Aşgabat, 12-nji iýun (TDH). Şu gün hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda döwlet durmuşyna degişli birnäçe meselelere seredildi.

Ilki bilen, Mejlisiň Başlygy D.Gulmanowa ýurdumyzyň kanunçylyk binýadyny kämilleşdirmek boýunça alnyp barylýan işler barada maglumat berdi.

Bellenilişi ýaly, häzirki wagtda Mejlisde ministrliklerden we pudaklaýyn dolandyryş edaralaryndan gelip gowşan teklipler esasynda Türkmenistanyň Gümrük, Zähmet, Sanitariýa, Maşgala we Administratiw hukuk bozulmalary hakynda kodekslerine, “Harby borçlulyk we harby gulluk hakynda”, “Administratiw önümçilik hakynda”, “Kazyýet hakynda”, “Neşirýat işi hakynda” Türkmenistanyň Kanunlaryna üýtgetmeleri we goşmaçalary girizmek boýunça degişli işler alnyp barylýar. Şunuň bilen birlikde, ýurdumyzyň Mejlisinde BMG-niň Ilat gaznasynyň, Halkara Migrasiýa Guramasynyň Türkmenistandaky wekilleri bilen geçirilen duşuşyklar barada aýdyldy. Mejlisiň wekilleriniň BMG-niň düzüm birlikleriniň ýurdumyzyň degişli döwlet edaralary bilen bilelikde guran okuw maslahatlaryna, duşuşyklaryna gatnaşandyklary habar berildi.

Hormatly Prezidentimiz döwrüň talabyna laýyk gelýän täze kanun taslamalaryny işläp taýýarlamak boýunça alnyp barylýan işleri dowam etdirmegiň möhümdigini belledi.

Ministrler Kabinetiniň Başlygynyň orunbasary H.Geldimyradow Ykdysady hyzmatdaşlyk boýunça türkmen-slowak bilelikdäki toparynyň birinji mejlisini geçirmek boýunça alnyp barylýan taýýarlyk işleri barada hasabat berdi. Bellenilişi ýaly, häzirki wagtda bu topary döretmek we onuň birinji mejlisini geçirmek boýunça zerur çäreler görülýär. Ykdysady hyzmatdaşlyk boýunça türkmen-slowak bilelikdäki toparynyň mejlisinde iki ýurduň arasyndaky hyzmatdaşlygy mundan beýläk-de ösdürmek maksady bilen, söwda-ykdysady, ýangyç-energetika, gurluşyk, ulag, aragatnaşyk we maglumat tehnologiýalary, oba hojalygy, daşky gurşawy goramak, saglygy goraýyş, lukmançylyk ylmy, bilim, medeniýet, sport we syýahatçylyk ulgamlary bilen bagly meseleler barada pikir alyşmak göz öňünde tutulýar. Şunuň bilen baglylykda, wise-premýer döwlet Baştutanymyzyň garamagyna degişli teklibi hödürledi.

Arkadagly Gahryman Serdarymyz hasabaty diňläp, ýurdumyzyň Ýewropa döwletleri, şol sanda Slowakiýa Respublikasy bilen netijeli gatnaşyklary alyp barýandygyny belledi. Hormatly Prezidentimiz Türkmenistan bilen Slowakiýa Respublikasynyň arasyndaky hyzmatdaşlygy mundan beýläk-de ösdürmek maksady bilen, bu ugurda taýýarlanylan resminama gol çekip, wise-premýere degişli işleri geçirmegi tabşyrdy.

Ministrler Kabinetiniň Başlygynyň orunbasary G.Agajanow “Türkmengaz” we “Türkmennebit” döwlet konsernleri tarapyndan alnyp barylýan işler barada hasabat berdi. Bellenilişi ýaly, Berkarar döwletiň täze eýýamynyň Galkynyşy döwründe tebigy gazyň çykarylýan möçberini artdyrmak hem-de onuň bilen sarp edijileri ygtybarly üpjün etmek, nebitgaz ýataklaryny düýpli özleşdirmek, olaryň gerimini giňeltmek boýunça degişli işler amala aşyrylýar. Şunda Hytaýyň öňdebaryjy kompaniýalary bilen netijeli hyzmatdaşlyga möhüm ähmiýet berilýär. Şunuň bilen baglylykda, wise-premýer döwlet Baştutanymyzyň garamagyna degişli teklibi hödürledi.

Hormatly Prezidentimiz hasabaty diňläp, ýurdumyzyň nebitgaz pudagyny ösdürmek we döwrebaplaşdyrmak boýunça maksatnamalaýyn işleriň alnyp barylýandygyny aýtdy. Döwlet Baştutanymyz nebitgaz pudagynyň öňünde goýlan wezipeleri üstünlikli durmuşa geçirmek maksady bilen, bu ugurda taýýarlanylan resminamalara gol çekip, wise-premýere degişli işleri geçirmegi tabşyrdy.

Ministrler Kabinetiniň Başlygynyň orunbasary T.Atahallyýew oba hojalyk pudagynda we welaýatlarda möwsümleýin işleriň alnyp barlyşy barada hasabat berdi.

Nygtalyşy ýaly, welaýatlarda ýetişdirilen bugdaýyň bol hasylyny gysga möhletde we ýitgisiz ýygnap almak boýunça degişli işler alnyp barylýar. Galla oragy möwsüminde däne ýygýan kombaýnlaryň, bugdaý daşaýan awtoulaglaryň doly güýjünde işledilmegini üpjün etmek, ýygnalan hasyly galla kabul ediş nokatlarynda kabul etmek boýunça degişli işler dowam edýär. Gowaça ekilen meýdanlarda ideg işleri geçirilýär hem-de agrotehnikanyň kadalaryna laýyklykda hatarara bejergi işlerini geçirmek, mineral dökünler bilen iýmitlendirmek, ösüş suwuny tutmak boýunça degişli çäreler görülýär. Daşoguz welaýatynda şaly ekilen meýdanlarda ideg işleri alnyp barylýar, Lebap welaýatynda şaly ekişi dowam edýär. Mary welaýatynda güýzlük gant şugundyrynyň ekişine taýýarlyk görülýär.

Welaýatlaryň maldarçylyk hojalyklarynda mallary talabalaýyk idetmek, olaryň baş sanyny artdyrmak, önüm berijiligini ýokarlandyrmak maksady bilen, häzirki wagtda mallar üçin ot-iýmleriň ätiýaçlyk gorlaryny döretmek babatda degişli işler geçirilýär. Ýurdumyzda ekerançylyk meýdanlarynyň suw üpjünçiligini we ýerleriň melioratiw ýagdaýyny gowulandyrmak, suw serişdelerini tygşytly peýdalanmak, suwaryş, şor suw akabalaryny arassalamak boýunça zerur çäreler görülýär.

Hormatly Prezidentimiz hasabaty diňläp, ýurdumyzyň oba hojalyk pudagyny toplumlaýyn ösdürmegi we kämilleşdirmegi dowam etdirmegiň wajypdygyny belledi. Döwlet Baştutanymyz wise-premýere galla oragyny guramaçylykly geçirmek, ýygnalan hasyly tabşyrmak boýunça alnyp barylýan işleriň, gowaça ekilen meýdanlarda ideg işleriniň öz wagtynda geçirilmegini berk gözegçilikde saklamagy tabşyrdy.

Ministrler Kabinetiniň Başlygynyň orunbasary B.Annamämmedow Senagat we gurluşyk önümçiligi ministrligi tarapyndan alnyp barylýan işler barada hasabat berdi. Bellenilişi ýaly, häzirki wagtda “Türkmendemirönümleri” döwlet kärhanasynyň doly kuwwatynda bökdençsiz işledilmegini gazanmak ugrunda zerur işler amala aşyrylýar. Munuň özi ýurdumyzda durmuşa geçirilýän gurluşyk taslamalaryny, ykdysadyýetiň pudaklaryny zerur bolan ýokary hilli gurluşyk serişdeleri bilen üpjün etmekde möhüm ähmiýete eýedir. Şunuň bilen baglylykda, wise-premýer döwlet Baştutanymyzyň garamagyna degişli teklibi hödürledi.

Arkadagly Gahryman Serdarymyz hasabaty diňläp, ýurdumyzyň senagat we gurluşyk pudagyny ösdürmek boýunça netijeli işleriň alnyp barylýandygyny belledi. Hormatly Prezidentimiz «Türkmendemirönümleri» döwlet kärhanasynyň önümçiligini bökdençsiz işletmek maksady bilen taýýarlanylan teklibi makullap, wise-premýere degişli işleri geçirmegi tabşyrdy.

Ministrler Kabinetiniň Başlygynyň orunbasary N.Atagulyýew dokma senagaty pudagyny mundan beýläk-de ösdürmek boýunça alnyp barylýan işler barada hasabat berdi. Bellenilişi ýaly, ýurdumyzda täze tehnologiýalar bilen enjamlaşdyrylan dokma kärhanalary yzygiderli gurlup ulanmaga berilýär. Şeýle hem pudagyň maddy üpjünçilik binýadyny pugtalandyrmak üçin degişli işler alnyp barylýar. Munuň özi bäsdeşlige ukyply, ýokary hilli dokma önümleriniň öndürilýän möçberiniň we görnüşleriniň artdyrylmagyna ýardam berýär. Şunuň bilen baglylykda, hormatly Prezidentimiziň garamagyna degişli teklip hödürlenildi.

Arkadagly Gahryman Serdarymyz hasabaty diňläp, ýurdumyzda hereket edýän dokma kärhanalarynda bäsdeşlige ukyply, ýokary hilli dokma önümleriniň öndürilýändigini aýtdy. Döwlet Baştutanymyz dürli pudaklaryň dokma önümlerine bolan sargytlaryny üpjün etmek boýunça taýýarlanan teklibi makullap, wise-premýere degişli işleri geçirmegi tabşyrdy.

Ministrler Kabinetiniň Başlygynyň orunbasary B.Seýidowa Balkan welaýatynda Medeniýet hepdeligini geçirmäge görülýän taýýarlyk işleri barada hasabat berdi.

Bellenilişi ýaly, hormatly Prezidentimiziň hem-de Gahryman Arkadagymyzyň taýsyz tagallalarynyň netijesinde medeniýetimizi ösdürmek, milli mirasymyzy gorap saklamak, ony halkara derejede giňden wagyz etmek üçin ähli zerur şertler döredilýär.

Döwlet Baştutanymyzyň degişli Kararyna laýyklykda, şeýle-de Medeniýet we sungat işgärleriniň hem-de Magtymguly Pyragynyň şygryýet güni mynasybetli «Garaşsyz, baky Bitarap Türkmenistan — bedew batly at-myradyň mekany» ýylynyň 22 — 27-nji iýuny aralygynda Balkan welaýatynda nobatdaky Medeniýet hepdeligini ýokary derejede guramaçylykly geçirmek boýunça degişli taýýarlyk işleri alnyp barylýar. Hepdeligiň çäklerinde sungatyň, çeper döredijiligiň görnüşleri boýunça dürli medeni çäreleri, şol sanda Balkanabat şäherindäki «Türkmeniň ak öýi» binasynda Medeniýet hepdeliginiň açylyş we ýapylyş dabaralaryny, aýdym-sazly çykyşlary, maslahatlary, sergileri, döredijilik duşuşyklaryny, edebi agşamlary, filmleriň, sahna oýunlarynyň görkezilişini guramak, ozal yglan edilen döredijilik bäsleşikleriniň jemlerini jemlemek, Magtymguly adyndaky milli sazly drama teatrynda «Leýli-Mejnun» operasynyň görkezilişini geçirmek göz öňünde tutulýar. Şunuň bilen baglylykda, wise-premýer döwlet Baştutanymyzyň garamagyna degişli teklibi hödürledi.

Hormatly Prezidentimiz hasabaty diňläp, ýurdumyzda medeniýetimizi ösdürmäge uly üns berilýändigini, Medeniýet we sungat işgärleriniň hem-de Magtymguly Pyragynyň şygryýet gününe gabatlanyp köp sanly çäreleriň geçirilýändigini belledi. Döwlet Baştutanymyz wise-premýere Balkan welaýatynda geçiriljek Medeniýet hepdeligine gowy taýýarlyk görmegi hem-de ony ýokary derejede geçirmegi tabşyrdy.

Soňra Ministrler Kabinetiniň Başlygynyň orunbasary B.Mämmedowa söz berildi.

Wise-premýer, ilki bilen, hormatly Prezidentimizi we Gahryman Arkadagymyzy “Garaşsyz, baky Bitarap Türkmenistan — bedew batly at-myradyň mekany” ýylynda ýurdumyzda dabaraly bellenilýän Ylymlar güni hem-de Arkadagly Gahryman Serdarymyzyň Türkmenistanyň Ylymlar akademiýasynyň akademikligine saýlanylmagy, şeýle hem ykdysady we syýasy ylymlaryň professory alymlyk adynyň berilmegi mynasybetli ýurdumyzyň ylmy jemgyýetçiliginiň adyndan tüýs ýürekden gutlady hem-de hormatly Prezidentimize, Gahryman Arkadagymyza berk jan saglyk, uzak ömür, il-ýurt bähbitli işleriniň hemişe rowaç bolmagyny arzuw etdi.

Soňra wise-premýer ýurdumyzyň ylym ulgamyny ösdürmek boýunça alnyp barylýan işler barada hasabat berdi.

Bellenilişi ýaly, Berkarar döwletiň täze eýýamynyň Galkynyşy döwründe ylym ulgamyny ösdürmek babatda toplumlaýyn işler amala aşyrylýar, onuň kanunçylyk we maddy-enjamlaýyn binýady döwrüň talaplaryna laýyklykda yzygiderli kämilleşdirilýär. Hormatly Prezidentimiziň Permany bilen tassyklanan “Türkmenistanda ylym ulgamyny ösdürmegiň 2024 — 2052-nji ýyllar üçin Strategiýasynyň” hem-de ony amala aşyrmak boýunça ýerine ýetirilmeli çäreleriň 2024 — 2028-nji ýyllar boýunça meýilnamasynda kesgitlenen wezipelere laýyklykda, ministrlikler we pudaklaýyn dolandyryş edaralary bilen bilelikde Türkmenistanyň Ylymlar akademiýasy tarapyndan “Türkmenistanda ylmyň, tehnikanyň we tehnologiýalaryň gazananlaryny wagyz etmek boýunça Döwlet maksatnamasynyň” hem-de ony amala aşyrmak boýunça 2026 — 2030-njy ýyllarda ýerine ýetirilmeli çäreleriň meýilnamasynyň taslamasy işlenip taýýarlanyldy. Maksatnamada ylmyň, tehnikanyň we tehnologiýalaryň gazananlaryny jemgyýetiň ähli wekilleriniň, şol sanda ýaşlaryň arasynda wagyz etmek arkaly ýurdumyzyň adam maýasynyň, ýaşlaryň ylmy dünýägaraýşynyň has-da ýokarlandyrylmagyny, gözýetiminiň giňeldilmegini, olaryň ylmy-döredijilik ukyplarynyň ösdürilmegini, şeýle hem ýurdumyzyň ylym ulgamynyň işine işjeň çekilmegini gazanmak maksat edinilýär. Şunuň bilen baglylykda, wise-premýer döwlet Baştutanymyzyň garamagyna degişli teklibi hödürledi.

Arkadagly Gahryman Serdarymyz hasabaty diňläp, Berkarar döwletiň täze eýýamynyň Galkynyşy döwründe ilatyň intellektual derejesini, ylmy dünýägaraýşyny ösdürmek boýunça netijeli işleriň alnyp barylýandygyny aýtdy hem-de «Türkmenistanda ylmyň, tehnikanyň we tehnologiýalaryň gazananlaryny wagyz etmek boýunça 2026 — 2030-njy ýyllar üçin Döwlet maksatnamasyny» tassyklamak hakynda resminama gol çekdi we wise-premýere degişli işleri geçirmegi tabşyrdy.

Soňra Ministrler Kabinetiniň Başlygynyň orunbasary, daşary işler ministri R.Meredowa söz berildi.

Ol, ilki bilen, mejlise gatnaşyjylaryň adyndan hormatly Prezidentimizi hem-de Gahryman Arkadagymyzy her ýyl Türkmenistanda giňden bellenilýän Ylymlar güni bilen, şeýle hem döwlet Baştutanymyzy Türkmenistanyň Ylymlar akademiýasynyň ykdysady we syýasy ylymlar boýunça akademikligine saýlanylmagy, ykdysady we syýasy hünärler boýunça professor alymlyk adynyň berilmegi bilen tüýs ýürekden gutlady. Bellenilişi ýaly, türkmen halkynyň Milli Lideri ylmy ösdürmek maksady bilen ägirt uly işleri amala aşyrdy. Hormatly Prezidentimiz häzirki wagtda Gahryman Arkadagymyzyň başlangyçlaryny mynasyp derejede durmuşa geçirýär.

Soňra wise-premýer, daşary işler ministri Malaýziýanyň Premýer-ministriniň Türkmenistana resmi saparyna görülýän taýýarlyk barada hasabat berdi.

Bellenilişi ýaly, hormatly Prezidentimiziň alyp barýan daşary syýasatynyň esasy ugurlarynyň biri hem Türkmenistanyň dünýä ýurtlary bilen özara bähbitli hyzmatdaşlygyny ösdürmekden ybaratdyr. Bu babatda ýurdumyzyň Aziýa yklymynyň döwletleri bilen ikitaraplaýyn gatnaşyklaryny giňeltmek boýunça işler ulgamlaýyn esasda alnyp barylýar. Şolaryň hatarynda Malaýziýa bilen hyzmatdaşlyk aýratyn bellenildi. Malaýziýa Türkmenistanyň Garaşsyzlygyny ykrar eden ilkinji döwletleriň biridir. Iki ýurduň arasyndaky diplomatik gatnaşyklar 1992-nji ýylyň 17-nji maýynda ýola goýuldy we häzirki wagtda ýokary derejede alnyp barylýar. Malaýziýa Türkmenistanyň hemişelik Bitaraplygynyň halkara derejede ykrar edilmegini ilkinjileriň hatarynda goldan döwletdir. Häzirki wagtda ikitaraplaýyn hyzmatdaşlygyň şertnama-hukuk binýady döwletara, hökümetara we pudagara resminamalaryň 43-si bilen berkidildi.

Syýasy ugur barada aýdylanda, döwlet we hökümet Baştutanlarynyň özara saparlary, ýokary derejedäki duşuşyklary hyzmatdaşlygy ösdürmekde möhüm orny eýeleýär. Bu babatda ýokary derejeli döwlet we resmi saparlaryň 9-sy, hususan-da, Türkmenistanyň Prezidentiniň Malaýziýa 4 sapary, Malaýziýanyň Premýer-ministrleriniň Türkmenistana 5 sapary guraldy. Şunuň bilen baglylykda, Gahryman Arkadagymyzyň köp ýyllaryň dowamynda Aziýa — Ýuwaş umman sebitinde ýerleşýän ýurtlar, şol sanda Malaýziýa bilen ikitaraplaýyn gatnaşyklary berkitmek ugrunda uly işleri amala aşyrandygy nygtaldy. Milli Liderimiziň 2011-nji we 2016-njy ýyllarda Malaýziýa amala aşyran döwlet we resmi saparlarynyň dowamynda iki ýurduň arasyndaky dostlukly gatnaşyklary berkitmegiň, syýasy dialogy giňeltmegiň, özara bähbitli hyzmatdaşlygy işjeňleşdirmegiň binýady goýuldy.

Häzirki döwürde hormatly Prezidentimiziň baştutanlygynda ýurdumyzyň Malaýziýa bilen gatnaşyklary has-da pugtalandyrylýar. Bu babatda döwlet Baştutanymyzyň 2024-nji ýylyň 18-19-njy dekabrynda Malaýziýa amala aşyran resmi saparynyň netijesinde türkmen-malaý hyzmatdaşlygynyň hil taýdan täze derejä çykarylandygy bellenildi. Şeýle hem Hökümet derejesinde, Daşary işler ministrlikleriniň arasynda yzygiderli gatnaşyklar alnyp barylýar. Türkmenistan bilen Malaýziýanyň arasyndaky syýasy gatnaşyklar halkara guramalaryň, hususan-da, Birleşen Milletler Guramasynyň, Yslam Hyzmatdaşlyk Guramasynyň, Goşulyşmazlyk Hereketiniň, beýleki iri halkara guramalaryň çäklerinde netijeli ösdürilýär.

Söwda-ykdysady ulgamda hem Malaýziýa Türkmenistanyň ozaldan gelýän hyzmatdaşy bolup durýar. Şunuň bilen baglylykda, wise-premýer, daşary işler ministri R.Meredow Malaýziýanyň Premýer-ministriniň ýolbaşçylygyndaky wekiliýetiň Türkmenistana resmi saparyna taýýarlyk görülýändigini hem-de bu saparyň netijeleriniň iki dostlukly ýurduň arasyndaky gatnaşyklary mundan beýläk-de ösdürmäge, ony hil taýdan täze derejä çykarmaga ýardam berjekdigini aýtdy.

Döwlet Baştutanymyz hasabaty diňläp, Türkmenistan bilen Malaýziýanyň arasyndaky gatnaşyklaryň netijeli ösdürilýändigini belledi hem-de iki döwletiň arasyndaky alnyp barylýan hyzmatdaşlygy berkitmek maksady bilen, Malaýziýanyň Premýer-ministriniň ýurdumyza boljak resmi saparyna gowy taýýarlyk görmegi tabşyrdy.

Ministrler Kabinetiniň Başlygynyň orunbasary B.Annaýew ulag we aragatnaşyk toplumynyň işini kämilleşdirmek boýunça ýerine ýetirilýän işler barada hasabat berdi. Bellenilişi ýaly, toplumyň maddy-tehniki binýady yzygiderli pugtalandyrylýar, onuň kadalaşdyryjy hukuk binýadyny döwrüň talaplaryna laýyk getirmek boýunça netijeli işler alnyp barylýar. Munuň özi toplumyň işleriniň ilerledilmeginde möhüm ähmiýete eýedir. Şunuň bilen baglylykda, wise-premýer döwlet Baştutanymyzyň garamagyna degişli teklibi hödürledi.

Hormatly Prezidentimiz hasabaty diňläp, ýurdumyzyň ulag we aragatnaşyk toplumynyň wajyp toplumlaryň biri bolup durýandygyny belledi. Döwlet Baştutanymyz ulag we aragatnaşyk toplumyna degişli ministrlikleriň, pudaklaýyn dolandyryş edaralarynyň işini kämilleşdirmek maksady bilen, bu ugurda taýýarlanan Karara gol çekip, wise-premýere degişli işleri geçirmegi tabşyrdy.

Soňra hormatly Prezidentimiz Ministrler Kabinetiniň agzalaryna ýüzlenip, ýurdumyzda Ylymlar gününiň giňden bellenip geçilýändigini, Garaşsyz ýurdumyzda ylym ulgamyny ösdürmäge uly ähmiýet berilýändigini, raýatlarymyzyň ylym-bilim bilen meşgullanmagy üçin ähli şertleriň döredilýändigini aýtdy hem-de pursatdan peýdalanyp, mejlise gatnaşyjylary we mähriban halkymyzy Ylymlar güni bilen tüýs ýürekden gutlady.

Mejlisde döwlet durmuşyna degişli başga-da birnäçe möhüm meselelere seredildi we olar boýunça degişli çözgütler kabul edildi.

Hormatly Prezidentimiz Serdar Berdimuhamedow Ministrler Kabinetiniň sanly ulgam arkaly geçirilen mejlisini jemläp, oňa gatnaşanlara berk jan saglyk, maşgala abadançylygyny, berkarar Watanymyzyň gülläp ösmegi ugrunda alyp barýan işlerinde uly üstünlikleri arzuw etdi.

Köp sanly iş duşuşyklary, syýasy geňeşmeler, işewürlik gepleşikleri, halkara forumlar, sergiler, medeni çäreler halkymyzyň bagtyýar durmuşynyň we ählumumy abadançylygyň bähbidine durmuşa geçirilýän giň möçberli döwlet maksatnamalarynyň çäklerinde ýurdumyzyň ministrlikleriniň we pudaklaýyn dolandyryş edaralarynyň alyp barýan netijeli işlerini aýdyň görkezýär.

Şu ýylyň 3 — 8-nji maýy aralygynda Izmir şäherinde Türkiýe Respublikasynyň Medeniýet we syýahatçylyk ministrligi bilen Türki medeniýetiň halkara guramasynyň (TÜRKSOÝ) bilelikde guramagynda geçirilen «Turan» halkara kinofestiwalyna dünýäniň 90-dan gowrak döwletinden 2 müňden gowrak film hödürlenildi. Bu döredijilik çäresinde Türkmenistanyň Telewideniýe, radiogepleşikler we kinematografiýa baradaky döwlet komitetiniň Oguz han adyndaky «Türkmenfilm» birleşigi hem-de «Mahabat» müdirligi tarapyndan surata düşürilen filmler ýokary derejeli baýraklara mynasyp boldy.

4-nji maýda Ýerewan şäherinde Türkmenistanyň we Ermenistan Respublikasynyň daşary işler ministrleriniň orunbasarlarynyň arasynda geçirilen duşuşykda syýasy-diplomatik, söwda-ykdysady, medeni-ynsanperwer ugurlarda hyzmatdaşlygyň, abraýly halkara düzümleriň, hususan-da, Birleşen Milletler Guramasynyň çäklerinde özara gatnaşyklaryň ýokary derejesi bellenildi.

5-6-njy maýda ýurdumyzyň wekiliýeti Ermenistanda geçirilen «Yerevan Dialogue 2026» atly halkara forumyň işine gatnaşdy. Nygtalyşy ýaly, Türkmenistan energetika ulgamyny döwrebaplaşdyrmak, energiýa netijeliligini ýokarlandyrmak, zyňyndylary yzygiderli azaltmak arkaly energetika pudagynyň binýadyny işjeň berkidýär. Şunda ýurdumyzyň ykdysady durnuklylygyny we durmuş abadançylygyny üpjün etmek bilen bir hatarda, gaýtadan dikeldilýän energiýa çeşmeleriniň ulanylyşyny tapgyrlaýyn giňeltmek meselelerine aýratyn üns berildi.

6 — 8-nji maý aralygynda Türkmenistanyň wekiliýetiniň Germaniýanyň Leýpsig şäherinde «Durnukly ulagy maliýeleşdirmek» atly mowzuk boýunça geçirilen Halkara ulag forumynyň (ITF) her ýylky sammitine gatnaşmagy ýurdumyzyň giň gerimli ulag başlangyçlaryny durmuşa geçirmek ugrunda alyp barýan maksada okgunly işleriniň kanunalaýyk dowamy boldy. Çärä gatnaşyjylar maýa goýumlary çekmegiň, barha artýan töwekgelçilikleriň — howanyň üýtgemegi, tebigy hadysalar we beýleki şertlerde ulag ulgamynyň durnuklylygyny ýokarlandyrmaga gönükdirilen maliýeleşdirme strategiýalaryny işläp düzmegiň ýollaryny ara alyp maslahatlaşdylar.

7-nji maýda paýtagtymyzda geçirilen Ykdysady hyzmatdaşlyk boýunça türkmen-gruzin hökümetara toparynyň bäşinji mejlisinde döwletara gatnaşyklaryň ösüşiniň ýokary derejesi kanagatlanma bilen bellenildi. Nygtalyşy ýaly, iki ýurduň arasyndaky yzygiderli dialog syýasy-diplomatik, söwda-ykdysady, medeni-ynsanperwer ulgamlarda özara gatnaşyklaryň gerimini giňeltmek üçin berk binýat bolup hyzmat edýär. Şunda energetika we ulag-logistika ulgamlary ileri tutulýan ugurlar hökmünde kesgitlenildi. Mejlisiň jemleri boýunça degişli Teswirnama gol çekildi.

8-nji maýda Pnompen şäherinde Türkmenistanyň we Kamboja Patyşalygynyň daşary syýasat edaralarynyň arasynda ilkinji syýasy geňeşmeler geçirildi. Taraplar ikitaraplaýyn gatnaşyklaryň giň gerimli meselelerini ara alyp maslahatlaşdylar we Daşary işler ministrlikleriniň arasynda geňeşmeleriň geçirilmeginiň özara bähbitli hyzmatdaşlygy ilerletmek hem-de onuň täze geljegi uly ugurlaryny kesgitlemek üçin netijeli gural bolup durýandygyny aýtdylar. Sanly ulgam arkaly duşuşyklary, dostluk toparlarynyň wekiliýetleriniň saparlaryny guramak arkaly parlamentara gatnaşyklary pugtalandyrmaga aýratyn üns berildi. Şeýle hem halkara we sebit guramalarynyň, ilkinji nobatda, BMG-niň çäklerindäki özara gatnaşyklaryň ýokary derejesi bellenildi.

8-9-njy maýda Türkmenistanyň wekiliýetiniň Pnompen şäherine saparynyň çäklerinde Kamboja Patyşalygynyň Hökümetiniň we işewür toparlarynyň wekilleri bilen birnäçe duşuşyklar geçirildi. Olarda syýasy-diplomatik, söwda-ykdysady, medeni-ynsanperwer ulgamlarda hyzmatdaşlygyň gerimini giňeltmegiň möhüm meselelerine garaldy.

8 — 10-njy maýda ýurdumyzyň atçylyk pudagynyň önümçilik we ylmy edaralarynyň, medeniýet ulgamynyň, köpçülikleýin habar beriş serişdeleriniň wekillerinden ybarat uly topar hormatly Prezidentimiziň tabşyrygy boýunça Daşkent şäherinde “Gündogaryň merjeni” ady bilen geçirilen atly sport hem-de gözellik bäsleşiklerine, “Ahalteke bedewi — halklaryň dostlugynyň nyşany” atly halkara maslahata gatnaşmak üçin Özbegistan Respublikasynda saparda boldy. Türkmenistanyň we Özbegistanyň döwlet atçylyk hem-de sirk sungaty edaralarynyň, ugurdaş okuw, ylmy-barlag edaralarynyň ýolbaşçylarynyň özara duşuşyklary geçirildi. «Gündogaryň merjeni» atly halkara bäsleşigiň çäklerinde ahalteke atlarynyň gözellik boýunça dünýä çempionaty geçirildi. Oňa Türkmenistandan, Özbegistandan, Täjigistandan, Russiýadan, Gazagystandan, Gyrgyzystandan ahalteke atlary gatnaşdyryldy. Türkmen çapyksuwarlary bu ýaryşlarda öz bedewleri bilen üstünlikli çykyş edip, “Aziýanyň çempiony” we “Dünýäniň çempiony” diýen atlara mynasyp boldular.

10 — 15-nji maýda Türkmenistanyň Demokratik partiýasynyň başlygynyň ýolbaşçylygyndaky wekiliýet Uganda Respublikasynyň Prezidenti wezipesine gaýtadan saýlanan Ýoweri Kaguta Museweniň ýokary döwlet wezipesine resmi taýdan girişmegi mynasybetli geçirilen dabara gatnaşmak maksady bilen, Kampala şäherinde saparda boldy. Saparyň dowamynda Uganda Respublikasynyň Prezidenti, dolandyryjy partiýasynyň Baş sekretary, Daşary işler ministrliginiň halkara gatnaşyklar boýunça döwlet ministri bilen geçirilen duşuşyklarda syýasy-diplomatik, söwda-ykdysady we medeni-ynsanperwer ugurlarda gatnaşyklary ösdürmegiň meseleleri ara alnyp maslahatlaşyldy.

Türkmenistanyň Daşary işler ministrliginiň Halkara gatnaşyklary institutynda “Halkara gatnaşyklary: parahatçylyk dialogynyň medeniýeti” atly III halkara bäsleşik geçirildi. Bu bäsleşik “Garaşsyz, baky Bitarap Türkmenistan — bedew batly at-myradyň mekany” ýylynyň bilim ugurly möhüm çäreleriniň üstüni ýetirdi. Mälim bolşy ýaly, Türkmenistanyň Bitaraplyk syýasatyny iş ýüzünde amala aşyrmak hormatly Prezidentimiziň alyp barýan daşary syýasat strategiýasynyň esasy ugurlarynyň biridir. Şunuň bilen baglylykda, ýurdumyzda parahatçylyk we bitaraplyk ýörelgelerini has-da işjeňleşdirmek ugrunda toplumlaýyn işler alnyp barylýar. Şunda halkara gatnaşyklarda ýüze çykýan meseleleriň syýasy-diplomatik ýollar arkaly çözülmegine aýratyn üns berilýär. Bäsleşik 9 ýurduň — Russiýa Federasiýasynyň, Täjigistanyň, Özbegistanyň, Gruziýanyň, HHR-iň, Gazagystanyň, Gyrgyzystanyň, Beýik Britaniýanyň we Demirgazyk Irlandiýanyň Birleşen Patyşalygynyň, Eýran Yslam Respublikasynyň öňdebaryjy ýokary okuw mekdepleriniň wekillerini bir ýere jemledi.

12-nji maýda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Malaýziýanyň Premýer-ministriniň ýanyndaky Syýasy meseleler boýunça konsultatiw komitetiniň başlygy Tan Şri Mohd Hassan Marikan bilen duşuşdy. Söhbetdeşligiň dowamynda taraplar ykdysadyýet, söwda, ulag, energetika, bilim we medeniýet ýaly strategik ugurlary öz içine alýan ikitaraplaýyn gatnaşyklaryň okgunly häsiýete eýedigini kanagatlanma bilen bellediler. Şeýle hem geljekde sanly tehnologiýalary önümçilige ornaşdyrmakda, energiýa tygşytlaýjy ulgamlary kämilleşdirmekde, ekologik howpsuzlygy berkitmekde hyzmatdaşlygyň has-da ösdüriljekdigine berk ynam bildirildi.

12 — 14-nji maýda paýtagtymyzdaky Söwda-senagat edarasynyň sergi zalynda geçirilen «Agro Pack Turkmenistan — 2026» atly halkara sergi oba hojalyk pudagynda diňe bir ýurdumyzyň gazanan üstünliklerini beýan etmek bilen çäklenmän, eýsem, bu pudakda işjeň orny eýeleýän işewür düzümleriň ägirt uly mümkinçiliklerini hem görkezdi. Sergi meýdançasynda ýyladyşhana hojalyklaryny döwrebaplaşdyrmak, tohumçylyk we ösümlikleri goramak ulgamyndaky iň täze ylmy-tehniki işläp taýýarlamalar uly gyzyklanma döretdi.

12-13-nji maýda Azerbaýjan Respublikasyna iş saparynyň çäklerinde Türkmenistanyň Kärdeşler arkalaşyklarynyň Milli merkeziniň başlygy “Howanyň üýtgemegi meseleleri boýunça kärdeşler arkalaşyklarynyň işi” atly maslahata gatnaşdy. Gün tertibine kärdeşler arkalaşyklarynyň howa syýasatyny kemala getirmekdäki orny, durnukly ykdysadyýete adalatly geçişi üpjün etmek, işgärleriň zähmet hukuklaryny goramak we durmuş dialogyny ösdürmek bilen bagly meseleler girizildi. Şeýle hem howanyň üýtgemegi şertlerinde «ýaşyl» iş orunlaryny döretmek, işgärleri gaýtadan taýýarlamak, durmuş taýdan goraglylygy üpjün etmek meselelerine aýratyn üns çekildi. Saparyň dowamynda Azerbaýjanyň Kärdeşler arkalaşyklary konfederasiýasynyň başlygy bilen duşuşyk geçirildi. Duşuşygyň netijeleri boýunça hyzmatdaşlyk hakynda Ähtnama gol çekildi.

13-nji maýda Türkmenistanyň Daşary işler ministrliginde Ýewropanyň Maglumat-seljeriş kollejiniň sekretariatynyň direktory Ýasmin Guedar bilen duşuşyk geçirildi. Taraplar sebit we halkara gün tertibiniň meseleleri boýunça pikir alyşdylar. Şunda ýurdumyzyň parahatçylyk söýüjilikli syýasatynyň ähmiýeti hem-de halkymyzyň hoşniýetli goňşuçylyk, dostluk we özara hormat goýmak ýaly üýtgewsiz gymmatlyklara ygrarlydygy bellenildi.

Daşary işler ministrliginde Birleşen Arap Emirlikleriniň Türkmenistandaky Adatdan daşary we Doly ygtyýarly ilçisi bilen geçirilen duşuşykda döwletara gatnaşyklaryň, halkara guramalaryň hem-de köptaraplaýyn meýdançalaryň çäklerindäki hyzmatdaşlygyň möhüm ugurlaryna garaldy. Şeýle hem taraplar şu ýyl üçin meýilleşdirilen bilelikdäki çäreleri ara alyp maslahatlaşdylar.

13-14-nji maýda paýtagtymyzdaky “Ýyldyz” myhmanhanasynyň mejlisler zalynda Garaşsyz Döwletleriň Arkalaşygyna agza ýurtlaryň demir ýol ulagy boýunça Geňeşiniň 84-nji halkara mejlisi geçirildi. Bu forum ykdysady gatnaşyklaryň binýadyny pugtalandyrmak bilen bir hatarda, GDA ýurtlarynyň demir ýol edaralarynyň arasyndaky hyzmatdaşlygy berkitmegiň ýolunda möhüm ädim boldy. Döwletara derejede demir ýol ulagynyň işini utgaşdyrmagyň, halkara demir ýollar torunyň tehnologik bitewüligini üpjün etmegiň, bu düzümleri häzirki zaman şertlerinde ösdürmegiň meseleleri barada pikir alşyldy.

Mejlisiň çäklerinde ikinji “Ýaş demir ýolçular” forumy geçirildi. Onda bu ugry sazlaşykly ösdürmegiň strategiýasyny işläp taýýarlamak, demir ýol ulaglary edaralary üçin ýokary hünärli işgärleri ýetişdirmek bilen baglanyşykly meseleler wajyp wezipeleriň hatarynda kesgitlenildi.

13-14-nji maýda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Russiýa Federasiýasynyň Tatarystan Respublikasyna saparynyň çäklerinde Kazan şäheriniň “Yslam dünýäsiniň medeni paýtagty” diýlip yglan edilmegi mynasybetli Yslam Hyzmatdaşlyk Guramasynyň maslahatyna gatnaşdy. ICESCO-nyň Baş maslahatynyň 15-nji mejlisinde bolsa ýurdumyza Yslam dünýäsiniň Bilim, ylym we medeniýet meseleleri boýunça guramasynda synçy derejesi berildi. Şeýle hem Gahryman Arkadagymyz Kazan halkara atçylyk sport toplumyna baryp gördi we bu ýerde guralan at çapyşyklaryna tomaşa etdi. Onda ýurdumyzyň ussat çapyksuwarlary ussatlyklaryny görkezip, baýrakly orunlary eýelediler.

Saparyň çäklerinde türkmen halkynyň Milli Lideri bilen Russiýa Federasiýasynyň Prezidenti Wladimir Putiniň arasynda telefon arkaly söhbetdeşlik geçirildi. Söhbetdeşler iki ýurduň arasynda dostluk, ynanyşmak, özara düşünişmek ýörelgelerine esaslanýan gatnaşyklaryň dürli ugurlar boýunça okgunly ösdürilýändigini kanagatlanma bilen belläp, döwletara dialogy mundan beýläk-de dowam etdirmegiň möhümdigini nygtadylar.

Türkmenistanyň Halk Maslahatynyň Başlygy RF-niň Tatarystan Respublikasynyň Baştutany Rustam Minnihanow bilen geçiren duşuşygynyň barşynda ýurtlarymyzyň arasyndaky gatnaşyklaryň iki halkyň çuňňur taryhy köklerine esaslanyp, iri möçberli bilelikdäki taslamalaryň durmuşa geçirilmeginde öz beýanyny tapýandygy nygtaldy.

13-14-nji maýda Özbegistan Respublikasyna iş saparynyň dowamynda Mejlisiň Başlygynyň ýolbaşçylygyndaky ýurdumyzyň wekiliýeti sebit ýurtlarynyň we Azerbaýjan Respublikasynyň zenan ýolbaşçylarynyň dialogynyň çäklerinde guralan «Ylymda zenanlaryň ýolbaşçylygy: häzirki zaman meseleleri, innowasion çözgütler we ylmy hyzmatdaşlyk» atly alym zenanlaryň forumyna, «Zenanlara maýa goýum — durnukly ösüşiň esasy: zenanlaryň ykdysady, durmuş, syýasy we ekologiýa babatda hukuklaryny we mümkinçiliklerini berkitmek» ady bilen geçirilen Zenanlaryň ikinji Aziýa forumyna gatnaşdy. Mundan başga-da, Özbegistan Respublikasynyň Oliý Majlisiniň Senatynyň Başlygy T.Narbaýewa bilen geçirilen duşuşygyň dowamynda taraplar üstaşyr ulag, serhetýaka hyzmatdaşlyk, sanly tehnologiýalar ulgamynda zenanlaryň ornuny ýokarlandyrmak bilen baglanyşykly meseleleri ara alyp maslahatlaşdylar.

14-nji maýda Türkmenistanyň Ylymlar akademiýasynyň Himiýa institutynda «Garaşsyz, baky Bitarap Türkmenistan — bedew batly at-myradyň mekany» ýylynda bellenilýän Türkmenistanyň Garaşsyzlygynyň 35 ýyllyk baýramy mynasybetli “Himiýa we himiýa tehnologiýalary: ýetilen sepgitler we geljegi nazarlaýan ösüşler” atly utgaşykly görnüşdäki halkara ylmy maslahat geçirildi. Onda himiýa senagatyny ösdürmegiň geljegi uly ugurlaryna, täze ylmy açyşlara, innowasion usullara garaldy.

Ýurdumyzyň Daşary işler ministrliginde Kipr Respublikasynyň Türkmenistandaky Adatdan daşary we Doly ygtyýarly ilçisi Kipros Ýorgallis bilen geçirilen duşuşygyň barşynda taraplar syýasy-diplomatik, söwda-ykdysady, medeni-ynsanperwer ulgamlarda ikitaraplaýyn gatnaşyklary mundan beýläk-de pugtalandyrmak, halkara guramalaryň çäklerinde üstünlikli hyzmatdaşlyk etmek üçin mümkinçilikleriň bardygyny bellediler.

14-nji maýda ýurdumyzyň daşary syýasat edarasynda Koreýa Respublikasynyň Türkmenistandaky Adatdan daşary we Doly ygtyýarly ilçisi Li Wonje bilen duşuşyk geçirildi. Duşuşykda dürli ugurlar boýunça döwletara gatnaşyklary ösdürmegiň, halkara guramalaryň, ilkinji nobatda, BMG-niň çäklerindäki hyzmatdaşlygyň gerimini giňeltmegiň meseleleri ara alnyp maslahatlaşyldy. «Merkezi Aziýa — Koreýa Respublikasy» formatyndaky hyzmatdaşlyga aýratyn üns berildi. Gazhimiýa pudagynda, ulag infrastrukturasynda, gämi gurluşygynda iri taslamalaryň durmuşa geçirilmeginde koreý kompaniýalarynyň uly goşandy aýratyn nygtaldy.

Geçen aýda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Patyşa maşgalasynyň çakylygy boýunça Beýik Britaniýanyň we Demirgazyk Irlandiýanyň Birleşen Patyşalygyna sapary amala aşyryp, onuň çäklerinde Patyşa Karl III, Edinburgyň Gersogy Şazada Edward we onuň maşgalasy hanym Sofi Helen bilen duşuşdy. Gahryman Arkadagymyz atçylyk bilen bagly çäreleriň ýokary derejede guralandygyny belledi. Atly sport çärelerine Türkmenistan bilen birlikde 20 ýurtdan dürli atşynaslar atlary bilen gatnaşdylar. Soňra Türkmenistanyň Halk Maslahatynyň Başlygy Windzor galasynyň çäklerinde ýaýbaňlandyrylan atly sport çykyşlaryna tomaşa etdi.

18-nji maýda Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygynyň ýolbaşçylygyndaky ýurdumyzyň wekiliýeti Birleşen Milletler Guramasynyň Ilatly nokatlar boýunça maksatnamasy tarapyndan Azerbaýjan Respublikasynyň Hökümeti bilen bilelikde guralan Şäherleriň bütindünýä forumynyň 13-nji mejlisine (WUF13) gatnaşdy. Munuň özi Bitarap Türkmenistanyň Durnukly ösüş maksatlaryna, ählumumy abadançylygyň bähbidine köptaraply ekologik we innowasion hyzmatdaşlygy giňeltmäge ygrarlydygyny aýdyň görkezdi.

Forumyň öňüsyrasynda Azerbaýjan Respublikasynyň Prezidenti Ilham Aliýew bilen geçirilen duşuşygyň barşynda Şäherleriň bütindünýä forumynyň 13-nji mejlisiniň gün tertibi, iki halkyň mizemez dostlugynyň we doganlygynyň nyşany hökmünde türkmen tarapyndan Fizuli şäherinde gurulýan metjidiň gurluşyk işleri ara alnyp maslahatlaşyldy.

19-njy maýda Daşary işler ministrliginde Bütindünýä Söwda Guramasyna goşulmak boýunça departamentiň direktory Maýka Oşikawa bilen geçirilen duşuşygyň dowamynda Türkmenistanyň bu abraýly gurama bilen özara hyzmatdaşlygynyň häzirki ýagdaýy, hususan-da, ýurdumyzyň BSG-ä goşulmagy bilen bagly geljekki ädimler ara alnyp maslahatlaşyldy. Taraplar sebitleýin we halkara söwda-ykdysady hyzmatdaşlyk, milli kadalaşdyryjy hukuk binýadynyň kämilleşdirilmegi, halkara guramalar we degişli edaralar bilen özara gatnaşyklar barada pikir alyşdylar.

19 — 23-nji maýda paýtagtymyzda Ýewraziýa toparynyň 44-nji umumy mejlisiniň çäklerinde jenaýatçylykly ýol bilen alnan girdejileriň kanunlaşdyrylmagyna we terrorçylygyň maliýeleşdirilmegine garşy hereket etmek boýunça Ýewraziýa toparyna agza döwletleriň parlament agzalarynyň V forumy, Tehniki ýardam bermek boýunça iş toparynyň mejlisi hem-de birnäçe duşuşyklar geçirildi. Çäreleriň dowamynda Ýewraziýa toparynyň terrorçylyk howpunyň peseldilmegine, milli maliýe ulgamlarynyň aýanlygynyň, ygtybarlylygynyň, howpsuzlygynyň üpjün edilmegine, sebitiň döwletleriniň jenaýatçylykly ýol bilen alnan girdejileriň kanunlaşdyrylmagyna, terrorçylygyň maliýeleşdirilmegine garşy göreş boýunça halkara derejede alyp barýan işine üns berildi.

20-nji maýda BMG-niň Baş Assambleýasynyň 80-nji sessiýasynyň 82-nji plenar mejlisinde Türkmenistanyň başlangyjy bilen hödürlenen «Halkara parahatçylygy, howpsuzlygy we durnukly ösüş işini goldamakda hem-de berkitmekde bitaraplyk syýasatynyň orny we ähmiýeti» atly Kararnama biragyzdan kabul edildi. 47 döwlet bu resminamanyň awtordaşy bolup çykyş etdi. Onda Türkmenistanyň Hökümetiniň Birleşen Milletler Guramasynyň Tertipnamasynyň maksatlaryna we ýörelgelerine laýyklykda bitaraplyk, öňüni alyş diplomatiýasy meseleleri boýunça dialogy ösdürmek ugrundaky tagallalary aýratyn nygtalýar.

Daşary işler ministrliginde BMG-niň ýurdumyzda hereket edýän ýöriteleşdirilen edaralarynyň, hususan-da, Ösüş maksatnamasynyň, Çagalar gaznasynyň we Ilat gaznasynyň wekilleri bilen iş duşuşygy geçirildi. Duşuşygyň dowamynda taraplar Çagalary goramagyň halkara gününe bagyşlanan bilelikdäki çäreleriň geçirilmeginiň mümkinçilikleri barada pikir alyşdylar.

21-nji maýda ýurdumyzyň daşary syýasat edarasynda Belarus Respublikasynyň daşary işler ministriniň orunbasary Pawel Utýupin bilen duşuşyk geçirilip, onuň barşynda syýasy-diplomatik, söwda-ykdysady we medeni-ynsanperwer ulgamlardaky ikitaraplaýyn hyzmatdaşlygyň, şeýle hem Birleşen Milletler Guramasynyň, Garaşsyz Döwletleriň Arkalaşygynyň çäklerinde netijeli özara gatnaşyklaryň möhüm ähmiýeti nygtaldy.

Daşary işler ministrliginde geçirilen türkmen-belarus syýasy geňeşmelerinde dürli ulgamlarda döwletara gatnaşyklary mundan beýläk-de pugtalandyrmagyň mümkinçilikleri ara alnyp maslahatlaşyldy. Mundan başga-da, ählumumy parahatçylygy, durnuklylygy we ösüşi üpjün etmäge gönükdirilen başlangyçlary özara goldamak tejribesini dowam etdirmäge taýýarlyk beýan edildi.

21-22-nji maýda ýurdumyzyň wekiliýeti Garaşsyz Döwletleriň Arkalaşygynyň Parlamentara Assambleýasynyň Geňeşiniň mejlisine hem-de GDA-nyň Parlamentara Assambleýasynyň 60-njy plenar mejlisine gatnaşmak maksady bilen, Russiýa Federasiýasynyň Sankt-Peterburg şäherinde saparda boldy. Çäreleriň dowamynda kanun çykaryjylyk ulgamyndaky hyzmatdaşlygyň möhüm meseleleri barada pikir alşyldy, parlamentara dostluk toparlarynyň, parlament komitetleriniň işine üns çekildi, milli ösüş maksatnamalaryny durmuşa geçirmek boýunça tejribe alşyldy. Mejlisleriň çäklerinde parlamentleriň ýolbaşçylarynyň arasynda birnäçe duşuşyklar geçirildi. Gepleşikleriň dowamynda ikitaraplaýyn esasda hem-de GDA-nyň çäklerinde parlamentara gatnaşyklary ösdürmegiň meselelerine garaldy.

22-nji maýda paýtagtymyzda Garaşsyz Döwletleriň Arkalaşygynyň Hökümet Baştutanlarynyň Geňeşiniň mejlisi geçirildi. Türkmenistan GDA agza döwletler bilen gatnaşyklary taryhyň dowamynda kemala gelen dostlugyň, hoşniýetli goňşuçylygyň esasynda gurap, köpugurly hyzmatdaşlyk meselelerinde işjeň orny eýeleýär we onuň uly mümkinçiliklerinden netijeli peýdalanmak boýunça anyk başlangyçlary öňe sürýär. Ýurdumyzyň 2026-njy ýylda GDA-da başlyklyk etmeginiň çäklerinde dürli geňeşleriň, komissiýalaryň mejlisleri, beýleki duşuşyklardyr çäreler geçirilýär. Türkmenistan bu möhüm wezipä jogapkärli çemeleşmek bilen, öňde goýlan wezipeleri bilelikde çözmäge hemmetaraplaýyn ýardam bermäge çalyşýar.

24-nji maýda Daşary işler ministrliginde Ukrainanyň Daşary işler ministrliginiň Merkezi Aziýa boýunça ýörite wekili Wiktor Maýko bilen geçirilen duşuşykda syýasy-diplomatik, söwda-ykdysady, medeni-ynsanperwer ulgamlardaky hyzmatdaşlygyň möhüm meseleleri ara alnyp maslahatlaşyldy. Şunda taraplaryň döwletara gatnaşyklary ikitaraplaýyn görnüşde, halkara düzümleriň, ilkinji nobatda, BMG-niň çäklerinde mundan beýläk-de ösdürmäge ygrarlydyklary tassyklanyldy.

24-25-nji maýda paýtagtymyzda Aşgabat şäher häkimliginiň hem-de ýurdumyzyň Söwda-senagat edarasynyň bilelikde guramagynda “Ak şäherim Aşgabat” atly XXV köpugurly halkara sergi we maslahat öz işine başlady. Her ýyl geçirilýän sergi şäher gurluşygy, senagat, innowasiýalar ulgamlarynda ýurdumyzyň gazananlary, paýtagtymyzyň jemgyýetçilik, ykdysady, ylmy, medeni üstünlikleri bilen tanyşdyrýan iri çärä öwrüldi.

25-nji maýda Daşary işler ministrliginde BMG-niň Ilatly nokatlar boýunça maksatnamasynyň Gündogar Ýewropa we Merkezi Aziýa ýurtlary boýunça sebitleýin direktory Erfan Ali bilen duşuşyk geçirildi. Duşuşygyň dowamynda bu abraýly düzüm bilen hyzmatdaşlygyň yzygiderli ösdürilýändigi bellenildi hem-de gazanylan ylalaşyklary durmuşa geçirmegiň, gatnaşyklary mundan beýläk-de pugtalandyrmagyň meseleleri barada pikir alşyldy.

Ýurdumyzyň daşary syýasat edarasynda Gyrgyz Respublikasynyň Türkmenistandaky Adatdan daşary we Doly ygtyýarly ilçisi Azizbek Madmarow bilen geçirilen duşuşygyň dowamynda syýasy-diplomatik, söwda-ykdysady, medeni-ynsanperwer ugurlarda hem-de halkara guramalaryň çäklerinde özara bähbitli gatnaşyklary işjeňleşdirmegiň wajyp ähmiýeti nygtaldy.

25-nji maýda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow gurluşyk ulgamynda ýurdumyz bilen köp ýyllaryň dowamynda hyzmatdaşlyk edýän «Çalyk Holding» kompaniýalar toparynyň dolandyryjylar geňeşiniň başlygy Ahmet Çalygy kabul etdi. Duşuşygyň dowamynda Diýarymyzda möhüm ähmiýetli gurluşyk taslamalarynyň durmuşa geçirilişi baradaky meselelere garaldy.

25 — 28-nji maýda ýurdumyzyň wekiliýeti Duşenbe şäherinde “Durnukly ösüş üçin suw — 2018 — 2028-nji ýyllar” atly ýokary derejeli 4-nji halkara maslahata gatnaşdy. Durnukly ösüşiň altynjy maksadyny durmuşa geçirmegi tizleşdirmek, BMG-niň 2026-njy ýylda geçiriljek suw serişdeleri boýunça maslahatyna taýýarlyk görmek meselelerine aýratyn üns berildi. Bellenilişi ýaly, Türkmenistan halkara hukugyň kadalary esasynda, sebit döwletleriniň bähbitlerini nazara almak bilen we Birleşen Milletler Guramasynyň işjeň utgaşdyryjy orny arkaly suw serişdelerini dolandyrmagyň adalatly, durnukly, ylmy taýdan esaslandyrylan ulgamynyň döredilmegini yzygiderli goldaýar.

26-njy maýda Daşary işler ministrliginde BMG-niň Taslama hyzmatlary boýunça müdirliginiň Awstriýadaky köp ýurtly edarasynyň müdiri Simonetta Siligato bilen duşuşyk geçirildi. Taraplar bu müdirlik bilen hyzmatdaşlygyň geljekki ugurlaryny ara alyp maslahatlaşdylar hem-de parnik gazlarynyň zyňyndylaryny azaltmaga gönükdirilen ekologiýa maksatnamalaryny durmuşa geçirmegiň meseleleri boýunça gatnaşyklaryň oňyn häsiýetini bellediler.

26 — 30-njy maýda Türkmenistanyň Ministrler Kabinetiniň Başlygynyň orunbasary, daşary işler ministri R.Meredow BMG-niň Howpsuzlyk geňeşiniň mejlisiniň çäklerinde geçirilen «BMG-niň Tertipnamasynyň maksatlaryny we ýörelgelerini berjaý etmek hem-de Birleşen Milletler Guramasynyň merkezi ornuna esaslanýan halkara ulgamy berkitmek» atly ýokary derejeli açyk pikir alyşmalara gatnaşmak üçin Nýu-Ýork şäherinde iş saparynda boldy. Saparyň çäklerinde geçirilen ikitaraplaýyn duşuşyklaryň barşynda parahatçylygy we howpsuzlygy üpjün etmek, köptaraplaýyn hyzmatdaşlygy ösdürmek, häzirki zaman halkara gatnaşyklarynda BMG-niň ornuny berkitmek bilen baglanyşykly ählumumy gün tertibiniň möhüm meseleleri ara alnyp maslahatlaşyldy.

28-nji maýda ýurdumyzyň wekiliýeti Nýu-Ýork şäherinde geçirilen “Ählumumy dolandyryşy özgertmek we kämilleşdirmek, ählumumy wehimleri ýeňip geçmek üçin bilelikdäki tagallalar” atly Ählumumy dolandyryş boýunça dostlar toparynyň duşuşygyna gatnaşdy.

Şeýlelikde, maý aýynda ýurdumyzyň ministrlikleri we pudaklaýyn dolandyryş edaralary tarapyndan geçirilen köpugurly çäreler gyzyklanma bildirýän döwletler bilen dostluk, ynanyşmak, özara düşünişmek ýörelgelerine esaslanýan gatnaşyklary pugtalandyrmaga gönükdirilen Türkmenistanyň daşary syýasat strategiýasynyň üstünliklere beslenýändigini aýdyň görkezdi.

(TDH)

Aşgabat, 8-nji iýun (TDH). Şu gün hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Onda ýurdumyzyň oba hojalyk toplumynda we sebitlerde alnyp barylýan işler bilen baglanyşykly meselelere garaldy.

Ilki bilen, Ahal welaýatynyň häkimi T.Nurmyradowa söz berildi. Ol welaýatdaky möwsümleýin oba hojalyk işleri barada hasabat berdi.

Bellenilişi ýaly, sebitde galla oragyna guramaçylykly girişilip, ýetişdirilen hasyly ýitgisiz ýygnap almak, galla kabul ediş kärhanalarynda bökdençsiz kabul etmek boýunça zerur çäreler görülýär. Şunda oba hojalyk tehnikalary doly güýjünde işledilýär. Welaýatyň gowaça ekilen meýdanlarynda hatarara bejergi, mineral dökünler bilen iýmitlendirmek, ösüş suwuny tutmak işleri ýerine ýetirilýär. Ýurdumyzda azyk bolçulygyny has-da pugtalandyrmak boýunça öňde goýlan wezipelerden ugur alnyp, ekerançylyk meýdanlarynda ýazlyk ekinlere ideg etmek, ýeralmanyň we gök-bakja ekinleriniň hasylyny ýygnap almak işleri alnyp barylýar. Şeýle hem häkim Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilýän desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, galla oragynyň guramaçylykly geçirilmegini, welaýatyň gowaça meýdanlaryndaky ideg işleriniň agrotehnikanyň kadalaryna laýyklykda ýerine ýetirilmegini ileri tutulýan wezipeleriň hatarynda belledi we bu işleri gözegçilikde saklamagy tabşyrdy. Şeýle hem döwlet Baştutanymyz Oba milli maksatnamasynyň çäklerinde welaýatda amala aşyrylýan işleriň öz wagtynda, ýokary hilli ýerine ýetirilmegini üpjün etmegi tabşyrdy.

Balkan welaýatynyň häkimi H.Aşyrmyradow welaýatda dowam edýän möwsümleýin oba hojalyk işleri barada hasabat berdi.

Bellenilişi ýaly, sebitde bugdaý oragyna guramaçylykly girişmek üçin degişli taýýarlyk işleri alnyp barylýar. Gowaça ekilen meýdanlarda hatarara bejergi, ösüş suwuny tutmak we mineral dökünler bilen iýmitlendirmek işleri ýerine ýetirilýär. Ýurdumyzda gök-bakja önümleriniň öndürilýän möçberini has-da artdyrmak boýunça öňde goýlan wezipelere laýyklykda, welaýatda ýazlyk ýeralmanyň, beýleki ekinleriň ýetişdirilen hasylyny ýygnap almak işleri dowam edýär. Şeýle-de häkim Oba milli maksatnamasyna laýyklykda, şu ýyl welaýatda meýilleşdirilen işleriň barşy barada hasabat berdi.

Hormatly Prezidentimiz hasabaty diňläp, oba hojalygynda dowam edýän möwsümleýin işleriň möhüm ähmiýetine ünsi çekdi we galla oragyna guramaçylykly girişilmeginiň, gowaça ideg işleriniň agrotehniki möhletlerde geçirilmeginiň möhümdigini belledi. Döwlet Baştutanymyz welaýatda şu ýyl açylyp ulanmaga berilmegi meýilleşdirilýän desgalardaky gurluşyk işleriniň ýokary hilli ýerine ýetirilmegini gözegçilikde saklamagy tabşyrdy.

Daşoguz welaýatynyň häkimi D.Babaýew welaýatda alnyp barylýan möwsümleýin oba hojalyk işleri barada hasabat berdi.

Bellenilişi ýaly, welaýatda galla oragyna guramaçylykly girişmek üçin zerur çäreler görülýär. Gowaça ekilen meýdanlarda hatarara bejergi, otag etmek, ýekelemek, mineral dökünler bilen iýmitlendirmek işleri ýerine ýetirilip, ösüş suwuny tutmaga taýýarlyk görülýär. Ýazlyk ýeralma, gök-bakja ekinleri ekilen meýdanlarda ideg işleri geçirilip, ýetişdirilen hasyly ýygnamak boýunça taýýarlyk işleri alnyp barylýar. Welaýatda şaly ekişi guramaçylykly dowam edip, bu jogapkärli möwsümi gysga möhletde tamamlamak üçin zerur çäreler görülýär. Şeýle hem häkim ýurdumyzy durmuş-ykdysady taýdan ösdürmäge gönükdirilen maksatnamalara laýyklykda, şu ýyl açylyp ulanmaga berilmegi göz öňünde tutulýan dürli maksatly desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, galla oragyna guramaçylykly girişmek üçin ähli zerur çäreleri görmegiň, gowaça ideg işleriniň agrotehnikanyň kadalaryna laýyklykda geçirilmeginiň wajyp talap bolup durýandygyny belledi hem-de bu ugurda alnyp barylýan işleri gözegçilikde saklamagy tabşyrdy. Mundan başga-da, Oba milli maksatnamasyna laýyklykda, welaýatda şu ýyl üçin meýilleşdirilen işleriň ýokary hilli ýerine ýetirilmegini üpjün etmek babatda degişli tabşyryklar berildi.

Lebap welaýatynyň häkimi D.Genjiýew welaýatda dowam edýän möwsümleýin oba hojalyk işleri barada hasabat berdi.

Bellenilişi ýaly, welaýatda ýetişdirilen bugdaý hasylyny ýygnap almak işleri dowam edýär. Möwsümde oba hojalyk tehnikalary, galla kabul ediş kärhanalary bökdençsiz işledilýär. Bugdaý oragyndan boşan meýdanlarda sürüm işlerine girişildi. Sebitiň gowaça ekilen meýdanlarynda hatarara bejergi, mineral dökünler bilen iýmitlendirmek, ösüş suwuny tutmak işleri dowam edýär. Gök-bakja ekinleri ekilen meýdanlarda ideg işleri dowam edip, ýetişdirilen ýazlyk ýeralmanyň hasyly ýygnalyp alyndy. Şeýle hem welaýatda şaly ekişine girişmek üçin zerur taýýarlyk işleri alnyp barylýar. Häkim Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň barşy barada-da hasabat berdi.

Döwlet Baştutanymyz hasabaty diňläp, daýhan yhlasy bilen ýetişdirilen bugdaý hasylyny soňky dänesine çenli ýygnap almagyň, gowaça meýdanlaryndaky ideg işleriniň agrotehniki möhletlerde geçirilmeginiň zerurdygyny belledi we bu babatda degişli tabşyryklary berdi. Hormatly Prezidentimiz ýurdumyzy durmuş-ykdysady taýdan ösdürmäge gönükdirilen maksatnamalarda göz öňünde tutulan wezipeleriň üstünlikli ýerine ýetirilmeginiň möhüm ähmiýetine ünsi çekip, welaýatda bu ugurda alnyp barylýan işleri hemişe gözegçilikde saklamagy tabşyrdy.

Mary welaýatynyň häkimi D.Annaberdiýew welaýatda möwsümleýin oba hojalyk işleriniň barşy barada hasabat berdi.

Bellenilişi ýaly, sebitde galla oragyna girişilip, bu jogapkärli möwsümi guramaçylykly geçirmek üçin zerur çäreler görülýär. Däne ýygýan kombaýnlar, bugdaý daşaýan awtoulaglar, galla kabul ediş kärhanalary doly güýjünde işledilýär. Gowaça ekilen meýdanlarda hatarara bejergi, ýekelemek, mineral dökünler bilen iýmitlendirmek, ösüş suwuny tutmak işleri utgaşykly ýerine ýetirilýär. Welaýatyň ýazlyk ýeralma we gök-bakja ekinleri ekilen meýdanlarynda ideg işleri bilen birlikde, ýetişdirilen hasyly ýygnap almak işleri dowam edýär. Şeýle-de häkim Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, bugdaý hasylyny soňky dänesine çenli ýitgisiz ýygnap almagyň, gowaça ideg işleriniň agrotehnikanyň kadalaryna laýyklykda ýerine ýetirilmeginiň zerurdygyny belledi hem-de birnäçe anyk tabşyryklary berdi. Şeýle-de döwlet Baştutanymyz ýurdumyzy durmuş-ykdysady taýdan ösdürmek boýunça maksatnamalara laýyklykda, welaýatda şu ýyl üçin meýilleşdirilen işleriň öz wagtynda we ýokary hilli ýerine ýetirilmegini gözegçilikde saklamagy tabşyrdy.

Soňra Ministrler Kabinetiniň Başlygynyň orunbasary T.Atahallyýew ýurdumyzyň oba hojalygynda dowam edýän möwsümleýin işler barada hasabat berdi.

Bellenilişi ýaly, Diýarymyzda ýetişdirilen bugdaý hasylyny gysga wagtda, ýitgisiz ýygnap almak boýunça işler dowam edip, möwsümde oba hojalyk tehnikalaryny netijeli işletmek, ýygnalan hasyly galla kabul ediş kärhanalarynda bökdençsiz kabul etmek üçin zerur çäreler görülýär. Welaýatlaryň gowaça ekilen meýdanlarynda agrotehnikanyň kadalaryna laýyklykda degişli ideg işleri ýerine ýetirilýär. Ýurdumyzyň ekerançylyk meýdanlarynda ýazlyk ekinlere ideg etmek, ýetişdirilen hasyly ýygnap almak işleri alnyp barylýar. Şunuň bilen birlikde, Daşoguz welaýatynda şaly ekişi dowam edip, Lebap welaýatynda onuň ekiş möwsümine taýýarlyk işleri ýerine ýetirilýär.

Hormatly Prezidentimiz hasabaty diňläp, ýetişdirilen bugdaý hasylyny ýygnap almak boýunça işleriň hem-de gowaça ideg işleriniň bellenen kadalara laýyklykda ýokary hilli geçirilmeginiň, Daşoguz we Lebap welaýatlarynda şalynyň bol hasylyny ösdürip ýetişdirmek üçin zerur çäreleri görmegiň möhümdigini belledi hem-de wise-premýere bu ugurda alnyp barylýan işleri yzygiderli gözegçilikde saklamagy tabşyrdy.

Soňra döwlet Baştutanymyz iş maslahatyna gatnaşyjylara ýüzlenip, häzirki wagtda ýurdumyzyň oba hojalygynda dowam edýän möwsümleýin işlere ýene-de bir gezek ünsi çekdi hem-de bu jogapkärli möwsümi ýokary hilli we öz wagtynda geçirmek üçin toplumlaýyn çäreleri görmegi tabşyrdy.

Hormatly Prezidentimiz Serdar Berdimuhamedow sanly ulgam arkaly geçirilen iş maslahatyny jemläp, oňa gatnaşanlara berk jan saglyk, maşgala abadançylygyny, alyp barýan işlerinde uly üstünlikleri arzuw etdi.

Aşgabat, 5-nji iýun (TDH). Şu gün hormatly Prezidentimiz Serdar Berdimuhamedow sanly ulgam arkaly Ministrler Kabinetiniň mejlisini geçirdi. Onda şu ýylyň bäş aýynda ýurdumyzda alnyp barlan işleriň jemleri jemlenildi.

Ilki bilen, Mejlisiň Başlygy D.Gulmanowa şu ýylyň ýanwar — maý aýlarynda ýerine ýetirilen işleriň netijeleri barada maglumat berdi.

Bellenilişi ýaly, geçen bäş aýyň dowamynda Türkmenistanyň Kanunlarynyň 6-sy, Mejlisiň kararlarynyň 10-sy kabul edildi. Raýatlaryň hukuklaryny we kanuny bähbitlerini goramak, önümçilik desgalarynyň senagat howpsuzlygyny üpjün etmek, buhgalterçilik hasaba alnyşy we maliýe hasabatlylygy kämilleşdirmek, işiň aýry-aýry görnüşlerini ygtyýarlylandyrmak, awtomobil ýollary we ýol işi, daşky gurşawy, suwuň biologik serişdelerini goramak, migrasiýa syýasatynyň netijeliligini has-da ýokarlandyrmak bilen baglanyşykly hereket edýän kanunlara degişli üýtgetmeler we goşmaçalar girizildi.

Çad Respublikasynyň, Indoneziýa Respublikasynyň, Argentina Respublikasynyň, Müsür Arap Respublikasynyň Türkmenistandaky Adatdan daşary we Doly ygtyýarly ilçilerinden ynanç hatlary kabul edildi. Mejlisde dünýä döwletleriniň parlamentleriniň, daşary döwletleriň ýurdumyzdaky wekilhanalarynyň wekilleri bilen ikitaraplaýyn hyzmatdaşlyk meselelerini ara alyp maslahatlaşmak boýunça duşuşyklaryň 13-si geçirildi. Mejlisiň deputatlary we hünärmenleri halkara guramalaryň ýurdumyzyň degişli ministrlikleri, pudaklaýyn dolandyryş edaralary bilen bilelikde guran okuw maslahatlarynyň 51-sine gatnaşdylar. Halkara tejribeleri öwrenmek maksady bilen, deputatlaryň daşary ýurtlara iş saparlarynyň 13-si amala aşyryldy.

Türkmenistanyň parahatçylyk söýüjilikli, ynsanperwer syýasatyny parlament diplomatiýasynyň üsti bilen dünýä ýaýmak üçin türkmen wekiliýeti Zenanlaryň ikinji Aziýa forumyna hem-de onuň çäklerinde geçirilen Merkezi Aziýa ýurtlarynyň we Azerbaýjan Respublikasynyň zenan ýolbaşçylarynyň dialogynyň mejlisine gatnaşmak maksadynda Özbegistan Respublikasynyň Buhara şäherinde, Garaşsyz Döwletleriň Arkalaşygynyň Parlamentara Assambleýasynyň 60-njy mejlisine we bu Assambleýanyň geňeşiniň nobatdaky mejlisine gatnaşmak üçin Russiýa Federasiýasynyň Sankt-Peterburg şäherinde iş saparynda boldy. Saparlaryň çäklerinde birnäçe duşuşyklar geçirildi.

Hormatly Prezidentimiz ýurdumyzyň kanunçylyk binýadyny berkitmek we kämilleşdirmek boýunça alnyp barylýan işleri dowam etdirmegiň möhümdigine ünsi çekdi.

Ministrler Kabinetiniň Başlygynyň orunbasary H.Geldimyradow şu ýylyň bäş aýynyň makroykdysady görkezijileri barada hasabat berdi.

Bellenilişi ýaly, hasabat döwründe jemi içerki önümiň ösüşi 6,3 göterim artdy, şol sanda ösüş depgini senagat pudagynda 2,6 göterime, gurluşykda 6,4 göterime, ulag-aragatnaşyk pudagynda 10,2 göterime, söwdada 7,9 göterime, oba hojalygynda 1,3 göterime, hyzmatlar ulgamynda 8,4 göterime deň boldy. Geçen ýylyň degişli döwri bilen deňeşdirilende, şu ýylyň ýanwar — maý aýlarynda jemi öndürilen önüm 10,4 göterim artyp, ykdysadyýetiň pudaklarynda oňyn önümçilik netijeleri gazanyldy. Hasabat döwründe bölek satuw haryt dolanyşygy 10 göterim, daşary söwda dolanyşygy bolsa 8 göterim artdy. Şu ýylyň bäş aýynyň jemleri boýunça Döwlet býujetiniň girdeji böleginiň meýilnamasy 102,3 göterim, çykdajy böleginiň meýilnamasy 97,3 göterim ýerine ýetirildi.

Hasabat döwründe býujetden maliýeleşdirilýän we hojalyk hasaplaşygyndaky döwlet kärhanalarynda zähmet haklary, pensiýalar, döwlet kömek pullary, talyp haklary öz wagtynda maliýeleşdirildi. Maliýeleşdirmegiň ähli çeşmeleriniň hasabyna özleşdirilen düýpli maýa goýumlaryň möçberi, geçen ýylyň degişli döwri bilen deňeşdirilende, 5,1 göterim ýokarlandy. Şeýle hem Oba milli maksatnamasyny durmuşa geçirmegiň çäklerinde 2026-njy ýylyň ýanwar — maý aýlarynda ýerine ýetirilen işler, şol sanda dürli maksatly desgalaryň gurluşygy barada aýdyldy.

Hormatly Prezidentimiz hasabaty diňläp, ýurdumyzy durmuş-ykdysady taýdan ösdürmek, raýatlaryň ýaşaýyş-durmuş derejesini has-da ýokarlandyrmak, ykdysadyýet, maliýe we bank toplumynyň işini yzygiderli kämilleşdirmek boýunça alnyp barylýan işleri dowam etdirmegiň wajypdygyny belledi. Döwlet Baştutanymyz wise-premýere jemi içerki önümiň ösüş depginini ýylyň ahyryna çenli bellenen derejede saklamak üçin zerur çäreleri görmegi tabşyrdy.

Ministrler Kabinetiniň Başlygynyň orunbasary G.Agajanow ýurdumyzda nebitiň we gazyň çykarylyşyny artdyrmak, olary dünýä bazaryna çykarmagyň ugurlaryny köpeltmek boýunça 2026-njy ýylyň ýanwar — maý aýlarynda ýerine ýetirilen işleriň netijeleri barada hasabat berdi.

Bellenilişi ýaly, “Türkmennebit” döwlet konserni tarapyndan nebit çykarmagyň meýilnamasy 107,6 göterim, nebiti gaýtadan işleýän zawodlar tarapyndan nebiti gaýtadan işlemegiň meýilnamasy 104,6 göterim ýerine ýetirildi. Benzin öndürmegiň meýilnamasy 110 göterim, dizel ýangyjyny öndürmegiň meýilnamasy 110,4 göterim, çalgy ýaglaryny öndürmegiň meýilnamasy 124,1 göterim, suwuklandyrylan gazy öndürmegiň meýilnamasy 111,4 göterim berjaý edildi. Tebigy we ugurdaş gazy çykarmagyň meýilnamasy bolsa 106,6 göterim boldy.

Hormatly Prezidentimiz hasabaty diňläp, ýurdumyzda tebigy gazyň we nebitiň çykarylýan möçberini artdyrmak, topluma häzirki zaman tehnologiýalaryny giňden ornaşdyrmak boýunça işleri dowam etdirmegiň, önümçilikleri doly kuwwatyna çykaryp, bökdençsiz işledilmegini üns merkezinde saklamagyň möhümdigini aýtdy. Döwlet Baştutanymyz wise-premýere geologiýa-gözleg we buraw işleriniň netijeliligini has-da ýokarlandyrmagy tabşyrdy.

Ministrler Kabinetiniň Başlygynyň orunbasary T.Atahallyýew şu ýylyň ýanwar — maý aýlarynda ýerine ýetirilen işleriň netijeleri, ýurdumyzyň welaýatlarynda oba hojalyk işleriniň geçirilişi barada hasabat berdi.

Wise-premýer hormatly Prezidentimizi we Gahryman Arkadagymyzy oba hojalyk toplumynyň işgärleriniň adyndan Daşky gurşawy goramagyň bütindünýä güni bilen tüýs ýürekden gutlady hem-de Arkadagly Gahryman Serdarymyza, Milli Liderimize berk jan saglyk, uzak ömür, alyp barýan il-ýurt bähbitli işleriniň hemişe rowaç bolmagyny arzuw etdi.

Soňra wise-premýer hasabatyny dowam edip, oba hojalyk pudagy boýunça önümçiligiň ösüş depgininiň, geçen ýylyň degişli döwri bilen deňeşdirilende, 109,7 göterime deň bolandygyny aýtdy. Bu görkeziji Oba hojalyk ministrligi boýunça 105,4 göterime, Daşky gurşawy goramak ministrligi boýunça 100,6 göterime, Suw hojalygy baradaky döwlet komiteti boýunça 103,3 göterime, “Türkmenpagta” döwlet konserni boýunça 102,5 göterime, “Türkmengallaönümleri” döwlet birleşigi boýunça 120,1 göterime, “Türkmenobahyzmat” döwlet birleşigi boýunça 100,7 göterime, Azyk senagaty döwlet birleşigi boýunça 120 göterime, Maldarçylyk we guşçulyk senagaty döwlet birleşigi boýunça 101,6 göterime, “Türkmen atlary” döwlet birleşigi boýunça 107,5 göterime deň boldy. Maýa goýum serişdelerini özleşdirmegiň meýilnamasy 145,2 göterim ýerine ýetirildi.

Hormatly Prezidentimiziň ak pata bermegi hem-de oba hojalyk önümlerini öndürijilere edýän hemaýat-goldawy esasynda ýetişdirilen bugdaýyň bol hasylyny gysga wagtda ýygnap almak maksady bilen, Ahal, Lebap we Mary welaýatlarynda galla oragyna guramaçylykly girişildi. Balkan, Daşoguz welaýatlarynda galla oragyna 10-njy iýunda başlamak boýunça degişli taýýarlyk işleri geçirilýär. Häzirki wagtda gowaça ekilen meýdanlarda hatarara bejergi, ýekelemek, mineral dökünler bilen iýmitlendirmek, ösüş suwuny tutmak işleri alnyp barylýar. Şeýle hem ýetişdirilen ýazlyk ýeralmanyň, gök ekinleriň hasylyny ýygnap almak boýunça degişli işler dowam edýär.

Hormatly Prezidentimiz hasabaty diňläp, oba hojalyk pudagy boýunça önümçilik kuwwatyny doly peýdalanmagyň, ekinleriň hasyllylygyny ýokarlandyrmagyň pudagyň esasy wezipeleri bolup durýandygyny belledi. Şunuň bilen baglylykda, döwlet Baştutanymyz wise-premýere bu ugurda alnyp barylýan işleri netijeli dowam etdirmegi, ekin meýdanlarynda oba hojalyk işlerini öz wagtynda geçirmegi, galla oragy döwründe bugdaý hasylyny ýitgisiz ýygnap almak işlerine berk gözegçilik etmegi tabşyrdy.

Ministrler Kabinetiniň Başlygynyň orunbasary B.Annamämmedow gurluşyk we senagat toplumy tarapyndan 2026-njy ýylyň ýanwar — maý aýlarynda ýerine ýetirilen işleriň netijeleri barada hasabat berdi.

Nygtalyşy ýaly, hasabat döwründe toplum tarapyndan öndürilen önümleriň we ýerine ýetirilen işleriň meýilnamasy 130,1 göterim berjaý edildi. Gurluşyk we binagärlik ministrligi boýunça öndürilen önümleriň we işleriň meýilnamasy 106,3 göterim, Senagat we gurluşyk önümçiligi ministrligi boýunça 126,7 göterim, Energetika ministrligi boýunça 107,5 göterim ýerine ýetirildi. Awtomobil ýollary ministrligi tarapyndan ýerine ýetirilen işleriň meýilnamasy 110,6 göterim berjaý edildi. “Türkmenhimiýa” döwlet konserni boýunça bu görkeziji 152,7 göterime deň boldy. Aşgabat şäheriniň häkimligi boýunça işleriň meýilnamasyna 130,1 göterim amal edildi.

Hormatly Prezidentimiz hasabaty diňläp, gurluşyk we senagat toplumynyň kärhanalarynyň doly kuwwatynda işlemegini gazanmagyň, ýurdumyzyň sarp edijilerini, ilaty elektrik energiýasy bilen bökdençsiz üpjün etmek boýunça işleri dowam etdirmegiň, ýollaryň gurluşygyna we saklanyşyna gözegçiligi güýçlendirmegiň wajypdygyny aýtdy. Döwlet Baştutanymyz wise-premýere şu ýyl açylyp ulanmaga berilmegi göz öňünde tutulýan desgalaryň gurluşygynyň bellenen möhletlerde tamamlanmagyna berk gözegçilik etmegi tabşyrdy.

Ministrler Kabinetiniň Başlygynyň orunbasary N.Atagulyýew gözegçilik edýän ministrliklerinde we pudaklaýyn dolandyryş edaralarynda, telekeçilik ulgamynda şu ýylyň ýanwar — maý aýlarynda alnyp barlan işleriň netijeleri barada hasabat berdi.

Bellenilişi ýaly, Söwda we daşary ykdysady aragatnaşyklar ministrligi boýunça söwda dolanyşygynyň ösüş depgini, geçen ýylyň degişli döwri bilen deňeşdirilende, 109,6 göterime, öndürilen önümleriň ösüş depgini 100,8 göterime barabar boldy. Dokma senagaty ministrligi boýunça önüm öndürmekde, geçen ýylyň degişli döwri bilen deňeşdirilende, 106,3 göterim, şol sanda nah ýüplügiň önümçiliginde 102,7 göterim, nah matalaryň önümçiliginde 101,2 göterim, gön önümleriniň önümçiliginde 103,6 göterim ösüş depgini gazanyldy. “Türkmenhaly” döwlet birleşigi boýunça önüm öndürmegiň meýilnamasy 107 göterim ýerine ýetirildi.

Hasabat döwründe Döwlet haryt-çig mal biržasy tarapyndan 120 birža söwdasy geçirilip, olarda 12 müň 543 şertnama hasaba alyndy. 2026-njy ýylyň bäş aýynda Söwda-senagat edarasy boýunça ýerine ýetirilen işleriň ösüş depgini 109,1 göterime barabar boldy. Hasabat döwründe 11 sergi, 5 maslahat geçirildi. Senagatçylar we telekeçiler birleşmesi boýunça oba hojalyk we azyk önümlerini öndürmegiň ösüş depgini 107,2 göterime, senagat önümlerini öndürmegiň ösüş depgini 107,3 göterime deň boldy.

Döwlet Baştutanymyz hasabaty diňläp, ýurdumyzyň bazarlaryny, söwda nokatlaryny azyk we beýleki zerur harytlar bilen üpjün etmegi gözegçilikde saklamagyň, topluma degişli kärhanalaryň önümçiligini yzygiderli kämilleşdirmek boýunça işleri dowam etdirmegiň möhümdigine ünsi çekdi. Hormatly Prezidentimiz wise-premýere dokma önümleriniň möçberini, görnüşlerini artdyrmak we hilini ýokarlandyrmak boýunça alnyp barylýan işleri ilerletmegi tabşyrdy.

Ministrler Kabinetiniň Başlygynyň orunbasary B.Seýidowa gözegçilik edýän ulgamynda şu ýylyň bäş aýynda alnyp barlan işleriň netijeleri barada hasabat berdi.

Bellenilişi ýaly, hasabat döwründe 2026-njy ýylyň “Garaşsyz, baky Bitarap Türkmenistan — bedew batly at-myradyň mekany” ýyly diýlip yglan edilmegi, ýurdumyzyň Garaşsyzlygynyň 35 ýyllygy, milli senenamamyzda göz öňünde tutulan baýramçylyklar mynasybetli dürli medeni çäreler, dabaralar guraldy. Türkmenistanyň Konstitusiýasynyň we Döwlet baýdagynyň güni mynasybetli medeniýet we sungat ussatlarynyň baýramçylyk konserti, “Çalsana, bagşy!” bäsleşiginiň Arkadag we Aşgabat şäherleri, Ahal, Balkan welaýatlary boýunça jemleýji tapgyrlary, Gurban baýramy mynasybetli medeni çäreler geçirildi. TÜRKSOÝ-yň opera günleri ýokary derejede guraldy. Türkmen hünärmenleri daşary ýurtlaryň birnäçesinde iş saparlarynda bolup, halkara medeni çärelere, şol sanda festiwallara, okuw maslahatlaryna, sergilere we beýleki çärelere gatnaşdylar.

Gahryman Arkadagymyzyň, hormatly Prezidentimiziň tagallalary netijesinde ýurdumyzyň döredijilik işgärleri we köpçülikleýin habar beriş serişdeleriniň wekilleri Özbegistan Respublikasynyň Daşkent şäherinde “Gündogaryň merjeni” ady bilen geçirilen Aziýanyň açyk çempionatyna we onuň çäklerinde guralan “Ahalteke bedewi — halklaryň dostlugynyň nyşany” atly maslahata gatnaşdylar. “Galkynyş” milli at üstündäki oýunlar topary Stambul şäherinde geçirilen 8-nji Etnosport medeniýeti festiwalyna gatnaşyp, üstünlikli çykyş etdi. Şeýle hem şu ýylyň ýanwar — maý aýlarynda Türkmen döwlet neşirýat gullugy, Oguz han adyndaky «Türkmenfilm» birleşigi, köpçülikleýin habar beriş serişdeleri, kitaphanalar, muzeýler, teatrlar tarapyndan ýerine ýetirilen işler barada aýdyldy.

Hormatly Prezidentimiz hasabaty diňläp, şu ýylyň iýun aýynda meýilleşdirilen çärelere gowy taýýarlyk görmegiň we ýokary derejede geçirmegiň, medeniýet ulgamynyň işini yzygiderli kämilleşdirmek boýunça işleri dowam etdirmegiň möhümdigini nygtady. Döwlet Baştutanymyz wise-premýere ýaşlaryň arasynda taryhy ýadygärlikleri hemmetaraplaýyn wagyz etmek boýunça zerur işleri geçirip durmagy tabşyrdy.

Ministrler Kabinetiniň Başlygynyň orunbasary B.Mämmedow gözegçilik edýän ulgamlarynda şu ýylyň ýanwar — maý aýlarynda alnyp barlan işleriň netijeleri barada hasabat berdi.

Bellenilişi ýaly, hasabat döwründe bilim ulgamyny döwrebaplaşdyrmak boýunça işler dowam etdirildi. Bilim işinde okatmagyň öňdebaryjy usullary giňden ulanyldy. Okuwçylar we talyplar halkara ders, internet bäsleşiklerine gatnaşyp, jemi 871 medal gazandylar. Halkara olimpiadalar, ylmy-amaly maslahatlar geçirildi, çagalaryň tomus möwsüminde dynç alşy bilen bagly guramaçylyk işleri alnyp baryldy. Hasabat döwründe ýurdumyzyň ylmy kuwwatyny ösdürmäge gönükdirilen özgertmeler dowam etdirildi. Aspirantura, alymlyk derejelerine dalaşgärlige jemi 116 adam kabul edildi, doktorlyk, kandidatlyk dissertasiýalarynyň jemi 31-si goraldy.

2026-njy ýylyň bäş aýynda öňüni alyş-bejeriş işleriniň öňdebaryjy usullaryny amaly lukmançylyga ornaşdyrmak boýunça degişli işler alnyp baryldy. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň serişdeleriniň hasabyna näsag çagalara dürli görnüşli operasiýalar, bejergiler amala aşyryldy. “Türkmenistanda ylmy-lukmançylyk diplomatiýasyny ösdürmegiň 2026 — 2052-nji ýyllar üçin Milli strategiýasy”, “Türkmenistanda ýokanç däl keselleriň öňüni almak we garşysyna göreşmek boýunça 2026 — 2030-njy ýyllar üçin Milli strategiýa” tassyklanyldy. Hasabat döwründe bedenterbiýäni, sporty ösdürmek, ussat türgenleri taýýarlamak boýunça işler dowam etdirildi. Türgenlerimiz halkara ýaryşlarda ýokary netijeleri görkezip, jemi 301 medal gazandylar.

Hormatly Prezidentimiz hasabaty diňläp, ylym, bilim, saglygy goraýyş we sport ulgamlarynyň işini talabalaýyk ýola goýmagyň möhümdigini aýtdy. Şunuň bilen baglylykda, döwlet Baştutanymyz wise-premýere zehinli ýaşlary ylma, bilime, täze tehnologiýalara höweslendirmek, saglygy goraýyş edaralarynyň işini yzygiderli kämilleşdirmek, ýaşlary sporta giňden çekmek boýunça alnyp barylýan işleri dowam etdirmegi tabşyrdy.

Soňra Ministrler Kabinetiniň Başlygynyň orunbasary, daşary işler ministri R.Meredow şu ýylyň bäş aýynda Daşary işler ministrligi tarapyndan ýerine ýetirilen işleriň netijeleri barada hasabat berdi.

Bellenilişi ýaly, hormatly Prezidentimiziň alyp barýan daşary syýasatyny durmuşa geçirmek, Bitarap Türkmenistanyň daşary ýurtlar we halkara guramalar bilen ikitaraplaýyn, köptaraplaýyn gatnaşyklaryny ösdürmek babatda öňde goýlan wezipeleri ýerine ýetirmek maksady bilen, Daşary işler ministrligi tarapyndan hasabat döwründe degişli işler amala aşyryldy. Mälim bolşy ýaly, ýurdumyzyň halkara hyzmatdaşlygyny ösdürmekde ýokary derejedäki saparlar we duşuşyklar möhüm orny eýeleýär. Şunuň bilen baglylykda, türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň şu ýylyň 16 — 19-njy fewralynda Amerikanyň Birleşen Ştatlaryna, 18-19-njy martynda Hytaý Halk Respublikasyna, 8-9-njy aprelinde Awstriýa Respublikasyna, 13-14-nji maýynda Russiýa Federasiýasynyň Tatarystan Respublikasyna, 16-17-nji maýynda Beýik Britaniýanyň we Demirgazyk Irlandiýanyň Birleşen Patyşalygyna saparlary guraldy. Hormatly Prezidentimiz şu ýylyň 21-22-nji aprelinde Sebitleýin ekologiýa sammitine we Araly halas etmegiň halkara gaznasyny esaslandyryjy döwletleriň Baştutanlarynyň Geňeşiniň nobatdaky mejlisine gatnaşmak üçin Gazagystan Respublikasyna iş saparyny amala aşyrdy.

Abraýly halkara guramalar bilen hyzmatdaşlygy ösdürmek ýurdumyzyň daşary syýasat strategiýasynyň wajyp ugurlarynyň biri bolup durýar. Şunuň bilen baglylykda, Gahryman Arkadagymyzyň Awstriýa Respublikasyna saparynyň çäklerinde Atom energiýasy boýunça halkara agentligiň Baş direktory, BMG-niň Senagat ösüşi boýunça guramasynyň Baş direktory, BMG-niň Baş sekretarynyň orunbasary bilen duşuşyklary geçirildi. Mundan başga-da, şu ýylyň 21 — 23-nji ýanwarynda BMG-niň Azyk we oba hojalyk guramasynyň Baş direktory, 17 — 19-njy martynda bolsa Aziýada özara hyzmatdaşlyk we ynamy berkitmek çäreleri boýunça Geňeşiň Baş sekretary ýurdumyzda saparda boldular. Türkmenistanyň 2026-njy ýylda GDA-da başlyklyk etmeginiň çäklerinde dürli geňeşleriň, komissiýalaryň mejlisleri, beýleki duşuşyklar, çäreler geçirilýär. Şunuň bilen baglylykda, 22-nji maýda paýtagtymyzda Garaşsyz Döwletleriň Arkalaşygynyň Hökümet Baştutanlarynyň Geňeşiniň mejlisi geçirildi. Mejlise gatnaşmak üçin Arkalaşygyň döwletleriniň Hökümet ýolbaşçylary ýurdumyza sapar bilen geldiler.

Hasabat döwründe Daşary işler ministrliginiň üsti bilen jemi 293 wekiliýet döwletimize sapar bilen geldi we Türkmenistandan daşary ýurtlara 528 wekiliýet gitdi. Şu ýylyň ýanwar — maý aýlarynda sanly ulgam arkaly dürli derejedäki duşuşyklaryň 216-sy geçirildi. Hasabat döwründe Türkmenistanda daşary ýurtlar we halkara guramalar bilen bilelikde resmi gepleşiklerdir duşuşyklaryň 909-sy guraldy. Döwletimiziň halkara gatnaşyklarynyň şertnama-hukuk binýadynyň üsti halkara resminamalaryň 60-sy bilen ýetirildi.

Daşary işler ministrligi bilen beýleki döwletleriň daşary syýasat edaralarynyň arasynda syýasy geňeşmeleri geçirmek boýunça işler hem amala aşyrylýar. Bu babatda hasabat döwründe Türkmenistanyň daşary syýasat edarasynyň ýolbaşçysynyň Awstriýa Respublikasynyň, Birleşen Arap Emirlikleriniň, Beýik Britaniýanyň we Demirgazyk Irlandiýanyň Birleşen Patyşalygynyň, Hytaý Halk Respublikasynyň daşary işler ministrleri, Amerikanyň Birleşen Ştatlarynyň Döwlet sekretary bilen syýasy geňeşmeleri geçirildi. Bulardan başga-da, hasabat döwründe BMG-niň Baş sekretary, BMG-niň Baş Assambleýasynyň 80-nji sessiýasynyň Başlygy, Ýewropanyň täzeleniş we ösüş bankynyň prezidenti, Halkara Deňiz Guramasynyň Baş sekretary, Ýadro synaglaryny ählumumy gadagan etmek barada şertnama guramasynyň Ýerine ýetiriji sekretary bilen gepleşikler geçirildi.

2026-njy ýylyň ýanwar — maý aýlarynda Hindistan Respublikasynyň, Marokko Patyşalygynyň, Russiýa Federasiýasynyň, Germaniýa Federatiw Respublikasynyň, Zimbabwe Respublikasynyň, Azerbaýjan Respublikasynyň, Uganda Respublikasynyň, Koreýa Respublikasynyň, Ermenistan Respublikasynyň, Belarus Respublikasynyň we Kamboja Patyşalygynyň daşary syýasat edaralary bilen geňeşmeler guraldy.

Daşary döwletleriň ilçihanalarynyň üsti bilen diplomatik gatnaşyklary ösdürmek Bitarap Türkmenistanyň daşary syýasy işiniň wajyp ugurlarynyň biridir. Ýakyn Gündogar ýurtlary bilen gatnaşyklary ilerletmek babatdaky işler hem dowam edýär. Şunuň bilen baglylykda, hasabat döwründe ýurdumyzda Yrak Respublikasynyň diplomatik wekilhanasynyň açylandygy we öz işine başlandygy bellenildi. Hasabat döwründe Çad Respublikasynyň, Indoneziýa Respublikasynyň, Italiýa Respublikasynyň, Koreýa Respublikasynyň, Argentina Respublikasynyň, Müsür Arap Respublikasynyň Türkmenistanda täze bellenilen Adatdan daşary we Doly ygtyýarly ilçileri ynanç hatlaryny gowşurdylar. Türkmenistanyň Tailand Patyşalygyndaky, Amerikanyň Birleşen Ştatlaryndaky ilçileri, BMG-niň, Yslam Hyzmatdaşlyk Guramasynyň ýanyndaky hemişelik wekilleri ynanç hatlaryny gowşuryp, resmi taýdan işe başladylar.

Hormatly Prezidentimiz hasabaty diňläp, Bitarap Türkmenistanyň ählumumy abadançylyga gönükdirilen daşary syýasaty alyp barýandygyny aýtdy. Şunuň bilen baglylykda, döwlet Baştutanymyz wise-premýer, daşary işler ministrine dünýä ýurtlary bilen söwda-ykdysady, medeni-ynsanperwer, ylym-bilim ulgamlaryndaky gatnaşyklary ösdürmek boýunça alnyp barylýan işleri dowam etdirmegi, abraýly halkara we sebit guramalary bilen netijeli gatnaşyklary yzygiderli ösdürmegi tabşyrdy.

Ministrler Kabinetiniň Başlygynyň orunbasary B.Annaýew gözegçilik edýän düzümlerinde 2026-njy ýylyň ýanwar — maý aýlarynda ýerine ýetirilen işleriň netijeleri barada hasabat berdi.

Bellenilişi ýaly, ulag-kommunikasiýa toplumy boýunça ýerine ýetirilen işleriň we hyzmatlaryň ösüş depgini 114,2 göterime deň boldy. Awtomobil, demir ýol, howa, deňiz we derýa ulaglary arkaly ýük daşamagyň ösüş depgini, geçen ýylyň degişli döwri bilen deňeşdirilende, 101,5 göterime, ýolagçy gatnatmagyň ösüş depgini bolsa 103 göterime barabar boldy. Hasabat döwründe Demir ýol ulaglary ministrligi boýunça ýerine ýetirilen hyzmatlaryň ösüş depgini 106,8 göterime, Awtomobil ulaglary ministrligi boýunça hyzmatlaryň ösüş depgini 122,7 göterime, “Türkmenhowaýollary” döwlet gullugy boýunça hyzmatlaryň ösüş depgini 117,4 göterime, Deňiz we derýa ulaglary döwlet gullugy boýunça bu görkeziji 104,9 göterime, Aragatnaşyk ministrligi boýunça bolsa 115,3 göterime barabar boldy.

Hormatly Prezidentimiz hasabaty diňläp, ulag we aragatnaşyk toplumynyň öňünde goýlan wezipeleri doly ýerine ýetirmek üçin toplumyň işini yzygiderli kämilleşdirmegiň zerurdygyny nygtady. Döwlet Baştutanymyz wise-premýere ýurdumyzyň üstaşyr ulag mümkinçiliklerinden netijeli peýdalanyp, halkara ýükleriň daşalýan möçberini artdyrmagy, toplumyň maddy-tehniki üpjünçiligini döwrebaplaşdyrmaga aýratyn üns bermegi tabşyrdy.

Soňra hormatly Prezidentimiz Ministrler Kabinetiniň agzalaryna ýüzlenip, ýurdumyzy ösdürmäge gönükdirilen maksatnamalaryň üstünlikli durmuşa geçirilýändigini, ykdysadyýetimiziň ähli pudaklarynda özgertmeleriň netijeli alnyp barylýandygyny, önümçilik pudaklarynyň yzygiderli döwrebaplaşdyrylýandygyny aýtdy. Döwlet Baştutanymyz hasabat döwründe jemi içerki önümiň ösüşiniň 6,3 göterim derejede durnukly saklanyp gelýändigini kanagatlanma bilen belledi. Şeýle hem ýurdumyzda iri senagat desgalarynyň, täze şäherçeleriň, ýaşaýyş jaýlarynyň, mekdepleriň, çagalar baglarynyň, beýleki desgalaryň gurluşygynyň dowam edýändigi nygtaldy. Hormatly Prezidentimiz kabul edilen döwlet maksatnamalaryna laýyklykda, ykdysadyýetimiziň pudaklaryny mundan beýläk-de ösdürmegi dowam etdirmegiň, bu işleriň ýerine ýetirilişini hemişe gözegçilikde saklamagyň wajypdygyna ünsi çekdi.

Mejlisde döwlet durmuşyna degişli başga-da birnäçe möhüm meselelere seredildi we olar boýunça degişli çözgütler kabul edildi.

Hormatly Prezidentimiz Serdar Berdimuhamedow Ministrler Kabinetiniň sanly ulgam arkaly geçirilen mejlisini jemläp, oňa gatnaşanlara berk jan saglyk, maşgala abadançylygyny, berkarar Watanymyzyň gülläp ösmegi ugrunda alyp barýan işlerinde uly üstünlikleri arzuw etdi.

Aşgabat, 4-nji iýun (TDH). Şu gün Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Serdar Berdimuhamedow Döwlet howpsuzlyk geňeşiniň nobatdaky mejlisini geçirdi. Mejlisde harby we hukuk goraýjy edaralar tarapyndan şu ýylyň bäş aýynda alnyp barlan işleriň netijelerine seredildi. Şeýle hem Garaşsyz döwletimizde howpsuzlygy, asudalygy üpjün etmäge, harby we hukuk goraýjy edaralaryň maddy-enjamlaýyn binýadyny berkitmäge, olaryň işini has-da kämilleşdirmäge degişli meseleleriň birnäçesi ara alnyp maslahatlaşyldy.

Ilki bilen, Döwlet howpsuzlyk geňeşiniň sekretary, goranmak ministri B.Gündogdyýew çykyş edip, şu ýylyň ýanwar — maý aýlarynda ýurdumyzyň Ýaragly Güýçlerini ösdürmegiň maksatnamasynda göz öňünde tutulan wezipeleri üstünlikli ýerine ýetirmek maksady bilen alnyp barlan işler, harby gullukçylaryň ýaşaýyş-durmuş şertlerini has-da gowulandyrmak, ýolbaşçylyk edýän düzümlerinde öňdebaryjy tehnologiýalary ornaşdyrmak babatda görlen çäreler barada hasabat berdi. Hasabatda çagyryş boýunça harby gullugy geçýän harby gullukçylary gullukdan boşatmagyň we harby gulluga nobatdaky çagyrylyşyň guramaçylykly dowam edýändigi barada-da aýdyldy.

Hormatly Prezidentimiz hasabaty diňläp, Ýaragly Güýçlerimiziň goranyş kuwwatyny has-da berkitmek, harby gullukçylaryň taýýarlyk derejesini kämilleşdirmek boýunça işleri mundan beýläk-de dowam etdirmegiň möhümdigini belledi hem-de Milli goşunyň ähli bölümlerinde harby düzgün-nyzamyň berjaý edilişini, ýaş esgerleri watançylyk ruhunda terbiýelemek, harby gullukçylaryň netijeli gullugy üçin şertleri döretmek, ýaşaýyş-durmuş üpjünçiligini gowulandyrmak işlerini hemişe üns merkezinde saklamagy tabşyrdy.

Baş prokuror B.Muhamedow ýolbaşçylyk edýän düzümleri tarapyndan hasabat döwründe kadalaşdyryjy hukuk namalarynyň berjaý edilişine geçirilen prokuror gözegçiliginiň netijeleri, prokuratura edaralarynyň işgärleriniň hünär derejesini ýokarlandyrmak boýunça görülýän çäreler barada hasabat berdi.

Ýurdumyzyň Ýaragly Güýçleriniň Belent Serkerdebaşysy hasabaty diňläp, döwletimizde kanunlaryň ýerine ýetirilmegi boýunça prokuratura edaralarynyň alyp barýan işlerini mundan beýläk-de netijeli dowam etdirmegiň, hukuk düzgün-tertibini berkitmäge, düzgün bozulmalaryň öňüni almaga aýratyn üns bermegiň zerur talap bolup durýandygyny belledi we bu babatda birnäçe tabşyryklary berdi.

Içeri işler ministri M.Hydyrow şu ýylyň ýanwar — maý aýlarynda ýolbaşçylyk edýän düzümlerinde alnyp barlan işler, hususan-da, ýol hereketiniň we ýangyn howpsuzlygynyň kadalarynyň berjaý edilmegi, hukuk bozulmalarynyň öňüni almak boýunça görlen çäreler, içeri işler edaralarynyň işgärleriniň ýaşaýyş-durmuş şertlerini has-da gowulandyrmak, ministrligiň maddy-enjamlaýyn binýadyny pugtalandyrmak maksady bilen açylyp ulanmaga berlen desgalar barada hasabat berdi.

Hormatly Prezidentimiz hasabaty diňläp, ýurdumyzda jemgyýetçilik tertibini goramak we hukuk bozulmalarynyň öňüni almak boýunça işleri netijeli dowam etdirmegiň, ýol hereketiniň we ýangyn howpsuzlygynyň düzgünleriniň berjaý edilişine berk gözegçilik etmegiň möhümdigini belledi hem-de ministre birnäçe anyk görkezmeleri berdi.

Ýokary kazyýetiň başlygy B.Hojamgulyýew şu ýylyň bäş aýynda ýolbaşçylyk edýän düzümi tarapyndan alnyp barlan işleriň netijeleri hem-de milli kazyýet ulgamyna öňdebaryjy tejribäni ornaşdyrmak babatda ýerine ýetirilen işler barada hasabat berdi.

Döwlet Baştutanymyz hasabaty diňläp, milli kanunçylygymyza laýyklykda, döwletiň we jemgyýetiň bähbitlerini, raýatlaryň hukuklaryny üpjün etmek, kazyýet işgärleriniň iş tejribesini kämilleşdirmek boýunça alnyp barylýan işleri dowam etdirmek babatda tabşyryklary berdi. Ýurdumyzyň Ýaragly Güýçleriniň Belent Serkerdebaşysy mejlisiň dowamynda Türkmenistanyň kazyýetleriniň kazylaryny wezipä bellemek we wezipeden boşatmak hem-de olara hünär derejelerini bermek hakynda degişli resminama gol çekdi.

Milli howpsuzlyk ministri D.Meredow hasabat döwründe ýerine ýetirilen işler, şol sanda ýurdumyzda abadançylygy üpjün etmek, bu düzüme sanly ulgamy ornaşdyrmak boýunça alnyp barlan işler barada hasabat berdi.

Hormatly Prezidentimiz hasabaty diňläp, döwletimiziň howpsuzlygyny üpjün etmäge gönükdirilen işleri mundan beýläk hem netijeli dowam etdirmegiň möhüm ähmiýetini belledi we ministre birnäçe anyk tabşyryklary berdi.

Döwlet serhet gullugynyň başlygy I.Ilamanow şu ýylyň ýanwar — maý aýlarynda ýurdumyzyň mukaddes serhetleriniň ygtybarly goralmagyny üpjün etmek, serhet birikmeleriniň maddy-enjamlaýyn binýadyny döwrebaplaşdyrmak, harby gullukçylaryň ýaşaýyş-durmuş şertlerini has-da ýokarlandyrmak boýunça alnyp barlan işler barada hasabat berdi.

Türkmenistanyň Ýaragly Güýçleriniň Belent Serkerdebaşysy hasabaty diňläp, ýurdumyzyň döwlet serhediniň dost-doganlyk serhedi bolup durýandygyny nygtady hem-de serhet goşunlarynyň işini kämilleşdirmek we maddy-enjamlaýyn binýadyny pugtalandyrmak, serhetçileriň iş, ýaşaýyş-durmuş üpjünçiligini gowulandyrmak boýunça işleri gözegçilikde saklamagy tabşyrdy.

Adalat ministri M.Taganow 2026-njy ýylyň bäş aýynda milli kanunçylyk binýadyny häzirki döwrüň talaplaryna laýyk getirmek boýunça alnyp barlan işler, ministrligi ösdürmegiň maksatnamasynyň ýerine ýetirilişi barada hasabat berdi.

Döwlet Baştutanymyz hasabaty diňläp, milli kanunçylygymyzy halkara hukugyň umumy ykrar edilen kadalaryna, demokratik, hukuk we dünýewi döwletimiziň wezipelerine laýyklykda kämilleşdirmek boýunça alnyp barylýan işleri dowam etdirmegi tabşyrdy.

Döwlet gümrük gullugynyň başlygy M.Hudaýkulyýew hasabat döwründe ýerine ýetirilen işleriň netijeleri, şol sanda bu düzüme işiň döwrebap usullaryny, iň täze tehnologiýalary ornaşdyrmak boýunça görlen çäreler, ýurdumyzyň Ýaragly Güýçleriniň Belent Serkerdebaşysynyň ozal beren tabşyryklarynyň ýerine ýetirilişi barada hasabat berdi.

Hormatly Prezidentimiz hasabaty diňläp, gümrük nokatlarynda gümrük düzgünleriniň berjaý edilişine gözegçilik etmegiň möhüm talap bolup durýandygyny belledi hem-de gümrük nokatlaryndaky gözegçiligi has-da kämilleşdirmek boýunça alnyp barylýan işleri dowam etdirmek babatda birnäçe anyk tabşyryklary berdi.

Döwlet migrasiýa gullugynyň başlygy A.Sazakow ýolbaşçylyk edýän düzümi tarapyndan ýylyň başyndan bäri alnyp barlan işleriň netijeleri, hususan-da, ýurdumyzda migrasiýa işini kämilleşdirmek, gullugyň maddy-enjamlaýyn binýadyny pugtalandyrmak babatda ýerine ýetirilen işler barada hasabat berdi.

Hormatly Prezidentimiz hasabaty diňläp, migrasiýa işini döwrebap usullar esasynda yzygiderli kämilleşdirmegiň, ýokary hilli migrasiýa hyzmatlaryny üpjün etmegiň möhüm ähmiýetini belledi hem-de bu babatda gullugyň ýolbaşçysyna birnäçe anyk tabşyryklary berdi.

Döwlet Baştutanymyz mejlise gatnaşyjylara ýüzlenip, Türkmenistanyň goranyş häsiýetine eýe bolan Harby doktrinasynyň talaplaryna laýyklykda, Garaşsyz, hemişelik Bitarap döwletimiziň howpsuzlygyny we çäk bitewüligini ýokary derejede üpjün etmek, ýurdumyzyň goranmak ukybyny berkitmek, Watan goragçylarynyň we olaryň maşgala agzalarynyň ýaşaýyş-durmuş şertlerini has-da ýokarlandyrmak boýunça çäreleriň yzygiderli durmuşa geçirilýändigini aýtdy. Ýurdumyzyň Ýaragly Güýçleriniň Belent Serkerdebaşysy bu işleriň mundan beýläk-de dowam etjekdigini belledi.

Döwlet howpsuzlyk geňeşiniň mejlisinde başga-da birnäçe meselelere garaldy we olar boýunça degişli çözgütler kabul edildi.

Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Serdar Berdimuhamedow mejlisi jemläp, oňa gatnaşanlara berk jan saglyk, halkymyzyň asuda hem-de bagtyýar durmuşda ýaşamagy ugrunda alyp barýan jogapkärli gulluklarynda uly üstünlikleri arzuw etdi.

Türkmenistanyň Prezidenti Serdar Berdimuhamedow köpçülikleýin welosipedli ýörişe gatnaşdy

Aşgabat, 3-nji iýun (TDH). Şu gün ýurdumyzda Bütindünýä welosiped güni bellenildi. Bu halkara sene mynasybetli paýtagtymyzda geçirilen köpçülikleýin welosipedli ýörişe hormatly Prezidentimiziň gatnaşmagy onuň many-mazmunyny has-da artdyrdy. Geçirilmegi indi asylly däbe öwrülen bu giň gerimli sport çäresi ilatyň beden we ruhy taýdan sagdynlygyny pugtalandyrmaga ýardam bermek bilen bir hatarda, ýaşlaryň arasynda sagdyn durmuş ýörelgesini wagyz etmekde, sport medeniýetini ösdürmekde hem möhüm ähmiýete eýedir.

Berkarar döwletiň täze eýýamynyň Galkynyşy döwründe Gahryman Arkadagymyzyň ýurdumyzyň bedenterbiýe we sport ulgamyny ösdürmek boýunça başyny başlan özgertmeleri häzirki wagtda hormatly Prezidentimiziň baştutanlygynda üstünlikli dowam etdirilýär. Munuň aýdyň mysaly hökmünde soňky ýyllarda paýtagtymyzda hem-de welaýatlarda yzygiderli gurlup ulanmaga berilýän häzirki zaman sport-sagaldyş toplumlaryny, ýurdumyzyň türgenleriniň halkara ýaryşlarda gazanýan üstünliklerini görkezmek bolar.

Bütindünýä welosiped güni welosportuň giňden wagyz edilmegine ýardam bermek bilen çäklenmän, eýsem, Türkmenistanyň sportuň bu görnüşini ösdürmek boýunça halkara başlangyçlarynyň üstünlikli durmuşa geçirilýändigini-de görkezýär. Şunuň bilen baglylykda, ýurdumyzyň başlangyjy esasynda 3-nji iýunyň «Bütindünýä welosiped güni» diýlip yglan edilmeginiň, Birleşen Milletler Guramasynyň Baş Assambleýasynyň 76-njy sessiýasynyň 61-nji plenar mejlisinde «Durnukly ösüşi gazanmak üçin köpçülikleýin welosiped sürmegi jemgyýetçilik ulag ulgamlaryna girizmek» atly Kararnamanyň biragyzdan kabul edilmeginiň ähmiýetini bellemek gerek.

...«Garaşsyz, baky Bitarap Türkmenistan — bedew batly at-myradyň mekany» ýylynyň şu ajaýyp gününde welosipedli ýöriş paýtagtymyzyň Çandybil şaýoly bilen Bekrewe köçesiniň çatrygynda ýerleşýän “Welosiped” binasynyň ýanyndan badalga aldy. Bu ýere Mejlisiň Başlygy, Hökümet agzalary, harby we hukuk goraýjy edaralaryň, ministrlikleriň, pudaklaýyn dolandyryş edaralarynyň, şäher häkimliginiň, jemgyýetçilik guramalarynyň, ýokary okuw mekdepleriniň, köpçülikleýin habar beriş serişdeleriniň ýolbaşçylary ýygnandylar. Ýörişe daşary döwletleriň we halkara guramalaryň ýurdumyzdaky diplomatik wekilhanalarynyň ýolbaşçylarydyr wekilleri hem gatnaşýarlar. Bu ýere ýygnananlaryň hatarynda Döwletliler köşgünde terbiýelenýänler, Ýaş olimpiýaçylary taýýarlaýyş mekdebiniň, umumybilim berýän orta mekdepleriň okuwçylary, Türkmenistanyň welosport boýunça ýygyndy toparynyň türgenleri, talyplar, jemgyýetçilik wekilleri-de bar.

Hemmeler uly ruhubelentlik bilen hormatly Prezidentimiz Serdar Berdimuhamedowy mübäreklediler. Soňra medeniýet we sungat işgärleriniň ýerine ýetirmeginde sagdyn durmuş ýörelgesini, ýurdumyzyň ösüşlerini wasp edýän aýdym-sazly çykyşlar ýaýbaňlandyryldy. Çykyşlar tamamlanandan soňra, Arkadagly Gahryman Serdarymyz köpçülikleýin welosipedli ýörişe badalga berdi.

Döwlet Baştutanymyzyň göreldesine eýerip, bu asylly çärä gatnaşyjylar paýtagtymyzyň Çandybil we Bitarap Türkmenistan şaýollarynyň ugry bilen ýola düşdüler.

Hormatly Prezidentimiziň belleýşi ýaly, Bütindünýä welosiped güni dostlugyň we parahatçylygyň, sportuň hem-de ynsanperwerligiň belent ýörelgelerini dabaralandyrýan, jemgyýetimiziň agzybirligini, jebisligini alamatlandyrýan şanly sene hökmünde milli senenamamyzda aýratyn orun eýeleýär. Şonuň üçin-de eziz Diýarymyzda bu halkara baýram ýokary ruhubelentlikde giňden bellenilýär. Bütindünýä welosiped gününiň şanyna köpçülikleýin bedenterbiýe-sport we sagdyn durmuş, medeni çäreleriň geçirilmegi sagdynlygyň hem-de ruhubelentligiň ýurdy hökmünde Garaşsyz döwletimiziň abraýyny has-da belende göterýär.

Mälim bolşy ýaly, welosipedli ýörişler durmuş-ekologik taslamalary goldamak, jemgyýetde sagdyn durmuş ýörelgesini dabaralandyrmak maksady bilen amala aşyrylýan giň gerimli çäreleriň biridir. Ýurdumyzda hem bu asylly ýörelge mynasyp dowam etdirilip, köpçülikleýin sport çäreleri döwlet derejesindäki möhüm wezipeleriň hatarynda durýar. Şunuň bilen baglylykda, welosipedli ýörişleriň yzygiderli guralmagy adamlarda sporta höwesi artdyrmaga, sagdyn durmuş ýörelgesini köpçülikleýin derejede dabaralandyrmaga şert döredýär. Sportuň bu görnüşi dürli ýaşdaky adamlaryň saglygyny berkitmek, jemgyýetçilik gatnaşyklaryny işjeňleşdirmek üçin iň elýeterli hem-de netijeli ugurlaryň biri hasaplanýar. Welosport bilen yzygiderli meşgullanmak raýatlaryň gündelik durmuş işjeňligini artdyrmaga, olaryň medeni taýdan dynç almagyny üpjün etmäge ýardam berýär. Ýaş nesilleriň bedenterbiýe we sport bilen meşgullanmagy olaryň geljekde ruhy taýdan kämil şahsyýetler bolup ýetişmeginde uly ähmiýete eýedir. Çagalardyr ýaşlaryň köpçülikleýin sport hereketine işjeň gatnaşmaklary olaryň sagdyn ösüşine oňyn täsirini ýetirýär hem-de durmuşa kadaly uýgunlaşmagyna itergi berýär.

Ýurdumyzda çagalaryň saglygyny berkitmek meselelerine aýratyn ähmiýet berilýändigini nygtamak gerek. Hususan-da, döwlet goldawyna mätäç ýaşajyk raýatlarymyz uly üns-alada bilen gurşalýar. Gahryman Arkadagymyzyň başlangyjy bilen döredilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bu ugurda durmuşa geçirýän giň gerimli işleri munuň aýdyň mysalydyr. Ýakynda Bütindünýä welosiped güni mynasybetli Gökderedäki “Çynar” çagalar dynç alyş merkezinde dynç alýan Döwletliler köşgüniň ýaşlaryna Milli Liderimiziň we haýyr-sahawat gaznasynyň adyndan welosipedler gowşuryldy. Munuň özi olaryň köpçülikleýin bedenterbiýe-sagaldyş, sport hereketine işjeň gatnaşmagyna giň ýol açyp, ýurdumyzda ýaş nesilleriň sagdyn bedenli, gujur-gaýratly kämil şahsyýetler bolup ýetişmekleri ugrunda döwlet derejesinde alada edilýändiginiň nobatdaky beýany boldy. Şu gün Döwletliler köşgünde terbiýelenýän şol ýaşlar hem Gahryman Arkadagymyzyň adyndan sowgat berlen welosipedlerde, hormatly Prezidentimiziň göreldesine eýerip, welosipedli ýörişe uly ruhubelentlik bilen gatnaşdylar.

Tutuş adamzadyň howanyň üýtgemegi ýaly ählumumy mesele bilen ýüzbe-ýüz bolýan döwründe ulagyň ekologik taýdan arassa görnüşlerine geçmek möhüm wezipeleriň biridir. Welosiped bolsa ulagyň iň netijeli görnüşleriniň biri bolup, birnäçe artykmaçlyklara eýedir. Welosiped diňe bir ulag serişdesi bolman, eýsem, durnukly we ekologik taýdan arassa durmuş ýörelgesiniň nyşanydyr. Onuň yzygiderli ulanylmagy daşky gurşawa ýetirilýän zyýany azaltmaga mümkinçilik berýär. Ählumumy ekologik wehimler bilen baglylykda, ulag serişdesi hökmünde welosipede geçilmegi hemmeler üçin sagdyn geljegi döretmegiň ýolunda wajyp ädim bolup durýar. Şeýle köpçülikleýin çäreler ekologik meselelere ünsi çekip, adamlary ulagyň bu peýdaly görnüşini saýlap almaga ruhlandyrýar.

Türkmenistan ekologik abadançylyga durnukly ösüşiň aýrylmaz şerti hökmünde garaýar. Ýurdumyz halkara giňişlikde ekologiýa diplomatiýasyny we durnukly ösüşi üpjün etmek barada ähmiýetli başlangyçlary yzygiderli öňe sürüp, olary iş ýüzünde durmuşa geçirýän döwlet hökmünde tanalýar. Türkmenistanyň sebit hem-de dünýä derejesinde durnukly ekologik gurşawy kemala getirmäge gönükdirilen başlangyçlary halkara jemgyýetçilik tarapyndan giňden goldanylyp, milli, sebit, halkara derejede ekologiýa hem-de howa wezipelerini çözmäge goşant goşýar. Şeýle hem ýurdumyz daşky gurşawy goramak boýunça halkara konwensiýalara, şertnamalara we ylalaşyklara goşulmak bilen, bilelikdäki tagallalara ygrarlydygyny iş ýüzünde tassyklaýar.

...Bellenilen ugra görä, welosipedçileriň kerweni öz ýoluny paýtagtymyzyň giň şaýollary bilen dowam etdi. Köpetdagyň dag etekleriniň gözel görnüşleri, paýtagtymyzyň ajaýyp binagärlik keşbi ýörişe gatnaşýanlaryň ruhuny belende göterýär.

Aziýanyň merjen şäheri bolan Aşgabatda amala aşyrylýan ägirt uly gurluşyklar Gahryman Arkadagymyzyň başyny başlan we häzirki döwürde hormatly Prezidentimiziň baştutanlygynda üstünlikli durmuşa geçirilýän, halkymyzyň bagtyýar durmuşyny üpjün etmäge gönükdirilen durmuş ugurly döwlet syýasatynyň aýdyň netijesidir. Türkmenistanyň paýtagty Aşgabat häzirki zaman, okgunly ösýän şäheriň — geljegiň şäheriniň täsin nusgasyny özünde jemleýär. Onda gözellik, oňaýlylyk, binagärligiň öňdebaryjy gazananlary, inženerçilik-tehniki gazanylanlar, milli binagärligiň gadymdan gelýän däpleri sazlaşykly utgaşýar.

Gahryman Arkadagymyzyň başlangyjy esasynda işlenip taýýarlanylan «Saglyk» Döwlet maksatnamasynyň hormatly Prezidentimiziň baştutanlygynda üstünlikli durmuşa geçirilmegi bilen, milli saglygy goraýyş ulgamynyň işi yzygiderli kämilleşdirilýär. Şunda ilatyň saglygyny goramak, adamlaryň ömür dowamlylygyny uzaltmak, jemgyýetiň hemmetaraplaýyn ösmegini üpjün etmek esasy wezipe hökmünde kesgitlenendir. Halkyň saglygy diňe bir ýurduň baş baýlygy bolmak bilen çäklenmän, eýsem, häzirki we geljek nesilleriň röwşen geljeginiň hem berk binýadydyr.

Türkmenistanyň Milli Olimpiýa komitetiniň Prezidenti, döwlet Baştutanymyz Serdar Berdimuhamedow ýurdumyzda Olimpiýa hereketiniň ösdürilmegine möhüm ähmiýet berýär. Türkmenistanyň daşary syýasatynyň esasy ugurlarynyň biri bolan sport diplomatiýasy ýurtlaryň we halklaryň arasynda parahatçylyk söýüjilikli, dost-doganlyk gatnaşyklaryny pugtalandyrmagy maksat edinýär. Şunuň bilen baglylykda, Türkmenistanyň başlangyjy esasynda ýola goýlan welosport hereketi sebitde we halkara derejede ynsanperwer gatnaşyklary berkitmegiň özboluşly serişdesi hökmünde çykyş edýär. Ýurdumyzyň bu ugurdaky başlangyçlary dünýä jemgyýetçiligi tarapyndan giňden goldanylyp, döwletara gatnaşyklarda medeni diplomatiýanyň ösdürilmegine hem goşant goşýar.

...Hormatly Prezidentimiz welosipedli ýörişi tamamlap, paýtagtymyzdaky Ruhyýet köşgüniň ýanyndaky pellehana bardy. Bu ýerde welosipedli ýörişe gatnaşyjylar ýurdumyzyň başlangyjy bilen BMG-niň Baş Assambleýasy tarapyndan her ýylyň 3-nji iýunyny «Bütindünýä welosiped güni» diýip yglan etmek hakynda kabul edilen Kararnamanyň ähmiýetini bellediler hem-de hormatly Prezidentimizi, Gahryman Arkadagymyzy bu şanly sene bilen tüýs ýürekden gutladylar.

Döwlet Baştutanymyz hem olary bu sport baýramçylygy bilen gutlady we Bütindünýä welosiped gününe bagyşlanyp geçirilen köpçülikleýin sport çäresine gatnaşyjylar bilen mähirli hoşlaşyp, hemmelere berk jan saglyk, üstünlik arzuw etdi.

Şeýlelikde, şu gezekki welosipedli ýöriş jemgyýetimiziň agzybirliginiň, jebisliginiň, halkymyzyň sagdyn durmuş ýörelgelerine, ynsanperwer gymmatlyklara ygrarlydygynyň aýdyň güwäsi boldy.

Hormatly adamlar!

Eziz watandaşlar!

Sizi sagdynlygyň we ruhubelentligiň halkara baýramy — Bütindünýä welosiped güni bilen tüýs ýürekden gutlaýaryn. «Garaşsyz, baky Bitarap Türkmenistan — bedew batly at-myradyň mekany» ýylynda bu ajaýyp halkara senäniň şanyna geçiriljek çäreleriň mähriban Watanymyza, sagdyn we bagtyýar durmuşymyza, berkarar döwletimizde gazanylýan beýik üstünliklere bolan buýsanjymyzy has-da artdyrjakdygyna berk ynanýaryn.

Bütindünýä welosiped güni dostlugyň we parahatçylygyň, sportuň hem-de ynsanperwerligiň belent ýörelgelerini dabaralandyrýan, jemgyýetimiziň agzybirligini, jebisligini alamatlandyrýan şanly sene hökmünde milli senenamamyzda aýratyn orun tutýar. Şonuň üçin-de eziz Diýarymyzda bu halkara baýram ýokary ruhubelentlikde giňden bellenilýär. Berkarar döwletiň täze eýýamynyň Galkynyşy döwründe Bütindünýä welosiped güni mynasybetli täsirli çäreleriň we ýaryşlaryň guralmagy, köpçülikleýin welosipedli ýörişleriň geçirilmegi sagdynlygyň, ruhubelentligiň ýurdy hökmünde Watanymyzyň abraýyny dünýä ýaýýar.

Hormatly adamlar!

Garaşsyz, hemişelik Bitarap döwletimiz Birleşen Milletler Guramasynda möhüm başlangyçlar bilen çykyş edip, halkara sport hyzmatdaşlygyny has-da pugtalandyrýar. Halkara Olimpiýa Komitetiniň, Aziýanyň Olimpiýa Geňeşiniň agzasy hökmünde Olimpiýa hereketini ösdürmäge mynasyp goşant goşýar. Ata Watanymyzda iri sport ýaryşlarynyň, şol sanda Aziýa oýunlarynyň, yklym birinjilikleriniň we dünýä çempionatlarynyň ýokary derejede guralmagy döwletimiziň ägirt uly sport mümkinçilikleriniň bardygyny bütin dünýä subut etdi.

Türkmenistanyň başlangyjy bilen Birleşen Milletler Guramasynyň Baş Assambleýasy tarapyndan 3-nji iýuny «Bütindünýä welosiped güni» diýip yglan etmek hakynda taryhy Kararnamanyň, şeýle hem «Durnukly ösüşi gazanmak üçin köpçülikleýin welosiped sürmegi jemgyýetçilik ulag ulgamlaryna girizmek» atly Kararnamanyň biragyzdan kabul edilmegi, Türkmenistanyň 2023 — 2027-nji ýyllar üçin ÝUNESKO-nyň Bedenterbiýe we sport boýunça hökümetara komitetiniň düzümine saýlanylmagy bagtyýar halkymyzy çäksiz buýsandyran wakalar boldy. Birleşen Milletler Guramasynyň Baş Assambleýasynyň 78-nji sessiýasynda Türkmenistanyň başlangyjy esasynda «Birleşen Milletler Guramasynyň oýunlary» atly Kararnamanyň kabul edilmegi, GDA-nyň Hökümet Baştutanlarynyň Geňeşiniň mejlisinde Aşgabadyň «Arkalaşygyň täze sport mümkinçilikleriniň şäheri», Olimpiýa şäherçesiniň Tennis toplumynyň Aziýanyň Tennis federasiýasy tarapyndan «Tennis boýunça Aziýa sebitiniň okuw-türgenleşik merkezi» diýlip yglan edilmegi sport özgertmelerimiziň halkara derejede giňden goldanylýandygynyň aýdyň güwäsidir.

Eziz watandaşlar!

Gahryman Arkadagymyzyň «Döwlet adam üçindir!» diýen şygaryna hem-de «Watan diňe halky bilen Watandyr! Döwlet diňe halky bilen döwletdir!» diýen ýörelgämize laýyklykda, ykdysadyýetimiziň ähli pudaklarynda giň möçberli özgertmeleri amala aşyrýarys. Berkarar döwletiň täze eýýamynyň Galkynyşy döwründe köpçülikleýin bedenterbiýäni, Olimpiýa hereketini, sporty ösdürmäge aýratyn ähmiýet berýäris. Bu ugurda milli maksatnamalarymyzy, toplumlaýyn özgertmelerimizi üstünlikli durmuşa geçirýäris. Aýratyn-da, beden we ruhy taýdan sagdyn nesilleri terbiýeläp ýetişdirmek ýaly halkymyzyň gadymy döwürlerden bäri uly ähmiýet berip gelýän däplerini mynasyp dowam etdirýäris. Gysga döwrüň içinde eziz Diýarymyzda dünýä ölçeglerine laýyk gelýän iri sport hem-de atçylyk sport toplumlary, stadionlar, sport mekdepleri, Olimpiýa şäherçesi gurlup, döwrebap sport düzümleri döredildi.

Garaşsyz ýurdumyz beýleki möhüm ugurlar bilen bir hatarda, ekologiýa babatda halkara resminamalara işjeň goşulyp, daşky gurşawy goramaga we ilatyň arasynda sagdyn durmuş ýörelgelerini ornaşdyrmaga uly üns berýär. Diýarymyzda köpçülikleýin ylgaw hem-de welosipedli ýörişler, bedenterbiýe-sport we medeni çäreler yzygiderli geçirilýär. Welosiped sporty hem ynsan saglygyna oňyn täsir edýän sportuň netijeli görnüşi bolup, ýurdumyzda sportuň bu görnüşi bilen meşgullanýanlaryň sany barha artýar. Ata Watanymyzyň aýdyň geljegi bolan ýaşlarymyzyň ýaramaz endiklerden daşda durmagy, zähmet bilen dynç alşy utgaşdyrmagy, sportuň dürli, şol sanda hereketli milli görnüşleri bilen meşgullanmagy üçin ähli tagallalar edilýär. Biz geljekde hem bu ugurda alyp barýan işlerimizi mynasyp dowam etdireris.

Hormatly adamlar!

Eziz watandaşlar!

Sizi Bütindünýä welosiped güni bilen ýene-de bir gezek tüýs ýürekden gutlaýaryn. Size berk jan saglyk, abadan we bagtyýar durmuş, berkarar Watanymyzyň gülläp ösmegi ugrunda alyp barýan işleriňizde uly üstünlikleri arzuw edýärin.

Türkmenistanyň Prezidenti

Serdar BERDIMUHAMEDOW

Aşgabat, 1-nji iýun (TDH). Şu gün hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Onda ýurdumyzyň oba hojalyk toplumynda we sebitlerde alnyp barylýan işler bilen baglanyşykly meselelere garaldy.

Ilki bilen, Ahal welaýatynyň häkimi T.Nurmyradowa söz berildi. Ol welaýatda dowam edýän möwsümleýin oba hojalyk işleri barada hasabat berdi. Bellenilişi ýaly, sebitde galla oragyna girişmek, daýhan yhlasy bilen ýetişdirilen bugdaý hasylyny ýitgisiz ýygnap almak üçin taýýarlyk işleri geçirilýär. Welaýatyň gowaça ekilen meýdanlarynda hatarara bejergi, ýekelemek, otag etmek, mineral dökünler bilen iýmitlendirmek, ösüş suwuny tutmak işleri ýerine ýetirilýär. Ýurdumyzda azyk bolçulygyny has-da pugtalandyrmak boýunça öňde goýlan wezipelerden ugur alnyp, ýazlyk ýeralma, gök-bakja ekinleri ekilen meýdanlarda agrotehnikanyň kadalaryna laýyklykda ideg etmek, ýetişdirilen hasyly ýygnap almak işleri dowam edýär. Mundan başga-da, häkim Diýarymyzda giňden bellenilýän Bütindünýä welosiped güni mynasybetli welaýatda geçiriljek köpçülikleýin sport çärelerine taýýarlyk görlüşi, şu ýyl açylyp ulanmaga berilmegi göz öňünde tutulýan medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, galla oragyna guramaçylykly girişmegiň, bu jogapkärli möwsümi ýokary derejede geçirmegiň, ekerançylyk meýdanlaryndaky oba hojalyk işlerinde agrotehnikanyň kadalarynyň berk berjaý edilmeginiň möhümdigini belledi hem-de häkime bu babatda anyk tabşyryklary berdi. Döwlet Baştutanymyz ýurdumyzy durmuş-ykdysady taýdan ösdürmek boýunça maksatnamalara laýyklykda, şu ýyl welaýatda açylyp ulanmaga berilmegi meýilleşdirilýän dürli maksatly desgalardaky gurluşyk işleriniň ýokary hilli, öz wagtynda ýerine ýetirilmegini gözegçilikde saklamagy, Bütindünýä welosiped güni mynasybetli dabaralaryň ýokary guramaçylykly geçirilmegini üpjün etmegi tabşyrdy.

Balkan welaýatynyň häkimi H.Aşyrmyradow welaýatdaky möwsümleýin oba hojalyk işleriniň barşy barada hasabat berdi.Bellenilişi ýaly, häzirki wagtda ýetişdirilen bugdaý hasylyny ýygnap almaga guramaçylykly girişmek üçin degişli taýýarlyk işleri alnyp barylýar. Gowaça ekilen meýdanlarda hatarara bejergi, ösüş suwuny tutmak we mineral dökünler bilen iýmitlendirmek işleri ýerine ýetirilýär. Ýurdumyzda öndürilýän gök-bakja önümleriniň möçberini artdyrmak hem-de azyk bolçulygyny has-da pugtalandyrmak babatda öňde goýlan wezipelerden ugur alnyp, welaýatyň ýazlyk ýeralma ekilen meýdanlarynda ýetişdirilen hasyly ýygnap almak işleri alnyp barylýar. Mundan başga-da, häkim welaýatda Bütindünýä welosiped güni mynasybetli geçiriljek baýramçylyk we sport çärelerine taýýarlyk görlüşi, şu ýyl açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleri barada hasabat berdi.

Hormatly Prezidentimiz hasabaty diňläp, möwsümleýin oba hojalyk işlerine ünsi çekdi hem-de gowaça ideg etmekde agrotehniki talaplaryň berk berjaý edilmegini, galla oragy möwsümine guramaçylykly taýýarlyk görülmegini ileri tutulýan wezipeleriň hatarynda belledi we bu babatda degişli tabşyryklary berdi. Döwlet Baştutanymyz welaýatda Bütindünýä welosiped güni mynasybetli çäreleri ýokary guramaçylyk derejesinde geçirmegi, ýurdumyzy durmuş-ykdysady taýdan ösdürmäge gönükdirilen maksatnamalaryň çäklerinde alnyp barylýan işleri gözegçilikde saklamagy tabşyrdy.

Daşoguz welaýatynyň häkimi D.Babaýew welaýatda alnyp barylýan möwsümleýin oba hojalyk işleri barada hasabat berdi.

Hasabatda bellenilişi ýaly, galla oragyna ýokary guramaçylykly girişmek maksady bilen, häzirki wagtda welaýatda degişli taýýarlyk işleri alnyp barylýar. Gowaça ekilen meýdanlarda hatarara bejergi, otag etmek, ýekelemek işleri geçirilýär. Gowaça ösüş suwuny tutmak, mineral dökünler bilen iýmitlendirmek işlerine taýýarlyk görülýär. Welaýatyň ýazlyk ýeralma, gök-bakja ekinleri ekilen meýdanlarynda agrotehnikanyň kadalaryna laýyklykda ideg etmek işleri geçirilip, ýetişdirilen hasyly ýygnap almaga taýýarlyk çäreleri dowam edýär. Sebitde şaly ekişini bellenen möhletde geçirmek üçin zerur çäreler görülýär. Şeýle hem häkim welaýatda Bütindünýä welosiped güni mynasybetli geçiriljek medeni-köpçülikleýin we sport çärelerine görülýän taýýarlyk, ýurdumyzy durmuş-ykdysady taýdan ösdürmek boýunça maksatnamalara laýyklykda, şu ýyl açylyp ulanmaga berilmegi meýilleşdirilýän desgalardaky gurluşyk işleri barada hasabat berdi.

Hormatly Prezidentimiz hasabaty diňläp, oba hojalygynda dowam edýän jogapkärli möwsüme ünsi çekdi we welaýatyň ekerançylyk meýdanlarynda agrotehniki çäreleriň talabalaýyk geçirilmegini yzygiderli gözegçilikde saklamagy, bugdaý oragy möwsümine gowy taýýarlyk görmegi tabşyrdy. Mundan başga-da, döwlet Baştutanymyz baýramçylyk mynasybetli welaýatda guraljak çäreleri ýokary guramaçylyk derejesinde geçirmegi, şu ýyl açylyp ulanmaga berilmegi göz öňünde tutulýan desgalardaky gurluşyk işleriniň ýokary hilli ýerine ýetirilmegini üpjün etmegi tabşyrdy.

Lebap welaýatynyň häkimi D.Genjiýew welaýatda dowam edýän möwsümleýin oba hojalyk işleri barada hasabat berdi. Şu günler sebitde galla oragy möwsümine guramaçylykly girişmek, ýetişdirilen bugdaý hasylyny ýitgisiz, öz wagtynda ýygnap almak üçin zerur taýýarlyk işleri alnyp barylýar. Welaýatyň gowaça ekilen meýdanlarynda hatarara bejergi, otag etmek, ýekelemek, mineral dökünler bilen iýmitlendirmek, ösüş suwuny tutmak işleri ýerine ýetirilýär. Gök-bakja ekinleri ekilen meýdanlarda ideg etmek işleri bilen birlikde, ýetişdirilen ýazlyk ýeralmanyň hasylyny ýygnap almak boýunça zerur çäreler görülýär. Şeýle-de häkim welaýatda Bütindünýä welosiped güni mynasybetli guraljak çärelere taýýarlyk görlüşi, Oba milli maksatnamasyna laýyklykda, şu ýyl açylyp ulanmaga berilmegi meýilleşdirilen desgalardaky gurluşyk işleriniň barşy barada hasabat berdi.

Döwlet Baştutanymyz hasabaty diňläp, ekerançylyk meýdanlarynda ýaýbaňlandyrylan agrotehniki çäreleriň öz wagtynda we ýokary hilli geçirilmeginiň, bugdaý oragy möwsümine talabalaýyk taýýarlyk görmegiň möhümdigini belledi hem-de häkime bu ugurda birnäçe anyk tabşyryklary berdi. Hormatly Prezidentimiz Bütindünýä welosiped güni mynasybetli çäreleri guramaçylykly geçirmek, Oba milli maksatnamasyna laýyklykda, şu ýyl açylyp ulanmaga berilmegi meýilleşdirilen desgalardaky gurluşyk işlerini gözegçilikde saklamak babatda degişli tabşyryklary berdi.

Mary welaýatynyň häkimi D.Annaberdiýew welaýatda möwsümleýin oba hojalyk işleriniň barşy barada hasabat berdi. Bellenilişi ýaly, sebitde galla oragy möwsümine guramaçylykly girişmek hem-de ýetişdirilen bugdaý hasylyny ýitgisiz ýygnap almak üçin zerur taýýarlyk işleri alnyp barylýar. Gowaça ekilen meýdanlarda hatarara bejergi, ýekelemek, mineral dökünler bilen iýmitlendirmek, ösüş suwuny tutmak işleri utgaşykly ýerine ýetirilýär. Welaýatyň ýazlyk ýeralma we gök-bakja ekinleri ekilen meýdanlarynda ideg etmek, ýetişdirilen hasyly ýygnap almak işleri dowam edýär. Şeýle-de häkim Bütindünýä welosiped güni mynasybetli geçiriljek dabaraly çärelere taýýarlyk görlüşi, Oba milli maksatnamasyna laýyklykda, şu ýyl açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, ekerançylyk meýdanlarynda alnyp barylýan ideg işleriniň agrotehnikanyň kadalaryna laýyklykda, ýokary hilli geçirilmegini, galla oragy möwsümine guramaçylykly girişilmegini üpjün etmegi tabşyrdy. Döwlet Baştutanymyz ýurdumyzy durmuş-ykdysady taýdan ösdürmäge gönükdirilen maksatnamalarda göz öňünde tutulan wezipeleriň möhüm ähmiýetine ünsi çekip, welaýatda bu ugurda alnyp barylýan işleri yzygiderli gözegçilikde saklamagy, baýramçylyk mynasybetli çäreleri guramaçylykly geçirmegi tabşyrdy.

Soňra Ministrler Kabinetiniň Başlygynyň orunbasary T.Atahallyýewe söz berildi.

Wise-premýer, ilki bilen, hormatly Prezidentimize ýurdumyzyň pileçi kärendeçileriniň 2 müň 100 tonnadan gowrak pile ýetişdirip, şertnamalaýyn borçnamalaryny üstünlikli berjaý edendikleri baradaky hoş habary ýetirdi we bu waka mynasybetli Gahryman Arkadagymyzy hem-de Arkadagly Gahryman Serdarymyzy ýurdumyzyň ähli oba zähmetkeşleriniň adyndan tüýs ýürekden gutlady.

Soňra T.Atahallyýew ýurdumyzyň oba hojalygynda dowam edýän möwsümleýin işler barada hasabat berdi. Bellenilişi ýaly, galla oragy möwsümini guramaçylykly geçirmek hem-de ýetişdirilen bugdaý hasylyny öz wagtynda ýygnap almak üçin degişli taýýarlyk işleri geçirilýär. Ýurdumyzyň gowaça ekilen meýdanlarynda agrotehnikanyň kadalaryna laýyklykda degişli ideg işleri, hususan-da, hatarara bejergi, ýekelemek, otag etmek, mineral dökünler bilen iýmitlendirmek, ösüş suwuny tutmak işleri alnyp barylýar. Welaýatlaryň ýazlyk ýeralma, gök-bakja ekinleri ekilen meýdanlarynda ideg etmek, ýetişdirilen hasyly ýygnap almak işleri ýerine ýetirilýär. Daşoguz welaýatynda şaly ekişi dowam edip, Lebap welaýatynda ekiş möwsümine taýýarlyk görülýär.

Hormatly Prezidentimiz hasabaty diňläp, möwsümleýin oba hojalyk işleriniň öz wagtynda ýerine ýetirilmeginiň, gowaça ideg etmekde agrotehnikanyň kadalarynyň berk berjaý edilmeginiň, galla oragy möwsümine taýýarlykly girişilmeginiň we bu möwsümi ýokary guramaçylykly geçirmegiň zerurdygyny belledi hem-de wise-premýere birnäçe anyk tabşyryklary berdi.

Döwlet Baştutanymyz iş maslahatyna gatnaşyjylara ýüzlenip, zähmetsöýer pileçilerimiziň Watan harmanyna 2 müň 100 tonnadan gowrak pile tabşyrandyklaryny we şu ýylky şertnamalaýyn borçnamalaryny üstünlikli ýerine ýetirendiklerini kanagatlanma bilen belledi hem-de ýurdumyzyň ussat pileçilerini, mähriban halkymyzy bu zähmet üstünligi bilen tüýs ýürekden gutlady.

Hormatly Prezidentimiz Serdar Berdimuhamedow sanly ulgam arkaly geçirilen iş maslahatyny jemläp, oňa gatnaşanlara berk jan saglygyny, maşgala abadançylygyny, alyp barýan işlerinde uly üstünlikleri arzuw etdi.

Berkarar döwletimiziň eziz körpeleri!

Hormatly watandaşlar!

Sizi dünýä bileleşigi bilen birlikde, Garaşsyz, hemişelik Bitarap döwletimizde giňden bellenilýän Çagalary goramagyň halkara güni mynasybetli tüýs ýürekden gutlaýaryn. Bagtyýar çagalaryň mekany hökmünde giňden tanalýan Watanymyzda bu halkara senäniň şanyna geçiriljek dabaralaryň şadyýan körpelerimiziň kalbynda egsilmez joşgun döretjekdigine we aýdyň geljegimize ynamy has-da berkitjekdigine pugta ynanýaryn.

Çagalary goramagyň halkara güni adamzadyň dostluk hem-de parahatçylyk ýörelgelerini dabaralandyrýar, çagalaryň parahat, asuda we bagtyýar durmuşda ýaşamak hukuklaryny üpjün etmek babatda dünýä jemgyýetçiliginiň tagallalaryny birleşdirýär. Berkarar döwletiň täze eýýamynyň Galkynyşy döwründe bu halkara baýram biziň ýurdumyzyň Birleşen Milletler Guramasynyň çagalaryň hukuklary we bähbitleri baradaky baş ýörelgelerine ygrarlydygyny alamatlandyrýan sene hökmünde möhüm ähmiýete eýedir. Şoňa görä-de, biz dünýä bileleşigi bilen birlikde, gözel Diýarymyzda bu baýramy belent dabaralara besläp, ýokary ruhubelentlikde belleýäris.

«Garaşsyz, baky Bitarap Türkmenistan — bedew batly at-myradyň mekany» ýylynda hem jemgyýetçilik durmuşymyzda mynasyp orun alan bu halkara sene mynasybetli Aşgabat we Arkadag şäherlerinde, «Awaza» milli syýahatçylyk zolagynda, Gökderede, welaýat merkezlerinde, şäherdir obalarda aýdym-sazly çäreler giňden guralýar. Durmuşymyzyň gülleri bolan mähriban çagalarymyzyň berkarar döwletimizi, agzybir halkymyzy, ajaýyp zamanamyzy, dostlugy we parahatçylygy wasp edýän şirin aýdym-sazlary, şadyýan çaga gülküleriniň belentden ýaňlanmagy bagtyýar çagalygyň Diýary hökmünde Garaşsyz, hemişelik Bitarap Watanymyzyň at-abraýyny dünýä ýaýýar.

Eziz çagalar!

Ýurdumyzda çagalar aýratyn üns we gyzgyn mähir bilen gurşalyp alynýar. Sebäbi berkarar Watanymyzyň geljegi hem-de dowamatymyz bolan ýaş nesillerimiz hakynda hemmetaraplaýyn alada etmek biziň alyp barýan döwlet syýasatymyzyň esasy ugurlarynyň biri bolup durýar. Şoňa görä-de, Garaşsyz döwletimizde çagalaryň hukuklaryny we azatlyklaryny berk goraýarys. Olaryň döwrebap bilim-terbiýe almaklary, watansöýüjiligiň, ynsanperwerligiň belent ýörelgelerine, maşgala gymmatlyklaryna eýerip, zehininiň, ukyp-başarnyklarynyň ösmegi, dünýägaraýşynyň kämilleşmegi, bagtly durmuşda ýaşamagy üçin ähli şertleri döredýäris. Aşgabat we Arkadag şäherlerinde, sebitlerimizde dünýä ölçeglerine doly laýyk gelýän, ähli amatlyklary bolan çagalar baglarydyr orta mekdepleri, dynç alyş merkezlerini we seýilgähleri yzygiderli gurýarys.

Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň beýik başlangyjy bilen döredilen hem-de abraýly gurama öwrülen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy tarapyndan ýaş nesilleri durmuş taýdan goldamak, howandarlyga mätäç körpelerimiziň saglygynyň dikeldilmegine ýardam bermek, mynasyp durmuşda ýaşamagy üçin amatly şertleri döretmek ugrunda dünýä nusgalyk asylly işler durmuşa geçirilýär. Bagtyýar nesillerimiz hakyndaky aladalar biziň nurana ertirimize tarap ynamly hem-de buýsançly gadamlarymyzdyr.

Hormatly adamlar!

Eneleriň we çagalaryň durmuş taýdan goraglylygyny üpjün etmegiň jemgyýetimiziň hem-de döwletimiziň kämil derejede ösmeginde örän uly ähmiýeti bardyr. Şeýle bolansoň, her bir şahsyýetde şöhratly taryhymyzyň dowamynda kämilleşdirilip gelinýän milli buýsanç duýgusyny terbiýelemäge, maşgala mukaddesliklerini we gymmatlyklaryny mynasyp dowam etdirmäge, köp çagaly maşgalalary goldamaga hem-de höweslendirmäge döwlet derejesinde aýratyn üns berýäris. Biz dünýä ýurtlary we halkara guramalar, aýratyn-da, Birleşen Milletler Guramasy, onuň ýöriteleşdirilen düzümleri bolan Çagalar gaznasy, Ilat gaznasy, Bütindünýä Saglygy Goraýyş Guramasy bilen eneleriň we çagalaryň saglygyny hem-de hukugyny goramak, ýaş nesillere ýokary ahlak gymmatlyklary esasynda bilim-terbiýe bermek bilen bagly hyzmatdaşlygy has-da ösdürýäris. Bularyň ählisi adamzadyň parahatçylyk, dostluk we hoşniýetli gatnaşyklar baradaky belent maksatlaryny rowaçlandyrýar.

Garaşsyz, baky Bitarap döwletimiziň bagtyýar çagalary!

Eziz watandaşlar!

Sizi Çagalary goramagyň halkara güni bilen ýene-de bir gezek tüýs ýürekden gutlaýaryn. Size berk jan saglyk, uzak ömür, bagtyýar we abadan durmuş arzuw edýärin. Goý, durmuşymyzyň gülleri bolan mähriban çagalarymyzyň şatlykly gülküleri hemişe belentden ýaňlansyn dursun!

Türkmenistanyň Prezidenti

Serdar BERDIMUHAMEDOW.

Hormatly halyçylar we halyşynaslar!

Gadyrly myhmanlar!

Sizi «Garaşsyz, baky Bitarap Türkmenistan — bedew batly at-myradyň mekany» ýylynda eziz Diýarymyzda dabaralara beslenip giňden bellenilýän hem-de milli mirasymyzyň aýrylmaz bölegine öwrülen Türkmen halysynyň baýramy, şeýle-de bu baýram mynasybetli geçirilýän haly we haly önümleriniň sergisiniň hem-de Türkmen halyşynaslarynyň bütindünýä jemgyýetiniň XXVI mejlisiniň öz işine başlamagy bilen tüýs ýürekden gutlaýaryn.

Türkmen zenanlarynyň ýiti zehininden, akyl-paýhasyndan dörän, nepisligi, müň dürli öwüşgini, reňkleriniň ajaýyp sazlaşygy, tebigy özboluşlylygy bilen dünýäni haýran eden ajaýyp türkmen halysy umumadamzat medeniýetiniň genji-hazynasynda mynasyp orun alan gözelligiň we nepisligiň nusgasydyr. Müňýyllyklaryň dowamynda sünnälenip, hiç bir halkyňka meňzemeýän milli aýratynlyklary bilen türkmen durmuşynyň aýrylmaz gymmatlygyna öwrülen halylar öýlerimiziň ýaraşygydyr, törlerimiziň bezegidir, halkymyzyň buýsanjydyr. Ene-mamalarymyzyň, gelin-gyzlarymyzyň zehininden dörän bu ajaýyp sungatymyz dünýäde doly ykrar edildi. Türkmen milli halyçylyk sungatynyň Birleşen Milletler Guramasynyň Bilim, ylym we medeniýet meseleleri boýunça guramasynyň (ÝUNESKO) Adamzadyň maddy däl medeni mirasynyň sanawyna girizilmegi bu gadymy senedi ebedileşdirmek ugrunda amala aşyrylan uly işleriň rowaçlanýandygynyň aýdyň nyşanydyr.

Hormatly sergä we mejlise gatnaşyjylar!

Gadyrly myhmanlar!

Dünýäde deňi-taýy bolmadyk türkmen halysy halkymyzyň gadymy sungaty bolup, onda asyrlardan gözbaş alýan ruhy gymmatlyklarymyz öz aýdyň beýanyny tapýar. Zenan yhlasyny, onuň dünýägaraýşyny, medeniýetini, ýürek arzuwlaryny, geljege bolan beýik ynamyny göllerdir nagyşlaryna siňdiren haly bize ata-babalarymyzyň ýaşaýyş gymmatlyklary hakynda düýpli düşünjeleri berýär. Nepisligi, inçeligi, nusgalyk ajaýyplygy, dürli öwüşginli lowurdysy, gözüňi gamaşdyrýan owadanlygy bilen göreni haýrana goýýan halylarymyzda halkymyzyň ähli oňat häsiýetleri, özboluşly milli aýratynlyklary, diline, sungatyna, asylly däp-dessurlaryna bolan egsilmez söýgüsi öz beýanyny tapýar.

Döwlet nyşanlarymyzda türkmen haly gölleriniň ýerleşdirilmegi ata-babalarymyzyň wesýetlerine, asylly däplerine wepalylygyň nyşanydyr. Ol merdana halkymyzyň özboluşly däplerine eýermegiň, onuň milli aýratynlygyny, dünýägaraýşyny, häsiýetini we ruhy gymmatlyklaryny aýawly saklamagyň, geljeginiň rowaçlyklara beslenmeginiň nusgasydyr.

Çeper elli halyçylar we ussat halyşynaslar!

Gadyrly myhmanlar!

Täze taryhy döwürde halkymyzyň bütin dünýä ýaýran halyçylyk sungatyny ösdürmäge uly üns berilýär. Bu nepis we ajaýyp sungaty Ýer ýüzünde wagyz etmek, yzygiderli kämilleşdirmek, halylaryň täze görnüşlerini döretmek, gadymy asyl nusgalaryny aýawly saklamak, dikeltmek üçin giň mümkinçilikler döredilýär. Döwrebap çeper halyçylyk kärhanalary işe girizilip, olarda halyçy zenanlarymyzyň yhlasly zähmet çekmegi we dynç almagy üçin ähli zerur şertler döredilýär. Hünär ussatlygy, zähmetsöýerligi bilen hemmelere görelde bolýan ussat halyçy zenanlarymyzyň zähmetine döwletimiz tarapyndan ýokary baha berilýär. Olara hormatly atlar dakylyp, gymmat bahaly sowgatlar gowşurylýar. Biz mundan beýläk-de ellerinden dür dökülýän zehinli halyçy zenanlarymyzyň abadan, bagtyýar durmuşda ýaşamagy we dünýä meşhur türkmen halylaryny dokamaklary üçin ähli şertleri dörederis. 

«Garaşsyz, baky Bitarap Türkmenistan — bedew batly at-myradyň mekany» ýylynda milli gymmatlyklarymyza aýratyn sarpa goýulýar. Halkymyzyň ajaýyp halylarynyň nagyşlarynda şöhlelendirilýän milli gymmatlyklarymyzdan ylham alyp, behişdi bedewlerimiziň bady bilen röwşen geljege tarap ynamly barýarys. Müň öwüşginli halylarymyzda öz beýanyny tapýan asylly ýörelgelerimizden, däp-dessurlarymyzdan, halkymyzyň gazanýan ajaýyp üstünliklerinden ruhlanyp, parahatçylygyň we gülläp ösüşiň bähbidine belent sepgitlere ýetýäris.

Hormatly sergä we mejlise gatnaşyjylar!

Gadyrly halyçylar!

Sizi toýlarymyzyň bezegi, ojaklarymyzyň mukaddesliginiň nyşany bolan Türkmen halysynyň baýramy hem-de bu baýram mynasybetli geçirilýän haly we haly önümleriniň sergisiniň, Türkmen halyşynaslarynyň bütindünýä jemgyýetiniň XXVI mejlisiniň öz işine başlamagy bilen ýene-de bir gezek tüýs ýürekden gutlaýaryn. Size berk jan saglyk, maşgala abadançylygyny, bagtyýar durmuş, halyçylyk sungatymyzy döwrebap ösdürmek, bütin dünýä ýaýmak ugrunda alyp barýan işleriňizde uly üstünlikleri arzuw edýärin. Goý, çeper elli, uz barmakly halyçylarymyzyň daraklarynyň sesi hemişe batly ýaňlanyp dursun!

Türkmenistanyň Prezidenti

Serdar BERDIMUHAMEDOW.

Aşgabat — Arkadag, 27-nji maý (TDH). Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Gypjakdaky Türkmenbaşynyň ruhy metjidinde Gurban baýramynyň başlanýandygyny alamatlandyrýan baýram namazyny okady we Arkadag şäherindäki täze metjidiň gurluşyk işleri bilen tanşyp, bu şäherde gurbanlyk sadakasyny berdi. Munuň özi hajy Arkadagymyzyň asyrlar aşyp gelýän ýagşy dessurlary, asylly ýörelgeleri rowaçlandyrmakdaky tagallalarynyň aýdyň güwäsidir.

Bu gün ösüşleriň belentliklerine tarap bedew bady bilen ynamly gadam urýan ýurdumyzyň çar künjegi Gurban baýramy mynasybetli guralýan dabaralara beslendi. “Garaşsyz, baky Bitarap Türkmenistan — bedew batly at-myradyň mekany” ýylynyň bu nurana baýramy ir säher bilen “Allanyň öýi” hasaplanýan metjitlerde baýram namazynyň okalmagyndan başlandy.

Gurban baýramynyň ilkinji gününiň säher şapagy dag etekleriniň sahawatly tebigatyna özboluşly gözellik çaýdy. Munuň özi bereketli paslyň her bir gününiň jana ýakymly howasy, sungat eserlerine çalymdaş gözelligi bilen haýran galdyrýandygynyň alamatydyr.

Irden Gahryman Arkadagymyz Gypjakdaky Türkmenbaşynyň ruhy metjidine geldi. Bu ýere Türkmenistanyň Halk Maslahatynyň we Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň agzalary, köp sanly daşary ýurtlaryň Türkmenistanda işleýän diplomatik wekilhanalarynyň ýolbaşçylary ýygnandylar.

Hajy Arkadagymyz hemmeler bilen mähirli görşüp, bu ýere ýygnananlary mukaddes Gurban baýramynyň başlamagy bilen gutlady we üç günüň dowamynda ediljek doga-dilegleriň, beriljek sadakalaryň Beýik Biribaryň dergähinde kabul bolmagyny arzuwlap, metjidiň içine girdi.

Sebitde iň uly metjitleriň biri hasaplanýan Türkmenbaşynyň ruhy metjidinde baýram namazy okaldy. Mukaddes Gurban baýramynyň ähli dessurlaryny agzybirlikde berjaý edýän halkymyz milli däpleri ýokary derejede berjaý etmek ugrunda döredilýän mümkinçilikler üçin hajy Arkadagymyza we Arkadagly hajy Serdarymyza sagbolsun aýdýarlar. Halkymyzyň agzybirligi, jebisligi, sogap işleri we asyrlar aşyp gelýän ýagşy dessurlary ýerine ýetirmäge ygrarlylygy nusgalyk ýörelge hökmünde ykrar edilendir.

Hormatly Prezidentimiziň Gurban baýramy mynasybetli halkymyza iberen Gutlagynda ynsanperwerlik, dostluk we parahatçylyk söýüjilik ýörelgelerini rowaçlandyrýan bu mukaddes baýramyň halkymyzyň ruhy-ahlak gymmatlyklaryny özünde jemleýändigi, jemgyýetde agzybirligi, özara hormat-sylagy, ruhy bitewüligi has-da pugtalandyrýandygy bellenilýär.

Häzirki döwürde ýurdumyzda jemgyýetiň ruhy sagdynlygyny, halkymyzyň ahlak kämilligini berkitmek, watandaşlarymyzyň namaz okamaklary, yslam dünýäsiniň mukaddesliklerine zyýarat etmekleri üçin hemme mümkinçilikler döredilýär. Munuň özi hajy Arkadagymyzyň başyny başlan asylly işleriniň Arkadagly hajy Serdarymyzyň baştutanlygynda üstünlikli durmuşa geçirilýändiginiň aýdyň netijesidir.

Baýram namazy okalandan soňra, Gahryman Arkadagymyz bu ýere ýygnananlara ýüzlenip, doga-dilegleriň Beýik Biribaryň dergähinde kabul bolmagyny dileg etdi. Soňra Milli Liderimiz Ýaşulular geňeşiniň agzalary we daşary ýurtly diplomatlar bilen bilelikde Türkmenistanyň ilkinji Prezidenti Saparmyrat Nyýazowyň aram tapan ýerine tarap ugrady.

Bu ýerde ildeşlerimiz namazdan soňra ýurdumyzyň abadançylygynyň, halkymyzyň bagtyýar durmuşynyň berkarar bolmagyny dileg edýärler. Mälim bolşy ýaly, şu günler watandaşlarymyzyň köp sanlysy yslam dünýäsiniň keramatly künjeklerinde haj parzyny berjaý edip, ählumumy parahatçylygyň we durnukly ösüşiň bähbidine yzygiderli tagalla edýän hajy Arkadagymyzyň, Arkadagly hajy Serdarymyzyň asylly işleriniň rowaç bolmagynyň hatyrasyna doga-dileg edýärler.

Türkmenistanyň ilkinji Prezidentiniň we onuň maşgala agzalarynyň aram tapan ýerinde aýat okaldy. Hemmeler merhumlaryň ýatan ýeriniň ýagty, imanynyň hemra bolmagyny dileg etdiler. Munuň özi Milli Liderimiziň başlangyjy bilen öten-geçenleriň ruhuna tagzym etmek däbiniň dowam etdirilýändiginiň aýdyň beýanydyr.

Soňra hajy Arkadagymyz musulman ýurtlarynyň diplomatik wekilhanalarynyň ýolbaşçylaryna halkymyzyň durmuşynda möhüm ähmiýeti bolan çärä işjeň gatnaşýandyklary üçin minnetdarlyk bildirdi we hemmeler bilen hoşlaşyp, bu ýerden ugrady.

* * *

Ýurdumyzyň gözel künjekleriniň birinde ýerleşýän, mukaddes Gurban baýramynyň ilkinji gününde keşbinde baýramçylyk öwüşginleri duýulýan Arkadag şäheriniň dürli maksatly desgalarynyň, nurana ýollarynyň bir bitewi binagärlik sazlaşygyny emele getirmegi ýurdumyzda şähergurluşyk maksatnamasynyň nusgalyk derejede amala aşyrylýandygyny görkezýär. Gahryman Arkadagymyzyň başlangyjy esasynda binýat bolan “akylly” şäheriň gurluşygynyň ikinji tapgyrynda alnyp barylýan işleriň depgininiň barha ýokarlanýandygyny bellemek gerek.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäheriniň 30 müň orunlyk metjidiniň gurluşygynyň alnyp barylýan ýerine geldi. Bu ýerde Gahryman Arkadagymyz mähirli garşylanyldy.

Milli Liderimiz bu ýerde ilçiler, şeýle-de Türkmenistanyň Halk Maslahatynyň we Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň agzalary bilen söhbetdeş boldy.

Söhbetdeşligiň dowamynda hajy Arkadagymyz ýurdumyzda Garaşsyzlyk ýyllarynda metjitleriň gurluşygyna giňden badalga berlendigini, häzirki döwürde bolsa hormatly Prezidentimiziň baştutanlygynda Diýarymyzyň dürli künjeklerinde dürli maksatly binalaryň, şol sanda metjitleriň gurluşygynyň yzygiderli dowam etdirilýändigini belledi. “Bu işleriň ählisi adamzat taryhynyň bütin dowamynda parahatçylyk, dostluk, ynsanperwerlik ýörelgelerine ygrarly bolan halkymyzyň gadymyýetden gelýän, durmuş kadalaryna esaslanýan hem-de häzirki eýýamyň ruhy bilen sazlaşykly utgaşýan medeni däplerine, ýokary ruhy gymmatlyklarymyza, asylly ýörelgelerimize üýtgewsiz ygrarlydygymyza şaýatlyk edýär” diýip, Milli Liderimiz aýtdy.

Soňra Halk Maslahatynyň Başlygy metjidiň baş binasynyň içine girdi. Bu ýerde täze şäherde Gahryman Arkadagymyzyň ozal beren maslahatlaryndan ugur alnyp, metjidiň gurluşyk işleriniň depginini ýokarlandyrmak babatda edilýän tagallalar, onuň içki bezeg aýratynlyklary, gurluşykda we bezeg işlerinde ulanylýan serişdeleriň görnüşleri barada maglumat berildi. Şeýle-de Milli Liderimiz şekil taslamalary bilen tanyşdyryldy. Görkezilen şekil taslamalarynyň hatarynda metjidiň içerki ýyladyş ulgamynyň, namazlyklarynyň görnüşleri, kaşaň binanyň diwarlarynda ýerleşdiriljek ýazgylar, minaralaryň özboluşlylygy, mermer düşekleriň we metjidiň haly düşekleriniň görnüşleri, mährabyň bezeg aýratynlyklary bilen baglanyşykly taslamalar we olaryň ýerleşjek ýerleriniň çyzgylary bar.

“Akylly” şäheriň gurluşygynyň ikinji tapgyrynda alnyp barylýan işleriň depginini ýokarlandyrmagyň, şunda metjidiň gurluşyk işlerinde ýokary hil derejesiniň üpjün edilmeginiň möhüm talap hökmünde kesgitlenendigini aýdyp, hajy Arkadagymyz ähli işleriň öz wagtynda tamamlanmagynyň wajypdygyna ünsi çekdi we bu babatda maslahatlaryny berdi. Şunda binalaryň ýanaşyk ýerleriniň abadanlaşdyrylmagyna, şäherde ýokary ekologik ýagdaýyň saklanmagyna zerur ähmiýet berilmelidir.

Milli Liderimiz Garaşsyzlyk ýyllarynda il sylagly ýaşulularyň işjeň gatnaşmaklarynda milli aňyýetiň pugtalandyrylandygyny, ylahyýet fakultetiniň açylandygyny belledi. Şol ugurdan ençeme ýaşlar bilim aldy. Şol ýyllarda ýurdumyzda ilkinjileriň hatarynda Köşüde arap doganlarymyzyň bina etmeginde Şehitler metjidi guruldy. Türk doganlarymyzyň gatnaşmagynda Ärtogrul Gazy metjidi bina edildi. Gahryman Arkadagymyz Gökdepe metjidiniň hem gurlandygy, Gypjakdaky baş metjidiň ulanmaga berlendigi we gurluşykçylarymyzyň tejribesiniň artmagy bilen, paýtagtymyzda hem-de welaýatlarda öz ýurdumyz tarapyndan metjitleriň gurlandygy barada maglumatlary beýan etdi. Halk Maslahatynyň Başlygy bu gün bolsa döwrebap Arkadag şäherinde 30 müň orunlyk metjidiň gurulýandygyny aýdyp, onuň gurluşygy babatda bu ýere ýygnananlaryň teklipleri ýa-da pikirleri bar bolsa, olara seretmäge taýýardygyny nygtady.

Hormatly Arkadagymyz häzirki wagtda metjidiň bezeg işlerinde ulanylýan dürli serişdeleriň, mermer daşlaryň ýakyn goňşy we dostlukly döwletlerde öndürilýändigini aýdyp, hoşniýetli goňşuçylyk gatnaşyklarynyň haýyr işleriň amal bolmagyna özboluşly goşantdygyny, munuň agzybirlikden, birek-birege hormat goýmak ýörelgelerinden nyşandygyny belledi. Şeýlelikde, Garaşsyzlyk ýyllarynda ýakyn gatnaşyklarymyzyň netijesinde hyzmatdaşlygymyz täze derejä çykdy. Berkarar döwletiň täze eýýamynyň Galkynyşy döwründe ýurdumyzda ählumumy ösüşiň üpjün edilmegine gönükdirilen asylly işleriň durmuşa geçirilmegine her bir adamyň mynasyp goşant goşmagy wajypdyr. Mukaddes Gurban aýynda bolsa parz işleri berjaý etmek her bir raýatyň jemgyýetiň öňündäki ruhy we ahlak borjudyr.

Soňra hajy Arkadagymyz metjidiň daşyna çykyp, bu ýerde Türkmenistanyň Halk Maslahatynyň hem-de Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň agzalary, daşary ýurtlaryň Türkmenistandaky diplomatik wekilhanalarynyň ýolbaşçylary bilen gürrüňdeş boldy.

Diplomatlar yslam dünýäsiniň mukaddes baýramy bolan Gurban baýramynda sogap işleriň berjaý ediljek binasyna gelip, hajy Arkadagymyz bilen bilelikde gurluşyk işleri bilen tanyşmagyň özleri üçin uly hormatdygyny nygtadylar. Olar bu ýere gelmäge hem-de ýagşy dessurlara dahylly bolmaga döredilen mümkinçilik üçin Gahryman Arkadagymyza we Arkadagly hajy Serdarymyza tüýs ýürekden hoşallyk bildirdiler. Şeýle hem olar sazlaşykly ösüş ýoluna düşen Türkmenistan bilen hyzmatdaşlygyň ähli ugurlar boýunça ösdürilmegine mynasyp goşant goşmak ugrunda tagallalaryny gaýgyrmajakdyklaryna ynandyrdylar.

Milli Liderimiz Gurban baýramynyň agzybirligiň, jebisligiň baýramydygyny, ony ýakyn dostlar, doganlyk halklar bilen bilelikde dabaralandyrmagyň türkmen halkyna mahsus ýörelgeleriň biridigini belläp, hemmelere minnetdarlyk bildirdi. Gahryman Arkadagymyz olary Arkadag şäheriniň merkezinde ýerleşýän “Märkaw” myhmanhanasynda berjek gurbanlyk sadakasyna gatnaşmaga çagyrdy we bu ýerden ugrady.

Berkarar döwletiň täze eýýamynyň Galkynyşy döwründe Gurban baýramy jemgyýetimiziň agzybirligini we jebisligini, häzirki nesilleriň ata-babalarymyzyň belent ruhy gymmatlyklaryna ygrarlydygyny alamatlandyrýar. Halkymyzyň durmuş ýörelgelerini özünde jemleýän bu mukaddes baýram türkmen halkynyň müňýyllyklaryň dowamynda geçen ýolunyň häzirki döwür üçin nusgalykdygyny görkezýär. Hajy Arkadagymyzyň beren gurbanlyk sadakasy hem häzirki döwürde pederleriň wesýetlerine eýerýän bagtyýar nesilleriň belent borja wepalydygynyň aýdyň güwäsidir.

Hajy Arkadagymyz gurbanlyk sadakasynyň berilýän binasynda özi üçin taýýarlanan ýere geçip, bu ýere ýygnananlaryň hemmesini mukaddes baýram bilen gutlady.

“Garaşsyz, baky Bitarap ýurdumyzda milli däp-dessurlarymyzy berjaý etmek üçin ähli şertler döredilýär. Raýatlarymyz mukaddes ýerlere zyýarat edip, metjitlere baryp, doga-dileg edýärler. Gurban baýramynyň bellenilýän aýynda hem raýatlarymyzyň 3 müňe golaýy yslam dünýäsiniň merkezi bolan Mekge şäherindäki keramatly Käbä zyýarat edip, haj parzyny berjaý edýärler. Ynha, Gurban baýramynyň birinji gününde Arkadag şäherinde siziň bilen gurbanlyk sadakasyna gatnaşýarys” diýip, Milli Liderimiz söze başlady. Hajy Arkadagymyz hemmeleri Gurban baýramy bilen ýene-de bir gezek gutlap, olaryň gurbanlyk sadakalarynyň, doga-dilegleriniň kabul bolmagyny dileg etdi. Şeýle-de Milli Liderimiz türkmen halkynyň gursagy Allaly halkdygyny belledi.

Gahryman Arkadagymyzyň: “Yslam dininiň gymmatlyklary biziň öňden gelýän türkmençilik däplerimiz bilen berk baglydyr. Biziň ýolumyz halkyň ýoludyr. Halkyň ýoly bolsa Hakyň, hakykatyň ýoludyr” diýen sözlerinden soňra, Ahal welaýatynyň ymamy tebärek çykdy. Ol hajy Arkadagymyzyň berýän sadakasynyň kabul bolmagyny dileg etdi. Gurbanlyk sadakasynda türkmen halkynyň adamda päklik, asyllylyk, ynsanperwerlik hem-de kämillige ymtylyş ýaly häsiýetleriň kemala gelmegine ýardam edýän, gadymdan gelýän ruhy-ahlak ýörelgeleriniň ösdürilmegi, medeni-ahlak gymmatlyklarynyň dowamata atarylmagy, ýurdumyzda öten-geçenlere hormat goýmak, hoşniýetlilik, wepalylyk ýaly asylly ýörelgeleriň berkarar bolmagy ugrunda yzygiderli tagalla edýän hajy Arkadagymyzyň we Arkadagly hajy Serdarymyzyň janlarynyň sag, ömürleriniň uzak bolmagy, ýurdumyzyň abadançylygynyň, halkymyzyň bagtyýar durmuşynyň berkarar bolmagyna gönükdirilen beýik işleriniň rowaçlyklara beslenmegi dileg edildi.

Soňra sadaka gatnaşyjylara nahar çekildi. Gurban baýramy ruhubelentligi hem-de milli bitewüligi alamatlandyrýan baýram hökmünde halkymyzyň durmuşynda möhüm orny eýeleýär. Gurbanlyk günlerinde milli tagamlaryň taýýarlanylmagy, sadakalaryň berilmegi we ýagşy dilegler edilmegi asyrlar aşyp gelýän asylly ýörelgeleriň dowamata atarylýandygynyň güwäsidir. Nahardan soň, asylly däbe görä, aýat-töwir okaldy.

Soňra türkmen halkynyň Milli Lideri, Türkmenistanyň Halk Maslahatynyň Başlygy hajy Arkadagymyz gurbanlyk sadakasynda okalan aýatlaryň, edilen doga-dilegleriň Allatagalanyň dergähinde kabul bolmagyny dileg edip, hemmelere sadaka gatnaşandyklary üçin minnetdarlyk bildirdi. Milli Liderimiz ýygnananlara alyp barýan asylly işlerinde mundan beýläk-de uly üstünlikleri arzuw edip, bu ýerden ugrady.

Aşgabat, 26-njy maý (TDH). Şu gün türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz ýurdumyzyň Halk Maslahatynyň hem-de Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň nobatdaky mejlisini geçirdi. Onda ýaşulularyň gatnaşmagynda geçirilýän wagyz-nesihat işleriniň netijeleri we ynsanperwer ýörelgeleri ilerletmegiň esasy ugurlary ara alnyp maslahatlaşyldy.

Häzirki döwürde ýurdumyzyň abadançylygyny pugtalandyrmak, halkymyzyň ýaşaýyş-durmuş şertlerini yzygiderli gowulandyrmak bilen baglanyşykly meseleler hormatly Prezidentimiz Serdar Berdimuhamedowyň durmuş ugurly döwlet syýasatynyň esasy ugurlarynyň biri bolup durýar. Şunda ýaşulularyň ilat arasynda alyp barýan işlerine möhüm ornuň degişlidigini bellemek gerek.

Gahryman Arkadagymyz Ýaşulular geňeşiniň nobatdaky mejlisinde onuň gün tertibine girizilen meseleler boýunça çykyş etdi.

Milli Liderimiz, ilki bilen, Ýaşulular mejlisine gatnaşyjylary «Garaşsyz, baky Bitarap Türkmenistan — bedew batly at-myradyň mekany» ýylynda eziz Diýarymyzda giňden bellenilýän, belent ahlak gymmatlyklaryny hem-de ynsanperwerligi dabaralandyrýan Gurban baýramy bilen tüýs ýürekden gutlady. “Goý, Gurban baýramy günlerinde okaljak aýat-töwirler, ediljek doga-dilegler Beýik Biribaryň dergähinde kabul bolsun!” diýip, Gahryman Arkadagymyz sözüni dowam etdi.

Halk Maslahatynyň Başlygy şu gün Ýaşulular geňeşinde ýerine ýetirilmeli işleriň ara alnyp maslahatlaşylýandygyny aýdyp, ýaşulular bilen duşuşyp, hal-ahwal soraşyp, halkymyzyň hal-ýagdaýy barada pikir alyşmak, ýerlerde ilatymyzyň ýaşaýyş-durmuş şertlerini has-da gowulandyrmak, ýurdumyzda durmuşa geçirilýän işleri wagyz-nesihat etmek babatda alnyp barylýan işler, obadyr şäherleriň ýagdaýy barada söhbetdeş bolmakçydygyny nygtady. Gahryman Arkadagymyz mejlisiň gün tertibine laýyklykda, halkyň ýaşaýyş-durmuş şertlerini gowulandyrmak, ýurdumyzda durmuşa geçirilýän özgertmeleri wagyz-nesihat etmek, ýerlerde ýaş nesilleri watançylyk ruhunda terbiýelemek, ýaş we köp çagaly maşgalalara, mümkinçiligi çäkli çagalara hemaýat bermek boýunça alnyp barylýan işleriň ýagdaýyna we beýleki meselelere serediljekdigini aýtdy.

«Garaşsyz, baky Bitarap Türkmenistan — bedew batly at-myradyň mekany» ýylynda täze döwrüň möhüm wezipelerinden ugur alyp, ähli tagallalarymyzy, gujur-gaýratymyzy, döredijilikli başlangyçlarymyzy döwletimiziň hem-de jemgyýetimiziň depginli ösüşini üpjün etmäge gönükdirdik. Halkymyzyň ýaşaýyş-durmuş derejesini yzygiderli ýokarlandyrmak, ýurdumyzyň syýasy-ykdysady, medeni-ynsanperwer ugurlarda ynamly ösýän, abraýly döwlet hökmünde dünýädäki ornuny has-da pugtalandyrmak ugrunda giň gerimli işler üstünlikli amala aşyrylýar» diýip, Milli Liderimiz sözüni dowam etdi.

Türkmenistanyň Halk Maslahaty Türkmenistanyň halkynyň bähbitlerine wekilçilik edýän ýokary wekilçilikli edara bolup durýar. Halk Maslahaty döwlet ähmiýetli wezipeleri amala aşyrmaga, halkymyzyň agzybirligini hem-de jebisligini has-da berkitmäge ýakyndan gatnaşýar. Garaşsyz, hemişelik Bitarap döwletimiziň hemmetaraplaýyn ösmegine ýardam bermek boýunça degişli işleri durmuşa geçirýär. Hormatly Arkadagymyz Halk Maslahatynyň ýanynda döredilen Ýaşulular geňeşiniň işine uly ähmiýet berilýändigini belläp, degişli Düzgünnama laýyklykda, Ýaşulular geňeşiniň döwlet ähmiýetli soraglary çözmekde geňeşçi-maslahat beriji topar bolup durýandygyna ünsi çekdi. Ýaşulular geňeşiniň agzalarynyň wagyz-nesihat etmek, ösüp gelýän ýaş nesillerimizi goldamak babatda ýerlerde alyp barýan işleri, ýaş we köp çagaly maşgalalara, mümkinçiligi çäkli çagalara hemaýat bermek boýunça geçirýän çäreleri agzybirligimizi pugtalandyrmaga, milli bitewüligimizi berkitmäge, watansöýüji nesilleri kemala getirmäge ýardam edýär.

“Häzirki döwürde mähriban halkymyz baradaky hemmetaraplaýyn alada döwletimiziň alyp barýan durmuş syýasatynyň ileri tutulýan ugurlarynyň biri bolup durýar. Ýurdumyzyň her bir raýaty ata Watanymyza belent söýgüsi bilen ýaşaýar we yhlasly zähmet çekýär. Abadançylygyň, bagtyýarlygyň, gülläp ösüşiň bähbidine döwlet adama, adam bolsa döwlete gulluk edýär. Bu bolsa «Döwlet adam üçindir!» diýen syýasatymyzyň üstünlikli durmuşa geçirilýändigini görkezýär” diýip, Halk Maslahatynyň Başlygy aýtdy. Döwletimiziň tagallasy bilen ýurdumyzda amala aşyrylýan özgertmeler ykdysadyýetimizi ähli ugurlar boýunça ösdürmäge hem-de ägirt uly ösüşleri gazanmaga, adamlaryň ýaşaýyş-durmuş şertlerini gowulandyrmaga mümkinçilik berýär. Mähriban halkymyzyň abadançylygy üçin durmuşa geçirilýän işlerde Ýaşulular geňeşiniň agzalarynyň aýratyn ähmiýetli orny bardyr.

Gahryman Arkadagymyz mejlisiň gün tertibiniň birinji meselesi bolan ýerlerde halkymyzyň ýaşaýyş-durmuş şertlerini gowulandyrmak, ýurdumyzda amala aşyrylýan işleri wagyz-nesihat etmek babatda alnyp barylýan işler barada çykyş etmek üçin Ýaşulular geňeşiniň agzalaryna söz berdi.

Mejlisde Aşgabat şäherine wekilçilik edýän ýaşuly I.Saparlyýew çykyş etdi. Ol, ilki bilen, Gahryman Arkadagymyzy we hemmeleri mukaddes Gurban baýramy, giňden bellenilen Aşgabat şäheriniň güni, “Soňky jaň” dabarasy mynasybetli gutlady.

Häzirki döwürde ata-babalarymyzyň müňýyllyklardan gözbaş alýan asylly we ynsanperwer ýörelgeleri Gahryman Arkadagymyzyň, Arkadagly Gahryman Serdarymyzyň tagallalary netijesinde işjeň ösdürilýär we dowamata atarylýar. Halkymyzyň döreden ýagşy dessurlarynyň ýurdumyzyň Bitaraplyk hukuk derejesiniň parahatçylyk söýüjilikli, hoşniýetli goňşuçylyk syýasaty bilen utgaşyklydygyny bellemek gerek. Munuň özi ýurdumyzda beýik işleriň asylly ýörelgeler bilen utgaşykly dowam etdirilýändiginiň beýanydyr. I.Saparlyýew Ýaşulular geňeşiniň agzalarynyň türkmen halkynyň gadymdan gelýän maslahatlaşmak, ula-kiçä hormat goýmak däplerine esaslanýan wagyz-nesihat işlerini alyp barýandygyny aýtdy. Şunda halkymyzyň köpýyllyk durmuş hem-de iş tejribesine daýanylýar. Bu bolsa döwrüň wajyp meseleleriniň oňyn çözgüdiniň tapylmagynda ähmiýetli ugur hasaplanýar. Aşgabat şäheriniň wekili öz öňlerinde durýan wezipeleriň mundan beýläk-de üstünlikli ýerine ýetirilmegi ugrunda tagallalaryny gaýgyrmajakdyklaryna ynandyrdy.

Milli Liderimiz çykyş üçin minnetdarlyk bildirip, Ahal welaýatyna wekilçilik edýän ýaşuly G.Aýlyýewe söz berdi.

G.Aýlyýew sözüniň başynda “Garaşsyz, baky Bitarap Türkmenistan — bedew batly at-myradyň mekany” ýylynyň şanly seneleri bilen tüýs ýürekden gutlady. Mukaddes Garaşsyzlygymyzyň 35 ýyllyk baýramynyň toýlanýan ýylynyň her bir gününiň taryhy ähmiýetli wakalara beslenmegi rowaçlykdan nyşandyr. Şeýle hem ol welaýatyň çäginde ýaşulularyň alyp barýan işleri, olaryň halkyň arasynda bolup, döwlet derejesinde kabul edilýän çözgütler, öňe sürülýän başlangyçlar babatda wagyz-nesihat çärelerini işjeň dowam edýändiklerini nygtady. Munuň özi Türkmenistanyň Halk Maslahatynyň Başlygy Gahryman Arkadagymyzyň başyny başlan işleriniň üstünlikli durmuşa geçirilmegine mynasyp goşantdyr. Häzirki döwürde halkymyzyň bagtyýar durmuşynyň berkarar bolmagy ugrunda döwlet derejesinde edilýän tagallalar oňyn netijesini berýär. Şunda halkymyzyň isleg-arzuwlary öwrenilip, olaryň öndürijilikli işi, abadan durmuşynyň üpjün edilmegi üçin ähli zerur şertler döredilýär. Ahal welaýatynyň wekili Gahryman Arkadagymyza we Arkadagly Gahryman Serdarymyza welaýatyň ähli ilatynyň adyndan hoşallygyny beýan etdi.

Soňra Halk Maslahatynyň Başlygy çykyş etmek üçin Balkan welaýatyna wekilçilik edýän ýaşuly A.Begjanowa söz berdi.

Balkan welaýatynyň wekili hemmeleri mukaddes Gurban baýramy bilen gutlady we sahawatly günlerde beriljek sadakalaryň, okaljak aýat-töwirleriň Beýik Biribaryň dergähinde kabul bolmagyny dileg etdi. Şeýle hem ol Berkarar döwletiň täze eýýamynyň Galkynyşy döwründe ösüşleriň belentliklerine tarap bedew bady bilen ynamly gadam urýan ýurdumyzyň her bir gününiň şanly wakalara, täze zähmet üstünliklerine beslenýändigini nygtady.

Häzirki döwürde Diýarymyzyň günbatar welaýatynyň ähli ilaty umumy ösüşiň bähbidine gönükdirilen giň möçberli işlere mynasyp goşant goşmak ugrunda zerur tagallalary edýär. Bu bolsa milli ykdysadyýetimiziň kuwwatlanmagyna, ýurdumyzda azyk we senagat harytlarynyň bolçulygyna oňyn täsirini ýetirýär. Munuň özi ýurdumyzda Gahryman Arkadagymyzyň, Arkadagly Gahryman Serdarymyzyň tagallalary netijesinde beýik işleriň amal edilýändiginiň beýanydyr. Balkan welaýatynda utgaşykly dolanyşykda işlejek gazturbinaly elektrik stansiýasynyň, Türkmenbaşy — Garabogaz — Gazagystan serhedi awtomobil ýolunyň gurluşygy batly depginde alnyp barylýar, hormatly Prezidentimiziň gatnaşmagynda “Gadamly” gury ýük gämisi ýüzüşe goýberildi. Munuň özi diňe bir welaýatyň ilatynyň däl, eýsem, tutuş halkymyzyň buýsanjyny goşalandyrdy. Zähmetsöýer halkymyz agzybirligiň, jebisligiň nusgasyny görkezip, öndürijilikli işleri bilen belent sepgitleri eýeleýär we uly zähmet üstünliklerini gazanýar.

Çykyş üçin minnetdarlyk bildirip, Gahryman Arkadagymyz Daşoguz welaýatyna wekilçilik edýän ýaşuly H.Zahyrowa söz berdi.

H.Zahyrow Milli Liderimiz bilen bilelikde häzirki döwrüň derwaýys meseleleri boýunça pikir alyşmaga döredilen mümkinçilik üçin hormatly Prezidentimize we Gahryman Arkadagymyza hoşallyk bildirdi. Şeýle hem ol hemmeleri Gurban baýramy bilen gutlady.

Ýurdumyzyň ähli künjeklerinde bolşy ýaly, Daşoguz welaýatynda hem halkymyzyň eşretli durmuşynyň berkarar bolmagy ugrunda ägirt uly işler alnyp barylýar. Welaýatyň ilatynyň öndürijilikli zähmet çekmegi, ähli amatlyklary özünde jemleýän döwrebap ýaşaýyş jaýlary bilen üpjünçiligi döwletimiziň hemişelik üns merkezinde saklanýar. Bu bolsa adamlary täze zähmet ýeňişlerine, belent sepgitlere ruhlandyrýar. Şeýle hem türkmen-özbek serhedinde köpugurly söwda bazarynyň açylmagy iki doganlyk halkyň arasyndaky gatnaşyklaryň hil taýdan täze derejä çykmagyny üpjün etdi. Häzirki döwürde ýurdumyzda mukaddes Garaşsyzlygymyzyň şanly 35 ýyllyk toýuna taýýarlyk işleri ýaýbaňlandyryldy. Şunda ýaşulularyň wagyz-nesihat işlerine möhüm ornuň degişlidigini bellemek gerek. Ösüp gelýän ýaş nesilleri watançylyk we zähmetsöýerlik ruhunda terbiýelemek möhüm meseleleriň hatarynda kesgitlenildi. Bu ugurda ýaşuly nesilleriň alyp barýan işlerine aýratyn orun degişlidir. H.Zahyrow çykyşynyň ahyrynda öňde durýan wezipeleriň abraý bilen ýerine ýetirilmegi ugrunda zerur tagallalaryň ediljekdigini nygtady.

Soňra Ýaşulular geňeşiniň mejlisi Lebap welaýatyna wekilçilik edýän ýaşuly E.Talipowyň çykyşy bilen dowam etdi. E.Talipow hem hemmeleri mukaddes Gurban baýramy bilen gutlady we Gahryman Arkadagymyza, mejlise gatnaşyjylara welaýatyň zähmetsöýer halkynyň iberen salamyny ýetirdi.

Häzirki döwürde welaýatyň ykdysadyýetiniň ähli pudaklarynda uly ösüşler gazanylýar, obalaryň, şäherleriň keşbi gün-günden gözelleşýär. Bu bolsa halkymyzyň Watanymyza bolan buýsanjyny, guwanjyny artdyrýar. Häzirki döwürde sebitiň ilaty hormatly Prezidentimiziň hem-de Gahryman Arkadagymyzyň yzygiderli tagallalary netijesinde döredilýän giň mümkinçiliklerden netijeli peýdalanyp, öndürijilikli zähmet çekýär. Bu bolsa adamlaryň ýaşaýyş-durmuş derejesiniň ýokarlanmagyny üpjün edýär. Bagtyýar zamananyň eşretli durmuşynyň hözirini görüp ýaşaýan adamlar Gahryman Arkadagymyza, Arkadagly Gahryman Serdarymyza çäksiz hoşallyklaryny aýdýarlar. Bellenilişi ýaly, ýakynda welaýatyň pileçileri uly zähmet üstünligini gazandylar. Lebap topragynda gallanyň bol hasyly kemala getirildi. Şeýle hem Aşgabat — Türkmenabat ýokary tizlikli awtomobil ýolunyň Mary — Türkmenabat böleginiň açylmagy ýurdumyzyň üstaşyr ulag geçelgesi hökmündäki derejesini pugtalandyrdy.

Soňra Gahryman Arkadagymyz Mary welaýatyna wekilçilik edýän ýaşuly A.Çaryýewe söz berdi.

A.Çaryýew häzirki döwürde welaýatyň çäklerinde önümçilik we durmuş maksatly binalaryň gurluşyklarynyň batly depginde dowam edýändigini, täze, döwrebap şäherçeleriň peýda bolýandygyny aýtdy. Bu bolsa welaýatyň ilatynyň has-da öndürijilikli işlemegine, halkyň ýaşaýyş-durmuş derejesiniň ýokarlanmagyna oňyn täsirini ýetirýär. Sebitiň ýaşululary ilat arasynda ýygy-ýygydan bolup, olar bilen ekerançylyk meýdanlarynda, oba durmuşynda we şäherlerde ýerine ýetirilýän işleriň netijeleri bilen gyzyklanyp durýarlar. Adamlaryň isleg-arzuwlaryny öwrenýärler. Bu bolsa döwletimiziň adam hakyndaky aladasynyň netijesinde kabul edilýän çözgütleriň ähmiýetini açyp görkezmekde wajypdyr. Şunuň bilen baglylykda, ýaşuly nesliň wekilleri kesgitlenen wezipeleriň abraý bilen ýerine ýetirilmegi ugrunda tagallalaryny gaýgyrmaýarlar.

Türkmenistanyň Halk Maslahatynyň Başlygy Gahryman Arkadagymyz manyly çykyşlar üçin minnetdarlyk bildirdi we Berkarar döwletiň täze eýýamynyň Galkynyşy döwründe tutumly işleri amala aşyrmakda, agzybirligimizi, jebisligimizi has-da pugtalandyrmakda baý zähmet hem-de durmuş tejribesi bolan ýaşulularyň maslahatlaryna uly ähmiýet berilýändigini aýtdy. Olaryň her bir maşgalada asudalygy we agzybirligi üpjün etmekde, giň gerimli jemgyýetçilik-syýasy, durmuş-ykdysady özgertmeleri durmuşa geçirmekde alyp barýan işleri, maslahatlary, goldawlary, öwüt-ündewleri örän möhümdir.

Soňra Milli Liderimiz gün tertibiniň ikinji meselesi bolan ýerlerde ösüp gelýän ýaş nesilleri watançylyk ruhunda terbiýelemek, ýaş we köp çagaly maşgalalara, mümkinçiligi çäkli çagalara hemaýat bermek boýunça alnyp barylýan işler barada çykyş etmek üçin Türkmenistanyň Halk Maslahatynyň Diwanynyň iş dolandyryjysy R.Bazarowa söz berdi.

R.Bazarow çykyşynyň başynda Gahryman Arkadagymyzy we Arkadagly Gahryman Serdarymyzy, mejlise gatnaşyjylary «Garaşsyz, baky Bitarap Türkmenistan — bedew batly at-myradyň mekany» ýylynda bellenilýän Gurban baýramy mynasybetli tüýs ýürekden gutlady.

Ýurdumyzda ýaş nesilleriň sagdynlygy we abadan durmuşy hakyndaky aladanyň döwlet syýasatynyň möhüm ugurlarynyň birine öwrülendigini belläp, Halk Maslahatynyň Diwanynyň iş dolandyryjysy hereket edýän milli kanunçylyga laýyklykda, ýaş we köp çagaly maşgalalara, mümkinçiligi çäkli çagalara döwlet derejesinde durmuş goldawynyň yzygiderli berilýändigini nygtady. Şunda nesilleriň durmuş goraglylygyny üpjün etmek meselelerine zerur üns berilýär. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň işinde halkymyzyň taryhyň dowamynda döreden ynsanperwer ýörelgelerine aýratyn orun degişlidir. Gahryman Arkadagymyzyň başlangyjy bilen döredilen Ýaşulular geňeşiniň agzalary ýaş nesilleriň halkymyza, mähriban Watanymyza wepaly ýaşlar bolup ýetişmekleri ugrunda zerur tagallalary edýärler.

R.Bazarow geňeşiň agzalarynyň çagalaryň mähriban halkymyza, Garaşsyz Watanymyza, il-günümize wepaly şahsyýetler bolup ýetişmekleri bilen bagly soraglara seredýändigini nygtap, Gahryman Arkadagymyzyň çagalara hossarlyk edip, howandarlyk bilen garap, olaryň halkyň Arkadagynyň beýik adyny götermekleri üçin ähli mümkinçilikleri döredendigini, şunda Milli Liderimiziň belleýşi ýaly, ýurdumyzda hossarsyz çaganyň ýokdugyny, her bir çaganyň arkasynda döwletiň durandygyny, hormatly Prezidentimiziň, Gahryman Arkadagymyzyň durandygyny nygtady. Şeýle hem R.Bazarow Gahryman Arkadagymyza ýakynda doglan we hossarsyz galyp, Aşgabat şäheriniň çagalar öýünde terbiýelenilýän gyzjagaza mynasyp at dakmak baradaky teklip bilen ýüzlendi.

Hemişe ýurdumyzyň ýaş nesilleri, aýratyn-da, howandarlyga mätäç çagalar bilen duşuşmagyň, olaryň hal-ahwaly, saglyk ýagdaýy, okuwy, höwes edýän ugurlary bilen gyzyklanmagyň çagalarda guwanç duýgusyny döredýändigini nygtap, R.Bazarow Ýaşulular geňeşiniň nobatdaky mejlisiniň Çagalary goramagyň halkara gününiň öň ýanynda geçirilmeginde aýratyn many bardygyna ünsi çekdi. Şunda çagalary terbiýelemekde, olary edepli-ekramly, ilhalar, Watana wepaly nesil edip ýetişdirmekde ýaşuly nesliň orny uludyr. R.Bazarow Watanymyzyň geljegi bolan ýaş nesiller hakynda edýän atalyk aladalary, döredýän mümkinçilikleri üçin Gahryman Arkadagymyza hoşallyk bildirip, Milli Liderimiziň janynyň sag, belent başynyň aman bolmagyny, döwletli tutumlarynyň rowaçlyklara beslenmegini arzuw etdi.

Gahryman Arkadagymyz Ýaşulular geňeşiniň agzalarynyň teklibini oňlap, bu çaganyň aýlaryň seresi mukaddes Gurban aýynda doglandygyny nazara alyp, oňa Arkadag gyzy Gurbangül diýip at dakmagy maslahat berdi. Munuň özi ýurdumyzda sahawatly senelere goýulýan sarpanyň aýdyň nyşany bolar. Milli Liderimiz ýurdumyzda hossarsyz-howandarsyz çagalaryň ýokdugyny, olaryň arkasynda dag ýaly bolup kuwwatly döwletimiziň durandygyny ýene bir ýola belledi.

Türkmenistanyň Halk Maslahatynyň Başlygy Garaşsyz, hemişelik Bitarap döwletimizde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň serişdeleriniň hasabyna çagajyklary goldamak, saglygyny dikeltmek, olaryň hemaýata mätäçlerine saglygy goraýyş, durmuş maksatly kömekleri bermek we müňlerçe çaganyň jemgyýetiň hem-de döwletiň durmuşyna doly derejede gatnaşmaga bolan hukugyny üpjün etmek boýunça ähli zerur şertleriň döredilendigini nygtady. Ýurdumyzda çagalaryň saglygyny goramaga gönükdirilen, häzirki zamanyň iň ýokary talaplaryna laýyk gelýän enjamlar bilen üpjün edilen sagaldyş-dikeldiş merkezleri gurulýar. Arkadag şäherindäki çagalar sagaldyş-dikeldiş merkezinde döredilen amatly şertler bolsa döwlet tarapyndan halkymyzyň, çagalaryň geljegi, saglygy hakyndaky düýpli aladalaryň aýdyň mysalydyr. “Sahawat ýoly türkmeniň ýoludyr. Şoňa görä-de, biz geljekde hem hemaýata mätäç çagalara kömek etmek boýunça alyp barýan işlerimizi güýçlendirmegi maksat edinýäris” diýip, Gahryman Arkadagymyz aýtdy.

R.Bazarow gün tertibiniň üçünji meselesi boýunça çykyş edip, Ýaşulular geňeşiniň mejlislerinde kabul edilýän çözgütleriň işleriň ilerlemegine oňyn täsirini ýetirýändigini belledi. Düzgünnama laýyklykda, Ýaşulular geňeşi Gahryman Arkadagymyzyň başlyklyk etmeginde hereket edýär. Geňeşiň düzümi Milli Liderimiziň Karary bilen tassyklanylýar hem-de oňa degişli üýtgetmeler girizilýär. Bu barada aýtmak bilen, Halk Maslahatynyň Diwanynyň iş dolandyryjysy häzirki wagtda ähli welaýatlarda we Aşgabat şäherinde Karar bilen bellenen Ýaşulular geňeşiniň agzalarynyň bardygyny belläp, Arkadag şäherine hem mynasyp wekilçilik etjek ýaşuly agzalar barada Gahryman Arkadagymyzdan öz maslahatlaryny bermegini haýyş etdi.

Milli Liderimiz Ahal welaýatyna wekilçilik edýän Arkadag şäheriniň ýaşaýjysy K.Täşliýewiň, şol bir wagtyň özünde, Arkadag şäherine hem wekilçilik edýändigini aýdyp, özüniň hem Türkmenistanyň Halk Maslahatynyň ýolbaşçysy hökmünde Arkadag şäherine wekilçilik etjekdigini belledi.

Gahryman Arkadagymyz häzirki döwürde ýurdumyzy durmuş-ykdysady taýdan mundan beýläk-de ösdürmek, jemgyýetiň we döwletiň iň ýokary gymmatlygy bolan her bir adamyň abadan durmuşda ýaşamagy, döredijilikli zähmet çekmegi, mynasyp dynç almagy üçin hemmetaraplaýyn şert döretmek, ýaşlarymyzy watançylyk ruhunda terbiýelemek meseleleriniň döwlet syýasatynyň esasy ugurlarynyň biri hökmünde kesgitlenendigini aýtdy.

“Nesip bolsa, geljekde hem mähriban halkymyzyň goldawy bilen Garaşsyz, baky Bitarap Watanymyzyň dünýädäki abraýyny has-da ýokarlandyryp, raýatlarymyzyň abadan we bagtyýar durmuşda ýaşamagy ugrunda alyp barýan tutumly işlerimizi güýçli depginlerde dowam etdireris” diýip, Milli Liderimiz şu gün Ýaşulular geňeşiniň agzalary bilen birnäçe wezipelere seredilendigine ünsi çekdi. “Men siziň her biriňiziň ýurdumyzda durmuşa geçirilýän işlere mynasyp goşant goşjakdygyňyza berk ynanýaryn” diýip, Gahryman Arkadagymyz sözüni jemledi.

Şunlukda, Türkmenistanyň Halk Maslahatynyň hem-de Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň nobatdaky mejlisi öz işini tamamlady. Gahryman Arkadagymyz oňa gatnaşyjylara berk jan saglyk, maşgala abadançylygyny, alyp barýan işlerinde uly üstünlikleri arzuw etdi