Beýik ösüşlere beslenýän Watanymyz bedew bady bilen öňe barýar. Garaşsyz, hemişelik Bitarap Türkmenistan dünýäniň ösen ýurtlarynyň birine öwrüldi. Berkarar döwletiň täze eýýamynyň Galkynyşy döwründe bolup geçýän we jemgyýetiň ähli ugurlaryny gurşap alýan wakalar, oňyn özgertmeler watandaşlarymyzyň kalbyny buýsanja besleýär. Ykbal özgerdiji taryhy döwürde tutumly işlere badalga berilýär. 

Hormatly Prezidentimiz Serdar Berdimuhamedowyň tagallasy bilen ýaýbaňlandyrylýan işler döwletimiziň mundan beýläk-de okgunly ösmegini üpjün edýär, halkyň döredijilik mümkinçiliklerini açyp görkezýär.  

Türkmen halkynyň bagtyýar durmuş, ösüş üçin saýlap alan ýolunyň üstünlikleri üpjün edýändigini, ýurdumyzyň belent derejelere ýetendigini wagt görkezýär. Türkmen halky ýurdumyzy hemmetaraplaýyn ösdürmek we ilatyň ýaşaýyş-durmuş derejesini has-da ýokarlandyrmak boýunça başlangyçlary agzybirlik bilen goldaýar. Eziz Watanymyzda durmuşa geçirilýän özgertmeler, tutumly işler halkyň erk-isleginden, döwrüň talaplaryndan ugur alýar.  

Hormatly Prezidentimiz Serdar Berdimuhamedow halkymyzyň ynamyna we goldawyna daýanmak bilen, ýurdumyzy ösdürmek boýunça işleri giň gerim bilen ýaýbaňlandyrýar. Bu bolsa türkmenistanlylarda guwanç duýgusyny döredýär.  

Eziz Diýarymyzda «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynyň» üstünlikli durmuşa geçirilýän döwründe ylmyň iň täze gazananlary, iň gowy dünýä tejribesi esasynda beýik işler durmuşa ornaşdyrylýar.  

Ýurdumyzyň ykdysady kuwwatyny pugtalandyrmak, ilatyň ýaşaýyş-durmuş derejesini has-da ýokarlandyrmak, her bir ugurda ösüş gazanmak maksady bilen öňe sürülýän giň möçberli özgertmeler barha rowaç alýar. Ýurduň raýaty hökmünde biz döwletimiziň öňünde raýatlyk borjumyzyň uludygyna düşünýäris. Şol borçlaryň naýbaşysy eziz Diýarymyzyň has-da ösmegine öz mynasyp goşandymyzy goşmakdan ybaratdyr.  

Ýazgül HALMYRADOWA,

Türkmen döwlet maliýe institutynyň mugallymy.