görkezdi. Bu bolsa ýurdumyzy ýokary depginde ösdürmegiň täze tapgyryna badalga berer. Türkmen halkynyň Milli Lideri Halk Maslahatynyň geljek ýylda geçiriljek mejlisinde 2026 — 2052-nji ýyllarda ýurdumyzyň daşary ykdysady işini; döwlet-hususy hyzmatdaşlygyny; sanly ykdysadyýeti; ulag, medeni, ylmy-lukmançylyk diplomatiýasyny; ýokary bilimi ösdürmegiň Strategiýalarynyň; intellektual eýeçilik ulgamyny ösdürmegiň Konsepsiýasynyň; 2030-njy ýyla çenli bedenterbiýäni we sporty goldamagyň hem-de ösdürmegiň Maksatnamasynyň taslamalaryna garamagy teklip etdi.

Soňra Arkadagly Gahryman Serdarymyz mejlisde çykyş edip, ýurdumyzda Garaşsyz, hemişelik Bitarap Watanymyzy durmuş-ykdysady taýdan ösdürmäge, halkymyzyň hal-ýagdaýyny barha ýokarlandyrmaga gönükdirilen, şu ýylda ýerine ýetirilen işleriň jemlerini jemledi hem-de eziz Diýarymyzy mundan beýläk-de gülledip ösdürmegiň möhüm wezipelerini kesgitledi.

Döwlet Baştutanymyz milli ykdysadyýetimiziň yzygiderli ösdürilýändigini belledi. Şu ýylyň başyndan bäri jemi içerki önümiň ösüşiniň 6,3 göterim derejede durnukly saklanmagy muňa şaýatlyk edýär. Döwlet maýa goýum syýasatynyň netijeliligini has-da ýokarlandyrmak üçin zerur işler alnyp barylýar. Üstünlikli amala aşyrylýan sebit we milli derejedäki maýa goýum taslamalary oňyn netijesini berýär. Munuň özi Diýarymyzyň sebitleriniň ykdysady kuwwatynyň yzygiderli berkidilmegine ýardam berýär. Şunuň bilen baglylykda, golaýda geçirilen Türkmenistanyň maýa goýum forumynyň döwletimiziň dünýä jemgyýetçiligi bilen ykdysady gatnaşyklaryny pugtalandyrmaga, täze işewürlik hyzmatdaşlygyny ýola goýmaga we ýurdumyzyň maýa goýum mümkinçilikleri bilen tanyşmaga gowy şert döredendigi barada aýdyldy. «Türkmenistany 2024-nji ýylda durmuş-ykdysady taýdan ösdürmegiň we maýa goýum Maksatnamasyna» laýyklykda, şu ýylyň ahyryna çenli 38 milliard 500 million manat möçberinde düýpli maýa goýumlary özleşdirmek göz öňüne tutulýar. Bu maýa goýumlar ýurdumyzy ösdürmäge gönükdiriler hem-de täze önümçilik, medeni-durmuş maksatly desgalary gurmaga we döwrebaplaşdyrmaga şert döreder.

Hormatly Prezidentimiz şu ýyl ýurdumyzyň baş maliýe meýilnamasyndan bilimi, saglygy goraýşy, medeniýeti ösdürmäge, önümçilik, durmuş-medeni maksatly desgalaryň gurluşygyna köp möçberde serişdeleriň gönükdirilendigini nygtady. Bu serişdelerden önümçilik maksatly desgalaryň gurluşygyna goýberilen maýa goýumlaryň umumy möçberi 67,8 göterime, medeni-durmuş maksatly desgalaryň gurluşygy üçin bolsa 32,2 göterime deň boldy. Muňa garamazdan, ykdysadyýeti özgertmek, innowasion ösüşi gazanmak, hususy pudagyň paýyny giňeltmek arkaly Döwlet býujetiniň girdeji bölegi artdyryldy. Bank hyzmatlarynyň hilini ýokarlandyrmak, milli manadyň hümmetini saklamak boýunça geçirilen özgertmeler durnukly pul dolanyşygyny hem-de ykdysady ösüşi üpjün etdi. Täze ýylyň 1-nji ýanwaryndan bolsa býujetden maliýeleşdirilýän edaralaryň, hojalyk hasaplaşygyndaky kärhanalaryň, jemgyýetçilik birleşikleriniň işgärleriniň aýlyk zähmet haklarynyň, pensiýalaryň, döwlet kömek pullarynyň, talyp we diňleýji haklarynyň möçberi ýene-de 10 göterim ýokarlandyrylar.

Nygtalyşy ýaly, ilatyň ýaşaýyş-durmuş derejesini ýokarlandyrmak boýunça işler geljekde-de yzygiderli dowam etdiriler. Munuň özi mähriban halkymyzyň abadançylygy baradaky aladanyň döwlet syýasatynyň ileri tutulýan ugry bolup durýandygyny ýene-de bir gezek aýdyň tassyklaýar. Döwlet Baştutanymyz «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynda» göz öňünde tutulan wezipeleri geljek ýylda-da üstünlikli dowam etdirmek maksady bilen, «Türkmenistany 2025-nji ýylda durmuş-ykdysady taýdan ösdürmegiň we maýa goýum Maksatnamasyny» işläp taýýarlamagy hem-de ony Halk Maslahatynyň garamagyna hödürlemegi tabşyrdy.

Biziň esasy maksadymyz eziz Watanymyzy beýik geljege tarap ynamly öňe alyp barmakdan ybaratdyr. Şoňa görä-de, ähli tagallalarymyzy Garaşsyz, hemişelik Bitarap döwletimizi mundan beýläk-de gülledip ösdürmäge, merdana halkymyzyň ýaşaýyş-durmuş derejesini has-da ýokarlandyrmaga gönükdirmelidiris diýip, hormatly Prezidentimiz aýtdy.

Mejlisde «Türkmenistanyň Gahrymany» diýen ada mynasyp bolanlary sylaglamak dabarasy boldy. Hormatly Prezidentimiz berkarar döwletimizi mundan beýläk-de toplumlaýyn ösdürmäge gönükdirilen taryhy ähmiýetli resminamalara gol çekdi. Şolaryň hatarynda 2025-nji — Halkara parahatçylyk we ynanyşmak ýylyny geçirmek boýunça çäreler hakynda, Arkadag şäherini 2024 — 2052-nji ýyllarda ösdürmegiň Konsepsiýasyny we Türkmenistanda ylym ulgamyny ösdürmegiň 2024 — 2052-nji ýyllar üçin Strategiýasyny tassyklamak hakynda Permanlar bar.

25-nji sentýabrda Gahryman Arkadagymyzyň we Arkadagly Gahryman Serdarymyzyň gatnaşmagynda mukaddes Garaşsyzlygymyzyň 33 ýyllygy we Türkmenistanyň Halk Maslahatynyň mejlisiniň üstünlikli geçmegi mynasybetli Türkmenbaşynyň ruhy metjidinde sadaka berildi. Türkmen halkynyň Milli Lideri hem-de hormatly Prezidentimiz Türkmenistanyň ilkinji Prezidenti Saparmyrat Nyýazowy hatyralap, metjidiň ýanyndaky kümmetde ýadygärlige gül dessesini goýdular.

Watanymyzyň mukaddes Garaşsyzlygynyň 33 ýyllygyna gabatlanyp, Döwlet migrasiýa gullugynda Türkmenistanyň raýatlygyna kabul edilen adamlara pasportlary gowşurmak hem-de ýurdumyzda ýaşaýan daşary ýurt raýatlaryna Türkmenistanda ýaşamak üçin ygtyýarnama bermek dabarasy boldy. Döwlet Baştutanymyzyň 22-nji sentýabrda geçirilen Ministrler Kabinetiniň giňişleýin mejlisinde gol çeken Permanyna laýyklykda, ýurdumyzyň çäklerinde hemişelik ýaşaýan hem-de 29 milletiň wekili bolup durýan 1 müň 146 adam Türkmenistanyň raýatlygyna kabul edildi. Şeýle-de hormatly Prezidentimiziň Kararyna laýyklykda, 6 döwletiň raýaty we 15 milletiň wekili bolup durýan 134 adama Türkmenistanda ýaşamak üçin ygtyýarnamalar berildi.

Şeýlelikde, Garaşsyzlygymyzyň şanly 33 ýyllygy mynasybetli geçirilen giň gerimli çäreler ýurdumyzyň durmuşynyň ähli ulgamlarynda ýetilen belent sepgitleriň, halkymyzyň yhlasly zähmeti netijesinde gazanylan ajaýyp üstünlikleriň aýdyň beýany boldy. Hormatly Prezidentimiz Serdar Berdimuhamedowyň baştutanlygynda döwletimiziň abadançylygynyň, halkymyzyň rowaçlygynyň bähbidine amala aşyrylýan düýpli özgertmeler üstünliklere beslenýär.

Aşgabat, 30-njy sentýabr. Şu gün hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Onda ýurdumyzyň oba hojalyk toplumynda we sebitlerde alnyp barylýan işler, Oba milli maksatnamasynyň ýerine ýetirilişi bilen baglanyşykly meselelere garaldy.

Ilki bilen, Ahal welaýatynyň häkimi S.Soltanmyradowa söz berildi. Häkim welaýatda möwsümleýin oba hojalyk işleriniň barşy barada hasabat berdi.

Bellenilişi ýaly, häzirki wagtda ösdürilip ýetişdirilen pagta hasylyny gysga wagtda, ýitgisiz ýygnap almak, pagta ýygymynyň depginini güýçlendirmek boýunça zerur işler alnyp barylýar. Ýygym möwsüminde oba hojalyk tehnikalary, kabul ediş harmanhanalary, pagta arassalaýjy kärhanalar doly güýjünde işledilýär. Welaýatda bugdaý ekişini agrotehniki möhletlerde geçirmek boýunça degişli işler dowam edýär. Bu işlerde oba hojalyk tehnikalaryndan we gurallardan netijeli peýdalanylýar. Ekiş geçirilen meýdanlarda gögeriş suwy tutulýar. Sebitiň ekerançylyk meýdanlarynda güýzlük ýeralma, gök-bakja, beýleki azyklyk ekinlere ideg etmek, ýetişdirilen hasyly ýygnap almak işleri utgaşykly alnyp barylýar. Şeýle hem häkim welaýatdaky medeni-durmuş maksatly desgalaryň ýyladyş ulgamlaryny gyş paslyna taýýarlamak boýunça alnyp barylýan işler, Oba milli maksatnamasyny durmuşa geçirmegiň çäklerinde şu ýyl açylyp ulanmaga berilmegi meýilleşdirilen medeni-durmuş, önümçilik maksatly desgalarda gurluşyk işleriniň depginleri barada hasabat berdi.

Hormatly Prezidentimiz hasabaty diňläp, daýhan yhlasy bilen ýetişdirilen pagta hasylynyň ýitgisiz ýygnalyp alynmagynyň, bugdaý ekişiniň agrotehniki möhletlerde, ýokary hilli geçirilmeginiň zerur talap bolup durýandygyny belledi we bu babatda häkime anyk tabşyryklary berdi. Döwlet Baştutanymyz Oba milli maksatnamasynda bellenen wezipeleriň üstünlikli durmuşa geçirilmeginiň möhümdigine ünsi çekip, bu ugurdaky işleriň ýokary hilli ýerine ýetirilmegini gözegçilikde saklamagy tabşyrdy.

Soňra Balkan welaýatynyň häkimi H.Aşyrmyradow welaýatda alnyp barylýan möwsümleýin oba hojalyk işleri barada hasabat berdi.

Bellenilişi ýaly, häzirki wagtda sebitde pagta ýygymyny guramaçylykly geçirmek, ýygym möwsümine gatnaşýan ähli düzümleriň sazlaşykly işini üpjün etmek, ýygnalan pagta hasylyny bökdençsiz kabul etmek we talabalaýyk ýerleşdirmek boýunça zerur çäreler görülýär. Bugdaý ekişini ýokary hilli, agrotehniki möhletlerde geçirmek boýunça degişli işler dowam edýär. Şunda kuwwatly oba hojalyk tehnikalarynyň doly güýjünde, netijeli işledilmegine aýratyn üns berilýär. Bugdaý ekilen meýdanlarda gögeriş suwy tutulýar. Hormatly Prezidentimiziň ýurdumyzda gök-bakja we beýleki azyklyk ekinleriň öndürilýän möçberini artdyrmak, bu önümler bilen ilatymyzy bolelin üpjün etmek babatda berýän tabşyryklaryny ýerine ýetirmek maksady bilen, welaýatyň güýzlük ýeralma, gök-bakja, beýleki ekinler ekilen meýdanlarynda ideg etmek, ýetişdirilen hasyly ýygnap almak işleri alnyp barylýar. Şeýle hem häkim welaýatdaky edara-kärhanalaryň, ýaşaýyş jaýlarynyň, bilim edaralarynyň, beýleki medeni-durmuş maksatly desgalaryň ýyladyş ulgamlaryny gyş möwsümine taýýarlamak boýunça ýerine ýetirilýän işler, ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna, Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleri barada hasabat berdi.

Hormatly Prezidentimiz hasabaty diňläp, häzirki wagtda oba hojalygynda ýaýbaňlandyrylan möwsümleýin işlere ünsi çekdi hem-de bugdaý ekişini agrotehniki möhletlerde geçirmek, pagta ýygymynyň depginini güýçlendirmek babatda häkime birnäçe tabşyryklary berdi. Şeýle-de döwlet Baştutanymyz ýurdumyzy durmuş-ykdysady taýdan ösdürmäge gönükdirilen maksatnamalara laýyklykda, şu ýyl welaýatda açylyp ulanmaga berilmegi göz öňünde tutulýan medeni-durmuş, önümçilik maksatly desgalardaky gurluşyk işleriniň ýokary hilli ýerine ýetirilmegini gözegçilikde saklamagy tabşyrdy.

Soňra sanly ulgam arkaly geçirilýän iş maslahaty Daşoguz welaýatynyň häkimi D.Babaýewiň möwsümleýin oba hojalyk işleriniň barşy baradaky hasabaty bilen dowam etdi.

Hasabatda bellenilişi ýaly, welaýatda pagta ýygymy guramaçylykly dowam edip, ýygymyň depginini güýçlendirmek, kombaýnlary we beýleki tehnikalary doly güýjünde, netijeli işletmek, ýygnalan hasyly kabul ediş harmanhanalarynda bökdençsiz kabul etmek üçin zerur çäreler görülýär. Welaýatda bugdaý ekişini ýokary hilli geçirmek, ekiş geçirilen meýdanlarda kadaly gögeriş almak boýunça degişli işler alnyp barylýar. Sebitiň güýzlük gök ekinler ekilen meýdanlarynda ideg etmek, ösdürilip ýetişdirilen ekinleriň hasylyny ýygnap almak işleri utgaşykly alnyp barylýar. Şaly oragyny guramaçylykly geçirmek maksady bilen, degişli taýýarlyk işleri alnyp barylýar. Mundan başga-da, häkim welaýatda medeni-durmuş maksatly binalaryň, edara-kärhanalaryň ýyladyş ulgamlaryny gyş möwsümine taýýarlamak boýunça ýerine ýetirilýän işler, Oba milli maksatnamasyna laýyklykda, şu ýyl açylyp ulanmaga berilmegi göz öňünde tutulýan medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, bugdaý ekişini agrotehniki möhletlerde geçirmek, ýetişdirilen pagta hasylyny gysga wagtda we ýitgisiz ýygnap almak üçin ähli zerur çäreleri görmegi häkime tabşyrdy. Şeýle hem Oba milli maksatnamasyna laýyklykda, şu ýyl welaýatda açylyp ulanmaga berilmegi göz öňünde tutulýan dürli maksatly desgalardaky gurluşyk işleriniň ýokary hilli ýerine ýetirilmegini gözegçilikde saklamak barada tabşyryklar berildi.

Soňra Lebap welaýatynyň häkimi M.Annanepesow welaýatda dowam edýän möwsümleýin oba hojalyk işleri barada hasabat berdi.

Hasabatda bellenilişi ýaly, sebitde ýetişdirilen pagta hasylyny ýitgisiz ýygnap almak hem-de döwlet harmanyna tabşyrmak boýunça işler guramaçylykly alnyp barylýar. Ýygym möwsüminde ulanylýan oba hojalyk tehnikalarynyň, kabul ediş harmanhanalarynyň, pagta arassalaýjy kärhanalaryň bökdençsiz işledilmegi üçin zerur çäreler görülýär. Welaýatda geljek ýylyň hasyly üçin bugdaý ekişini bellenen agrotehniki möhletlerde geçirmek, ekişde ulanylýan oba hojalyk tehnikalarynyň doly güýjünde işledilmegi boýunça degişli işler alnyp barylýar. Ekiş geçirilen ýerlerde gögeriş suwy tutulýar. Ýurdumyzda azyk bolçulygyny has-da pugtalandyrmak barada öňde goýlan wezipelerden ugur alnyp, welaýatyň güýzlük ýeralma, gök-bakja, beýleki oba hojalyk ekinleri ekilen meýdanlarynda ideg etmek, ýetişdirilen ekinleriň hasylyny ýygnap almak işleri dowam edýär. Ýetişdirilen şaly hasylyny ýygnap almaga taýýarlyk görülýär. Şeýle hem häkim welaýatyň çägindäki medeni-durmuş maksatly desgalaryň ýyladyş ulgamlaryny gyş möwsümine taýýarlamak boýunça ýerine ýetirilýän işler, «Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň ýaşaýyş-durmuş şertlerini özgertmek boýunça 2028-nji ýyla çenli döwür üçin Milli maksatnamasyna» laýyklykda, şu ýyl açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz Serdar Berdimuhamedow hasabaty diňläp, häzirki wagtda dowam edýän möwsümleýin oba hojalyk işleriniň möhüm ähmiýetine ünsi çekdi we bugdaý ekişiniň agrotehniki möhletlerde geçirilmegini, ýetişdirilen pagta hasylynyň ýitgisiz, gysga wagtda ýygnalyp alynmagyny ileri tutulýan wezipeleriň hatarynda kesgitledi hem-de bu ugurdaky işleriň ýokary guramaçylyk derejesiniň üpjün edilmegini häkime tabşyrdy. Şeýle-de döwlet Baştutanymyz ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna hem-de Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilýän dürli maksatly desgalardaky gurluşyk işleriniň ýokary hilli ýerine ýetirilmegini gözegçilikde saklamagy häkime tabşyrdy.

Mary welaýatynyň häkimi B.Orazow welaýatda möwsümleýin oba hojalyk işleriniň barşy barada hasabat berdi.

Bellenilişi ýaly, sebitde ýetişdirilen pagta hasylyny ýitgisiz ýygnap almak, pagta ýygymynyň depginini güýçlendirmek, oba hojalyk tehnikalaryny netijeli işletmek, ýygnalan hasyly kabul ediş harmanhanalarynda, pagta arassalaýjy kärhanalarda bökdençsiz kabul etmek boýunça degişli işler alnyp barylýar. Bugdaý ekişini ýokary hilli we bellenen möhletlerde geçirmek, gögeriş suwuny tutmak, kadaly gögeriş almak üçin zerur çäreler görülýär. Welaýatda ekilen güýzlük ýeralma, gök-bakja, beýleki oba hojalyk ekinlerine ideg etmek, ýetişdirilen hasyly ýygnap almak işleri alnyp barylýar. Gant şugundyry ekilen meýdanlarda hatarara bejergi, mineral dökünler bilen iýmitlendirmek, ösüş suwuny tutmak işleri ýerine ýetirilýär. Şeýle hem häkim welaýatda medeni-durmuş maksatly binalaryň ýyladyş ulgamlaryny gyş möwsümine taýýarlamak boýunça alnyp barylýan işler, Oba milli maksatnamasyna laýyklykda, şu ýyl welaýatda açylyp ulanmaga berilmegi göz öňünde tutulýan desgalardaky gurluşyk işleriniň ýagdaýy barada hasabat berdi.

Döwlet Baştutanymyz hasabaty diňläp, möwsümleýin oba hojalyk işleriniň agrotehniki möhletlerde we ýokary guramaçylykly geçirilmeginiň möhüm ähmiýetini belledi hem-de bu babatda häkime anyk tabşyryklary berdi. Şeýle hem hormatly Prezidentimiz Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilen dürli maksatly desgalardaky gurluşyk işleriniň talabalaýyk ýerine ýetirilmegini gözegçilikde saklamagy tabşyrdy.

Soňra Ministrler Kabinetiniň Başlygynyň orunbasary T.Atahallyýew ýurdumyzda möwsümleýin oba hojalyk işleriniň barşy barada hasabat berdi.

Bellenilişi ýaly, häzirki wagtda welaýatlaryň ekerançylyk meýdanlarynda ýetişdirilen pagta hasylyny ýygnap almak, möwsümde ulanylýan oba hojalyk tehnikalaryny öndürijilikli işletmek, ýygnalan hasyly pagta arassalaýjy kärhanalarda bökdençsiz kabul etmek boýunça degişli işler dowam edýär. Ýurdumyzda bugdaý ekişini talabalaýyk geçirmek maksady bilen, ekişde ulanylýan oba hojalyk tehnikalaryny we gurallary doly güýjünde işletmek, gallaçy daýhanlary ýokary hilli bugdaý tohumlary bilen üpjün etmek boýunça zerur çäreler görülýär. Ekiş geçirilen meýdanlarda gögeriş suwy tutulýar. Hormatly Prezidentimiziň Diýarymyzda azyk bolçulygyny has-da pugtalandyrmak baradaky tabşyryklaryndan ugur alnyp, welaýatlarda güýzlük ekilen azyklyk oba hojalyk ekinlerine ideg etmek, ýetişdirilen hasyly ýygnap almak boýunça işler ýerine ýetirilýär. Daşoguz, Lebap welaýatlarynda şaly oragyna başlamak boýunça taýýarlyk işleri, Mary welaýatynyň gant şugundyry ekilen meýdanlarynda bolsa ideg işleri alnyp barylýar.

Hormatly Prezidentimiz hasabaty diňläp, möwsümleýin oba hojalyk işleriniň agrotehnikanyň kadalaryna laýyklykda we ýokary hilli geçirilmeginiň möhümdigini belledi hem-de bu ugurda alnyp barylýan işleri gözegçilikde saklamagy wise-premýere tabşyrdy.

Soňra döwlet Baştutanymyz iş maslahatyna gatnaşyjylara ýüzlenip, ýetişdirilen pagta hasylynyň ýitgisiz ýygnalyp alynmagynyň, bugdaý ekişiniň agrotehniki möhletlerde geçirilmeginiň möhüm ähmiýetine ünsi çekip, bu ugurdaky işleriň guramaçylyk derejesini gözegçilikde saklamagy tabşyrdy. Şeýle-de hormatly Prezidentimiz welaýatlarda güýzlük ekinlere agrotehnikanyň kadalaryna laýyklykda ideg etmek, ýetişdirilen hasyly ýygnap almak boýunça zerur işleri geçirmek babatda birnäçe anyk tabşyryklary berdi.

Döwlet Baştutanymyz Serdar Berdimuhamedow sanly ulgam arkaly geçirilen iş maslahatyny jemläp, oňa gatnaşanlara öňde goýlan wezipeleri ýerine ýetirmekde üstünlikleri arzuw etdi.

Türkmenistanyň Halk Maslahatynyň mejlisi

Aşgabat, 24-nji sentýabr. Şu gün paýtagtymyzdaky Maslahat köşgünde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlyklyk etmeginde Türkmenistanyň Halk Maslahatynyň nobatdaky mejlisi geçirildi. Şanly senäniň — eziz Watanymyzyň Garaşsyzlygynyň 33 ýyllyk baýramynyň öňüsyrasynda geçirilen umumymilli forumyň gün tertibine halkymyzyň bagtyýar we abadan durmuşyny üpjün etmäge, ýurdumyzyň mundan beýläk-de ösüş hem rowaçlyk ýoly bilen üstünlikli öňe gitmegine gönükdirilen möhüm meseleler girizildi.

Halk häkimiýetiniň gadymdan gelýän milli däplerinden, häzirki zaman türkmen jemgyýetiniň demokratik kadalaryndan ugur alyp, jemgyýetiň ähli gatlaklarynyň we dürli nesilleriň wekilleri — talyplar, hormatly ýaşulular, kümüş saçly eneler ýurdumyzyň ýokary wekilçilikli edarasynyň mejlisine gatnaşmaga çagyryldy.

Maslahat köşgünde hakyky baýramçylyk we ruhubelentlik ýagdaýy emele geldi. Ýygnananlar türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowy ör turup, şowhunly el çarpyşmalar bilen garşylaýarlar. Gahryman Arkadagymyz köşgüň sahnasyna baryp, “Pähim-paýhas ummany Magtymguly Pyragy” ýylynyň möhüm wakalarynyň birine öwrülen ählihalk forumynyň wekilleri bilen mähirli salamlaşýar.

Milli Liderimiz ýygnananlara ýüzlenip, biz merdana ata-babalarymyzyň döwletlilik däplerine eýerip, Garaşsyz, hemişelik Bitarap Watanymyzyň mukaddes Garaşsyzlygynyň 33 ýyllyk baýramynyň bellenilýän günlerinde Türkmenistanyň Halk Maslahatynyň mejlisine ýygnandyk diýip belledi. Bu taryhy mejlise Türkmenistanyň Halk Maslahatynyň düzümine girýän döwlet häkimiýet edaralarynyň ýolbaşçylary, Mejlisiň deputatlary, ministrlikleriň we pudaklaýyn dolandyryş edaralarynyň, syýasy partiýalaryň, jemgyýetçilik guramalarynyň ýolbaşçylary, welaýatlaryň, etraplaryň, şäherleriň häkimleri, welaýat, etrap, şäher halk maslahatlarynyň agzalary, hormatly ýaşulular, mähriban eneler, ýurdumyzyň ähli sebitlerinden jemgyýetçilik wekilleri, beýleki çagyrylan adamlar gatnaşýarlar.

Şu ýyl biz şygyrlary dünýä edebiýatynyň altyn hazynasyna giren beýik akyldar şahyrymyz Magtymguly Pyragynyň doglan gününiň 300 ýyllygyny giňden belleýäris diýip, Gahryman Arkadagymyz aýtdy we bu gün ykbalyny halkyň ykbaly bilen berk baglan akyldaryň arzuw eden zamanasynyň gelendigini buýsanç bilen nygtady. Berkarar Türkmenistan agzybirligiň hem-de rowaçlyklaryň ýurduna öwrüldi.

Häzirki wagtda Garaşsyz, hemişelik Bitarap Watanymyzy mundan beýläk-de ösdürmek ugrunda tutumly işler durmuşa geçirilýär. Döwlet häkimiýet we dolandyryş edaralarynyň işi ýurdumyzy iň bagtly adamlar ýaşaýan hem zähmet çekýän kuwwatly döwlete öwürmäge gönükdirilýär. Şoňa görä-de, Türkmenistanyň Halk Maslahatynyň mejlisinde geçilen taryhy menzillere göz aýlamak, öňde durýan wezipeleri kesgitläp, Garaşsyz döwletimiziň üstünliklerini berkitmek esasy maksadymyzdyr diýip, hormatly Arkadagymyz nygtady.

Dabaraly pursat gelip ýetýär: türkmen halkynyň Milli Lideri Gurbanguly Berdimuhamedow Halk Maslahatynyň mejlisini açyk diýip yglan edýär. Türkmenistanyň Döwlet senasy ýaňlanýar. Umumymilli foruma gatnaşyjylaryň ählisi oňa öz seslerini goşýarlar.

Soňra wekiliýetleriň agzalaryndan gelip gowşan tekliplere laýyklykda, Türkmenistanyň Halk Maslahatynyň mejlisiniň prezidiumy saýlanylýar. Milli Liderimiz olardan öz ýerlerine geçmeklerini haýyş edýär.

Gahryman Arkadagymyz ýygnananlary we ýurdumyzyň ähli halkyny Watanymyzyň beýik Garaşsyzlygynyň 33 ýyllyk baýramy bilen tüýs ýürekden gutlady hem-de hemmelere berk jan saglyk, merdana türkmen halkyna gülläp ösüş, bagtyýarlyk arzuw edip, forumyň wekilleriniň mejlisiň gün tertibi, serediljek soraglar bilen tanyşmaga mümkinçilik alandyklaryny belledi. Şeýle-de Milli Liderimiz gün tertibine hödürlenen soraglar we resminamalar boýunça teklipleriň, bellikleriň bardygy ýa-da ýokdugy bilen gyzyklandy.

Halk Maslahatynyň Başlygy Gurbanguly Berdimuhamedow ýygnananlaryň biragyzdan goldamagynda we doly makullamagynda Türkmenistanyň Halk Maslahatynyň mejlisiniň gün tertibiniň tassyklanylýandygyny yglan etdi. Soňra Gahryman Arkadagymyz çykyş edip, beýik türkmen şahyry we Gündogaryň akyldary Magtymguly Pyragynyň arzuwlan Garaşsyz Türkmenistanyň geçen şöhratly ýoluny, demokratik, hukuk, dünýewi döwletimizi mundan beýläk-de ösdürmegiň ileri tutulýan ugurlaryny beýan etdi.

Türkmen halkynyň Milli Lideri ýygnananlara ýüzlenip, ýene-de sanlyja günden berkarar Watanymyzyň mukaddes Garaşsyzlygynyň 33 ýyllyk baýramynyň ýokary derejede, giňden bellenilip geçiljekdigini aýtdy. Garaşsyzlyk mähriban halkymyzyň we eziz Watanymyzyň bütin dünýäde ykrar edilmegidir. Ähli üstünliklerimiziň, beýik ösüşlerimiziň aýdyň ýoludyr diýip, Halk Maslahatynyň Başlygy nygtady.

Garaşsyz, hemişelik Bitarap Türkmenistanyň Prezidenti hormatly Serdar Berdimuhamedowyň baştutanlygynda ýurdumyzda amala aşyrylýan düýpli özgertmeler giň gerimi hem-de täzeçilligi bilen tapawutlanýar. Bu özgertmeler döwlet hem jemgyýetçilik durmuşynyň ähli ugurlaryny gurşap alýar. Ýurdumyzyň her bir raýaty ata Watanymyza belent söýgüsi bilen ýaşaýar we yhlasly zähmet çekýär. Abadançylygyň, bagtyýarlygyň, gülläp ösüşiň hatyrasyna döwlet adama, adam bolsa döwlete gulluk edýär. Munuň özi «Döwlet adam üçindir!» diýen taglymatymyzyň esasynda alyp barýan işlerimiziň rowaçlanýandygyny görkezýär diýip, Gahryman Arkadagymyz sözüni dowam etdi.

Bellenilişi ýaly, «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasy», “Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasy”, Oba milli maksatnamasy, “Türkmenistany 2024-nji ýylda durmuş-ykdysady taýdan ösdürmegiň we maýa goýum Maksatnamasy”, Halk Maslahatynyň işiniň esasy ugurlary boýunça Türkmenistanyň Mejlisi, ministrlikleri, pudaklaýyn dolandyryş edaralary hem-de jemgyýetçilik birleşikleri bilen bilelikde şu ýyl ýerine ýetirilmeli işleriň we geçirilmeli çäreleriň Meýilnamasy, kabul edilen beýleki maksatnamalar üstünlikli amala aşyrylýar. Döwletimiziň ykdysady kuwwaty artyp, halkara abraýy pugtalanýar, halkymyzyň hal-ýagdaýy barha ýokarlanýar.

Türkmen halkynyň Milli Lideri Gurbanguly Berdimuhamedow hormatly Prezidentimiz Arkadagly Gahryman Serdarymyzyň baştutanlygynda «Pähim-paýhas ummany Magtymguly Pyragy» ýylynyň syýasy, ykdysady, medeni galkynyşlara, şöhratly wakalara baý ýyllaryň biri bolup taryha girjekdigine berk ynam bildirdi.

Gahryman Arkadagymyz ýurdumyzyň ýokary wekilçilikli edarasynyň işi barada aýdyp, Türkmenistanyň Halk Maslahatynyň döwlet ähmiýetli meseleleri çözmäge, halkymyzyň agzybirligini hem-de jebisligini has-da berkitmäge ýakyndan gatnaşýandygyny, Garaşsyz, hemişelik Bitarap döwletimiziň hemmetaraplaýyn ösmegine ýardam bermek boýunça degişli işleri durmuşa geçirýändigini nygtady.

Halk demokratiýasynyň bu kadasy ýurdumyzyň jemgyýetçilik-syýasy durmuşynda mynasyp orny eýeleýär. Raýatlarymyzyň watansöýüjiligi, häkimiýet bilen halkyň mizemez bitewüligi bolsa döwlet durmuşynyň binýady, kämil jemgyýetçilik gatnaşyklarynyň esasy bolup durýar. Şoňa görä-de, ýurdumyzda häkimiýet bilen halkyň, döwlet bilen jemgyýetiň arabaglanyşygyny has-da pugtalandyrmak babatda tagalla edilýär diýip, türkmen halkynyň Milli Lideri sözüni dowam etdi we bu ugurda Türkmenistanyň Halk Maslahatynyň ýanynda döredilen Ýaşulular geňeşiniň işine uly ähmiýet berilýändigine ünsi çekdi.

Ýaşulular geňeşiniň agzalarynyň terbiýeçilik, wagyz-nesihat, ösüp gelýän ýaş nesillerimizi goldamak babatda ýerlerde alyp barýan işleri, oba zähmetkeşleri bilen geçirýän çäreleri agzybirligimizi pugtalandyrmaga, milli bitewüligimizi berkitmäge, watansöýüji nesilleri kemala getirmäge uly ýardam berýär. Eden işi nusgalyk, parasatly gojalarymyz, enelerimiz halkymyzyň guwanjy hem buýsanjydyr. Şoňa görä-de, eziz Watanymyzy ýürekden söýmegi, ata-enä hormat goýmagy, halal ýaşamagy ündeýän ýaşuly nesillerimize hormatymyz örän uludyr diýip, Gahryman Arkadagymyz nygtady.

Beýik akyldar şahyrymyz Magtymguly Pyragynyň Garaşsyz döwlet baradaky arzuwlary bu gün doly hasyl boldy. Bize pederlerimiziň belent hem-de asylly arzuwlary hakykata öwrülen parahat, asuda, berkarar ýurtda ýaşamak we döretmek bagty miýesser etdi. Nesip bolsa, geljekde has-da uly işleri amala aşyryp, kuwwatly kärhanalary, önümçilik merkezlerini, täze, döwrebap şäherleri, şäherçeleridir obalary gurarys. Ata Watanymyzyň görküni has-da gözelleşdireris. Mähriban halkymyzyň maksada okgunly işleri bilen ykdysady taýdan kuwwatly döwlet hökmünde ýurdumyzyň abraýynyň yzygiderli ýokarlanmagyny, jemgyýetimiziň gülläp ösmegini gazanarys diýip, Türkmenistanyň Halk Maslahatynyň Başlygy sözüni dowam etdi.

Şu ýylyň ýokary görkezijileri döwlet Baştutanymyzyň durmuşa geçirýän oýlanyşykly içeri we daşary syýasatynyň örän dogrudygyny görkezýär. Welaýatlara amala aşyrýan iş saparlarymda dürli kärdäki adamlar bilen duşuşanymda nygtaýan esasy meseläm halkymyzyň agzybirligini has-da pugtalandyrmak, ýurdumyzyň ösüşini mundan beýläk-de ýokarlandyrmak bilen baglydyr. Agzybirlik, asudalyk, zähmetsöýerlik eziz Diýarymyzyň rowaçlyklarynyň binýadydyr. Şeýle halky bolan döwletiň geljegi aýdyňdyr hem-de beýikdir diýip, türkmen halkynyň Milli Lideri nygtady.

Gahryman Arkadagymyz ykdysady ösüşiň her bir ýurduň durnukly öňe gitmeginiň möhüm şertidigini aýdyp, biziň ykdysady üstünliklerimiziň halkymyzyň ýaşaýyş-durmuş derejesini has-da ýokarlandyrmaga gönükdirilendigini aýratyn buýsanç bilen belledi. Şunuň bilen baglylykda, türkmen halkynyň Milli Lideri adam başyna düşýän girdejiniň ýokary derejesini; ähli pudaklarda zähmet öndürijiliginiň ýokary bolmagyny; ykdysady özgertmeleriň işjeň depginini; adam maýasynyň hem-de ylmy-tehnologik ösüşleriň ýokary derejesini; dünýä bazarynda bäsdeşlige ukyplylygy ykdysady ösüşleriň hem-de kuwwatly döwletiň esasy aýratynlyklarynyň hatarynda görkezdi. Şeýle bolansoň, ýurdumyzy durmuş-ykdysady taýdan mundan beýläk-de ösdürmek, Bitarap döwletimiziň halkara abraýyny has-da ýokarlandyrmak hemmämiziň esasy wezipämiz bolup durýar.

Halk Maslahatynyň Başlygy çykyşyny dowam edip, Garaşsyz döwletimiziň we jemgyýetimiziň ösüşiniň ylym, bilim, medeniýet bilen berk baglydygyna ünsi çekdi. Altyn güýzüň ilkinji gününde — Bilimler we talyp ýaşlar gününde ýurdumyzda täze, döwrebap orta mekdepler, çagalar baglary dabaraly açyldy. Birinji synpa kabul edilen okuwçylaryň 155 müň 641-sine hormatly Prezidentimiziň adyndan ýurdumyzda öndürilen kompýuterler sowgat hökmünde gowşuryldy. «Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasy» esasynda bilim işini halkara ölçeglere laýyk kämilleşdirmäge badalga berildi. Geljekde hem ýurdumyzda döwrebap bilim edaralary gurlup, ylmyň we innowasiýalaryň ileri tutulýan ugurlary boýunça tehnologiýalar merkezleri döredilse maksadalaýyk bolar diýip hasap edýärin diýip, Gahryman Arkadagymyz nygtady we dünýäniň öňdebaryjy uniwersitetleriniň sanawyna girýän bilelikdäki ýokary okuw mekdepleri ýa-da olaryň şahamçalary açylsa, ýaşlarymyz üçinem, jemgyýetimiz üçinem bähbitli boljakdygyna ynam bildirdi.

Milli Liderimiz ýaşlar barada döwlet syýasatyny amala aşyrmak bilen bagly mesele dogrusynda-da durup geçdi. Şunuň bilen baglylykda, mekdebe çenli çagalar edaralarynyň hem-de umumybilim berýän orta mekdepleriň sanyny artdyrmagy; saglygy sebäpli mümkinçiligi çäkli çagalar bilen alnyp barylýan işleri kämilleşdirmegi, olar bilen işleýän pedagogik işgärleriň hünärini ýokarlandyrmagy; ýokary okuw mekdeplerinde ylym-bilim-önümçilik arabaglanyşygynyň kämil usulyny döretmegi; ýaş nesilleri milli gymmatlyklarymyza, däp-dessurlarymyza buýsanç ruhunda, ynsanperwer kadalarymyz esasynda terbiýelemek üçin meşhur şahsyýetlerimiziň ýadygärliklerini ebedileşdirmek boýunça degişli işleri alyp barmagy; müňýyllyklardan gözbaş alýan medeniýetimizi, edebiýatymyzy, şöhratly taryhymyzy täze nazaryýet esasynda düýpli öwrenmegi hem-de ylmy taýdan beýan etmegi; Arkadag şäheriniň dünýäniň ylym-bilim merkezi hökmündäki ornuny pugtalandyryp, şäherde Türkmenistanyň gadymy, orta asyrlar, täze we iň täze taryhyny, arheologik, binagärlik ýadygärliklerini, döwletimiziň alyp barýan syýasatyny öwrenýän hem-de wagyz edýän halkara ylmy-barlag merkezini döretmegi möhüm hasap edýärin diýip, Gahryman Arkadagymyz belledi.

Türkmenistanyň Halk Maslahatynyň Başlygy mejlise gatnaşyjylara ýüzlenip, täze döwrüň amala aşyrylýan özgertmeleri has-da giňeldip, jemgyýetimiziň aň-bilim mümkinçiligini ýokarlandyrmagy talap edýändigini nygtady. Şoňa görä-de, şu ýylyň ahyryna çenli toplumlarda ylym, bilim, medeniýet ulgamlaryny kämilleşdirmek, ýaşlar barada döwlet syýasaty bilen bagly maslahatlary geçirmek teklip edildi.

Türkmen halkynyň Milli Lideri Gurbanguly Berdimuhamedow durmuşa geçirilýän syýasatyň ykdysady ugruna degip geçip, kabul edilen maksatnamalaryň çäklerinde Aşgabat we Arkadag şäherleriniň daş-töwereklerinde, welaýatlarda tokaý zolaklarynyň, Hazaryň kenarynda «Awaza» milli syýahatçylyk zolagynyň döredilmeginiň, Garagumuň merkezinde «Altyn asyr» Türkmen kölüniň gurulmagynyň, ekologik howpsuzlygy üpjün etmek boýunça alnyp barylýan beýleki işleriň ýurdumyzda daşky gurşawy goramak, şäherdir obalarymyzy bagy-bossanlyga öwürmek meselesine uly ähmiýet berilýändigini aýdyň görkezýändigine ünsi çekdi. Döwletimiz bu ugurda maksada okgunly işleri alyp barýar, halkara guramalar bilen netijeli hyzmatdaşlyk edýär. Biz bu işleri geljekde has-da ýokary depginde dowam etdirmelidiris diýip, Gahryman Arkadagymyz nygtady.

Ykdysadyýetimiziň pudaklarynda amala aşyrylýan özgertmeleriň ilatyň iş bilen üpjünçiligini gowulandyrmaga mümkinçilik berýändigi bellenildi. Şunuň bilen baglylykda, «Türkmenistanyň zähmet bazaryny 2030-njy ýyla çenli ösdürmegiň Konsepsiýasyny» kabul etmegi zerur hasaplaýaryn. Bu Konsepsiýa iş üpjünçiligi boýunça halkara guramalar, daşary ýurt döwletleri bilen hyzmatdaşlygy giňeltmekde, hususan-da, Halkara Zähmet Guramasynyň konwensiýalaryna goşulmakda möhüm ädim bolar diýip pikir edýärin diýip, Türkmenistanyň Halk Maslahatynyň Başlygy aýtdy.

Maliýe bazaryny ösdürmek, telekeçiligiň täze görnüşlerini we usullaryny ornaşdyrmak hem döwrüň talabydyr. Ýurdumyzyň durmuş-ykdysady ösüşiniň berk binýady bolan pul-karz, walýuta, maliýe, salgyt-býujet ulgamlary yzygiderli kämilleşdirilýär. Ýokary hilli, bäsdeşlige ukyply önümleri öndürmekde, azyk howpsuzlygyny berkitmekde, döwrebap senagat kärhanalaryny, şäherdir obalary gurmakda telekeçilerimiz uly işleri alyp barýarlar. Şunuň bilen baglylykda, Gahryman Arkadagymyz 2030-njy ýyla çenli maliýe bazaryny ösdürmegiň Strategiýasynyň, kiçi we orta telekeçiligi goldamagyň Milli maksatnamasynyň kabul edilmegini, şeýlelikde, ýurdumyzy ýokary depginde ösdürmegiň täze tapgyryna badalga berilmegini möhüm wezipeleriň hatarynda görkezdi.

Çykyşynyň dowamynda türkmen halkynyň Milli Lideri Türkmenistanyň Halk Maslahatynyň geljek ýylda geçiriljek mejlisine 2026 — 2052-nji ýyllarda ýurdumyzyň daşary ykdysady işini; döwlet-hususy hyzmatdaşlygyny; sanly ykdysadyýeti; ulag diplomatiýasyny; medeni diplomatiýasyny; ylmy-lukmançylyk diplomatiýasyny; ýokary bilimi ösdürmegiň Strategiýalarynyň; intellektual eýeçilik ulgamyny ösdürmegiň Konsepsiýasynyň; 2030-njy ýyla çenli bedenterbiýäni we sporty goldamagyň hem-de ösdürmegiň Maksatnamasynyň taslamalaryny hödürlemegi teklip etdi.

Biz geljek, 2025-nji ýylda şanly senäni — Türkmenistanyň hemişelik Bitaraplygynyň 30 ýyllygyny halkara derejede giňden belläp geçeris diýip, Gahryman Arkadagymyz sözüni dowam etdi we Birleşen Milletler Guramasynyň Baş Assambleýasynyň 78-nji sessiýasynyň 63-nji plenar mejlisinde Türkmenistanyň başlangyjy bilen 2025-nji ýylyň «Halkara parahatçylyk we ynanyşmak ýyly» diýlip yglan edilendigini ýatlatdy. Şunuň bilen baglylykda, biz Garaşsyz döwletimiziň hemişelik Bitaraplygynyň 30 ýyllygy belleniljek Halkara parahatçylyk we ynanyşmak ýylynda dünýäde hyzmatdaşlygy hem-de özara düşünişmegi pugtalandyrmagy ählumumy wezipe hasaplaýarys diýip, Halk Maslahatynyň Başlygy nygtady.

Bitaraplyk biziň parahatçylygy we hyzmatdaşlygy ündeýän, halklary dost-doganlyga, agzybirlige çagyrýan, ynsanperwerligi wagyz edýän işlerimizi dünýä ýaýýan taglymatdyr. Bu taglymat eziz Watanymyzyň beýik geljeginiň şanyna döredýän hem gurýan merdana halkymyza täze üstünlikleri gazanmaga güýç-kuwwat berýär. Geçen 30 ýylyň dowamynda Bitarap döwletimiz bu ugurda baý tejribe toplap, ylalaşyklylygyň we dostlugyň merkezine öwrüldi. Ýurdumyz halkara bileleşigiň jogapkärli agzasy hökmünde Bitaraplyk hukuk ýagdaýyna daýanyp, geljekde-de «Dialog — parahatçylygyň kepili» atly filosofiýa esasynda halkara gatnaşyklaryň ösüşine mynasyp goşant goşar diýip, Gahryman Arkadagymyz aýtdy.

Merdana halkymyzy beýik işlere galkyndyrmakda hem-de jebisleşdirmekde geçirilýän syýasy-jemgyýetçilik çäreleriniň ähmiýeti uludyr. Şoňa görä-de, raýatlarymyzy täze üstünliklere ruhlandyrmakda Türkmenistanyň Halk Maslahatynyň we Mejlisiniň, ministrlikleriň we pudaklaýyn dolandyryş edaralarynyň, häkimlikleriň, syýasy partiýalaryň, jemgyýetçilik birleşikleriniň işlerini sazlaşykly dowam etdirmeli. Biziň esasy wezipämiz halkymyzyň egsilmez güýjüni ýurdumyzy mundan beýläk-de gülledip ösdürmäge gönükdirmekden ybaratdyr diýip, türkmen halkynyň Milli Lideri nygtady.

Häzirki döwürde Arkadag şäherini ösdürmek, onuň ikinji tapgyryny gurmak bilen bagly işleri alyp barýarys. Ýurdumyzda, şol sanda Arkadag şäherinde sagdyn durmuş ýörelgeleriniň berkidilmegine, senagat we önümçilik desgalarynyň ýokary ekologik talaplara laýyk gelmegine möhüm ähmiýet berýäris. Şäherde «Arkadag Medisina Klasteri Menejment» kärhanasynyň durmuşa geçirýän işleri muňa şaýatlyk edýär. Biziň amala aşyrýan beýik işlerimiz raýatlarymyzyň, çagalarymyzyň, agtyk-çowluklarymyzyň bagtyýar geljegine gönükdirilendir diýip, Gahryman Arkadagymyz nygtady.

Şu ýylyň martynda ynsanperwer gymmatlyklary goldanýan Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň üç ýyllygyny dabaraly ýagdaýda belledik. Garaşsyz ýurdumyzda gaznanyň serişdeleriniň hasabyna köp sanly çaganyň saglygy dikeldildi we bu ynsanperwer işi biz geljekde-de dowam etdireris. Bu işler üçin biziň ýeterlik serişdelerimiz bar. Eziz Diýarymyzyň bagtyýar nesilleri baradaky alada biziň beýik hem ýagty geljegimiz hakyndaky aladadyr. Amala aşyrýan bu işlerimiz türkmenistanlylaryň häzirki we geljek nesilleriniň bagtyýar durmuşynyň berk binýadyny berkitmekde möhüm ähmiýete eýedir. Gaznanyň alyp barýan işine halkara derejede ýokary baha berilmegi döwletimizde howandarlygyň, çagalara mähirli garaýşyň nusgalyk tejribesiniň toplanandygyny, Garaşsyz döwletimiziň ynsanperwer syýasatynyň üstünliklere beslenýändigini görkezýär diýip, Halk Maslahatynyň Başlygy aýtdy.

Watan mukaddesdir, onuň hatyrasyna ýerine ýetirilýän işler hem mukaddesdir. Şoňa görä-de, berkarar Watanymyzyň abraý-mertebesine, bedew batly ösüşine dahylly her bir işe ýürekden ýapyşmalydyrys. Bilelikde yhlasly zähmet çekip, eziz Diýarymyzy has-da beýgeltjek tutumly işleri amala aşyrmalydyrys diýip, hormatly Arkadagymyz çykyşynyň ahyrynda aýtdy we foruma gatnaşyjylara hem-de halkymyza berk jan saglyk, bagtyýar hem abadan durmuş arzuw etdi.

Türkmen halkynyň Milli Lideriniň çykyşy uly üns bilen diňlenildi we dowamly el çarpyşmalar bilen garşylanyldy. Soňra Gahryman Arkadagymyz umumymilli foruma gatnaşyjylara söz berdi.

Ilki bilen, Lebap welaýatynyň Türkmenabat şäheriniň ýaşaýjysy H.Ereşow çykyş edip, ähli ýaşulularyň adyndan Gahryman Arkadagymyzy, hormatly Prezidentimizi we ähli watandaşlarymyzy Türkmenistanyň Garaşsyzlygynyň 33 ýyllygy bilen tüýs ýürekden gutlady.

Bellenilişi ýaly, häzirki wagtda Türkmenistan ösüşiň ýoly bilen öňe barýar. Gahryman Arkadagymyzyň başlangyjy bilen paýtagtymyzyň günorta künjeginde bina edilen «Magtymguly Pyragy» medeni-seýilgäh toplumynyň açylmagy şu ýylyň möhüm wakalarynyň biri boldy. Medeni-seýilgäh toplumynyň merkezinde türkmen we dünýä edebiýatynyň meşhur nusgawy şahyrynyň ýadygärliginiň oturdylmagy hemmämizde uly buýsanç döredýär. Şahyryň ajaýyp eserlerinde çuňňur garaýyşlar beýan edilýär. Olar diňe bir türkmen halkynyň däl, eýsem, bütin adamzadyň ruhy dünýäsini baýlaşdyrýar.

Ýaşuly nesliň wekili halkymyzyň, her bir maşgalanyň, ýurdumyzyň her bir raýatynyň abadançylygy ugrunda edýän uly aladalary üçin türkmen halkynyň Milli Liderine hoşallygyny beýan edip, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň alyp barýan giň gerimli işleriniň ençeme çagalaryň arzuwlaryna ganat, geljegine umyt berendigini belledi. Şeýle-de Gahryman Arkadagymyzyň ähli welaýatlarda metjitleri gurdurmak baradaky başlangyjynyň ähmiýeti nygtaldy. Gadymy Änew topragynda Seýit Jemaleddin metjidi guruldy, Arkadag şäherinde täze metjidiň düýbi tutuldy. Arkadagly hajy Serdarymyzyň başda durmagynda müňlerçe raýatlaryň haj parzyny berjaý etmekleri üçin giň mümkinçilikleriň döredilmegi bolsa döwürleriň we nesilleriň, köpasyrlyk asylly ýörelgeleriň, parasatly ata-babalarymyzyň nusgalyk däp-dessurlarynyň dowamat-dowam bolýandygynyň aýdyň güwäsidir. Şunuň bilen baglylykda, çykyş eden türkmen halkynyň Milli Lideriniň ajaýyp eserlerinden ruhlanýan ýaşuly nesliň ýaşlary Watana söýgi, wepalylyk, zähmetsöýerlik, halkymyzyň gadymdan gelýän gymmatlyklaryna we däplerine ygrarlylyk ruhunda terbiýelemek üçin yhlasyny gaýgyrmajakdygyna ynandyrdy.

H.Ereşow ýaşulularyň Gahryman Arkadagymyzyň taryhy çykyşyny ruhubelentlik bilen diňländiklerini hem-de mejlisde kabul ediljek çözgütleriň ýurdumyzy mundan beýläk-de ösdürmäge kuwwatly itergi berjekdigine ynanýandyklaryny belledi. Ol Milli Liderimize, Arkadagly Gahryman Serdarymyza berk jan saglyk, uzak ömür, döwlet işlerinde uly üstünlikleri arzuw edip, çykyşyny goşgy setirleri bilen jemledi.

Soňra Mary welaýatynyň Mary şäher salgyt bölüminiň işgäri A.Jumamyradow çykyş edip, ykdysadyýet ulgamynyň ähli işgärleriniň adyndan Gahryman Arkadagymyzy «Pähim-paýhas ummany Magtymguly Pyragy» ýylynda giňden bellenilýän ýurdumyzyň mukaddes Garaşsyzlygynyň 33 ýyllygy bilen tüýs ýürekden gutlady. Bellenilişi ýaly, häzirki döwürde Türkmenistan ykdysady taýdan kuwwatly, durnukly ösýän döwlete öwrüldi. Muny ähli pudaklarda gazanylýan ajaýyp üstünlikleriň mysalynda aýdyň görmek bolýar.

«Döwlet adam üçindir!» diýen baş şygarymyz, Arkadagly Gahryman Serdarymyzyň «Watan diňe halky bilen Watandyr! Döwlet diňe halky bilen döwletdir!» diýen ynsanperwer ýörelgesi esasynda amala aşyrylýan beýik işler ýurdumyzyň ykdysadyýetiniň ösmegine, halkymyzyň ýaşaýyş-durmuş derejesiniň has-da ýokarlandyrylmagyna gönükdirilendir. Önümçilik kärhanalarynyň, zawoddyr fabrikleriň gurulmagy döwlet syýasatynyň ykdysady ugruny pugtalandyryp, Garaşsyz, hemişelik Bitarap Türkmenistanyň sebitde we dünýäde Durnukly ösüş maksatlaryna ýetmek ugrunda ynamly öňe barýandygyny görkezýär diýip, çykyşda bellenildi.

BMG-niň Ykdysady we Durmuş geňeşiniň mejlisinde Türkmenistanyň BMG-niň Durmuş ösüşi boýunça komissiýasynyň 2025 — 2029-njy ýyllar üçin agzalygyna biragyzdan saýlanylmagy biziň ösüşlerimize bütin dünýäde ýokary baha berilýändigine aýdyň şaýatlyk edýär. Ýaş hünärmen Arkadag şäheriniň açylmagynyň hem-de şäheriň ikinji tapgyrynyň gurluşygyna girişilmeginiň, ýakynda Türkmenistanyň maýa goýum forumynyň ýokary derejede geçirilmeginiň, TOPH taslamasynyň möhüm tapgyry bolan Arkadagyň ak ýoly bilen Serhetabat — Hyrat gaz geçirijisiniň, optiki-süýümli aragatnaşyk ulgamynyň gurluşygyna badalga berilmeginiň, Owganystanyň Hyrat welaýatynda «Nur-el-Jahad» elektrik bekediniň işe girizilmeginiň, beýleki wajyp taslamalaryň amala aşyrylmagynyň Türkmenistanyň oňyn başlangyçlaryň ýurdy hökmünde abraýyny has-da berkidip, ykdysady kuwwatynyň artmagyna mynasyp goşant goşjakdygyna ynam bildirdi.

A.Jumamyradow çykyşyny joşgunly goşgy setirleri bilen jemläp, ykdysadyýet ulgamynyň ähli işgärleriniň adyndan Türkmenistanyň Halk Maslahatynyň Başlygy Gurbanguly Berdimuhamedowa we hormatly Prezidentimiz Serdar Berdimuhamedowa berk jan saglyk, uzak ömür, Watanymyzyň abadançylygy ugrunda alyp barýan asylly işlerinde uly üstünlikleri arzuw etdi.

Soňra Balkan welaýatynyň Esenguly etrap medeniýet bölüminiň hünärmeni J.Garajaýewa söz berildi. Ol medeniýet we sungat işgärleriniň adyndan türkmen halkynyň Milli Liderini, Arkadagly Gahryman Serdarymyzy we ähli türkmen halkyny Türkmenistanyň Garaşsyzlygynyň 33 ýyllygy bilen tüýs ýürekden gutlady.

Bellenilişi ýaly, Gahryman Arkadagymyzyň ýiti zehininden, egsilmez döredijilik ylhamyndan dörän «Pähim-paýhas ummany Magtymguly Pyragy» atly ajaýyp goşgy Garaşsyz Watanymyzyň tutuş bir ýylyny — 2024-nji ýyly uly joşguna besleýär. Paýtagtymyzda Magtymguly Pyragynyň ýadygärliginiň we şahyryň adyny göterýän medeni-seýilgäh toplumynyň açylmagy, türkmen edebiýatynyň nusgawy şahyrynyň doglan gününiň 300 ýyllygynyň bellenilýän ýylynda «Magtymguly» atly goşgular ýygyndysynyň üç dilde çap edilmegi Gündogaryň beýik akyldaryna goýulýan belent sarpanyň aýdyň nyşanydyr. Çykyşda Türkmenistanyň «Magtymguly Pyragynyň 300 ýyllygyna» atly ýubileý medalyny döretmek hem-de söz ussadynyň medeni mirasyny gorap saklamak we geljek nesillere ýetirmek maksady bilen, «Magtymguly Pyragynyň medeni mirasy hakynda» Türkmenistanyň Kanunyny kabul etmek baradaky başlangyçlary öňe sürendigi üçin, türkmen halkynyň Milli Liderine hoşallyk beýan edildi.

Magtymguly Pyragynyň baý döredijiligini dünýä ýaýmak boýunça ýerine ýetirilen işleriň çäklerinde, akyldaryň golýazmalar toplumynyň ÝUNESKO-nyň «Dünýäniň hakydasy» maksatnamasynyň halkara sanawyna girizilmegi, şahyryň doglan gününiň 300 ýyllygynyň ÝUNESKO bilen bilelikde bellenilip geçilýän şanly seneleriň sanawyna goşulmagy watandaşlarymyzyň kalbynda çäksiz buýsanç duýgusyny döredýär. Medeniýet ulgamynyň wekili halkymyzyň gadymy döwürlerden bäri enä mukaddeslik hökmünde sarpa goýýandygyny, Gahryman Arkadagymyzyň bu däbi mynasyp dowam etdirip, ata-enäni hormatlamagyň nusgalyk göreldesini görkezýändigini nygtady. Türkmen halkynyň Milli Lideriniň mähriban käbesi Ogulabat ejäniň we Türkmenistanyň at gazanan halyçysy Ogulgerek Berdimuhamedowanyň nusgalyk göreldesi nesilleri ruhy-ahlak ýörelgelerine laýyklykda terbiýelemegiň asylly mekdebidir.

Çykyşda Gahryman Arkadagymyzyň şöhratly taryhymyz, medeniýetimiz, ruhy gymmatlyklarymyz hakynda söz açýan eserleriniň dünýäniň ençeme diline terjime edilip, halklaryň arasyndaky dostluk köprüsine öwrülendigi nygtaldy. Gadymy Änew şäheriniň “Türki dünýäsiniň medeni paýtagty” diýlip yglan edilen ýylynda hormatly Prezidentimiziň «Änew — müňýyllyklardan gözbaş alýan medeniýet» atly ajaýyp kitabynyň çap edilmegi bolsa türkmen halkynyň Milli Lideriniň döredijilik ýolunyň mynasyp dowam etdirilýändigini görkezýär.

J.Garajaýewa umumymilli foruma gatnaşyjylaryň Halk Maslahatynyň şu gezekki taryhy mejlisinde beýan edilen teklipleri we kabul edilen çözgütleri ruhubelentlik bilen diňläp, hemmetaraplaýyn goldaýandyklaryny nygtady hem-de Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak bolmagyny, giň gerimli döwlet işleriniň üstünliklere beslenmegini arzuwlap, çykyşyny gazal bilen jemledi.

Soňra Daşoguz welaýatynyň Boldumsaz etrabynyň «Türkmenistan» daýhan birleşiginiň topar ýolbaşçysy M.Geldiýew çykyş etdi. Ol sözüniň başynda Gahryman Arkadagymyzy, hormatly Prezidentimizi we ähli türkmen halkyny Watanymyzyň Garaşsyzlygynyň 33 ýyllygy bilen tüýs ýürekden gutlady.

Bellenilişi ýaly, Arkadagly Gahryman Serdarymyzyň halkymyza peşgeş beren «Änew — müňýyllyklardan gözbaş alýan medeniýet» atly ajaýyp eseri ak bugdaýyň mekany bolan sahawatly türkmen topragynyň belent waspydyr.

Türkmen daýhanlary bu günki gün ata-babalarymyzyň asyrlaryň dowamynda sünnäläp, sungat derejesine ýetiren daýhançylyk tejribesini barha kämilleşdirýärler. Daýhanlara sahawatly toprakdan bol hasyl öndürip, halal zähmet çekip, eşretli durmuşda ýaşamaga ähli şertler döredilýär. Döwlet harmanyna tabşyrylan galla we pagta hasyly üçin hasaplaşyklar öz wagtynda geçirilýär diýlip, çykyşda bellenildi. Şeýle-de çykyş eden ýurdumyzda oba hojalyk önümleriniň döwlet satyn alyş nyrhlaryny ýokarlandyrmak hakynda Kararyň türkmen daýhanlaryny täze üstünliklere ruhlandyrandygyny nygtady.

Çykyşda bellenilişi ýaly, ylmy-barlag institutlarynyň döredilmegi oba hojalyk pudagynda düýpli özgertmeleriň durmuşa geçirilýändigine, gadymy daýhançylyk tejribeleriniň ylmyň ýokary gazananlary bilen sazlaşykly alnyp barylýandygyna şaýatlyk edýär. Ýakynda Aşgabatda Garaşsyz Döwletleriň Arkalaşygynyň Tohumçylyk meseleleri boýunça hökümetara utgaşdyryjy geňeşiniň nobatdaky mejlisiniň, ugurdaş halkara maslahatyň we serginiň geçirilmegi bu işleriň ylmy esasda utgaşykly alnyp barylýandygynyň aýdyň mysalydyr.

M.Geldiýew türkmen alymlary tarapyndan güýzlük bugdaýyň «Serdar», «Arkadag», «Pyragy» atly täze görnüşleriniň döredilmegi bilen Gahryman Arkadagymyzy we Arkadagly Gahryman Serdarymyzy ähli oba hojalykçylaryň adyndan tüýs ýürekden gutlap, olaryň önümçilige ornaşdyrylmagynyň geljekde bu ekiniň hasyllylygyny artdyrmaga mümkinçilik döretjekdigine ynam bildirdi.

Çykyşda dünýäniň işjeň senagatlaşýan döwletine öwrülen Türkmenistanda döwrebap azyk senagaty we gaýtadan işleýän kärhanalaryň, elewatorlaryň, ýyladyşhanalaryň, sowadyjy ammarlaryň sanynyň artýandygy bellenildi. Munuň özi gök önümleriň, miweleriň ösdürilip ýetişdirilýän möçberini artdyrmaga, ýylyň ähli paslynda ýurdumyzyň bazarlaryny azyk harytlary bilen bolelin üpjün etmäge mümkinçilik döredýär. Oba zähmetkeşleri hakynda edilýän bimöçber aladalaryň netijesinde obalarda döwrebap durmuş maksatly desgalar gurlup ulanmaga berilýär. Oba hojalyk ulgamynyň wekili türkmen halkynyň Milli Lideriniň Halk Maslahatynyň şu gezekki mejlisinde eden çuň manyly taryhy çykyşynyň türkmen halkyny täze zähmet üstünliklerine ruhlandyrjakdygyny belledi hem-de daýhanlaryň edilýän aladalara jogap edip, Garaşsyz, hemişelik Bitarap Watanymyzyň röwşen geljegi, halkymyzyň abadan durmuşy ugrunda mundan beýläk-de yhlasly halal zähmet çekjekdiklerine ynandyrdy.

Soňra Arkadag şäheriniň Enäniň we çaganyň saglygyny goraýyş merkeziniň lukmany M.Jumaýewa çykyş edip, ähli saglygy goraýyş işgärleriniň adyndan türkmen halkynyň Milli Liderini we döwlet Baştutanymyzy Türkmenistanyň mukaddes Garaşsyzlygynyň 33 ýyllygy bilen tüýs ýürekden gutlady.

Ol halkyň saglygyny goramagyň Gahryman Arkadagymyz tarapyndan başy başlanyp, häzirki wagtda hormatly Prezidentimiziň başda durmagynda mynasyp dowam etdirilýän döwlet syýasatynyň ileri tutulýan ugurlarynyň biridigini belledi. Ýurdumyzyň ähli künjeklerinde iň kämil lukmançylyk enjamlary bilen üpjün edilen köp sanly saglyk merkezleriniň, hassahanalaryň, şypahanalaryň gurlup ulanmaga berilmegi ilatyň saglygy hakyndaky aladanyň döwletimiziň hemişelik üns merkezinde saklanýandygyny aýdyň görkezýär. Şunuň bilen baglylykda, Arkadag şäherinde halkara hil standartlaryna doly laýyk gelýän lukmançylyk klasterini döretmek baradaky başlangyjyň ähmiýeti aýratyn nygtaldy.

Bellenilişi ýaly, Gahryman Arkadagymyz Watanymyzyň geljegi bolan ýaş nesliň saglygyny goramak babatda hemmetaraplaýyn alada edýär. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmegi munuň aýdyň güwäsidir. Häzirki wagtda gazna tarapyndan çagalaryň saglygyny goramak hem-de dikeltmek boýunça giň gerimli işler alnyp barylýar. Türkmen halkyna mahsus bolan dost-doganlyk, hoşniýetli goňşuçylyk, ynsanperwerlik ýörelgelerine eýerilip, gaznanyň serişdeleriniň hasabyna dünýäniň dürli ýurtlarynyň çagalaryna ynsanperwerlik kömekleri iberilýär. Ýakynda Koreýa Respublikasynyň Seul şäherinde geçirilen «akylly» şäherleriň «World Smart City Expo 2024» halkara sergisinde Arkadag şäheriniň üç sany abraýly baýraga mynasyp bolmagy watandaşlarymyzyň buýsanjyny has-da artdyrdy. Munuň özi Garaşsyz Watanymyzyň Ýer ýüzünde belent abraýa eýediginiň we gazanýan üstünlikleriniň halkara derejede ykrar edilýändiginiň nobatdaky mysalydyr.

M.Jumaýewa abadan durmuşda ýaşamak babatda döredýän mümkinçilikleri üçin Gahryman Arkadagymyza we hormatly Prezidentimize hoşallygyny beýan edip, çykyşyny joşgunly goşgy setirleri bilen jemledi.

Soňra Bäherden sement zawodynyň hünärmeni D.Meretgeldiýewe söz berildi. Ol senagat-gurluşyk toplumynyň işgärleriniň adyndan türkmen halkynyň Milli Liderini we Arkadagly Gahryman Serdarymyzy Watanymyzyň Garaşsyzlygynyň 33 ýyllyk baýramy bilen tüýs ýürekden gutlady.

Maslahata gatnaşyjy wekil ýurdumyzda senagat pudagynyň batly depginlerde ösýändigini, Garaşsyz Türkmenistanyň ykdysady kuwwatynyň pugtalanmagy babatda uly işleriň alnyp barylýandygyny nygtady. Bellenilişi ýaly, senagat pudagy milli ykdysadyýetimiziň geljegi uly, çalt depginler bilen ösýän pudaklarynyň biridir. Ýurdumyzda dünýä bazarynda isleg bildirilýän dürli görnüşli önümler öndürilýär. “Pähim-paýhas ummany Magtymguly Pyragy” şygary astynda geçýän şu ýylda Lebap welaýatynda Lebap sement zawodynyň, Ahal welaýatynda Bäherden sement zawodynyň ikinji tapgyrlary ulanmaga berildi. Munuň özi ýokary hilli sementiň daşary döwletlere eksportyny artdyrmaga mümkinçilik berdi.

Elektroenergetika pudagynda gazanylýan üstünlikler barada durup geçip, çykyş eden ýokary woltly elektrik geçirijileriniň, «Balkan» we «Daşoguz» elektrik beketleriniň gurulmagynyň, ýurdumyzda bitewi halkalaýyn energoulgamyň döredilmeginiň diňe bir içerki sarp edijileriň elektrik energiýasy bilen bökdençsiz üpjün edilmegini däl, eýsem, ony daşary ýurtlara ibermäge hem mümkinçilik berendigini belledi. Şunuň bilen baglylykda, Balkan welaýatynda köpugurly Gün we ýel elektrik stansiýasynyň gurlup ulanmaga berilmeginiň ýurdumyzda energiýanyň gaýtadan dikeldilýän çeşmelerini ulanmak babatda täze tapgyr boljakdygyna ynam bildirildi. D.Meretgeldiýew türkmen gurluşykçylary tarapyndan gurlup, dünýäni haýrana goýan Arkadag şäheriniň möhüm ähmiýetini aýratyn nygtady. Gahryman Arkadagymyzyň çuň many-mazmunly çykyşynyň mejlise gatnaşyjylaryň eziz Watanymyza bolan buýsanç duýgusyny has-da artdyrandygyny belläp, ol gurluşyk-senagat pudagynyň ösdürilmegi babatda edilýän hemmetaraplaýyn aladalar üçin çuňňur hoşallyk bildirdi.

Türkmen halkynyň Milli Liderine we hormatly Prezidentimize Watanymyzyň gülläp ösmeginiň hatyrasyna alyp barýan asylly işlerinde uly üstünlikleri arzuw edip, ýaş hünärmen çykyşyny joşgunly goşgy setirleri bilen jemledi.

Soňra “Türkmendeňizderýaýollary” agentliginiň baş hünärmeni T.Gurtgeldiýew çykyş etdi. Ulag-kommunikasiýa toplumynyň işgärleriniň adyndan Gahryman Arkadagymyzy, hormatly Prezidentimizi we ähli türkmen halkyny Watanymyzyň Garaşsyzlygynyň 33 ýyllygy bilen tüýs ýürekden gutlap, ol “Pähim-paýhas ummany Magtymguly Pyragy” şygary astynda geçýän ýylyň her bir gününiň şanly wakalara beslenýändigini nygtady.

Häzirki wagtda ýurdumyzda döwrebap, köpugurly ulag-kommunikasiýa ulgamyny döretmek boýunça iri taslamalaryň üstünlikli durmuşa geçirilýändigi bellenildi. Sebit we halkara ulag geçelgeleriniň möhüm bölegi bolup durýan awtomobil, demir ýollaryň, täze köprüleriň, howa menzilleriniň, Merkezi Aziýanyň “deňiz derwezesi” hasaplanýan Türkmenbaşy Halkara deňiz portunyň gurulmagy, şu ýylda Aşgabat — Türkmenabat ýokary tizlikli awtomobil ýolunyň Tejen — Mary böleginiň açylyp ulanmaga berilmegi, Garabogazköl aýlagynyň üstünden geçýän köpriniň gurluşygy, “Balkan” gämi gurluşyk we abatlaýyş zawodynda gury ýük gämileriniň gurluşygyna girişilmegi ulag ulgamynda ägirt uly kuwwatyň bardygyny görkezýär.

Çykyşda nygtalyşy ýaly, Gahryman Arkadagymyzyň strategik öňdengörüjiligi, döwlet Baştutanymyzyň başlangyçlary esasynda ýurdumyzyň okgunly ösüşiniň binýadyny emele getirýän sanly ulgamyň ornaşdyrylmagy boýunça giň gerimli işler alnyp barylýar. Arkadag şäheriniň we maglumat-aragatnaşyk enjamlary bilen enjamlaşdyrylan häzirki zaman desgalarynyň gurulmagy sanly hyzmatlaryň durmuşymyza giňden ornaşdyrylýandygyny subut edýär.

Pudagyň işgärleriniň multimodal ulag geçelgeleriniň netijeli ulanylmagy arkaly, ýurdumyzyň ulag-kommunikasiýa pudagynyň halkara hyzmatdaşlyga işjeň goşulyşmagyny dolulygyna goldaýandyklaryny belläp, T.Gurtgeldiýew ulgamy ösdürmek babatda hemmetaraplaýyn aladalary, zähmetkeşleriň ýaşamagy, zähmet çekmegi ugrunda amatly şertleriň döredilýändigi üçin Gahryman Arkadagymyza, Arkadagly Gahryman Serdarymyza çäksiz hoşallyk bildirdi.

Türkmen halkynyň Milli Liderine hem-de hormatly Prezidentimize berk jan saglyk, ýurdumyzyň gülläp ösmeginiň hatyrasyna alyp barýan asylly işlerinde uly üstünlikleri arzuw edip, maslahata gatnaşyjy wekil çykyşyny goşgy setirleri bilen jemledi.

Soňra çykyş etmek gezegi berlen harby gullukçy K.Öwezmuhammedow Watan goragçylarynyň adyndan türkmen halkynyň Milli Liderini we ähli ýygnananlary döwlet durmuşyndaky möhüm jemgyýetçilik-syýasy waka — Türkmenistanyň Halk Maslahatynyň mejlisiniň geçirilmegi bilen gutlady.

Biz mukaddes Garaşsyzlygymyzyň 33 ýyllygynyň giňden bellenilýän günlerinde geçirilýän bu ählihalk maslahatynda ýurdumyzy mundan beýläk-de depginli ösdürmäge, halkymyzyň bagtyýar durmuşyny üpjün etmäge gönükdirilen düýpli özgertmeleri amala aşyrmagyň ileri tutulýan wezipeleriniň kesgitleniljekdigine tüýs ýürekden ynanýarys diýip, çykyş eden aýtdy. K.Öwezmuhammedowyň belleýşi ýaly, Gahryman Arkadagymyzyň öňdengörüjilikli başlangyçlaryny üstünlikli dowam etdirýän Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy Serdar Berdimuhamedowyň baştutanlygynda toplumlaýyn harby özgertmeler geçirilip, harby we hukuk goraýjy edaralaryň maddy-enjamlaýyn binýady pugtalandyrylýar.

Döwlet Baştutanymyz harby gullukçylaryň, olaryň maşgala agzalarynyň gulluk, ýaşaýyş şertleri bilen hemişe gyzyklanyp, Milli goşunymyzyň güýç-kuwwatyny emele getirýän döwrebap tehnikalar bilen tanyşýar, harby gullukçylaryň hünär taýýarlygyna aýratyn üns berip, ýaş nesilleriň terbiýesi barada alada edýär. 1-nji sentýabrda — Bilimler we talyp ýaşlar gününde paýtagtymyzda Türkmenistanyň Goranmak ministrliginiň Berdimuhamet Annaýew adyndaky Ýöriteleşdirilen harby mekdebiniň ak mermerli täze binalar toplumynyň açylmagy munuň aýdyň mysalydyr. Bularyň ählisi Watan goragçylarynyň buýsanjyny, olaryň döwletimize, halkymyza yhlasly gulluk etmäge bolan isleglerini artdyrýar. Harby gullukçylar Gahryman Arkadagymyzyň sargytdyr maslahatlaryny mukaddes harby borjy ýerine ýetirmekde ruhubelentligiň we çäksiz buýsanjyň çeşmesi hökmünde kabul edýärler.

Häzirki wagtda ýurdumyzyň harby we hukuk goraýjy düzümlerinde watançylyk terbiýesini alan ýaşlar gulluk edýärler. Olar gahryman pederlerimiziň, edermen ata-babalarymyzyň nusgalyk göreldesinden ruhlanyp, Garaşsyz, Bitarap Watanymyzyň çäk bitewüliginiň, özbaşdaklygynyň goragyny üpjün edýärler. Harby we hukuk goraýjy edaralaryň şahsy düzüminiň adyndan döwletimiz tarapyndan edilýän aladalar üçin aýratyn hoşallyk bildirip, maslahata gatnaşyjy wekil harby gullukçylaryň Watanymyzyň Garaşsyzlygynyň 33 ýyllygy mynasybetli geçiriljek dabaraly harby ýörişden buýsanç bilen geçjekdiklerini nygtady.

Gahryman Arkadagymyza we hormatly Prezidentimize berk jan saglyk, uzak ömür, jogapkärli döwlet işlerinde uly üstünlikleri arzuw edip, harby gullukçy Watan goragçylarynyň ussat mugallym, edermen esger Berdimuhamet Annaýewiň, içeri işler edaralarynyň hormatly weterany Mälikguly Berdimuhamedowyň nusgalyk göreldesine eýerip, mähriban Diýarymyzyň parahatçylygynyň we asudalygynyň goragynda polat gala bolup durjakdyklaryna ynandyrdy.

Soňra Türkmenistanyň Telekommunikasiýalar we informatika institutynyň talyby S.Amanmyradow çykyş etdi. Ol ýurdumyzyň ýaşlarynyň adyndan Gahryman Arkadagymyzy we hormatly Prezidentimizi Watanymyzyň Garaşsyzlygynyň 33 ýyllygy bilen gutlady hem-de Berkarar döwletiň täze eýýamynyň Galkynyşy döwründe geçirilýän Halk Maslahatynyň mejlisine gatnaşmaga döredilen mümkinçilik üçin tüýs ýürekden hoşallyk bildirdi.

Arkadagly Gahryman Serdarymyzyň türkmen halkynyň Milli Lideriniň nusgalyk ýoluny dowam etdirmegi ýaş nesli beýik işlere ruhlandyrýar. Röwşen geljegi gurmak, döretmek işine işjeň gatnaşmak biziň üçin mukaddes borçdur diýip, çykyş eden aýtdy. Türkmen ýaşlary halkara olimpiadalara, ders bäsleşiklerine, sport ýaryşlaryna gatnaşyp, ýokary netijeleri görkezip, medallara, baýrakly orunlara mynasyp bolýarlar. 2023-nji ýylyň ahyrynda «Arkadag Serdarly bagtyýar ýaşlar ýyly» şygary astynda tamamlanan ýylyň jemlerine bagyşlanyp geçirilen halkara ylmy-amaly maslahat we köpugurly sergi ýaşlaryň kalbyna şatlyk paýlady. Hormatly Prezidentimiziň «Ýaşlar — Watanyň daýanjy», «Änew — müňýyllyklardan gözbaş alýan medeniýet» atly kitaplary ýaş nesli watançylyk ruhunda terbiýelemäge hyzmat edip, olary täze üstünlikleri gazanmaga ruhlandyrýar. Ol çykyşynda asman jisimlerini öwrenýän “Kosmos-Ýer” jemgyýetiniň alymlarynyň Arkadag şäheriniň açylmagynyň bir ýyllygy mynasybetli asman giňişligindäki ýyldyzlaryň birine “Arkadag” diýip at berendikleri we bu baradaky güwänamanyň, teleskopyň hem-de onuň düşüren suratlarynyň, Magtymguly adyndaky Türkmen döwlet uniwersitetine gowşurylmagy hakyndaky hoş habar barada-da durup geçdi.

Ilhalar mugallym Berdimuhamet Annaýewiň, içeri işler edaralarynyň hormatly weterany Mälikguly Berdimuhamedowyň, türkmen halkynyň Milli Lideriniň ömür ýollarynyň türkmen ýaşlary üçin watançylygyň ajaýyp nusgasydygy, Arkadagly Gahryman Serdarymyzyň parasatly ýörelgeleriniň ruhlandyryjy çeşmedigi bellenildi.

Maslahata gatnaşýan wekilleriň Halk Maslahatynyň şu gezekki taryhy mejlisinde kabul edilen çözgütleri ruhubelentlik bilen garşylandyklaryny nygtan S.Amanmyradow ýurdumyzyň ýaşlarynyň öňde goýlan belent maksatlara ýetmäge öz mynasyp goşantlaryny goşjakdygyna ynandyrdy.

Gahryman Arkadagymyzyň we döwlet Baştutanymyzyň adyna iň gowy arzuwlaryny beýan edip, talyp çykyşyny watançylyk goşgusy bilen jemledi.

Türkmen halkynyň Milli Lideri Gurbanguly Berdimuhamedow ara alyp maslahatlaşmalaryň jemini jemläp, şu günki taryhy mejlisde döwlet we syýasy-jemgyýetçilik durmuşynyň örän möhüm soraglarynyň ara alnyp maslahatlaşylandygyny, şolar boýunça çykyşlaryň diňlenilendigini, mejlisde çykyş edenleriň ählisiniň öňe sürlen başlangyçlary goldandyklaryny belledi. Şunuň bilen baglylykda, Gahryman Arkadagymyz çykyş edenleriň we ara alyp maslahatlaşmaga gatnaşanlaryň ählisine minnetdarlyk bildirdi.

Soňra gysga wagtlyk arakesme yglan edildi. Arakesmeden soňra, Halk Maslahatynyň mejlisi hormatly Prezidentimiz Serdar Berdimuhamedowyň gatnaşmagynda öz işini dowam etdi. Türkmen halkynyň Milli Lideri döwlet Baştutanymyza söz berdi. Arkadagly Gahryman Serdarymyz çykyşynda ýurdumyzda ýerine ýetirilen işleriň jemlerini jemledi.

Hormatly Prezidentimiz Serdar Berdimuhamedow ýygnananlary we ähli watandaşlarymyzy mähirli mübärekläp, Berkarar döwletiň täze eýýamynyň Galkynyşy döwründe baş baýramymyzy — Türkmenistanyň Garaşsyzlygynyň 33 ýyllygyny şanly wakalar we zähmet üstünlikleri bilen garşy alýarys diýip belledi hem-de hemmeleri bu şanly sene bilen tüýs ýürekden gutlap, olara berk jan saglyk, bagtyýar durmuş, alyp barýan işlerinde uly üstünlikleri arzuw etdi.

Döwlet Baştutanymyzyň belleýşi ýaly, Garaşsyzlyk ýyllarynda ýurdumyz belent sepgitlere ýetdi. Garaşsyz, hemişelik Bitarap döwletimiziň at-abraýyny ýokary derejä ýetiren türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň beýik başlangyçlary, döwletli tutumlary bilen ata Watanymyz kuwwatly döwlete öwrüldi. Biz şu gün Türkmenistanyň Halk Maslahatynyň mejlisini geçirmek bilen, Garaşsyz döwletimizi mundan beýläk-de ösdürmekde öňde durýan wezipeleri kesgitleýäris diýip, hormatly Prezidentimiz aýtdy.

Milli ykdysadyýetimiziň yzygiderli ösdürilmegi ilatymyzyň hal-ýagdaýyny has-da gowulandyrmaga şert döredýär. Şu ýylyň başyndan bäri jemi içerki önümiň ösüşi 6,3 göterim derejede durnukly saklanýar. Bu bolsa ýurdumyzda alnyp barylýan özgertmeleriň üstünlikli durmuşa geçirilýändigini görkezýär.

Biz döwlet maýa goýum syýasatynyň netijeliligini has-da ýokarlandyrmak üçin zerur işleri alyp barýarys. Sebit we milli derejedäki maýa goýum taslamalarymyz üstünlikli amala aşyrylýar. Munuň özi Diýarymyzyň sebitleriniň ykdysady kuwwatyny yzygiderli berkidýär. Şunuň bilen baglylykda, hormatly Prezidentimiz golaýda geçirilen Türkmenistanyň maýa goýum forumynyň döwletimiziň dünýä jemgyýetçiligi bilen ykdysady gatnaşyklaryny pugtalandyrmaga, täze işewürlik hyzmatdaşlygyny ýola goýmaga we ýurdumyzyň maýa goýum mümkinçilikleri bilen tanyşmaga gowy şert döredendigini belledi. Biz geljekde hem maýa goýum taslamalaryny durmuşa geçirmek, bu ugurdaky halkara hyzmatdaşlygy ösdürmek babatda alyp barýan işlerimizi dowam etdireris diýip, döwlet Baştutanymyz aýtdy.

«Türkmenistany 2024-nji ýylda durmuş-ykdysady taýdan ösdürmegiň we maýa goýum Maksatnamasy» esasynda ýurdumyzy ösdürmek üçin şu ýylyň ahyryna çenli 38 milliard 500 million manat möçberinde düýpli maýa goýumlar özleşdiriler. Bu bolsa täze önümçilik we medeni-durmuş maksatly desgalary gurmaga hem-de döwrebaplaşdyrmaga şert döredýär. Ýurdumyzda ähli amatlyklary bolan, döwrebap ýaşaýyş jaýlarynyň gurluşygy üstünlikli dowam edýär. Biz ilatyň, aýratyn-da, ýaş maşgalalaryň döwrebap ýaşaýyş jaýlaryny satyn almaklary üçin berilýän ýeňillikli karz we sarp ediş maksatly karzlaryň möçberini yzygiderli artdyrýarys. Ýurdumyzda mätäçlik çekýän raýatlar üçin döwlet serişdeleriniň hasabyna ähli amatlyklary bolan ýaşaýyş jaýlaryny gurup, goşmaça durmuş ýeňilliklerini döredýäris. Bu taryhy özgertmeleriň ählisi mähriban halkymyzyň bagtyýar durmuşda ýaşamagyna gönükdirilen tutumly işleriň üstünlikli amala aşyrylýandygyna aýdyň şaýatlyk edýär. Bu üstünlikler «Watan diňe halky bilen Watandyr! Döwlet diňe halky bilen döwletdir!» diýen syýasatymyzyň netijesidir diýip, hormatly Prezidentimiz Serdar Berdimuhamedow nygtady.

Döwlet Baştutanymyzyň belleýşi ýaly, biziň ykdysady syýasatymyzyň baş maksady halkymyzyň ýaşaýyş-durmuş derejesini yzygiderli gowulandyrmakdan ybaratdyr. Ýurdumyzyň ähli sebitlerinde täze iş orunlaryny döretmek we ilatyň durmuş taýdan goraglylygyny üpjün etmek boýunça toplumlaýyn işler alnyp barylýar. Döwrebap şäherleriň, täze obalaryň gurluşyklary dowam etdirilýär. Hormatly Prezidentimiz «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynda» göz öňünde tutulan wezipeleri geljek ýylda-da üstünlikli ýerine ýetirmek üçin «Türkmenistany 2025-nji ýylda durmuş-ykdysady taýdan ösdürmegiň we maýa goýum Maksatnamasyny» işläp taýýarlamagy hem-de ony Halk Maslahatyna hödürlemegi tabşyrdy.

Döwlet býujeti ykdysadyýetimizi meýilleşdirmegiň möhüm guralydyr. Şunuň bilen baglylykda, şu ýyl ýurdumyzyň baş maliýe meýilnamasyndan bilimi, saglygy goraýşy, medeniýeti ösdürmäge, önümçilik, durmuş-medeni maksatly desgalaryň gurluşygyna köp möçberde serişdeler gönükdirildi. Bu serişdelerden önümçilik maksatly desgalaryň gurluşygyna maýa goýumlaryň umumy möçberiniň 67,8 göterimi, medeni-durmuş maksatly desgalaryň gurluşygy üçin hem 32,2 göterimi goýberildi. Döwlet býujetiniň çykdajylar böleginiň maksatlaýyn peýdalanylmagy we özleşdirilmegi üpjün edildi. Ykdysadyýeti özgertmek, innowasion ösüşi gazanmak, hususy pudagyň paýyny giňeltmek arkaly býujetiň girdejileri artdyryldy diýip, döwlet Baştutanymyz nygtady. Bank hyzmatlarynyň hilini ýokarlandyrmak, milli manadyň hümmetini saklamak boýunça geçirilen özgertmeler durnukly pul dolanyşygyny hem-de ykdysady ösüşi üpjün etdi diýip, hormatly Prezidentimiz belledi. Täze ýylyň 1-nji ýanwaryndan bolsa býujetden maliýeleşdirilýän edaralaryň, hojalyk hasaplaşygyndaky kärhanalaryň, jemgyýetçilik birleşikleriniň işgärleriniň aýlyk zähmet haklarynyň, pensiýalaryň, döwlet kömek pullarynyň, talyp we diňleýji haklarynyň möçberi ýene-de 10 göterim ýokarlandyrylar.

Döwlet Baştutanymyz ýurdumyzyň nebitgaz pudagyny giň gerimde ösdürmäge we onuň halkara energetika ulgamyna işjeň goşulyşmagyna gönükdirilen syýasatyň üstünlikli durmuşa geçirilýändigini belledi. Şu ýyl nebitgaz pudagyny ösdürmek, nebiti we tebigy gazy gaýtadan işlemäge ýöriteleşdirilen täze, döwrebap toplumlary gurmak, geologiýa-gözleg işlerini kämilleşdirmek bilen bagly işlere aýratyn üns berildi.

Hormatly Prezidentimiziň nygtaýşy ýaly, ýakynda Türkmenistan — Owganystan — Pakistan — Hindistan gaz geçirijisiniň esasy tapgyry bolan Arkadagyň ak ýoly bilen Serhetabat — Hyrat gaz geçirijisiniň gurluşygyna badalga berildi. Şeýle hem energetika, ulag-aragatnaşyk pudaklaryna degişli iri desgalaryň açylyş we gurluşygyna badalga bermek dabaralary öz taryhy ähmiýeti bilen täze mümkinçilikleri açdy. Munuň özi Gahryman Arkadagymyzyň başlangyjy esasynda Türkmenistan bilen Owganystanyň arasynda hoşniýetli hyzmatdaşlygyň barha rowaçlanýandygyny görkezýän taryhy wakalardyr.

Garaşsyz ýurdumyzda innowasion önümçilikleri döretmek boýunça gurluşyk we senagat toplumynda uly işler amala aşyrylýar. Toplumyň kuwwatyny artdyrmak, bu ugurda hususy işewürligiň önümçilik binýadyny ösdürmek üçin zerur şertleri döredýäris. Döwlet ähmiýetli awtomobil ýollarynyň gurluşygy dowam etdirilýär. Garabogazköl aýlagynyň üstünden geçýän awtomobil köprüsiniň gurluşygy alnyp barylýar. Awtomobil ýollaryny döwrebaplaşdyrmak we olaryň dünýä standartlaryna gabat gelmegi üçin pudagyň maddy-enjamlaýyn binýady yzygiderli berkidilýär. Himiýa senagatynda täze önümçilikleri döretmek boýunça hem netijeli işler durmuşa geçirilýär. Şunuň bilen baglylykda, hormatly Prezidentimiz şu ýyl Ahal hem-de Lebap welaýatlarynda her biri ýylda bir million tonna önüm öndürýän Bäherden we Lebap sement zawodlarynyň ikinji tapgyrynyň dabaraly ýagdaýda açylyp ulanmaga berlendigini aýtdy. Mundan başga-da, Aşgabat şäheriniň Bagtyýarlyk etrabynda hem-de Ahal welaýatynyň Ak bugdaý etrabynyň Ýaşlyk şäherçesinde agyz suwuny arassalaýjy desgalar ulanmaga berildi. Bu desgalaryň işe girizilmegi ilatymyzy arassa agyz suwy bilen üpjün etmekde alyp barýan syýasatymyzyň üstünlikli durmuşa geçirilýändiginiň aýdyň güwäsidir.

Ýurdumyzda halkalaýyn energoulgamy birleşdirmek boýunça hem netijeli işler amala aşyryldy. Ahal — Balkan, Mary — Ahal, Balkan — Daşoguz ugurlary boýunça ýokary woltly asma elektrik geçirijileri işe girizildi. Bu bolsa içerki sarp edijilerimiziň elektrik energiýasy bilen üpjünçiligini gowulandyrmaga mümkinçilik berýär. Eziz Watanymyzyň dürli künjeklerinden daşary ýurtlara elektrik energiýasyny ibermek üçin amatly şertleri döredýär diýip, döwlet Baştutanymyz belledi. Şunuň bilen birlikde, häzirki wagtda Balkan welaýatynyň Türkmenbaşy etrabynyň çäginde utgaşykly dolanyşykda işlejek elektrik stansiýasynyň gurluşygy ýokary depginde alnyp barylýar. Ýakyn günlerde Balkan welaýatynyň Gyzylarbat etrabynda gurlan köpugurly Gün we ýel elektrik stansiýasynyň açylyş dabarasy geçiriler. Umuman, gurluşyk we senagat toplumynda täze önümçilikleri döretmek işi geljekde-de yzygiderli dowam etdiriler.

Biziň alyp barýan durmuş syýasatymyzyň netijesinde Diýarymyzyň welaýatlary, Aşgabat we Arkadag şäherleri durnukly ösdürilýär. Şu ýyl Gahryman Arkadagymyzyň başlangyjy bilen ýurdumyzyň taryhynda ilkinji gurlan «akylly» şäher — Arkadag şäheriniň dabaraly açylyşynyň bir ýyllygy ýokary derejede bellenildi. Ýakynda Koreýa Respublikasynda guralan halkara sergide bolsa Arkadag şäheri üç sany baýraga mynasyp boldy. Iň tapawutlanan “akylly” şäher hökmünde Arkadag şäherine baş baýragyň gowşurylmagy aýratyn buýsandyryjy wakadyr diýip, döwlet Baştutanymyz aýtdy. Hormatly Prezidentimiz türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowy we mähriban halkymyzy bu şatlykly waka bilen tüýs ýürekden gutlap, häzirki wagtda Arkadag şäheriniň gurluşygynyň ikinji tapgyrynyň dowam etdirilýändigini belledi.

2026-njy ýyla çenli onuň ikinji tapgyrynyň çäklerinde ähli amatlyklary bolan ýaşaýyş jaýlary, senagat önümçiliklerine ýöriteleşdirilen desgalar, medeni-durmuş maksatly binalar gurlup ulanmaga berler. Biz halkymyzyň ýaşaýyş-durmuş derejesini ýokarlandyrmagy geljekde hem dowam ederis. Munuň özi mähriban halkymyzyň abadançylygy baradaky aladanyň döwlet syýasatynda ileri tutulýan ugur bolup durýandygyny ýene-de bir gezek aýdyň tassyklaýar diýip, döwlet Baştutanymyz nygtady.

Hormatly Prezidentimiz Serdar Berdimuhamedow milli ykdysadyýetimiziň esasy pudaklarynyň biri bolan oba hojalygy bilen bagly meselä geçip, bugdaý we pagta öndürijileri ykdysady taýdan höweslendirmek üçin şu ýylyň hasylyndan başlap, bu önümleriň döwlet satyn alyş bahalarynyň ýokarlandyrylandygyny belledi. Ýurdumyzyň zähmetsöýer daýhanlary Watan harmanyna 1 million 400 müň tonnadan gowrak bugdaý hasylyny tabşyrdylar. Ýygnalan bugdaý hasyly halkymyzyň, berkarar Watanymyzyň baýlygydyr, saçaklarymyzyň rysgal-berekedidir. Döwlet Baştutanymyz şular barada aýtmak bilen, bol galla hasylyny ýetişdirmekde we ýitgisiz ýygnap almakda uly işleri bitiren, Watan öňündäki şertnamalaýyn borçnamalaryny ýerine ýetiren ussat gallaçy daýhanlarymyzy tüýs ýürekden gutlady. Ýüpekçilik pudagyny ösdürmek boýunça öňde goýlan wezipeler hem netijeli durmuşa geçirilýär. Şu ýyl 2 müň 150 tonnadan gowrak pile öndürildi. Maldarçylyk we guşçulyk pudagy-da ösdürilýär. Gara mallaryň, dowarlaryň, guşlaryň, düýeleriň baş sany yzygiderli artdyrylýar. Şunuň bilen baglylykda, hormatly Prezidentimiz oba hojalyk toplumynyň ösüşiniň ylym hem-de ýokary tehnologiýalar bilen berk baglanyşdyrylýandygyny nygtady.

Döwlet Baştutanymyz Garaşsyz Watanymyzda ahalteke bedewlerimiziň tohum arassalygyny gorap saklamak we olaryň baş sanyny yzygiderli artdyrmak boýunça uly işleriň alnyp barylýandygyny, halkymyzyň milli buýsanjyna öwrülen türkmen alabaýlaryny ösdürip ýetişdirmek, itşynaslyk sungatyny yzygiderli ösdürmek ugrunda-da asylly işleriň durmuşa geçirilýändigini belledi. Biz tebigata aýawly garamaga, onuň baýlyklaryny gorap saklamaga hem-de köpeltmäge uly üns berýäris diýip, hormatly Prezidentimiz aýtdy. Şu ýyl ösümlik we haýwanat dünýäsini goramaga gönükdirilen Türkmenistanyň Gyzyl kitabynyň 4-nji neşiri çap edildi. Milli tokaý maksatnamasy esasynda eziz Diýarymyzy bagy-bossanlyga öwürmekde toplumlaýyn işler alnyp barylýar. Her ýyl ählihalk bag ekmek dabaralarynyň geçirilmegi bilen, ekologik abadançylyk üpjün edilýär. Howanyň üýtgemegi barada Türkmenistanyň Milli strategiýasy esasynda ýurdumyzda hereket edýän senagat kärhanalarynyň önümçiliginde metan gazlarynyň zyňyndylaryny azaltmak boýunça hem toplumlaýyn işler alnyp barylýar. Döwlet Baştutanymyz Türkmenistanyň Merkezi Aziýada howanyň üýtgemegi bilen bagly tehnologiýalar boýunça sebit merkezini, Hazar deňziniň gurşawyny we biologik serişdelerini gorap saklamakda netijeli halkara gurala öwrüljek «Hazar ekologik başlangyjyny» döretmek baradaky teklipleriniň dünýäde uly goldaw tapandygyny belledi.

Hormatly Prezidentimiz ykdysadyýetimiziň öňdebaryjy pudaklarynyň biri bolan söwda toplumy bilen bagly meseleler barada durup geçip, «Türkmenistanda öndürildi» diýen nyşanly harytlarymyza dünýä bazarlarynda uly isleg bildirilýändigini aýtdy. Daşary ýurtlara iberilýän harytlaryň möçberi we ugurlary artdyrylýar. Yzygiderli guralýan sergiler, maslahatlar halkara hyzmatdaşlygy ösdürmekde möhüm ähmiýete eýe bolýar.

Arkadagly Gahryman Serdarymyz dokma senagatyny döwrebaplaşdyrmak boýunça-da möhüm özgertmeleriň amala aşyrylýandygyny belledi. Ýokary hilli harytlary öndürýän toplumlary gurup, halkara ülňülere laýyk gelýän eksport önümçiligini giňeldýäris. Halkymyzyň meşhur halyçylyk sungatyny ösdürmäge aýratyn üns berilýär. Bu ajaýyp sungaty dünýä ýaýmak, yzygiderli kämilleşdirmek üçin zerur işler geçirilýär. Geljekde hem täze kärhanalary işe girizip, pudagyň önümçilik kuwwatyny has-da berkitmegi dowam etdireris diýip, hormatly Prezidentimiz belledi.

Döwlet Baştutanymyz Türkmenistanyň Senagatçylar we telekeçiler birleşmesiniň agzalarynyň dürli ugurlarda iş alyp barmak bilen, gysga döwrüň içinde guwandyryjy netijeleri gazanýandyklaryny, bäsdeşlige ukyply, eksporta niýetlenen ýokary tehnologik önümleri öndürýän önümçilikleri, senagat kärhanalaryny döretmekde telekeçileriň uly paýynyň bardygyny nygtap, geljekde hem kiçi, orta we iri telekeçiligi ösdürmäge gönükdirilen özgertmeleriň dowam etdiriljekdigini aýtdy.

Arkadagly Gahryman Serdarymyz ulag-kommunikasiýa toplumynda durmuşa geçirilýän işler barada durup geçip, bu ugurda-da netijeli özgertmeleriň amala aşyrylýandygyna ünsi çekdi. Gadymy Beýik Ýüpek ýoluny täzeden dikeltmekde ýurdumyzda nusgalyk işler durmuşa geçirilýär. Ulag-kommunikasiýalar toplumynda netijeli özgertmeler amala aşyrylýar. Ulagyň ähli görnüşleri bilen ýolagçy we ýük dolanyşygyny ösdürmek, halkara üstaşyr ulag mümkinçiligimizi doly ulanmak boýunça degişli işler ýerine ýetirilýär. Bu ugurda ýurdumyz Birleşen Milletler Guramasy we beýleki iri halkara guramalar bilen hyzmatdaşlygy alyp barýar. Biz Gündogar — Günbatar we Demirgazyk — Günorta ugurlary boýunça esasy üstaşyr ulag geçelgeleriniň düzümlerini giňeltmegi möhüm hasaplaýarys diýip, döwlet Baştutanymyz nygtady. Hytaý — Gazagystan — Türkmenistan — Eýran ulag geçelgesini ösdürmek, daşalýan ýükleriň möçberini artdyrmak babatda zerur işler alnyp barylýar. Aziýa — Ýuwaş umman sebitiniň ýurtlaryndan Ýewropa ýurtlaryna çenli halkara multimodal ulag ugruny ösdürmäge uly ähmiýet berilýär.

Ýurdumyzyň dürli künjeginde ulag-kommunikasiýalar toplumyna degişli önümçilik, durmuş maksatly desgalaryň gurluşygy giň gerim bilen alnyp barylýar. Şu ýyl biz Balkan welaýatynyň Jebel şäherçesinde Halkara howa menziliniň toplumyny ulanmaga bereris. Şeýle hem Balkan welaýatynyň Türkmenbaşy şäherinde ulag-kommunikasiýa toplumynyň işgärleri üçin gurlan, ähli amatlyklary bolan döwrebap ýaşaýyş jaýlar toplumy açylar. Biz ýurdumyzda ulag-kommunikasiýalar toplumynyň maddy-enjamlaýyn binýadyny pugtalandyrmak işlerini mundan beýläk hem dowam etdireris diýip, hormatly Prezidentimiz aýtdy.

Döwlet Baştutanymyz bilim ulgamynda ruhy taýdan kämil, giň dünýägaraýyşly ýaş nesilleri terbiýelemek boýunça netijeli işleriň alnyp barylýandygyny belledi. Şunuň bilen baglylykda, ýurdumyzda halkara derejä laýyk gelýän umumybilim edaralaryny döretmek, mekdep-gimnaziýalary açmak hem möhüm wezipeleriň hatarynda görkezildi.

Häzirki wagtda Aşgabat şäherinde Türkmen döwlet binagärlik-gurluşyk institutynyň, Türkmenistanyň Senagatçylar we telekeçiler birleşmesiniň ýokary okuw mekdebiniň, Türkmenabat şäherinde Seýitnazar Seýdi adyndaky Türkmen döwlet mugallymçylyk institutynyň täze binalar toplumlarynyň, Mary şäherinde Türkmenistanyň Döwlet energetika institutynyň täze okuw binalar toplumynyň we umumy ýaşaýyş jaýynyň gurluşygy güýçli depginde dowam edýär. Şu ýyl Bilimler we talyp ýaşlar gününde Türkmenistanyň Goranmak ministrliginiň Berdimuhamet Annaýew adyndaky Ýöriteleşdirilen harby mekdebiniň täze binalar toplumy, Täjigistan Respublikasynda bolsa dost-doganlyk gatnaşyklaryna esaslanyp, Magtymguly adyndaky umumybilim berýän orta mekdep dabaraly ýagdaýda ulanmaga berildi diýip, döwlet Baştutanymyz sözüni dowam etdi. Şeýle hem ýurdumyzyň welaýatlarynda häzirki zaman tehnologiýalary ornaşdyrylan, döwrebap orta mekdepler, çagalar baglary ýaşlarymyz üçin öz gapylaryny giňden açdy. Munuň özi bilim özgertmeleriniň üstünlikli durmuşa geçirilýändiginiň aýdyň mysallarydyr.

Hormatly Prezidentimiz ýurdumyzyň ylym ulgamy bilen bagly mesele barada durup geçip, bu ugurda ylmy barlaglaryň we täze tehnologiýalaryň netijeliligini ýokarlandyrmak boýunça köp işleriň ýerine ýetirilendigini aýtdy. Ylmyň, tehnikanyň örän çalt depginlerde ösmegi, täze tehnologiýalaryň döremegi bilim edaralarynda okatmagyň usulyýetini kämilleşdirmegi talap edýär.

Hormatly Prezidentimiz halkymyzyň saglygynyň, abadan we bagtyýar durmuşynyň döwlet syýasatynyň ileri tutulýan ugurlarynyň biridigine ünsi çekdi. Saglygy goraýyş ulgamynda halkymyza dünýä ülňülerine laýyk gelýän, elýeterli, ýokary hilli lukmançylyk hyzmatlary edilýär. Ýurdumyzda «Arkadag Medisina Klasteri Menejment» kärhanasynyň döredilmegi bilen, dürli görnüşli lukmançylyk serişdeleriniň önümçiligi ýola goýuldy. Saglygy goraýyş ulgamynda yzygiderli ulanylýan, ekologik taýdan arassa ýerli çig mallardan öndürilýän bu önümler geljekde dünýä bazarlarynda uly orny eýelär diýip, döwlet Baştutanymyz aýtdy. Ýakyn wagtda bolsa Türkmenistanyň saglygy goraýyş we derman senagaty işgärleriniň güni mynasybetli Aşgabatda Halkara fiziologiýa ylmy-kliniki we Halkara sagaldyş-dikeldiş merkezleri dabaraly ýagdaýda ulanmaga berler. Lebap welaýatynyň Türkmenabat şäherinde buýan kökünden derman serişdesini öndürmäge niýetlenen döwrebap kärhana işe giriziler.

Häzirki wagtda paýtagtymyzda Halkara pediatriýa, Halkara onkologiýa ylmy-kliniki merkezleriniň we Stomatologiýa merkeziniň gurluşygy ýokary depginde dowam edýär. “Arçman” şypahanasynda 400 orunlyk goşmaça binalar toplumynyň gurluşygy alnyp barylýar. Ýakyn geljekde biz Mary, Balkan we Lebap welaýatlarynda halkara derejeli onkologiýa merkezlerini, Daşoguz welaýatynda Enäniň we çaganyň saglygyny goraýyş merkezini gurmagy göz öňünde tutýarys. Bu işleriň ählisi keselleriň öňüni almak, anyklamak we bejermek boýunça öňdebaryjy tejribeleriň milli saglygy goraýyş ulgamyna giňden ornaşdyrylýandygyny görkezýär. Halkymyzyň saglygyny goramak, ýurdumyzyň abadançylygyny gazanmak biziň iň uly maksadymyzdyr diýip, hormatly Prezidentimiz aýtdy.

Bedenterbiýäni we sporty ösdürmek, raýatlarymyzyň saglygyny berkitmek, sagdyn bedenli nesilleri ýetişdirmek döwlet syýasatymyzyň ileri tutulýan ugurlarynyň biridir. Ýurdumyzda Ýapyk binalarda we söweş sungaty boýunça V Aziýa oýunlary, Agyr atletika boýunça dünýä çempionaty hem-de Garagum sährasy boýunça «Amul — Hazar» halkara awtorallisi ýokary derejede geçirildi. Şeýle hem ýetginjekleriň arasynda tennis boýunça Merkezi Aziýa ýurtlarynyň sebitleýin ýaryşy, Kuraş boýunça dünýä çempionaty, hokkeý boýunça halkara ýaryş we beýleki halkara bäsleşikler üstünlikli geçirildi. Garaşsyz Döwletleriň Arkalaşygynyň Hökümet Baştutanlarynyň Geňeşiniň Çözgüdine laýyklykda, Aşgabat şäheri «Arkalaşygyň täze sport mümkinçilikleriniň şäheri» diýlip yglan edildi. Aziýanyň Tennis federasiýasy tarapyndan Olimpiýa şäherçesiniň Tennis toplumynyň «Tennis boýunça Aziýa sebitiniň okuw-türgenleşik merkezi» diýlip yglan edilmegi ýurdumyzyň halkara sport abraýyny has-da artdyrýar diýip, hormatly Prezidentimiz Serdar Berdimuhamedow belledi.

Döwlet Baştutanymyz medeniýetiň we sungatyň halkymyzyň ruhy baýlygydygyny aýdyp, ruhy gymmatlyklarymyzy, medeni mirasymyzy aýawly saklamakda, dünýä ýaýmakda medeniýet ulgamyna uly ornuň degişlidigini belledi. Nygtalyşy ýaly, häzirki döwürde türkmen medeniýetiniň, sungatynyň gazananlaryny dünýä ýaýmak maksady bilen, dürli festiwallar, konsertler, sergiler, döredijilik duşuşyklary, beýleki medeni-köpçülikleýin çäreler yzygiderli geçirilýär. Ýurdumyzda Medeniýet hepdeligi şu ýyl sebitde deňi-taýy bolmadyk Arkadag şäherinde geçirildi. Geljek ýylda bolsa bu özboluşly sungat baýramçylygy Ahal welaýatynda geçiriler. Biz döredijilik işgärleriniň kämil, döwrebap eserleri döretmekleri, döredijilikli zähmet çekmekleri üçin mundan beýläk-de ähli şertleri dörederis diýip, hormatly Prezidentimiz nygtady.

Döwlet Baştutanymyz türkmen halkynyň Milli Lideri Gahryman Arkadagymyzyň Magtymguly Pyragynyň doglan gününiň 300 ýyllygyny örän ýokary derejede bellemek, şahyryň ýadygärligini döretmek boýunça başlangyçlary öňe sürendigini aýtdy. Şunuň bilen baglylykda, şu ýyl paýtagtymyzyň gözel künjeginde «Magtymguly Pyragy» medeni-seýilgäh toplumy, akyldar şahyrymyzyň ýadygärligi dabaraly ýagdaýda açyldy.

Gündogaryň beýik akyldary Magtymguly Pyragynyň doglan gününiň 300 ýyllygy mynasybetli 2024-nji ýyl Türki medeniýetiň halkara guramasy (TÜRKSOÝ) tarapyndan «Türki dünýäsiniň beýik şahyry we akyldary Magtymguly Pyragy ýyly» diýlip yglan edildi. Şanly ýylda ýurdumyzyň Änew şäheri hem «Türki dünýäsiniň medeni paýtagty» diýen ady buýsanç bilen göterýär. Bu şöhratly wakalaryň biri-biri bilen utgaşykly gelmegi aýratyn many-mazmuna eýedir diýip, hormatly Prezidentimiz nygtady. Şunuň bilen baglylykda, döwlet Baştutanymyz Magtymguly Pyragynyň doglan gününiň 300 ýyllygy mynasybetli oktýabr aýynda geçiriljek döwlet we hökümet Baştutanlarynyň halkara forumynyň, Änew şäheriniň 2024-nji ýylda «Türki dünýäsiniň medeni paýtagty» diýlip yglan edilmeginiň şanyna guraljak beýleki giň gerimli çäreleriň dünýä ýurtlary bilen dost-doganlyk gatnaşyklarymyzy has-da ösdürjekdigine berk ynam bildirdi.

Hormatly Prezidentimiz döwletimiziň Birleşen Milletler Guramasynyň bilim, ylym we medeniýet meseleleri boýunça ýöriteleşdirilen düzümi, ýagny ÝUNESKO bilen netijeli gatnaşyklara aýratyn ähmiýet berýändigini nygtady.

Geçen döwürde Gadymy Merw, Köneürgenç, Nusaý galalary ÝUNESKO-nyň Bütindünýä mirasynyň sanawyna, şeýle hem maddy däl medeni gymmatlyklarymyzyň 9-sy bu guramanyň Adamzadyň maddy däl medeni mirasynyň sanawyna girizildi. Biz ÝUNESKO bilen alyp barýan işlerimizi geljekde has-da giňelderis. Şoňa görä-de, türkmen alabaýlaryny ýetişdirmek sungatyny, çaga sallançagyny bejermegiň däplerini we hüwdini ýerine ýetirijilik sungatyny guramanyň Adamzadyň maddy däl medeni mirasynyň sanawyna girizmek üçin degişli işleri geçirmeli diýip, döwlet Baştutanymyz nygtady. Şeýle hem gadymy Änew medeniýetiniň Altyndepe we Ulugdepe ýaly ösen merkezlerini, Beýik Ýüpek ýolunyň çatrygynda ýerleşen gadymy Dehistanyň arheologik ýadygärliklerini, Köýtendagyň dag ekoulgamyny Bütindünýä mirasynyň sanawyna; Arkadag şäherini ÝUNESKO-nyň döredijilik şäherleriniň toruna, onuň bilim edaralaryny bolsa guramanyň assosirlenen mekdepler toruna girizmek üçin zerur işleri alyp barmaly.

Dünýä döwletleri bilen deňhukukly we özara bähbitli gatnaşyklary ösdürmek döwletimiziň daşary syýasatynyň esasy ugurlarynyň biridir. Birleşen Milletler Guramasy tarapyndan iki gezek ykrar edilen hem-de Konstitusiýamyzda hemişelik berkidilen oňyn Bitaraplygymyzdan ugur alyp, biz ähli döwletler, abraýly halkara guramalar bilen hyzmatdaşlygy ösdürmek we berkitmek boýunça zerur tagallalary edýäris diýip, döwlet Baştutanymyz nygtady. «Türkmenistan — Birleşen Milletler Guramasy» strategik maslahat beriş geňeşiniň döredilmegi hem Bitaraplygymyzyň bütin dünýä üçin nusgalykdygyny subut edýär.

BMG-niň Baş Assambleýasynyň 78-nji sessiýasynyň 63-nji plenar mejlisiniň dowamynda ýurdumyzyň başlangyjy esasynda, «2025-nji ýyl — Halkara parahatçylyk we ynanyşmak ýyly» atly Kararnama biragyzdan kabul edildi. Bu Kararnamanyň kabul edilmegi Türkmenistanyň ählumumy parahatçylygy üpjün etmek, döwletleriň arasynda ynanyşmagy berkitmek ugrunda edýän taýsyz tagallalarynyň bütin dünýäde ykrar edilýändiginiň aýdyň güwäsidir. Şunuň bilen baglylykda, biz dünýä bileleşigi bilen geljek, 2025-nji ýylda örän möhüm taryhy we şanly senäni — Türkmenistanyň hemişelik Bitaraplygynyň 30 ýyllyk baýramyny ajaýyp wakalar, uly üstünlikler bilen garşylamaga häzirden düýpli taýýarlyk görmeli diýip, hormatly Prezidentimiz nygtady.

Döwlet Baştutanymyz Türkmenistanyň Mejlisiniň işi bilen bagly mesele barada durup geçip, milli parlamentiň raýatlaryň kanuny bähbitlerini goramak, ykdysadyýetimiziň pudaklaryny ösdürmek babatda netijeli işleri alyp barýandygyna ünsi çekdi. Şunuň bilen birlikde, halkymyzyň ýaşaýyş-durmuş derejesini mundan beýläk-de ýokarlandyrmak boýunça giň möçberli işleriň hukuk esaslaryny has-da pugtalandyrmaly diýip hasaplaýarys. Täze kanunçylyk namalaryny kabul etmek we yzygiderli kämilleşdirip durmak häzirki döwrüň möhüm talaplarynyň biri diýip pikir edýärin diýip, hormatly Prezidentimiz aýtdy.

Arkadagly Gahryman Serdarymyz sözüni dowam edip, häzirki wagtda ýurdumyzda durmuşa geçirilýän beýik özgertmeleriň biziň ählimizden jogapkärçilikli, yhlasly zähmet çekmegi, ýokary netijeleri gazanmagy talap edýändigini nygtady. Şoňa görä-de, eziz Watanymyzyň, häzirki we geljek nesillerimiziň öňündäki jogapkärçiligimizi nazara alyp, ýurdumyzyň ýokary döwlet häkimiýet edaralarynyň işini yzygiderli kämilleşdirmelidiris.

Berkarar döwletiň täze eýýamynyň Galkynyşy döwründe biziň ýolumyz bagtyýarlygyň, berkararlygyň ýoludyr. Geçmişimizi, şu günümizi we geljegimizi berk baglanyşdyryp, biz mundan beýläk-de bu ýol bilen ynamly öňe gideris. Agzybirlikde, bitewülikde ýurdumyzy ösdürmek boýunça Gahryman Arkadagymyzyň başyny başlan döwletlilik ýoluny ynamly dowam etdireris diýip, döwlet Baştutanymyz nygtady.

Türkmenistanyň Halk Maslahatynyň mejlisinde beýan eden ösüşlerimiz we täze maksatlarymyz biziň öňümizde uly wezipeleri goýýar diýip, hormatly Prezidentimiz belledi we mähriban halkymyz bilen bilelikde tutanýerli zähmet çekip, geljek ýyl üçin bellenen sepgitlere hem abraý bilen ýetiljekdigine berk ynam bildirdi.

Biziň esasy maksadymyz eziz Watanymyzy beýik geljege tarap ynamly öňe alyp barmakdan ybaratdyr. Şoňa görä-de, ähli tagallalarymyzy Garaşsyz, hemişelik Bitarap döwletimizi mundan beýläk-de gülledip ösdürmäge, merdana halkymyzyň ýaşaýyş-durmuş derejesini has-da ýokarlandyrmaga gönükdirmelidiris diýip, hormatly Prezidentimiz aýtdy. Çykyşynyň ahyrynda döwlet Baştutanymyz ählihalk forumyna gatnaşyjylary we mähriban halkymyzy eziz Watanymyzyň Garaşsyzlygynyň 33 ýyllyk baýramy bilen ýene-de bir gezek tüýs ýürekden gutlady hem-de hemmelere berk jan saglyk, abadan we bagtyýar durmuş, Garaşsyz, hemişelik Bitarap Watanymyza rowaçlyklary arzuw etdi.

«Goý, Garaşsyz döwletimiziň dünýädäki at-abraýy mundan beýläk-de belent bolsun! Ýaşasyn Berkarar döwletiň täze eýýamynyň Galkynyşy döwri! Ýaşasyn Garaşsyz, hemişelik Bitarap Türkmenistan!» diýip, döwlet Baştutanymyz çykyşyny jemledi.

Hormatly Prezidentimiziň ýurdumyzyň Hökümeti tarapyndan ýerine ýetirilen işler hem-de geljek üçin meýilnamalar baradaky çykyşy uly üns bilen diňlenildi we dowamly el çarpyşmalar bilen garşylanyldy.

Türkmen halkynyň Milli Lideri Arkadagly Gahryman Serdarymyzdan zähmetde gazanan üstünlikleri bilen tapawutlanan ýurdumyzyň raýatlaryny Türkmenistanyň Garaşsyzlyk baýramy mynasybetli döwlet sylaglary bilen sylaglamak hakynda, şeýle hem Garaşsyz Diýarymyzy toplumlaýyn ösdürmek baradaky resminamalara gol çekmegi haýyş etdi. Döwlet Baştutanymyz ýygnananlaryň el çarpyşmalary astynda degişli resminamalara gol çekdi. Gahryman Arkadagymyz hormatly Prezidentimiziň tabşyrygy boýunça ertir sylaglary gowşurmak dabaralarynyň geçiriljekdigini belledi.

Halk Maslahatynyň mejlisinde, däp bolşy ýaly, hormatly ýaşulularymyza we ene-mamalarymyza mynasyp bolan sylaglary gowşurylýar. Şoňa görä, Milli Liderimiz Arkadagly Gahryman Serdarymyza her welaýatdan, Aşgabat we Arkadag şäherlerinden “Hormatly il ýaşulusy” diýen ada hem-de «Zenan kalby» ordenine mynasyp bolan adamlara sylaglary gowşurmak haýyşy bilen ýüzlendi.

Permanlary okamak üçin Türkmenistanyň Mejlisiniň Başlygy D.Gulmanowa söz berilýär.

Hormatly Prezidentimiz Serdar Berdimuhamedow Türkmenistanyň «Hormatly il ýaşulusy» diýen hormatly adyna mynasyp bolan ýaşuly nesliň wekillerine hem-de dürli ulgamlarda çeken asylly zähmeti, ýaşlary watançylyk, halkymyzyň belent ruhy-ahlak gymmatlyklary ruhunda terbiýeländikleri üçin «Zenan kalby» ordenine mynasyp bolanlara sylaglary dabaraly ýagdaýda gowşurýar.

Hormatly ýaşulular, mähriban eneler mynasyp bolan sylaglaryny buýsanç duýgusy bilen kabul edip, zähmetine berlen ýokary baha, mähriban halkymyzyň abadan durmuşy barada edilýän ýadawsyz aladalar üçin tüýs ýürekden hoşallyk bildirdiler.

Soňra «Türkmenistanyň Gahrymany» diýen ada mynasyp bolanlary sylaglamak dabarasy boldy. Hormatly Prezidentimiz mejlise gatnaşyjylaryň el çarpyşmalary astynda Garaşsyz Döwletleriň Arkalaşygynyň Önümçilik-ylmy tohumçylyk assosiasiýasynyň prezidenti, GDA-nyň Tohumçylyk meseleleri boýunça hökümetara utgaşdyryjy geňeşiniň başlygy, oba hojalyk ylymlarynyň doktory, akademik I.I.Kuzmine, Türkmenistanyň halk artisti, Magtymguly adyndaky halkara baýragyň eýesi A.S.Nurmuhammedowa we meşhur heýkeltaraş, Türkmenistanyň halk suratkeşi S.Babaýewe döwletimiziň iň ýokary sylagyny dabaraly ýagdaýda gowşurýar.

Akademik I.Kuzmin ýokary sylag üçin sagbolsun aýdyp, häzirki wagtda okgunly ösýän Türkmenistanyň gazanýan üstünliklerine haýran galýandygyny belledi. Şeýle-de ol ýurdumyzyň Hökümeti tarapyndan giň halkara hyzmatdaşlygy ösdürmek babatda döredilýän ajaýyp şertler üçin tüýs ýürekden hoşallyk bildirdi. Golaýda Aşgabatda iri forumlaryň — GDA-nyň Tohumçylyk meseleleri boýunça hökümetara utgaşdyryjy geňeşiniň nobatdaky mejlisiniň, «Oba hojalyk ekinleriniň tohumçylygynda ýetilen sepgitler we öňde durýan wezipeler» atly halkara ylmy maslahatyň hem-de onuň çäklerinde Türkmenistanyň oba hojalyk pudagynda gazanylanlaryň sergisiniň geçirilmegi munuň aýdyň güwäsidir.

«Türkmenistanyň Gahrymany» diýen belent ada mynasyp bolan A.S.Nurmuhammedowa we S.Babaýew hem, öz nobatlarynda, döwlet Baştutanymyza ägirt uly hormat-sarpasy üçin tüýs ýürekden hoşallyk bildirip, zähmetine berlen şeýle ýokary bahanyň olary mundan beýläk-de tutanýerli işlemäge ruhlandyrýandygyny, hemmetaraplaýyn ösüş ýoly bilen ynamly öňe barýan Garaşsyz Türkmenistana söýgüsini, buýsanjyny has-da artdyrýandygyny nygtadylar.

Türkmen halkynyň Milli Lideri mejlise gatnaşyjylara jemleýji söz bilen ýüzlenip, Türkmenistanyň Halk Maslahatynyň mejlisinde örän möhüm soraglaryň ara alnyp maslahatlaşylandygyny hem-de Prezident Maksatnamasyna laýyklykda, geljekde öňde durýan wezipeleriň kesgitlenendigini belledi.

Gahryman Arkadagymyz ählihalk forumynyň gün tertibine girizilen soraglary ara alyp maslahatlaşmaga işjeň gatnaşandyklary üçin ýygnananlara minnetdarlyk bildirip, biziň kabul eden milli maksatnamalarymyzyň baş maksady Garaşsyz, hemişelik Bitarap ýurdumyzy mundan beýläk-de gülledip ösdürmekden ybaratdyr diýip belledi we Arkadagly Gahryman Serdarymyzyň baştutanlygynda ähli halkymyz bilen bilelikde bu beýik özgertmeleriň üstünlikli amala aşyryljakdygyna berk ynam bildirdi. Biz bu işlerde şöhratly geçmişimize, häzirki bagtyýar durmuşymyza, nurana geljegimize buýsanýan hem-de eziz Watanymyzyň güýç-kuwwatyna öwrülen ýaşlarymyza bil baglaýarys diýip, türkmen halkynyň Milli Lideri nygtady. Şeýle-de hormatly Arkadagymyz Berkarar döwletiň täze eýýamynyň Galkynyşy döwründe halkymyzy belent maksatlaryň daşynda jebisleşdirip, öňe alyp gitmekde Türkmenistanyň Halk Maslahatyna aýratyn ornuň degişlidigini belledi.

Halk Maslahatynyň Başlygy mejlisiň jemini jemläp, berkarar döwletimiziň gülläp ösüşini üpjün etmekde, bagtyýar durmuşyny gazanmakda uly wezipeleriň öňde durýandygyny aýtdy we amala aşyrylýan giň gerimli, tutumly işlere ýurdumyzyň her bir raýatynyň agzybirlikde, jebislikde gatnaşyp, mynasyp goşant goşjakdygyna berk ynam bildirdi.

Gahryman Arkadagymyz ýygnananlary berkarar Watanymyzyň mukaddes Garaşsyzlygynyň 33 ýyllyk baýramy bilen ýene-de bir gezek tüýs ýürekden gutlap, hemmelere berk jan saglyk, abadan durmuş, döwletimiziň mundan beýläk-de gülläp ösmegi ugrunda alyp barýan işlerinde uly üstünlikleri arzuw etdi.

Sözüniň ahyrynda Türkmenistanyň Halk Maslahatynyň Başlygy Gurbanguly Berdimuhamedow türkmençilikde köp nakyllaryň bardygyny aýdyp, “Ýagşy niýet — ýarym döwlet”, “Maslahatly biçilen don gysga bolmaz”, “Agzybire Taňry biýr...”, “Köpüň dilegi köl bolar”, “Geçmişi bolmadygyň geljegi bolmaz”, “Arkalaşan dag aşar”, “Ýoly ýörän ýeňer”, “Ýagşydan at galar”, “Döwletliden döwlet ýokar”, “Ilim-günüm bolmasa, Aýym-Günüm dogmasyn”, “Söýenişen ýykylmaz”, “Akylly iş — ganatly guş” ýaly parasatly sözleri mysal getirdi.

Soňra Gahryman Arkadagymyz mejlise gatnaşyjylara ata-babalarymyzyň däp-dessurlaryna eýerip, ertir agzybirlikde Türkmenbaşynyň ruhy metjidinde sadaka bermek baradaky teklip bilen ýüzlendi. Bu teklip biragyzdan goldanyldy.

Türkmen halkynyň Milli Lideri Gurbanguly Berdimuhamedow Türkmenistanyň Halk Maslahatynyň mejlisini ýapyk diýip yglan etdi.

Maslahat köşgünde Türkmenistanyň Döwlet senasy belentden ýaňlandy.

* * *

Türkmenistanyň Halk Maslahatynyň mejlisi tamamlanandan soňra, Maslahat köşgüniň eýwanynda Gahryman Arkadagymyz hormatly Prezidentimiz Serdar Berdimuhamedowy mukaddes Garaşsyzlygymyzyň 33 ýyllyk baýramy, şeýle hem umumymilli forumda halkymyzyň bagtyýar durmuşyny we ýurdumyzyň sazlaşykly ösüşini üpjün etmäge gönükdirilen möhüm çözgütleriň kabul edilmegi bilen gutlady.

Soňra döwlet Baştutanymyzy Mejlisiň Başlygy, Ministrler Kabinetiniň Başlygynyň orunbasarlary, ýurdumyzyň harby we hukuk goraýjy edaralarynyň ýolbaşçylary tüýs ýürekden gutladylar. Bellenilişi ýaly, ýokary derejede geçirilen, “Pähim-paýhas ummany Magtymguly Pyragy» ýylynyň möhüm wakasyna öwrülen Halk Maslahatynyň mejlisi mähriban halkymyzy täze zähmet ýeňişlerine ruhlandyrdy. Şeýle giň möçberli çäre jemgyýetimiziň mundan beýläk-de jebisleşmegine oňyn täsir edip, Berkarar döwletiň täze eýýamynyň Galkynyşy döwrüniň belent maksatlarynyň üstünlikli durmuşa geçirilmegine ýardam berýär.

Hormatly Prezidentimiz Serdar Berdimuhamedow gutlaglar we hoşniýetli sözler üçin minnetdarlyk bildirip, hemmeleri ýetip gelýän baýramçylyk bilen tüýs ýürekden gutlap, olara eziz Watanymyzyň gülläp ösmegi ugrunda alyp barýan jogapkärli işinde uly üstünlikleri arzuw etdi.

Türkmenistanda baş baýram — Garaşsyzlyk güni mynasybetli geçiriljek giň gerimli dabaralara taýýarlyk görülýär. Bu taryhy sene durmuşyň ähli ulgamlaryndaky üstünlikler bilen garşylanylýar. Olar Gahryman Arkadagymyzyň Garaşsyz Watanymyzy depginli ösdürmäge, jemgyýetiň aň-paýhas, ruhy mümkinçiliklerini durmuşa geçirmäge, halkymyzyň eşretli durmuşyny üpjün etmäge, sebit we halkara derejede deňhukukly, özara bähbitli hyzmatdaşlygyň gerimini giňeltmäge gönükdirilen başlangyçlaryny üstünlikli durmuşa geçirýän hormatly Prezidentimiz Serdar Berdimuhamedowyň özgertmeler syýasatynyň rowaçlyklara beslenýändigini aýdyň görkezýär.

Döwlet Baştutanymyzyň 16-njy sentýabrda geçiren iş maslahatynda ýurdumyzyň oba hojalyk toplumynda alnyp barylýan işler, Oba milli maksatnamasynyň ýerine ýetirilişi, Garaşsyzlygymyzyň 33 ýyllygyna görülýän taýýarlyk bilen baglanyşykly meselelere garaldy. Hormatly Prezidentimiz bugdaý ekişiniň agrotehnikanyň kadalaryna laýyklykda, öz wagtynda geçirilmeginiň, pagta ýygymynyň depginini has-da güýçlendirmegiň, oba hojalyk tehnikalarynyň doly güýjünde işledilmeginiň, pagtaçylar üçin zerur iş şertleriniň döredilmeginiň wajyp talap bolup durýandygyny nygtady. Şeýle-de güýzlük ýeralma, gök-bakja, beýleki ekinlere ideg etmek babatda görkezmeler berildi. Ýurdumyzyň Garaşsyzlyk güni mynasybetli geçiriljek çäreleriň ýokary guramaçylyk derejesini üpjün etmek, şu ýyl welaýatlarda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň barşyny berk gözegçilikde saklamak meselelerine aýratyn üns çekildi.

17-nji sentýabrda hormatly Prezidentimiz Serdar Berdimuhamedow Merkezi Aziýa döwletleriniň Baştutanlarynyň Germaniýa Federatiw Respublikasynyň Federal Kansleri Olaf Şols bilen Astanada geçirilen ikinji duşuşygyna gatnaşmak üçin Gazagystan Respublikasyna iş saparyny amala aşyrdy.

Hormatly Prezidentimiz sammitde çykyş edip, Merkezi Aziýa ýurtlarynyň we Germaniýanyň arasyndaky gatnaşyklary, hususan-da, sebit howpsuzlygy, ykdysadyýet, daşky gurşaw babatda hyzmatdaşlygy ösdürmegiň möhümdigini nygtady. Döwlet Baştutanymyz halkara terrorçylyga, ekstremizme, neşe serişdeleriniň bikanun dolanyşygyna, serhetýaka jenaýatçylyga garşy göreşmek ýaly meselelere aýratyn üns çekmek bilen, Merkezi Aziýa döwletleriniň hem-de Germaniýanyň diplomatik gatnaşyklarynyň güýçlendirilmeginiň maksadalaýykdygyny belledi.

Hormatly Prezidentimiz sebitde parahatçylygyň, howpsuzlygyň möhüm meseleleriniň biri bolan Owganystandaky ýagdaýa degip geçmek bilen, agyr we köpýyllyk döwri ýeňip geçmek, ykdysadyýetiň, durmuş ulgamynyň döwlet institutlaryny dikeltmek, sebitde parahatçylygy, ylalaşygy, bitewüligi gazanmak we berkarar etmek boýunça umumymilli işe geçmek üçin owgan halkyna kömek bermegiň zerurdygyny aýtdy. Döwlet Baştutanymyz ykdysadyýetiň Merkezi Aziýa ýurtlarynyň we Germaniýa Federatiw Respublikasynyň hyzmatdaşlygynyň ileri tutulýan ugrudygyny belläp, ulag-logistikany, kommunikasiýany, energetikany, senagat önümçiligini, himiýa senagatyny, maşyn gurluşygyny, saglygy goraýşy we derman senagatyny, obasenagat toplumyny, innowasion tehnologiýalar ulgamyndaky işläp taýýarlamalary hyzmatdaşlygyň esasy ugurlarynyň hatarynda görkezdi.

Ekologiýa we howanyň üýtgemegi bilen bagly meselelere aýratyn üns berildi. Şunuň bilen baglylykda, döwlet Baştutanymyz “ýaşyl” mesele boýunça dialogy işjeňleşdirmegi, eýýäm ýakyn geljek üçin gatnaşyklaryň anyk meýilnamalaryny işläp taýýarlamaga girişmegi teklip etdi. Merkezi Aziýa bilen Germaniýanyň arasynda ýaşlar hyzmatdaşlygyny ösdürmegiň hem-de höweslendirmegiň, giň ugurlar boýunça bilelikdäki çäreleriň meýilnamalarynydyr maksatnamalaryny işläp taýýarlamagyň möhümdigi bellenildi.

Hormatly Prezidentimiz iş saparynyň çäklerinde Germaniýanyň Hökümetiniň Baştutany we öňdebaryjy nemes kompaniýalarynyň ýolbaşçylary bilen duşuşyklary geçirdi. Duşuşyklaryň dowamynda bilelikdäki taslamalary durmuşa geçirmegiň çäklerinde däp bolan hyzmatdaşlygy ösdürmegiň mümkinçilikleri barada pikir alşyldy. Ulag-kommunikasiýa, himiýa we dokma senagaty, suw hojalyk ulgamy geljegi uly ugurlaryň hatarynda görkezildi. Mundan başga-da, german kompaniýalary Türkmenistanda «ýaşyl» ykdysadyýet taslamalaryny amala aşyrmaga, ýurdumyzda şäher düzümleriniň işini döwrebaplaşdyrmak, innowasion dolandyryş usullaryny ornaşdyrmak, ýaş hünärmenleri taýýarlamakda özara tejribe alyşmak babatda hyzmatdaşlyk etmäge çagyryldy.

19-njy sentýabrda hormatly Prezidentimiz Serdar Berdimuhamedow Yslam ösüş bankynyň (YÖB) ýolbaşçysy Muhammad Al Jasseri kabul etdi. YÖB-niň ýolbaşçysy bu halkara maliýe guramasynyň oňyn Bitaraplyk ýörelgeleri esasynda döredijilikli syýasaty durmuşa geçirýän, netijeli durmuş-ykdysady özgertmeleri, giň gerimli düzümleýin maksatnamalary amala aşyrýan ýurdumyz bilen köpýyllyk gatnaşyklary pugtalandyrmaga taýýardygyny tassyklady. Türkmenistanyň Yslam ösüş bankyna 30 ýyllyk agzalygynyň dowamynda bu bank ýurdumyzda saglygy goraýyş, bilim, ulag, aragatnaşyk, energetika ýaly ugurlarda 20-den gowrak taslamany maliýeleşdirmäge gatnaşdy.

Duşuşygyň dowamynda ikitaraplaýyn hyzmatdaşlygyň ileri tutulýan ugurlary, şol sanda bankyň üstaşyr ulag geçelgelerini döretmek, internet we telekommunikasiýa ulgamlaryny kämilleşdirmek, kiçi we orta telekeçiligi ösdürmekde maliýe-karz, maslahat beriş hyzmatlaryny işjeňleşdirmek boýunça taslamalara gatnaşmagynyň mümkinçilikleri ara alnyp maslahatlaşyldy.

20-nji sentýabrda hormatly Prezidentimiz Serdar Berdimuhamedow sanly ulgam arkaly Ministrler Kabinetiniň giňişleýin mejlisini geçirdi. Onda ýurdumyzy durmuş-ykdysady taýdan ösdürmegiň möhüm wezipeleri ara alnyp maslahatlaşyldy, käbir resminamalaryň taslamalaryna we beýleki birnäçe meselelere garaldy. Şolaryň hatarynda milli kanun çykaryjylyk ulgamyny kämilleşdirmek, Halk Maslahatynyň mejlisine, mukaddes Garaşsyzlygymyzyň 33 ýyllygy mynasybetli geçiriljek çärelere görülýän taýýarlyk boýunça meseleler bar. Şeýle-de Balkan, Lebap, Mary welaýatlarynda gurulmagy meýilleşdirilýän onkologiýa hassahanalary bilen baglanyşykly alnyp barylýan işler, uglewodorod serişdeleriniň goşmaça möçberini çykarmak, täze nebitgaz ýataklaryny gözlemek we özleşdirmek, halkara maglumat ulgamlaryny ulanmak arkaly birža söwdasyny guramak, ulag ulgamyna sanly tehnologiýalary, öňdebaryjy tejribäni ornaşdyrmak babatda görülýän çäreler, welaýatlarda möwsümleýin oba hojalyk işleriniň barşy barada hasabat berildi.

Şu ýylyň oktýabr aýynda geçiriljek esasy çäreleriň, medeni-durmuş maksatly binalaryň ulanmaga berilmeginiň Tertibi barada-da aýdyldy. Döwlet Baştutanymyzyň garamagyna ýerli çig mal esasynda demir garyndylaryny öndürýän zawodyň gurluşyk taslamasyny durmuşa geçirmek boýunça degişli teklip hödürlenildi. 2028-nji ýylda Amerikanyň Birleşen Ştatlarynyň Los-Anjeles şäherinde geçiriljek XXXIV tomusky Olimpiýa we XVIII tomusky Paralimpiýa oýunlaryna Türkmenistanyň milli ýygyndy toparlaryny taýýarlamak boýunça öňde goýlan wezipelere laýyklykda, hormatly Prezidentimiziň garamagyna guramaçylyk toparyny döretmek, Olimpiýa oýunlaryna milli ýygyndy toparlary toplumlaýyn taýýarlamak boýunça maksatnamany işläp taýýarlamak, Aşgabat şäherindäki Olimpiýa şäherçesiniň desgalarynda, «Awaza» milli syýahatçylyk zolagyndaky sport toplumynda okuw-türgenleşik sapaklaryny hem-de ýygnanyşyklary guramak babatda teklip hödürlenildi.

Mejlisiň dowamynda hormatly Prezidentimiz Serdar Berdimuhamedow asylly däbe eýerip, iş kesilen 736 raýatyň ýurdumyzyň Garaşsyzlyk baýramy mynasybetli günäsini geçmek, 1 müň 146 adamy Türkmenistanyň raýatlygyna kabul etmek hakynda Permanlara hem-de 134 adama ýurdumyzda ýaşamak üçin ygtyýarnama bermek hakynda Karara gol çekdi. Şeýle-de döwlet Baştutanymyz Magtymguly Pyragynyň doglan gününiň 300 ýyllygy mynasybetli «Döwürleriň we siwilizasiýalaryň özara arabaglanyşygy — parahatçylygyň we ösüşiň binýady» atly halkara forumy ýokary derejede geçirmek boýunça guramaçylyk toparyny döretmek hakynda Buýruga gol çekdi.

Geçen hepdede Türkmenistanyň Prezidenti “Çagyryş boýunça harby gullugy geçýän harby gullukçylary Türkmenistanyň Ýaragly Güýçlerinden, beýleki goşunlaryndan we harby edaralaryndan harby gullukdan boşatmak we Türkmenistanyň raýatlarynyň harby gulluga nobatdaky çagyrylyşy hakynda” Permana hem-de ony ýerine ýetirmek boýunça degişli Buýruga gol çekdi.

22-nji sentýabrda hormatly Prezidentimiz Serdar Berdimuhamedow bilen Russiýa Federasiýasynyň Prezidenti Wladimir Putiniň we Özbegistan Respublikasynyň Prezidenti Şawkat Mirziýoýewiň arasynda telefon arkaly söhbetdeşlikler boldy. Dostlukly ýurtlaryň Liderleri döwlet Baştutanymyzy doglan güni bilen tüýs ýürekden gutlap, berk jan saglyk, abadançylyk, jogapkärli döwlet işinde mundan beýläk-de üstünlikleri arzuw etdiler. Telefon arkaly söhbetdeşlikleriň dowamynda döwlet Baştutanlary mundan beýläk-de köpugurly hyzmatdaşlyga taýýardyklaryny tassykladylar.

Geçen hepdäniň beýleki wakalarynyň hatarynda Daşary işler ministrliginde Türkmenistanyň maýa goýum forumynyň netijeleri boýunça hem-de Türkmenistanyň we Owganystanyň gatnaşmagynda energetika, elektroenergetika, ulag-aragatnaşyk desgalarynyň işe girizilmegi, düýbüniň tutulmagy mynasybetli geçirilen brifing görnüşli halkara amaly maslahaty görkezmek bolar. Nygtalyşy ýaly, bu taslamalaryň üstünlikli amala aşyrylmagy diňe iki ýurduň halklarynyň bähbitlerine däl, sebitdäki beýleki goňşy döwletleriň we halklaryň durmuş-ykdysady ulgamynyň kämilleşmegine hem goşant bolar. Maslahat Gahryman Arkadagymyz tarapyndan başy başlanan netijeli özgertmeleriň häzirki wagtda hormatly Prezidentimiziň baştutanlygynda üstünlikli durmuşa geçirilýändiginiň aýdyň güwäsine öwrüldi.

Paýtagtymyzdaky “Ýyldyz” myhmanhanasynda GDA-nyň Tohumçylyk meseleleri boýunça hökümetara utgaşdyryjy geňeşiniň nobatdaky mejlisi geçirildi. Oňa Russiýa Federasiýasynyň, Belarusuň, Gazagystanyň, Gyrgyzystanyň, Özbegistanyň, Täjigistanyň, Türkmenistanyň we beýleki döwletleriň ugurdaş ministrlikleriniň, pudaklaýyn dolandyryş edaralarynyň, ylmy-barlag, önümçilik merkezleriniň, GDA-nyň Ýerine ýetiriji komitetiniň wekilleri gatnaşdylar. Utgaşykly görnüşde geçirilen duşuşygyň dowamynda oba hojalyk pudagynda hyzmatdaşlygy mundan beýläk-de ösdürmek bilen baglanyşykly meseleleriň giň toplumy ara alnyp maslahatlaşyldy.

Mejlisiň çäklerinde Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň GDA-nyň Tohumçylyk meseleleri boýunça hökümetara utgaşdyryjy geňeşiniň başlygynyň orunbasary Iwan Kuzmin bilen duşuşygy geçirildi. Onda tohumçylyk pudagynda özara bähbitli hyzmatdaşlygyň meseleleri ara alnyp maslahatlaşyldy. Şeýle-de oba hojalyk önümçiligine ekinleriň, şol sanda güýzlük bugdaýyň täze görnüşlerini giňden ornaşdyrmak meselelerine, tohumçylykda gazanylanlara, bugdaýyň täze görnüşleriniň tohumçylygyny ylmy esasda alyp barjak ýaş ylmy işgärleri taýýarlamak üçin zerur şertleriň döredilmegine bagyşlanan “tegelek stol” duşuşyklary geçirildi.

Paýtagtymyzda «Oba hojalyk ekinleriniň tohumçylygynda ýetilen sepgitler we öňde durýan wezipeler» atly halkara ylmy maslahat hem-de onuň çäklerinde Türkmenistanyň oba hojalyk pudagynda gazanylanlaryň sergisi geçirildi. Bu çäreler türkmen oba hojalykçylarynyň üstünliklerini aýdyň şöhlelendirmek, ýurdumyzyň oba hojalyk pudagynyň mümkinçiliklerini, importyň ornuny tutýan, eksport ugurly ýokary hilli önümleriň önümçiligi ulgamynda mümkinçilikleri artdyrmak üçin döredilýän şertler bilen tanyşdyrmak, daşary ýurtly hünärmenler bilen tejribe alyşmak, özara bähbitli hyzmatdaşlygy mundan beýläk-de ösdürmek üçin amatly meýdança boldy.

Milli ykdysadyýetimiziň, ýurdumyzyň syýasy-jemgyýetçilik, medeni-ynsanperwer durmuşyndaky giň möçberli özgertmeleriň, özboluşly baý medeni mirasymyzyň guwandyryjy üstünliklerini şöhlelendirýän ykdysady üstünlikleriň sergisi Türkmenistanyň ýeten sepgitleriniň özboluşly beýanyna öwrüldi. “Garagum” myhmanhanasynyň arkasynda gurnalan sergi meýdançasynda ýaýbaňlandyrylan köpugurly gözden geçiriliş milli ykdysadyýetimiziň ähli pudaklaryny döwrebaplaşdyrmak we diwersifikasiýalaşdyrmak boýunça alnyp barylýan işleri, döwlet maksatnamalarynyň, innowasion taslamalaryň çäklerinde üstünlikli amala aşyrylýan çäreleri giňden açyp görkezdi.

Türkmenistanyň Ykdysadyýet toplumynda «Sanly we “ýaşyl” ykdysadyýet — durnukly ykdysady ösüşi üpjün etmegiň şerti» atly ylmy-amaly maslahat geçirildi. Oňa ýurdumyzyň degişli ministrlikleriniň we pudaklaýyn dolandyryş edaralarynyň, maliýe düzümleriniň, ugurdaş ýokary okuw mekdepleriniň ýolbaşçylarydyr wekilleri gatnaşdylar. Çykyşlarda bellenilişi ýaly, milli ykdysadyýetimiziň pudaklaryna energiýa tygşytlaýjy we ekologik taýdan arassa tehnologiýalaryň giňden ornaşdyrylmagy ýurdumyzy durmuş-ykdysady taýdan ösdürmek boýunça milli maksatnamalaryň ileri tutulýan ugry bolup durýar. Bu ugurdaky işleriň üstünlikli mysaly hökmünde türkmen halkynyň Milli Lideriniň başlangyçlary, hormatly Prezidentimiziň tagallalary bilen binýat bolan Arkadag şäherini görkezmek bolar. Bu şäheriň gurluşygynda «akylly» şäher konsepsiýasy we daşky gurşawa zyýanyň iň pes derejesini üpjün etmek çemeleşmesi gurluşyk serişdelerini öndürmek döwründen başlap, tä desgalary ulanmaga tabşyrmaga çenli ähli tapgyrlarda durmuşa geçirildi. Şeýlelikde, şu gezekki forum ýurdumyzda sanly we “ýaşyl” ykdysadyýeti ösdürmek, ösüşiň ylma we innowasiýa esaslanýan täze hil derejesine çykmak boýunça alnyp barylýan giň möçberli işleri aýdyňlygy bilen şöhlelendirdi.

Ýurdumyzyň baş baýramynyň öňüsyrasynda paýtagtymyzyň «Parahat — 7» ýaşaýyş toplumynda 13 sany 9 gatly ýaşaýyş jaýynyň we seýilgähiň açylyş dabarasy boldy. Bu çäre Diýarymyzyň ykdysady mümkinçilikleriniň, Gahryman Arkadagymyzyň ýurdumyzyň baş şäherini ösdürmek boýunça başyny başlan şähergurluşyk maksatnamasynyň Arkadagly Gahryman Serdarymyz tarapyndan üstünlikli amala aşyrylýandygynyň nobatdaky beýany boldy. Her biri 54 we 36 öýli ýaşaýyş jaýlarynyň gurluşygynda döwrebap binagärlik çözgütleri peýdalanylyp, ýaşaýyş üçin ähli amatly şertler döredilipdir. Binalaryň ýanaşyk ýerleri doly abadanlaşdyrylyp, degişli ýol-ulag, inženerçilik-tehniki düzüm göz öňünde tutulypdyr. Saýaly baglar ekilen, ýaşyl zolaklar döredilen täze seýilgäh bolsa ýaşaýyş toplumyna aýratyn bezeg berip, ýakymly howa gurşawyny döredýär.

Dabaranyň dowamynda zähmetde tapawutlanan gurluşykçylara hormatly Prezidentimiziň adyndan gymmat bahaly sowgatlar gowşuryldy.

Hepdäniň beýleki wakalarynyň hatarynda 22-nji sentýabrda Döwlet medeniýet merkeziniň Mukamlar köşgünde geçirilen “Arkadagly Gahryman Serdarymyzyň ak ýoly,//Arşa göterilýär halkyň ykbaly” atly konserti görkezmek bolar. Dabara sungat ussatlary, ýaş estrada aýdymçylary, meşhur aýdym-saz, tans toparlary gatnaşdylar.

Şol gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäherine iş saparyny amala aşyrdy. Bu ýerde Gahryman Arkadagymyz şäheri ösdürmek, döwlet Baştutanymyzyň beren tabşyryklaryny ýerine ýetirmek bilen baglanyşykly alnyp barylýan işler bilen tanyşdy. Şeýle-de Watanymyzyň Garaşsyzlygynyň 33 ýyllyk baýramy mynasybetli giň gerimli dabaralara görülýän taýýarlyk meselelerine üns çekildi.

Şeýlelikde, geçen hepdäniň wakalary Berkarar döwletiň täze eýýamynyň Galkynyşy döwründe hormatly Prezidentimiz Serdar Berdimuhamedowyň baştutanlygynda ýurdumyzyň içeri we daşary syýasatynyň üstünlikli durmuşa geçirilýändiginiň nobatdaky beýany boldy. Mähriban halkymyzyň bagtyýar durmuşyny üpjün etmek, dünýä jemgyýetçiligi bilen netijeli dialogy çuňlaşdyrmak, ählumumy parahatçylygyň, abadançylygyň, ösüşiň bähbidine ykdysady hyzmatdaşlygy we ynsanperwer gatnaşyklary giňeltmek bu syýasatyň baş maksadydyr.

Arkadag şäheri, 22-nji sentýabr. Şu gün türkmen halkynyň Milli Lideri, Türkmenistanyň Halk Maslahatynyň Başlygy, Hormatly il ýaşulusy Gurbanguly Berdimuhamedow Arkadag şäherine nobatdaky iş saparyny amala aşyrdy. Gahryman Arkadagymyz bu ýerde degişli ýolbaşçylar bilen şäheri ösdürmegiň wajyp meselelerini hem-de öňde goýlan wezipeleri ara alyp maslahatlaşdy.

Häzirki döwürde Milli Liderimiziň başlangyjy bilen binýat bolan täze şäher ähli ugurlar boýunça sazlaşykly ösüş ýoluna düşdi. Arkadag şäheriniň halkara derejedäki güwänamalara we abraýly baýraklara mynasyp bolmagy bu ýerde alnyp barylýan işleriň ylmyň täze gazananlaryna, dünýäniň ösen tejribesine esaslanýandygyny görkezýär. Munuň özi Gahryman Arkadagymyzyň başyny başlan asylly işleriniň Arkadagly Gahryman Serdarymyzyň baştutanlygynda ýokary derejede amala aşyrylýandygyny tassyklaýar.

Ir bilen Türkmenistanyň Halk Maslahatynyň Başlygy Gurbanguly Berdimuhamedow häzirki zamanyň ösen tehnologiýalaryny we milli binagärlik ýörelgelerini özünde jemleýän, “akylly” şäher konsepsiýasy esasynda bina edilen Arkadag şäherine geldi. Gahryman Arkadagymyz bu ýerde Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow we Arkadag şäheriniň häkimi G.Mämmedowa bilen täze şäheri ösdürmegiň meselelerini, öňde goýlan wezipeleri ýerine ýetirmegiň ugurlaryny ara alyp maslahatlaşdy.

Bellenilişi ýaly, ýurdumyzyň we halkymyzyň durmuşynda möhüm ähmiýeti bolan Türkmenistanyň Halk Maslahatynyň nobatdaky mejlisiniň öňüsyrasynda döwlet ähmiýetli meseleler boýunça pikir alyşmak asylly däbe öwrüldi. Şunda hormatly Prezidentimiz Serdar Berdimuhamedowyň Ministrler Kabinetiniň geçen ýylda ýurdumyzda ýerine ýetirilen işleriň jemlerine bagyşlanyp geçirilen giňişleýin mejlisinde “Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyny” amal etmegiň çäklerinde Arkadag şäherini hemmetaraplaýyn ösdürmek boýunça beren tabşyryklarynyň ähmiýetine üns çekildi.

Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow Milli Liderimiziň başlangyjy esasynda “Arkadag şäherini 2024 — 2052-nji ýyllarda ösdürmegiň Konsepsiýasynyň” işlenip taýýarlanylandygyny aýdyp, degişli maksatnamany tassyklamak boýunça zerur işleriň alnyp barylýandygyny nygtady. Konsepsiýada Arkadag şäherini ähli ugurlarda ösdürmegiň wezipeleri kesgitlenildi.

Hormatly Arkadagymyz täze şäheri mundan beýläk-de ösdürmegiň çäklerinde alnyp barylýan işleriň wajypdygyna ünsi çekip, onuň häzirki zaman ylmynyň gazananlaryna, täzeçil tehnologiýalara esaslanmalydygyny belledi. Munuň özi şäheriň ähli görkezijiler boýunça döwrüň ösen talaplaryna laýyk gelmeginiň baş şertini emele getirýär. Şunuň bilen baglylykda, Arkadag şäherini “akylly” şäher konsepsiýasynyň talaplaryna laýyklykda ösdürmegiň wajypdygyny nygtap, Halk Maslahatynyň Başlygy medeni-durmuş maksatly binalaryň taslamalary taýýarlanylanda ýerli tebigy aýratynlyklaryň göz öňünde tutulmalydygyny, bu künjegiň ekologik ýagdaýynyň ýokary derejede saklanmalydygyny aýtdy.

Türkmen halkynyň Milli Lideri “Arkadag şäherini 2024 — 2052-nji ýyllarda ösdürmegiň Konsepsiýasyny” Türkmenistanyň Halk Maslahatynyň Prezidiumyna iberip, maksatnamany hormatly Prezidentimiziň tassyklamagyna hödürlemek boýunça degişli işleriň alnyp barylmalydygyna ünsi çekdi. Arkadagly Gahryman Serdarymyz bu Konsepsiýany tassyklan halatynda, onda kesgitlenen wezipeleri ýerine ýetirmegiň wajypdygy bellenildi. Şeýle hem bu Konsepsiýanyň esasynda “Türkmenistanda ylym ulgamyny ösdürmegiň 2024 — 2052-nji ýyllar üçin Strategiýasyny” tassyklamak boýunça geçirilýän işleriň netijeleri ara alnyp maslahatlaşyldy.

Türkmenistanyň başlangyjy boýunça BMG-niň Baş Assambleýasy 2025-nji ýyly “Halkara parahatçylyk we ynanyşmak ýyly” diýip yglan etmek hakynda Kararnamany kabul etdi. Munuň özi ählumumy derejede parahatçylygy, howpsuzlygy, durnukly ösüşi üpjün etmek babatda aýratyn ähmiýetli çözgüt bolup durýar. Türkmenistanyň başlangyjynyň halkara giňişlikde ykrar edilmegi ýurdumyzyň dünýä ähmiýetli işlere ägirt uly goşant goşýandygynyň nobatdaky beýanydyr.

Bellenilişi ýaly, ylym ulgamyny mundan beýläk-de ösdürmek boýunça maksatnamanyň işlenip taýýarlanylmagy Türkmenistanda häzirki zaman ylmynyň netijeli ösdürilmegi bilen baglanyşykly meselelere döwlet derejesinde ähmiýet berilýändigini görkezýär. Şunuň bilen baglylykda, ýurdumyzyň dürli künjeklerinde, şol sanda Arkadag şäherinde döwrebap ylym-bilim ojaklarynyň yzygiderli gurulmagy, olaryň ýokary derejede enjamlaşdyrylmagy, bilim edaralarynda ýaşlara bilim bermegiň häzirki zaman usullarynyň ornaşdyrylmagy möhüm wezipe hökmünde kesgitlenildi.

Gahryman Arkadagymyz täze şäherde alnyp barylýan işleriň halkara derejede ykrar edilýändigini belläp, dünýäde “Halkara parahatçylyk we ynanyşmak ýyly” diýlip atlandyrylan 2025-nji ýyly ähmiýetli wakalara beslemek, onuň çäklerinde halkara çäreleri geçirmek boýunça wezipeleriň kesgitlenmelidigini aýtdy. Şunda “Dialog — parahatçylygyň kepili” ýörelgesinden ugur almagyň wajypdygy bellenildi.

Nygtalyşy ýaly, ýakynda paýtagtymyzda Türkmenistanyň maýa goýum forumy, ýurdumyzyň ykdysadyýetine ýokary tehnologiýalary we innowasiýalary çekmek boýunça halkara maslahat geçirildi. Bu bolsa önümçilik toplumlaryny gurmak, Arkadag şäheriniň lukmançylyk klasterini döretmek işlerine daşary ýurt maýa goýum serişdelerini çekmek meselelerinde möhüm orny eýeleýär.

Milli Liderimiz täze şäheriň ikinji tapgyrynyň gurluşygyny çaltlandyrmak, binalaryň bellenen möhletlerde ulanmaga berilmegini üpjün etmek meseleleri barada aýdyp, ýaşlaryň häzirki zaman intellektual eýeçiliginiň aýratynlyklaryny, sanly ulgamyň ähmiýetini işjeň özleşdirmekleri üçin zerur tagallalaryň edilmelidigine ünsi çekdi. Şol bir wagtyň özünde, ösüp gelýän ýaş nesilleriň türkmen halkynyň dünýä nusgalyk ýagşy dessurlary esasynda terbiýelenmegine wajyp ähmiýet berilmelidir.

Lukman Arkadagymyz Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň işiniň häzirki zaman lukmançylyk ylmyna daýanýandygyny belledi. Gaznanyň hemaýat bermeginde alnyp barylýan bejeriş çäreleri lukmançylyk ylmynda gazanylan üstünliklere, bu ugruň aýratynlyklaryna esaslanýar.

Soňra Arkadag şäheriniň häkimi G.Mämmedowa öňde boljak şanly senelere taýýarlygyň çäklerinde ýaýbaňlandyrylan işler barada hasabat berdi. Bellenilişi ýaly, mukaddes Garaşsyzlygymyzyň 33 ýyllygy, Saglygy goraýyş we derman senagaty işgärleriniň güni mynasybetli, täze jaýlara göçüp gelmegiň hormatyna köpçülikleýin jaý toýlarynyň tutulmagyna taýýarlyk görülýär.

Milli Liderimiz öňde boljak şanly seneleri, şol sanda Halkara Bitaraplyk güni mynasybetli guraljak çäreleri ýokary derejede geçirmegiň wajypdygyny aýdyp, medeni-köpçülikleýin çärelerde halkymyzyň bagtyýar durmuşynyň, täze şäheriň ösüş depgininiň öz beýanyny tapmalydygyny belledi. Şol bir wagtyň özünde, ýaşlaryň sportuň dürli görnüşlerine bolan gyzyklanmalaryny artdyrmak meseleleri ünsden düşürilmeli däldir.

Häzirki döwürde Arkadag şäherinde sportuň dürli görnüşleri bilen meşgullanýan ýaşlaryň sany barha artýar. Munuň özi täze şäheriň halkara sport giňişligine aralaşmagyna giň ýol açýar. “Arkadag” futbol topary geçen ýylyň jemleri boýunça Türkmenistanyň ýokary Ligasynyň çempiony boldy. Onuň şu ýylky görkezijileriniň hem ýokary derejä eýedigi “Arkadag” futbol toparynyň ägirt uly geljeginiň bardygyny görkezýär. Sportuň medeni çäreler bilen utgaşdyrylmagy jemgyýetimizde sagdyn durmuş ýörelgeleriniň berkidilmegi bilen bir hatarda, halkymyzyň ruhy dünýäsiniň baýlaşmagynda, ýaşlary täze ýeňişlere, uly üstünliklere ruhlandyrmakda hem ähmiýetlidir. Şunda şanly seneleriň hormatyna guralýan dabaralar, jaý toýlary täsirli wakalara, ýatda galyjy pursatlara baý bolmalydyr.

Türkmenistanyň at gazanan arhitektory Gahryman Arkadagymyz Köpetdagyň etegindäki gözel künjekde bina edilen şäheriň ösüşinde häzirki zamanyň ösen tejribesiniň ulanylmalydygyny belledi. Munuň özi şäheriň ilatynyň durmuş derejesiniň ýokarlanmagynda ähmiýetlidir.

Soňra Milli Liderimiz täze şäherde ulanylýan elektrobuslaryň aýratynlyklary bilen tanyşdy. Türkmenistanyň Halk Maslahatynyň Başlygy elektrobuslaryň amatlylyk we tehniki görkezijiler babatda häzirki zamanyň ösen talaplaryna, ýokary halkara ülňülere laýyk gelmelidigini belledi. Munuň üçin degişli düzümleriň hünärmenleri bilen bilelikdäki tagallalaryň edilmegi zerurdyr. Häzir bar bolan we geljekde satyn alynjak elektrobuslaryň ýerli tebigy howa şertlerine laýyk gelmegi, olarda ähli amatlyklaryň üpjün edilmegi hem-de halkymyza ýokary derejeli hyzmat etmegi bilen baglanyşykly meselelere aýratyn ähmiýet berilmelidir. Gahryman Arkadagymyz elektrobuslaryň hyzmat aýratynlyklaryna, daşky bezegine birnäçe belliklerini aýdyp, geljekde bu talaplaryň göz öňünde tutulmalydygyna ünsi çekdi. Şeýle-de elektrobuslarda döwrebap mahabat ýazgylaryny ýerleşdirmek meseleleri barada aýdylyp, bu ugurda degişli işleri geçirmek tabşyryldy.

Häzirki döwürde halkymyzyň bagtyýar durmuşy, ýurdumyzyň abadançylygy bilen baglanyşykly meseleleriň döwletimiziň hemişelik üns merkezinde saklanýandygyny aýdyp, Gahryman Arkadagymyz täze şäheriň ýollarynda elektrobuslaryň we beýleki ulaglaryň sazlaşykly hereketiniň üpjün edilmegine gönükdirilen çäreleriň döwrüň ruhuna doly laýyk gelmelidigini nygtady. Bu işleriň ýokary derejede berjaý edilmegi Türkmenistanyň Halk Maslahatynyň Başlygy Gurbanguly Berdimuhamedowyň “Döwlet adam üçindir!” diýen şygaryny baş ýörelge edinýän hormatly Prezidentimiziň durmuş ugurly syýasatynyň esasy talabydyr.

Gahryman Arkadagymyz hemmelere alyp barýan işlerinde uly üstünlikleri arzuw edip, bu ýerden ugrady.

Beýleki habarlar

Aşgabat, 20-nji sentýabr. Şu gün hormatly Prezidentimiz Serdar Berdimuhamedow sanly ulgam arkaly Ministrler Kabinetiniň giňişleýin mejlisini geçirdi. Onda ýurdumyzy durmuş-ykdysady taýdan ösdürmegiň möhüm wezipeleri ara alnyp maslahatlaşyldy, käbir resminamalaryň taslamalaryna garaldy. Mejlise Döwlet howpsuzlyk geňeşiniň agzalary, welaýatlaryň, Aşgabat şäheriniň häkimleri hem çagyryldy.

Döwlet Baştutanymyz mejlisi açyp: “Hemişe bolşy ýaly, biz jenaýat edendikleri üçin iş kesilen we eden etmişlerine ökünip, ak ýürekden toba gelen raýatlarymyzyň günäsini geçýäris, olary jeza çekmekden boşatmak ýaly sahawatly çäreleri yzygiderli geçirip durýarys” diýip belledi.

Şunuň bilen baglylykda, Döwlet howpsuzlyk geňeşiniň sekretary, Türkmenistanyň Prezidentiniň ýanyndaky Raýatlyk we günä geçmek meseleleri boýunça teklipleri taýýarlamak baradaky toparyň başlygy B.Gündogdyýewe söz berildi. Ol jenaýat edendikleri üçin iş kesilen raýatlaryň Garaşsyzlygymyzyň 33 ýyllyk baýramy mynasybetli günäsini geçmek boýunça bu toparyň geçiren işleri barada hasabat berdi.

Döwlet Baştutanymyz hasabaty diňläp, asylly däbimize eýerip, iş kesilen 736 raýatyň ýurdumyzyň Garaşsyzlyk baýramy mynasybetli günäsini geçmek baradaky Permana gol çekýändigini aýtdy.

Döwlet howpsuzlyk geňeşiniň sekretary, goranmak ministri B.Gündogdyýewe hukuk goraýjy edaralaryň ýolbaşçylary bilen bilelikde günäsi geçilen adamlaryň ählisini tussaglykdan boşadyp, olaryň ýakyn wagtda öz öýlerine, maşgala agzalarynyň arasyna barar ýaly, ähli zerur işleri geçirmek tabşyryldy. Hormatly Prezidentimiz günäsi geçilen adamlara yhlasly zähmet çekip, eziz Watanymyza ak ýürekden hyzmat edip, halal zähmetiň hözirini görüp ýaşamaklaryny arzuw etdi.

Soňra Mejlisiň Başlygy D.Gulmanowa alnyp barylýan kanun çykaryjylyk işi barada maglumat berdi.

Bellenilişi ýaly, iş toparlarynda döwletimiziň we jemgyýetimiziň durmuşynyň dürli ugurlarynyň kanunçylyk taýdan üpjün edilmegine gönükdirilen işler alnyp barylýar. Şunuň bilen birlikde, Mejlisde geçirilen duşuşyklar barada aýdyldy. Hususan-da, Wengriýanyň Türkmenistandaky Adatdan daşary we Doly ygtyýarly ilçisinden ynanç haty kabul edildi. ABŞ-nyň Türkmenistandaky Adatdan daşary we Doly ygtyýarly ilçisi hem-de bu ýurduň Döwlet departamentiniň ýörite geňeşçisi, Gazagystan Respublikasynyň ýurdumyzdaky Adatdan daşary we Doly ygtyýarly ilçisi bilen duşuşyklar geçirildi. Mejlisiň wekilleri BMG-niň Ösüş maksatnamasynyň, Çagalar gaznasynyň wekilhanalarynyň, ÝHHG-niň Aşgabatdaky merkeziniň ýurdumyzyň degişli döwlet edaralary bilen bilelikde guran iş maslahatlaryna gatnaşdylar. Deputatlar Merkezi Aziýa döwletleriniň ikinji parlamentara forumyna gatnaşmak üçin Özbegistan Respublikasynyň Hywa şäherinde iş saparynda boldular.

Milli parlamentiň ýolbaşçysy Türkmenistanyň Halk Maslahaty, Ministrler Kabineti, degişli ministrlikler we pudaklaýyn dolandyryş edaralary, welaýatlaryň, Aşgabat we Arkadag şäherleriniň häkimlikleri hem-de jemgyýetçilik birleşikleri bilen bilelikde Türkmenistanyň Halk Maslahatynyň mejlisine taýýarlyk görlüşi barada habar berdi. Mundan başga-da, deputatlar mukaddes Garaşsyzlygymyzyň, Halk Maslahatynyň döredilmeginiň hem-de onuň alyp barýan işleriniň taryhy, syýasy-jemgyýetçilik ähmiýetini wagyz-nesihat etmek boýunça geçirilýän çärelere gatnaşýarlar.

Hormatly Prezidentimiz döwletimiziň hukuk binýadyny we ykdysady esaslaryny berkitmäge ýardam berýän kanun taslamalaryny işläp taýýarlamagy dowam etdirmegiň zerurdygyna ünsi çekdi. Şunuň bilen bir hatarda, Halk Maslahatynyň mejlisine, Garaşsyzlygymyzyň 33 ýyllyk baýramy mynasybetli geçiriljek çärelere gowy taýýarlyk görmegiň wajypdygy bellenildi.

Ministrler Kabinetiniň Başlygynyň orunbasary H.Geldimyradow Balkan, Lebap, Mary welaýatlarynda gurulmagy meýilleşdirilýän onkologiýa hassahanalary bilen bagly meseleler barada hasabat berdi. Hususan-da, olary gurmagyň taslamalaryny maliýeleşdirmek boýunça geçirilen degişli işleriň netijeleri barada aýdyldy.

Hormatly Prezidentimiz Serdar Berdimuhamedow hasabaty diňläp, ýurdumyzda ynsan saglygyny goramaga we berkitmäge, sagdyn durmuş ýörelgelerini ornaşdyrmaga uly ähmiýet berilýändigini nygtady. Diýarymyzyň ähli welaýatlarynda dünýä ölçeglerine laýyk gelýän hassahanalaryň, saglyk merkezleriniň gurluşygyny yzygiderli dowam etdirmek zerurdyr. Munuň özi saglygy goraýyş ulgamyny döwrebap derejede ösdürmäge ýardam berer. Şunuň bilen baglylykda, döwlet Baştutanymyz wise-premýere birnäçe anyk tabşyryklary berdi.

Ministrler Kabinetiniň Başlygynyň orunbasary B.Amanow gözegçilik edýän ýangyç-energetika ulgamyndaky işleriň ýagdaýy barada hasabat berdi.

Bellenilişi ýaly, “Türkmengaz” döwlet konserni, “Türkmengeologiýa” döwlet korporasiýasy tarapyndan çykarylýan uglewodorod serişdeleriniň möçberini artdyrmak, ýurdumyzyň nebitgaz ýataklaryny gözlemek we özleşdirmek boýunça degişli çäreler görülýär. Şunuň bilen baglylykda, gaz känlerinde gözleg-barlag, baha beriş-ulanyş guýularyny burawlamak boýunça bilelikde işlenip düzülen degişli meýilnamanyň esasynda Ahal, Lebap we Mary welaýatlarynyň çäklerindäki meýdançalarda gözleg-barlag guýularyny burawlamak işleri meýilleşdirildi. Şonuň esasynda Lebap welaýatynyň çäginde ýerleşýän meýdançalaryň birinde geçirilen buraw işleriniň netijesinde, senagat ähmiýetli gaz akymy alyndy. Munuň özi çykarylýan mawy ýangyjyň möçberini artdyrmaga mümkinçilik berer.

Hormatly Prezidentimiz hasabaty diňläp, nebitgaz ýataklaryny gözlemegiň we özleşdirmegiň hasabyna nebitiň, tebigy gazyň goşmaça möçberini çykarmaga uly ähmiýet berilýändigini belledi. Bu ugurda türkmen geologlary tarapyndan netijeli işler alnyp barylýar. Şunuň bilen baglylykda, döwlet Baştutanymyz täze açylan gaz ýatagyny özleşdirmek üçin ähli zerur işleri geçirmegiň wajypdygyny aýtdy we wise-premýere ýurdumyzyň çägindäki meýdançalarda gözleg-barlag guýularyny burawlamak işlerini yzygiderli dowam etdirmegi tabşyrdy.

Ministrler Kabinetiniň Başlygynyň orunbasary T.Atahallyýew ýurdumyzyň oba hojalyk pudagynda, welaýatlarda alnyp barylýan möwsümleýin işler barada hasabat berdi.

Bellenilişi ýaly, şu günler Diýarymyzda bugdaý ekişini bellenen möhletlerde we talabalaýyk geçirmek, ekişde ulanylýan oba hojalyk tehnikalaryny, gurallary öndürijilikli işletmek, gallaçy daýhanlary ýokary hilli bugdaý tohumlary bilen üpjün etmek boýunça işler dowam etdirilýär. Ekiş geçirilen meýdanlarda gögeriş suwy tutulýar. Gowaça meýdanlarynda pagta ýygymy dowam edýär. Ýetişdirilen hasyly gysga wagtda, ýitgisiz ýygnap almak, pagta kabul ediş harmanhanalarynda, pagta arassalaýjy kärhanalarda bökdençsiz kabul etmek, möwsümde ulanylýan tehnikalary netijeli işletmek boýunça zerur çäreler görülýär. Welaýatlaryň ekerançylyk meýdanlarynda güýzlük azyklyk ekinlere ideg etmek, ýetişdirilen hasyly ýygnap almak işleri utgaşykly alnyp barylýar.

Şeýle hem wise-premýer ýurdumyzyň maldarçylyk hojalyklarynda mallaryň baş sanyny artdyrmak, önüm berijiligini ýokarlandyrmak, ekerançylyk meýdanlarynyň suw üpjünçiligini we ýerleriň melioratiw ýagdaýyny gowulandyrmak, suw serişdelerini tygşytly peýdalanmak üçin ýerine ýetirilýän çäreler barada hasabat berdi.

Hormatly Prezidentimiz hasabaty diňläp, ýurdumyzyň oba hojalyk pudagyny toplumlaýyn ösdürmegi, maddy-enjamlaýyn binýadyny pugtalandyrmagy dowam etdirmegiň wajypdygyny belledi. Döwlet Baştutanymyz bugdaý ekişini bellenen möhletlerde, talabalaýyk alyp barmagyň, oba hojalyk tehnikalaryny netijeli peýdalanmagyň, gallaçy daýhanlarymyzyň ýokary hilli bugdaý tohumlary bilen üpjün edilmeginiň zerurdygyny nygtap, wise-premýere pagta ýygymy möwsümini ýokary depginde dowam etdirmegi, beýleki oba hojalyk ekinleriniň hasylyny ösdürip ýetişdirmekde-de netijeli işleri alyp barmagy tabşyrdy.

Ministrler Kabinetiniň Başlygynyň orunbasary B.Annamämmedow Türkmenistany senagat taýdan ösen ýurtlaryň birine öwürmek, daşary ýurtlardan getirilýän harytlaryň ornuny tutýan hem-de eksport ugurly önümleri öndürýän döwrebap önümçilikleri döretmek boýunça görülýän çäreler barada hasabat berdi.

Iri gurluşyklary, ykdysadyýetiň pudaklaryny, ilatymyzy ýokary hilli gurluşyk serişdeleri bilen ýeterlik derejede üpjün etmek boýunça netijeli işler alnyp barylýar. Ýurdumyzda we daşary ýurtlarda demir garyndylaryna bolan islegleriň artýandygy bilen baglylykda, häzirki wagtda bu önümi öndürýän zawody gurmak mümkinçiligi öwrenilýär. Şunuň bilen baglylykda, döwlet Baştutanymyzyň garamagyna zawodyň gurluşyk taslamasyny durmuşa geçirmek boýunça degişli teklip hödürlenildi.

Hormatly Prezidentimiz hasabaty diňläp, ýurdumyzy senagat taýdan ösdürmekde, ýerli çig-mal serişdelerimizi rejeli we netijeli peýdalanmakda maksatnamalaýyn işleriň alnyp barylýandygyny belledi. Şunuň bilen baglylykda, döwlet Baştutanymyz demir garyndylaryny öndürýän zawodyň gurluşyk taslamasy üçin tehniki-ykdysady esaslandyrmany işläp taýýarlamak baradaky teklibi goldady we wise-premýere bu ugurda degişli işleri geçirmegi tabşyrdy.

Ministrler Kabinetiniň Başlygynyň orunbasary B.Atdaýew eksportyň we ýurdumyzyň daşary söwda dolanyşygynyň möçberini artdyrmak boýunça alnyp barylýan işler barada hasabat berdi.

Bellenilişi ýaly, Döwlet haryt-çig mal biržasynyň daşary ykdysady gatnaşyklaryny ösdürmek, eksport-import harytlarynyň dünýä bazarlaryndaky bahalaryny seljermegiň halkara maglumat ulgamlaryny ulanmak arkaly birža söwdasyny häzirki döwrüň talaplaryna laýyklykda guramak boýunça zerur işler alnyp barylýar. Şunuň bilen baglylykda, döwlet Baştutanymyzyň garamagyna degişli teklip hödürlenildi.

Hormatly Prezidentimiz hasabaty diňläp, ýurdumyzda daşary söwda dolanyşygyny artdyrmak, eksportyň möçberini we ugurlaryny giňeltmek boýunça netijeli işleriň amala aşyrylýandygyny belledi. Şunuň bilen baglylykda, döwlet Baştutanymyz wise-premýere eksport we import edilýän harytlaryň nyrhlaryna gözegçilik etmek bilen bagly degişli işleri geçirmegi tabşyrdy.

Ministrler Kabinetiniň Başlygynyň orunbasary M.Mämmedowa şu ýylyň oktýabr aýynda geçiriljek esasy çäreleriň, medeni-durmuş maksatly binalaryň ulanmaga berilmeginiň Tertibi barada hasabat berdi.

Bellenilişi ýaly, geljek aýda dürli maslahatlary, döredijilik duşuşyklaryny, sergileri, Magtymguly Pyragynyň doglan gününiň 300 ýyllygy, Ýaşulularyň halkara güni, Hatyra güni, Saglygy goraýyş we derman senagaty işgärleriniň güni, Türkmen alabaýynyň baýramy mynasybetli dürli çäreleri geçirmek meýilleşdirilýär. Şeýle hem ozal yglan edilen döredijilik bäsleşikleriniň jemleri jemlener.

Türkmenistanyň Halk Maslahatynyň mejlisinden gelip çykýan wezipeleri wagyz etmek maksady bilen, maslahatlary, wagyz-nesihat çärelerini geçirmek göz öňünde tutulýar. Şunuň bilen birlikde, Magtymguly Pyragynyň doglan gününiň 300 ýyllygyna bagyşlanan “Döwürleriň we siwilizasiýalaryň özara arabaglanyşygy — parahatçylygyň we ösüşiň binýady” atly halkara forum, Russiýa Federasiýasynyň, Ermenistan Respublikasynyň Türkmenistandaky Medeniýet günleri, Türki medeniýetiň halkara guramasyna agza ýurtlaryň II teatr festiwaly we beýleki çäreler guralar.

Döwlet Baştutanymyz hasabaty diňläp, ýurdumyzda bellenilýän baýramlar we şanly seneler bilen bagly oktýabr aýynda guraljak esasy çärelere, şol sanda Ýaşulularyň halkara güni, Saglygy goraýyş we derman senagaty işgärleriniň güni, Türkmen alabaýynyň baýramy mynasybetli geçiriljek çärelere gowy taýýarlyk görmegiň möhümdigini belledi. Hormatly Prezidentimiz ulanmaga berilýän medeni-durmuş maksatly desgalaryň açylyş dabaralaryny ýokary derejede geçirmegiň zerurdygyna ünsi çekip, wise-premýere degişli tabşyryklary berdi.

Ministrler Kabinetiniň Başlygynyň orunbasary B.Orazdurdyýewa 2028-nji ýylda Amerikanyň Birleşen Ştatlarynyň Los-Anjeles şäherinde geçiriljek XXXIV tomusky Olimpiýa we XVIII tomusky Paralimpiýa oýunlaryna Türkmenistanyň milli ýygyndy toparlaryny taýýarlamak boýunça alnyp barylýan işler barada hasabat berdi.

Bellenilişi ýaly, Berkarar döwletiň täze eýýamynyň Galkynyşy döwründe ýurdumyzda Olimpiýa hereketini we ýokary netijeli sporty ösdürmek boýunça giň mümkinçilikler döredilýär. Türkmen türgenlerini dünýä derejesindäki ýaryşlara häzirden taýýarlamak we olaryň ussatlygyny kämilleşdirmek, ýokary netijeleri gazanmaklary üçin zerur şertleri döretmek boýunça öňde goýlan wezipelere laýyklykda, Türkmenistanyň Bedenterbiýe we sport baradaky döwlet komiteti guramaçylyk toparyny döretmegi, Aşgabat şäherindäki Olimpiýa şäherçesiniň desgalarynda, «Awaza» milli syýahatçylyk zolagyndaky sport toplumynda sportuň görnüşleri boýunça okuw-türgenleşik sapaklaryny hem-de ýygnanyşyklary guramagy teklip edýär. Şunuň bilen baglylykda, döwlet Baştutanymyzyň garamagyna degişli teklip hödürlenildi.

Hormatly Prezidentimiz hasabaty diňläp, ýurdumyzda bedenterbiýäni we sporty halkara derejede ösdürmegiň, iri sport ýaryşlarynda türkmen türgenleriniň üstünlikli çykyş etmeklerini gazanmagyň döwlet syýasatynyň ileri tutulýan ugry bolup durýandygyny belledi. Döwlet Baştutanymyz türgenlerimiziň 2028-nji ýylda geçiriljek tomusky Olimpiýa we Paralimpiýa oýunlarynda üstünlikli çykyş etmekleri üçin häzirden zerur işleri alyp barmagyň möhümdigine ünsi çekdi we wise-premýere bu ugurda degişli işleri geçirmegi tabşyrdy.

Ministrler Kabinetiniň Başlygynyň orunbasary, daşary işler ministri R.Meredow Türkmenistanyň raýatlygyna kabul etmek hem-de ýurdumyzda ýaşamak üçin ygtyýarnamalary bermek meseleleri barada hasabat berdi.

Bellenilişi ýaly, ynsanperwer ulgam döwlet syýasatynyň ileri tutulýan ugurlarynyň biri bolup durýar. Milli kanunçylygymyz we halkara kadalar esasynda ýurdumyzda ýaşaýan ähli adamlaryň hukuklaryny, azatlyklaryny, bähbitlerini goramak hem kepillendirmek üçin yzygiderli işler geçirilýär. Şol işleriň netijesinde, Türkmenistanyň Hökümeti tarapyndan BMG we beýleki halkara guramalar bilen bilelikde bosgunlaryň, raýatlygy bolmadyk adamlaryň hukuklaryny ýokary derejede üpjün etmek boýunça degişli çäreler amala aşyrylýar.

Mälim bolşy ýaly, köp ýyllaryň dowamynda Türkmenistanyň Prezidentiniň Permanlary bilen, ýurdumyzda ýaşaýan we şol bir wagtyň özünde hiç bir döwletiň raýaty bolmadyk 30 müň 998 adam Türkmenistanyň raýatlygyna kabul edildi. Şeýle-de häzirki wagta çenli 5 müň 18 daşary ýurt raýatyna we raýatlygy bolmadyk adamlara Türkmenistanda ýaşamak üçin ygtyýarnama berildi. Bu ynsanperwer häsiýetli çözgütler Türkmenistanyň köptaraplaýyn halkara resminamalary, hususan-da, Birleşen Milletler Guramasynyň Bosgunlaryň statusy hakynda, Apatridleriň statusy hakynda we Raýatsyzlygy azaltmak hakynda Konwensiýalaryny üstünlikli berjaý edýändigini aýdyň görkezýär.

Dünýä bileleşigini bu ugurda ýurdumyzyň toplan oňyn tejribesi bilen tanyşdyrmak üçin geçirilmegi meýilleşdirilýän raýatsyzlygyň soňuna çykmak boýunça ýokary derejeli sebitleýin maslahatyň ähmiýeti has-da artýar. Döwlet Baştutanymyzyň başlangyjyndan hem-de Türkmenistanyň Birleşen Milletler Guramasynyň Baş Assambleýasynyň 78-nji sessiýasyndaky ileri tutýan garaýyşlaryndan ugur alyp, BMG-niň Bosgunlaryň işi baradaky Ýokary komissarynyň müdirligi bilen bilelikde bu forumy şu ýylyň 8-nji noýabrynda Aşgabat şäherinde geçirmek göz öňünde tutulýar.

Daşary işler ministrligi we ýurdumyzyň ygtyýarly döwlet edaralary tarapyndan ýurdumyzyň çäklerinde hemişelik ýaşaýan, döwletimiziň raýatlygyna kabul edilmegi baradaky şahsy ýüztutmalary hasaba alnan 1 müň 146 adamyň Türkmenistanyň raýatlygyna kabul edilmegi boýunça degişli işler geçirildi. Raýatlyk almak üçin hödürlenilýän adamlar 29 milletiň wekilleridir. Şunuň bilen birlikde, Türkmenistana gelen daşary ýurt raýatlaryna ýurdumyzda ýaşamak üçin ygtyýarnamanyň berilmegi baradaky şahsy ýüztutmalary hasaba alnan 134 adamyň Türkmenistanda ýaşamak üçin ygtyýarnamanyň berilmegi boýunça degişli işler geçirildi. Olar 6 döwletiň raýatlary we 15 milletiň wekilleridir. Şunuň bilen baglylykda, hormatly Prezidentimiziň garamagyna Türkmenistanyň raýatlygyna kabul etmek, şeýle hem ýurdumyzda ýaşamak üçin ygtyýarnamalarynyň berilmegi bilen bagly resminamalaryň taslamasy hödürlenildi.

Pasportlary we degişli resminamalary gowşurmak dabarasyny ýakyn günlerde Döwlet migrasiýa gullugynyň binasynda Türkmenistanda işleýän halkara guramalaryň we daşary ýurt habar beriş serişdeleriniň wekilleriniň, ýurdumyzyň degişli ministrlikleriniň, pudak edaralarynyň wekilleriniň gatnaşmagynda geçirmek meýilleşdirilýär.

Hormatly Prezidentimiz Serdar Berdimuhamedow hasabaty diňläp, adam hukuklaryny we azatlyklaryny goramak babatda halkara hukugyň umumy ykrar edilen kadalaryna eýermek bilen, ýurdumyzda bu ugurda netijeli işleriň durmuşa geçirilýändigini belledi we 1 müň 146 adamy Türkmenistanyň raýatlygyna kabul etmek hakynda Permana hem-de 134 adama Türkmenistanda ýaşamak üçin ygtyýarnama bermek hakynda Karara gol çekdi.

Ministrler Kabinetiniň ýanyndaky Ulag we kommunikasiýalar agentliginiň Baş direktory M.Çakyýew halkara awtomobil gatnawlary, üstaşyr ýükleriň möçberini artdyrmak, awtoulag serişdeleri arkaly ýükleri daşamak babatda hyzmatlary giňeltmek we hilini ýokarlandyrmak boýunça alnyp barylýan işler barada hasabat berdi.

Bellenilişi ýaly, ozal gazanylan hökümetara ylalaşyklar esasynda ulag, sanly tehnologiýalary, öňdebaryjy tejribäni ornaşdyrmak ulgamynda daşary ýurtlar bilen hyzmatdaşlyk üstünlikli dowam etdirilýär. Munuň özi ulag amallaryny çaltlandyrmakda, ulag ulgamynyň kuwwatyndan netijeli peýdalanmak üçin amatly şertleri döretmekde aýratyn orun eýeleýär. Şunuň bilen baglylykda, ýük daşamalary kadalaşdyrmak üçin sanly ulgama geçmek boýunça daşary ýurt tejribesini öwrenmegiň maksadalaýykdygy bellenildi.

Hormatly Prezidentimiz hasabaty diňläp, halkara awtoulag gatnawlary hakynda ýurdumyzyň baglaşan hökümetara ylalaşyklary esasynda ulag babatda hyzmatdaşlygyň giňden ösdürilýändigini aýtdy. Bu ugurda sanly ulgamyň mümkinçiliklerinden peýdalanmaga möhüm ähmiýet berilýär. Döwlet Baştutanymyz ýurdumyzyň mundan beýläk-de dünýä ulag ulgamyna goşulyşmagy boýunça işleri dowam etdirmek maksady bilen, bu ugurda taýýarlanan teklibi goldap, agentligiň ýolbaşçysyna birnäçe tabşyryklary berdi.

Soňra hormatly Prezidentimiz Ministrler Kabinetiniň giňişleýin mejlisine gatnaşyjylara ýüzlenip, geljek hepdede Türkmenistanyň Halk Maslahatynyň mejlisiniň, mukaddes Garaşsyzlygymyzyň 33 ýyllygy mynasybetli baýramçylyk çäreleriniň giňden bellenilip geçiljekdigini aýtdy. «Pähim-paýhas ummany Magtymguly Pyragy» ýylynyň oktýabr aýynda hem dabaraly çäreleri geçirmek göz öňünde tutulýar. Şunuň bilen baglylykda, döwlet Baştutanymyz Aşgabat şäherinde Magtymguly Pyragynyň doglan gününiň 300 ýyllygy mynasybetli «Döwürleriň we siwilizasiýalaryň özara arabaglanyşygy — parahatçylygyň we ösüşiň binýady» atly halkara forumyň geçiriljekdigini aýtdy. Foruma gatnaşmak üçin ýokary derejeli myhmanlaryň gelmegine garaşylýar.

Hormatly Prezidentimiz bu ugurda degişli guramaçylyk işleriniň ýola goýulmagynyň möhüm bolup durýandygyny nygtap, halkara forumy ýokary derejede geçirmek maksady bilen, guramaçylyk toparyny döretmek hakynda Buýruga gol çekdi.

Mejlisde döwlet durmuşyna degişli başga-da birnäçe möhüm meselelere garaldy we olar boýunça degişli çözgütler kabul edildi.

Hormatly Prezidentimiz Serdar Berdimuhamedow Ministrler Kabinetiniň sanly ulgam arkaly geçirilen giňişleýin mejlisini jemläp, oňa gatnaşanlara berk jan saglyk, maşgala abadançylygyny, berkarar Watanymyzyň gülläp ösmegi ugrunda alyp barýan işlerinde uly üstünlikleri arzuw etdi.

Aşgabat, 16-njy sentýabr. Şu gün hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Onda ýurdumyzyň oba hojalyk toplumynda we sebitlerde alnyp barylýan işler, Oba milli maksatnamasynyň ýerine ýetirilişi bilen baglanyşykly meselelere garaldy.

Ilki bilen, Ahal welaýatynyň häkimi S.Soltanmyradowa söz berildi.

Häkim welaýatda möwsümleýin oba hojalyk işleriniň barşy barada hasabat berdi.

Bellenilişi ýaly, häzirki wagtda ýetişdirilen pagta hasylyny gysga möhletde, ýitgisiz ýygnap almak boýunça işler alnyp barylýar. Ýygym möwsüminde pagta ýygyjy kombaýnlar, beýleki tehnikalar netijeli işledilýär. Ýygnalan hasyly kabul ediş harmanhanalarynda, pagta arassalaýjy kärhanalarda bökdençsiz kabul etmek üçin zerur çäreler görülýär. Welaýatyň ekerançylyk meýdanlarynda bugdaý ekişi guramaçylykly dowam edýär. Ekişde ulanylýan oba hojalyk tehnikalary doly güýjünde işledilýär. Ekiş geçirilen meýdanlarda gögeriş suwy tutulýar. Güýzlük ýeralma, gök-bakja we beýleki azyklyk ekinler ekilen meýdanlarda ideg etmek, ýetişdirilen hasyly ýygnap almak işleri geçirilýär. Şeýle hem häkim “Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna”, Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleri barada hasabat berdi.

Hormatly Prezidentimiz hasabaty diňläp, bugdaý ekişiniň hem-de pagta ýygymynyň guramaçylykly geçirilmeginiň zerur talap bolup durýandygyny belledi we bu babatda häkime anyk tabşyryklary berdi. Şeýle-de döwlet Baştutanymyz şu ýyl welaýatda açylyp ulanmaga berilmegi göz öňünde tutulýan dürli maksatly desgalardaky gurluşyk işleriniň ýokary hilli ýerine ýetirilmegini gözegçilikde saklamagy tabşyrdy.

Balkan welaýatynyň häkimi H.Aşyrmyradow welaýatda möwsümleýin oba hojalyk işleri barada hasabat berdi.

Bellenilişi ýaly, häzirki wagtda sebitde pagta ýygymy möwsüminde pagta arassalaýjy kärhanalarda, kabul ediş harmanhanalarynda ýygnalan hasyly bökdençsiz kabul etmek, pagta ýygýan kombaýnlaryň, hasyly daşamakda ulanylýan tehnikalaryň netijeli işledilmegini üpjün etmek boýunça zerur çäreler görülýär. Bugdaý ekişini ýokary hilli geçirmek maksady bilen, oba hojalyk tehnikalary we gurallar doly güýjünde işledilýär. Bugdaý ekilen meýdanlarda kadaly gögeriş almak üçin gögeriş suwy tutulýar. Ýurdumyzda azyk bolçulygyny has-da pugtalandyrmak barada öňde goýlan wezipelerden ugur alnyp, güýzlük ýeralma, gök-bakja we beýleki azyklyk ekinler ekilen meýdanlarda ideg işleri geçirilýär. Şeýle hem häkim Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleri barada hasabat berdi.

Hormatly Prezidentimiz hasabaty diňläp, häzirki wagtda oba hojalygynda möhüm möwsümiň dowam edýändigini belledi we bugdaý ekişini ýokary hilli, öz wagtynda geçirmek, ýetişdirilen pagta hasylyny ýitgisiz ýygnap almak üçin ähli zerur çäreleri görmegi häkime tabşyrdy. Döwlet Baştutanymyz Oba milli maksatnamasyna laýyklykda, şu ýyl welaýatda açylyp ulanmaga berilmegi göz öňünde tutulýan desgalardaky gurluşyk işleriniň bellenen möhletlerde ýerine ýetirilmegini gözegçilikde saklamak barada-da görkezmeleri berdi.

Iş maslahaty Daşoguz welaýatynyň häkimi D.Babaýewiň welaýatda möwsümleýin oba hojalyk işleriniň barşy baradaky hasabaty bilen dowam etdi.

Hasabatda bellenilişi ýaly, sebitde pagta ýygymy möwsümine girişilip, häzirki wagtda ýygymyň depginini güýçlendirmek, ýetişdirilen hasyly gysga wagtda ýygnap almak boýunça çäreler görülýär. Pagta ýygymynda ulanylýan kombaýnlar, beýleki tehnikalar netijeli işledilýär. Hasyly pagta kabul ediş harmanhanalarynda bökdençsiz kabul etmek üçin zerur işler geçirilýär. Welaýatda bugdaý ekişi dowam edip, ekişi agrotehnikanyň kadalaryna laýyklykda, ýokary hilli geçirmek boýunça degişli işler ýerine ýetirilýär. Ekiş geçirilen meýdanlarda endigan gögeriş alynýar. Bugdaý ekilmeli meýdanlarda tagt suwy tutulýar. Welaýatda güýzlük ekinleriň ekişi, ekiş geçirilen meýdanlarda ideg etmek, ösdürilip ýetişdirilen ekinleriň hasylyny ýygnap almak işleri utgaşykly alnyp barylýar. Şaly oragyna taýýarlyk görülýär. Mundan başga-da, häkim Oba milli maksatnamasyna laýyklykda, şu ýyl welaýatda açylyp ulanmaga berilmegi göz öňünde tutulýan medeni-durmuş, önümçilik maksatly desgalardaky gurluşyk işleri barada hasabat berdi.

Hormatly Prezidentimiz hasabaty diňläp, bugdaý ekişiniň agrotehnikanyň kadalaryna laýyklykda geçirilmegini, daýhan yhlasy bilen ýetişdirilen hasylyň gysga wagtda, ýitgisiz ýygnalyp alynmagyny esasy wezipeleriň hatarynda kesgitledi we bu babatda häkime anyk tabşyryklary berdi. Şeýle-de döwlet Baştutanymyz ýurdumyzy durmuş-ykdysady taýdan ösdürmek boýunça kabul edilen maksatnamalara laýyklykda, şu ýyl welaýatda açylyp ulanmaga berilmegi göz öňünde tutulýan dürli maksatly desgalardaky gurluşyk işleriniň ýokary hilli ýerine ýetirilmegini gözegçilikde saklamagy tabşyrdy.

Soňra Lebap welaýatynyň häkimi M.Annanepesow welaýatda dowam edýän möwsümleýin oba hojalyk işleri barada hasabat berdi.

Bellenilişi ýaly, sebitde pagta ýygymyna köpçülikleýin girişilip, ýetişdirilen hasyly ýitgisiz ýygnap almak hem-de kabul ediş harmanhanalarynda bökdençsiz kabul etmek boýunça işler guramaçylykly ýola goýuldy. Ýygymda ulanylýan oba hojalyk tehnikalarynyň doly güýjünde işledilmegine aýratyn üns berilýär. Şunuň bilen birlikde, welaýatda bugdaý ekişini agrotehnikanyň kadalaryna laýyklykda, bellenen möhletde geçirmek maksady bilen, oba hojalyk tehnikalary, ekiji gurallar netijeli işledilýär. Bugdaý ekişi geçirilen meýdanlarda gögeriş suwy tutulýar. Hormatly Prezidentimiziň ýurdumyzda azyk bolçulygyny has-da pugtalandyrmak barada berýän tabşyryklaryndan ugur alnyp, sebitiň güýzlük ýeralma, gök-bakja we beýleki oba hojalyk ekinleri ekilen meýdanlarda ideg işleri dowam edýär. Şaly meýdanlarynda ideg işleri tamamlaýjy tapgyrda alnyp barylýar. Şeýle-de häkim «Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň ýaşaýyş-durmuş şertlerini özgertmek boýunça 2028-nji ýyla çenli döwür üçin Milli maksatnamasyna» laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz Serdar Berdimuhamedow hasabaty diňläp, bugdaý ekişini ýokary hilli geçirmek, ýetişdirilen pagta hasylyny gysga wagtda ýygnap almak üçin ähli zerur çäreleriň görülmelidigini belledi we bu babatda häkime degişli görkezmeleri berdi. Döwlet Baştutanymyz ýurdumyzy durmuş-ykdysady taýdan ösdürmäge gönükdirilen maksatnamalara laýyklykda, şu ýyl welaýatda açylyp ulanmaga berilmegi meýilleşdirilýän dürli maksatly desgalardaky gurluşyk işleriniň öz wagtynda ýerine ýetirilmegini gözegçilikde saklamagy tabşyrdy.

Soňra Mary welaýatynyň häkimi B.Orazow welaýatda möwsümleýin oba hojalyk işleriniň barşy barada hasabat berdi.

Bellenilişi ýaly, häzirki wagtda sebitde pagta ýygymynyň depginini güýçlendirmek, ýetişdirilen hasyly gysga wagtda, ýitgisiz ýygnap almak boýunça degişli işler alnyp barylýar. Ýygnalan hasyly kabul ediş harmanhanalarynda, pagta arassalaýjy kärhanalarda bökdençsiz kabul etmek, kombaýnlary, hasyly daşamakda ulanylýan awtoulaglary netijeli işletmek üçin zerur çäreler görülýär. Welaýatda bugdaý ekişi dowam edip, bu jogapkärli möwsümi ýokary hilli geçirmek üçin degişli işler alnyp barylýar. Bugdaý ekişinde ulanylýan oba hojalyk tehnikalary doly güýjünde işledilýär. Güýzlük ýeralma we beýleki oba hojalyk ekinleri ekilen meýdanlarda ideg işleri geçirilýär. Gant şugundyry ekilen meýdanlarda hatarara bejergi, mineral dökünler bilen iýmitlendirmek, ösüş suwuny tutmak işleri alnyp barylýar. Şeýle hem häkim Oba milli maksatnamasyna laýyklykda, şu ýyl welaýatda açylyp ulanmaga berilmegi göz öňünde tutulýan medeni-durmuş, önümçilik maksatly desgalardaky gurluşyk işleriniň ýagdaýy barada hasabat berdi.

Döwlet Baştutanymyz hasabaty diňläp, bugdaý ekişiniň agrotehniki möhletlerde geçirilmeginiň geljekde bol hasyl almagyň esasy şertleriniň biridigini belledi we bu babatda häkime anyk tabşyryklary berdi. Şunuň bilen birlikde, hormatly Prezidentimiz ýetişdirilen pagta hasylynyň gysga wagtda, ýitgisiz ýygnalyp alynmagy babatda birnäçe görkezmeleri berdi. Döwlet Baştutanymyz Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilen dürli maksatly desgalardaky gurluşyk işleriniň talabalaýyk, öz wagtynda ýerine ýetirilmegini gözegçilikde saklamagy hem tabşyrdy.

Soňra Ministrler Kabinetiniň Başlygynyň orunbasary T.Atahallyýew ýurdumyzda möwsümleýin oba hojalyk işleriniň barşy barada hasabat berdi.

Bellenilişi ýaly, şu günler welaýatlarda pagtaçy daýhanlaryň tutanýerli zähmeti bilen ösdürilip ýetişdirilen pagta hasylyny gysga wagtda, ýitgisiz ýygnap almak, oba hojalyk tehnikalaryny netijeli işletmek, tabşyrylýan hasyly kabul ediş harmanhanalarynda, pagta arassalaýjy kärhanalarda bökdençsiz kabul etmek boýunça degişli işler alnyp barylýar. Ýurdumyzda bugdaý ekişini agrotehniki möhletlerde, ýokary guramaçylyk derejesinde geçirmek maksady bilen, ekişde ulanylýan oba hojalyk tehnikalaryny doly güýjünde hem-de netijeli işletmek, önüm öndürijileri ýokary hilli bugdaý tohumy bilen üpjün etmek babatda zerur işler geçirilýär. Hormatly Prezidentimiziň Diýarymyzda ýeralmanyň gök-bakja we beýleki azyklyk ekinleriň bol hasylyny ösdürip ýetişdirmek baradaky tabşyryklaryny ýerine ýetirmek ugrunda degişli işler geçirilýär. Güýzlük ekilen azyklyk ekinlere ideg etmek işleri alnyp barylýar. Daşoguz hem-de Lebap welaýatlarynyň şaly ekilen meýdanlarynda ideg işleri, Mary welaýatynyň gant şugundyry ekilen meýdanlarynda bolsa hatarara bejergi, mineral dökünler bilen iýmitlendirmek, ösüş suwuny tutmak işleri dowam edýär.

Hormatly Prezidentimiz hasabaty diňläp, häzirki wagtda oba hojalygynda ýaýbaňlandyrylan möwsümleýin işleriň möhüm ähmiýetine ünsi çekdi hem-de olaryň ýokary guramaçylyk derejesinde geçirilmegini gözegçilikde saklamagy wise-premýere tabşyrdy.

Soňra döwlet Baştutanymyz iş maslahatyna gatnaşyjylara ýüzlenip, şu günler gallaçy daýhanlarymyzyň durmuşynda jogapkärli möwsüm bolan bugdaý ekişiniň gyzgalaňly dowam edýändigini belledi. Gallanyň bereketli hasylyny ýetişdirmek, ýurdumyzyň azyk howpsuzlygyny üpjün etmek, halkymyzyň rysgal-berekedini artdyrmak köp babatda ekiş möwsüminiň agrotehniki kadalara laýyklykda, öz wagtynda, ýokary hilli geçirilmegine baglydygyny tejribe görkezýär diýip, hormatly Prezidentimiz aýtdy. Şunuň bilen baglylykda, döwlet Baştutanymyz welaýatlarda bugdaý ekişiniň alnyp barlyşyna gündelik gözegçilik etmegi, bugdaý meýdanlarynda tagt we gögeriş suwuny wagtynda tutmagy, ekişde tehnikalaryň doly güýjünde işledilmegini üpjün etmegi tabşyrdy.

Hormatly Prezidentimiz pagtaçy daýhanlaryň durmuşynda hem jogapkärli döwrüň başlanandygyna ünsi çekip, welaýatlarda pagta ýygymynyň depginini has-da güýçlendirmek, ýetişdirilen hasyly gysga wagtda, ýitgisiz ýygnap almak üçin ähli zerur çäreleriň görülmelidigini, ýygym möwsüminde kombaýnlaryň, awtoulaglaryň we beýleki tehnikalaryň, pagta arassalaýjy kärhanalaryň, harmanhanalaryň doly güýjünde işledilmelidigini, pagtaçylar üçin zerur bolan iş we durmuş şertleriniň döredilmelidigini tabşyrdy. Şunuň bilen bir hatarda, welaýatlarda güýzlük ýeralma, gök we beýleki ekinlere agrotehniki kadalara laýyklykda ideg etmek, ýetişdirilen hasyly ýitgisiz ýygnap almak üçin ähli zerur bolan guramaçylyk işlerini geçirmek babatda-da tabşyryklar berildi.

Döwlet Baştutanymyz welaýatlarda Garaşsyzlygyň 33 ýyllygyna gowy taýýarlyk görmegi, şu ýyl açylyp ulanmaga berilmegi meýilleşdirilen medeni-durmuş, önümçilik maksatly desgalarda gurluşyk işleriniň barşyna berk gözegçilik etmegi tabşyrdy.

Hormatly Prezidentimiz iş maslahatyny jemläp, oňa gatnaşanlara öňde goýlan wezipeleri ýerine ýetirmekde üstünlikleri arzuw etdi.

Arkadag şäheri, 15-nji sentýabr. Şu gün türkmen halkynyň Milli Lideri, Türkmenistanyň Halk Maslahatynyň Başlygy, Hormatly il ýaşulusy Gurbanguly Berdimuhamedow Arkadag şäherine nobatdaky iş saparyny amala aşyrdy. Gahryman Arkadagymyz bu ýerde şäheriň gurluşygynyň ikinji tapgyrynda bina edilmegi meýilleşdirilýän desgalaryň şekil taslamalary bilen tanyşdy hem-de degişli ýolbaşçylaryň gatnaşmagynda iş maslahatyny geçirdi.

Häzirki döwürde Gahryman Arkadagymyzyň başlangyjyndan binýat bolan täze şäheriň gurluşygynyň ikinji tapgyrynda meýilleşdirilen işleriň depgini barha artýar. Köpetdagyň etegindäki gözel künjekde ýerleşýän Arkadag şäherinde gurulýan medeni-durmuş, önümçilik maksatly desgalaryň taslamalarynyň taýýarlanylmagyna we gurluşyk işlerine hemmetaraplaýyn esasda çemeleşilýär.

Ir bilen Türkmenistanyň Halk Maslahatynyň Başlygy häzirki zamanyň ösen tehnologiýalaryny we milli binagärlik ýörelgelerini özünde jemleýän, “akylly” şäher konsepsiýasy esasynda bina edilen Arkadag şäherine geldi.

Şu günler şäheriň çäklerinde ýurdumyzyň durmuşynda möhüm ähmiýeti bolan şanly Garaşsyzlygymyzyň baýramçylyk dabaralaryna taýýarlyk işleri ýaýbaňlandyryldy. Arkadag şäherinde alnyp barylýan arassaçylyk we abadanlaşdyryş işleriniň oňyn netijeleri nurana köçelerde, seýilgählerde, döwrebap desgalaryň ýanaşyk ýerlerinde has aýdyň görünýär.

Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow we şäheriň häkimi G.Mämmedowa bu ýerde häzirki döwürde alnyp barylýan gurluşyk işleriniň ýagdaýy, gurulmagy meýilleşdirilýän medeni-durmuş maksatly binalaryň şekil taslamalary, olaryň ýerleşjek ýerleriniň çyzgylary barada hasabat berdiler. Görkezilýän taslamalaryň hatarynda Arkadag şäheriniň söwda merkeziniň, özboluşly bezeg aýratynlyklary bolan myhmanhananyň, döwrebap dynç alyş seýilgähiniň, ähli amatlyklary özünde jemleýän köp gatly ýaşaýyş jaýlarynyň, şypahananyň, maglumat tehnologiýalary boýunça umumybilim berýän merkeziň, işewürlik merkeziniň, Oba hojalyk uniwersitetiniň şekil taslamalary bar.

Şeýle hem bu ýerde Gahryman Arkadagymyzyň garamagyna täze şäheriň gurluşygynyň ikinji tapgyrynda gurulmagy meýilleşdirilýän saglyk seýilgähiniň şekil taslamasy, seýilgähiň, şäheriň çäklerinde ekilmegi meýilleşdirilýän dürli baglaryň, gülleriň, seýilgähde goýulmagy meýilleşdirilýän oturgyçlaryň we germewleriň görnüşleri, elektron enjam arkaly dolandyrylýan mehaniki haly sergileýiş ulgamynyň şekilleri görkezildi.

Milli Liderimiz desgalaryň şekil taslamalary bilen tanşyp, olara birnäçe belliklerini aýtdy we degişli düzedişleri girizdi. Täze şäheriň çäklerindäki desgalaryň “akylly” şäher konsepsiýasynyň talaplaryna laýyk derejede bina edilmelidigini belläp, Gahryman Arkadagymyz medeni-durmuş maksatly binalaryň taslamalary taýýarlanylanda, olaryň keşbinde desgalaryň ähmiýetine laýyk gelýän bezeg serişdeleriniň ulanylmalydygyna ünsi çekdi.

Türkmenistanyň at gazanan arhitektory Gurbanguly Berdimuhamedow täze binalaryň we desgalaryň taslamalary taýýarlanylanda häzirki zaman şähergurluşyk maksatnamasynyň talaplarynyň göz öňünde tutulmalydygyny belledi. Şunda binalaryň gurluşyklarynda ýokary hil derejesiniň üpjün edilmegi, bu künjegiň tebigy aýratynlyklarynyň, ekologik ýagdaýynyň göz öňünde tutulmagy möhüm talap bolup durýar. Şular barada aýtmak bilen, hormatly Arkadagymyz käbir taslamalaryň täzeden işlenilmeginiň maksadalaýyk boljakdygyny belledi. Aýratyn-da, Oba hojalyk uniwersitetiniň binalarynyň daşky bezeg işlerine wajyp ähmiýet berilmelidir. Ýokary okuw mekdebiniň okuw otaglarynyň, beýleki desgalarynyň, tejribe-ekerançylyk bölümleriniň bir bitewi sazlaşygy emele getirmegi möhüm talap hökmünde kesgitlenildi.

Türkmen halkynyň Milli Lideri täze şäheriň seýilgähiniň çäklerinde we ýol ýakalarynda ekiljek baglaryň, gülleriň bu künjegiň toprak-howa şertlerine laýyk gelmegi, olara ýola goýuljak ideg işleri bilen baglanyşykly meseleleriň ylmy esasda öwrenilmelidigini aýtdy. Şunda germewleriň, beýleki bezeg serişdeleriniň döwrebaplygyna zerur üns berilmelidir. Gahryman Arkadagymyz binalaryň içinde bezeg serişdeleri bilen owadan görnüşli halylaryň sazlaşykly ulanylmalydygyny tabşyrdy.

Alym Arkadagymyz täze şäheriň çäklerinde ornaşdyrylmagy meýilleşdirilýän mehaniki haly sergileýiş elektron enjamynyň döwrebap derejede ulanylmagyna, onda sanly tehnologiýalaryň, täzeçil usullaryň işjeň peýdalanylmagyna hemmetaraplaýyn esasda çemeleşilmelidigini belledi. Halkara giňişlikde şöhrat gazanan türkmen halylaryny tanyşdyrýan maglumatlar dünýä dillerinde beýan edilmelidir. Munuň özi onuň ýurdumyza gelýän köp sanly myhmanlar üçin düşnükli bolmagynda ähmiýetlidir.

Soňra Türkmenistanyň Halk Maslahatynyň Başlygy Gurbanguly Berdimuhamedow Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazowyň we Arkadag şäheriniň häkimi G.Mämmedowanyň gatnaşmagynda iş maslahatyny geçirdi.

D.Orazow Arkadag şäheriniň gurluşygynyň ikinji tapgyrynda bina edilýän desgalarda alnyp barylýan işleriň ýagdaýy we gurluşyk işleriniň depginlerini ýokarlandyrmak boýunça edilýän tagallalar barada hasabat berdi. Bellenilişi ýaly, paýtagtymyzda Türkmenistanyň maýa goýum forumynyň, ýurdumyzyň ykdysadyýetine ýokary tehnologiýalary we innowasiýalary çekmek boýunça halkara maslahatyň çäklerinde duşuşyklar geçirilip, olarda Arkadag şäherini mundan beýläk-de ösdürmek bilen baglanyşykly meseleler, maýa goýum serişdelerini çekmegiň ugurlary ara alnyp maslahatlaşyldy.

Gahryman Arkadagymyz täze şäheriň ikinji tapgyrynyň gurluşygyny çaltlandyrmak, binalaryň bellenen möhletlerde ulanmaga berilmegini üpjün etmek meselelerine örän jogapkärçilikli çemeleşilmelidigini tabşyrdy. Şol bir wagtyň özünde şäheriň önümçilik maksatly desgalarynyň, lukmançylyk klasteriniň binalarynyň gurluşygyna, olaryň enjamlaşdyrylyşyna maýa goýum serişdelerini çekmek boýunça alnyp barylýan işler netijeli dowam etdirilmelidir. Täze şäheriň ähli görkezijiler babatda häzirki zaman talaplaryna laýyk gelmelidigini belläp, Milli Liderimiz bu ugurda alnyp barylýan işlerde ösen tejribeleriň ulanylmalydygyny, gurluşyk serişdeleriniň berkligine, uzak möhletleýinligine üns berilmelidigini aýtdy we bu babatda birnäçe görkezmeleri berdi. Häzirki zamanyň täze tehnologiýalarynyň, sanly ulgamyň mümkinçilikleriniň ulanylmagy esasynda gurlan “akylly” şäheriň ikinji tapgyrynda gurulýan ýaşaýyş jaýlarynyň, dürli maksatly binalaryň gurluşyk işlerinde milli binagärlik ýörelgeleri bilen gurluşyk ulgamyndaky dünýäniň ösen tejribesiniň utgaşdyrylmagy möhüm talap bolup durýar.

Arkadag şäheriniň häkimi G.Mämmedowa şäheriň döwrebap ýaşaýyş jaýlaryna ilaty göçürip getirmek işleri bilen bir hatarda, şanly seneleri ýokary derejede dabaralandyrmak babatda görülýän taýýarlyk işleri barada hasabat berdi. Bellenilişi ýaly, milli senenamamyzda möhüm orun eýeleýän şanly seneleriň hormatyna guraljak dabaralaryň medeni maksatnamasy taýýarlanyldy. Oňa laýyklykda, Arkadag şäheriniň ähli künjegini şanly seneleriň hormatyna guralýan medeni-köpçülikleýin çäreler gurşap alar.

Gahryman Arkadagymyz Türkmenistanyň Halk Maslahatynyň nobatdaky mejlisi, Garaşsyzlyk baýramy, Saglygy goraýyş we derman senagaty işgärleriniň güni, Halkara Bitaraplyk güni mynasybetli guraljak medeni çäreleriň häzirki döwrüň ruhuna kybap derejede dabaralandyrylmalydygyny belledi. Aýratyn-da, şanly senelere taýýarlyk görülýän günlerde şäheriň çäklerinde degişli arassaçylyk we abadanlaşdyryş işleri yzygiderli geçirilmelidir. Şunda jemagat hojalygy edaralarynyň işi sazlaşykly ýola goýulmalydyr.

Arkadag şäheriniň “ýaşlaryň şäheri” diýen derejesinden ugur alyp, täze şäheriň ýaşlarynyň watansöýüjilik, milli däp-dessurlara wepalylyk ruhunda terbiýelenilmelidigini aýdyp, Gahryman Arkadagymyz ösüp gelýän ýaş nesilleriň şähere bolan söýgüsini pugtalandyrmak, olaryň edep-terbiýeli bolmagyny gazanmak ugrunda bilelikdäki tagallalaryň ýola goýulmalydygyny belledi. Türkmen halkynyň taryhyň dowamynda döreden ýagşy dessurlarynyň ýaşlaryň aňyna berk ornaşdyrylmagynyň zerurdygyny nygtap, alym Arkadagymyz bu işde bilim işgärleri bilen bir hatarda, ýaşulularyň hem bilelikdäki wagyz-nesihat işlerini yzygiderli guramagyň möhümdigine ünsi çekdi.

Milli Liderimiz täze şäherde ornaşdyrylan sanly tehnologiýalaryň kämilleşdirilmegine we baýlaşdyrylmagyna toplumlaýyn esasda çemeleşilmelidigini belledi. Şol bir wagtyň özünde şäheriň täze gurulýan binalaryna häzirki zamanyň täzeçil tehnologiýalarynyň ornaşdyrylmagyna, döwrebap usullaryň özleşdirilmegine zerur üns berilmelidir.

Gahryman Arkadagymyz şäheriň halkara giňişlikdäki abraýynyň barha belende galýandygyny aýdyp, Arkadag şäheriniň Koreýa Respublikasynda geçirilen “World Smart City Expo” atly halkara sergide üç ugur boýunça ýörite baýraklara mynasyp bolmagynyň munuň aýdyň güwäsidigini belledi we bu ugurda halkara hyzmatdaşlygyň işjeňleşdirilmegi babatda tabşyryklary berdi. Türkmenistanyň Halk Maslahatynyň Başlygy “Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasynda” kesgitlenen wezipeleriň degişli derejede ýerine ýetirilmeginiň şäherleriň keşbini özgertmek we halkymyzyň durmuş derejesini ýokarlandyrmak üçin oňyn şertleri üpjün edýändigini belledi.

Gahryman Arkadagymyz hemmelere öňde goýlan wezipeleri talabalaýyk ýerine ýetirmek babatda alyp barýan işlerinde üstünlik arzuw edip, bu ýerden ugrady.