Etrap, şäher saýlaw toparlary döredildi
Balkan welaýatynyň etrap, şäher saýlaw toparlarynyň ygtyýarlyk möhletiniň tamamlanandygy sebäpli, olar täzeden döredildi. Türkmenistanyň Saýlaw kodeksiniň 18-nji maddasyna laýyklykda, etrap, şäher saýlaw toparlarynyň düzümine agzalyga wekilleri hödürlemek işleri syýasy partiýalaryň, jemgyýetçilik birleşikleriniň welaýat we etrap, şäher guramalarynyň mejlislerinde, şeýle hem raýatlar toparlarynyň ýygnaklarynda guramaçylykly amala aşyryldy. Etrap, şäher saýlaw toparlarynyň düzümine wekil hödürlemek boýunça mejlisler we ýygnaklar demokratik ýörelgeler esasynda, aýanlyk, açyklyk ýagdaýynda geçirilip, olarda saýlaw toparynyň düzümine hödürlenýänleriň çäklendirilmedik sany ara alnyp maslahatlaşyldy. Şeýlelikde, Balkan welaýaty boýunça Balkanabat, Türkmenbaşy şäher we Bereket, Esenguly, Etrek, Magtymguly, Gyzylarbat, Türkmenbaşy etrap hem-de Türkmenbaşy şäheriniň Awaza etrap saýlaw toparlarynyň täze düzümine agzalyga jemi 99 wekil hödürlenildi. Türkmenistanyň Saýlaw kodeksiniň 32-nji maddasyna laýyklykda, etrap, şäher saýlaw toparlarynyň düzümine agzalyga wekil hödürlemek hakyndaky syýasy partiýalaryň, jemgyýetçilik birleşikleriniň mejlisleriniň we raýatlar toparlarynyň ýygnaklarynyň beýanlary esasynda etrap, şäher saýlaw toparlary Balkan welaýat saýlaw topary tarapyndan täzeden döredildi. Bu saýlaw toparlaryny täzeden döretmek işleri Merkezi saýlaw topary tarapyndan tassyklanylan meýilnama esasynda bellenilen möhletde guramaçylykly geçirildi. Türkmenistanyň Saýlaw kodeksiniň 19-njy maddasyna laýyklykda, etrap, şäher saýlaw toparlarynyň agzalarynyň täze düzümi birinji mejlisini geçirip, onda toparyň başlygyny, başlygynyň orunbasaryny we kätibini saýlady. Balkan welaýat saýlaw topary hem öz geçiren mejlisinde etrap, şäher saýlaw toparlarynyň täze düzümini tassyklady we olaryň agzalaryna şahsyýetnamalary dabaraly ýagdaýda gowşurdy.
Saparmyrat Işanow, welaýat Baş maliýe we ykdysadyýet müdirliginiň Flot gözegçiligi bölüminiň başlygy-port kapitany, welaýat saýlaw toparynyň başlygynyň orunbasary