Türkmenistanyň Prezidentiniň 2019-njy ýylyň 27-nji iýunyndaky 1294 belgili «Balyk tutmagy we suwuň bioserişdelerini gorap saklamagy düzgünleşdirmek hakynda» Kararyna laýyklykda, Türkmenistanyň Senagat we kommunikasiýa ministrliginiň “Türkmensenagat” agentliginiň Türkmenistanyň Döwlet balyk goraýyş müdirligi Türkmenistanyň Maliýe we ykdysadyýet ministrliginiň ýanyndaky Ykdysadyýeti töwekgelçiliklerden goramak Agentliginiň garamagyna berildi. Täze döredilen düzüm hem-de ol Türkmenistanyň Maliýe we ykdysadyýet ministrliginiň ýanyndaky Ykdysadyýeti töwekgelçiliklerden goramak Agentliginiň Döwlet balyk goraýyş we suwuň bioserişdelerine gözegçilik müdirligi diýip atlandyryldy. 2011-nji ýylyň 21-nji maýynda kabul edilen “Balyk tutmak we suwuň bioserişdelerini gorap saklamak hakynda” Türkmenistanyň Kanunyna laýyklykda, Döwlet balyk goraýyş we suwuň bioserişdelerine gözegçilik müdirliginiň öňünde ýurdumyzyň balyk hojalyk ähmiýetli suw desgalarynda gymmatly suw bioserişdelerini gorap saklamak boýunça möhüm wezipeler kesgitlenildi.

Müdirligiň esasy wezipeleri bolup:

• Suwuň bioserişdeleriniň goragyny, şeýle hem balyk hojalyk ähmiýetli suw desgalarynda balyk goraýyş we balyk tutmagyň düzgünleriniň berjaý edilişini gözegçilikde saklamak;
• Balyk hojalyk ähmiýetli suw desgalarynda balyk goraýyş we balyk tutmagyň düzgünleriniň berjaý edilmänligi üçin wezipeli adamlara we raýatlara Türkmenistanyň kanunçylygy bilen bellenilen tertipde administratiw temmileri ulanmak;
• Balyk hojalyk suw howdanlarynyň berkidilmegi we balyk tutulýan uçastoklaryň ulanyjylara bölünip berilmegi hakyndaky teklipleri bellenilen tertipde işläp taýýarlamak;
• Balyk we suw haýwanlarynyň gorlaryny köpeltmek, olary emeli usulda köpeltmek we uýgunlaşdyrmak, balyk hojalyk meliorasiýasy we suw howdanlaryna balyk goýbermek boýunça işleri guramagy we geçirmegi amala aşyrmak;
• Balyk hojalyk ähmiýetli suw desgalarynyň hasabyny ýöretmek we olaryň ulanylyşyna gözegçiligi amala aşyrmak;
• Balyk hojalygyny alyp barmagyň we köl harytlyk hem-de beýleki medeni balyk hojalyklaryny döretmegiň şertleri hakynda suwuň bioserişdelerinden peýdalanyjylar (mundan beýläk – peýdalanyjylar) bilen şertnamalar baglaşmak;
• höwesjeň, sport maksatly balyk tutmagy we medeni balyk hojalyklaryny guramak üçin suw howdanlaryny ýa-da suw howdanlarynyň uçastoklaryny kesgitlemek;
• Geçirilen ylmy-barlag işleriniň esasynda suwuň bioserişdelerini tutmaga rugsat edilýän umumy möçberini kesgitlemek;
• Suwuň bioserişdeleriniň gorlarynyň goragyny we üznüksiz köpelmegini üpjün etmek maksady bilen balyk hojalyk ähmiýetli suw desgasynda we kenarýaka gorag zolagynda öz işlerini amala aşyrýan kärhanalaryň we beýleki hojalygy ýörediji subýektleriň gurluşyk, durkuny täzelemek, tehniki taýdan enjamlaşdyrmak boýunça taslamalarynyň döwlet ekologik seljermesini geçirmek;
• Partlama, seýsmiki gözleg, düýbüni çuňlaşdyryş we gurluşyk işlerini geçirmek üçin rugsatlary bermek;
• Balyk hojalyk ähmiýetli suw desgalaryndan çykarylan topragyň döküljek ýerlerini ylalaşmak;
• Degişli rugsatnamalary bolmazdan amala aşyrylýan işleri togtatmak;
• Suwuň desgalarynyň döwlet kadastryny alyp barmaklygy amala aşyrmak;
• Türkmenistanyň ýuridik we fiziki şahslarynyň kiçi göwrümli, motorly, ýelkenli, özi ýöremeýän (harby gämilerden başga) ähli gämilerini hasaba almak, hasabyny ýöretmek hem-de olary ulanmak bilen baglanyşykly beýleki işleri amala aşyrmak;
• Suwuň bioserişdelerinden peýdalanylanlygy üçin tölegleri almagyň tertibini işläp taýýarlamak we Türkmenistanyň Maliýe we ykdysadyýet ministrliginde tassyklamaga bermek;
• Suwuň bioserişdelerini goramak we rejeli peýdalanmak boýunça ilat arasynda bilimleri ündemegi amala aşyrmak;
• Türkmenistanyň kanunçylygy bilen öz ygtyýarlygyna degişli edilen beýleki meseleleri çözmekden ybarat bolup durýar.

Türkmenistanyň Prezidenti tarapyndan 2019-njy ýylyň 30-njy noýabrynda gol çekilen “Işiň aýry-aýry görnüşlerini ygtyýarlylandyrmak hakynda” Türkmenistanyň Kanunyna laýyklykda, 2020-nji ýylyň 1-nji aprelinden balyk tutmak we beýleki suw haýwanlaryny awlamak bilen bagly iş görnüşi işiň ygtyýarlylandyrylýan görnüşleriniň sanawyndan aýryldy.