Täze döwrüň basgançagynda
Hormatly Prezidentimiziň parasatly baştutanlygynda Garaşsyz, baky Bitarap Watanymyz syýasatda, ykdysadyýetde uly ösüşlere, üstünliklere beslenýär. Şanly ýylymyzyň taryhy wakalary il-günümizde ýokary ruhubelentligi döredýär. Arkadag Serdarly bagtyýar ýaşlar ýylymyzda hem ähli ugurlarda bolşy ýaly, ätiýaçlandyryş ulgamynyň ösüşleri hem uly üstünliklere, zähmet ýeňişlerine beslenýär.
Türkmenistanyň Döwlet ätiýaçlandyryş guramasy we onuň garamagyndaky döwlet ätiýaçlandyryş guramalary ähli müşderiler üçin ygtybarly hyzmatdaş bolup durýar. Töwekgelçilikler dünýäsinde ätiýaçlandyryş şahadatnamasy bilen goralmak biziň her birimiz üçin iň gowy we amatly ýoldur. Döwletimiziň ätiýaçlandyryş ulgamynda özgertmeler örän wajypdyr, sebäbi örän çalt ösýän ýurdumyz ähli pudaklarda halkara standartlaryny hasaba alýar. Biziň ýurdumyzda amala aşyrylýan durmuş-ykdysady özgertmeler ätiýaçlandyryş işiniň netijeliliginiň ösmegine ýardam edýär. Türkmenistanyň Döwlet ätiýaçlandyryş guramasy ätiýaçlandyryş babatynda döwlet syýasatyny durmuşa geçirmek bilen fiziki we ýuridik şahslary dürli töwekgelçiliklerden goramak boýunça yzygiderli işleri amala aşyrýar. Şu maksat bilen ätiýaçlandyryşyň täze usullary ornaşdyrylýar. Döwletiň ätiýaçlandyryş syýasatyny durmuşa geçirmek, fiziki we ýuridik şahslary emläk, şahsy bähbitleriniň ätiýaçlandyryş goragy bilen üpjün etmek ätiýaçlandyryş guramalarynyň esasy wezipeleriniň biri bolup durýar.
Arkadagly Gahryman Serdarymyza berk jan saglyk, uzak ömür, mähriban halkymyzyň bagtyýarlygynyň we abadançylygynyň, tutuş adamzadyň durnukly ösüşiniň bähbidine alyp barýan asylly işlerinde üstünlikleriň ýaran bolmagyny arzuw edýäris.
Maýsa NASYROWA.
Baýramaly şäheriniň döwlet ätiýaçlandyryş guramasynyň baş hünärmeni.
Durnukly ösüşiň kämil ugry
Hormatly Prezidentimiziň oýlanyşykly we öňdengörüjilikli ykdysady syýasaty Garaşsyz, Türkmenistanymyzyň milli ykdysadyýetiniň belent sepgitlere ýetmegine itergi berýär. Arkadag Serdarly bagtyýar ýaşlar ýylynda-da halk hojalygymyzyň dürli pudaklarynyň we beýleki ulgamlarynyň tehnologiki we tehniki binýadyny döwrebaplaşdyrmakda degerli işler durmuşa geçirilýär. Bu meselede sanly ykdysadyýetiň ösdürilmegi aýratyn ähmiýete eýe bolýar. Sebäbi, täze ulgam çylşyrymly önümçilik kuwwatlyklaryny dolandyrmakda, beýleki ulgamlary çalt depginlerde ösdürmekde orny uludyr. Şonuň üçinem Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasy üstünlikli durmuşa geçirilýär. Bu resminamada sanly ykdysadyýeti ösdürmegiň tapgyrlaýyn wezipeleri kesgitlenendir.
Sanly bilim ulgamyny şu günüň talabyna laýyk ösdürmekde ýurdumyzyň ýokary okuw mekdeplerinde täze ulgamyň esasynda bilim bermek işini sanlylaşdyrmakda uly işler durmuşa geçirilýär. Ýene bir bellemeli zat bolsa, okuw mekdepleriniň talyplara bilim bermek bilen bagly maglumatlaryň täzelenip hem-de täze maglumatlar bilen üstüniň ýetirilip durulmagy ýola goýuldy. Ylym-bilim ulgamynyň sanlylaşdyrylmagy köptaraplaýyn amatlyklary bilen tapawutlanýar. Institutymyzda kämil ulgamdan netijeli peýdalanylmagy talyplara bilim berip, hünär öwretmekde biz, mugallymlar üçinem bähbitli welin, talyp ýaşlar üçinem goşmaça amatlyklary ýatlamalydyrys. Bilim bermekde sanly ulgama geçilmeginiň giň gerime eýe bolmagy bu wajyp wezipäniň oňyn çözgüdine giň ýol açýar. Gürrüňi edilýän mesele babatdaky tagallalar Arkadag Serdarly bagtyýar ýaşlar ýylynda-da rowaçlanýar.
Nazar ATAÝEW.
TDEI-niň mugallymy.
Öndürijilikli işe goldaw
Milli ykdysadyýetimiziň gaz senagaty iri pudaklaryň biri bolup, döwlet Baştutanymyz bu pudagyň durnukly ösdürilmegine uly üns berýär. Pudagyň maddy-enjamlaýyn binýady döwrebaplaşdyrylýar. Gazçylaryň daşary ýurtlaryň ýokary öndürijilikli tehnikalary we enjamlary bilen üpjün edilmegi tebigy gazyň akymynyň artdyrylmagyna, mawy ýangyjyň gaýtadan işlenmegine bähbitli täsirini ýetirýär. Tehnologik ulaglar kärhanamyzyň işgärlerem gaz çykaryjylaryň döredijilikli zähmet çekmeklerine özleriniň saldamly goşantlaryny goşýarlar.
Kärhanamyzyň sürüjilerdir mehanizatorlary müdirligimiziň gaz çykaryjylaryna talaba laýyk hyzmat etmekde uly işleri bitirýärler. Kärdeşler arkalaşygy guramamyz tarapyndan zähmetsöýer adamlarymyzyň tutanýerli zähmeti çekmekleri üçin ähli tagallalar edilýär. Tehniki howpsuzlygynyň we zähmeti goramagy kadalarynyň berjaý edilişine berk gözegçilik howpsuz zähmetiň gazanylmagynyň özenini düzýär. Şeýle hem sürüjiler bilen geçirilýän hereket howpsuzlygyny üpjün etmäge gönükdirilen çärelerem möhüm wezipämiz. Şu tagallalarymyzyň gazçylarymyzyň iş we durmuş şertlerini gowulandyrmak bilen utgaşdyrylmagy gowy netijesini berýär. Işgärlerimiziň ýörite egin-eşikler, aýakgaplar bilen üpjün edilmegi ugrunda-da aladalanýarys. Zähmet adamlary hakdaky köptaraplaýyn yhlas-tagallalarymyz üstünliklere ýetirýär.
Wepa AKGAJYKOW.
“Marygazçykaryş” müdirliginiň 4-nji tehnologik ulaglar kärhanasynyň KA-nyň ilkinji guramasynyň başlygy.