Aşgabat, 5-nji ýanwar (TDH). Şu gün hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Onda ýurdumyzyň oba hojalyk toplumynda we welaýatlarda alnyp barylýan işler bilen baglanyşykly meselelere garaldy.

Ilki bilen, Ahal welaýatynyň häkimi T.Nurmyradowa söz berildi. Ol welaýatda möwsümleýin oba hojalyk işleriniň barşy barada hasabat berdi.

Bellenilişi ýaly, häzirki wagtda bugdaý ekilen meýdanlarda mineral dökünler bilen iýmitlendirmek işleri alnyp barylýar. Gowaça ekişine taýýarlyk görmegiň çäklerinde sürüm, tekizleýiş, topragy mineral dökünler bilen gurplandyrmak işleri dowam etdirilýär. Daýhanlary ýokary hilli tohumlar bilen üpjün etmek üçin gowaça tohumyny taýýarlamak, ekişde ulanyljak oba hojalyk tehnikalaryny abatlamak, talabalaýyk saklamak babatda zerur çäreler görülýär. Şeýle hem häkim welaýatyň çägindäki medeni-durmuş maksatly binalaryň ýyladyş ulgamlaryny kadaly işletmek, ilaty elektrik energiýasy, tebigy gaz we agyz suwy bilen bökdençsiz üpjün etmek boýunça alnyp barylýan işler, şu ýyl welaýatda açylyp ulanmaga berilmegi meýilleşdirilýän desgalardaky gurluşyk işleriniň ýagdaýy barada hasabat berdi.

Hormatly Prezidentimiz hasabaty diňläp, oba hojalygynda dowam edýän möwsümleýin işleriň agrotehnikanyň kadalaryna laýyklykda ýerine ýetirilmeginiň, ýazky ekiş möwsümine talabalaýyk taýýarlyk görmegiň möhüm ähmiýetini belledi we bu babatda häkime degişli tabşyryklary berdi. Şeýle-de döwlet Baştutanymyz welaýatda şu ýyl üçin meýilleşdirilen işleriň ýokary hilli, öz wagtynda ýerine ýetirilmegini gözegçilikde saklamagy tabşyrdy.

Soňra Balkan welaýatynyň häkimi H.Aşyrmyradow welaýatyň ekerançylyk meýdanlarynda alnyp barylýan oba hojalyk işleri barada hasabat berdi.

Nygtalyşy ýaly, şu günler sebitiň bugdaý ekilen meýdanlarynda degişli ideg işleri, hususan-da, mineral dökünler bilen iýmitlendirmek işleri ýerine ýetirilýär. Gowaça ekiljek meýdanlarda sürüm we tekizleýiş, ýazky ekiş möwsüminde ulanyljak tehnikalary, pagta öndürijiler üçin gowaça tohumyny taýýarlamak işleri alnyp barylýar. Şeýle-de häkim welaýatyň çägindäki ýaşaýyş jaýlarynyň, jemgyýetçilik binalarynyň ýyladyş ulgamlaryny kadaly işletmek, ilaty elektrik energiýasy, tebigy gaz we agyz suwy bilen üpjün etmek boýunça görülýän çäreler, şu ýyl welaýatda açylyp ulanmaga berilmegi meýilleşdirilýän desgalardaky gurluşyklaryň barşy barada hasabat berdi.

Döwlet Baştutanymyz hasabaty diňläp, agrotehnikanyň kadalarynyň berk berjaý edilmeginiň durnukly ösýän oba hojalygynyň binýady bolup durýandygyny belledi we häkime welaýatda oba hojalyk işleriniň talabalaýyk alnyp barylmagyny yzygiderli gözegçilikde saklamagy tabşyrdy. Şunuň bilen birlikde, hormatly Prezidentimiz ýurdumyzy durmuş-ykdysady taýdan ösdürmäge gönükdirilen maksatnamalarda göz öňünde tutulan wezipeleriň üstünlikli durmuşa geçirilmeginiň zerur talap bolup durýandygyna ünsi çekip, bu babatda degişli görkezmeleri berdi.

Daşoguz welaýatynyň häkimi D.Babaýew welaýatda möwsümleýin oba hojalyk işleriniň barşy barada hasabat berdi.

Hasabatda bellenilişi ýaly, şu ýylyň hasyly üçin gowaça ekişine taýýarlyk görmegiň çäklerinde meýdanlarda sürüm, tekizleýiş, mineral dökünler bilen gurplandyrmak işleri utgaşykly alnyp barylýar. Ýokary hilli gowaça tohumyny, ekişde ulanyljak oba hojalyk tehnikalaryny we gurallary möwsüme taýýarlamak babatda zerur çäreler görülýär. Mundan başga-da, gyş paslynyň dowam edýän günlerinde welaýatyň çägindäki ýaşaýyş jaýlarynyň, medeni-durmuş maksatly binalaryň ýyladyş ulgamlaryny kadaly işletmek, ilaty elektrik energiýasy, tebigy gaz we agyz suwy bilen bökdençsiz üpjün etmek boýunça görülýän çäreler, şu ýyl sebitde açylyp ulanmaga berilmegi meýilleşdirilýän desgalardaky gurluşyk işleriniň ýagdaýy hakynda hasabat berildi.

Hormatly Prezidentimiz hasabaty diňläp, oba hojalyk önümçiliginiň ähli tapgyrlarynda toplumlaýyn çemeleşmäniň üpjün edilmeginiň ekinlerden bol hasyl almaga ýardam berýändigini belledi we häzirki wagtda welaýatda dowam edýän agrotehniki çäreleriň ýokary hilli ýerine ýetirilmegini gözegçilikde saklamagy tabşyrdy. Döwlet Baştutanymyz ýurdumyzy durmuş-ykdysady taýdan ösdürmäge gönükdirilen maksatnamalara laýyklykda, şu ýyl welaýatda açylyp ulanmaga berilmegi göz öňünde tutulýan desgalardaky gurluşyk işleriniň öz wagtynda ýerine ýetirilmegini gözegçilikde saklamak barada-da tabşyryklary berdi.

Lebap welaýatynyň häkimi D.Genjiýew sebitde dowam edýän möwsümleýin oba hojalyk işleri barada hasabat berdi.

Bellenilişi ýaly, hormatly Prezidentimiziň oba hojalyk pudagyny yzygiderli ösdürmek, ekinleriň hasyllylygyny ýokarlandyrmak babatda öňde goýan wezipelerinden ugur alnyp, welaýatda möwsümleýin oba hojalyk işleri dowam edýär. Bu işleriň çäklerinde bugdaý ekilen meýdanlarda degişli ideg işleri agrotehnikanyň kadalaryna laýyklykda alnyp barylýar. Gowaça ekiljek meýdanlarda sürüm, tekizleýiş, çil çekmek, ýuwuş suwuny tutmak, topragy mineral dökünler bilen gurplandyrmak işleri ýerine ýetirilýär. Ýazky ekiş möwsüminde we ideg işlerinde ulanyljak oba hojalyk tehnikalaryny taýýarlamak ugrunda degişli çäreler görülýär. Şeýle-de häkim gyş paslynyň dowam edýän günlerinde welaýatyň çägindäki ýaşaýyş jaýlarynyň, edara-kärhanalaryň, medeni-durmuş maksatly binalaryň ýyladyş ulgamlaryny talabalaýyk işletmek, ilaty elektrik energiýasy, tebigy gaz we agyz suwy bilen bökdençsiz üpjün etmek boýunça görülýän çäreler, «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna», Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilýän desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, agrotehniki çäreleriň talabalaýyk geçirilmeginiň ekinlerden ýokary hasyl almak bilen bir hatarda, ýer-suw serişdelerinden hem netijeli peýdalanmaga mümkinçilik berýändigini belledi we häkime degişli tabşyryklary berdi. Mundan başga-da, ýurdumyzy durmuş-ykdysady taýdan ösdürmek boýunça maksatnamalara laýyklykda, welaýatda ýerine ýetirilýän işleri gözegçilikde saklamak babatda degişli görkezmeler berildi.

Mary welaýatynyň häkimi D.Annaberdiýew welaýatda möwsümleýin oba hojalyk işleriniň barşy barada hasabat berdi.

Nygtalyşy ýaly, sebitde bugdaýyň bol hasylyny ösdürip ýetişdirmek üçin ekin meýdanlarynda agrotehnikanyň kadalaryna laýyklykda mineral dökünler bilen iýmitlendirmek, ösüş suwuny tutmak işleri alnyp barylýar. Gowaça ekiljek meýdanlarda sürüm we tekizleýiş işleri ýerine ýetirilýär. Pagta öndürijileri ýokary hilli gowaça tohumy bilen üpjün etmek, ýazky oba hojalyk işlerinde ulanyljak tehnikalary möwsüme doly taýýar etmek boýunça zerur işler alnyp barylýar. Welaýatda ösdürilip ýetişdirilen gant şugundyrynyň hasylyny ýitgisiz ýygnap almak, ony gaýtadan işlemek babatda zerur çäreler görülýär. Mundan başga-da, häkim welaýatdaky ýaşaýyş jaýlarynyň, mekdepleriň, çagalar baglarynyň ýyladyş ulgamlaryny kadaly işletmek, ilaty elektrik energiýasy, tebigy gaz we agyz suwy bilen bökdençsiz üpjün etmek boýunça alnyp barylýan işler, Oba milli maksatnamasyny durmuşa geçirmegiň çäklerinde welaýatda dowam edýän gurluşyk işleriniň ýagdaýy barada hasabat berdi.

Hormatly Prezidentimiz hasabaty diňläp, häzirki wagtda oba hojalygynda dowam edýän jogapkärli möwsümiň agrotehniki möhletlerde geçirilmeginiň zerurdygyny aýtdy we welaýatyň ekerançylyk meýdanlarynda alnyp barylýan işleri gözegçilikde saklamagy tabşyrdy. Şeýle hem döwlet Baştutanymyz Oba milli maksatnamasyna laýyklykda, welaýatda şu ýyl üçin meýilleşdirilen işleriň talabalaýyk, öz wagtynda ýerine ýetirilmegini üpjün etmek barada tabşyryklary berdi.

Soňra Ministrler Kabinetiniň Başlygynyň orunbasary T.Atahallyýew “Garaşsyz, baky Bitarap Türkmenistan — bedew batly at-myradyň mekany” diýlip yglan edilen täze ýylda ýurdumyzda möwsümleýin oba hojalyk işleriniň barşy barada hasabat berdi.

Bellenilişi ýaly, bugdaý ekilen meýdanlarda agrotehnikanyň kadalaryna laýyklykda ideg etmek, hususan-da, mineral dökünler bilen iýmitlendirmek işleri alnyp barylýar. Şunda oba hojalyk tehnikalarynyň netijeli işledilmegine aýratyn üns berilýär. Gowaça ekişine taýýarlyk görmegiň çäklerinde sürüm, tekizleýiş, topragy mineral dökünler bilen gurplandyrmak işleri dowam edýär. Ekiş möwsüminde pagta öndürijileri ýokary hilli gowaça tohumy bilen üpjün etmek üçin ähli zerur işler alnyp barylýar. Ýazky ekişde ulanyljak oba hojalyk tehnikalaryny möwsüme taýýarlamak we talabalaýyk saklamak boýunça hem zerur çäreler görülýär.

Hormatly Prezidentimiz hasabaty diňläp, ýurdumyzda azyk bolçulygyny üpjün edýän oba hojalyk pudagynyň milli ykdysadyýetimizdäki strategik ornuna ünsi çekdi we wise-premýere pudagy mundan beýläk-de döwrüň talabyna laýyklykda ösdürmek boýunça alnyp barylýan işleri dowam etdirmegi tabşyrdy.

Soňra döwlet Baştutanymyz iş maslahatyna gatnaşyjylara ýüzlenip, möwsümleýin oba hojalyk işlerine ýene-de bir gezek ünsi çekdi hem-de welaýatlaryň bugdaý meýdanlarynda ideg işlerini talabalaýyk geçirmegiň, gowaça ekiljek ýerlerde sürüm we tekizleýiş işlerini agrotehniki kadalara laýyk ýerine ýetirmegiň, pagta öndürijileri ýokary hilli gowaça tohumlary bilen ýeterlik möçberde üpjün etmegiň, ýaz ekişinde ulanyljak oba hojalyk tehnikalaryny möwsüme talabalaýyk taýýarlamagyň möhümdigini belledi.

Arkadagly Gahryman Serdarymyz welaýatlarda pagta we bugdaý öndürijiler bilen hyzmat ediji edara-kärhanalaryň arasynda 2024-2025-nji ýyllaryň pagta, 2025-2026-njy ýyllaryň bugdaý hasyly üçin ýerine ýetirilen işler boýunça hasaplaşyklaryň geçirilişini berk gözegçilikde saklamagy, Mary welaýatynda ýetişdirilen gant şugundyrynyň hasylyny öz wagtynda ýygnap almak boýunça zerur çäreleri görmegi, welaýatlarda ýaşaýyş jaýlarynyň, mekdepleriň, çagalar baglarynyň ýyladyş ulgamlarynyň kadaly işleýşini hem-de ilatyň elektrik energiýasy, tebigy gaz we agyz suwy bilen üpjünçiligini aýratyn gözegçilikde saklamagy, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalarda gurluşyk işleriniň barşyna berk gözegçilik etmegi tabşyrdy.

Hormatly Prezidentimiz Serdar Berdimuhamedow iş maslahatyny jemläp, oňa gatnaşanlara berk jan saglyk, maşgala abadançylygyny, alyp barýan işlerinde uly üstünlikleri arzuw etdi.

2025-nji ýyly jemlän geçen hepde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow tarapyndan başy başlanyp, hormatly Prezidentimiz Serdar Berdimuhamedowyň baştutanlygynda üstünlikli durmuşa geçirilýän, Watanymyzyň mundan beýläk-de ösdürilmegine, bütin dünýäde parahatçylygyň pugtalandyrylmagyna gönükdirilen ýurdumyzyň içeri we daşary syýasatynyň ähli ugurlarynda zähmet üstünliklerine beslendi. Ýurdumyzyň ýeten täze sepgitleriniň özboluşly dowamy bolan 2026-njy ýyla mynasyp gadam basyldy. Täze ýylyň «Garaşsyz, baky Bitarap Türkmenistan — bedew batly at-myradyň mekany» atly şygary geljek üçin möhüm maksatlary özünde jemleýär. Çünki ýelden ýüwrük ahalteke bedewleri Watanymyzyň döredijilik kuwwatynyň, ösüşiň täze belentliklerine tarap ynamly gadamlarynyň, halkymyzyň tutanýerli zähmetiniň nyşanydyr.

29-njy dekabrda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Özbegistan Respublikasynyň Prezidenti Şawkat Mirziýoýewiň arasynda telefon arkaly söhbetdeşlik geçirildi. Taraplar birek-biregi täze — 2026-njy ýyl mynasybetli gutlap, iki ýurduň doganlyk halklaryna ösüş we abadançylyk arzuw etdiler. Prezident Şawkat Mirziýoýew hormatly Prezidentimize mähirli salamyny, iň gowy arzuwlaryny beýan etdi.

Söhbetdeşligiň barşynda Gahryman Arkadagymyz goňşy ýurduň döwlet Baştutanynyň 26-njy dekabrda Özbegistanyň parlamentine we halkyna ýüzlenmesinde 2026-njy ýyly «Mahalleleri ösdürmek we jemgyýeti özgertmek ýyly» diýip yglan etmeginiň ähmiýetini belledi. Türkmenistanyň Halk Maslahatynyň Başlygy maksatlaryň umumylygyny nazara alyp, Türkmenistan bilen Özbegistanyň arasyndaky strategik hyzmatdaşlygyň ugurlaryň giň gerimi boýunça has-da ösdüriljekdigine ynam bildirdi.

Türkmen halkynyň Milli Lideri 2026-njy ýylda Türkmenistanyň we Özbegistanyň daşary syýasat edaralarynyň arasyndaky hyzmatdaşlygyň işjeň häsiýete eýe boljakdygyna ynam bildirip, gadam basylan ýylyň ilkinji günlerinden başlap ýurtlarymyzda geçirilmegi meýilleşdirilýän iri halkara çäreleriň guramaçylyk meselelerini ara alyp maslahatlaşmak boýunça bilelikdäki işlere girişmegi teklip etdi. Şunuň bilen baglylykda, Gahryman Arkadagymyz 2026-njy ýylda Türkmenistanda geçirilmegi meýilleşdirilýän Merkezi Aziýa ýurtlarynyň we Azerbaýjanyň döwlet Baştutanlarynyň konsultatiw duşuşygynyň, GDA-nyň döwlet Baştutanlarynyň Geňeşiniň nobatdaky mejlisiniň guramaçylyk meseleleri barada durup geçdi. Merkezi Aziýa, Aral we Hazar sebitlerinde, Amyderýanyň suw meselelerini çözmäge gönükdirilen hereketleriň bilelikdäki maksatnamasyny işläp düzmegiň zerurdygy nygtaldy.

2025-nji ýylyň jemleri we geljekki meýilnamalar türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenkonyň arasynda geçirilen telefon arkaly söhbetdeşligiň esasy mazmunyny düzdi.

Bellenilişi ýaly, 2025-nji ýylda türkmen-rus gatnaşyklary netijeli häsiýete eýe boldy we möhüm wakalara beslendi. Gahryman Arkadagymyz hormatly Prezidentimiziň Beýik Ýeňşiň 80 ýyllygy mynasybetli dabaralara hem-de Garaşsyz Döwletleriň Arkalaşygyna gatnaşyjy ýurtlaryň döwlet Baştutanlarynyň ýokary derejeli resmi däl duşuşygyna gatnaşmak üçin Russiýa Federasiýasyna amala aşyran saparlarynyň ähmiýetine ünsi çekdi. Şunuň bilen baglylykda, Beýik Watançylyk urşunda gazanylan Ýeňşiň şanly senesi mynasybetli «Hatyra otlusy» başlangyjynyň Türkmenistanda goldanandygy, oňa ýurdumyzyň mekdep okuwçylarynyň gatnaşandygy nygtaldy.

Türkmenistanyň we Russiýanyň arasyndaky parlamentara gatnaşyklar yzygiderli ösdürilýär. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewanyň ýolbaşçylygyndaky Türkmenistanyň wekiliýetiniň «Modanyň Arkalaşygy» atly IV halkara forumyň işine gatnaşmak üçin Sankt-Peterburg şäherine amala aşyran sapary iki ýurduň arasyndaky ynsanperwer hyzmatdaşlygy ösdürmekde möhüm ädim boldy.

Gahryman Arkadagymyz Türkmenistanyň Russiýa bilen ikitaraplaýyn strategik hyzmatdaşlyk ruhunda köpugurly we ulgamlaýyn häsiýete eýe bolan özara gatnaşyklary, köptaraplaýyn formatlaryň çäklerindäki dialogy dowam etdirmäge taýýardygyny tassyklady. Şunuň bilen baglylykda, GDA-nyň döwlet Baştutanlarynyň Geňeşiniň çözgüdine laýyklykda, Arkalaşygyň sammitini 2026-njy ýylyň 9-njy oktýabrynda Türkmenistanda, has takygy, «Awaza» milli syýahatçylyk zolagynda geçirmek göz öňünde tutulýar. Şeýle-de Türkmenistanyň GDA-da başlyklyk etmeginiň çäklerinde zenanlaryň dialogyny, GDA-nyň Parlamentara Assambleýasynyň mejlisini, demografiýa meseleleri boýunça maslahaty geçirmek meýilleşdirilýär.

Türkmen halkynyň Milli Lideri türkmen-rus hyzmatdaşlygynyň ösdürilmeginde Walentina Matwiýenkonyň uly şahsy goşandyny nygtap, 2026-njy ýylda Russiýa Federasiýasynyň Federal Ýygnagynyň Federasiýa Geňeşiniň Başlygy bilen meýilleşdirilýän gepleşikleriň döwletara gatnaşyklary täze derejä çykarjakdygyna ynam bildirdi.

Türkmenistanda 2026-njy ýyl milli ykdysadyýetiň ähli ugurlarynda gazanylan üstünlikler we ýetilen belent sepgitler bilen uly ruhubelentlikde, şatlyk-şowhunda garşylanyldy. Täze ýyl mynasybetli dabaralar ýurdumyzyň ähli künjegini gurşap aldy. Baýramçylyk dabaralarynyň geçirilýän ýerlerinde oturdylan, dürli öwüşginde ýalkym saçýan arçalaryň daşyndan bagtyýar çagalar gol tutuşyp aýlandylar. Medeniýet we sungat ussatlarynyň çykyşlary dabaralara aýratyn öwüşgin çaýdy.

Paýtagtymyzyň köp sanly ýaşaýjylary we myhmanlary täze ýyly “Älem” medeni-dynç alyş merkeziniň öňündäki ertekiler şäherjigini ýatladýan meýdançada — ýurdumyzyň Baş arçasynyň ýanynda garşyladylar. Belli aýdymçylar çykyşlarynda täze taryhy döwürde Watanymyzyň ösüşlerini wasp etdiler. Şeýle hem milli aýdym-sazlar, täze ýyl arzuwlaryna beslenen kompozisiýalar ýerine ýetirildi.

Alypbaryjylar bu ýere ýygnananlaryň adyndan Gahryman Arkadagymyzy we hormatly Prezidentimizi Täze ýyl baýramy bilen gutlap, berk jan saglyk, bagtyýarlyk, Watanymyzyň rowaçlygynyň bähbidine amala aşyrylýan özgertmeleriň üstünliklere beslenmegini arzuw etdiler. Däp bolşy ýaly, teleköpri arkaly ýurdumyzyň welaýatlarynyň merkezlerindäki we Arkadag şäherindäki dabaralar paýtagtymyzda geçirilen dabara bilen özara baglanyşdyryldy.

Täze ýylyň öňüsyrasynda hormatly Prezidentimiz Serdar Berdimuhamedowyň Täze ýyl Gutlagy bilen halkymyza ýüzlenmegi dabaralaryň ýatdan çykmajak pursadyna öwrüldi. Döwlet Baştutanymyz geçen ýylyň ýurdumyzyň durmuşynyň ähli ulgamlaryny gurşap alan möhüm wakalaryna ünsi çekip, içeri we daşary syýasatda gazanylan oňyn netijeler barada durup geçdi. Bellenilişi ýaly, 2025-nji ýyl Garaşsyz Watanymyzyň täze taryhynda halkymyzyň durmuşyny üstünliklere beslän ýyllaryň biri boldy. “Täze ýyl abadançylygyň, rysgal-berekediň ýyly bolsun! Maşgala ojaklaryňyza agzybirlik, döwletlilik ýar bolsun! Täze ýyl rowaçlyk, bagt getirsin! Täze ýyl bedew bady bilen ähliňizi maksat-myrada ýetirsin!” diýip, döwlet Baştutanymyz Gutlagyny jemledi.

Dabara paýtagtymyzyň asmanyny bezän ajaýyp feýerwerk bilen tamamlandy.

Geçen hepdäniň Täze ýyl mynasybetli dabaralara baý bolandygyny aýratyn bellemek gerek. Baýramçylygyň öňüsyrasynda paýtagtymyzda daşary ýurt estrada aýdymçylarynyň konsertleri guraldy. Gyşky oýunlar sport toplumynda geçirilen aýdym-sazly dabaralarda meşhur aýdymçylar — “Ýewrowideniýe” bäsleşiginde baýrakly orna eýe bolan eýran-şwed aýdymçysy Araş, “Mot” lakamy bilen tanalýan russiýaly aýdymçy Matweý Melnikow hem-de türkiýeli aýdymçy Semijenk çykyş etdiler. Olaryň şowhunly çykyşlary Halkara parahatçylyk we ynanyşmak ýylynyň dowamyndaky giň gerimli çäreleriň möhüm bölegine öwrüldi. Baýramçylyklaryň öňüsyrasynda dünýä belli ýyldyzlaryň ýurdumyzda konsertlerini guramak Gahryman Arkadagymyzyň başlangyjy bilen asylly däbe öwrülip, ol hormatly Prezidentimiz tarapyndan üstünlikli dowam etdirilýär. Täze ýylyň bosagasynda geçirilýän şeýle medeni çäreler halkymyza ýatdan çykmajak baýramçylyk şatlygyny eçilýär.

Täze ýylyň ilkinji güni mynasybetli çäreler Arkadag şäherindäki meýdançada Döwlet baýdagynyň galdyrylmagy we dürli reňkdäki şarlaryň asmana uçurylmagy bilen badalga aldy. Aýazbaba we Garpamyk owadan bezelen konsert meýdançalarynda medeniýet hem-de sungat ussatlarynyň, çagalaryň şowhunly çykyşlaryna goşuldylar. Baýramçylyk dabaralary Gurbanguly Berdimuhamedow adyndaky çagalar sagaldyş-dikeldiş merkezinde dowam etdi. Bu ýerde aýdym-sazly çykyşlar bilen utgaşan dabaranyň dowamynda çagalara hormatly Prezidentimiz Serdar Berdimuhamedowyň hem-de türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň adyndan baýramçylyk sowgatlary — süýjülikler, okuw esbaplary, interaktiw serişdeler we saz gurallary gowşuryldy. Çagalar özleri baradaky alada üçin döwlet Baştutanymyza we Gahryman Arkadagymyza hoşallyk bildirip, Täze ýyl mynasybetli gutlaglaryny beýan etdiler.

Täze ýylyň öňüsyrasynda paýtagtymyzdaky Maslahat köşgünde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň guramagynda baýramçylyk dabarasy geçirildi. Oňa “Jahan” döredijilik merkeziniň körpeleri we beýleki çagalar gatnaşdylar. Çagalara gaznanyň adyndan sowgatlar gowşuryldy.

Döwletliler köşgünde terbiýelenýän çagalara hem hormatly Prezidentimiziň we Gahryman Arkadagymyzyň adyndan Täze ýyl sowgatlary gowşuryldy. Çagalary gutlamaga Aýazbaba we Garpamyk, 2026-njy ýylyň nyşany bolan bedew atyň lybasyndaky çagalar, ýurdumyzyň ministrlikleriniň, pudaklaýyn dolandyryş edaralarynyň, jemgyýetçilik guramalarynyň ýolbaşçylary hem-de wekilleri geldiler. Döwletliler köşgünde terbiýelenýän çagalar döwlet Baştutanymyza we Gahryman Arkadagymyza bagtyýar çagalyk, özleri baradaky yzygiderli aladalar üçin tüýs ýürekden hoşallyklaryny bildirdiler.

Täze ýylyň öňüsyrasynda köp sanly maşgalalara täze jaýlaryň açarlarynyň gowşurylmagy ýatdan çykmajak waka boldy. Paýtagtymyzyň Büzmeýin etrabynda we “Parahat — 7” ýaşaýyş toplumynda, Mary şäherinde Täze ýyl dabaralary jaý toýlary bilen utgaşdy.

Ýanwar aýynyň ilkinji günlerinde Arkadag şäherinde 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» atly şygaryna we onuň ähmiýetine bagyşlanan aýdym-sazly dabaraly maslahat geçirildi. Dabaraly çärä Arkadag şäheriniň, ýurdumyzyň atçylyk pudagynyň ýolbaşçylary, Aba Annaýew adyndaky Halkara atçylyk akademiýasynyň mugallymlary, pudagyň hünärmenleri, Hormatly il ýaşululary, döredijilik işgärleri, jemgyýetçilik guramalarynyň, köpçülikleýin habar beriş serişdeleriniň wekilleri, döredijilik işgärleri, talyplar gatnaşdylar. Şäher häkimliginiň edara binasynyň eýwanynda guralan sergide Arkadag şäheriniň gazanan üstünliklerini we ahalteke bedewleriniň gözelligini beýan edýän şekillendiriş, amaly-haşam sungatynyň eserleri, fotosuratlar görkezildi. Onda Gahryman Arkadagymyzyň behişdi bedewlere bagyşlap ýazan “Ahalteke bedewi — biziň buýsanjymyz we şöhratymyz”, “Gadamy batly bedew”, “Atda wepa-da bar, sapa-da” ýaly eserlerine aýratyn orun berildi.

Maslahatda çykyş edenler täze taryhy döwürde Gahryman Arkadagymyzyň we Arkadagly Gahryman Serdarymyzyň tagallalary netijesinde ahalteke bedewiniň ýurdumyzyň esasy nyşanlarynyň birine öwrülendigini nygtadylar. Munuň özi döwürleriň we nesilleriň aýrylmaz baglanyşygyny görkezýär. Bellenilişi ýaly, 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» ýyly diýlip atlandyrylmagy ýerine düşen ajaýyp çözgütdir. Täze ýylyň şygary Milli Liderimiziň: “Biz bedewlerimiz bilen ýakynlygyň täsin filosofiýasyny döredýäris. Ol bolsa ýeňişdedir. Ýeňiş bolsa taplanmakdyr we kämilligiň menzilidir. Öňe, diňe ýeňiş üçin, il-halkyň mertebesine şöhrat getir, bedewim!” diýen ajaýyp sözleri bilen utgaşýar.

Ahalteke atlary halkymyzyň durmuşynda möhüm orny eýeleýär. Tebigy gözelligi bilen bütin dünýäni haýrana goýýan bedewler türkmen halkynyň göz guwanjy we uçar ganatydyr. Ahalteke atçylyk sungaty we atlary bezemek däpleriniň türkmen sungatynyň naýbaşy görnüşleriniň biri hökmünde ÝUNESKO-nyň Adamzadyň maddy däl medeni mirasynyň sanawyna girizilmegi ahalteke atlarynyň dünýädäki şöhratyny has-da belende göterdi. Behişdi bedewlere bolan ählihalk söýgüsini göz öňünde tutup, Milli Liderimiz atçylyk sungatyny kämilleşdirmek we ganatly bedewleri dünýäde ýaýmak boýunça alnyp barylýan işleri döwlet syýasatynyň wajyp ugurlarynyň hataryna çykardy. Abraýly bäsleşiklerde we gözden geçirilişlerde ýeňiji bolan “Galkynyş” milli at üstündäki oýunlar toparynyň gazanýan üstünliklerini muňa mysal hökmünde görkezmek bolar. Şunuň bilen baglylykda, bu toparyň geçen ýyl Monako Knýazlygynyň Monte-Karlo şäherinde geçirilen 47-nji halkara sirk sungaty festiwalynda ýeňiji bolup, baş baýraga we beýleki ýörite baýraklara mynasyp bolandygyny bellemek gerek. Çykyş edenler 2026-njy ýylyň şygarynyň hormatyna ilkinji dabaraly maslahatyň dünýä meşhur behişdi bedewleriň mekany bolan Arkadag şäherinde geçirilmeginiň ähmiýetine ünsi çekdiler.

Şeýlelikde, 2026-njy ýylyň giň gerimli wakalary badalga aldy. Şanly ýylda halkymyz Gahryman Arkadagymyzyň we hormatly Prezidentimiziň daşyna has-da jebisleşip, Garaşsyz, baky Bitarap Watanymyzyň mundan beýläk-de gülläp ösmeginiň bähbidine öňde goýlan belent maksatlara tarap ynamly öňe barýar.

(TDH)

Aşgabat, 1-nji ýanwar (TDH). Şu gün Döwletliler köşgüniň baýramçylyk öwüşgininde bezelen zalynda Täze ýyl mynasybetli dabara geçirildi. Onuň dowamynda bu ýerde terbiýelenýän çagalara hormatly Prezidentimiz Serdar Berdimuhamedowyň hem-de türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň adyndan sowgatlar gowşuryldy.

Ýaş nesle mynasyp terbiýe bermek Berkarar döwletiň täze eýýamynyň Galkynyşy döwrüniň möhüm wezipeleriniň biridir. Çagalyk ýyllarynda şahsyýetiň häsiýetleri, ahlak ýörelgeleri hem-de gymmatlyklary, Watana söýgi, milli däp-dessurlara sarpa goýmak, ata-babalarymyzyň wesýetlerine we beýik taglymlaryna eýermek duýgulary kemala gelýär. Ýurdumyzda durmuşa geçirilýän döwlet syýasatynyň netijesinde bu ugurda toplumlaýyn işler alnyp barylýar. Çagalar baglarynda terbiýelenýän, ýöriteleşdirilen mekdeplerde, mekdep-internatlarda bilim alýan ýaş türkmenistanlylaryň saglygyny berkitmek, olaryň ýokary hilli bilim almagy üçin mümkinçilikleri döretmek meseleleri halkara hukugyň umumy ykrar edilen kadalaryna, ynsanperwer ýörelgelere esaslanýan milli strategiýanyň wajyp ugurlarynyň hataryndadyr.

Mälim bolşy ýaly, ýurdumyzyň howandarlyga mätäç körpe ýaşaýjylary yzygiderli üns merkezinde saklanylýar. Bu ugurda halkymyz asyrlaryň dowamynda asylly ýörelgeleri kemala getiripdir. Bu işler häzirki wagtda çagalaryň jemgyýete goşulmagyna ýardam bermäge, özbaşdak ýaşaýşa gadam basmagyny goldamaga gönükdirilen çäreleriň toplumynyň durmuşa geçirilmegi, durmuş goraglylygynyň kepillendirilmegi arkaly mynasyp dowam etdirilýär. Gahryman Arkadagymyzyň Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň müdiriýetiniň 2025-nji ýylyň 5-nji noýabrynda Arkadag şäherinde geçirilen mejlisindäki çykyşynda nygtaýşy ýaly, mätäje ýardam we goldaw bermek halkymyzyň häsiýetiniň esasy aýratynlyklarynyň biridir. Gadymdan gelýän bu asylly däplerimiz ata-enesinden jyda düşen çagalary aýratyn üns-alada bilen gurşap almaga halkymyzy borçly edýär. Şeýle ynsanperwer işler geçmiş taryhymyzdan, ata-babalarymyzyň ajaýyp däplerinden ugur alýar. Berkarar döwletimizde ynsanperwer milli däplerimize eýermek bilen, ata-enesiniň ýa-da olaryň ornuny tutýan adamlaryň howandarlygyndan galan çagalar hem-de ýetginjekler barada aýratyn alada edilýär.

“Ýurdumyzda çagalaryň hiç biri hossarsyz däldir. Olaryň arkasynda dag ýaly döwlet durandyr. Biz mundan beýläk hem çagalaryň hemmetaraplaýyn sazlaşykly ösmegi, jemgyýetimiziň durmuşyna doly derejede gatnaşmagy üçin ähli oňaýly şertleri döretmegi dowam etdireris. Geljek nesillerimize hemişe-de goldaw we hemaýat bereris. Ösüp gelýän nesillerimiz baradaky alada biziň beýik we ýagty geljegimiz baradaky aladadyr. Amala aşyrýan bu işlerimiz watandaşlarymyzyň häzirki we geljek nesilleriň bagtyýar durmuşynyň binýadyny berkitmekde möhüm ähmiýete eýedir” diýip, Milli Liderimiz belleýär. Şunuň bilen baglylykda, Garaşsyz, baky Bitarap Türkmenistany arzyly arzuwlaryň hasyl bolýan bagtyýar çagalygyň ýurdy diýip atlandyrmaga doly esas bar.

...Ine, bu gün hem çagalaryň bilim we terbiýe alýan özboluşly şäherjiginde oturdylan uly arçanyň ýanynda baýramçylyk ýagdaýy emele geldi. Döwletliler köşgünde terbiýelenýänleri baýramçylyk bilen gutlamaga Aýazbabadyr Garpamyk, ýetip gelen 2026-njy ýylyň nyşany bolan bedew atyň lybasyndaky çagalar, ýurdumyzyň ministrlikleriniň, pudaklaýyn dolandyryş edaralarynyň, jemgyýetçilik guramalarynyň ýolbaşçylary hem-de wekilleri geldiler.

Hormatly Prezidentimiziň yzygiderli aladalary netijesinde berkarar Watanymyzda beden we ruhy taýdan sagdyn, aň-paýhas taýdan sazlaşykly ösen nesli kemala getirmek, olaryň ukyp-başarnyklaryny açmak boýunça giň gerimli işler alnyp barylýar. Döwletliler köşgünde çagalar diňe bir bilimleri däl, eýsem, dürli hünärleri hem özleşdirýärler. Bu ýerde olar şekillendiriş we saz sungatynyň tilsimlerini ele alýarlar, gurnaklarda sportuň dürli görnüşleri bilen meşgullanýarlar. Olaryň köpüsi ýurdumyzda we daşary ýurtlarda geçirilýän döredijilik bäsleşikleriniň, halkara festiwallaryň ýeňijileridir. Şolaryň hatarynda Gulbaba adyndaky çagalar baýragynyň eýesi bolan “Joşgun” tans topary-da bar.

Ýaşajyk türkmenistanlylar myhmanlaryň öňünde konsert maksatnamasy bilen çykyş edip, döredijilik ukyplaryny görkezdiler. Baýramçylyk dabarasynyň geçirilýän ýeriniň bezeginde ulanylan serişdeleriň aglabasyny çagalaryň öz elleri bilen taýýarlandyklaryny bellemek gerek. Bezelen arçanyň ýanynda çagalar goşgy okadylar, joşgunly tanslary, eziz Watanymyzy, döwlet Baştutanymyzyň hem-de Gahryman Arkadagymyzyň durmuşa geçirýän beýik işlerini wasp edýän, şeýle-de Täze ýyl baýramçylygyna bagyşlanan aýdymlary ýerine ýetirdiler.

Dabaranyň ahyrynda ýaş zehinler Aýazbaba we Garpamyk, türkmen halk döredijiliginiň, dünýä halklarynyň ertekileriniň gahrymanlary bilen bilelikde owadan arçanyň daşyndan aýlanyp, aýdym aýtdylar.

Hormatly Prezidentimiziň hem-de Gahryman Arkadagymyzyň adyndan dürli süýjüliklerden we ter miwelerden, okuw esbaplaryndan, interaktiw serişdelerden ybarat sowgatlaryň gowşurylmagy çagalaryň şatlygyny has-da artdyrdy. “Garaşsyz, baky Bitarap Türkmenistan — bedew batly at-myradyň mekany” diýlip yglan edilen täze ýylyň hormatyna guralan dabarada Döwletliler köşgünde terbiýelenýän çagalara saz gurallary hem gowşuryldy. Munuň özi olarda ýakymly täsirleri galdyrdy.

Dabaranyň ahyrynda çagalar sowgatlary çuňňur hoşallyk duýgulary bilen kabul edip, döwlet Baştutanymyza we Gahryman Arkadagymyza bagtyýar çagalyk we özleri baradaky yzygiderli aladalar üçin tüýs ýürekden hoşallyklaryny beýan etdiler.

Eziz watandaşlar!

2025-nji ýyl — Halkara parahatçylyk we ynanyşmak ýyly tamamlanyp barýar. Ýene az salymdan täze — 2026-njy ýyly garşylarys.

2026-njy ýyl — Gündogar müçenamasy boýunça ýylky, ýagny bedew ýyly. Türkmen halky öz arzuwlaryny, belent maksatlaryny ahalteke bedewleri bilen baglanyşdyrýar. Ahalteke bedewi biziň buýsanjymyzdyr, şöhratymyzdyr.

2025-nji ýyl Garaşsyz Watanymyzyň täze taryhynda halkymyzyň durmuşyny üstünliklere beslän ýyllaryň biri boldy. Bu ýyl türkmen halkynyň Milli Lideri Gahryman Arkadagymyzyň döwletli tutumlary, taryhy başlangyçlary has-da rowaçlandy. Ýurdumyzy gülledip ösdürmäge, halkymyzyň ýaşaýyş-durmuş derejesini has-da ýokarlandyrmaga gönükdirilen maksatnamalar üstünlikli durmuşa geçirildi.

Berkarar döwletimizi durmuş-ykdysady taýdan ösdürmek maksady bilen, täze etraplar döredildi. Diýarymyzyň ähli ýerlerinde döwrebap mekdepler, çagalar baglary, saglygy goraýyş, sport desgalary, medeniýet edaralary, önümçilik binalary, başga-da köp sanly desgalar ulanmaga berildi. Bagtyýar maşgalalaryň müňlerçesi täze jaýly bolmak bagtyna eýe boldy.

Ýangyç-energetika toplumyna degişli iri taslamalar durmuşa geçirildi. Türkmenbaşydaky nebiti gaýtadan işleýän zawodlar toplumynyň nebit we nebit önümleri guýulýan gämi duralgasy işe girizildi. Gahryman Arkadagymyzyň gatnaşmagynda Türkmenistan — Owganystan — Pakistan — Hindistan gaz geçirijisiniň esasy tapgyry bolan Arkadagyň ak ýoly bilen Serhetabat — Hyrat gaz geçirijisiniň Owganystanyň Hyrat welaýatyna barýan böleginiň gurluşygyna badalga berildi.

Ahal welaýatynyň Bäherden etrabynda Bäherden keramiki önümler kärhanasy, paýtagtymyzda çüýşe önümlerini öndürýän kärhana, Balkan welaýatynyň Esenguly etrabynda agyz suw arassalaýjy desga, Garabogazköl aýlagynyň üstünden geçýän awtomobil köprüsi ulanmaga berildi. Lebap welaýatynyň Türkmenabat şäherindäki himiýa zawodynda mineral dökünleri öndürýän toplumyň, Balkan welaýatynyň Türkmenbaşy etrabynda karbamid öndürýän toplumyň gurluşygyna badalga berildi. Türkmenbaşy — Garabogaz — Gazagystan serhedi awtomobil ýolunyň gurluşygyna hem girişildi. Şeýle hem Aşgabat şäherinde «Güneşli» çagalar we ýetginjekler merkeziniň gurluşygyna badalga berildi.

Şu ýyl ýurdumyzyň Ahal welaýatynyň Ak bugdaý etrabynda Döwletli mekan, Kaka etrabynda Bagtly zamana atly täze, döwrebap obalar açylyp ulanmaga berildi. Daşoguz welaýatynyň Köneürgenç etrabynda häzirki zaman Bitaraplyk şäherçesi dabaraly ýagdaýda açyldy. Arkadag şäheriniň ikinji tapgyrynyň gurluşygy dowam etdirildi. Ýurdumyzda döwrebap obalaryň, häzirki zaman ýaşaýyş jaýlarynyň gurluşygy hem dowam edýär. Bularyň ählisi «Watan diňe halky bilen Watandyr! Döwlet diňe halky bilen döwletdir!» diýen şygarymyzyň üstünlikli durmuşa geçirilýändigini görkezýär.

Eziz watandaşlar!

Oba hojalyk pudagynda geçirýän özgertmelerimiz hem rowaçlyklara beslenýär. Edermen daýhanlarymyz Watan harmanyna 1 million 400 müň tonnadan gowrak ýokary hilli bugdaý hasylyny tabşyryp, şertnamalaýyn borçnamany üstünlikli ýerine ýetirdiler. Ýygnalan bol galla hasyly mähriban halkymyzyň, berkarar Watanymyzyň baýlygydyr, saçaklarymyzyň rysgal-berekedidir. Geljekde hem oba zähmetkeşlerini ykdysady taýdan höweslendirmek, pudagyň maddy-enjamlaýyn binýadyny berkitmek boýunça netijeli çäreleri durmuşa geçireris.

Ýurdumyzyň nebitgaz, ulag-aragatnaşyk we söwda toplumlarynda hem köp işler amala aşyrylýar. Bu toplumlar berkarar döwletimiziň gazanýan ösüşlerine mynasyp goşant goşýarlar.

Eziz watandaşlar!

Halkymyzyň saglygy, abadan we bagtyýar durmuşy biziň alyp barýan döwlet syýasatymyzyň möhüm ugry bolup durýar. Tamamlanyp barýan ýylda Aşgabat şäherinde köpugurly hassahananyň, Ahal welaýatynyň Tejen şäherinde köpugurly hassahananyň, şeýle hem Daşoguz welaýatynyň Daşoguz şäherinde Enäniň we çaganyň saglygyny goraýyş merkeziniň gurluşygyna badalga berildi. Ynsan saglygyny goramak boýunça alyp barýan işlerimizi geljekde hem dowam etdireris.

Ylym we bilim ulgamlarynda hem netijeli özgertmeler durmuşa geçirildi. Türkmenistanyň Döwlet energetika institutynyň döwrebap okuw binalar toplumy, Halkara senagatçylar we telekeçiler uniwersitetiniň binalar toplumy we başga-da köp sanly bilim maksatly desgalar açylyp ulanmaga berildi.

Ýaş nesillerimizi sport bilen meşgullanmaga giňden çekmek, ýurdumyzyň halkara sport abraýyny has-da belende götermek ugrunda hem uly işleri alyp barýarys. Şu ýyl «Galkynyş» milli at üstündäki oýunlar topary Monte-Karlo halkara festiwalynda baş baýraga mynasyp boldy. «Arkadag» futbol topary hem halkara ýaryşda ýeňiş gazanyp, ýurdumyzyň halkara sport abraýyny has-da artdyrdy. Türgenlerimiz dünýä derejesindäki ýaryşlarda üstünlikli çykyş edip, baýrakly orunlara mynasyp boldular. Biz geljekde hem ýurdumyzda sporty ösdürmek boýunça alyp barýan işlerimizi dowam etdireris.

Hormatly adamlar!

Biz milli medeniýetimizi ösdürmek, mirasymyzy gorap saklamak, wagyz etmek boýunça hem giň gerimli işleri alyp barýarys. Halkara parahatçylyk we ynanyşmak ýylynda Aşgabat şäheri ÝUNESKO-nyň öwreniji şäherleriniň bütindünýä toruna girizildi. Şeýle hem türkmen alabaý itlerini ösdürip ýetişdirmek däpleri ÝUNESKO-nyň Adamzadyň maddy däl medeni mirasynyň sanawyna girizildi. Geçip barýan ýylda halkara derejede dürli medeni çäreler, Medeniýet günleri yzygiderli geçirildi. Geljek ýyl Medeniýet hepdeligini Balkan welaýatynda ýokary derejede geçireris.

Eziz watandaşlar!

Şu ýyl ýurdumyzyň başlangyjy bilen Birleşen Milletler Guramasynyň Baş Assambleýasy tarapyndan «Türkmenistanyň hemişelik Bitaraplygy» atly Kararnama biragyzdan kabul edildi. Munuň özi Bitaraplyk syýasatymyzyň mynasyp dowam etdirilýändigini ýene-de bir gezek görkezdi.

Halkara parahatçylyk we ynanyşmak ýyly hem-de ýurdumyzyň hemişelik Bitaraplygynyň 30 ýyllygy mynasybetli halkara derejede köp sanly çäreler geçirildi. «Awaza» milli syýahatçylyk zolagynda Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahaty ýokary derejede geçirildi. Bu ugurda Birleşen Milletler Guramasynyň Baş Assambleýasy tarapyndan «Awaza syýasy Jarnamasy» atly Kararnama biragyzdan kabul edildi. Şeýle hem ýurdumyzyň başlangyjy bilen Birleşen Milletler Guramasynyň Baş Assambleýasy tarapyndan «Birleşen Milletler Guramasynyň Durnukly ulag boýunça onýyllygy (2026 — 2035-nji ýyllar)» hem-de «Durnukly ösüşi üpjün etmekde ygtybarly we durnukly energiýa birikmesiniň esasy orny» atly Kararnamalar biragyzdan kabul edildi.

«Awaza» milli syýahatçylyk zolagynda geçirilen «Häzirki zaman jemgyýetinde zenanlaryň orny: Durnukly ösüş maksatlaryna ýetmek ugrunda halkara hyzmatdaşlygy ösdürmek» atly halkara maslahat hem möhüm ähmiýete eýe boldy. Halkara maslahatyň jemi boýunça jemleýji resminama kabul edildi. Halkara Bitaraplyk güni mynasybetli geçirilen halkara forum şanly ýylyň iň esasy wakasyna öwrüldi. Ýokary derejede geçirilen halkara forum boýunça Aşgabat Jarnamasy kabul edildi. Bu forum parahatçylyk söýüji döwlet hökmünde ýurdumyzyň abraýyny has-da belende göterdi.

Hormatly adamlar!

Ata Watanymyzy mundan beýläk-de ösdürmek maksady bilen, biz ýetip gelen 2026-njy ýyla «Garaşsyz, baky Bitarap Türkmenistan — bedew batly at-myradyň mekany» ýyly diýip at berdik. Hoşniýetli arzuw-umytlar bilen garşy alýan täze ýylymyzda mukaddes Garaşsyzlygymyzyň şanly 35 ýyllygyny belläp geçeris. Watanymyzy bagtyýarlygyň we rowaçlygyň mekanyna öwürmek ugrunda yhlas bilen zähmet çekeris.

Eziz watandaşlar!

Ýene az salymdan täze — 2026-njy ýyly garşy alarys. Şu pursatda siziň ähliňize berk jan saglygyny we täze üstünlikleri arzuw edýärin.

Täze ýyl abadançylygyň, rysgal-berekediň ýyly bolsun! Maşgala ojaklaryňyza agzybirlik, döwletlilik ýar bolsun!

Täze ýyl rowaçlyk, bagt getirsin!

Täze ýyl bedew bady bilen ähliňizi maksat-myrada ýetirsin!

Täze — 2026-njy ýylyňyz gutly bolsun!

Aşgabat, 30-njy dekabr (TDH). Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenkonyň arasynda telefon arkaly söhbetdeşlik geçirildi.

Söhbetdeşligiň başynda Gahryman Arkadagymyz we Russiýanyň parlamentiniň ýokarky palatasynyň ýolbaşçysy birek-biregi ýetip gelýän täze — 2026-njy ýyl bilen tüýs ýürekden gutlap, iki ýurduň halklaryna bagtyýarlyk, abadançylyk, rowaçlyk arzuw etdiler. Milli Liderimiz telefon arkaly söhbetdeşligi geçirmek başlangyjy üçin Walentina Matwiýenko minnetdarlyk bildirip, Täze ýylyň öňüsyrasyndaky bu söhbetdeşlige berk özara dostlugyň nyşany hem-de iň gowy arzuwlary beýan etmek üçin mümkinçilik hökmünde garaýandygyny aýtdy.

Bellenilişi ýaly, 2025-nji ýylda türkmen-rus gatnaşyklary netijeli häsiýete eýe boldy we möhüm wakalara beslendi. Şunuň bilen baglylykda, Gahryman Arkadagymyz hormatly Prezidentimiziň Beýik Ýeňşiň 80 ýyllygy mynasybetli dabaralara hem-de Garaşsyz Döwletleriň Arkalaşygyna gatnaşyjy ýurtlaryň döwlet Baştutanlarynyň ýokary derejeli duşuşygyna gatnaşmak üçin Russiýa Federasiýasyna amala aşyran saparlarynyň ähmiýetine ünsi çekdi. Bu saparlar Türkmenistan bilen Russiýanyň arasyndaky hoşniýetli goňşuçylygyň, dostlugyň, strategik hyzmatdaşlygyň pugtalandyrylýandygyny, ýurtlarymyzyň umumy taryhy mirasa, halklarymyz tarapyndan häzirki döwürde aýawly saklanýan we baýlaşdyrylýan gymmatlyklara, däp-dessurlara ygrarlydygyny tassyklady. Şunuň bilen baglylykda, Milli Liderimiz Beýik Watançylyk urşunda gazanylan ýeňiş mynasybetli «Hatyra otlusy» başlangyjynyň Türkmenistanda goldanandygyny, oňa ýurdumyzyň mekdep okuwçylarynyň gatnaşandygyny aýtdy hem-de bu möhüm çäräniň guramaçylygy üçin minnetdarlyk bildirdi.

Halk Maslahatynyň Başlygy Türkmenistanda Russiýanyň ýurdumyz bilen hyzmatdaşlygy pugtalandyrmaga berýän ünsüne, döwletimiziň bitarap daşary syýasy ugruna, ählumumy durnuklylygy berkitmäge, döwletara gatnaşyklarda parahatçylyk, ynanyşmak, özara hormat goýmak dialogynyň filosofiýasyny ilerletmekdäki tagallalaryna berýän goldawyna ýokary baha berilýändigini aýtdy. Russiýa Federasiýasynyň Prezidenti Wladimir Putiniň Halkara parahatçylyk we ynanyşmak ýylyna bagyşlanan halkara foruma hem-de Türkmenistanyň hemişelik Bitaraplygynyň 30 ýyllygy mynasybetli dabaralara gatnaşmak üçin ýurdumyza amala aşyran sapary munuň aýdyň beýany boldy. Munuň özi ýurtlarymyzyň ikitaraplaýyn görnüşde, şeýle hem halkara gün tertibiniň çäklerinde mundan beýläk-de ýakyn we netijeli hyzmatdaşlyga ygrarlydygyny, BMG-niň Tertipnamasynyň ýörelgeleriniň esasynda halkara howpsuzlygyň arhitekturasyny pugtalandyrmaga bilelikde goşant goşmaga taýýardygyny tassyklady.

Gahryman Arkadagymyz şu ýyl Türkmenistan bilen Russiýanyň arasyndaky parlamentara gatnaşyklaryň hem yzygiderli ösdürilendigini belledi. Şunda Türkmenistanyň Mejlisiniň Başlygynyň ýolbaşçylygyndaky ýurdumyzyň wekiliýetiniň 2025-nji ýylyň oktýabrynda Moskwa amala aşyran saparynyň ähmiýetine üns çekildi. Ýurdumyzyň parlamentiniň ýolbaşçysynyň RF-niň Federal Ýygnagynyň Federasiýa Geňeşiniň Başlygy bilen duşuşygy iki ýurduň parlamentleriniň arasyndaky hyzmatdaşlygy pugtalandyrmaga uly goşant boldy. Şunuň bilen bir hatarda, bu duşuşyk iki tarapyň hem bu gatnaşyklary ösdürmegi maksat edinýändigini tassyklamak bilen, mundan beýläk-de bilelikde iş alyp barmak, parlament tejribesini alyşmak üçin täze mümkinçilikleri açdy.

Türkmen halkynyň Milli Lideri Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewanyň ýolbaşçylygyndaky Türkmenistanyň wekiliýetiniň «Modanyň Arkalaşygy» atly IV halkara forumyň işine gatnaşmak üçin Sankt-Peterburg şäherine amala aşyran saparynyň iki ýurduň arasyndaky ynsanperwer hyzmatdaşlygy ösdürmekde möhüm ädim bolandygyny belledi hem-de pursatdan peýdalanyp, türkmen wekiliýetine bildirilen myhmansöýerlik we forumyň çäklerinde Russiýa Federasiýasynyň Federal Ýygnagynyň Federasiýa Geňeşiniň Başlygy bilen duşuşmaga döredilen mümkinçilik üçin minnetdarlyk bildirdi.

Halk Maslahatynyň Başlygy söhbetdeşligiň dowamynda Türkmenistanyň geljek ýylda-da Russiýa bilen ikitaraplaýyn strategik hyzmatdaşlyk ruhunda köpugurly we ulgamlaýyn häsiýete eýe bolan özara gatnaşyklary, köptaraplaýyn formatlaryň çäklerindäki dialogy dowam etdirmäge taýýardygyny tassyklady. Şunuň bilen baglylykda, Gahryman Arkadagymyz GDA-nyň döwlet Baştutanlarynyň Geňeşiniň çözgüdine laýyklykda, Arkalaşygyň sammitiniň 2026-njy ýylyň 9-njy oktýabrynda Türkmenistanda geçiriljekdigini aýtdy. Türkmen tarapy bu sammiti iri halkara forumlary geçirmek üçin ähli mümkinçilikler döredilen «Awaza» milli syýahatçylyk zolagynda geçirmegi göz öňünde tutýar.

Şeýle-de Türkmenistanyň GDA-da başlyklyk etmeginiň çäklerinde zenanlaryň dialogyny, GDA-nyň Parlamentara Assambleýasynyň mejlisini, demografiýa meseleleri boýunça maslahaty geçirmäge taýýarlyk görmegiň möhümdigi nygtaldy. Gahryman Arkadagymyz ozalky duşuşyklaryň netijelerinden görnüşi ýaly, şeýle formatlarda özara hyzmatdaşlygy dowam etdirmegiň hem-de baýlaşdyrmagyň zerurdygyny aýtdy hem-de türkmen tarapynyň bu çäreleri geçirmek boýunça guramaçylyk meselelerini ara alyp maslahatlaşmaga taýýardygyny tassyklady.

Milli Liderimiz döredijilikli, netijeli, özara hormat goýmak häsiýetine eýe bolan ikitaraplaýyn hyzmatdaşlygyň, dostlugyň, hoşniýetli goňşuçylygyň we ynanyşmagyň Türkmenistan bilen Russiýanyň arasyndaky gatnaşyklaryň binýadyny emele getirýändigini aýratyn nygtady hem-de döwletara hyzmatdaşlygy ýokary derejä ýetirmekde Federasiýa Geňeşiniň Başlygynyň uly hyzmatynyň bardygyny aýtdy. Bellenilişi ýaly, Walentina Matwiýenko türkmen-rus gatnaşyklaryny ösdürmäge goşandy we tagallalary netijesinde Türkmenistanda uly abraýdan peýdalanýar. Şunuň bilen baglylykda, hormatly Arkadagymyz Federasiýa Geňeşiniň Başlygyna hut öz adyndan, şeýle hem hormatly Prezidentimiziň adyndan tüýs ýürekden minnetdarlyk bildirdi.

Türkmen halkynyň Milli Lideri geljek ýylda Walentina Matwiýenkonyň ýolbaşçylygynda Federasiýa Geňeşiniň işiniň has-da netijeli boljakdygyna, Russiýanyň bähbidine we onuň halkara gatnaşyklarynyň pugtalandyrylmagyna hyzmat etjekdigine, Türkmenistan bilen Russiýa Federasiýasynyň, iki ýurduň halklarynyň arasyndaky dostluga we özara gatnaşyklara täze itergi berjekdigine ynam bildirdi. Şeýle hem Gahryman Arkadagymyz geljek ýylda Russiýa Federasiýasynyň Federal Ýygnagynyň Federasiýa Geňeşiniň Başlygy bilen gepleşikleriň geçiriljekdigine we olaryň netijeleriniň türkmen-rus gatnaşyklaryny täze derejelere çykarjakdygyna ynanýandygyny aýtdy.

RF-niň parlamentiniň ýokarky palatasynyň ýolbaşçysy Gahryman Arkadagymyza hoşniýetli sözler we iki ýurduň arasyndaky netijeli gatnaşyklary ösdürmek babatda alyp barýan işine beren ýokary bahasy üçin hoşallyk bildirdi hem-de Russiýanyň iki döwletiň halklarynyň arasyndaky özara bähbitli hyzmatdaşlygy pugtalandyrmaga berk ygrarlydygyny tassyklady.

Telefon arkaly söhbetdeşligiň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow hem-de Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenko birek-biregi ýetip gelýän täze — 2026-njy ýyl bilen ýene-de bir gezek gutlap, iň gowy arzuwlaryny beýan etdiler.

«Halkara parahatçylyk we ynanyşmak ýyly» diýlip yglan edilen 2025-nji ýyl ýurdumyzyň taryhynda möhüm tapgyr boldy. Halkymyzyň bagtyýar durmuşda ýaşamagy, ählumumy derejede parahatçylyk söýüjilik ýörelgelerini ilerletmek ugrunda alnyp barylýan işler Gahryman Arkadagymyz tarapyndan başy başlanyp, Arkadagly Gahryman Serdarymyzyň baştutanlygynda üstünlikli amala aşyrylýan döwlet syýasatynyň guwandyryjy netijeleridir. Bu ýylda ýetilen belent sepgitler Watanymyzyň rowaçlygynyň bähbidine gazanyljak ýeneki üstünlikleriň berk binýady bolar.

22-nji dekabrda hormatly Prezidentimiz Serdar Berdimuhamedow Russiýa Federasiýasyna iş saparynyň çäklerinde Garaşsyz Döwletleriň Arkalaşygyna gatnaşyjy ýurtlaryň döwlet Baştutanlarynyň ýokary derejeli resmi däl duşuşygyna gatnaşdy. Bitarap Türkmenistan Garaşsyz Döwletleriň Arkalaşygynyň assosirlenen agzasy bolmak bilen, Arkalaşygyň çäklerinde giň möçberli energetika we logistika taslamalaryny durmuşa geçirip, özara bähbitli ykdysady hyzmatdaşlygy pugtalandyrýar.

Sammitiň öňüsyrasynda oňa gatnaşýan döwlet Baştutanlary «Ermitaž» muzeýine aýlanyp gördüler. Dostlukly ýurtlaryň Liderleri antik döwrüň zergärleriniň ýasan altyn şaý-sepleri görkezilýän «Altyn hazyna» zalyna, Beýik Ýüpek ýolunyň taryhy bilen tanyşmaga mümkinçilik berýän Orta Aziýa zalyna, Beýik Britaniýanyň we Fransiýanyň sungaty hem-de Gaýtadan döreýiş döwrüniň beýik ussady Leonardo da Winçiniň eserleri bilen tanyşdyrýan zallara baryp gördüler. Dürli ýurtlara we döwürlere degişli bolan bu gymmatlyklaryň bir ýerde jemlenmegi ählumumy medeni mirasy gorap saklamaga gönükdirilendir.

Sammitiň dowamynda şu ýyl Arkalaşygyň çäklerinde ýerine ýetirilen işleriň netijelerine syn berildi, hyzmatdaşlygyň ileri tutulýan ugurlary hem-de geljek üçin wezipeler kesgitlenildi. Ykdysady hyzmatdaşlygyň oňyn görkezijileri kanagatlanma bilen bellenildi. Şeýle hem sebit we ählumumy gün tertibiniň möhüm meseleleri barada pikir alşyldy.

Russiýa Federasiýasynyň Prezidenti Wladimir Putin 2026-njy ýylda Türkmenistanyň GDA-da başlyklyk etmegi mynasybetli döwlet Baştutanymyzy gutlady we üstünlikleri arzuw etdi.

Hormatly Prezidentimiziň Garaşsyz Döwletleriň Arkalaşygyna gatnaşyjy ýurtlaryň döwlet Baştutanlarynyň ýokary derejeli resmi däl duşuşygyna gatnaşmagy ýurdumyzyň açyk we özara hormat goýmak dialogyna ygrarlydygynyň nobatdaky aýdyň beýany boldy. Resmi däl görnüşde geçen sammit tamamlanyp barýan ýylyň jemlerini jemlemek bilen bir hatarda, dürli ulgamlarda bilelikdäki täze başlangyçlar üçin binýady hem döretdi. Türkmenistan üçin bu meýdança sebitde parahatçylyk döredijilikli başlangyçlary ilerletmekde möhüm gural bolup durýar.

22-nji dekabrda Türkmenistanyň Daşary işler ministrliginiň Halkara gatnaşyklary institutynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň «Hakyda göwheri» atly kitabynyň azerbaýjan dilindäki neşiriniň tanyşdyrylyş dabarasy boldy. Dabara ýurdumyzyň daşary syýasat edarasynyň ýolbaşçy düzümi, Türkmenistanyň Azerbaýjan Respublikasyndaky we Azerbaýjan Respublikasynyň Türkmenistandaky Adatdan daşary we Doly ygtyýarly ilçileri, Türkmen-azerbaýjan parlamentara dostluk toparynyň türkmen böleginiň ýolbaşçylary, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň alymlary, agzalan ýokary okuw mekdebiniň professor-mugallymlary, talyplar gatnaşdylar.

Çykyşlarda bellenilişi ýaly, Gahryman Arkadagymyzyň bu eseri diňe bir türkmen halkynyň däl, eýsem, bütin türki dünýäniň ruhy hazynasyna öwrülen paýhas nusgalaryny özünde jemleýär. Kitap azerbaýjanly okyjylara halkymyzyň şöhratly geçmişi, ahlak gymmatlyklary, Türkmenistanda ylmyň, bilimiň, medeniýetiň ösüşi barada giň düşünje almaga mümkinçilik berýär. Şeýle hem “Hakyda göwheri” atly kitabyň azerbaýjan diline terjime edilmeginiň iki dostlukly ýurduň arasynda ruhy köprini pugtalandyrmak bilen, medeni-ynsanperwer gatnaşyklaryň ýygjam häsiýete eýe bolmagyna ýardam berjekdigine ynam bildirildi.

24-nji dekabrda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Balkan welaýatyna iş saparyny amala aşyrdy. Gahryman Arkadagymyz saparynyň dowamynda 2026-njy ýylda ýurdumyzda geçiriljek taryhy ähmiýetli halkara çäreleri ýokary derejede guramak bilen bagly meseleler bilen gyzyklandy. Göz öňünde tutulýan halkara çäreleriň guramaçylyk derejesiniň üpjün edilmegi, ýokary derejeli myhmanlaryň kabul ediljek ýerinde döredilýän şertler, çäreleriň geçiriljek ýerinde dünýäniň öňdebaryjy tejribeleriniň we innowasion tehnologiýalaryň peýdalanylmagy, ýokary tizlikli internet ulgamynyň, aragatnaşyk serişdeleriniň netijeli işiniň ýola goýulmagy, sergileriň geçiriljek künjeklerinde milli gymmatlyklara orun berilmegi bilen bagly meselelere aýratyn üns çekildi.

Gahryman Arkadagymyz dikuçarda “Awaza” milli syýahatçylyk zolagy boýunça uçuşy amala aşyryp, onuň dowamynda Türkmenbaşy — Garabogaz — Gazagystanyň serhedi awtomobil ýolunyň gurluşygynda alnyp barylýan işleri we Awazanyň önümçilik toplumlaryny synlady. Awazanyň ýokary kuwwatly elektrik bekediniň sazlaşykly işini ýola goýmak, sebit hyzmatdaşlygyny pugtalandyrmakda, söwda dolanyşygyny işjeňleşdirmekde Türkmenbaşy Halkara deňiz portunyň mümkinçiliklerinden peýdalanmak, “Garabogazkarbamid” kärhanasynda önümçiligiň depginini ýokarlandyrmak, kärhananyň eksport mümkinçiliklerini artdyrmak ýaly meselelere hem garaldy.

25-nji dekabrda paýtagtymyzdaky “Mekan” köşgünde Türkmenistanyň Halk Maslahatynyň guramagynda “Halkara parahatçylyk we ynanyşmak ýyly: Bitarap Türkmenistanyň ynamly gadamlary” atly dabara geçirildi. Oňa Hökümet agzalary, ýurdumyzyň diplomatik gullugynyň, daşary döwletleriň we halkara guramalaryň Aşgabatdaky diplomatik wekilhanalarynyň ýolbaşçylarydyr wekilleri, dürli pudaklarda zähmet çekýän raýatlar, ýaşlar gatnaşdylar.

Halkara parahatçylyk we ynanyşmak ýylynda Türkmenistanyň daşary syýasy işiniň jemlerine bagyşlanyp geçirilen çäräniň dowamynda Bitaraplygyň türkmen nusgasyna we many-mazmunyna giňişleýin seljerme berildi. Birleşen Milletler Guramasynyň jogapkärli agzasy hökmünde ýurdumyzyň ösüş filosofiýasynyň Bitaraplyk, parahatçylyk, ynanyşmak ýaly özara baglanyşykly üç möhüm ýörelgede jemlenendigi nygtaldy. BMG-niň Baş Assambleýasy tarapyndan “Halkara parahatçylyk we ynanyşmak ýyly” diýlip yglan edilen 2025-nji ýylyň taryhy ähmiýetli wakalara baý bolandygy aýratyn bellenildi. Diňe bir ýurdumyz däl, eýsem, dünýä bileleşigi üçin hem şanly waka bolan Türkmenistanyň hemişelik Bitaraplygynyň 30 ýyllygy halkara derejede giňden dabaralandyryldy.

12-nji dekabrda paýtagtymyzda hormatly Prezidentimiziň we Gahryman Arkadagymyzyň başlangyçlary bilen döwlet Baştutanlarynyň we halkara guramalaryň ýolbaşçylarynyň gatnaşmagynda üstünlikli geçirilen halkara forum Türkmenistanyň dünýä jemgyýetçiligindäki abraýyny has-da artdyrdy, döwletimiziň parahatçylyk söýüjilikli taglymatyny ýene-de bir gezek dünýä ýaýdy. 15-nji dekabrda hormatly Prezidentimiziň başlangyjy boýunça Baş Assambleýanyň 64-nji plenar mejlisinde iki sany möhüm Kararnama — “Birleşen Milletler Guramasynyň Durnukly ulag boýunça onýyllygy (2026 — 2035-nji ýyllar)” we “Durnukly ösüşi üpjün etmekde ygtybarly we durnukly energiýa birikmesiniň esasy orny” atly Kararnamalar kabul edildi. Bu resminamalaryň ikisi hem Türkmenistanyň ählumumy gün tertibiniň wajyp meselelerini çözmek üçin dünýä jemgyýetçiliginiň tagallalaryny birleşdirmäge gönükdirilen syýasatynyň logiki dowamydyr.

Şu ýylyň dowamynda Türkmenistan Ykdysady Hyzmatdaşlyk Guramasy, Yslam Hyzmatdaşlyk Guramasy, Türki Döwletleriň Guramasy, Garaşsyz Döwletleriň Arkalaşygy ýaly halkara guramalaryň çäklerinde hem özüni işjeň ýurt hökmünde görkezdi. Merkezi Aziýa döwletleriniň Baştutanlarynyň konsultatiw duşuşyklarynyň formatynyň giňeldilmegi bu formatyň şu ýylyň noýabrynda geçirilen ýedinji duşuşygyndaky möhüm wakalaryň biri boldy. Oňa gatnaşyjy döwletler Türkmenistanyň Azerbaýjany bu duşuşyklara doly hukukly agza hökmünde çagyrmak baradaky teklibini biragyzdan goldadylar. Şeýle-de Türkmenistan «Merkezi Aziýa +» dialogynyň işine netijeli gatnaşdy. Olaryň çäklerinde Hytaý Halk Respublikasy, Russiýa Federasiýasy, Amerikanyň Birleşen Ştatlary, Ýaponiýa, Ýewropa Bileleşigi, Italiýa Respublikasy ýaly ýurtlar bilen duşuşyklar geçirildi.

2025-nji ýylda ýokary derejedäki ikitaraplaýyn gatnaşyklar hem-de özara saparlar işjeň dowam etdi. Şu ýylyň dowamynda hormatly Prezidentimiz daşary ýurtlara döwlet, resmi we iş saparlarynyň 15-sini amala aşyrdy, Gahryman Arkadagymyz hem 9 ýurtda saparda boldy, şol bir wagtda daşary ýurtlaryň döwlet we hökümet Baştutanlarynyň Türkmenistana saparlarynyň 31-si guraldy. Şanly ýylda Türkmenistan «Açyk gapylar» syýasatynyň çäklerinde birnäçe iri halkara çäreleri geçirdi. Şolaryň hatarynda Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatyny, “Häzirki zaman jemgyýetinde zenanlaryň orny: Durnukly ösüş maksatlaryna ýetmek ugrunda halkara hyzmatdaşlygy ösdürmek” atly halkara maslahaty görkezmek bolar. Halkara parahatçylyk we ynanyşmak ýylynda Türkmenistan tarapyndan alnyp barlan giň möçberli işler ýurdumyzyň dünýä derejesinde parahatçylyk dörediji merkezleriň biri hökmünde tanalmagyna ýardam berdi.

Çäräniň dowamynda döwlet Baştutanymyzyň gol çeken Permanlaryna hem-de Kararyna laýyklykda, daşary ýurt döwletleriniň we halkara guramalaryň Türkmenistandaky diplomatik wekilhanalarynyň ýolbaşçylaryny hem-de ýurdumyzyň raýatlaryny «Türkmenistanyň Bitaraplygynyň 30 ýyllygyna» atly Türkmenistanyň ýubileý medaly hem-de «Türkmenistanyň hemişelik Bitaraplygynyň 30 ýyllygy» atly ýadygärlik kümüş nyşany bilen sylaglamak dabarasy boldy. Sylaglamak dabarasynyň barşynda Ministrler Kabinetiniň Başlygynyň orunbasary, daşary işler ministri R.Meredow şu ýylyň dowamynda geçirilen halkara çärelere işjeň gatnaşandyklary, wekilçilik edýän ýurtlarynyň hem-de düzümleriniň Türkmenistan bilen gatnaşyklary pugtalandyrmaga goşýan goşantlary üçin hemmelere Gahryman Arkadagymyzyň we hormatly Prezidentimiziň adyndan hoşallyk bildirdi.

26-njy dekabrda hormatly Prezidentimiz Serdar Berdimuhamedow Ministrler Kabinetiniň we Döwlet howpsuzlyk geňeşiniň giňişleýin mejlisini geçirdi. Oňa welaýatlaryň, Aşgabat şäheriniň häkimleri hem gatnaşdylar. Mejlisde döwlet Baştutanymyz 2026-njy ýylyň şygaryny hem-de nyşanyny tassyklap, geljek ýylyň şygaryny «Garaşsyz, baky Bitarap Türkmenistan — bedew batly at-myradyň mekany» diýip yglan etdi. Munuň özi täze ýylda ýurdumyzyň okgunly ösüşini we belent sepgitlere ýetmäge ymtylmasyny alamatlandyrar.

Hormatly Prezidentimiz Halkara parahatçylyk we ynanyşmak ýylynyň Birleşen Milletler Guramasynyň Baş Assambleýasy tarapyndan «Türkmenistanyň hemişelik Bitaraplygy» atly Kararnamanyň kabul edilmegi bilen başlanandygyny we bu ýylyň dowamynda köp sanly halkara çäreleriň geçirilip, möhüm ähmiýetli resminamalaryň kabul edilendigini belledi. “Ýakynda bolsa ýurdumyza ýene-de bir hoş habar gelip gowuşdy. Birleşen Milletler Guramasynyň Baş Assambleýasynyň 80-nji sessiýasynyň 64-nji plenar mejlisiniň dowamynda Türkmenistanyň başlangyjy bilen «Birleşen Milletler Guramasynyň Durnukly ulag boýunça onýyllygy» hem-de «Durnukly ösüşi üpjün etmekde ygtybarly we durnukly energiýa birikmesiniň esasy orny» atly Kararnamalar biragyzdan kabul edildi” diýip, döwlet Baştutanymyz aýtdy we bu başlangyçlary goldan ähli ýurtlara türkmen halkynyň adyndan tüýs ýürekden minnetdarlyk bildirdi.

Döwlet Baştutanymyz tamamlanyp barýan ýylyň jemini jemläp, ýurdumyzyň ykdysadyýetini ösdürmek üçin maksatnamalaýyn işleriň amala aşyrylýandygyny, ähli pudaklarda ýokary ösüş depginleriniň gazanylýandygyny kanagatlanma bilen belledi. Ýurdumyzyň ähli sebitlerinde önümçilik we medeni-durmuş maksatly desgalaryň, iri ýaşaýyş toplumlarynyň gurluşygy dowam etdirilýär. Şeýle-de hormatly Prezidentimiz Täze ýylyň baýram edilýän günlerinde ähli gulluklarda nobatçylygyň tertibini ýola goýmagy, bazarlarda we dükanlarda dürli görnüşli harytlaryň bolçulygyny üpjün etmegi, baýramçylyk günlerinde raýatlarymyzyň gowy dynç almagy üçin şäherlerde we obalarda medeni çykyşlary guramagy tabşyrdy.

Täze ýyl baýramçylygy mynasybetli şatlykly pursatlara baý bolan dabaralar 26-njy dekabrda Maslahat köşgünde ýaş türkmenistanlylaryň gatnaşmagynda geçirilen baýramçylyk çäresi bilen dowam etdi. 27-nji dekabrda hormatly Prezidentimiz paýtagtymyzdaky «Älem» medeni-dynç alyş merkezinde ýerleşýän ýurdumyzyň Baş arçasynyň ýanynda guralan Täze ýyl dabarasyna gatnaşdy. Watanymyzyň ähli welaýatlaryndan, paýtagtymyzdan we Arkadag şäherinden gelen ýaşajyk ildeşlerimiz üçin şol gün Aşgabat çäksiz täsinlikler dünýäsine öwrüldi. Täze ýyl baýramynyň we ertekileriň baş gahrymanlarynyň dabara gatnaşmagy körpeler üçin has-da täsirli boldy. Döwlet Baştutanymyz çagalaryň haýyşy boýunça olar bilen bilelikde şatlykly wakadan ýadygärlik hökmünde ýurdumyzyň Baş arçasynyň ýanynda surata düşdi.

Söwda-senagat edarasynyň baýramçylyk öwüşgininde bezelen uly zalynda Aýazbaba bilen Garpamygyň, 2026-njy ýylyň nyşany bolan ýylkynyň, estrada aýdymçylarynyň, teatr we sirk artistleriniň, folklor, tans toparlarynyň, çagalar döredijilik toparlarynyň, şol sanda çagalar baglarynda terbiýelenýänlerden başlap, dürli ýaşdaky zehinli çagalaryň gatnaşmaklarynda täsirli pursatlara beslenen çykyşlar ýaýbaňlandyryldy. Baýramçylyk dabarasyna hormatly Prezidentimiz, ýurdumyzyň Hökümet agzalary, daşary ýurtlaryň Türkmenistandaky diplomatik wekilhanalarynyň ýolbaşçylary, ýurdumyzyň daşary döwletlerdäki ilçileri öz çagalarydyr agtyklary bilen gatnaşdylar.

Şeýlelikde, syýasy, ykdysady, medeni ulgamlarda gazanylan üstünlikler bilen ýurdumyzyň ýyl ýazgysynda ýene bir ajaýyp sahypany açan 2025-nji — Halkara parahatçylyk we ynanyşmak ýyly tamamlanyp barýar. Bitarap ýurdumyz dünýäniň ähli gyzyklanma bildirýän döwletleri bilen dostlukly gatnaşyklary ösdürmäge gönükdirilen halkara hyzmatdaşlyk strategiýasyny üstünlikli durmuşa geçirýän hormatly Prezidentimiziň baştutanlygynda ählumumy abadançylygyň we Watanymyzyň rowaçlygynyň bähbidine köpugurly mümkinçiliklerini netijeli ulanmagy maksat edinýär.

(TDH)

Hormatly Prezidentimiz Serdar Berdimuhamedow Täze ýyl dabaralaryna gatnaşdy

Aşgabat, 27-nji dekabr (TDH). Asylly däbe görä, şu gün hormatly Prezidentimiz Serdar Berdimuhamedow ýurdumyzyň Baş arçasynyň ýanynda guralan Täze ýyl dabarasyna gatnaşdy. Bu waka bagtyýar çagalarda aýratyn şatlyk duýgusyny döretdi.

Ak mermerli Aşgabadyň gözel künjekleriniň biri bolan “Älem” medeni-dynç alyş merkezinde giň möçberli Täze ýyl baýramçylygy geçirildi. Meýdançanyň merkezinde depesi “2026” ýazgyly, sekizburçly ýyldyz bilen bezelen Baş arça diňe bir dabaranyň geçirilýän esasy künjegi bolman, eýsem, türkmen halkynyň mizemez jebisliginiň, abadançylygynyň hem nyşanydyr. Paýtagtymyzdan, Arkadag şäherinden, ähli welaýatlardan gelen ýaşajyk ildeşlerimiz üçin bu gün Aşgabat täsinlikler dünýäsine öwrüldi. Meýdança ýygnanan çagalary şatlyk duýgusy gurşap aldy. Arçany bezeýän oýnawaçlaryň öwüşginleri, dürli reňkli çyralardyr bezegler ýagty geljege ynam döredýän ägirt uly baýramçylygyň buşlukçysy boldy.

Erteki gahrymanlarynyň keşbini janlandyran çagalaryň şatlyk-şowhuny meýdançany açyk asmanyň astyndaky teatr sahnasyna öwürdi. Daş-töweregi gurşap alan, dürli yşyklar bilen bezelen baglar baýramçylyga mahsus jadyly görnüşleri döredýär.

Dabara gatnaşyjylar hormatly Prezidentimize sabyrsyzlyk bilen garaşýarlar. Döwlet Baştutanymyzyň bu baýramçylyk çäresine gatnaşmagy ýurdumyzda ýaş nesil barada edilýän aladalaryň aýdyň nyşany bolup durýar. Arkadagly Gahryman Serdarymyzyň awtoulagy dabaranyň geçirilýän ýerine geldi. Bu ýerde çagalar döwlet Baştutanymyzy uly ruhubelentlik we şatlyk duýgusy bilen garşylap, gül desselerini gowşurdylar hem-de hoşallyklaryny beýan etdiler. Körpeleriň ýerine ýetiren goşgulary Garaşsyz, baky Bitarap ýurdumyzyň bagtyýar çagalarynyň çuňňur hoşallygynyň nyşanyna öwrüldi.

Joşgunly aýdym-sazlaryň astynda hormatly Prezidentimiz Serdar Berdimuhamedow çagalar bilen bilelikde ajaýyp Täze ýyl arçasynyň ýanyna barýar. Bu ýerde baýramçylygyň baş gahrymanlary bolan Aýazbaba bilen Garpamyk hem-de ýylyň müçeleriniň keşplerini janlandyran körpeler Arkadagly Gahryman Serdarymyzy Täze ýyl baýramy bilen gutladylar. Aýazbaba çagalar barada edilýän aladalar üçin döwlet Baştutanymyza hem-de Gahryman Arkadagymyza tüýs ýürekden hoşallygyny beýan etdi.

Soňra körpeleriň çykyşlary ýaýbaňlandyryldy. Ýaş aýdymçylaryň, çagalar tans toparlarynyň ýerine ýetiren aýdym-sazly kompozisiýalary hemmelere Täze ýyl şatlygyny paýlady. Hormatly Prezidentimiz eziz Watanymyzyň geljegi bolan şadyýan çagalaryň çykyşlaryna uly gyzyklanma bilen tomaşa etdi.

Mälim bolşy ýaly, Türkmenistanyň döwlet syýasatynda ösüp gelýän ýaş nesiller baradaky alada esasy orun eýeläp, munuň özi ýurdumyzyň uzak möhletli abadançylygynyň hem binýady bolup durýar. Her bir çagany söýgi we alada bilen gurşap almak, olaryň intellektual, döredijilik mümkinçiliklerini durmuşa geçirmek üçin ähli şertleri döretmek bu ugurda alnyp barylýan giň möçberli işleriň esasyny düzýär. Döwletimiz ýaşajyk raýatlara ýurdumyzyň esasy gymmatlygy hökmünde garamak bilen, çagalar üçin saglygy goraýyş, bilim we beýleki ulgamlarda döwrebap infrastrukturany döretmäge ägirt uly serişdeleri gönükdirýär. Öňdebaryjy tehnologiýalar bilen üpjün edilen döwrebap mekdepleriň, çagalar baglarynyň, sagaldyş merkezleriniň yzygiderli gurlup ulanmaga berilmegi bu strategiýanyň aýdyň güwäsidir. Şunda milli däp-dessurlaryň sanly tehnologiýalar bilen sazlaşykly utgaşdyrylan bilim gurşawynyň emele getirilmegine aýratyn üns berilýär. Ýaş zehinleri goldamak üçin ýöriteleşdirilen sungat mekdepleri, sport toplumlary we ylmy-tehnologik merkezleri döredilýär.

Çagalaryň saglygyny, durmuş goraglylygyny üpjün etmek bu syýasatyň binýatlaýyn ugry bolup durýar. Eneligi we çagalygy goramak boýunça maksatnamalar, ýokary hilli lukmançylyk hyzmatlary, çagalar sportunyň ösdürilmegi beden taýdan sagdyn, ruhy taýdan baý nesli kemala getirmäge ýardam berýär. Döwletimiz her bir çaganyň jemgyýete üstünlikli goşulmagy üçin deň şertleri döredýär. Bu yzygiderli alada ýaş nesilllerde watansöýüjilik we ýurdunyň geljegi üçin jogapkärçilik duýgusyny terbiýeleýär. Şeýlelikde, çagalar hem-de ýaşlar baradaky hemmetaraplaýyn alada Türkmenistanda döwlet doktrinasynyň aýratyn ugruna öwrüldi.

...Uly şatlyk-şowhun bilen Täze ýyl arçasynyň daşyndan aýlanmak baýramçylygyň ýatdan çykmajak pursady boldy. Ýylanyň we ýylkynyň keşbini janlandyrýan lybaslary geýen çagalar döwlet Baştutanymyzdan özleri bilen Täze ýyl arçasynyň daşyndan aýlanmagyny haýyş etdiler. Arkadagly Gahryman Serdarymyz körpe nesliň wekilleri bilen bilelikde dostlugy, parahatçylygy, bitewüligi, jebisligi alamatlandyrýan bu baýramçylygyň şatlygyny paýlaşdy.

Soňra dabara gatnaşan ähli çagalara Täze ýyl sowgatlary gowşuryldy. Hormatly Prezidentimiz çagalaryň haýyşy boýunça olar bilen bilelikde şu günki şatlykly wakadan ýadygärlik hökmünde Baş arçanyň ýanynda surata düşdi. Bu dabara Türkmenistanda çagalaryň sazlaşykly ösmegi we bagtyýar durmuşda ýaşamagy üçin ähli şertleri döretmegiň ileri tutulýan ugur bolup durýandygyny ýene-de bir gezek tassyklady.

Döwlet Baştutanymyz dabara gatnaşyjylar bilen mähirli hoşlaşdy we olara Täze ýyly şadyýan garşylamagy, ajaýyp gyşky dynç alşy, okuwlarynda üstünlikleri arzuw edip, awtoulagynda Söwda-senagat edarasynyň binasyna tarap ugrady. Bu ýerde çagalar döredijilik toparynyň, estrada aýdymçylarynyň, teatr we sirk artistleriniň gatnaşmagynda Täze ýyl şüweleňi dowam etdi.

Arkadagly Gahryman Serdarymyz Söwda-senagat edarasynyň baýramçylyk öwüşgininde bezelen uly zalyna barýar. Bu ýerdäki gözel arçanyň daşynda Aýazbaba we Garpamyk, 2026-njy ýylyň nyşany bolan ýylky, baýramçylyk lybasly köp sanly ýaşajyk aşgabatlylar, paýtagtymyzyň myhmanlary bar. Olaryň ählisi döwlet Baştutanymyzy uly ruhubelentlik bilen garşylaýarlar.

Baýramçylyk dabarasyna hormatly Prezidentimiz, ýurdumyzyň Hökümet agzalary öz çagalarydyr agtyklary bilen geldiler. Şeýle-de Täze ýyl mynasybetli guralan dabara daşary ýurtlaryň Türkmenistandaky diplomatik wekilhanalarynyň ýolbaşçylary, ýurdumyzyň daşary döwletlerdäki ilçileri çagalary bilen gatnaşdylar.

Hormatly Prezidentimiz estrada aýdymçylarynyň, teatr we sirk artistleriniň, folklor-tans toparlarynyň, çagalar döredijilik toparlarynyň, şol sanda çagalar baglarynda terbiýelenýänlerden başlap, dürli ýaşdaky zehinli çagalaryň çykyşlaryna tomaşa etdi. Baýramçylyk äheňinde bezelen sahnada Täze ýyla bagyşlanan ruhubelent aýdym-sazlaryň, joşgunly tanslaryň utgaşmagynda täsirli pursatlara beslenen çykyşlar ýaýbaňlandyryldy. Çagalaryň baýramçylyk mynasybetli dürli dillerde ýerine ýetiren goşgulary dabara gatnaşyjylarda ýakymly täsirleri galdyrdy.

Şeýle hem birnäçe aýdymçylar, döwlet derejesindäki bäsleşikleriň, halkara döredijilik festiwallarynyň ýeňijileri ajaýyp eserleri bilen çykyş etdiler. Olar Täze ýyl mynasybetli dünýä halklarynyň, türkmen kompozitorlarynyň häzirki zaman aýdymlaryny, nusgawy eserleri, horeografik çykyşlary öz içine alýan ýörite medeni maksatnamany taýýarlapdyrlar.

Tomaşaçylar Türkmen döwlet gurjak teatrynyň, Türkmenistanyň Döwlet sirkiniň artistleriniň çykyşlaryny şowhunly el çarpyşmalar bilen garşyladylar. Olaryň çykyşlary ýygnananlaryň ruhuny has-da belende göterdi. Döwlet sirkiniň artistleriniň döredijilik işgärleri täsin galdyryjy çykyşlary bilen tomaşaçylarda ýakymly täsirleri döretdi. Ýaşajyk zehinler hem öz başarnyklary bilen hemmelere şatlyk paýlap, türkmen sungatynyň, medeniýetiniň uly geljeginiň bardygyny aýdyňlyk bilen görkezdiler.

Täze ýyl baýramy mynasybetli dabara gatnaşan bagtyýar çagalara sowgatlar gowşuryldy we süýjülik torty hödürlenildi.

Döwlet Baştutanymyz ýygnananlary ýetip gelýän Täze ýyl bilen gutlady hem-de dabara gatnaşyjylar bilen hoşlaşyp, bu ýerden ugrady.

Bu gün paýtagtymyzyň şaýollary, seýilgähleri, jemgyýetçilik ýerleri ajaýyp Täze ýyl lybasyna beslendi. Özboluşly kompozisiýalar, yşyklandyryjy bezegler ähli ýerde gözel görnüşleri emele getirýär. Baýramçylyk dabaralary her bir öýe, her bir maşgala ýagşy arzuwlary, şatlykly pursatlary, baýramçylyk täsinliklerini eçilýär.

Şeýlelikde, hormatly Prezidentimiziň şu günki dabaralara gatnaşmagy ýaş nesilleriň abadançylygy we olaryň sazlaşykly ösmegi üçin ähli şertleriň döredilmeginiň Türkmenistanyň döwlet syýasatynyň esasy ugry bolup durýandygyny tassyklady. Ruhubelentlik ýagdaýynda geçen baýramçylyk çäreleri ýurdumyzda bagtyýar çagalygyň aýdyň nyşany bolup, ýaşajyk raýatlarymyzy ýetip gelýän 2026-njy ýylda okuwda we döredijilikde täze üstünliklere ruhlandyrdy.

Aşgabat, 26-njy dekabr (TDH). Şu gün hormatly Prezidentimiz Serdar Berdimuhamedow Ministrler Kabinetiniň we Döwlet howpsuzlyk geňeşiniň giňişleýin mejlisini geçirdi. Oňa welaýatlaryň, Aşgabat şäheriniň häkimleri hem gatnaşdylar.

Döwlet Baştutanymyz mejlisi açyp, Türkmenistanyň Mejlisiniň Başlygy D.Gulmanowa söz berdi.

Milli parlamentiň ýolbaşçysy, ilki bilen, hormatly Prezidentimizi we türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzy ýetip gelýän Täze ýyl bilen deputatlaryň adyndan tüýs ýürekden gutlap, hormatly Prezidentimiziň baştutanlygynda 2026-njy ýylyň ýurdumyza uly üstünlikleri we rowaçlyklary getirmegini, döwlet Baştutanymyzyň hem-de Milli Liderimiziň janlarynyň sag, ömürleriniň uzak bolmagyny arzuw etdi.

Soňra Mejlisiň Başlygy 2026-njy ýylyň şygaryny we nyşanyny kesgitlemek boýunça ýerine ýetirilen işleriň netijeleri barada maglumat berdi.

Bellenilişi ýaly, Gahryman Arkadagymyzyň geljek ýylyň — bedew ýylynyň aýratyn ähmiýete eýedigi, halkymyzyň köpasyrlyk taryhynda ahalteke bedewlerine uly ornuň degişlidigi baradaky pähimlerinden, Arkadagly Gahryman Serdarymyzyň baştutanlygynda ösüşleriň belentliklerine tarap bedew bady bilen ynamly öňe barýan berkarar Watanymyzyň ähli ugurlarda gazanýan üstünliklerini dabaralandyrmak maksady bilen, halk wekillerinden, ýurdumyzyň iri jemgyýetçilik birleşiklerinden, zähmetkeş toparlaryndan, raýatlardan gelip gowşan teklipleriň esasynda, 2026-njy ýyly “Garaşsyz, baky Bitarap Türkmenistan — bedew batly at-myradyň mekany» ýyly diýip atlandyrmak barada Mejlisiň karary taýýarlanyldy. Şunuň bilen baglylykda, hormatly Prezidentimiziň garamagyna geljek ýylyň nyşany hödürlenildi.

Hormatly Prezidentimiz mejlise gatnaşyjylara ýüzlenip, ýurdumyzda her ýyly döwrebap atlandyrmak boýunça ýylyň şygarynyň yglan edilýändigini we nyşanynyň kabul edilýändigini belledi. Şunuň bilen baglylykda, döwlet Baştutanymyz Türkmenistanyň Mejlisiniň agzalarynyň halkymyz bilen bilelikde geljek ýylyň şygaryny hem-de nyşanyny teklip edýändiklerini aýtdy we bu teklibi goldap, 2026-njy ýylyň şygaryny «Garaşsyz, baky Bitarap Türkmenistan — bedew batly at-myradyň mekany» diýip yglan etdi. Bu çözgüt şowhunly el çarpyşmalar bilen garşylanyldy.

Soňra Ministrler Kabinetiniň Başlygynyň orunbasary, daşary işler ministri R.Meredowa söz berildi. Ol hormatly Prezidentimiziň döwlet syýasatynyň esasy ugurlarynyň Türkmenistanyň mukaddes Garaşsyzlygyny, onuň döwletliligini we hukuk esaslaryny berkitmäge, ýurdumyzyň ykdysady kuwwatyny ulgamlaýyn esasda pugtalandyrmaga, halkymyzyň hal-ýagdaýyny, ýaşaýyş-durmuş şertlerini yzygiderli ýokarlandyrmaga gönükdirilendigini belledi. Arkadagly Gahryman Serdarymyzyň baştutanlygynda Türkmenistanyň daşary syýasatyny has-da işjeňleşdirmek, döwletimiziň halkara giňişlikdäki at-abraýyny mundan beýläk-de ýokarlandyrmak maksady bilen, uly işler durmuşa geçirilýär. 2025-nji ýylda amala aşyrylan giň gerimli işler hem munuň aýdyň mysalydyr. Bularyň ählisi Gahryman Arkadagymyzyň köp ýyllaryň dowamynda alyp baran asylly işleriniň häzirki wagtda hormatly Prezidentimiziň baştutanlygynda mynasyp dowam etdirilýändigini hem-de türkmeniň milli düşünjesine mahsus dowamat-dowam ýörelgesiniň iş ýüzünde amal edilýändigini görkezýär.

Wise-premýer, daşary işler ministri geljek ýylda hem öňde goýlan wezipeleri üstünlikli ýerine ýetirmek üçin ähli zerur tagallalary etjekdiklerine ynandyrdy hem-de 2026-njy ýylyň “Garaşsyz, baky Bitarap Türkmenistan — bedew batly at-myradyň mekany» ýyly diýlip atlandyrylmagy bilen döwlet Baştutanymyzy hem-de Gahryman Arkadagymyzy mejlise gatnaşyjylaryň adyndan tüýs ýürekden gutlady. Bellenilişi ýaly, Halkara parahatçylyk we ynanyşmak ýylynda daşary syýasy ugur boýunça dürli derejede möhüm çäreler geçirildi. Olar halkara parahatçylygy, howpsuzlygy we durnukly ösüşi üpjün etmäge, durmuş, ynsanperwer meseleleri çözmäge gönükdirilendir.

R.Meredow hormatly Prezidentimiziň başlangyçlary bilen şu ýylda Birleşen Milletler Guramasynyň Baş Assambleýasy tarapyndan örän wajyp halkara resminamalaryň kabul edilendigini aýdyp, ýakynda kabul edilen «Durnukly ösüşi üpjün etmekde ygtybarly we durnukly energiýa birikmesiniň esasy orny» hem-de «Birleşen Milletler Guramasynyň Durnukly ulag boýunça onýyllygy (2026 — 2035-nji ýyllar)» atly Kararnamalary muňa mysal hökmünde görkezdi. Ol döwlet Baştutanymyzy ýurdumyzyň bu daşary syýasy ýeňşi bilen tüýs ýürekden gutlady. Şeýle hem wise-premýer, daşary işler ministri hormatly Prezidentimiziň Hökümet agzalaryny, ýurdumyzyň dürli pudaklarynda zähmet çekýän raýatlaryny, Türkmenistanyň dünýä bileleşigi bilen halkara hyzmatdaşlygyny ösdürmäge goşant goşýan daşary ýurt raýatlaryny “Türkmenistanyň Bitaraplygynyň 30 ýyllygyna” atly ýubileý medaly we ýadygärlik nyşany bilen sylaglandygyny aýdyp, bildirilen uly hormat hem-de ynam üçin döwlet Baştutanymyza ýene-de bir gezek hoşallygyny beýan etdi.

Çykyşynyň ahyrynda Ministrler Kabinetiniň Başlygynyň orunbasary, daşary işler ministri R.Meredow hormatly Prezidentimizi hem-de türkmen halkynyň Milli Liderini ýetip gelýän täze — 2026-njy ýyl bilen tüýs ýürekden gutlap, berk jan saglyk, abadançylyk, bagtyýarlyk, mundan beýläk-de uly üstünlikleri arzuw etdi.

Hormatly Prezidentimiz mejlise gatnaşyjylara ýüzlenip, 2025-nji — Halkara parahatçylyk we ynanyşmak ýylynyň Birleşen Milletler Guramasynyň Baş Assambleýasy tarapyndan «Türkmenistanyň hemişelik Bitaraplygy» atly Kararnamanyň kabul edilmegi bilen başlanandygyny we bu ýylyň dowamynda köp sanly halkara çäreleriň geçirilip, möhüm ähmiýetli resminamalaryň kabul edilendigini belledi. “Ýakynda bolsa ýurdumyza ýene-de bir hoş habar gelip gowuşdy. Birleşen Milletler Guramasynyň Baş Assambleýasynyň 80-nji sessiýasynyň 64-nji plenar mejlisiniň dowamynda Türkmenistanyň başlangyjy bilen «Birleşen Milletler Guramasynyň Durnukly ulag boýunça onýyllygy» hem-de «Durnukly ösüşi üpjün etmekde ygtybarly we durnukly energiýa birikmesiniň esasy orny» atly Kararnamalar biragyzdan kabul edildi” diýip, döwlet Baştutanymyz aýtdy we bu başlangyçlary goldan ähli ýurtlara türkmen halkynyň adyndan tüýs ýürekden minnetdarlyk bildirdi. Hormatly Prezidentimiz ýurdumyzyň geljekde-de Birleşen Milletler Guramasy bilen netijeli hyzmatdaşlygy ösdürmek boýunça alnyp barylýan işleri dowam etdirjekdigini nygtap, mejlise gatnaşyjylary möhüm ähmiýetli Kararnamalaryň kabul edilmegi bilen tüýs ýürekden gutlady.

Nygtalyşy ýaly, 2025-nji ýyl tamamlanyp barýar. Bu ýyl Garaşsyz, hemişelik Bitarap döwletimiziň taryhynda hemişelik galar. Geçip barýan Halkara parahatçylyk we ynanyşmak ýylynda ýurdumyzda taryhy özgertmeler durmuşa geçirildi. Halkymyzyň abadan we bagtyýar durmuşy has-da rowaçlandy. Garaşsyz Watanymyzyň hemişelik Bitaraplygynyň 30 ýyllyk baýramy halkara derejede giňden bellenildi. Geçip barýan ýylda Ministrler Kabinetiniň 44, Döwlet howpsuzlyk geňeşiniň 11 mejlisi, şeýle hem dürli döwlet maslahatlarynyň 24-si geçirildi. Bu mejlislerde we maslahatlarda döwletimiziň içeri hem-de daşary syýasatyna degişli möhüm soraglara seredildi.

“Ýurdumyzyň ykdysadyýetini ösdürmek üçin maksatnamalaýyn işler amala aşyrylýar, ähli pudaklarda ýokary ösüş depginleri gazanylýar. Zähmet haklary, pensiýalar, döwlet kömek pullary, talyp haklary öz wagtynda maliýeleşdirildi. Döwletimiziň ösüşini üpjün edýän täze kanunlar kabul edildi. Ýurdumyzyň ähli sebitlerinde önümçilik we medeni-durmuş maksatly desgalaryň, iri ýaşaýyş toplumlarynyň gurluşygy dowam etdirilýär” diýip, hormatly Prezidentimiz aýtdy we mejlise gatnaşýan ýolbaşçylara Täze ýylyň baýram edilýän günlerinde ähli gulluklarda nobatçylygyň tertibini ýola goýmagy, baýramçylyk günlerinde jemagat hojalygy, elektrik we suw üpjünçilik gulluklarynyň, bejeriş-öňüni alyş edaralarynyň bökdençsiz işledilmegini üpjün etmegi tabşyrdy. Döwlet Baştutanymyz bazarlarda we dükanlarda dürli görnüşli harytlaryň bolçulygyny üpjün etmegi, baýramçylyk günlerinde raýatlarymyzyň gowy dynç almagy üçin medeni çykyşlary guramagy, şäherlerde, obalarda jemgyýetçilik ulaglarynyň kadaly gatnamagyny üpjün etmegi, Täze ýyl baýramçylygy günlerinde ähli ýerde tertip-düzgüniň pugta berjaý edilmegini gözegçilikde saklamagy tabşyrdy.

Hormatly Prezidentimiz Serdar Berdimuhamedow Ministrler Kabinetiniň we Döwlet howpsuzlyk geňeşiniň giňişleýin mejlisini jemläp, hemmeleri täze — 2026-njy ýyl bilen tüýs ýürekden gutlady we geljek ýylda halkymyzyň ýaşaýyş-durmuş şertlerini has-da gowulandyrmak, berkarar döwletimizi ösdürmek ugrunda alyp barjak işlerinde uly üstünlikleri arzuw etdi.

Aşgabat, 25-nji dekabr (TDH). Şu gün paýtagtymyzdaky “Mekan” köşgünde Türkmenistanyň Halk Maslahatynyň guramagynda “Halkara parahatçylyk we ynanyşmak ýyly: Bitarap Türkmenistanyň ynamly gadamlary” atly dabara geçirildi. Oňa Hökümet agzalary, ýurdumyzyň diplomatik gullugynyň, daşary döwletleriň we halkara guramalaryň Aşgabatdaky diplomatik wekilhanalarynyň ýolbaşçylarydyr wekilleri, dürli pudaklarda zähmet çekýän raýatlar, ýaşlar gatnaşdylar.

Parahatçylyk söýüjilik, oňyn Bitaraplyk ýörelgeleri Gahryman Arkadagymyz tarapyndan esaslandyrylyp, täze taryhy eýýamda hormatly Prezidentimiziň baştutanlygynda mynasyp dowam etdirilýän Türkmenistanyň daşary syýasat strategiýasynyň esasyny düzýär. Bitarap ýurdumyz öz üstüne alan halkara borçnamalaryna üýtgewsiz ygrarly bolmak bilen, dünýäde parahatçylyk dörediji merkez hökmünde ykrar edilýär. Döwletimiziň hemişelik Bitaraplyk hukuk derejesine eýe bolan wagtyndan bäri geçen 30 ýylyň içinde Türkmenistanyň başlangyjy bilen Birleşen Milletler Guramasynyň Baş Assambleýasy tarapyndan birnäçe Kararnamalar kabul edildi. Şolaryň hatarynda Türkmenistanyň hemişelik Bitaraplygynyň degişli Kararnamalar bilen üç gezek ykrar edilmegi Watanymyzyň dünýädäki abraýynyň ýokarydygyny, durmuşa geçirýän syýasy ugrunyň bolsa halkara bileleşik tarapyndan giňden goldanylýandygyny aýdyň görkezýär. Türkmenistanyň hemişelik Bitaraplygynyň 30 ýyllygyna, BMG-niň döredilmeginiň 80 ýyllygyna beslenip, tamamlanyp barýan şu ýylyň ýurdumyzyň başlangyjy bilen “Halkara parahatçylyk we ynanyşmak ýyly” diýlip yglan edilmegi möhüm waka boldy. Munuň özi ýurdumyzyň oňyn Bitaraplyga esaslanýan daşary syýasatynyň üstünliklere beslenmeginde, dünýäde parahatçylyk we ynanyşmak ýörelgelerini dabaralandyrmakda taryhy senä öwrüldi. Şu gezekki dabara hem şanly ýylda ýetilen sepgitlere nazar aýlamaga, Diýarymyzyň syýasy-jemgyýetçilik durmuşynda bolup geçen taryhy wakalaryň ähmiýetini wagyz etmäge gönükdirildi.

Dabaranyň geçirilýän ýerinde medeniýet we sungat ussatlarynyň aýdym-sazly çykyşlary ýaýbaňlandyryldy. Dabara gatnaşyjylar halkymyzyň medeni mirasyna, Garaşsyzlygyň we hemişelik Bitaraplygyň aýdyň ýolunda ýurdumyzyň gazanan üstünliklerine bagyşlanan sergini synladylar.

Soňra dabara “Mekan” köşgüniň mejlisler zalynda dowam etdi. Türkmenistanyň Halk Maslahatynyň Diwanynyň iş dolandyryjysy R.Bazarow dabara gatnaşyjylary mübärekläp, «Halkara parahatçylyk we ynanyşmak ýyly: Bitarap Türkmenistanyň ynamly gadamlary» atly dabaranyň möhüm ähmiýetini belledi.

Nygtalyşy ýaly, “Halkara parahatçylyk we ynanyşmak ýyly” şygary bilen geçip barýan ýylda hormatly Prezidentimiziň baştutanlygynda alnyp barlan işler Türkmenistanyň halkara abraýyny has-da belende galdyrmaga ýardam berdi. Ýurdumyzda Türkmenistanyň hemişelik Bitaraplygynyň 30 ýyllygy hem-de 2025-nji ýylyň BMG-niň Baş Assambleýasy tarapyndan «Halkara parahatçylyk we ynanyşmak ýyly» diýlip yglan edilmegi mynasybetli çäreleri ýokary derejede geçirmek boýunça döredilen, Gahryman Arkadagymyz tarapyndan ýolbaşçylyk edilýän guramaçylyk döwlet topary tarapyndan köp sanly çäreler üstünlikli geçirildi. Baş Assambleýa tarapyndan Türkmenistanyň başlangyjy bilen «2025-nji ýyl — Halkara parahatçylyk we ynanyşmak ýyly» atly Kararnamanyň biragyzdan kabul edilmegi döwletimiziň şan-şöhratyny has-da beýgelden wakalaryň biri boldy. Birleşen Milletler Guramasynyň esaslandyrylmagynyň 80 ýyllyk ýubileýi bilen gabat gelen ýurdumyzyň Bitaraplygynyň şanly 30 ýyllygy 12-nji dekabrda giňden dabaralandyryldy.

«Awaza» milli syýahatçylyk zolagynda ýokary derejede guralan Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatynyň jemleri boýunça birnäçe möhüm resminamalaryň kabul edilmegi Watanymyzyň halkara abraýyny has-da belende göterdi. Şeýle-de dekabr aýynda «Awaza» milli syýahatçylyk zolagynda durnukly ösüşi üpjün etmekde zenanlaryň möhüm ornuny tassyklan «Häzirki zaman jemgyýetinde zenanlaryň orny: Durnukly ösüş maksatlaryna ýetmek ugrunda halkara hyzmatdaşlygy ösdürmek» atly halkara maslahat geçirilip, onuň Jemleýji resminamasy kabul edildi diýip, R.Bazarow aýtdy we hormatly Prezidentimiziň «Türkmenistanyň Bitaraplygy — parahatçylygyň we ynanyşmagyň aýdyň ýoly» atly täze kitabyny halkymyza peşgeş bermeginiň Halkara Bitaraplyk gününi, Türkmenistanyň hemişelik Bitaraplygynyň şanly 30 ýyllygyny has-da dabaralandyrandygyny nygtady.

12-nji dekabrda paýtagtymyzda hormatly Prezidentimiziň we Gahryman Arkadagymyzyň başlangyçlary bilen, döwlet Baştutanlarynyň we halkara guramalaryň ýolbaşçylarynyň gatnaşmagynda üstünlikli geçirilen halkara forum Türkmenistanyň dünýä jemgyýetçiligindäki abraýyny has-da artdyrdy, döwletimiziň parahatçylyk söýüjilikli taglymatyny ýene-de bir gezek dünýä ýaýdy diýip, Türkmenistanyň Halk Maslahatynyň Diwanynyň iş dolandyryjysy R.Bazarow çykyşyny jemledi.

Soňra Türkmenistanyň Döwlet senasy ýerine ýetirildi. Soňra Ministrler Kabinetiniň Başlygynyň orunbasary, daşary işler ministri R.Meredowa söz berildi.

Wise-premýer, daşary işler ministri örän möhüm jemgyýetçilik-syýasy waka — Türkmenistanyň Halk Maslahaty tarapyndan guralýan «Halkara parahatçylyk we ynanyşmak ýyly: Bitarap Türkmenistanyň ynamly gadamlary» atly dabara gatnaşyjylary mähirli mübärekläp, 2025-nji ýylyň Türkmenistanyň taryhynda, onuň döwletlilik ýörelgeleriniň, syýasy, ykdysady, durmuş ösüşiniň pugtalanmagynda möhüm tapgyr bolandygyny belledi. Gahryman Arkadagymyzyň hem-de Arkadagly Gahryman Serdarymyzyň giň gerimli döwlet işleriniň netijesinde 2025-nji ýyl ýurdumyzyň içeri we daşary syýasatynda gazanylan uly üstünlikler, ýetilen belent sepgitler bilen dabaralandy.

Ýakynda ýurdumyzda bütin dünýä jemgyýetçiligi bilen bilelikde Türkmenistanyň hemişelik Bitaraplygynyň 30 ýyllygy giňden bellenilip geçildi. Nygtalyşy ýaly, türkmen halkynyň bu baýramy başga-da iki möhüm waka — Türkmenistanyň başlangyjy esasynda Baş Assambleýa tarapyndan yglan edilen Halkara parahatçylyk we ynanyşmak ýyly hem-de Birleşen Milletler Guramasynyň döredilmeginiň 80 ýyllygy bilen gabat geldi. Bu üç şanly sene bir-biri bilen berk baglanyşykly bolup, derwaýys ähmiýete eýedir we amaly taýdan çuň many-mazmuny özünde jemleýär.

2025-nji ýylda Türkmenistan hemişelik Bitaraplyk ýörelgelerine doly ygrarlydygyny, Birleşen Milletler Guramasynyň Tertipnamasyny we halkara hukugyň kadalaryny iş ýüzünde durmuşa geçirmekde tutanýerli hereket edýändigini, halkara syýasatda parahatçylyk we ynanyşmak medeniýetini işjeň öňe sürmäge hem-de berkitmäge taýýardygyny ýene-de bir gezek tassyklady. Bitaraplyk, parahatçylyk, ynanyşmak ýaly özara baglanyşykly üç möhüm ýörelgede Birleşen Milletler Guramasynyň jogapkärli agzasy hökmünde Türkmenistanyň ösüş filosofiýasy jemlenendir. Biz bu gün çylşyrymly meseleleri çözmekde bitaraplygy parahatçylyk dörediji we syýasy dialogyň esasy hökmünde ilerletmek boýunça uly işler amala aşyryldy diýip doly belläp bileris. Netijede, dünýäde biziň Bitaraplygymyza, onuň howpsuzlygyň, asudalygyň we durnukly ösüşiň möhüm şerti hökmünde tutýan ornuna düşünmegiň has artandygyny görmek bolýar diýip, wise-premýer, daşary işler ministri sözüni dowam etdi.

Bellenilişi ýaly, ýylyň dowamynda Türkmenistanda hem-de daşary ýurtlarda Halkara parahatçylyk we ynanyşmak ýylyna bagyşlanan çäreleriň ýüzlerçesi geçirildi. Şol bir wagtyň özünde Türkmenistanyň daşary syýasatyny, hemişelik Bitaraplyk derejesiniň many-mazmunyny dünýäniň köpçülikleýin habar beriş serişdelerinde, bilermenleriň we ylmy jemgyýetçiligiň arasynda wagyz etmek işlerine aýratyn üns berildi. Şu ýyl Birleşen Milletler Guramasynyň Baş Assambleýasy Türkmenistanyň başlangyjy boýunça Milletler Bileleşiginiň agza döwletleriniň onlarçasynyň awtordaş hökmünde çykyş etmeginde birnäçe Kararnamany biragyzdan kabul etdi. Şolaryň hatarynda «Türkmenistanyň hemişelik Bitaraplygy» atly Kararnama, energetika we ulag ýaly möhüm ugurlar boýunça hyzmatdaşlyga degişli Kararnamalar bar.

Wise-premýer, daşary işler ministri Baş Assambleýanyň şu ýylyň 15-nji dekabrynda kabul edilen «Durnukly ösüşi üpjün etmekde ygtybarly we durnukly energiýa birikmesiniň esasy orny» hem-de «Birleşen Milletler Guramasynyň Durnukly ulag boýunça onýyllygy (2026 — 2035-nji ýyllar üçin)» atly Kararnamalaryna aýratyn ünsi çekdi. Nygtalyşy ýaly, bu resminamalaryň ikisi hem Türkmenistanyň ählumumy gün tertibiniň wajyp meselelerini çözmek üçin dünýä jemgyýetçiliginiň tagallalaryny birleşdirmäge gönükdirilen syýasatynyň logiki dowamydyr. Bu resminamalarda Milletler Bileleşiginiň durnukly energetika we ulag ulgamynda alyp barýan işleriniň ýerine ýetirilişi barada seljerme berilýär, bu ugurlary Birleşen Milletler Guramasynyň, şol sanda Türkmenistanyň başlangyjy bilen döredilen ýörite iş toparlarynyň çäklerinde ösdürmek babatda anyk çäreler kesgitlenilýär. Agzalan Kararnamalar milli, sebit we ählumumy derejede durnukly energetika, ulag baglanyşygyny üpjün etmek boýunça halkara hyzmatdaşlygy dowam etdirmek, netijeli işleýän halkara energetika we ulag infrastrukturasyny döretmek üçin ygtybarly syýasy-hukuk binýadyna öwrüldi.

Şu ýylyň dowamynda Türkmenistan Ykdysady Hyzmatdaşlyk Guramasy, Yslam Hyzmatdaşlyk Guramasy, Türki Döwletleriň Guramasy, Garaşsyz Döwletleriň Arkalaşygy ýaly halkara guramalaryň we düzümleriň çäklerinde hem özüni işjeň ýurt hökmünde görkezdi. Şunuň bilen baglylykda, Türkmenistanyň Merkezi Aziýa döwletleriniň Baştutanlarynyň konsultatiw duşuşyklarynyň çäklerinde goňşy ýurtlar bilen alyp barýan hyzmatdaşlygy aýratyn nygtaldy. Bu formatyň şu ýylyň noýabrynda geçirilen ýedinji duşuşygynda oňa gatnaşyjy döwletler Türkmenistanyň doganlyk Azerbaýjany bu duşuşyklara doly hukukly agza hökmünde çagyrmak baradaky teklibini biragyzdan goldadylar.

Türkmenistan «Merkezi Aziýa +» dialogynyň işine-de netijeli gatnaşdy. Olaryň çäklerinde Hytaý Halk Respublikasy, Russiýa Federasiýasy, Amerikanyň Birleşen Ştatlary, Ýaponiýa, Ýewropa Bileleşigi, Italiýa Respublikasy ýaly ýurtlar bilen duşuşyklar geçirildi.

Hormatly Prezidentimiziň ýolbaşçylygyndaky ýurdumyzyň wekiliýeti sentýabr aýynda Nýu-Ýork şäherinde iş saparynda bolup, Baş Assambleýanyň 80-nji sessiýasyna gatnaşdy. Döwlet Baştutanymyz agzalan sessiýanyň ýokary derejeli plenar mejlisinde eden çykyşynda dünýäde ýüze çykan häzirki ýagdaýlara giňişleýin seljerme berdi, halkara parahatçylygy we howpsuzlygy berkitmäge, Ýer ýüzünde durnukly ösüşi üpjün etmäge, adamzadyň ýüzbe-ýüz bolýan durmuş we ynsanperwer meselelerini çözmäge gönükdirilen birnäçe anyk başlangyçlary öňe sürdi.

2025-nji ýylda ýokary derejedäki ikitaraplaýyn gatnaşyklar hem-de özara saparlar işjeň dowam etdi. Şunuň bilen baglylykda, şu ýylyň dowamynda hormatly Prezidentimiziň daşary ýurtlara döwlet, resmi we iş saparlarynyň 15-sini amala aşyrandygy, Gahryman Arkadagymyzyň hem 9 ýurtda saparda bolandygy, şol bir wagtda daşary ýurtlaryň döwlet we hökümet Baştutanlarynyň Türkmenistana saparlarynyň 31-siniň guralandygy aýdyldy. Munuň özi ýurdumyz tarapyndan işjeň daşary syýasatyň alnyp barylýandygyna, Türkmenistanyň dünýäniň dürli döwletleri bilen halkara hyzmatdaşlygynyň esasy ýörelgeleriniň iş ýüzünde netijeli durmuşa geçirilýändigine aýdyň şaýatlyk edýär.

2025-nji ýylda Türkmenistan «Açyk gapylar» syýasatynyň çäklerinde birnäçe iri halkara çäreleri geçirdi. Şolaryň hatarynda Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatyny we “Häzirki zaman jemgyýetinde zenanlaryň orny: Durnukly ösüş maksatlaryna ýetmek ugrunda halkara hyzmatdaşlygy ösdürmek” atly halkara maslahaty görkezmek bolar. Şunuň bilen bir hatarda, Halkara parahatçylyk we ynanyşmak ýyly, Halkara Bitaraplyk güni, Türkmenistanyň hemişelik Bitaraplygynyň 30 ýyllygy mynasybetli geçirilen halkara forum şu ýylyň esasy syýasy wakasy boldy. Oňa onlarça döwletiň we halkara guramalaryň wekilleri, döwlet, hökümet, parlament ugurly, şeýle-de abraýly halkara düzümleriň Baştutanlarynyň ýolbaşçylygyndaky wekiliýetler gatnaşdylar. Bu forum dünýä syýasy-diplomatik gün tertibiniň örän ähmiýetli wakasyna öwrüldi. Onuň jemleri boýunça kabul edilen Aşgabat Jarnamasy bolsa strategik taýdan many-mazmunly resminama boldy.

Halkara parahatçylyk we ynanyşmak ýylynda Türkmenistan tarapyndan alnyp barlan giň möçberli işler ýurdumyzyň dünýä derejesinde parahatçylyk dörediji merkezleriň biri hökmünde tanalmagyna ýardam berdi. Şunuň bilen bir hatarda, gazanylan üstünlikler Türkmenistanyň ençeme ýyllaryň dowamynda yzygiderli öňe sürýän, dünýäde giň goldaw tapýan we düşünilýän parasatly, öňdengörüjilikli strategiýasynyň hem-de halkara başlangyçlarynyň kanunalaýyk netijesidir. Şeýle-de wise-premýer, daşary işler ministri Türkmenistanyň halkara başlangyçlary barada durup geçdi. Nygtalyşy ýaly, «Ösüş arkaly parahatçylyk» başlangyjynyň esasy many-mazmuny üstünlikli durmuş-ykdysady ösüş, adamzadyň we dünýäniň abadançylygy, özara bähbitli hyzmatdaşlyk etmek babatdaky maksatlaryň aýrylmaz baglanyşykly bolmagyndan ybaratdyr. Bu başlangyç 10 ýyldan gowrak wagt mundan ozal Gahryman Arkadagymyz tarapyndan Birleşen Milletler Guramasynyň münberinden dünýä jemgyýetçiligine yglan edildi.

Milli Liderimiz parahatçylyk döredijilikli ugry ösdürmek bilen, 2021-nji ýylyň dekabrynda häzirki döwürde döwletara gatnaşyklaryň täze konsepsiýasyny kemala getirmek baradaky teklip bilen çykyş etdi we ony «Dialog — parahatçylygyň kepili» diýip atlandyrdy. Hormatly Prezidentimiz bu möhüm başlangyçlary dowam etdirmek bilen, 2025-nji ýyly «Halkara parahatçylyk we ynanyşmak ýyly» diýip yglan etmek baradaky başlangyjy Milletler Bileleşiginiň garamagyna resmi taýdan hödürledi. Mälim bolşy ýaly, bu teklip Baş Assambleýa tarapyndan doly goldanyldy.

R.Meredow çykyşynda Bitaraplygyň türkmen nusgasyna aýratyn ünsi çekdi. Nygtalyşy ýaly, türkmen Bitaraplygy täze, örän aýdyň ähmiýete, many-mazmuna we goldawa eýe bolýar. Ol halkara syýasatyň ösüşinde möhüm, täsirli, tanalýan şerte öwrülýär. Ýurdumyz bitaraplygyň diňe aýratyn bir döwletiň resmi derejesi däldigini dünýä jemgyýetçiligine ýetirmegi başardy. Bitaraplyk özüňe we tutuş umumadamzat maşgalasy hökmünde beýleki halklara bolan aýratyn garaýyşdyr. Ýüze çykýan kynçylyklara garamazdan, şeýle maşgalada parahatçylyk, ylalaşyklylyk we hormat höküm sürmelidir. Türkmenistan öz Bitaraplygyny şu belent maksatlara ýetmek hem-de ony adamzada hyzmat etmek üçin gönükdirmäge taýýardygyny iş ýüzünde subut etdi. Şu nukdaýnazardan, bitaraplygyň uly geljegi bar. Ol öz aýratynlygy boýunça ýakynlaşmaga, ylalaşyga, kanuny bähbitleri hasaba almaga gönükdirilen hyzmatdaşlygyň görnüşi hökmünde örän zerur bolan syýasy-hukuk derejesine öwrüler. Türkmenistan Bitaraplygyň mümkinçilikleriniň, oňa mahsus gurallaryň we çemeleşmeleriň halkara syýasatda, hususan-da, anyk ýagdaýlarda ýygy-ýygydan hem-de giňden ulanyljakdygyna berk ynanýar. Bitaraplyk ýurdumyzyň içerki ösüşiniň, halkara hyzmatdaşlygynyň esasy ýörelgesi hem-de ýol görkezijisi bolup gelýär we şeýle bolmagynda-da galar diýip, wise-premýer, daşary işler ministri nygtady.

Türkmenistanyň Bitaraplyk syýasaty türkmen halkynyň doly goldawyna eýedir. Şu ýyl «Bitarap Türkmenistanyň parahatçylyk we ynanyşmak syýasatynyň hukuk esaslary hakynda» Konstitusion kanunyň kabul edilmegi munuň aýdyň mysaly boldy. Şoňa görä, Türkmenistan hemişe öz daşary syýasatynyň esas goýujy başlangyçlary hökmünde bitaraplyk, parahatçylyk, ynanyşmak ýörelgelerine eýerer, ähli ýurtlar we halklar bilen dostlugy, hoşniýetli goňşuçylygy, özara düşünişmegi, hormata esaslanýan hyzmatdaşlygy ösdürmegi dowam etdirer. Munuň üçin bu gün bizde ähli mümkinçilikler, ýagny berk döwletlilik, dünýä derejesinde hormat, abraý we goldaw, aýdyň maksatlardyr wezipeler bar diýip, wise-premýer, daşary işler ministri çykyşyny jemledi we pursatdan peýdalanyp, Gahryman Arkadagymyzy, Arkadagly Gahryman Serdarymyzy we hemmeleri ýetip gelýän Täze ýyl baýramy bilen tüýs ýürekden gutlady.

Soňra Türkmenistanyň Birleşen Milletler Guramasynyň ýanyndaky hemişelik wekili, Türkmenistanyň Gahrymany A.Ataýewa söz berildi. Ol gatnaşyjylary hormatly Prezidentimiziň baştutanlygynda, Gahryman Arkadagymyzyň saýasynda Halkara parahatçylyk we ynanyşmak ýylynyň üstünlikli geçirilmegi bilen tüýs ýürekden gutlap, bu ýylyň dowamynda sebit we ählumumy derejede parahatçylygy, ynanyşmagy pugtalandyrmaga gönükdirilen köp sanly halkara ähmiýetli maslahatlaryň, ýokary derejeli forumlaryň we duşuşyklaryň guralandygyny, ählumumy howpsuzlygy pugtalandyrmaga gönükdirilen başlangyçlaryň üstünlikli durmuşa geçirilendigini belledi.

Nygtalyşy ýaly, Halkara parahatçylyk we ynanyşmak ýylynyň çäklerinde dünýä jemgyýetçiligi bilen bilelikdäki hemme çäreler Türkmenistanyň başlangyjy bilen Birleşen Milletler Guramasynyň Baş Assambleýasy tarapyndan 2024-nji ýylyň 21-nji martynda biragyzdan kabul edilen degişli Kararnamanyň esasynda geçirildi. Tamamlanyp barýan Halkara parahatçylyk we ynanyşmak ýyly Türkmenistanyň ählumumy parahatçylygy, durnukly ösüşi pugtalandyrmagyň bähbidine dünýä döwletleri bilen dostlukly gatnaşyklary ýola goýmaga, iri halkara guramalar, ilkinji nobatda, Birleşen Milletler Guramasy bilen ýakyn hyzmatdaşlyga gönükdirilen daşary syýasatynyň ileri tutulýan ugurlarynyň üýtgewsiz amala aşyrylýandygyny, ýurdumyzyň halkara abraýynyň has-da artýandygyny aýdyň görkezdi. Ýylyň dowamynda Türkmenistanyň diplomatik gullugy tarapyndan ýurdumyzyň daşary syýasat ugrunyň 2022 — 2028-nji ýyllar üçin Konsepsiýasyndan ugur alnyp, halkara giňişlikde Türkmenistanyň abraýyny ýokarlandyrmak, hormatly Prezidentimiziň we Gahryman Arkadagymyzyň parahatçylygy, howpsuzlygy, durnukly ösüşi berkitmäge gönükdirilen möhüm başlangyçlaryny iş ýüzünde amala aşyrmak boýunça netijeli işler alnyp baryldy.

Hormatly Prezidentimiziň sentýabrda Birleşen Milletler Guramasynyň Baş Assambleýasynyň 80-nji sessiýasynyň ýokary derejeli hepdeligine gatnaşmagy 2025-nji ýylyň möhüm we esasy wakalarynyň biri boldy. Döwlet Baştutanymyz Baş Assambleýanyň belent münberinden ählumumy parahatçylygy, howpsuzlygy üpjün etmek, durnukly ösüş, ekologiýa howpsuzlygy, köptaraplaýyn ynsanperwer hem-de halkara hukuk hyzmatdaşlygyny ösdürmek boýunça anyk teklipdir başlangyçlary öňe sürdi. Olary iş ýüzünde amala aşyrmak maksady bilen, häzirki wagtda parahatçylygy we howpsuzlygy berkitmäge, durnukly ösüşi gazanmaga gönükdirilen ugurlar boýunça anyk işler alnyp barylýar.

2025-nji ýylyň 15-nji ýanwarynda BMG-niň Nýu-Ýorkdaky ştab-kwartirasynda BMG-niň, halkara guramalaryň ýolbaşçylarynyň, bu düzüme agza döwletleriň ýokary wezipeli wekilleriniň gatnaşmagynda Halkara parahatçylyk we ynanyşmak ýylyna ählumumy derejede badalga berildi. Açylyş dabarasynda 2025-nji ýylda parahatçylygy we ynanyşmagy pugtalandyrmak boýunça ählumumy çäreleriň esasy ugurlaryny kesgitleýän bilelikdäki “Ýol kartasy” kabul edildi. 21-nji martda Baş Assambleýanyň 61-nji plenar mejlisinde “Türkmenistanyň hemişelik Bitaraplygy” atly Kararnamanyň biragyzdan kabul edilmegi Halkara parahatçylyk we ynanyşmak ýylynyň birinji ýarymynyň möhüm syýasy wakasy boldy. Türkmenistanyň hemişelik Bitaraplygy hakyndaky Kararnamanyň üçünji gezek kabul edilmegi ýurdumyzyň Bitaraplyk doktrinasyna üýtgewsiz ygrarlydygyny we bu syýasatyň halkara jemgyýetçilik tarapyndan biragyzdan goldanylýandygyny tassyklaýar.

Türkmenistanyň başlangyjy bilen 2020-nji ýylda BMG-niň çäklerinde döredilen parahatçylygyň, howpsuzlygyň we durnukly ösüşiň bähbidine Bitaraplygyň dostlary toparynyň düzüminiň yzygiderli giňemegi häzirki wagtda Bitaraplyk syýasatynyň we oňa esaslanýan köptaraplaýyn meýdançalaryň wajyp ähmiýetini görkezýär. Halkara parahatçylyk we ynanyşmak ýylynda topara Azerbaýjan Respublikasynyň, Täjigistan Respublikasynyň we Eswatini Patyşalygynyň goşulyşmagy Bitaraplyk ýörelgeleriniň halkara jemgyýetçilik tarapyndan goldanylýandygyna şaýatlyk edýär. Şunuň bilen bir hatarda, sebit we ählumumy derejede parahatçylygy we ynanyşmagy pugtalandyrmak, durnukly durmuş-ykdysady ösüşi üpjün etmek boýunça tagallalaryň arasyndaky aýrylmaz baglanyşygy nygtamak bilen, hormatly Prezidentimiziň we Gahryman Arkadagymyzyň durnukly ösüş ulgamynda 2030-njy ýyla çenli Gün tertibini amala aşyrmaga gönükdirilen başlangyçlaryny durmuşa geçirmek boýunça yzygiderli işler alnyp baryldy.

Şu ýylyň awgustynda “Awaza” milli syýahatçylyk zolagynda geçirilen BMG-niň Deňze çykalgasy bolmadyk ösüp barýan döwletler boýunça üçünji maslahaty bu babatda esasy halkara waka boldy. Bu maslahat 2025-nji ýylda BMG-niň howandarlygynda geçirilen iri halkara çäreleriň biri bolup, möhüm halkara ähmiýetli resminamalaryň — 2024 — 2034-nji ýyllar üçin Hereketleriň Awaza maksatnamasynyň yglan edilmegi we Awaza syýasy Jarnamasynyň kabul edilmegi bilen jemlendi. Häzirki wagtda agzalan resminamalary durmuşa geçirmek üçin BMG-niň degişli düzüm birlikleri we ösüş boýunça hyzmatdaşlar bilen bilelikde anyk işler ýerine ýetirilýär. 2025-nji ýylyň 14-nji oktýabrynda Baş Assambleýanyň 80-nji sessiýasynyň 18-nji plenar mejlisinde “Awaza syýasy Jarnamasy” atly Kararnamanyň biragyzdan kabul edilmegi bu ugurda alnyp barylýan yzygiderli işleriň kanunalaýyk dowamy boldy.

4-nji iýunda Türkmenistanyň Baş Assambleýa tarapyndan 2026 — 2028-nji ýyllar üçin Birleşen Milletler Guramasynyň Ykdysady we Durmuş geňeşiniň agzalygyna biragyzdan saýlanylmagy Halkara parahatçylyk we ynanyşmak ýylynyň ykdysady ugur boýunça möhüm daşary syýasy üstünligi boldy. Bu çözgüt ýurdumyzyň durnukly ösüş ulgamynda Gün tertibini ilerletmekde eýeleýän işjeň ornunyň ykrar edilmeginiň güwäsidir. Ýakynda, has takygy, 2025-nji ýylyň 15-nji dekabrynda hormatly Prezidentimiziň başlangyjy boýunça Baş Assambleýanyň 64-nji plenar mejlisinde iki möhüm Kararnama — “Birleşen Milletler Guramasynyň durnukly ulag boýunça onýyllygy (2026 — 2035-nji ýyllar üçin)” we “Durnukly ösüşi üpjün etmekde ygtybarly we durnukly energiýa birikmesiniň esasy orny” atly Kararnamalar kabul edildi. Bu resminamalar ählumumy we uzak möhletli häsiýete eýe bolup, BMG-niň çäklerinde ulag, energetika gün tertibini ilerledýän ýurt hökmünde ýurdumyzyň ornuny we abraýyny mundan beýläk-de pugtalandyrmaga goşant goşar.

Ýylyň dowamynda gazanylan üstünlikler Gahryman Arkadagymyzyň başlangyçlaryny mynasyp dowam etdirýän hormatly Prezidentimiziň parasatly baştutanlygynda Türkmenistanyň strategik daşary syýasatynyň ýokary netijeliligine şaýatlyk edýär. Hemişelik Bitaraplyk, parahatçylyk söýüjilik, hoşniýetli goňşuçylyk we netijeli halkara hyzmatdaşlyk ýörelgelerine esaslanýan bu syýasat ýurdumyzyň, şeýle hem tutuş dünýä jemgyýetçiliginiň uzak möhletli bähbitlerine doly laýyk gelýär. Bu başlangyçlaryň durmuşa geçirilmegi Türkmenistanyň ähli döwlet institutlarynyň halkara hyzmatdaşlar bilen ýakyndan iş alyp barmagy netijesinde mümkin boldy diýip, Türkmenistanyň BMG-niň ýanyndaky hemişelik wekili nygtady we çykyşynyň ahyrynda hormatly Prezidentimizi, Gahryman Arkadagymyzy, ähli ildeşlerimizi Halkara parahatçylyk we ynanyşmak ýylynyň üstünlikli geçirilmegi bilen ýene-de bir gezek gutlady.

Soňra Birleşen Milletler Guramasynyň Çagalar gaznasynyň Türkmenistandaky wekili Jalpa Ratna çykyş etdi. Ol çykyşynyň başynda BMG-niň Türkmenistandaky ýurt boýunça toparynyň adyndan Türkmenistanyň Hökümetini hem-de halkyny Halkara parahatçylyk we ynanyşmak ýylynyň tamamlanmagy, ýurdumyzyň hemişelik Bitaraplygynyň 30 ýyllygy hem-de BMG-niň döredilmeginiň 80 ýyllygy bilen tüýs ýürekden gutlady. Ol şanly seneleriň köptaraplaýynlygy we durnukly ösüşi ilerletmekdäki jogapkärçiligiň möhümdigini ýene-de bir gezek görkezendigini belledi. Nygtalyşy ýaly, BMG we Türkmenistan strategik hyzmatdaşlygy alyp barýarlar. 2025-nji ýylda ählumumy gün tertibiniň ulag infrastrukturasy bilen baglylykda, “Birleşen Milletler Guramasynyň durnukly ulag boýunça onýyllygy (2026 — 2035-nji ýyllar üçin)” hem-de «Durnukly ösüşi üpjün etmekde ygtybarly we durnukly energiýa birikmesiniň esasy orny» atly Kararnamalaryň kabul edilmegi munuň aýdyň beýanydyr.

BMG-niň Deňze çykalgasy bolmadyk ösüp barýan döwletler boýunça üçünji maslahaty we onuň netijeleri esasynda 2024 — 2034-nji ýyllar üçin Hereketleriň Awaza maksatnamasynyň yglan edilmegi, Awaza syýasy Jarnamasynyň kabul edilmegi Türkmenistanyň durnukly özara baglanyşyk, ykdysadyýeti diwersifikasiýalaşdyrmak, daşky gurşawy goramak we sebit hyzmatdaşlygy boýunça ileri tutýan ugurlaryny mundan beýläk-de ösdürmekde möhüm ädim boldy. “Türkmenistan bilen Birleşen Milletler Guramasynyň arasynda durnukly ösüş çygrynda 2026 — 2030-njy ýyllar üçin hyzmatdaşlygyň Çarçuwaly maksatnamasynyň” tassyklanylmagy Türkmenistanyň hem-de bu guramanyň Durnukly ösüş maksatlaryna ygrarlydygyny aýdyň görkezýär.

Hanym Jalpa Ratna 2025-nji ýylda BMG-niň ýurt boýunça toparynyň Türkmenistanyň Hökümeti bilen bilelikde ýerine ýetiren işleri barada durup geçdi. Bu ugurda alnyp barlan işler Türkmenistanyň Durnukly ösüş maksatlaryny gazanmak boýunça halkara tagallalara uly goşant goşýandygyny ýene-de bir gezek tassyklady. Birleşen Milletler Guramasynyň Çagalar gaznasynyň Türkmenistandaky wekili çykyşynyň ahyrynda BMG-niň ýurt boýunça toparynyň Türkmenistanyň Hökümeti we ösüş boýunça hyzmatdaşlar bilen Hereketleriň Awaza maksatnamasyny durmuşa geçirmek hem-de Durnukly ulag boýunça onýyllygy ilerletmek üçin hyzmatdaşlyk etmäge taýýardygyny tassyklady.

Soňra Amerikanyň Birleşen Ştatlarynyň Türkmenistandaky Adatdan daşary we Doly ygtyýarly ilçisi Elizabet Ruda söz berildi. Ol, ilki bilen, Türkmenistanyň Hökümetini we halkyny Halkara parahatçylyk we ynanyşmak ýylynyň dowamynda ýurdumyzyň hemişelik Bitaraplygyna bagyşlanan çäreleriň üstünlikli geçirilmegi bilen gutlady. Bu şanly wakalar parahatçylygyň, durnuklylygyň nyşany bolan bitaraplygyň ähmiýetini aýdyň görkezdi.

Bellenilişi ýaly, Amerikanyň Birleşen Ştatlary Türkmenistanyň oňyn Bitaraplyk syýasatyny yzygiderli goldaýar. Türkmenistanyň hemişelik Bitaraplyk hukuk derejesiniň 1995-nji ýylda BMG-niň Baş Assambleýasy tarapyndan ilkinji gezek ykrar edilmeginden soňra, ýurdumyzyň Bitaraplygynyň halkara parahatçylygy we howpsuzlygy pugtalandyrmakda ähmiýetini tassyklaýan ýene iki sany Kararnama kabul edildi. Türkmenistan öz Bitaraplyk hukuk derejesine ygrarlydygyny durmuşa geçirýän işleri bilen tassyklaýar. Şu ýylyň iýunynda çylşyrymly ýagdaýlara sezewar bolan dünýäniň 52 ýurdunyň, şol sanda Amerikanyň Birleşen Ştatlarynyň raýatlaryna öz ýurtlaryna gaýdyp barmaklary üçin türkmen tarapynyň eden kömegi munuň aýdyň beýanydyr. Şunuň bilen bir hatarda, noýabr aýynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň adyndan Owganystanyň ýertitreme zerarly ejir çeken halkyna ynsanperwerlik kömeginiň iberilendigini bellemek gerek. Munuň özi Türkmenistanyň Bitaraplyk syýasatynyň ählumumy meseleleri çözmekdäki we halkara hyzmatdaşlygy ösdürmekdäki wajyp ornuny ýene-de bir gezek görkezýär.

Nygtalyşy ýaly, Amerikanyň Birleşen Ştatlary we Türkmenistan ykdysady, medeni gatnaşyklar arkaly ösüşiň, abadançylygyň, parahatçylygyň bähbidine hyzmatdaşlyk edýärler. Şeýle hem ýurtlarymyz ikitaraplaýyn görnüşde, “C5+1” we “B5+1” formatlarynyň çäklerinde sebitiň ileri tutulýan ugurlary boýunça hyzmatdaşlyk etmek we ykdysadyýetiň ösmegine goşant goşmak arkaly Merkezi Aziýada parahatçylygy, durnuklylygy pugtalandyrmak üçin berk binýady döredýärler. Bu başlangyçlar innowasiýa, bilim, işewürlik ugurlarynda täze mümkinçilikleri açmak bilen, sebit howpsuzlygyny goldamaga ýardam berýär. Geçen aýda Waşingtonda geçirilen duşuşygyň netijelerinden hem görnüşi ýaly, “C5+1” dialogy biziň umumy garaýşymyzyň esasyny düzmek bilen, ykdysady işjeňlik we hyzmatdaşlyk arkaly ösüşe, parahatçylyga, abadançylyga goşant goşýar. Amerikanyň Birleşen Ştatlary Türkmenistan bilen umumy gymmatlyklara esaslanýan hem-de sebitde parahatçylygyň, durnuklylygyň bähbidine hyzmatdaşlyga ýokary baha berýär.

Amerikanyň Birleşen Ştatlarynyň Türkmenistandaky doly ygtyýarly wekili sözüniň ahyrynda amerikan-türkmen gatnaşyklarynyň bilelikdäki işleriň netijesinde mundan beýläk-de ösdüriljekdigine ynam bildirdi.

Soňra Germaniýa Federatiw Respublikasynyň Türkmenistandaky Adatdan daşary we Doly ygtyýarly ilçisi Bernd Haýnsä söz berildi. Diplomat Halkara parahatçylyk we ynanyşmak ýyly mynasybetli geçirilýän dabarada çykyş etmegiň özi üçin uly hormatdygyny aýdyp, tamamlanyp barýan ýylyň Türkmenistan üçin üstünliklere beslenendigini hem-de ýurdumyzyň parahatçylygy, ynanyşmagy, özara düşünişmegi üpjün etmekdäki tagallalarynyň möhüm ähmiýetini belledi.

Nygtalyşy ýaly, 2025-nji ýyl Türkmenistan üçin taryhy ähmiýete eýe bolan wakalara baý boldy. Şunuň bilen baglylykda, ilçi Awazada geçirilen BMG-niň Deňze çykalgasy bolmadyk ösüp barýan döwletler boýunça üçünji maslahatynyň hem-de Türkmenistanyň hemişelik Bitaraplygy mynasybetli halkara forumyň ähmiýetine ünsi çekdi. 2025-nji ýylda Türkmenistanyň parahatçylygy we ynanyşmagy pugtalandyrmak boýunça öňe sürýän başlangyçlary bilelikdäki tagallalaryň wajypdygyny görkezdi. Diplomatyň belleýşi ýaly, ählumumy parahatçylygyň, ynanyşmagyň üpjün edilmeginde Türkmenistana uly orun degişlidir. Türkmenistanyň halkara dialogy, özara ynanyşmagy ösdürmek boýunça tagallalary dünýäniň beýleki ýurtlary üçin nusgalykdyr.

Germaniýa Federatiw Respublikasynyň Türkmenistandaky doly ygtyýarly wekili Germaniýa bilen Türkmenistanyň arasyndaky syýasy, ykdysady, medeni ulgamlardaky hyzmatdaşlygyň mundan beýläk-de ösdüriljekdigine ynam bildirip, Gahryman Arkadagymyza hem-de hormatly Prezidentimize bagtyýarlyk we abadançylyk, Türkmenistanyň halkyna ösüş, rowaçlyk arzuw etdi.

Dabaranyň dowamynda Özbegistan Respublikasynyň Türkmenistandaky Adatdan daşary we Doly ygtyýarly ilçisi Rawşanbek Alimowa söz berildi. Diplomat dabara gatnaşyjylary mähirli mübärekläp, Halkara parahatçylyk we ynanyşmak ýylynyň jemlerine, sebitde we dünýäde parahatçylygy, durnuklylygy, ynanyşmagy pugtalandyrmaga uly goşant goşýan Türkmenistanyň üstünliklerine bagyşlanan möhüm çärä gatnaşmagyň özi üçin uly hormatdygyny belledi. Şeýle-de ol Türkmenistanyň ýolbaşçylaryny we türkmen halkyny dünýä diplomatiýasynyň aýratyn tapgyry hökmünde taryha girjek bu şanly ýylyň üstünlikli geçirilmegi bilen gutlady.

Nygtalyşy ýaly, Türkmenistanyň başlangyjy boýunça 2025-nji ýylyň BMG-niň Baş Assambleýasy tarapyndan “Halkara parahatçylyk we ynanyşmak ýyly” diýlip yglan edilmegi ýurduň belent abraýynyň, onuň parahatçylyk söýüjilikli we netijeli daşary syýasatynyň ykrar edilýändiginiň aýdyň subutnamasy boldy. Türkmenistanyň bu başlangyjy dünýä jemgyýetçiligine ynanyşmak dialogynyň, özara hormat goýmagyň durnukly hem-de adalatly dünýä gurluşynyň berk binýady bolup durýandygyny ýatlatdy. Halkara parahatçylyk we ynanyşmak ýyly Türkmenistanyň hemişelik Bitaraplyk ýörelgelerine esaslanýan yzygiderli hem-de öňdengörüjilikli daşary syýasatynyň aýdyň netijesidir.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň belleýşi ýaly, Bitaraplyk diňe bir daşary syýasy ugur bolman, eýsem, türkmen halkynyň parahatçylyk söýüjilik, hoşniýetli goňşuçylyk we ynsanperwerlik ýörelgelerine esaslanýan durmuş filosofiýasydyr. Şeýle çemeleşme Türkmenistanyň ýokary halkara abraýynyň we başlangyçlarynyň dünýä derejesinde ykrar edilmegini üpjün etdi. BMG-niň Baş Assambleýasynyň Kararnamalary bilen üç gezek ykrar edilen Türkmenistanyň oňyn Bitaraplyk syýasaty eýýäm 30 ýyl bäri Merkezi Aziýa sebitinde, onuň çäkleriniň daşynda-da parahatçylygy, durnukly ösüşi, netijeli dialogy berkitmegiň möhüm şerti bolup durýar.

2025-nji ýyl Türkmenistanda üstünlikli geçirilen iri halkara we sebit wakalaryna beslendi. Bu ýylda geçirilen forumlar halkara howpsuzlygyň, durnukly ösüşiň we ynsanperwer hyzmatdaşlygyň möhüm meselelerini ara alyp maslahatlaşmak üçin netijeli meýdança boldy. Şu ýylyň awgustynda Awazada geçirilen BMG-niň Deňze çykalgasy bolmadyk ösüp barýan döwletler boýunça üçünji maslahaty dünýä derejeli waka boldy. Türkmenistan BMG-niň sebit hem-de ählumumy dialogy ilerletmek boýunça ygtybarly hyzmatdaşy hökmünde çykyş etdi diýip, diplomat sözüni dowam etdi we Türkmenistanyň ýolbaşçylaryna, Hökümetine we halkyna bu forumyň çäklerinde özbek halkynyň baý medeni mirasyny tanyşdyrmaga döredilen mümkinçilik üçin ýene-de bir gezek hoşallyk bildirdi.

Ilçi Türkmenistanyň Hökümeti we Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy tarapyndan geçirilen iki möhüm çäräni — “Parahatçylyk we ynanyşmak ýyly: çagalaryň hatyrasyna halkara işiniň ösüşi” we “Häzirki zaman jemgyýetinde zenanlaryň orny: Durnukly ösüş maksatlaryna ýetmek ugrunda halkara hyzmatdaşlygy ösdürmek” atly halkara maslahatlary aýratyn nygtady. Bu forumlar diňe bir Halkara parahatçylyk we ynanyşmak ýylynyň gün tertibini baýlaşdyrmak bilen çäklenmän, eýsem, zenanlaryň we çagalaryň hukuklaryny goramak boýunça ählumumy tagallalara hem anyk goşant goşdy.

Aşgabatda Halkara Bitaraplyk gününe, Halkara parahatçylyk we ynanyşmak ýylyna hem-de Türkmenistanyň hemişelik Bitaraplygynyň 30 ýyllygyna bagyşlanyp geçirilen halkara forum şanly ýyldaky çäreleriň iň esasysy boldy. Foruma döwlet we hökümet Baştutanlarynyň, halkara guramalaryň ýolbaşçylarynyň, ýokary derejeli wekiliýetleriň gatnaşmagy raýdaşlygyň aýdyň nyşanyna öwrüldi. Maslahatyň jemleri boýunça kabul edilen Aşgabat Jarnamasy ählumumy parahatçylyk döredijilikli tagallalara möhüm goşant bolmak bilen, parahatçylyk, ynanyşmak we netijeli hyzmatdaşlyk ýörelgelerine ygrarlylygy berkitdi. Diplomat çykyşynyň ahyrynda 2025-nji ýylda Türkmenistanyň gazanan üstünlikleriniň parahatçylyk, ynanyşmak, hoşniýetli goňşuçylyk, özara bähbitli hyzmatdaşlyk ýörelgelerine esaslanýan ösüş ýolunyň netijeliliginiň subutnamasy bolup durýandygyny aýdyp, Türkmenistanyň Hökümetini we halkyny, dabara gatnaşyjylary ýetip gelýän täze — 2026-njy ýyl bilen gutlady.

Soňra Eýran Yslam Respublikasynyň Türkmenistandaky Adatdan daşary we Doly ygtyýarly ilçisi Ali Mojtaba Ruzbehanä söz berildi. Diplomatyň belleýşi ýaly, Türkmenistanyň hemişelik Bitaraplygynyň 30 ýyllygyna beslenýän 2025-nji ýyl “Halkara parahatçylyk we ynanyşmak ýyly” diýlip yglan edildi. Türkmenistanyň oňyn Bitaraplyk syýasaty sebit howpsuzlygyny we durnuklylygyny üpjün etmekde möhüm şert bolup çykyş edýär. Ilçi hormatly Prezidentimiz Serdar Berdimuhamedowy hem-de türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowy Aşgabatda Halkara parahatçylyk we ynanyşmak ýylyna bagyşlanan halkara forumyň, Awazada BMG-niň Deňze çykalgasy bolmadyk ösüp barýan döwletler boýunça üçünji maslahatynyň üstünlikli geçirilmegi bilen gutlady. Bu forumlara dünýäniň dürli ýurtlarynyň döwlet Baştutanlarynyň, ýokary derejeli wekiliýetleriň gatnaşmagy Türkmenistanyň ählumumy parahatçylygy we ynanyşmagy pugtalandyrmakda öňe sürýän başlangyçlarynyň ykrar edilýändiginiň nobatdaky beýany boldy.

Bellenilişi ýaly, 2025-nji ýyl Eýran Yslam Respublikasy bilen Türkmenistanyň arasyndaky ikitaraplaýyn gatnaşyklarda möhüm ýyllaryň biri boldy. Eýranyň Prezidenti Masud Pezeşkianyň dekabr aýynda Aşgabatda geçirilen halkara foruma gatnaşmagy eýran tarapynyň sebitde parahatçylygy we özara hyzmatdaşlygy pugtalandyrmaga ygrarlydygynyň aýdyň beýany boldy. Şeýle-de Eýran Yslam Respublikasynyň birinji wise-prezidentiniň BMG-niň Deňze çykalgasy bolmadyk ösüp barýan döwletler boýunça üçünji maslahatyna gatnaşmak üçin Türkmenistana sapar bilen gelmegi ikitaraplaýyn gatnaşyklary pugtalandyrmak babatda dialog üçin ajaýyp mümkinçilik boldy. Eýran we Türkmenistan dürli ugurlar boýunça, şol sanda medeniýet ulgamynda bilelikde iş alyp barýarlar.

Soňra Mary welaýatynyň Wekilbazar etrabynyň ýaşaýjysy B.Hojaberdiýew çykyş etdi. Ol dabara gatnaşyjylary mähirli mübärekläp, ýurdumyzyň başlangyjy bilen «Halkara parahatçylyk we ynanyşmak ýyly» diýlip yglan edilen 2025-nji ýylyň üstünlikli jemlenmegi, şeýle hem ýetip gelýän täze ýyl bilen tüýs ýürekden gutlady hem-de Gahryman Arkadagymyza we Arkadagly Gahryman Serdarymyza berk jan saglyk, uzak ömür, alyp barýan asylly işlerinde rowaçlyklary arzuw etdi.

Bellenilişi ýaly, halkymyzyň hoşniýetlilik, parahatçylyk söýüjilik ýörelgeleri Gahryman Arkadagymyzyň başlangyjy bilen binýady goýlan, hormatly Prezidentimiziň baştutanlygynda üstünlikli durmuşa geçirilýän ýurdumyzyň daşary syýasatynda öz beýanyny tapýar. Hemişelik Bitaraplygy dünýä bileleşigi tarapyndan üç gezek ykrar edilen ýurdumyzyň paýtagty Aşgabatda döwlet we hökümet Baştutanlarynyň, halkara guramalaryň ýolbaşçylarynyň gatnaşmagynda Halkara parahatçylyk we ynanyşmak ýylyna, Halkara Bitaraplyk gününe hem-de Türkmenistanyň hemişelik Bitaraplygynyň 30 ýyllygyna bagyşlanyp geçirilen iri forum Türkmenistanyň oňyn başlangyçlarynyň giňden ykrar edilýändiginiň nobatdaky beýany boldy. B.Hojaberdiýew ýakynda hormatly Prezidentimiziň ýurdumyzyň halkara ýaryşlarda we olimpiadalarda üstünlik gazanan ýaşlaryny sylaglamak dabarasyna gatnaşmagynyň taryhy waka öwrülendigini aýtdy. Munuň özi ýaş nesilleriň hemmetaraplaýyn ösen şahsyýetler bolup ýetişmekleri üçin döwletimiz tarapyndan zerur mümkinçilikleriň döredilýändiginiň aýdyň nyşanyna öwrüldi.

Halkara ynsanperwer ylymlary we ösüş uniwersitetiniň mugallymy Ç.Wekilowanyň nygtaýşy ýaly, hormatly Prezidentimiziň baştutanlygynda ýurdumyzda zenanlaryň bagtyýar durmuşda ýaşamagy üçin giň mümkinçilikler döredilýär. Zenanlar hakynda alada döwlet syýasatynyň ileri tutulýan ugurlarynyň biri bolup durýar. Häzirki wagtda türkmen zenanlary ykdysadyýetiň dürli pudaklarynda, döwlet we jemgyýetçilik edaralarynda yhlasly zähmet çekýärler. Şu ýylyň dekabrynda «Awaza» milli syýahatçylyk zolagynda Türkmenistanyň Hökümetiniň we Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň Birleşen Milletler Guramasy bilen bilelikde guramagynda geçirilen «Häzirki zaman jemgyýetinde zenanlaryň orny: Durnukly ösüş maksatlaryna ýetmek ugrunda halkara hyzmatdaşlygy ösdürmek» atly halkara maslahat munuň aýdyň güwäsi boldy.

Ýurdumyzda eneligi we çagalygy goramak, çaga lukmançylygyny, bilimi kämilleşdirmek, çagalara durmuş hyzmatlaryny bermek babatda maksatnamalaýyn işler durmuşa geçirilýär. Şunuň bilen baglylykda, haýyr-sahawat gaznasy çagalara ýardam bermek, olaryň hukuklaryny, bähbitlerini goramak boýunça anyk taslamalary durmuşa geçirýär. Şu ýyl gaznanyň döredilmeginiň dört ýyllygy mynasybetli Arkadag şäherinde geçirilen «Parahatçylyk we ynanyşmak ýyly: çagalaryň hatyrasyna halkara işiniň ösüşi» atly halkara maslahat hem ýurdumyzda çagalaryň sagdyn we bagtyýar durmuşyny üpjün etmek babatda amala aşyrylýan işleriň dünýä bileleşigi tarapyndan ykrar edilýändiginiň nobatdaky beýanyna öwrüldi. Şeýle-de hemişelik Bitaraplygymyzyň 30 ýyllygynyň toýlanýan günlerinde «Awaza» milli syýahatçylyk zolagynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň şahamçasynyň açylmagy buýsandyryjy waka boldy.

Soňra Türkmenistanyň Daşary işler ministrliginiň Halkara gatnaşyklary institutynyň talyby O.Sähetmyradowa söz berildi. Ol Halkara parahatçylyk we ynanyşmak ýylynyň ýurdumyz üçin aýratyn şanly senedigini, bu ýyl Türkmenistanyň hemişelik Bitaraplygynyň 30 ýyllyk ýubileýini dünýä derejesinde dabaralandyrandygyny aýtdy.

Bellenilişi ýaly, bu taryhy sene ýurdumyzyň saýlap alan parahatçylyk söýüjilikli ýolunyň dabaralanmasydyr. Gahryman Arkadagymyzyň başyny başlan we hormatly Prezidentimiziň baştutanlygynda üstünlikli durmuşa geçirilýän ynsanperwer, oňyn daşary syýasaty Türkmenistany dünýä giňişliginde ygtybarly hyzmatdaş hökmünde tanatdy. Oňyn Bitaraplyk ýörelgesi bu günki gün diňe bir döwletimiziň durnuklylygyny däl, eýsem, bütin sebitiň parahatçylygyny hem üpjün edýän syýasy ugur hökmünde ykrar edildi. Bu ynsanperwer taglymatyň ylmy esaslary hormatly Prezidentimiziň ýakynda halkymyza sowgat beren “Türkmenistanyň Bitaraplygy — parahatçylygyň we ynanyşmagyň aýdyň ýoly” atly täze kitabynda çuňňur beýanyny tapýar. Bu gymmatly eser ýurdumyzyň Bitaraplyk ýörelgesini ylmy taýdan öwrenmekde, parahatçylyk söýüjilikli daşary syýasatyny dünýä ýaýmakda gymmatly gollanma bolup durýar.

Döwletimiz tarapyndan ýaşlaryň sazlaşykly ösmegi, berk bedenli, sagdyn ruhly we döwrebap bilimli bolup ýetişmegi üçin ähli amatly şertler döredilýär. Ýaşlarymyz bu mümkinçiliklerden peýdalanyp, halkara derejede üstünlik gazanyp, ýaşyl tugumyzy belentde parladýarlar. 2025-nji ýylda türkmen ýaşlarynyň ylym-bilim, sport bäsleşiklerinde gazanan ýeňişleri munuň aýdyň güwäsidir. Şeýle hem ol ýaşlaryň zähmet çekmegi, döretmegi, Watana hyzmat etmegi mukaddes borç hasaplaýandyklaryny belläp, hormatly Prezidentimiziň daşyna has-da jebisleşip, özlerine bildirilýän belent ynamy ödemek ugrunda mundan beýläk-de yhlaslaryny gaýgyrmajakdyklaryna ynandyrdy we döredilýän mümkinçilikler üçin Gahryman Arkadagymyza, hormatly Prezidentimize tüýs ýürekden hoşallyk bildirdi.

Soňra daşary ýurt döwletleriniň we halkara guramalaryň Türkmenistandaky diplomatik wekilhanalarynyň ýolbaşçylaryny hem-de ýurdumyzyň raýatlaryny «Türkmenistanyň Bitaraplygynyň 30 ýyllygyna» atly Türkmenistanyň ýubileý medaly hem-de ýadygärlik kümüş nyşany bilen sylaglamak dabarasy boldy.

Dabaranyň ahyrynda Ministrler Kabinetiniň Başlygynyň orunbasary, daşary işler ministri R.Meredow çykyş edip, «Halkara parahatçylyk we ynanyşmak ýyly: Bitarap Türkmenistanyň ynamly gadamlary» atly dabarada Türkmenistanyň hemişelik Bitaraplygy, bitaraplyk ýörelgeleriniň we öňüni alyş diplomatiýasynyň iş ýüzünde durmuşa geçirilmegi, parahatçylyk, ynanyşmak, dialog medeniýetiniň ähmiýeti barada çuňňur many-mazmunly çykyşlaryň diňlenilendigini aýtdy. Bellenilişi ýaly, Birleşen Milletler Guramasynyň Baş Assambleýasynyň Kararnamasy bilen “Halkara parahatçylyk we ynanyşmak ýyly” diýlip yglan edilen 2025-nji ýyl ýubileý ýyl bolup, örän möhüm taryhy wakalara beslendi. Şu ýyl dünýä bileleşigi bilen bilelikde Türkmenistanyň hemişelik Bitaraplygynyň 30 ýyllygy halkara derejede giňden bellenilip geçildi.

Wise-premýer, daşary işler ministri bu şanly sene mynasybetli, hormatly Prezidentimiziň daşary ýurt döwletleriniň we halkara guramalaryň Türkmenistandaky diplomatik wekilhanalarynyň ýolbaşçylaryny, Türkmenistanyň raýatlaryny “Türkmenistanyň Bitaraplygynyň 30 ýyllygyna” atly ýubileý medaly bilen sylaglamak hakynda Permanlara hem-de “Türkmenistanyň Bitaraplygynyň 30 ýyllygy” atly ýadygärlik kümüş nyşany bilen sylaglamak hakynda Karara gol çekendigini aýtdy.

Hormatly Prezidentimiziň degişli resminamalaryny okamak üçin Türkmenistanyň Halk Maslahatynyň Diwanynyň iş dolandyryjysy R.Bazarowa söz berildi. Sylaglamak dabarasynyň ahyrynda Ministrler Kabinetiniň Başlygynyň orunbasary, daşary işler ministri R.Meredow çykyş edip, 2025-nji ýylyň döwletimiz üçin örän möhüm taryhy ýyl bolandygyny, bu ýylyň dowamynda Gahryman Arkadagymyzyň asylly başlangyçlaryny üstünlikli durmuşa geçirýän hormatly Prezidentimiziň baştutanlygynda Türkmenistanyň belent sepgitlere ýetendigini aýtdy.

Pursatdan peýdalanyp, ol şu ýylyň dowamynda geçirilen halkara çärelere işjeň gatnaşandyklary üçin hemmelere Gahryman Arkadagymyzyň we hormatly Prezidentimiziň adyndan hoşallyk bildirdi hem-de ýetip gelýän 2026-njy ýylyň ýylky ýylydygyny aýdyp, bu ýylda bedew bady bilen öňe barýan Türkmenistan Watanymyzyň täze üstünlikleri gazanjakdygyna ynam bildirdi. Şeýle hem wise-premýer, daşary işler ministri daşary ýurt döwletleriniň we halkara guramalaryň Türkmenistandaky diplomatik wekilhanalarynyň ýolbaşçylaryna ýüzlenip, olaryň wekilçilik edýän ýurtlarynyň hem-de düzümleriniň Türkmenistan bilen gatnaşyklary pugtalandyrmaga goşýan goşantlary üçin Gahryman Arkadagymyzyň minnetdarlygyny we hoşniýetli sözlerini ýetirdi.

Şeýlelikde, şu günki çäre Türkmenistanyň öňe sürýän parahatçylyk we netijeli hyzmatdaşlyk taglymlarynyň has-da dabaralanýandygynyň aýdyň subutnamasy boldy. Halkara parahatçylyk we ynanyşmak ýylynyň netijeleri hormatly Prezidentimiziň we Gahryman Arkadagymyzyň döredijilikli başlangyçlarynyň halkara jemgyýetçiligiň giň goldawyna eýe bolýandygyny nobatdaky gezek tassyklady. Bu ýylda ýetilen belent sepgitler milli diplomatiýamyzyň taryhynda täze sahypany açyp, ösüşiň we abadançylygyň ýoly bilen ynamly öňe barýan Bitarap Watanymyzyň dünýä derejesindäki parahatçylyk döredijilik merkezi hökmünde eýeleýän ornuny has-da pugtalandyrdy.

Aşgabat — Türkmenbaşy — Aşgabat, 24-nji dekabr (TDH). Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Balkan welaýatyna iş saparyny amala aşyrdy. Gahryman Arkadagymyz saparynyň dowamynda hormatly Prezidentimiziň rowaçlyklara beslenýän daşary syýasat strategiýasy netijesinde 2026-njy ýylda ýurdumyzda geçiriljek halkara çäreleri ýokary derejede guramak bilen bagly meseleler bilen gyzyklandy we halkara çäreleriň guramaçylyk derejesine degişli taslamalar bilen tanyşdy.

Türkmen halkynyň Milli Lideri Balkan welaýatyna iş saparyna ugramak üçin ir bilen paýtagtymyzyň Halkara howa menziline geldi. Biraz wagtdan Gahryman Arkadagymyzyň uçary Türkmenbaşy şäheriniň Halkara howa menziline gelip gondy.

Türkmenistanyň Halk Maslahatynyň Başlygy deňiz ýakasyndaky şäheriň Halkara howa menzilinden täze ýylda ýokary derejeli halkara çäreleriň geçiriljek ýerine tarap ugrady.

Mälim bolşy ýaly, Gahryman Arkadagymyzyň we hormatly Prezidentimiziň yzygiderli tagallalary netijesinde “Awaza” milli syýahatçylyk zolagy halkara maslahatlaryň, giň möçberli çäreleriň geçirilýän künjegine öwrüldi. Munuň özi syýahatçylyk zolagynyň häzirki zaman talaplaryna, ýokary halkara görkezijilere laýyklykda toplumlaýyn esasda ösdürilýändiginiň aýdyň nyşanydyr.

Hormatly Arkadagymyz täze ýylda Hazaryň kenarynda meýilleşdirilen halkara çäreleriň geçiriljek ýerine geldi. Tutuş adamzat üçin taryhy ähmiýeti bolan meseleleri öz içine alýan halkara çäreleriň geçiriljek toplumynyň ýanaşyk ýerleriniň abadanlaşdyrylyşy, onuň girelgesiniň döwrebaplygy bilen tanşyp, türkmen halkynyň Milli Lideri bu babatda degişli ýolbaşçylara öz maslahatlaryny berdi.

Soňra Gahryman Arkadagymyz binanyň içine girip, onuň enjamlaşdyrylyş derejesi, meýilleşdirilen halkara çäreleriň geçiriljek ýerleri bilen tanyşdy hem-de ýokary derejeli myhmanlaryň kabul ediljek ýerinde döredilýän şertleriň ýokary halkara ülňülere doly laýyk gelmelidigini belledi. Şunda täzeçil usullaryň we sanly ulgamyň mümkinçilikleriniň ulanylmagyna zerur üns berilmelidir. 2026-njy ýylda geçirilmegi göz öňünde tutulýan halkara çäreleriň ýokary guramaçylyk derejesiniň üpjün edilmegi, oňa taýýarlygyň çäklerinde dünýäniň öňdebaryjy tejribeleriniň we innowasion tehnologiýalaryň peýdalanylmagy möhüm wezipe hökmünde kesgitlenendir. Şunuň bilen baglylykda, bu ugurda alnyp barylýan taýýarlyk işleriniň depginini güýçlendirmek zerurdyr.

Milli Liderimiz toplumyň giň möçberli maslahatlaryň geçiriljek ýerine geldi. Bu ýerde meýilleşdirilen halkara maslahatlaryň we forumlaryň ýokary guramaçylyk derejesi üpjün edilmelidir. Şunda binanyň içki bezeg işlerine, reňkleriň sazlaşygyna, onuň yşyklandyryş ulgamyna wajyp ähmiýet berilmelidir diýip, Gahryman Arkadagymyz nygtady hem-de bu babatda maslahatlaryny berdi. Hormatly Prezidentimiziň tabşyrygyna laýyklykda, bu ýerde döredilen mümkinçiliklerde we şertlerde ýurdumyzyň sanly tehnologiýalary özleşdirmekde ýeten derejesiniň öz beýanyny tapmalydygyny aýdyp, Halk Maslahatynyň Başlygy bu toplumda ýokary tizlikli internet ulgamynyň, aragatnaşyk serişdeleriniň netijeli işiniň ýola goýulmalydygyna ünsi çekdi.

Soňra Gahryman Arkadagymyza toplumda alnyp barylýan döwrebaplaşdyryş we bezeg işlerine degişli taslamalar, ulanylýan gurluşyk serişdeleriniň görnüşleri görkezildi. Degişli ýolbaşçylar 2026-njy ýylda Hazaryň kenarynda halkara forumyň geçiriljek binasynyň ýerleşýän ýeriniň meýilnamasy, onuň bölümleriniň, mejlisler zalynyň teklip edilýän bezeg işleri, yşyklandyryş ulgamynyň görnüşleri barada giňişleýin maglumat berdiler.

Bellenilişi ýaly, taýýarlyk we bezeg işleri taýýarlanylan meýilnama laýyklykda alnyp barlar. Şunda häzirki zamanyň ösen tejribesi, täzeçil tehnologiýalar netijeli ulanylar. Bu ýerde meýilleşdirilen işler ýurdumyzyň gurluşyk boýunça iş alyp barýan telekeçilerine ynanyldy. Gahryman Arkadagymyz häzirki döwürde türkmen telekeçileriniň, ähli ugurlarda bolşy ýaly, gurluşyk ulgamynda we binalaryň içki bezeginde-de işjeňlik görkezýändiklerini nygtap, meýilleşdirilen ähli işleriň ýokary hilli, kesgitlenen möhletlerde ýerine ýetirilmeginiň wajyp wezipe bolup durýandygyna ünsi çekdi. Şunda binanyň enjamlaşdyrylyşy bilen bir hatarda, onuň bezeginiň, toplumda goýuljak mebelleriň we olaryň reňkleriniň sazlaşygyna hem möhüm ähmiýet berilmelidir.

Mälim bolşy ýaly, halkara çärelere görülýän taýýarlyk işleriniň ählisi hormatly Prezidentimiziň yzygiderli gözegçiliginde saklanylýar diýip, Milli Liderimiz aýtdy we bu işlere dahylly düzümleriň sazlaşykly işiniň üpjün edilmelidigini belledi. Munuň özi işleriň netijeli häsiýete eýe bolmagyny üpjün eder.

Gahryman Arkadagymyz öňde boljak halkara forumyň çäklerinde toplumyň çägindäki halkara derejeli sergileriň geçiriljek künjeginde alnyp barylýan işler bilen hem tanyşdy. Milli Liderimiz guraljak halkara sergide halkymyzyň taryhyň dowamynda döreden milli gymmatlyklarynyň öz beýanyny tapmalydygyny aýdyp, degişli ýolbaşçylara maslahatlaryny berdi.

Halk Maslahatynyň Başlygy giň möçberli forumyň köpugurly häsiýete eýe bolmagyna, onuň ýokary guramaçylyk derejesiniň üpjün edilmegine zerur üns berilmelidigini belläp, bu çäräniň halkara hyzmatdaşlygyň möhüm ugruny emele getirýändigini we giň möçberli serginiň forumyň many-mazmun taýdan baýlaşmagyny üpjün etjekdigini aýtdy. Munuň özi ýurdumyzyň ähli düzümleriniň ösüşiniň, ykdysadyýetiň pudaklarynyň, önümçilik düzümleriniň kuwwatynyň we halkymyzyň ýokary durmuş derejesiniň aýdyň beýanyna öwrülmelidir.

Türkmen halkynyň Milli Lideri meýilleşdirilen işleri ýokary derejede alyp barmakda hemmelere üstünlikleri arzuw edip, bu ýerden ugrady.

Gahryman Arkadagymyz dikuçarda “Awaza” milli syýahatçylyk zolagynyň ýokarsyndan öwrüm edip, bu ýerde alnyp barylýan işler, Hazaryň kenarynyň tebigy aýratynlyklaryny we öz çägini giňeldýän syýahatçylyk zolagynyň täze binalary, ýerine ýetirilýän gurluşyk işleri bilen tanyşdy.

Soňky ýyllarda Hazaryň kenarynda giň gerimli halkara çäreler yzygiderli guralýar. Munuň özi häzirki döwrüň möhüm meselelerini ara alyp maslahatlaşmak, sebitara hem-de halkara hyzmatdaşlygy pugtalandyrmak ýaly meseleleri öz içine alýan we degişli çözgütleri kabul etmäge ukyply forumlaryň uly ähmiýete eýedigini görkezýär. Şunuň bilen baglylykda, Hazaryň kenarynda düýpli özgertmeler üstünlikli durmuşa geçirilýär. Bu bolsa ykdysadyýetimiziň we jemgyýetiň sazlaşykly ösüşine gönükdirilen başlangyçlaryň öňe sürülmegini şertlendirýär. Şunda Hazaryň kenarynyň ekologik ýagdaýyna döwlet derejesinde ähmiýet berilýändigini bellemek gerek. Mälim bolşy ýaly, Türkmenistan ekologiýa meseleleri boýunça başlangyçlara uly ähmiýet berýär hem-de döwletleriň we halkara guramalaryň bu babatdaky tagallalarynyň birleşdirilmeginiň wajypdygyna ünsi çekýär.

Hazaryň kenarynyň ösümlik we haýwanat dünýäsiniň görnüşleri, bu ýerde täsin guşlaryň gyşlamagy Awazanyň ekologik derejesiniň ýokarydygyna şaýatlyk edýär. Deňiz ýakasynyň tebigatynyň Awazanyň binagärlik keşbi bilen bir bitewi sazlaşygy emele getirmegi bu ýerde dynç alýanlaryň ruhubelentligini üpjün edýär. Hazaryň kenarynda hormatly Prezidentimiziň we Gahryman Arkadagymyzyň tagallalary netijesinde durmuşa geçirilýän işler bu künjegiň sazlaşykly ösüşine hemmetaraplaýyn goldaw bermäge gönükdirilendir.

Häzirki döwürde bu ýerde hormatly Prezidentimiziň gatnaşmagynda gurluşygyna badalga berlen Türkmenbaşy — Garabogaz — Gazagystanyň serhedi awtomobil ýolunyň gurluşygy batly depginde dowam edýär. Munuň özi ýurdumyzda Gahryman Arkadagymyzyň başyny başlan giň möçberli özgertmeleriniň Arkadagly Gahryman Serdarymyzyň baştutanlygynda üstünlikli amala aşyrylmagy esasynda milli ulag-logistika ulgamynyň ösdürilmegi ugrunda yzygiderli tagalla edilýändigini görkezýär. Soňky ýyllarda ýurdumyzda halkara ähmiýetli ulag ýollarynyň gurluşygyna möhüm ähmiýet berilýär. Bu bolsa Garaşsyz, hemişelik Bitarap Türkmenistanyň halkara ulag geçelgesi hökmünde eýeleýän derejesini pugtalandyrýar.

Milli Liderimiz dikuçardan halkara ulag geçelgesiniň gurluşygynda alnyp barylýan işleri synlady. Ýurdumyzda kesgitlenen wezipelere laýyklykda, ýollaryň gurluşygy häzirki zamanyň ösen tejribeleri we täzeçil usullar esasynda alnyp barylýar. Bu bolsa ýol gurluşygynyň ýokary hil derejesiniň üpjün edilmegini şertlendirýär. Şeýlelikde, ýurdumyzyň dürli künjeklerinde bolşy ýaly, Balkan welaýatynyň çäklerinde-de döwrüň talaplaryna we ýokary halkara görkezijilere doly laýyk gelýän ýollaryň gurluşygyna döwlet derejesinde ähmiýet berilýär.

Soňra Gahryman Arkadagymyz Awazanyň önümçilik toplumlaryny synlady. Şunda Awazanyň ýokary kuwwatly elektrik bekediniň sazlaşykly işiniň ýola goýulmagy Hazar deňziniň kenaryndaky önümçilikleriň, şypahana düzümleriniň, myhmanhanalaryň, ýaşaýyş jaýlarynyň elektrik energiýasy bilen bökdençsiz üpjün edilmeginiň baş şertini emele getirýär.

Häzirki döwürde Türkmenbaşy Halkara deňiz porty ýurdumyzyň üstaşyr ulag geçelgesi hökmündäki derejesini berkidýän düzüme öwrüldi. Munuň özi Türkmenistanyň halkara giňişlikde ählumumy arabaglanyşygy üpjün etmekde möhüm orun eýeleýändigini görkezýär. Şunuň bilen baglylykda, ulag-logistika düzüminiň işine häzirki zamanyň ösen tejribesi işjeň ornaşdyrylýar. Türkmenbaşy Halkara deňiz portunyň mümkinçilikleriniň ählumumy derejede peýdalanylmagyna giň ýol açýar. Bu bolsa sebit hyzmatdaşlygyny pugtalandyrmaga, söwda dolanyşygyny işjeňleşdirmäge ýardam berýär. “Awaza” milli syýahatçylyk zolagynda ählumumy arabaglanyşygy ösdürmekde wajyp orun eýeleýän ýokary derejeli halkara çäreleriň guralmagy dünýä ýurtlarynyň we halklaryň umumy bähbidini nazarlaýar.

Ýurdumyzyň ähli welaýatlary bilen bir hatarda, Balkan welaýatynyň önümçilik toplumlarynda alnyp barylýan işleriň hem depgini barha ýokarlanýar. Şunuň bilen baglylykda, hormatly Prezidentimiziň yzygiderli tagallasy netijesinde himiýa senagatynyň işi kämilleşdirilýär. Gahryman Arkadagymyzyň Balkan welaýatyna şu gezekki iş saparynda “Garabogazkarbamid” zawodynyň işiniň talabalaýyk alnyp barylmagy bilen baglanyşykly meselelere hem üns berildi.

Häzirki wagtda “Garabogazkarbamid” kärhanasynda önümçiligiň depginini ýokarlandyrmak, kärhananyň eksport mümkinçiliklerini artdyrmak boýunça toplumlaýyn işler amala aşyrylýar. Munuň özi himiýa senagatynyň sazlaşykly ösüşiniň üpjün edilmeginde, milli ykdysadyýetimiziň kuwwatlanmagynda ähmiýetlidir.

Şeýle hem Türkmenbaşy Halkara deňiz portunyň ähli düzümlerinde ýyllyk meýilnamany üstünlikli ýerine ýetirmek ugrunda tagalla edilýär. Ýurdumyzyň halkara ulag geçelgesi hökmünde ykrar edilen deňiz portunyň işi häzirki zaman talaplaryna laýyk derejede alnyp barylýar. Portuň ähli düzümleriniň sazlaşykly işiniň üpjün edilmegi halkara ýükleri daşamak we ýolagçy gatnatmak boýunça kesgitlenen wezipeleriň üstünlikli amala aşyrylmagyny şertlendirýär. Portuň işine ösen tejribeler, sanly tehnologiýalar işjeň ornaşdyrylýar. Bu bolsa ýerine ýetirilýän işleriň talabalaýyk bolmagyny we ýurdumyzda halkara hyzmatdaşlygyň ösüşiň täze derejesine çykmagyny üpjün edýär. Şunuň bilen baglylykda, deňiz portunda alnyp barylýan işleriň depginini ýokarlandyrmak, halkara ulag geçelgesiniň işini kämilleşdirmek boýunça hormatly Prezidentimiziň beren tabşyryklaryny üstünlikli durmuşa geçirmek bilen bagly işler oňyn netijesini berýär.

Gahryman Arkadagymyz uçuşy tamamlap, Türkmenbaşy şäheriniň Halkara howa menziline geldi we bu ýerden paýtagtymyza tarap ugrady. Biraz wagtdan Milli Liderimiziň uçary Aşgabadyň Halkara howa menziline gelip gondy.

Türkmenistanyň Prezidentiniň Russiýa Federasiýasyna iş sapary tamamlandy

Sankt-Peterburg — Aşgabat, 22-nji dekabr (TDH). Şu gün hormatly Prezidentimiz Serdar Berdimuhamedow Russiýa Federasiýasyna iş saparynyň çäklerinde Garaşsyz Döwletleriň Arkalaşygyna gatnaşyjy ýurtlaryň döwlet Baştutanlarynyň ýokary derejeli resmi däl duşuşygyna gatnaşdy.

Hemişelik Bitarap Türkmenistan Garaşsyz Döwletleriň Arkalaşygynyň assosirlenen agzasy bolmak bilen, Arkalaşygyň çäklerinde giň möçberli energetika we logistika taslamalaryny durmuşa geçirip, özara bähbitli ykdysady hyzmatdaşlygy pugtalandyrýar. Ýurdumyz GDA-nyň giňişliginde ulag-kommunikasiýa arabaglanyşygyna aýratyn üns berýär. Bütindünýä durnukly ulag gününi yglan etmek baradaky başlangyjy öňe süren ýurt hökmünde Türkmenistan Arkalaşygyň ýurtlarynyň çäklerinden geçýän Demirgazyk — Günorta, Gündogar — Günbatar ulag geçelgelerini ösdürmek ugrunda çykyş edýär. Türkmenistanyň Hazar deňzi sebitini kuwwatly ulag merkezine öwürmek boýunça başlangyçlary dostlukly döwletleriň arasynda söwda gatnaşyklaryny pugtalandyrmaga, harytlary Günorta Aziýanyň we Ýewropanyň bazarlaryna çykarmaga ýardam berýär.

Ynsanperwer we ekologiýa ulgamlary hem Türkmenistanyň GDA-nyň çäklerindäki gün tertibinde möhüm orny eýeleýär. Ýurdumyz Aral meselesini çözmäge işjeň gatnaşyp, «ýaşyl» diplomatiýa, howanyň üýtgemegine uýgunlaşmak bilen bagly başlangyçlary öňe sürýär. Türkmenistanyň şäherleriniň birnäçe gezek «Arkalaşygyň medeni paýtagty» diýlip yglan edilmegi bolsa Türkmenistanyň özara hormat goýmak, umumy taryhy mirasy gorap saklamak arkaly halklaryň arasyndaky dostlugy pugtalandyrýandygyny, medeniýetara dialoga açykdygyny görkezýär.

Türkmenistan bilen Russiýa Federasiýasynyň arasyndaky gatnaşyklar özara hormat goýmak we köpasyrlyk dostluk ýörelgelerine esaslanýan strategik hyzmatdaşlygyň aýdyň nusgasydyr. Türkmenistanyň hemişelik Bitaraplygynyň 30 ýyllygy dabaraly bellenilýän 2025-nji ýylda ikitaraplaýyn dialog hil taýdan täze derejä çykaryldy. Halkara parahatçylyk we ynanyşmak forumyna gatnaşmak maksady bilen, Russiýanyň Prezidenti Wladimir Putiniň ýurdumyza amala aşyran sapary iki ýurduň hem özara hyzmatdaşlygy çuňlaşdyrmaga ygrarlydygyny tassyklan ähmiýetli waka boldy.

Söwda-ykdysady ulgam ikitaraplaýyn hyzmatdaşlygyň binýady bolup çykyş edýär. Häzirki wagtda özara haryt dolanyşygynyň yzygiderli artmagy munuň aýdyň mysalydyr. Ulag-logistika hyzmatdaşlygy hem strategik ähmiýete eýe. Demirgazyk — Günorta halkara ulag geçelgesiniň ugrunda ýerleşýän ýurdumyz bu günki gün Ýewraziýanyň üstaşyr ulag merkezine öwrülýär. Demir ýol infrastrukturasyny ösdürmek, logistikany sanlylaşdyrmak, Türkmenbaşy Halkara deňiz portunyň kuwwatlyklaryny giňeltmek boýunça bilelikdäki tagallalar GDA ýurtlaryna Hind ummany we Pars aýlagy ýurtlarynyň bazarlaryna çykmaga mümkinçilik berýär. Bu hyzmatdaşlyk sebitiň geografik artykmaçlyklaryny ykdysady abadançylygyň anyk guralyna öwürýär. Ynsanperwer ulgamdaky hyzmatdaşlyk iki ýurduň halklaryny birleşdirýän köpri bolup hyzmat edýär. Şunda ylym we bilim ulgamlaryna aýratyn orun degişlidir.

Türkmenistan bilen Russiýanyň arasyndaky syýasy hyzmatdaşlyk ynanyşmagyň ýokary derejesi bilen tapawutlanýar. Russiýa Türkmenistanyň hemişelik Bitaraplyk syýasatyny yzygiderli goldap, onuň Merkezi Aziýada durnuklylygy pugtalandyrmagyň esasy şerti hökmünde eýeleýän möhüm ornuny ykrar edýär.

...Ir bilen hormatly Prezidentimiz Serdar Berdimuhamedow GDA gatnaşyjy ýurtlaryň döwlet Baştutanlarynyň ýokary derejeli resmi däl duşuşygynyň geçirilýän ýerine — Döwlet “Ermitaž” muzeýine geldi. Bu ýerde hormatly Prezidentimizi Russiýa Federasiýasynyň Prezidenti Wladimir Putin mähirli garşylady. Sammitiň öňüsyrasynda oňa gatnaşýan döwlet Baştutanlary «Ermitaž» muzeýine aýlanyp gördüler.

Döwlet Baştutanlary, ilki bilen, muzeýiň birinji gatynda ýerleşýän «Altyn hazyna» zalyna baryp gördüler. Bu ýerde antik döwrüň zergärleriniň ýasan altyn şaý-sepleri görkezilýär. Şolaryň hatarynda gadymy skif halkyna degişli bolan iki müň ýyllyk altyn önümler nepisligi bilen haýran galdyrýar. Ikinji gatda ýerleşýän Orta Aziýa zalynda Beýik Ýüpek ýolunyň taryhy bilen tanyşmak bolýar. Ekspozisiýa asyrlaryň dowamynda medeniýetleriň arasynda kemala gelen gatnaşyklar bilen tanyşmaga mümkinçilik berýär. Gadymy döwürlerde ýurtlary we halklary birleşdiren Beýik Ýüpek ýoly diňe bir özara bähbitli söwda gatnaşyklaryny alyp barmakda däl, eýsem, medeni dialogy yzygiderli ösdürmekde hem özboluşly köpri bolup hyzmat edipdir. Bu söwda ýolunyň merkezinde ýerleşýän türkmen topragy Gündogar bilen Günbatary baglanyşdyrypdyr. Ýükli kerwenler ýurdumyzyň üstünden Ýakyn Gündogar we Ýewropa ýurtlaryna geçipdirler. Bu ýoluň ugrunda ýerleşýän Merw, Köneürgenç, Nusaý ýaly şäherler möhüm ylmy we medeni merkezler bolupdyr.

Soňra dostlukly ýurtlaryň Liderleri Beýik Britaniýanyň we Fransiýanyň sungaty bilen tanyşdyrýan zallara aýlanyp gördüler. Bu ýerde Günbataryň meşhur suratkeşleriniň, heýkeltaraşlarynyň eserleri bilen tanyşmak bolýar.

Soňra döwlet Baştutanlary «Leonardo da Winçi» zalyna baryp gördüler. Bu ýerde Ýewropanyň Gaýtadan döreýiş döwrüniň beýik ussadynyň 20-den gowrak eseri saklanýar. Bu sungat eserleri çeperçilik ussatlygy we çuňňur many-mazmuny bilen tapawutlanýar.

Muzeý bilen tanyşlyk tamamlanandan soňra, GDA gatnaşyjy ýurtlaryň döwlet Baştutanlarynyň ýokary derejeli resmi däl duşuşygy geçirildi. RF-niň Prezidenti Wladimir Putin duşuşygy açyp, oňa gatnaşyjylary ýene-de bir gezek mähirli mübärekledi hem-de resmi däl sammite gatnaşmak üçin Sankt-Peterburga gelmäge çakylygy kabul edendikleri üçin hemmelere hoşallyk bildirdi.

Sammitiň dowamynda şu ýyl Arkalaşygyň çäklerinde ýerine ýetirilen işleriň netijelerine syn berildi, hyzmatdaşlygyň ileri tutulýan ugurlary hem-de geljek üçin wezipeler kesgitlenildi. Ykdysady hyzmatdaşlygyň oňyn görkezijileri kanagatlanma bilen bellenildi. Şeýle hem sebit we ählumumy gün tertibiniň möhüm meseleleri boýunça pikir alşyldy. Prezident Wladimir Putin 2026-njy ýylda Türkmenistanyň GDA-da başlyklyk etmegi mynasybetli döwlet Baştutanymyzy gutlady we üstünlikleri arzuw etdi.

Arkalaşygyň ýurtlarynyň hoşmeýilli erke, özara hormat goýmaga, ynanyşmaga esaslanýan deňhukukly özara bähbitli hyzmatdaşlyga üýtgewsiz ygrarlydyklary nygtaldy. Şu gezekki duşuşyk hem GDA ýurtlarynyň netijeli hyzmatdaşlygy häzirki döwrüň talaplaryna laýyk gelýän täze derejä çykarmagy maksat edinýändikleriniň güwäsidir. Russiýa Federasiýasynyň Prezidenti mümkinçilikden peýdalanyp, GDA gatnaşyjy ýurtlaryň ähli raýatlaryna ýetip gelýän Täze ýyl baýramy mynasybetli tüýs ýürekden gutlaglaryny we iň gowy arzuwlaryny beýan etdi.

Bu ýerde belent mertebeli myhmanlaryň hormatyna Russiýa Federasiýasynyň Prezidentiniň adyndan resmi däl günortanlyk nahary berildi. Şeýle hem döwlet Baştutanlary “Ermitaž” muzeýinde konserte tomaşa etdiler.

Russiýa Federasiýasyna iş saparynyň maksatnamasy tamamlanandan soňra, hormatly Prezidentimiz Serdar Berdimuhamedow Sankt-Peterburg şäheriniň «Pulkowo» Halkara howa menziline bardy we bu ýerden Watanymyza ugrady. Aşgabadyň Halkara howa menzilinde döwlet Baştutanymyzy ýurdumyzyň resmi adamlary garşyladylar.

Şeýlelikde, hormatly Prezidentimiziň Garaşsyz Döwletleriň Arkalaşygyna gatnaşyjy ýurtlaryň döwlet Baştutanlarynyň ýokary derejeli resmi däl duşuşygyna gatnaşmagy ýurdumyzyň açyk we özara hormat goýmak dialogyna ygrarlydygynyň nobatdaky aýdyň beýany boldy. Resmi däl görnüşde geçen sammit tamamlanyp barýan ýylyň jemlerini jemlemek bilen bir hatarda, dürli ulgamlarda bilelikdäki täze başlangyçlar üçin binýat goýmaga hem mümkinçilik berdi. GDA-nyň assosirlenen agzasy hökmünde Türkmenistan üçin şeýle meýdança sebitde parahatçylyk döredijilikli başlangyçlary ilerletmekde möhüm gural bolup durýar.

Tokio, 20-nji dekabr (TDH). Hormatly Prezidentimiz Serdar Berdimuhamedow iş saparynyň çäklerinde Ýaponiýanyň Premýer-ministri Sanae Takaiti bilen duşuşdy.

Premýer-ministr Sanae Takaiti döwlet Baştutanymyzy mähirli mübärekläp, Ýaponiýa sapar bilen gelmäge çakylygy kabul edendigi üçin hoşallyk bildirdi hem-de bu duşuşygyň iki ýurduň arasyndaky dostluk, özara hormat goýmak, deňhukuklylyk ýörelgelerine esaslanýan hyzmatdaşlygyň pugtalandyrylmagynda möhüm ähmiýete eýe boljakdygyna ynam bildirdi. Şeýle hem ol Ýaponiýa bilen Türkmenistanyň arasyndaky gatnaşyklaryň häzirki ýagdaýynyň okgunly häsiýetini belläp, şunda yzygiderli amala aşyrylýan ýokary derejedäki saparlara aýratyn ornuň degişlidigini aýtdy.

Hormatly Prezidentimiz çakylyk we bildirilen myhmansöýerlik üçin minnetdarlyk bildirip, Sanae Takaitini Ýaponiýanyň Premýer-ministri wezipesine saýlanylmagy bilen ýene-de bir gezek gutlady we alyp barýan döwlet işinde üstünlikleri arzuw etdi we pursatdan peýdalanyp, türkmen halkynyň Milli Lideri Gahryman Arkadagymyzyň mähirli salamyny, iň gowy arzuwlaryny beýan etdi. Döwlet Baştutanymyz Ýaponiýanyň Premýer-ministrini “EKSPO — 2025” Bütindünýä sergisiniň üstünlikli geçmegi bilen hem tüýs ýürekden gutlady.

Duşuşygyň dowamynda bellenilişi ýaly, Türkmenistan Ýaponiýa bilen köpugurly, uzak möhletleýin gatnaşyklaryň ösdürilmegine möhüm ähmiýet berýär. Bu gatnaşyklar özara hormat goýmaga, ynanyşmaga, açyklyga esaslanýar. Şunuň bilen baglylykda, hormatly Prezidentimiz ýurdumyzyň hyzmatdaşlygyň häzirki ýeten derejesine ýokary baha berýändigini we türkmen-ýapon dialogyny ileri tutulýan ugurlar boýunça mundan beýläk-de ösdürmäge taýýardygyny aýtdy.

Ýurtlarymyzyň arasyndaky syýasy-diplomatik gatnaşyklar netijeli ösdürilýär. Türkmenistan we Ýaponiýa diňe bir ikitaraplaýyn görnüşde däl-de, eýsem, halkara guramalaryň, hususan-da, Birleşen Milletler Guramasynyň çäklerinde-de üstünlikli hyzmatdaşlyk edýärler hem-de parahatçylygy, durnukly ösüşi üpjün etmek boýunça birek-biregiň başlangyçlaryny yzygiderli goldaýarlar. Soňky ýyllarda parlamentara gatnaşyklar hem işjeňleşdirilýär. Parlamentara dostluk toparlarynyň döredilmegi döwletara gatnaşyklary pugtalandyrmakda wajyp ädime öwrüldi.

Söwda-ykdysady ugur türkmen-ýapon hyzmatdaşlygynyň möhüm bölegidir. Tebigy gaz, energetika we ulag ulgamynda durmuşa geçirilýän bilelikdäki taslamalar munuň aýdyň mysalydyr. Şunuň bilen baglylykda, hormatly Prezidentimiz Ýaponiýa şu gezekki iş saparynyň dowamynda gol çekilen ikitaraplaýyn resminamalaryň ähmiýetini belledi. Döwlet Baştutanymyz öňdebaryjy ýapon kompaniýalary bilen bilelikdäki işiň toplanan oňyn tejribesine esaslanyp, ýurdumyzyň bu hyzmatdaşlygy mundan beýläk-de ösdürmegi maksat edinýändigini aýtdy.

Medeni-ynsanperwer ugur hem türkmen-ýapon gatnaşyklarynyň aýrylmaz bölegi bolup çykyş edýär. Şunda ylym-bilim, sport ulgamlaryndaky hyzmatdaşlyga, medeni alyşmalara aýratyn üns berilýär. Şeýle hem Türkmenistanyň we Ýaponiýanyň ýokary okuw mekdepleriniň arasyndaky hyzmatdaşlyk netijeli ösdürilýär. Şunuň bilen baglylykda, söhbetdeşler bu ugurdaky gatnaşyklary uzak möhletleýin esasda mundan beýläk-de pugtalandyrmagyň zerurdygyny bellediler.

Premýer-ministr Sanae Takaiti Ýaponiýanyň Türkmenistanyň hemişelik Bitaraplyk hukuk derejesine esaslanýan parahatçylyk söýüjilikli daşary syýasatyna ýokary baha berýändigini we ýurdumyza Merkezi Aziýada durnuklylygy, abadançylygy üpjün etmekde möhüm orun eýeleýän ygtybarly hyzmatdaş hökmünde garaýandygyny aýtdy we pursatdan peýdalanyp, Gahryman Arkadagymyza salamyny, iň gowy arzuwlaryny beýan etdi.

Duşuşygyň ahyrynda hormatly Prezidentimiz we Ýaponiýanyň Premýer-ministri bilelikdäki tagallalaryň netijesinde Türkmenistan bilen Ýaponiýanyň arasyndaky dostlukly gatnaşyklaryň, özara bähbitli hyzmatdaşlygyň mundan beýläk-de pugtalandyryljakdygyna ynam bildirip, birek-birege iň gowy arzuwlaryny beýan etdiler. Türkmenistanyň Prezidenti Serdar Berdimuhamedow bilen Ýaponiýanyň Premýer-ministri Sanae Takaitiniň arasynda geçirilen ýokary derejeli duşuşygyň netijesi boýunça bilelikdäki Metbugat Beýanaty kabul edildi.